رواية قتلهن الطيش وأحياهن الحب -19
هند : بس كذا .. اسمعي انا براسي فكره وابي اسويها وانت معي
لوجين : اوكي بس وش هي ؟
هند : بعدين لما نوصل افهمك
لوجين :طيب
هند تصارخ : نوووور يالله عاد
نور تضحك : طيب بس ادور لكم موقف...الكل ضحك على كلمتها ..
وقفوا ونفس الشي تبادلوا الاماكن وركبت هند وجنبها ماجد طبعا ومن اول جلست دعست بانزين بقوه وكل واحد ضرب بالمرتبه اللي قدامه وقالت : بسم الله الرحمن الرحيم .. يمه وش فيها السياره
نور صرخت .. ولوجين مثلها والشباب ماتوا ضحك .. ماجد : الله يقطع بليسك يالخبله
هند شوي وتبكي :مدري لحالها
نور ضحكت .. وقال فهد : وين وين لحالها سيارتي جديده ومافيها شي البلى فيك انت ماتعرفين تسوقين
لوجين : هنوده تكفين ابي ارجع سليمه
عبدالرحمن : ماعليك بترجعين ويضحك
ماجد : عاد انتو اللي تبون تسوقون تحملوا بعض .. يكلم هند يالله لفي عشان نرجع رجوع لمكاننا
هند خاااايفه وترجف : طيب
ماجد : حطي ايدك هنا ويقصد القير وحط ايده على ايدها وصارت تمشي شوي شوي وماجد يساعدها
فهد : الظاهر اني بنام واقوم وانا ماوصلت
عبدالرحمن : مافي أي مشكله ريح اللين نوصل
نور : اما انك تحفه ياهند
هند : لا تتريقين
نور تضحك : طيب اسفه
لوجين : هنوده شرايك توقفين وتخلين واحد من الشباب اللي يسوق
هند : لا والله توني راكبه انتو كل وحده اخذت نصيبها
لوجين ضحكت : يمه يمه طيب اكلتينا
نور تكلم لوجين : لا تاخذين عليها تراها خايفه واعصابها مشدوده
لوجين تهز راسها: عارفه عارفه ماعليك
الشريط اللي كان شغال وقف ..وحبت نور تعاندها فقالت: هند شغليلنا شريط ثاني
هند : اللحين موب وقت اغاني
نور فطست ضحك : طيب لو سمحت يااخ ماجد شغل لنا شريط
ماجد بدون كلام فتح ودور شريط .. طلع شريط لماجد المهندس وشغله وصار يعيد الشريط يبي يوصل لأغنيه محدده بهالوقت طلع جواله وارسل رساله لنور( هذي الاغنيه اهداء)
وصلت الرساله وفتحتها نور قرأتها مسحتها انتبهت لوجين لكنها مادققت وقف الشريط عند الاغنيه المطلوبه وقال ماجد بصوت عالي .. : هذي اهداء خااااااص واللي يبي يهدي يقول من اللحين
عبدالرحمن : انا بهديها لك
ماجد : مايصير كذا الاهداء يكون لوحده من البنات اللي بالسياره
فهد : انا بهدي نور
ماجد انقهر من فهد : لأ
عبدالرحمن : انا بهدي هند
فهد : وش اللي لأ؟
ماجد انتبه لنفسه وش قال : هاه .. انت وش قلت لمين
فهد : لنور
ماجد / اووه كأني سمعتها لوجين بقولك مايصير .. وطبعا قال كذا يداري ردت فعله
عبدالرحمن : وانت ؟
ماجد : باقي لوجين .. الله يعيني بهديها اياها
وشغل الشريط ( بين ايديا .. واحس انكـ بعيد .. ذووب بحضاني .. مثل قطعه جليد.. علم العشاق .. شلون الحب يكون.. بلا حواجز احلى طعم الحب اكيد.. زيد ناري .. خلي بجروحي ملح .. خلني اسهر .. ليلنا لحد الصبح .. لا تفكر حبنا غلطه ولا صح .. ايش مايعدي العمر .. حبنا يضل جديد..اقترب مني ترى الدنيا فرص .. وخذ من شوقي اذا شوقك نقص .. خلني احكي مواويل وقصص .. ايش مايعدي العمر حبنا يضل جديد)
تابع الجزء التاسع
نور تسمع الاغنيه ومسرحه بكلماتها اللين انتهت ..
ماجد : ياشيخ والله هذي ماتنفع للوجين
لوجين : ليش ان شالله
ماجد: كذا .. انت يبيلك اغنيه عزازي
لوجين : ايش ايش واي اغنيه ان شالله
ماجد يضحك : ليتك تموت اليوم وارتاح انا منك
الكل يضحك ..لوجين : وجع ان شالله فال الله ولا فالك
فهد : هنودووه وقفي خلااااص تبين تدخلين الخيمه
هند تضحك : ناااويه اكمل
عبدالرحمن : انت كذا صرتي اكثر وحده سايقا في البنات
نور: ايه والله ظلم
هند وقفت السياره وهي تضحك : لا موب ظلم .. هذي قسمه حق
نزلت هند وهي مبسوطه وماجد ضل بالسياره ونزل عبدالرحمن وفهد.. ولوجين ماعندها وقت طمرت من فوق المراتب وبقت نور تحاول تفك المرتبه بس ماعرفت ولا تبي تقول لماجد يساعدها .. ضلت تحاول وتحاول بس مافي امل الكل راح ومابقى غيره وهو شايفها ومتجاهلها وينتظرها تطلبه .. نور طفش: اوووف وجلست .. ماجد ممكن تفك لي المرتبه
ماجد لف ناظرها : وسكت
نور تناظره : تبي تفكها ولا اتصل على احد يجي يفكها لي
ماجد لازال يناظرها : لا مايحتاج انا بفكها لك بس بعد ماتسمعين كل اللي عندي
نور خافت : ماجد لو سمحت .. حنا مابيننا كلام .. بتفكها لي ولا شلون
ماجد : وان مافكيتها وش بتسوين .. بتناقزين مثل لوجين
نور: ايه
ماجد : مارح اتركك تسوينها قبل ماتسمعين اللي عندي
نور : وش عندك ؟
ماجد : احبك
نور حمر وجهها : شكرا وحبتك العافيه .. الحين ممكن تساعدني بهالمرتبه
ماجد : اقولك احبك يانور
نور ساكته ..
ماجد : انت تدرين اني احبك وتتجاهليني
نور: ماجد لو سمحت ماله داعي هالكلام
ماجد : الا له داعي ونص ..
نور: وايش معنى رسالتك اللي اليوم .. مو تأسفت على اللي صار وطلبت مني انسى كل شي
ماجد : ايه بس كنت مقهور منك .. عشان كذا ارسلت هالرساله
نور انفعلت : وانا شسويت لك عشان تنقهر مني
ماجد : ماتعطيني مجال اقولك اللي عندي .. وباللحظه اللي اعترف لك فيها تتركيني وتروحين .. نور انا احبك احبك والله احبك .. ليش ماتقدرين هالشي
نور تناظره وعيونها طايره فيه ولا عندها أي كلمه تقدر ترد فيها على ماجد .. ماجد سكت وتنهد بقوووه ونزل من السياره وفك لها المرتبه وتبي تنزل وهو قدامها .. نزلت وصارت واقفه قدامه بالضبط وعيونها بالارض : ممكن تبعد
ماجد لازال واقف ومغطيها بطوله وشايف شماغه اللي ناسيته عليها : اكيد رح ابعد بس...
نوررفعت عينها له ورمشت بهدوووء : بس ايش؟
ماجد قرب لها وباسها من خدها وقال: تأكدي اني احبك مهما رديتيني
لكن ماجد ماحس الا بكف على وجهه من نور ولمح دمعه نزلت من عينها وكانت اسرع من الحركه اللي سوها
نور دفته وبصوت مكتوم ومقهور : قليل ادب .. وراحت من قدامه كأنها سراب واختفى .. وقال بنفسه انا وش سويت .. لكنها لحظه ..وبعدها بتسم و قال .. والله لأجننك يانور اللين تحبيني مثل مااحبك واكثر ...
نور دخلت الخيمه وباين عليها شي موب طبيعي قابلتها ضي : يخس يانور ماتاخذونا معكم
نور: ضي ابعدي من قدامي احسن لك
ضي: وش فيك نونو؟
نور بصوت عالي شوي : مافيني شي خلاص
الكل يناظر نور ومستغرب تصرفها نور بطبعها هاديه وان عصبت ماتبين هالشي لأحد ولا تطلع حرتها باللي قدامها ..
ضي خافت ومشت من قدامها : اسفه .. ولحقتها الهنوف : وش فيها نور
ضي: ماادري اول مره تكلمني كذا
دخلت جلست نور وفي عيونها دموع قهر على اللي صار وتقول بنفسها وش هالـجرائه اللي فيه من جد حقير .. ىسعاد : نور وش فيك بسم الله عليك
نور صحت لنفسها هي ماتحب احد يشوفها بوضع مثل كذا الحين اكيد سين وجيم عشان يعرفون السبب
نور: هااه .. لا ابد بس ...
عبير: صاير معك شي نور
نور: لا ياشيخه مافيني شي بس وانا بسياره ونازله المرتبه مارضت تفتح طفشتني ولما فتحت ومامداني انزلت الا مسك بنطلوني بالحديده وطحت على وجهي
لوجين انفجرت ضحك : ياليتني شفك
و هند مامشت عليها هالقصه ابدا بس سكتت.. هدى : بسم الله عليك عسى ماتعورتي
نور ابتسمت وتخفي قهرها : هههههههه لا طيحه خفيفه الحمدلله
جات جنان عندها: عمه عولتي ( عمه تعورتي ؟ )
نور تحبها : لا ياقلبي ماتعورت
سعاد مستغربه وتناظر نور : هاه .. نور يابنتي وش الشماغ اللي على كتوفك هذا
نور انتبهت له وشالته من كتوفها ورمته جنبها : هاا ايه هذا لبسته وانا اسوق تلثمت فيه
عبير : وكيف السواقه
نور: اسألي هند وش سوت فينا...
,,,,,,,,,,,,,,,,,,,,,,,,,,,,,,,
سعود: وين رحتوا ياعيال.؟
عبدالرحمن : رحنا سوقنا البنات شوي
عبدالعزيز: وكيف سواقتهم ؟
ماجد : اما اختك نور ماشالله احسن مني والباقي قول عليهم السلام
عبدالعزيز: ايه نور تعرف تسوق
عبدالله : وبنيتي كيف ساقت
سطح عبدالرحمن وقال: والله لو تشوفها ياعمي محتضنه الدركسون تقول انه يبي يطير
الكل يضحك ...
صالح : وهند؟
فهد ضحك : هند اول ماركبت دعست بانزين بقوه طيرتنا
سعود يضحك : ياحليلهم هالبنات .. والله انهم حلاة الدنيا
عبدالرحمن :: اوووه يبه والشباب
سعود: حتى انتم بس البنات لهم طعم ثاني
ماجد : اجل كذا ياعمي بنسوي حمله معارضه ضدك
سعود يضحك: الشباب كله مايتعوض ..عيشو ايامكم ولا تشيلون هموم من بدري ترى الايام اللي تروح ماترجع
عبدالله : وانت صادق
صالح : ايه والله عايشيين ايام ماعشناها
عبدالله : خلهم يتهنون بشبابهم مو مثلنا الله على ايامنا كيف كانت وايامهم شلون صايره .. بااذن الله طول ماانا حي مابحرم عيالي شي
الكل: عسى عمرك طويل ان شالله
,,,,,,,,,,,,,,,,,,,,,,,,,
لوجين جات وجلست جنب هند : تعالي هنا ماقلتيلي وش الخطه اللي تبين تسوينها عشان حسن
هند : ايه ذكرتيني ..اسمعي حسن له مدى يتصل عليه وانا ماابيه ولا ابي اكلمه
لوجين : طيب..
هند: ابيه يبطل يتصل .. بس ماني عارفه كيف جات براسي فكره وخايفه ماتضبط
لوجين وش هيا؟
هند: ابيك اذا اتصل تردين عليه .. وان سأل عني قولي اني مت
هنا لوجين انفجرت ضحك: كيف اقول انك متي
هند: شوفي انا من يوم تركته مااتصلت عليه ولا ار د على اتصالاته .. انت اذا اتصل ورديتي رح يعرفك اكيد من صوتك قوليله اني مت بحادث وان جوالي معك من مده
لوجين : مستحيل مارح يصدق
هند: لا يصدق وقوليله ان الدليل على كذا انك خليتي اخوك يرد عليه قبل كم يوم وانه سوى حاله غلطان بالرقم
اوجين اقتنعت : اوكي حلوه الفكره
هند: بس هاااه ماابي احذرك وانبهك ماتغلطين بشي امشي على الخطه مثل ماهي مرسومه
لوجين : اكيد مايحتاج تقولي
نور كانت تصلي العشا وسلمت وجالسه على السجاده .. نادتها هند: نونو .. نونو
نور لفت : نعم
هند : تعالي بسرعه بقولك شي
نور: وش ؟
هند: تعالي انت وبتعرفين
نور قامت فصخت وراحت لهم وجلست : وش فيه .. وش السالفه ؟
هند تقولها الخطه ..
نور ضحكت باستهزاء: ليه غبي هو لهذي الدرجه .. مستحيل يصدق
لوجين : انا قلت لها بعد
نور: والله مايصدق ولا بتعدي عليه كذا وان عداها بيكون بكيفه هالشي
هند:لا ماعليك بنخلي لوجين تبكي وتتأثر على السماعه وخلاص ان اتصل بعد كذا مافي أي احد يرد وانا بقفله اغلب الوقت
نور: والله ياهند مارح يصدق وبعدين خير ان شالله وش صديقتك هذي اللي بتاخذ جوالك وين اهلك مايقفلونه بعد ماتموتين
هند: عادي نخلي لوجين تقول انها طلبته امي عشان صديقاتي لو اتصلوا ولا احد يبيني
نور تضحك: هند بلا خبال مو بزر هو..
لوجين : لا ماعليكم بضبط الدور وبعدين كل مااتصل وانا كنت موجوه انا برد واذا ماكنت فيه يامغلق يامحد يرد
نور: والله بكيفكم .. بس من الحين اقولكم انا
هند: خلاص افقنا .. متى مااتصل باخليك تردين عليه ..
لوجين نقزت : ياويلي ماصليت العشا
هند ونور : ماشالله
نور: ياويلك يالولو انت دايم تأخرين الصلاه
لوجين : استغفر الله ياربي .. يالله بروح اتوضى واصلي
طلعت لوجين توضي وكان عبدالرحمن بسيارته ومن يوم شاف زولها نزل ..كانت واقفه هي وخدامتهم خديجه .. خديجه تصب لها مويه ولوجين تتوضى .. مر من عندها : لوجين
لوجين شافته : هلا دحوم
عبدالرحمن : كيفك
لوجين : تمام انت كيفك
عبدالرحمن : بخير ..
لوجين : الحمدلله ..
عبدالرحمن : لوجين .. ممكن اسألك سؤال
لما قال هالجمله تذكرت اورنج وش عندهم هذول على الاسئله اليوم : اكيد تفضل
عبدالرحمن متردد : قلبك وش اخباره ؟
لوجين انصدمت ووقفت وضوئها وصارت تناظره بدهشه : هاه ؟!!
عبدالرحمن : لوجين .. قلبك وش اخباره ؟؟
لوجين ضحكت ضحكه صفرا: وش هالسؤال؟
عبدالرحمن يكلم خديجه : لو سمحت جيبي لي ماء
خديجه خلت اللي بيدها وتناظرهم وشاكه بالوضع .. وراحت
عبدالرحمن : ممكن تجاوبيني
لوجين تضحك: على ايش؟
عبدالرحمن : هو سؤال واحد .. ونفسي تريحيني .. لك علاقه بوليد ولا لأ ؟
لوجين حست كان احد ضربها : هااه .. مين وليد؟؟؟
عبدالرحمن : لوجين لا تسوين نفسك ماتدرين عن شي .. انا عارف السالفه كلها .. بس اللي ابي اعرفه انت باقي علاقتك معه ولا لأ؟
لوجين : انت وش دراك؟
عبدالرحمن : ليه يعني انت ماتدرين انه خويي واعرف عنه كل شي
لوجين ساكته
عبدالرحمن : بتجاوبين ولا شلون ؟
جات خديجه وبيدها كاسه المويه واعطتها لعبدالرحمن .. : شكرا
خديجه واقفه تناظرهم : عفوا
عبدالرحمن : لوجين ماجاوبتي ..
لوجين : مااظن ان هالموضوع يخصك
تفاجئ عبدالرحمن من ردها : بس انا ابي اعرف
لوجين : اسفه .. هذا الشي يخصني انا وبس
عبدالرحمن انقهر منها وكب المويه البارده اللي بيده على وجهها ورمى الكاسه وراح
لوجين شهقت من بروده المويه واستوعبت اللي صار واطلقت ضحكه عاليه وقفت عبدالرحمن بمكانه وخلته يلف ويناظرها .. وقالت له بكل صوتها : مجنووووون
وعادت وضوئها ودخلت وهو دخل الخيمه بقمه قهره..
وهي داخله لهم والضحكه بفمها ..هدى : انت اللي تضحكين
لوجين : ايه
هدى : وكم مره اقول لك وطي صوتك لما تضحكين .. يعني مافي رجال جنبنا
لوجين : تكتم ضحكتها : اسفه ماما غصب عني .. وراحت جلست جنب هند
نور : وش اللي ضحكك كذا؟
ردت تضحك : صار شي يضحك وضحكت عليه
هند: ايه وش هالشي اللي خلاك تسطحين وتنسين نفسك
نور : وش ذا كلك مويه انت توضيتي ولا تروشتي
لوجين قامت خلوني اصلي واقولكم وش صار ...
,,,,,,,,,,,,,,,
ماجد جالس وماسك جواله ويكتب رساله اعتذار لنور .. وعبدالرحمن ماسك جواله بعد ويقلبه بيده مقهور من لوجين اما فهد كان ماسك جنان ويلعب معاها واصواتهم ماليه المكان والباقي يسولفون اما عن الشغل ولا الاسهم ولا السياسه والاخبار..
,,,,,,,,,,,,,,,,
خلصت لوجين صلاه ونور وهند ينتظرونها
نور: يالله قولي وش صار
هند: بسرعه تعالي اجلسي خلي وحده من الخدامات تطبق الشرشف
لوجين : يوووه خلاص دقايق اصبرو شوي
سكتو البنات اللين خلصت وجت جلست بينهم بالنص ..: اسمعوا السالفه ياطويلات العمر
نور : هاتيها
لوجين : طبعا انا قلت لكم اني بطلع اتوضي
هند : أيه
لوجين : وبقدره قادر رجعت متروشه
نور : ايه اخلصي علينا
لوجين : هذا اخوك العزيز ياست نور كب علي كاسه المويه البااارده اللي حسيت قلبي وقف منها
هند ونور بتعجب : ليش ؟
وتقولهم السالفه كلها ...
نور : اخس يادحيم اثريك راعي هالسوالف
هند : لا تنسين انه ولد يعني اكيد عنده هالسوالف
نور تضحك : بس حركته حلوه طلع قهره زين
هند تضرب لوجين على فخذها : والله يحبك يالولو
لوجين مصرقعه : والله ياحظي .. بس يمكن مايكون حب يكون بس يبي يعرف اذا لي علاقه فيه ولا لأ
نور: بلا غباء اصلا هوا عارف مابينكم شي لأن وليد صديقه يعني اكيد يعرف بس هوا يبي يتأكد اذا انت باقي تحبينه ولا لأ .. بس خانه التعبير
هند : حلوه هذي خانه التعبير عجبتني .. صادقه نور خانه التعبير ماعرف شلون يوصلك سؤاله
لوجين : والله مدري عنه بس على العموم انا ماعطيته وجه
نور : تعجبني ياشديد
لوجين ضحكت : لا تشيلي هم اعجبك
سكتو البنات ونادت سعاد على هند : هند يمه
هند: هلا
سعاد : اتصلي على ابوك والشباب قولي لهم العشا جاهز
هند : طيب وتقوم تجيب جوالها لأنها حاطته بالشنطه
قامت وراها لوجين وصارت تمشي معها وتقول لها بأذنها سألتي نور وش كان فيه اليوم
هند: لا ماسألتها بس ماعليك بسألها قريب واعرف ..
وصلت الرساله لنور وفتحتها ( انا اسف وسامحني ,, غصب اللي بدر مني ,, انا والله احبك بس,, ببعدك عني تتعبني ,,,, نور ياقلبي انا اسف ماني عارف شلون ابرر اللي صار مني بس اعذريني فديتك .. احبك ) قرأتها نور ومسحتها وكانت تبي ترد عليه برساله ثانيه لكنها بطلت وقالت لنفسها انا اعرف شلون اتعامل معاه..
,,,,,,,,,,,,,,,,,,
انتهى العشا والحريم والخدامات لمو الاغراض كلها من الليل عشان بكره من بدري بيرجعون للمدينه .. هند ونور ولوجين كالعاده مع بعض كل وحده منسدحه جنب الثانيه ويسولوفون قبل النوم .. هند : نور
نور: نعم
هند : وش صار اليوم العصر بعد مارجعنا يوم دخلتي الخيمه معصبه
نور : ولا شي وش صار يعني .. قلت لكم وش صار معاي وانا نازله من الجيب
لوجين : ايه وغير اللي صار بالجيب في شي ثاني وشو ؟؟
نور: مافي ولا شي
هند : نونو حبيبتي كل الفلم اللي قلتيه مادخل راسي ابدا لا بالطول ولا بالعرض
نور تضحك : طيب جربتي وهو على جنب يمكن يدخل
لوجين: لا من جد نونو وش خلاك كذا معصبه
نور : ولا شي ياقلبي ماصار أي شي .. اصلا لو صاير شي بقولكم بوقتها
هند : نوور مو علي هالكلام انا اعرفك زين
نور طفشت : يووووه مافي شي وش تبوني اقول لكم يعني أألف لكم سالفه عشان يصير في شي
لوجين : لا بس شكلك ابدا ماكان طبيعي
نور : وحده حرانه وساعه اللين مانزلت من السياره وبعد هذا كله تتطيح على وجهها بهالتراب المولع من الشمس تبينها تدخل لكم تضحك
لوجين اقتنعت بكلامها وهند حاولت تقنع نفسها باللي تقوله نور لكن مافي امل تقتنع لكنها سكتت لأنها نعست ونامت ونور نفس الشي الا لوجين اللي تنتظر الكل ينام عشان تبي تكلم اورنج على حسب اتفاقهم
,,,,,,,,,,,,,,,,,,,,,,,,,,,,,
بعد ساعه الكل نايم حريم ورجال الا لوجين اللي جالسه برا الخيمه لحالها وتناظر القمر والنجوم وتفكر بنفسها وبوضعها وقالت : ياربي انا ليش اتصرف كذا ,, ليش اكلم اورنج .. مااحس اني حبيته ولا مرتاحه معه .. ووجوده وعدمه واحد .. قطع تفكيرها اتصاله .. ومن يوم شافت الرقم ردت ولا كأنها كانت تعاتب نفسها قبل دقايق : هلا والله
اورنج : اهلين يانور العين .. شلونتس قلبي
لوجين : الحمدلله مستاااانسه .. وانت كيفك؟!
اورنج: مشتاق لتس
لوجين: تسلملي وانا اكثر
اورنج : شلون السواقه اليوم ؟!
لوجين : والله شي يجنن الصراحه روعه ستانسنا حيل
اورنج : ياعساها دوم هالوناسه يارب
لوجين : آمين يارب
بعد وقت من السوالف..قال اورنج: لولو حبيبتي ..
لوجين : يالبيه
اورنج : شكلك شلون صاير .. تصدقين نفسي اشوفتس
لوجين تضحك : عادي شكلي زي كل الناس
اورنج : لا مااظن ..
لوجين : ليه ؟
اورنج : لأني احس انتس قمر
لوجين انحرجت : يوووه احرجتني تسلم
اورنج يمزح : تشبهين هند ؟!
لوجين ضحكت : شلون اشبه هند ..
اورنج : لأنتس خويتها من زمان اكيد انتس تشبهينها
لوجين : بلا استهبال اورنجي
اورنج يضحك : طيب من تشبهين من الفنانات ولا الممثلات ..
لوجين : امممم .. مااشبه احد
اورنج : مو قلت لتس انتس قمر
لوجين : انت القمر
اورنج : طيب ابي اشوفتس .. وشلون
لوجين : وشلون ؟!
اورنج : انت قولي لي وشلون .. عادي ترسلين لي صورتس؟!
لوجين : لا
اورنج : ليش ياقلبي .. لا تقولين مابيننا ثقه .. انت شفتي هند ارسلت لي وماسويت لها شي رغم كل اللي صار منها
لوجين : مو شغله ثقه بس ... ماادري .. لا لا مابرسل شي
اورنج : ياقلبي بتزعليني منتس .. حنا مو تونا نعرف بعض لنا زمان صح ؟! من ايام هند كانت بيننا مكالمات .. يعني انت تعرفيني زين وانا بعد اعرفتس زين
لوجين : ايه صح .. بس لا ماادري,, بفكر بالموضع
اورنج : ماابيك تفكرين ابيك تعطيني كلمه الحين
لوجين : اووورنج لا تضغط علي
اورنج : اول شي لا تقولين لي ارونج قولي لي عزوزي
لوجين : ليه ؟
اورنج : تسذا احسن .. احس اذا قلتي ارونج اني بالماسن وانا ماابي احس وانا معتس اني بالنت ابي احس اني بعالمي الخاص بدنيتي اللي عايشها صدز
لوجين : اهاا .. اوكي .. لك ماطلبت ياعزوزي
اورنج : ياويلي ويلاه يازينها منتس .. واللحين وش قلتي بترسلين لي الصور ؟!
لوجين : بس تمسحها بسرعه
اورنج : ياقلبي انت .. شووور .. وانا معتس بشوفها وبمسحها
لوجين : خلاص بس موب اليوم خلها لما نرجع
اورنج : لا الحين .. اكيد في صور لتس بجوالتس
لوجين بكل استسلام : طيب يالله بقفل عشان ارسل ولما توصل لك اتصل ..
اورنج يبتسم بخبث : اكيد يالبى قلبتس
قفلت منه وجلست تدور بالجوال احلى صوره وارسلتها
,,,,,,,,,,,,,,,,,,,,,,
نرجع للمدينه واهلها ..
وليد بغرفته منسدح ويفكر .. وقال بكره ان شالله من يوم اصحى بكلم امي عشان اتقدم واخطبها .. وبكذا اثبت لها حبي واثبت لفهد صدق نيتي..
,,,,,,,,,,,,,,
حسن بعد كان بغرفته وجالس بالصاله لحاله ويقلب بالقنوات ويفكر بهند .. ورفع جواله والله مابتركها اللين ترد علي واتصل بس لقاه مغلق وانقهر ورماه على الارض وقام .. لكن حسن ماييئس وبيضل يتصل عليها..
,,,,,,,,,,,,,,,,,,,,,,,,,
وصلت الصوره لأورنج وفتحها وهو متحمس .. شافها وشهق : يازينها والله ..وكبر وكبر بالصوره وجلس ياطلعها .. شوي واتصل عليها .. وردت : هااا وصلت ؟
اورنج: لعن ابو بليسك وش هالجمال ماشالله ..
لوجين بدلع : لا تجامل .. شكلي عادي موب حلو ولا شين
اورنج : اقول انثبري والله انتس تخققين
لوجين ضحكت : وش انثبري هذي بعد انت تسب وتمدح بنفس الوقت
اورنج : اسف ياقلبي بس تبين الصدز .. قمر .. وماكذبت يوم قلتها لتس .. والله انتس قمر قمر
لوجين : خلاص عاد احرجتني والله
اورنج : شسوي لازم اعبر عن مشاعري اللي شفته مو شي هين
لوجين : طيب يالله الحين امسحها
اورنج : اصبري ياقلبي توني ماتأملتها زين
لوجين خاافت : هااا بدينا ..
اورنج : لا لا مابدينا ولا شي هه اللحين بمسحها وانت معي .. دقيزه خلتس على الخط
لوجين : اوكي
اورنج طقطق بالازارير وسوا حاله مسحها ورد كلمها : خلاص قلبولا تخافين مسحتها
لوجين : اكيد
اورنج : شدعوه ياقلبي .. اكيد
,,,,,,,,,,,,,,,,,,
هند تتقلب تتقلب على فراشها وصحت شافت الدنيا ظلام سحبت جوالها وفتحته تبي تشوف كم الساعه ومن الظلام ماانتبهت ان لوجين ميب موجوده .. فتح جوالها وعلى طول وصلت رسايل موجود من حسن مسحتها وشافت الساعه الا 3ونص الفجر .. وردت تبي تقفل الجوال الا هذا حسن يتصل وقامت بسرعه تبي تصحي لوجين عشان ترد عليه لكنها مالقتها نادت بصوت واطي محد رد قفل حسن واتصلت على لوجين بسرعه ولقته مشغول واستغربت وقالت اكيد انها برا وقامت بسرعه طلعت برا الخيمه الا لوجين تضحك .. بس قطعت ضحكتها لما شافت هند وارتبكت ونزلت الجوال وردت رفعته لأذنها مره ثانيه .. وتبي الوضع يكون عادي ..: وش فيك صحيتي
هند حست بخوف لوجين وارتباكها لكن ماهمها هالموضوع كثر موضوع حسن فقالت لها : بسرعه قفلي حسن جالس يتصل
لوجين : والله
هند : ايه بسرعه اللحين اكيد يبدق مره ثانيه
لوجين : طيب حبيبتي يالله اللحين لازم اقفل اكلمك بكره ان شالله اذا ر جعت
اورنج : من عندتس
لوجين بضحكه صفرا : لا هذي هنوده تبيني ضروري يالله مع السلامه
اورنج : اوكي
هذا حسن رجع اتصل .. هند : خذي خذي بسرعه سوي نفسك نايمه
لوجين : يالله باي وقفلت من اورنج وحطت جوالها بجيب البجامه عشان ماتاخذته هند تشوف الرقم .. واخذت السماعه من هند وغيرت بصوتها : الوو
حسن حس الدنيا ضحكت له من جديد واخيرا ردت : الوو.. هند ؟!
لوجين : لا ياحسن مو هند
حسن خاف : من معاي .. هذا موب جوال هند
لوجين : الا جوالها بس انا مو هند انا لوجين
حسن : لوجين .. هلا كيفك
لوجين : بخير .. انت كيفك
حسن : ماني بخير .. لوجين وين هند ليش ماترد علي؟؟ وليش تخليك انت اللي تردين علي ؟؟وقبل مده تعطي اخوها مدري ابوها يرد ؟؟ ليش تسويي فيني كذا؟!
لوجين : حسن اهدى شوي والله ماادري وش اقولك .. بس مو هند اللي كانت ماترد ولا هي اللي عطتني اكلمك اللحين
حسن مستغرب: اجل من؟
لوجين : انا ..
حسن : شلون انت .. يعني بتفهميني ان جوال هند معاك من زمان
لوجين : ايه صحيح معاي من مده طويله .. وانا اللي كنت اشوف ارقامك ولا ارد وقبل كم يوم خليت اخوي يرد عليك لما سويت نفسك غلطان
حسن : ليش طيب .. ليش ماكنت تردي وتقولين لي عشان ماازعجك بإتصالاتي .. وبعدين ليش هند معها رقم ثاني غير هذا؟!
لوجين : لا موب كذا السالفه
حسن : اجل ..؟!
لوجين بدت تغير بصوتها كأنها تبكي : حسن الحين مابقدر افهمك شي .. بليز بكره اتصل وانا اقوك كل السالفه
هند واقفه وتتابع الفلم اللي لوجين تمثله ومكتفه ايدينها ومبتسمه وكل شوي تهز راسها بمعنى كملي و ماشيه تمام
حسن خاف: ليه لوجين .. وش صار؟1
لوجين ضبطت صوتها وكأنها بكت صحيح : حسن تكفى مارح اقدر اتكلم معاك باللي صار ..
حسن نافخ عليها: لوجين قولي وش صاير .. هند صار لها شي
لوجين وصار تشهق وضابطه الدور: حسن هند ماتت
حسن كان واقف ويدور بغرفته جنب السرير ويوم سمع كلمتها جلس مصدوم : شتقولين ..
هند دارت وجهها عن لوجين لأنها تضحك وماتبي تخرب المشهد المؤثر هذا ..لوجين : مثل ماقلت لك
حسن دمعت عيونه : كيف ومتى صار ؟؟؟!
لوجين لازالت ضابطه الدور وتشهق وتبكي وكل شوي تتنحنح يعنني ترجع صوتها : من شهر تقريبا .. صار لها حادث وماتت ياحسن .. ماتت صديقه عمري .. وسوت حالها تبكي
حسن بكى : لوجين انت صادقه ولا كذابه .. بذمتك جاوبيني.. صدق اللي قلتيه ولا بس عشان مااتصل عليها .. اذا عشان هالسبب خلاص مابتصل بس لاتقولين كذا
لوجين وكأنها انفعلت : حسن مااظن ان هالمواضيع فيها صدق وكذب .. حسن هند راحت مننا .. وسوت حالها تبكي مره ثانيه
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك