رواية قتلهن الطيش وأحياهن الحب -14
هند ماينفهم كلامها من البكي: من طرف منيره
نور: ماني سامعه ولا فاهمه شي اسكتي شوي واهدي وتكلمي خليني افهم السالفه
هند تحاول تهدي صوتها وتتنحنح : ايوا
نور: ايه زين .. وش تقولين
هند : حسن طلع من طرف منيره
نور شهقت : وش تقولين ؟! شلون عرفتي ؟!
هند : هو اللي قالي .. نووور منيره تنتقم مني وارسلت لي حسن
نور: الله لا يوفقها الملعونه ..
هند ردت تبكي: نوووور انا مقهوووووووووره بالحيل ... نور قهرني الحيوااان ..
نور: اهدي ياقلبي .. وقوليلي وش اللي صار وخلى كل هذا يحصل ؟!
هند تقولها اللي صار..
نورمتفاجئه من الكلام اللي سمعته : اهدي ياقلبي وناس مثل هذي ماتستاهل دمعه من عيونك
هند لازالت تبكي : ذبحني الحقير وانا احبه .. ذبحني اللي مايخاف ربه ..
نور : انت وش جالسه تسوين الحين ؟!
هند : وش جالسه اسوي بعد جالسه ابكي على نفسي قهر
نور : طيب نعالي لي الحين ..
هند : انت تعالي انا مالي خلق اطلع ..
نور: انا مافي احد يجيبني ..
هند خلاص .. اوكي ..
نور: يالله ياقلبي باي .. انتظرك ,,, وقفلت منها وقالت بنفسها ( الله يلعنك يامنيروووه .. والله يهديك ياهنو كم مره قلت لك ماتدرين من ويج جايك هذا )
,,,,,,,,,,,,,,,,,,,,,,,,
لوجين بالغرفه جالسه على اللاب توب لكن مو على النت لأن حتى دخلتها للنت محسوبه عليها .. مسدوحه نص سدحه على السرير واللاب توب على رجولها ولابسه السماعات وتسمع اغاني .. انطق الباب ..لكن لوجين ماسمعت
انفتح الباب ودخل فهد وبيده كيس متوسط الحجم وانتبهت لوجين ناظرت فيه ونزلت السماعات وصارت تسمع من نفس اللاب توب ومااعطته أي اهتمام لوجوده
فهد : السلام عليكم ..
لوجين من غير لا تطالعه وبهمس : وعليكم السلام
فهد واقف قدامها عند السرير : وش تسوين ؟!
لوجين : ارقص .. انت وش شايف يعني .. جالسه
فهد : اهااا .. طيب ممكن نتكلم شوي
لوجين ايضا بدون اهتمام وعيونها للاب : تفضل
فهد : طيب اتركي الكمبيوتر عنك واسمعيني شوي
حطت لوجين اللاب على السرير وناظرته: نعم
فهد يمد يده بالكيس اللي معاه : خذي هذي شريحه جديده وجوال جديد بعد .. جبتها لك اليوم .. بس انت كبيره وتفهمين ومانبي غلط كبير مثل اللي راح يتكرر
لوجين للحين مااخذت الكيس منه : مشكور وماتقصر خله لك
انصدم فهد من ردها توقع انها رح تطير من الفرحه لو جاب لها الجوال الجديد : بس انا جايبه لك
لوجين : محد طلب منك .. انا لما ابي الجوال اعرف اجيبه
فهد انقهر : وش قصدك ؟!
لوجين : مايخصك .. والحين ممكن تتركني ابي انام
فهد نزل يده اللي ماسك بها الكيس : اوكي ..
وطلع وقفل الباب وراه .. ولوجين ابتسمت بخبث لأنها قدرت تقهره .. وراحت الغرفه لأمها وابوها ,, وطقت الباب ..
هدى من داخل الغرفه : ادخل
فتحت لوجين الباب ودخلت : السلام
هدى وعبدالله : وعليكم السلام ..
وقفت لوجين على التسريحه وركزت ظهرها عليها : ممكن اطلب طلب ؟!
عبدالله : اطلبي
هدى : وش الطلب
لوجين : بس اهم شي تقولون تم ..
هدى على حسب الطلب
عبدالله : تم ..
لوجين تناظر ابوها وتبتسم : كلمه رجال يابابا
عبدالله : افا عليك وانا ابوك .. اكيد كلمه رجال
هدى : اصبر خلنا نعلاف وش الطلب بالاول
عبدالله : ماعليك لو تبي لبن العصفور بجيبه لها ( طبعا عبدالله مايدري عن سالفه جوالها ولما سألها عنه قالو له ان الجوال ضاع منها . . وهي ماتبي حاليا جوال )
لوجين : ابي جوال .. بدال الاول
هدى : ماله داعي
عبدالله : ليش ماله داعي .. مافي احد موب ماسك جوال .. اللي في بطن امه اللحين شريحته جاهزه .. وبنتي زين منها جالسه الفتره اللي راحت من غير جوال ولا طلبت
هدى : خليه في الاجازه .. عشان مايشغلك عن الدراسه
لوجين : ماما انا مو بزر الجوال يلهيني عن الدراسه .. وبعدين اللي يسمعك يقول اول مره امسك جوال
عبدالله : خلاص ياام فهد .. ويناظر لوجين بكره ان شالله انا بنفسي بطلع لك شريحه جديده .. وبعد المغرب اخذك عشان تختارين الجهاز اللي تبيه
لوجين راحت وحبته : الله يخليك لي يارب .. بس تراني ابي رقم ممييييييييييز بالحيل
عبدالله : ابشري
هدى : خلاص اتفقتوا
لوجين بضحكه : ايه
هدى : طيب يالله على غرفتك
عبدالله مبتسم .. ولوجين طلعت .. دقايق ولحقتها هدى للغرفه طقت الباب ودخلت ..لوجين كانت واقفه على التسريحه تغني لنفسها وترقص فرحانه
لوجين : هلا والله بالغاليه .. مرت الغالي ..
هدى : اسمعي ,, تراني وافقت على الجوال بس عشان ابوك .. لكن والله يالوجين لويصير تصرف غلط مثل المره اللي راحت ماتلومين الا نفسك
لوجين : اوكي .. وبعدين خلاص ياماما كل الناس تغلط
هدى : ايه كل الناس تغلط .. بس لو تكرر غلطها تعرف وش رح يصير لها ..
لوجين لوت بفمها : حاضر من عيوني
هدى : يالله تصبحين على خير
لوجين : وانت من اهل الخير .... وطلعت وقفلت الباب وراها .. ولوجين ردت لفت على المرايا وكملت غناها وهي مبسوطه ...
,,,,,,,,,,,,,,,,,,,,,,,
هند راحت لنور البيت وقالت لها كل اللي صار .. ونور ماتوقعت كل هذا يصير من راس الحيا منيره
نور: ماعليك والله لأردها لك ياهنوده
هند : انا ماعلي منها خلها تولي بس حسن يانور انا احبه
نور عصبت عليها : بعد كل هذا تحبينه .. انت وش تنتظرين من واحد مثله .. هند اصحي لنفسك شوي وفكري ..واحد مسح فيك البلاط وماخلا ولا بقى عليك .. وتقولين احبه
هند ساكته تسمعها وهي تبكي وتكمل نور كلامها : وبعدين من البدايه انت قايله لي بلسانك انك قلتيله ماتبين حب ..وش اللي غير كلامك اللحين .. ولا حنا كذا خلاص يالبنات بكلمتين حلوه ننسى انفسنا .. هند ياحبيبتي افهميني .. والله مايستاهل دمعه من عيونك .. والله مايستاهلها ..
زاد بكى هند وقربت لها نور وضمتها لصدرها وقالت لها : ابكي هنا بصدري اللين ترتاحين وانت اقنعي نفسك انه انسان حقير ومايستاهل وحده مثلك .. ومنيره والله رح ترجع لها هالحركه بس اصبريلي شوي ..
فكرت هند بالموضوع كثير لما رجعت البيت واللي يميز هالبنت عزه نفسها ومستحيل ترخص كرامتها لأي شخص كان قالت وهي منسدحه على السرير : دامه باع والله لأبيع .. ولو جاني شاري والله بتراب ماشريته
ثاني يوم بعد المغرب لوجين مع ابوها بالسياره ورايحين ( الحداد للإتصالات ) بياخذون جهاز .. وقفوا قدام المحل ونزلوا ودخلوا .. وهم يتفرجون على الاجهزه
عبدالله : هاااه ماعجبك شي ؟!
لوجين : دقيقه بشوف كل الاجهزه وبعدين اختار ..
ولازالوا يتفرجون وواحد من الشباب اللي يبيعون يعرض لهم افضل الجوالات واحدثها اللين اختارت n93 i
لوجين : بابا ابي هذا ؟!
عبدالله : الله كل هذا تبينه .. كبير وشكله رجالي ؟!
لوجين بتوسل : بابا والله عجبني ..
عبدالله : بكيفك .. وناظر الشاب : كم سعره ؟!
الشاب: 2700 ريال
اشتروه وطلعوا ..وهم بالسياره ركبت لوجين شريحتها الجديده في الجهاز الجديد وجالسه تتفرج عليه من جوا وبرا
عبدالله : هااه مبسوطه ؟!
لوجين : اااااااخر بسط .. الله لا يحرمني منك يااحلى راقل بالدنيا << تتكلم مصري
عبدالله يضحك : اللهم امين .. وانا عندي كم لوجين بالدنيا ..
لوجين : بس وحده تحبك مووت
اتصلت لوجين على نور .. نور شافت رقم غريب .. وماردت
صارت تتصل اللين ردت نور وسكتت: .....
لوجين : الوووووووو ياحلووووووووو
نور: هلاا ..منو؟!
لوجين : كيف صوتي بالجوال الجديد ؟!
نور ضحكت عرفتها : هلاااااااااااا واللله .. مبروووووووك طلعتي جوال جديد
لوجين : يس يس .. توني بالسياره مابعد وصلت البيت .. فرش فرش
نور: على البركه . ان شالله .. وبعدين الرقم وااااااو من جد رهيب
لوجين : ايه تحسبين بس انت ارقامك مميزه .. حتى حنا ياماما .. يالله خليني اتصل على هنوده ابشرها
نور: اوكي ..باي
لوجين : باي ... وتقفل وتتصل على هند ... وهند لازال المزاج معكر ..شافت الجوال رقم غريب .. ولا ردت .. جلست لوجين تتصل تتصل بس مافي أي رد وبعدين صار مغلق لأن هند ملت وقفلته .. لما فقدت الامل .. ارسلت لها رساله ( انا عمتك لوجين ..ردي.. هع هع هع )
بعد ساعات من رجوع لوجين للبيت ومعها الجوال رجع فهد ولوجين بالصاله وطقطق بالجوال وتشوف وش فيه ووش مافيه .. دخل فهد وشافها بالصاله : السلام عليكم
لوجين ناظرت فيه وردت نظرها للجوال : وعليكم السلام
فهد ناظر الجوال بيدها : حوال من هذا ؟!
لوجين : جوالي ..
فهد : من وين لك ؟1
لوجين : الله يخليلي بابا شرالي اياه اليوم .. وتناظره بأستهزاء وتمد يدها لاجوال: خذ شوفه ..
فهد لازال واقف في بدايه الصاله: على البركه ان شالله .. بس الله الله مايحتاج نوصي
لوجين : اكيد مايحتاج .. انا مو بزر
فهد ماشافه ولا شي وطلع على غرفته ..
,,,,,,,,,,,,,,,,,,,
بعد ايام قررت نور انها تسوي سبرايز لهند عشان تغير لها الجو الكئيب اللي عايشته .. وكلمت لوجين .. واتفقت معاها على كل شي .. بالاضافه الى سعاد والهنوف اللي متفقين معهم بعد ...
بعد صلاه العشاء هند كانت بغرفتها بالبجامه وجالسه على الكرسي الهزاز .. في نفس البيت عند الباب نور ولوجين وضي توهم داخلين وسلموا على سعاد والهنوف وكان معهم كيس كبير بالحيل واكياس متوسطه نوعا ما.. نور ولوجين كانوا لابسين مثل بعض فساتين قصيره حد الركب لونها وردي وفيها نفشه حلوه وربطه من تحت الصدر وجزم بعد وردي مثل جزم الباليه الواطيه وشعورهم مستشورينها وطبعا شعر لوجين طول شوي .. وهالفساتين اشتروها سوا وجابوا لهند مثله ..
نور: وينها؟!
سعاد : بغرفتها .. وش بلاكم لابسين كذا تقولون بزارين
نور تضحك : عشنها بارتي صغير ومفاجئه نبي نكون مثل الاطفال
سعاد: هههههههههه والله انتو عليكم حركات ..
لوجين تضحك : يلا خلينا نحط الهديه قبل لاتنزل ..
فتحوا الكيس وطلعوا منه صوره كبيره ومبروزه لهند كانت عند نور ودامجين فيها كذا صوره لها وهي كبيره وصغيره وصور لهم بعد وهم صغار وعملوا هالصوره في استديوا لمسات للتصوير..
سعاد: الله وش هالزين ..
نور تدير البرواز عليها: شرايك ياخاله سعاد؟!
سعاد : رووووعه الصراحه . . الله يسعدكم يارب
لوجين : يالله يانونو جيبيها .. ضيو طلعي الاستاند حق الصوره من الكيس الثاني.. وطلعته ضي وحطوا الصوره في زاويه الصاله بحيث اللي يدخل الصاله يشوف الصوره قدامه بشكل واضح .. ونزلوا الاستريو من فوق وحطوا الشريط اللي سجلوه مجموعه اغاني فرايحيه حقت صهلله وهيصه ورقص .. طلعت نور من شنطتها كرت حجمه متوسط كانت كاتبه فيه هي ولوجين .. واعطته الهنوف
نور: هذا خليه معك واذا طلعتي تنادينها بعد شوي حطيه لها لما تطلع من الغرفه اوكي
الهنوف مبسوطه : اوكي .. بس ان شالله ماتطردني من الغرفه ههههههههههههههههههههههههه
الكل يضحك ..نور: لا ان شالله ماهي طاردتك
بعد ماجهز كل شي طلعت الهنوف لفوق وراحت لغرفه هند .. طقت الباب ..
هند : منو؟!
الهنوف : انا . افتحيلي الباب ..
هند : وش تبين ؟!
الهنوف : تعالي شوي ماما تبيك تحت
هند بتأفف: وش تبي؟!
الهنوف : ماادري .. يالله بسرعه
هند : خلاص طيب قوليلها شوي وانزل
الهنوف : لا تقول الحين ..
هند : اوووف .. طيب .. وتقوم تفتح الباب وتشوف الهنوف قدامها : وانت شفيك كذا واقفه مثل الصنم .. خلاص قلت الحين انزل
الهنوف تخفي ابتسامتها : لا بس ابي احط من عطرك سينما .. ممكن ؟!
هند تمشي من قدامها متوجهه للدرج : حطي
ودخلت الهنوف بسرعه حطت الكرت على التسريحه وطلعت وراها..
البنات يوم شافوا زولها شغلوا المسجل وكانت اغنيه رابح صقر ( وش رايك الليله نسهر سهر ثاني ,, تنسى به احزانك وانسى به احزاني ) وهي نازله من الدرج سمعت صوت الاغاني عالي بالحيل استغربت .. شوي الا نور ولوجين طالعين لها من الصاله وواقفين عند بدايه الدرج ويبتسمون لها .. هند تفاجئت ووقفت ثواني على الدرج تستوعب اللي صاير اغاني وصديقلتها وفساتين وبعدها صرخت صرخه قويه ونزلت ركض من الدرج وضمتهم وسلمت عليهم وصارت تضحك وتسألهم بصوت عالي : وش السالفه ؟1
نور بصوت اعلى : تغير جو للصديقتنا المكتئبه وتضحك
لوجين تمسك اطراف فستانها وتدور : شرااايك بس ؟!
هند الفرحه مو سايعتها : وااااااااااااو روعه روعه احلى مفاجئه .. واشكالكم تجنن
وسحبوها للصاله وشافت صورتها بالزاويه صرخت : الله تجنن وتدخل تشوفها من قريب ناظرت الصوره شوي ولفت على البنات وناظرتهم ودمعت عيونها وراحت لهم وضمتهم : الله لا يحرمني منكم .. قولوا امين
نور ولوجين : آآآآآآآآآآآآآآآآآآآآآآآآآمين يارب..
جلسوا شوي .. الا قالت لوجين لهند : ماتحسين شكلك غلط بيننا
هند : ليه ؟1
لوجين تناظر نور: قومي بالله خلينا نلبسها
وجابت الكيس اللي فيه الفستان ودخلوها حمام الضيوف غيرت وطلعت لهم وشكلها يضحك
نور ولوجين ماتو ضحك
هند : كيف شكلي ؟!
نور: روووعه تعالي اصلح شعرك المزيت ..ههههههههههههه
هند : انقلعي والله مو مزيت .. الصبح متروشه
لوجين وتروح ركض تجيب الجزمه وتجي وتاخذها هند وتلبسها .. ووقفت قدام المرايا : واااااو يجنن الفستان .. من اللي اشترته
نور: تسحبها للصاله موب شغلك .. خاله شرايك
الا سعاد تضحك : الصراحه اشكالكم تحفه .. يبغالكم صوره
وتركض الهنوف لفوق تجيب الكاميرا وتصورهم .. بكذا حركه حلوه وغير صور الاستهبال ...
جلسوا البنات كملوا السهره وتعشوا بعد ماطلبت لهم سعاد من برا وعلى الساعه وحده ونص كل بنت في بيتها وهند طلعت غرفتها فتخت الباب ودخلت وهي بقمه الفرحه وتحمد ربها على نور ولوجين .. دخلت على التسريحه على طول تناظر شكلها وتضحك .. وانتبهت للكرت عبست بحواجبها بس توقعت انه من البنات وسحبته وطلعت الكرت من الظرف وفتحته وبدت تقرا ...
( بسم الله الرحمن الرحيم .. هاااي انا نونو اكيد عرفتيني من خطي الحلو .. والله ياهنو مدري ايش اكتبلك بس من جد الدنيا ماتسوى تنام وخاطرك زعلان هههههههههه ايش رايك فيني اخقق صح ؟! المهم ياقلبي انا مررره كنت متضايقه من وضعك وزعلانه من زعلك عشان كذا فكرت الفكره الخطيره و الجوووهنميه اننا نعملك البارتي الصغير انا ولولو الصغيره ام خشه كبيره << ههههه حلوه هذي صح ؟! عشان نطلعك من جوك الكئيب .. وطبعا قلت لـ لولو السالفه وانصدمت وقالت لازم نسوي كذا عشانك صديقتنا الغبيه يؤيؤ اقصد الحلوه الذكيه الشاطره .. المهم مااطول عليك الحين المايك مع لولو << على بالها اذاعه هع هع هع ... سلام ياحلو..
مررررررررحبااااا يابطه انا لولو .. الصراحه قالت لي نونو السالفه ودعيت عليهم الله يقلعهم وتحمست لحركه البارتي عشان نغير لك جوك يالله ان شالله نونسك ونبسطك .. وتعجبك الهديه اللي سويناها عقبال ماتسون لي بارتي حلو زي اللي بنسويه لك .. حياتي هنو .. دمعتك غاليه ورضاك بالدنيا عشان كذا لا تحاولي تزعلي نفسك ولو زعله قد النمله << ايش رايك بالتشبيه بس؟! لأن محد يستاهل ياحياتي ..
يالله باي باي ..
حبيباتك / نونه الشعنونه _ لوله المهبوله
هههههههههههههههههههههههههههههههههههههههههه )
قفلت هند الكرت والابتسامه ماليه وجهها صحيح هذول الصديقات ولا بلاش .. بالفعل غيرو جوها وطلعوها من الحزن اللي هي فيه وعيشوها احلى وقت ..
يتبع الجزء السابع
ثاني يوم العصر هند كانت بالصاله وكل شوي تناظر بالصوره اللي مانشالت من امس وتبتسم كل ماشافت الصوره .. الاهذا ماجد نازل من فوق توه قايم وطبعا الليله اللي قبلها كان سهران برا البيت لوقت متأخر ولما وصل بالليل للبيت مايشوف الطريق طلع على الغرفه سيدا ولا شاف البرواز .. دخل الصاله وسلم : السلام عليكم
وناظر الصوره .. وارتسمت على وجهه علامات الاستغراب
هند : وعليكم السلام .. صح النوم
ماجد يجلس ولازال يناظر البرواز : صح بدنك .. وش الصوره الحلوه هذي ؟! متى سويتيها ؟1
هند : ماسويتها جاتني هديه ..
ماجد : من مين؟!
هند : من حبيبات قلبي نونو ولولو .. امس سوو لي حفله تجنن
ماجد صحصح مع طاري نور: ليه وش المناسبه ؟1
هند تتنهد بضحكه : مافي مناسبه بس شافوا صديقتهم متضايقه ونفسيتها تعبانه حبو يغيروا لها جوها
ماجد : ياشين اللي يمزح والواحد توه قايم من النوم
هند : والله صدق ماامزح
ماجد : الله بس عشانك متضايقه سوو لك حفله وهديه
هند : ايه لا وماشفت شي امس فاتك نص عمرك .. بس ايش رايك بالله مو هذول الصديقات ولا بلاش .. انت اصدقائك يسون لك كذا اذا طفشت ولا تضايقت
ماجد : اقول والله انتو البنات عندكم خرابيط ماتخلص لو الوحده زكمت جبتوا لها هديه
هند تضحك : بس ايش رايك بالصوره ؟!
ماجد : الصراحه حلوه .. بس ذولي الصغار منهم ؟1
هند : اوف اوف نسيتهم مره وحده .. هذول نونو لولو وهم بزارين
ماجد : والله ؟!
هند : ايه والله هذي اللي لابسه قصير ومسويه قرنين لولو واللي لابسه شورت وبلوزه عريان وشعرها بوي نونو
ماجد منشكح على الاخر : ياحليلهم .. بس نور شكلها ولد بالحيل
هند : ايه .. بس الحين تغيرت انعكست الايه
ماجد : ليه ؟!
هند : لأن لولو شكلها بوي لما كبرت بس نونو صارت بنت
ماجد يضحك : حلوه هذي .. صارت بنت .. ليه ولد من اول ؟1
هند : ههههههههه لا بنت من يومها ..بس قوم معي خلني اطلعها غرفتي .
ماجد : ليه تودينها غرفتك ؟! خليها بالصاله
هند : لا ابيها فوق عندي عشان اناظرها طول الوقت
ماجد : وانا لا بغيت اناظرها اطلع غرفتك والله مشوار
هند : وانت وش دخلك ؟!
ماجد : شلون وش دخلني اذا انا مااشوف صوره نور كل يوم منو يشوفها ؟!
هند : انا طبعا
ماجد يتكلم وهو مبتسم : تصدقين عاد ؟!
هند : ايش ؟1
ماجد : الصوره لو انك لحالك بتكون شيييييييييييييييييييينه بس لأن صورة قليبي فيها صارت تحفه
هند : احلف
ماجد يضحك : والله العظيم .. قسم بالله .. امانه انت شوفي بنفسك لو هالقمر اللي اسفل الصوره موب موجود كان زمان انحرقت الصوره .. ومشو حالهم بأي هديه غيرها
هند تضحك : طيب طيب .. قوم شيلها معي
ماجد : طيب اصبري بتأمل فيها شوي وبعدين اشيلها
هند : اااه ياربي منك يالله قوم
ماجد : بس من الحين اقولك انا بشيل الصوره وانت تدبري بالاستاند
هند : اوكي
وقاموا بيشيلونها الا هذي سعاد : هاه .. وين شايلينها ؟!
هند : بطلعها غرفتي
سعاد : وشوله خليها بالصاله ..
هند : لا ابيها عندي
ماجد : من اليوم اقولها خليها تقولي لأ
هند : انت موب شغلك
ماجد: يمه اوقفي مع الحق ..
سعاد : أي حق واي باطل
ماجد : اقولها خليها عشان القمر اللي فيها موب راضيه
هند : لا والله ماني مخليتها يالله خلنا نطلعها
سعاد مبتسمه وفاهمه قصد ماجد : اقول طلعها وانت ساكت ياوليدي ولا تصير مخفه
ماجد : افاااا يمه انا مخفه
هند : ايه
ماجد : انت مالك شغل
هند : مالك شغل ولا مالك معاذ هههههههههههههههههه
ماجد ضحك : يمه بنتك فيها شي اليوم ؟!
سعاد : والله من بعد امس ميب صاحيه
هند لازالت تضحك .. ماجد : ياخي ليش ماقلتو لي في بارتي امس بالبيت عشان اقعد
هند : لا والله صدق
ماجد : ايه
سعاد : يالله يالله بس طلعواها وانتو ماسكينها كذا تقول احد معاقبكم وتدخل الصاله وتجلس
وهند وماجد طلعوا للغرفه ورا بعض وماجد الصوره بيده وهند سابقته بالاستاند .. قابلوا سعود نازل
سعود : وش فيكم ..
هند بطلع الصوره للغرفه
ماجد : يبه شفتها .. ويلف الصوره على ابوه
سعود : ايه شفتها من البارح
ماجد : اهاا احسبك ماشفتها
سعود نازل من الدرج : لا شفتها وحلوه بعد
ماجد وهو ماشي : اكيد حلوه وحبيبتي فيها
هند : اقول امشي وانت ساكت بس
ماجد يضحك : ااااااااااه ياقلبي ياحبي لها
ويدخلون الغرفه ويحطون الاستاند والصوره بزاويتها بعد تغيرات بسيطه بترتيب الغرفه طبعا بعد مذله من ماجد اللي ساعدها بالقوه
,,,,,,,,,,,,,,,,,,,,,,,,,,,,
بعد شهر من الاحداثاللي صارت كانت نور بغرفتها جالسه على المكتب تذاكر لأن عندها اختبار النصف النهائي بالكليه ولها اكثر من ثلاث ساعات والماده غثيثه وممله سكتت ورمت المذكره اللي تذاكر منها من ايدها وركزت ظهرها على الكرسي وتأففت : ياااااربي طفشت وش ذا الملل متى اخلص الزفت الدراسه .. ومسكت جوالها وفتحت الرسايل وجلست تقرا شويه وتركته ومسكت المذكره تبي تكمل الا وصلتها رساله .. وسحبت الجوال وفتحت تشوف الرساله من رقم غريب ومكتوب فيها ( ياهاتفي ارسل على اعز مخلوق .. وصل له المرسول بأسرع دقيقه .. ياهاتفي قله ترى القلب محروق .. ودي اشوفه بس كيف الطريقه .. ) قرتها نور وماعرفت الرقم .. وحطت الجوال وكملت دراسه ..
,,,,,,,,,,,,,,,,,,,,,,,,,,,,,
اما لوجين فكان وقتها جدا ضيق ومابقي الا شهرين او اقل على اختبارات الترم الثاني يعني بالنسبه للوجين تخرج عشان كذا كانت من مدرسه خصوصيه لمدرسه الثانيه وتحاول قد ماتقدر تشد حيلها رغم انها ماهي راعيه دراسه بس لأنها تبي الجامعه شاده حيلها ولقائاتها بالبنات قليله مره كل اسبوعين ولا ثلاث اسابيع ويتواصلون معاها بالجولات بس عشان مايشغلونها ..
,,,,,,,,,,,,,,,,,,,,,,,,,,,
هند بالصاله والبيت فاضي امها والهنوف طالعين للسوق وابوها وماجد بعد طالعين يعني مافي غير هي والخدامه .. كانت تكلم بالجوال وتضحك : هههههههههه لا لا من نور هذي مااعرفها اول مره اسمع بأسمها
اورنج : اهاا يعني ماتعرفينها
هند : لا مااعرفها
اورنج : اجل من وين لتس رقمي ؟!
هند : مثل ماقلت لك غلطت برقمك بس انت مو مقتنع بهالشي
اورنج : احاول اصدق .. بس انا حاس انتس من طرفها
هند : يااااربي ياخي انت شلون تفهم .. اقولك مااعرفها وش اسوي لك عشان تصدقني
اورنج : لا تسوين شي خلاص مصدقك .. طيب انت وش اسمتس
هند : يهمك ؟!
اورنج : لا مايهمني
هند : وانت وش اسمك ؟!
اورنج : انا مشغول الحين مع السلامه
هند : ههههههههههههه ماتعرف تتهرب من السؤال
اورنج : لا مااتهرب اسمي تركي .. يالله بقفل
هند : عاشت الاسامي يااا تركي .. ومع السلامه
اورنج : باي باي وقفل ... طبعا اورنج ماقالها اسمه الحقيقي بس كذا تسكيته وهو اصلا مو مقتنع بسالفه هالبنت اللي جايته كذا من الباب للطاقه بس قال انا بمشي معاها للأخرواشوف وش وراها .. اما هند قفلت منه وهي مبتسمه : والله ووصلنا لك يااورنج اقصد ياتركي .. وتضحك .. واتصلت على نور ونور كانت باقي تذاكر
ردت نوروصوتها طفشان : هلا
هند : هلا بك يابعدي .. كيفك
نور: طفشاااااااااانه وملاااااانه وابي ابكي
هند : له له ليش كل هذا ياقلبي
نور: عندي اختبار طويل وغثيث وموب راضي يخلص من العصر بدري وانا اذاكر والين اللحين ماخلصت
هند : طيب ارتاحي شوي وبعدين كملي
نور: اخاف مايمديني بااااقيلي كثير .. الله يقطعهم طفشت والله طفشت وبكت نور لأنها مضغوطه نفسيا من هم الامتحانات
هند : صلي على النبي ياقلبي وقومي اتروشي واشربي عصير ولا أي شي وبعدين كملي
نور تتنحنح تبي ترد صوتها : ان شالله
هند : يالله ياقلبي قومي وشوي برد اتصل عليك اشوف وش سويتي
نور: اوكي .. باي
هند باي ...
قفلت نور وقامت سوت اللي قالت لها هند
اما هند قفلت من نور قالت اتصل على لوجين اشوف وش تسويي
ولوجين بعد كانت عند مدرسه الرياضيات ومن حظ هند ان المدرسه ماكانت موجوده بهالحظه وردت لوجين : هلا هنوو
هند : مرحبا .. كيفك
لوجين : اهلين .. طيبه الحمدلله .. انت كيفك
هند : انا مخلفه وناسيه
لوجين : هاه .. ايش
هند : اقولك انا مخلفه وناسيه
لوجين ابتسمت : ليه ؟!
هند : الله لا يوريكي عندي بنتين شايله هم دراستهم وكل شوي اتصل اتطمن عليهم
لوجين تضحك : من هم
هند : انت ونور ههههههههههههه
لوجين : اجل وش شغلتك بالحياه بس اكل ونوم .. الا هذي المدرسه جايه من جوا .. يالله يالله باي انا عند المدرسه الخصوصيه والحين جات
هند : طيب باي
لوجين : باي وتقفل .. جود : من هذي هند؟!
لوجين : ايه شكلها طفشانه ومتصله تسأل
جود : اصص خلاص بعدين كملي السالفه
وجلست المدرسه وكملو الشرح ..
هند قفلت منها وحطت الجوال جنبها واخذت جهاز التلفزيون وجلست تقلب القنوات الا هذا جوالها يدق رقم اورنج وردت : هلا
اورنج : اهلين .. شلونتس ؟!
هند : تمام .. ماشالله خلصت شغل ياسرعك
اورنج : موب شغل شغل بس شغله بسيطه خلصتها وقلت اتصل اشوف هالبنت وش عندها
هند :اهااا .. لا ماعندي شي
اورنج : اكيد ؟!
هند : ايه اكيد
اورنج : وش يثبتلي ؟!
هند : اني اقولك مع السلامه الحين
اورنج : لا لاتقولين مع السلامه لأني مارح اقفل الا لما اعرف من انتي
هند : قلت لك ارسلت لك كول مي بالغلط وانت نشبت فيني
اورنج : سبحان الله بالغلط .. بس البنات صايرين تغلطون كثير هالايام ولا وش رايتس انت ؟!
هند : لا مااظن انا من يوم طلعت جوالي اول مره اغلط فيك
اورنج : صدز والله .. بس انا من يوم طلعت جوالي البنات يدقون غلطانين علي مدري رقمي طالع بأعلان ولا بشي
هند : يمكن ..
اورنج : كم عمرك يااا... الا ماقلتي لي وش اسمتس
هند : اسمي هند
اورنج : عاشت الاسامي ياهند
هند : عاشت ايامك .. تسلم
اورنج : ايه ماقلتي كم عمرتس ؟!
هند : 22( مااعطته عمرها الحقيقي )
اورنج : ماشالله العمر كله
هند : تسلم وانت ؟!
اورنج : 24 سنه
هند : العمر كله
اورنج : لنا ولك .. وش رايتس نترك الرسميات اللي مااحبها
هند : ياليت والله لأن حتى انا مااحبها
اورنج : طيب متى بترسلين صورتس ؟!
هند عقدت حواجبها : أي صوره ؟!
اورنج يضحك : صورتس
هند : هههههههههههه ليه ارسلها
اورنج : عشان اتخيلتس اذا جيت انام
هند تضحك : والله من جد ؟!
اورنج : ايه اجل امزح
هند : لا انسى الموضوع هذا
اورنج : ليه ؟!
هند : كيف ليه .. مايبيلها سؤال لأني مارح ارسلها
اورنج : الله يهداتس بس وشوله ماترسلينها بشوفها وامسحها على طول
هند حست انها تورطت معاه : طيب اسمع اكلمك شوي اوكي
اورنج عرف انها تتهرب منه : وين بتروحين ؟!
هند : ولا مكان بس بسوي شغله وارجع اتصل عليك
اورنج : انت ليش تقلدين
هند : اقلد شنو ؟!
اورنج : تقلديني ..
هند ضحكت : لا والله مااقلد .. بس بكلم وحده من صديقاتي وارد ادق عليك
اورنج : بتقوليلها عني اكيد .. بس قبل لا تقوليلها أي شي خليها تقول ماشالله اخاف تحسدني
هند : ههههههههههه لا ماني بقايله لها شي عنك وليش تحسدك ان شالله ؟1
اورنج : لأني ادري بتقولين لها دمي خفيف الله يسعدني ههههههههههه
هند : ههه هه هه ايه بالحيل ماشالله .. ( هند حست انه نسى موضوع الصوره وبطلت تقفل الخط )
اورنج : طيب اذا قفلتي مني واتصلتي عليها وقفلتي منها ارسليلي الصوره اوكي
هند قالت بنفسها يوووووه وش هالنشبه : ههههههههه طيب يصير خير يالله مع السلامه
اورنج : احس انك بتسحبين فيني
هند : لا لا اعوذ بالله انا لا مااسحب فيك ولا شي بس انسى موضوع الصوره
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك