رواية قتلهن الطيش وأحياهن الحب -18
انتهــــــى الجزء الثامن ..
وش رح يدور بين نور وماجد بعد هالاعتراف الخطير.. وهل ياترى مشاعر فهد وعبدالرحمن لهند ولوجين صادقه ولا مجرد نزوه ؟؟!
الــجزء التــــاسع...
مدخل/
انا انت .. وياانت انا ..
لو سألوا حبيبي .. عن اسمي حبيبي..
قل هذا انا..
تشبهني عيونك ..سميني المدى..
غطيني برموشك .. عن عين العدا..
ظفرني جدايل .. واكتبني رسايل..
وانسى من انا ..
واعدني المدينه .. اوقات الغروب..
امواجي سفينه..ورمالي دروب..
بأمشي لين اشوفك..لين اقرا بكفوفك..
اسمي ..وين انا ..
..............
ماجد دقات قلبه زادت من ارتباك نور .. ويحاول يسيطر على نفسه ..
ماجد : نور
نور قامت تبي تروح من عنده
ماجد \ نور تكفين اسمعيني
نور ميب عارفه شلون تتصرف بموقف مثل هذا .. وناظرته بنظره ذوبته ومشت
ماجد بحركه سريعه وقف وسحب ايدها ووقفها : نور انت وعدتيني تسمعيني للأخر
نور تناظر الارض وساكته ولازالت يدينها بايدين ماجد ووتمنى الارض تنشق وتبلعها
ماجد : تعالي اجلسي
نور: معليش ياماجد اتركني اروح
ماجد : تكفين ..
نور: وش تبي تقول .. اظن اللي تبي تقوله ارسلته برساله
ماجد : ايه صح بس الكلام اللي بقلبي اكثر من الكلمتين اللي ارسلتها لك
نور: انا اسفه .. وسحبت ايديها ومشت لداخل الخيمه
ماجد ظل واقف مكانه لفتره طويله ويمر براسه الموقف اللي صار واعترافه لنور بحبه اللي صارله زمان خاشه .. ونور دخلت للخيمه وهي مفهيه ومو متخيله اللي صار وماتعرف هي بحلم ولا علم .. وصلت للاخر الخيمه وجلست وجوالها بيدها رفعته وناظرت الرساله ( احبك .. ماجد ) مسحت الرساله وقفلت جوالها ورجعت لتفكيرها باللي صار..
الساعه 2 الظهر الشمس معطيه رمل الصحراء بريق اخاذ لكن حرارتها طاغيه على هالمنظر الحلو اللي محد جالس يتأمله غير نور .. هند طالعه من خيمه الحريم وشوي شوي ومن ورا نور اللي سارحه بعالم ثاني وتبي تخوفها : بخخخخخخخخخخخخ
نور بالفعل خافت فزت وحطي ايدها على قلبها : بسم الله الرحمن الرحيم .. وجع خوفتيني
هند تضحك : ادري .. ماخذ عقلك يتهنا به
نور : انت اللي اخذته
هند : وش مجلسك بالحر
نور: بس كذا ابي اتشمس
هند مبتسمه وتلعب بطرف شيلتها : على بالك بلبنان
نور ضحكت : لا عارفه اني بالسعوديه وبالبر بعد
هذي لوجين طالعه من ورا الخيمه : مرحبااا
نور: وين كنت انت
لوجين : كنت امشي بالحر اللين حسيت اني انشويت ورجعت
هند : عاد يعني من البياض الزايد يوم تمشين بالشمس
لوجين : ابي اصير برونزاج عندك أي مانع مس هند ؟!
نور: اخس يابرونزاج .. انت برونزاج رباني
هند ونور يضحكون
لوجين : كيفي حره
نور: تدرون وش نفسي فيه
هند : قبل لا نعرف وش نفسك فيه قومي عن الكرسي ابي اجلس
نور: ماني بقايمه الكراسي ياكثرها داخل جيبي لك واحد وبعدين ماني متنازله لك بالظل اللي انا تحته
لوجين تضحك : احسن
هند تناظر لوجين : وش احسن انت بعد ؟
لوجين : احسن كسحتك .. وتضحك
هند : ياشينك والله وتروح الخيمه ماتلاقي ولا كرسي
وتنادي على امها : ماما\ ماما
سعاد : مشغوله بتحضير السفر للغدا وماردت عليها
هدى : وش بغيتي هند ؟
هند تتلفت : وين الكراسي اللي كانت هنا
هدى : والله ماادري الظاهر برى
هند : لا مافي شي برا
عبير: لا هنوده بالليل طلبها عبدالعزيز .. الظاهر انها عندهم بالخيمه
هند : اوكي وطلعت
لوجين : وين الكرسي
هند : بخيمه الرجال بروح انادي ماجد يعطيني واحد
نور سمعت اسمه وحست بمغص ببطنها .. لوجين : اجل جيبيلي واحد معك
هند : اوكي
هند وصلت للخيمه ورنت لماجد ورد عليها وقالت له انها تبي كرسيين من عندهم وطلع لها ماجد بيده الكراسي وشاف نور من بعيد جالسه
هند : شكرا يااخي العزيز
ماجد مارد عليها وعيونه على نور .. هند اخذت منه الكراسي وتناظر فيه وهو واقف ولا كأن قدامه احد .. هند وقفت جنبه بنفس الطريقه اللي واقف فيها وميلت عليه شوي وكتفت ايدينها وتناظر نور وقالت بصوت واطي : تصدق عاد ..
ماجد بمثل الصوت : ايش؟
هند : انك لا شفتها تفهي
ماجد : أي وقسم بالله انك صادقه
هند ابتسمت وكملت : وتصدق بعد ..
ماجد : ايش؟
هند : انك مو بس تحبها الا ميت عليها
ماجد صحى لنفسه من كلام هند ودفها بخفيف : هييي انت وش فيك .. عسى ماشر
هند ميته ضحك : انت اللي عسى ماشر .. صدق انك خبل
ماجد ضحك : اقول يالله يالله روحي بس لا تنكفخين الحين
هند باقي تضحك وراحت من عنده عشان ماتنضرب : خلاص رايحه
وصلت للبنات وهي ميته على حالها ضحك وحطت الكرسي وجلست
نور: ياباسط .. ضحكينا معك
لوجين وهي تجلس على الكرسي : خير خير ان شالله ضحكينا معتس
نور تناظر لوجين : من متى السين بكلامك
لوجين تبتسم : وحده من البنات تتكلم بالسين واحس اني صرت مثلها
نور اها..
هند : واي بنت هذي ماشالله
لوجين : وحده شرقاويه ياعلي فداها تهبل
نور تناظرها ورافعه حواجبها مستغربه : الله يهنيك معاها
لوجين : امين
هند: الحين خلاص جلست قولي وش نفسك فيه يانور
نور: أي والله نفسي بشي
لوجين : وشو ؟!
نور: ودي.. ودي.. ودي.. ودي اسوق
هند : الله وناااااااااسه
لوجين : صدق والله وناسه بس الشباب تتوقعون يوافقون
نور بيأس : مدري ..
هند : نقول لهم ونشوف
نور: انا بكلم عبدالرحمن واقترح عليه
لوجين : والله اخوك هذا ماينفع كل شي عنده لأ..
نور: لا بعد امس مااظن انه يرفض
هند : اقول لمجود اظمن لكم موافقته
لوجين : انتو سوو اجراءاتكم واعطوني خبر .. مابحمس نفسي على شي يمكن مايصير
هند : لا ماعليك والله مجود مايقول شي .. الحين اكلمه
نور: خلاص كلميه وانا بكلم دحيم
هند طلعت جوالها واتصلت ونور كانت قافلته من الصبح وتوها تفتحه واول مافتحت وصلتها رساله وطبعا من رقم ماجد ( جعل السعــاده في حياتكـ تباريكـ ,,, والحظ يضحكـ لكـ على طول دنياكـ ..... آآآآسف اني بحبي اعترفت وانسي اللي حصل كله )
نور قرأت الرساله وحست الدنيا دارت فيها وبالذات من العباره الاخيره اللي بالرساله .. ليه يتأسف على حبه وهو لسه ماشاف مني شي لا رفضته ولا قبلته .. حست بضيقه من الرساله وهي من النوع اللي يبين في وجهها وعيونها أي شي .. ناظرتها لوجين : وش فيك؟
نورتمسح الرساله : لا لا ولا شي بدق على دحيم
نور تناظر هند : وش فيك ماكلمتي مايرد ؟
هند : لا عطاني مشغول
نور اتصلت على عبدالرحمن ورد : هلا
نور: السلام
عبدالرحمن وعليكم السلام
نور: دحوم دحوم دحوم .. طلبتك لا تردني
عبدالرحمن : وش بغيتي
نور: قول تم
عبدالرحمن : على وش ؟
نور: اول قول تم
عبدالرحمن : تم
نور تضحك عشان تداري اللي فيها : نبي نسوق انا والبنات
عبدالرحمن وبدون أي تفكير : لاااا ياحبيبتي انسي الموضوع
نور بترجي : اماااانه عبدالرحمن انت قلت تم .. خلاص وعدتني
عبدالرحمن : لا المنطقه هذي كلها رمله واخاف تغرزون
نور: لا انت معنا .. الله يخليك
بنفس الوقت دق ماجد على هند : هلا هند اتصلتي
هند : ايه .. هند اتبعت نفس اسلوب نور
ماجد بهمس: حبيبتي جنبك ؟
هند : حبك برص وعشره خرس وتضحك .. مجود طالبتك طلبه قول تم
ماجد : خير ان شالله ياكثر طلباتك انت
هند : اول قل تم
ماجد : اسف والله على حسب الطلب
هند : طلب صغيرووون قد كذا
ماجد ضحك : وش قد كذا ... يعني وش كبره الكذا اللي تقصديه ؟
هند : يعني .. وبدت تشرح له .. شفت صباع ايدك الصغير
ماجد : ايه
هند : كبره من فوق .. صغيرون صح ؟
ماجد : اخلصي يابنت الحلال
هند : قل تم بالاول
ماجد : تم
هند : نبي نسوق انا والبنات
ماجد : هلا والله يالطلب .. اللحين هذا الطلب كبر صباعي الصغير هذا كبر راسي وراسك
هند تضحك : امانه امانه خلاص انت قلت لي تم
وبنفس الوقت نور لازالت تقنع عبدالرحمن .. عبدالرحمن يطالع بماجد وضحك بصوت عالي
نور: وش فيك
عبدالرحمن يناظر ماجد : من تكلم ؟
ماجد مبتسم : هند
عبدالرحمن : وش تبي تبي تسوق هي بعد
ماجد ضحك : وش دراك
نور تناظر هند : وش بلاه هذا
لوجين : وش فيه
نور: مدري يسولف مع ماجد
هند تضحك : الظاهر انهم جنب بعض
عبدالرحمن : هاا ماجد وش رايك ؟؟
ماجد : تم
عطوهم الموافقه وبغوا يطيرون البنات من الفرحه
فهد يناظر عبدالرحمن وماجد : وش السالفه
ماجد : البنات يبون يسوقون
فهد : ايه
عبدالرحمن : ولعبوا بحسبتنا ياشيخ والله انهم نشبه ماخلونا اللين وافقنا
فهد ضحك : وافقتو؟
ماجد : ايه
فهد : بايعين انفسكم انتو ؟
عبدالرحمن : لا ياشيخ بنكون معهم
فهد : والله الفله وبأي سياره بنركب
ماجد : ناوي تركي معنا ياابو الشباب
فهد : ايه واول الراكبين انا
ماجد : غريبه
فهد : وش الغريب ماغريب الا الشيطان
عبدالرحمن : والله انا بعد استغربت وتوقعت انك ترفض
فهد : على قولتك امس يالدحمي موب كل يوم الطلعات
,,,,,,,,,,,,,,,,,,,,,,,,,,,,,,,,
بعد العصر الحريم كلهم بالخيمه جالسين ويشربون شاهي وسوالف ماتخلص .. عبير : والله انك صادقه ياخاله سعاد التربيه يبيلها قلب صاحي
سعاد : ياحليللك يابنتي انت توك بنت وحده وتوها صغيره مابعد جبتي الثاني والثالث والرابع ويكبرون ويكبر همهم معهم
عبير: ايه والله معك حق
هدى : الحمدلله ياربي لك الحمد انا بنت وولد وبس ان شالله ازوجهم وافتك منهم
سعاد : الله يسمع منك
لوجين : لا ياماما انا ماابي اتزوج بلا غثا
هدى : الزواج ستر يابنتي
لوجين : مستورين والحمدلله
سعاد تضحك : قلبتي مصريه يالوجين
الكل يضحك الا لوجين اللي انحرجت : طلعت مني عفويه
عبير تتلفت : وين دنونه ؟
ضي كانت تسولف مع الهنوف : عزيز خذاها عنده
عبير: انت شفتيه
ضي : ايه شفته
عبير تطلع جوالها تبي تدق على عبدالعزيز تبي تتأكد اذا كانت جنان عنده ولا لأ ..
عبدالعزيز بخيمه الرجال ويسولفون ورن جواله ورد : هلا ام جنان
عبير: السلام عليكم
عبدالعزيز: وعليكم السلام
عبير: عزيز جنان عندك ؟
عبدالعزيز : لأ ميب عندي ..
عبير خافت : ماجات لمك ضي تقول انك خذيتها
عبدالعزيز: ايه بس من زمان طلعت من عندنا وقالت انها تبيك .. هي ماهي بعدنك
قامت عبير وقفت : لا .. يالله بطلع اشوفها برا
عبدالعزيز قفل وطلع برا يشوف وينها فيه بنته
عبير قفلت منه وقالت : جنان مو عند ابوها ويقول انها من اول تركته
نور: اكيد برا .. وقامت طلعت هي وعبير يشوفون وينها
عبدالرحمن كان برا الخيمه وجاي بيدخل الا عبدالعزيز طالع
عبدالرحمن : على وين
عبدالعزيز : بشوف جنان امها كلمتني تقول انها ميب عندها
عبدالرحمن : وين راحت
عبدالعزيز مستعجل ويناظر برا الخيمه : مدري بشوف وينها .. ولحق وراه عبدالرحمن
عبير تنادي : جنان .. جنان
نور بعد تنادي : دنونه .. دنونه .. وينك
لوجين وهند شافوهم وهم يدورون ومو لا قينها .. قالت لوجين : ماما
هدى : نعم
لوجين : ماهم لاقيين جنان
هدى خافت : لا لا اكيد انها قريبه لا تخافين
هند : بقوم اشوف ..
الكل قام وقف حريم ورجال ويدورون على جنان..
مرت ربع ساعه والدنيا انقلبت عليها .. عبير تبكي
وعبدالعزيز يدورها مثل المجنون .. ونور وهند ولوجين وضي والهنوف كل وحده بمكان قالوا يمكن انها مشت بعيد وضاعت
الخدامات بعد نفس الشي
هدى وسعاد واقفين ولا بيدهم شي غير الدعاء
الشباب بعد تفرقوا
عبدالله وصالح : واقفين بعد ينتظرون الفرج
صالح عيونه دمعت .. بنت ولده ضايعه وهو جالس مابيده حيله
المنطقه اللي هم فيها ماينسمع فيها غير اصوات تنادي باسم جنان .. لكن من اللي بيرد على هالنداء ؟!
الكل اجتمع بعد نص ساعه وعلى وجيههم علامات اليأس عبير ماتت صياح ونور بعد وضي.. عبدالعزيز اعصابه فلتانه على الاخير ورجوله ماشالته عبدالرحمن ماسك جواله بيدق على الشرطه الا هذي سرياتي خادمه سعاد طالعه من خيمه العزبه وبيدها جنان نايمه : ماما عبير .. ماما عبير.. كلاص جنان موجود
عبير لفت بسرعه وركضت لها واخذتها منها : وين لقيتيها
سرياتي : انا شوف هيا نوم في هدا كيمه ( شفتها نايمه في هذي الخيمه )
عبير بامتنان للخدامه : شكرا سرياتي ..وتاخذ جنان وتضمها لصدرها وتحبها وتحمد ربها .. الا هذا عبدالعزيز ياخذها منها ويضمها وتصحى جنان بيده : بابا
عبدالعزيز: وين رحتي يادنونه
جنان : مالحت متان بث تنت نايمه ( مارحت مكان بس كنت نايمه )
نور بكت زود يوم شافتها مافيها شي وهند ولوجين يضحكون على اللي صار والباقي راحوا جلسوا يريحون بعد شد الاعصاب اللي عاشوه
,,,,,,,,,,,,,,,,,,,,
بعد ساعه من الموقف اللي حصل رن جوال نور وكان عبدالرحمن يبي يقولها يتجهزون عشان يسوقون .. بنفس اللحظه رن جوال لوجين وكان اورنج قامت من الخيمه ترد برا : هلا والله
اورنج : اهلين قلبو .. شخبارتس ؟!
لوجين : الحمدلله .. انت اخبارك ؟
اورنج : الحمدلله ماشي الحال .. وبنتس انت لو ماتصل عليتس ماتتصلين
لوجين تضحك : لا والله مو كذا بس طالعين طلعه للبر وماافضى اتصل
اورنج : اهاا .. زين والله .. ومستانسين ؟
لوجين : ايه اخر وناسه الحمدلله
اورنج : انتو ومن طالعين .. اكيد اهلتس
لوجين : لا والله .. احنا وجيراننا
اورنج : زين
لوجين : تدري من معي بهالطلعه ؟!
اورنج : من ؟
لوجين : هند ونور
اورنج حس كأن احد ضربه على وجهه .. وهو من يوم يسمع طاري نور يحس انه احقر انسان بالدنيا : صدز؟
لوجين : أي والله حنا طالعين هالطلعه سوا
اورنج الفضول ذبحه: نور يمتس الحين ؟
لوجين : كنت عندها ولما رديت عليك قمت
اورنج تنهد : يالله ..
لوجين : وش فيك؟
اورنج : عمري ماكنت اتخيل اني ادخل عالم نور .. لا والاغرب من كذا انها ماتدري .. الله يلعنتس ياهند
لوجين شهقت : ليش الله يلعنها ؟!
اورنج : لأنها فرقت بيني وبين نور
لوجين : ليش يعني انت تحب نور ؟1
اورنج : لا مااحبها .. بس كانت صديقه عزيزه علي بالحيل .. تصدقين يالولو اني من صارت سالفه هند حذفت نور من ايميلي
لوجين استغربت : حذفتها؟
اورنج : ايه
لوجين : ليش ؟!
اورنج : مالي أي وجه اسولف معاها .. وش تبينها تقول عني ..
لوجين : تصدق عاد انها قالت هالشي
اورنج: وش قالت ؟
لوجين : كذا مره دخلت المسن بهالاسبوع ولا تشوفك وهي تعرف اوقات دخولك النت .. قالت اكيد انه اعطاني بلوك ولا دليت عشان ماله وجه يكلمني بعدها
اورنج : والله انها احسن انسانه شفتها وتسوى هند وطوايفها .. بس يالله قيد اللي صار صار وماترجع الامور مثل اول
لوجين : على قولتك
هند تنادي على لوجين من بعيد : لولو يالله العيال يبونا نسوق
لوجين بصوت عالي : اوكي شوي وارجع .. دقايق بس .. وترد تكلم اورنج .. ايه واخبارك بعد
اورنج : ابد والله .. وش السالفه من يبيتس
لوجين : هند تناديني عشان نبي نسوق
اورنج : والله ؟
لوجين تبتسم : ايه والله
اورنج : سياره من بتسوقون ؟
لوجين : جيب اخوي
اورنج : والله الوناسه داجين انتو
لوجين تضحك : نستانس وش ورانا
اورنج : سمعي لولو بسألتس ؟
لوجين : اسأل
اورنج : يدورن البنات انتس تكلميني
لوجين : لا .. ولا وحده تدري
اورنج : اها زين وياليت ماتقولين
لوجين : انا مابقول بس ليش؟
اورنج : بس كذا مااحب تصير مشاكل مثل المره اللي راحت وتكبر الامور على شي ماله داعي ..حتسي صح ؟
لوجين : اهاا .. ايه صح
اورنج : اخليتس الحين ياقلبي
لوجين : اوكي اكلمك بالليل
اورنج : اوكي .. يالله قلبي ابي بوسه الحين
لوجين ضحكت : امووواااه
اورنج : يااااالب قلبتس .. احبتس
لوجين : وانا بعد ..
اورنج : يالله حبيبتي
لوجين : وانا مالي بوسه
اورنج يضحك : لتس احلى بوسه .. امووووااااااه
لوجين : شكرا
اورنج : العفو
نور طلعت ناديها وعصبوا عليها : لوجين لو ماجيتي بنروح
لوجين : لا لا جايه .. يالله قلبي مع السلامه
اورنج : مع السلامه
وقفلت وراحت لهم
هند : خلصتي ياهانم ..
لوجين تضحك : ايه خلصت
نور: والله بغينا نخليك
لوجين : والله ياويلكم
عبدالرحمن دق على نور: يالله وينكم
نور: يالله يالله طالعين
اتفقوا ان البنات كلهم يسوقون بس كل مره يكون معاهم واحد من الشباب ..
اللفه الاولى كانت لوجين اللي تبي تسوق وجنبها فهد وبالمرتبه الثانيه هند ونور .. ركبت لوجين وسمت بسم الله .. ولفت على البنات : تمسكو زين .. فيها نرجع وفيها مانرجع
فهد يضحك : فال الله ولا فالك
نور: اقول اذا من اولها كذا بنزل انا
هند : والله ماتنزلين .. لو نزلتي بنزل معك
لوجين : لا والله انت وواياها ولا وحده بتنزل والموت مع الجماعه رحمه وتضحك ..
قبل لاتحرك لوجين عبدالرحمن طق القزاز وفتحت له الشباك
لوجين تخشن صوتها : وش بغيت يالاخو
عبدالرحمن يناظر عيونها ويبتسم : اقول عندي اقتراح ثاني
فهد : وشو ؟
عبدالرحمن : اللي مايسوقون يتوزعزن على المرتبه اللي ورا واللي بعدها وكل مره نبدل .. شرايك
نور : ايه احسن كذا
هند : يعني بنجلس ورا انا وانت يالخبله
نور: يالله هنوده حركات بزران.. وش المشكله .... عادي
لوجين تناظر عبدالرحمن وتضحك : عطلتنا يالاخو ..
عبدالرحمن : ماعليه اصبر علينا شوي ياكومار..
لوجين : وجع وش كومار
عبدالرحمن : كذا شكلك يقول ان اسمك كومار.. هاا شقلتو؟
فهد : عادي بكيفكم انا مايفرق معاي الوضع
عبدالرحمن نادى على ماجد اللي دخل الخيمه وركبوا كلهم سوا .. عبدالرحمن وماجد المرتبه الثانيه وهند ونور المرتبه الاخيره ..
لوجين كانت تسوق وحاضنه الدركسون ومقدمه المرتبه بالحيل .. قال عبدالرحمن : لوجين انتبهي لا تطلعين من القزاز
الكل ضحك .. لوجين : بالله اسكت تراني يالله يالله متمالكه اعصابي احس اني بدخل بأقرب جبل
فهد يضحك : أي جبل مافي جبال قدامك
لوجين : يمكن يطلع لي فجئه
هند ماتت ضحك : ليه جني ..
نور تضحك : بسم الله علينا
فهد يلف ويناظر هند ويضحك : تحصني ياهند ..
ماجد قلبه ياكله على نور اللي ماهي معطيته أي اعتبار .. ونور حاسه فيه بس قالت بنفسها هو اللي طلب مني انسى كل شي قبل لا يصير شي .. وعشان ترفع ضغطه قالت لفهد : فهد مافي شريط اغاني عندك
فهد : الاشرطه مليانه وش تبين انتي
نور: اختار لي على كيفك .. اللي يجي منك حلو
فهد : اوكي وصار يحوس بدرج الاشرطه
لوجين ماتتكلم ابدا وتطالع طريقها وبس
عبدالرحمن : خلاص لوجين وقفي اللي بعدك يبون
لوجين : امانه بس شوي
عبدالرحمن : يرحم والديك يالوجين دورتي راسي بالفلفه .. انت منتي بحاسه انك جالسه تلفين بنفس المكان من اول
لوجين : خايفه امشي قدام ونضيع
عبدالرحمن يضحك : ليه تضيعين بملاهي انت
فهد لقى شريط : نور ينفع طقاقات
نور: الله عز الطلب .. من الطقاقه
فهد : اكيد موضي مافيها كلام
عبدالرحمن : ياشيخ تسلملي.. شغله
ماجد : دقيقه قبل تشغلونه .. يالله لوجين وقفي
لوجين : طيب .. وقفت ونزلت .. من اللي تبي تسوق اللحين
نور : انا انا
الكل نزل من السياره عشان يتبدلون الاماكن الا هند طبعا اللي ماتغير مكانها ,, ركبت نور وجنبها اخوها .. وتلف عليهم ورا وتجي عينها بعين ماجد : هااا جاهزين ؟!
هند ولوجين بصوت واحد : ايه
قبل تمشي نور قالت : ابي شماغ ياشباب
عبدالرحمن : ليش
نور: بس كذا
فهد : لا ياابو الشباب روق
نور تضحك امانه ابي شماغ
هند : اعرفها تبي تعيش الجو
لوجين : نونو تكفين لا تعيشين جو وحنا نعيش باقي العمر معاقين
عبدالرحمن يضحك : اعوذ بالله
نور: يالله ابي شماغ .. وتلف لفهد : ياخي مافي شماغ لك بالسياره
فهد : لا والله مافي شماغي بالخيمه .. ويناظر ماجد : انت مارميت شماغك هنا امس؟
ماجد : والله مدري
لوجين : دقيقه اشوف يمكن ورا ؟
وتلف وبالفعل تلاقيه مرمي ورا بس رايح فيها .. سحبته : هه خذي لقينا شماغ
لوجين عطته ماجد وماجد ناوله نور وعينه مانزلت عنها مسكته وقالت : نظيف ؟
ماجد : ايه نظيف بس من امس راميه بالسياره
نور :والله شكله مايطمن بس بلبسه .. وتلبسه وتناظر المرايا وتلثمت وشمت ريحة شماغه اللي مغرقها عطر وتنهدت .. ودارت عليهم .. وقاصده بكلامها البنات : شرايكم
هند : الله يلعن ابو شكلك لو انك ولد تجنن عيونك
ماجد يطالع عيونها ويقول بنفسه صادقه ياهند : تهبلين
نور: انا اقصد البنات
فهد ضحك : لقط وجهك
ماجد تضايق وبصوت مو مسموع : هين يانور
عبدالرحمن دق نور: يالله عاد زودتيها..نور: اوكي
ودعست بانزين وايدها على القير عشان تتحكم بالسياره وهي تعرف تسوق من زمان ومااااشيه بشكل حلو ومتحكمه بالسياره زين وماجد مستغرب منها .. قال فهد : ماشالله تسوقين زين
نور: ايه كم مره سقت قبل كذا
فهد : وين سقتي؟؟
نور: كم مره بطريق جده .. وبعد لما نروح سوريا ولبنان اسوق
لوجين : ونااااسه يانونو
نور: ايه احساس يجنن
عبدالرحمن : وش احساسه احساس سواقين
الشباب ضحكوا على كلمته
نور: بالعكس احلى شي بالحياه السواقه تحس انك حر
هند : طيب يانور لا تاخذين راحتك بالحيل في غيرك يبي يجرب اذا انت مجربه
نور تضحك : طيب وش فيك ميب طايره السياره
هند : طايره ولا زاحفه ههههههههههه
نور: يامصخك ههههههههههههه
عبدالرحمن : ياشينكم يالبنات .. يالله نور خلاص وقفي يكفي
نور: طيب وهي باقي ماشيه
هند يرن جوالها وتطلعه من جيبها وكشرت وعبست بوجهها
لوجين : من؟
هند بهمس : هذا حسن له كم يوم يتصل غثني
لوجين : وليش ماتردين عليه
هند : ماابيه ولا ابي ارد عليه
لوجين : ليش
هند : بس كذا .. اسمعي انا براسي فكره وابي اسويها وانت معي
لوجين : اوكي بس وش هي ؟
هند : بعدين لما نوصل افهمك
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك