رواية عذبتني باسباب فرقاك -37
مريم وقف واختل توازنها مره وحده حست بدوخه مو طبيعية ورمت روحها على الكرسي مرة ثانية وغمضت عيونها وحطت يدها على جبينها
يوسف اتبهدل وراح لها مريم شفييج ؟؟ تعبااانه ؟؟
مريم ما ردت بس هزت راسها بالنفي
يوسف بخووف أوديج المستشفى ؟؟
مريم فتحت عيونها لا شوية دوخه ما يحتاج .. عادي اكيد نزل ضغطي اليوم ما تريقت الصبح ..
يوسف وهو يدقق في ويهها حتى ويهج صاير أصفر .. أمير شافج جذي ؟؟ شاف لون ويهج ؟؟
مريم وهي مكشره وباين عليها التعب أمير مسافر .. صار له أسبوع بنيوزلندا ..
يوسف فاتح عينه محد قال لنا ؟؟ اشلون يخلييج بروحج في البيت ؟؟
مريم تفتح عينها وتغمضها كل شوي تبي تخف الدوخة معاي الخدم مو بروحي .. يالله خل نمشي ..
يوسف مسك يدها يمشيها اوكي بس .. لازم تاكلين قبل ..
مريم زين يالله .. ناكل بالمستشفى ..
يوسف اي مستشفى ؟؟
مريم يوسف شفييك ؟؟ بنروح نشوف حبيبتك على قولتك .. انا صارلي يومين ما مريتها ؟؟
يوسف ابتسم ابتسامة شكر وطلعوا من الشركة بسيارته لانه ما رضى مريم تسوق وهي تعبانة جذي ..
في المصح
كانت كعادتها قاعده بالحديقة مسندة ظهرها على الكرسي ورافعه ريلها الثنتين وضامتهم لصدرها ودمعتها على خدها
شافها وهو طالع من جولته داخل المصح ابتسم ودار ويهه على الممرضة خلاص روحي شوفي شغلج ..
راح قعد يمها ويراقب عيونها كانت صافنه برسام يعاني من اكتئاب شديد صارله سنين بالمصح مو قادر يطلع كان ماسك فرشاته وألوانه ويرسم أشياء مبهمة خطوط مالها نهاية وأشكال غريبة
كانت ملامحها هادية ومو حاسة بأحد غير الهوى اللي يداعب خصلاتها
صفن معاها وحاول يخترق افكارها شفتي حياته وين تبدأ ..
مي انتبهت له بس ما دارت ويهها ولا تغير شي بويهها
هشام وعيونه على الرسام أول ما يحط الفرشاة تبدأ الحياه عنده وكل شي يرسمه .. كل شكل من الاشكال يعبر عن معاناه مرت بحياته ..
مي دارت ويهها له باهتمام تبي تتكلم بس مو قادره عطته نظره بمعنى كمل
هشام كان يطالعها وعيونه تلمع يحس بسعاده لما يعالجها لف ويهه مره ثانية على الرسام شوفي ذاك الخط .. مو قادر يوقف قاعد يطوله ويطوله لانها حاس ان السبب باللي هو فيه .. شي بداخله يحسسه هالاحساس .. ان هذا اللي يرسمه هو سبب أحزانه ومعاناته .. كل واحد يا مي عنده هالاحساس .. انتي بعد يا مي عندج هالاحساس عبري عن معاناتج بطريقتج .. لا تكتمين بقلبج .. سوي اللي تبينه .. اي شي يخطر على بالج .. اي شي مثلا اي سبورت انتي تحبينه .. كتبي .. اذا تحسين انج بتقولين اللي بقلبج كتبيه .. مو لازم أحد يقراه .. كتبيه بعدين شققي الورقه .. حرقيها .. قطيها بأي مكان .. أهم شي تعبرين ..
مي قامت ومشت عنه بخطوات سريعة وكأنها اقتنعت بكلامه ..
هو ابتسم لان حس بتحسن حالتها وقام من مكانه
وصلوا المستشفى ونزلت مريم وهي حاسة الدنيا كلها تدور فيها
يوسف كان حاس بس ما حب يضايقها وقال يمكن من فراق أمير ضعفانه وما تاكل وداير راسها
وصلوا لغرفة ساره لانهم طلعوها من العناية بعد ما استقرت حالتها دخلت مريم ودخل وراها يوسف
راحت باستها على جبينها ومسحت على شعرها وقعدت يمها سوسو حبيبتي .. انا مريم .. تسمعيني ؟؟ انا ادري انج تسمعيني .. ساره انا تعبت اصحي .. مليت بروحي انت هني ومي هناك .. لاتخلوني بروحي ما اقدر على فراقكم .. حتى يوسف تعب كل يوم معاج وينام عندج .. قعدي شوفي حالته ضعف .. اذا تحبينه قومي خليه يشوفج ويشوف عيونج .. ساره قومي .. الحياه جدامج .. انسي اللي راح .. لا تضيعين عمرج أكثر وانتي نايمة .. السعاده تنطرج .. حبيبج معااج .. يبيج يا ساره .. اصحي .. خلاص ما تعبتي نمتي وايد ..
يوسف راح وقعد يمها على السرير وحط راسها بحضنه وبدى يغني لها مثل كاليوم
عذبتني باسباب فرقاك
ظالم وأنا في الحب مظلوم
قلبي جبرني امشي وياك
وش حيلتي والقلب مغروم
تجفي وتتغلى ونهواك
وتزيدنا حراة وسكون
وحنا شراة العين ندراك
تبخل علينا وانته تروم
راح الزمن وانا برجواك
وبدرب ودك صرت ملزوم
دنياي تتبسم بدنياك
وتروح مع طلعتك لهموم
مريم ابتسمت له وطلعت من الغرفة تبيه ياخذ راحته معاها
يتبع
مريم ابتسمت له وطلعت من الغرفة تبيه ياخذ راحته معاها
نزلت الكافتيريا وشرت لها سندويج وعصير قعدت تبي تاكل فتحت السندويج وقربته من فمها تبي تاكل شمت ريحة اللحم وحست بمعدتها تقلب حطت يدها على فمها وركضت لاقرب حمام تبي ترجع .. حاسة بغثيان مو قادره تتحمل بس ما قدرت ترجع غسلت ويهها ومسحته بالكلينكس وطلعت من الحمام بس ما قدرت تواصل أكثر داخت وحست الدنيا سوده وتلف في عيونها ما تشوف احد
وطاحت غشياانه على الارض وعند باب الحمام من برى
ألتموا عليها الناس اللي يتفرج واللي يبي يسااعدهاا ونادوا على الممرضين وشالوها بالترولي على غرفة الطوارئ
بعد ربع ساعة تقريبا صحتها الطبيبة المناوبة اشلونج مريم ؟؟
مريم تطالعها بثقل وتعب انا وين ؟؟؟
الدكتورة انتي طحتي ويابوج هني قسم الطوارئ ..
مريم تحاول تقوم طحت .؟؟؟ وين طحت ؟؟ وليييش ؟؟؟
الدكتوره وهي تحاول ترجعها على ورى وتسدح راسها على المخده مريم ارتاحي لا تقوميين .. انتي ييتي مع من ؟؟ لانهم خذوا شنطتج عشان يعرفون هويتج .. وتتسجلين ..
مريم وهي حاطة يدها على جبينها ييت مع حماي اخو زوجي ..
الدكتورة وزوجج وينه ؟؟
مريم وهي مغمضة عينهاا مسافر ..
الدكتوره تهز راسها بضييق اشلون يسافر ويخليج وانتي على هالحال .. افف .. انا بحولج على الطبيبة المختصة وهي تقرر ..
مريم بملل اي طبيبة ؟؟ واي مختصة ؟؟ ومن قالج اني تعبانة .. عطيني شنطتي ابي ارد البيت ..
الدكتوره وهي حاملة تقرير علاج مريم اذا بتطلعين على مسؤوليتج .. لازم توقعين اول ..
مريم جلست نفسها بتعب انتي شقاعده تقولين ؟؟ اوقع على شنو ؟؟ انا ما فيني شي .. شوية دوخه عاااادي ..
الدكتوره بحزم هذي الدوخة ترى خطيرة عليج .. افرضي انج طحتي بالشارع ولا بمكان خطير .. لازم تاخذين العلاج ولا راح تتعبين أكثر
مريم بإستسلام خلاص مو مشكلة .. وين اروح ..
الممرضة دخلت وهي جاره الويل جيير تفضلي قعدي هني .. انا بوديج هناك ..
مريم مستنكره وجود الويل جير اقدر امشي ما يحتاج
الممرضة احسنلج عشان ما تتعبين في المشي وتدوخين ..
مريم ابتسمت ابتسامة شكر وقعدت على الكرسي والممرضة ردت لها الابتسامة وجرتها
وصلوا لقسم المختص ودخلت مريم على طول
ابتسمت لها الدكتوره لانهاا كانت تنطرها هلا مريم .. حياج ..
مريم مو فاهمه ليش هي بهالمكان اصلا قامت من على الويل جير وقعدت على الكرسي اللي مواجه الدكتوره
الدكتوره وهي تقرى ملف مريم من متى وانتي جذي ؟؟ يعني تييج هالدوخة والغثيان ؟؟ وتفقدين وعيج مرة وحدة ..
مريم وهي تمشط شعرها بأصابع يدينهاا تأفأف بملل عادي انا تيني هالحالة وايد .. ادوخ بسرعة يمكن ضغطي ينزل ولا قلبي تنزل او ترتفع نبضاته احس بدوخة واطيح ..
الدكتوره بدون لف ودوران مريم انتي حامل ...
مريم تكمل سوالفها ولا انتبهت لكلام الدكتوره بس عادي .. ما له داعي ايي هني اصلا
الدكتوره علت صوتها انتييييي حـــــااااااامل ..
مريم مو مستوعبة فتحت فمها وعيونه مصدومة من اللي حامل ؟؟
الدكتوره وهي تبتسم انتي يا مريم حامل .. مبروك
مريم وقفت على طولها وهي تأشر على نفسها انـــــــــــاا ؟؟!!!!!!!!!انااااا حـــــــااااامل ؟؟؟؟؟
الدكتوره استغربت من مريم وكبر صدمتهاا اي انتي .. عشان جذي تدوخين وايد لان نسبة هرمون البروجستون وايد كبيرة والحمل متقدم ..
مريم رمت نفسها على الكرسي للحين تحت تأثير الصدمة اي حاااااامل .. واي هرمون .. انتي شقاعده تقوليين .. انا مستحيل احمل ...
الدكتوره قامت من على مكتبها يالله تعالي بوريج عشان تصدقين ..
مريم مو قادره تسوي ولا شي بعدها مصدومه راحت بخطوات بليده وانسدحت على السرير تستجيب لطلب الدكتورة
الدكتورة حطت الجل على بطن مريم وبدت تحرك الجهاز بالالترساوند وهي تبتسم لمريم ..
على عكس مريم كانت في دوامة كبيرة ما تشوف غير أمير في عيونها تخاف وتغمضها مره ثانية
كسر عليها دوامتها صوت الدكتوره شوفيه .. هذا البيبي .. شوفي أطرافه .. هذول يدينه وريله .. وهذا راسه ..
شغلت الصوت وهني كانت مصيبة مريم لما سمعت دقات قلبه سالت دمعتهاا من طرف عينهاا شنوو هذااا ؟؟؟
الدكتورة حاسة في مريم واشلون خاايفة هذا قلب البيبي .. ما شاءالله كل شي تمام وانتي حامل بالاسبوع العاشر .. يعني قربتي تخلصين المرحلة الاولى من الحمل ..
الدكتورة مسحت بطن مريم من الجل وقامت عنها
مريم مو قادره تمسك نفسها ولا تتحكم بدموعها حاطة يدها على بطنها وتمسح عليه بنعومة حاسة نفسها بحلم
نادت عليها الدكتوره تعالي يا مريم ..
جلست قعدتها ومسحت دموعها بظهر يدها ومسحت شعرها بيدها وقامت راحت قعدت على نفس الكرسي
الدكتورة وهي تكتب لها الادوية انتي لازم تاخذين هذول الفيتامينات ..........
مريم وقفت اشلوووون احمل ما يصير ؟؟ ما يصييير ؟؟؟
الدكتوره ليش ما يصير ؟؟؟ عشان اللولب يعني ؟؟
مريم قعدت وهي فاتحه عينها اي .. انا حطيته عشان ما احمل .. قالو لي انه اضمن شي عشان ما احمل .. واللي يركبونه ما يحملون ..
الدكتورة وناس وايد يحملون عليه .. يعني مو ضمان .. بس انتي ليش ما تبين تحملين ..
مريم بخنقة لو كان بيدي كنت حملت من أول شهر .. بس زوجي رافض ..
الدكتورة ليييش رافض ؟؟ احد يرفض نعمة الابوه ؟؟
مريم تمسح دموعها انا مريضة .. قلبي ضعيف ما يتحمل ..
الدكتورة بأسف اووووه .. سوري .. والله ما كنت ادري .. مو مكتوب عندي بالريبورت .. عموما اذا تبين تنزلين الحمل .. بدخلج العمليات حالا .. بس اول توقعين على مسؤوليتج .. لاني ما اقدر اسويلج العملية على مسؤوليتي ..
مريم هه .. انزل الحمل ؟؟ يعني اذبح ولدي ولا بنتي ؟؟ لا ما ابي ..
الدكتورة زين عيل خليني اشيل اللولب عشان الرحم يتمدد على راحته ويكبر البيبي ...
مريم بتردد وهي حاطة يدها على بطنها يصير ما اشيله ؟؟ اخاف يكون خطر على البيبي .. يعني اذا شلتيه ..
الدكتوره يفضل انج تشيلينه .. لا ان شاءالله ما في خطر .. دقايق ونخلص .. روحي اتسطحي داخل وخلي الممرضة تساعدج
مريم ابتسمت وطاعت كلام الدكتورة
وفي أقل من خمس دقايق والدكتورة مخلصة يالله يا مريم .. الحين كل شي طبيعي .. بس انتي اهتمي بأكلج .. حاولي تغصبين نفسج لو على شي بسيط .. حتى لو رجعتي اهم شي تاكلين .. واذا لقيتي نفسج ودج تنامين نامي .. انتي محتاجة راحة .. انا عطيتج أدوية اخذيها بعد الاكل واللي عن الدوخة قبل الاكل بربع ساعة .. والله يتمم لج على خير ..
مريم ابتسمت لها بسعاده ان شاءالله ..
مريم طلعت من الطوارئ وراحت لغرفة ساره وهي تبتسم لكل واحد يطلع بويهها ويدها على بطنها
دخلت عليهم الغرفة لقت يوسف راقد يم ساره ابتسمت له وخذت سويج سيارته وطلعت من المستشفى كله ما تدري وين تروح من فرحتها صارت تلف الشوارع أكثر من مره ودخلت المول وقررت تشتري شي للبيبي .. ومن فرحتها أشترت أشياء مو شي واحد .. طلبت لها أكل وقعدت تبي تاكل بس مو قادره كلما تفتح فمها تلاقي نفسها تضحك
رن تلفونها ابتسمت وردت هلا يوسف ...
يوسف مريم انتي وينج ؟؟ انا صارلي 3 ساعات راقد ..
مريم بضحكة قلت اخليك ترقد شوي .. خذيت سويج سيارتك وييت اسوي شوبنغ ..
يوسف شوبنغ وانتي تعبانة .. اشلون تسوقين ؟؟ انتي ما تخافين ترد لج الدوخة مره ثانية ؟؟؟
مريم عادي يوسف .. اكلت شوي وصرت احسن .. اذا تبي السياره برد الحين ..
يوسف لا ما ابيها .. انا بظل هني مع ساره .. تدرين بهالوقت ما افارقها ..
مريم زين تعال خذها من البيت ..
يوسف زين .. انتي ديري بالج على نفسج ..
مريم اوكي ..
سكر يوسف وهو مستغرب سعادة مريم المفاجئة ..
مريم خلصت على المغرب وراحت بيتها القديم تنطر عيال عمها وقفت السياره ودارت ويهها لورى لقت أجياس وايد .. كلهم للبيبي .. اذا ودتهم بيتها بشوفهم أمير .. ما حبت حتى تفكر بالموضوع .. هرنت على الخدم وطلعوا لها
أمرتهم ياخذون الاغراض غرفتها القديمة وهي راحت مكتب أبوها تفتح الخزنة
طلعت منها الوصية بس ما فتحتها كانت تنطر بدر وفاطمة والمحامي طبعا
وصل المحامي وبدر بنفس الوقت وهو استغرب وجود المحامي
كانت مريم قاعده تتصفح بكتاب كان ابوها وايد يحب يقراه كانت تتذكره وتترحم عليه وبنفسها بابا .. رحت ولا شفت عيالي .. بابا انا حامل .. انت الوحيد اللي تعرف .. ما قلت لاحد غيرك .. حبيبي اشتقت لك وين ما تكون .. ادري انك تسمعني لانك بقلبي عايش ما رحت عني ..
طقوا الباب ومريم مسحت دمعة ذكرى من على خدها وابتسمت تفضل ..
دخلوا كلهم مع بعض سلام عليكم ..
مريم وقفت تصافح المحامي وتصافح بدر هلا .. وعليكم السلام .. تفضل استاذ رائد .. بدر وين فاطمة ؟؟
بدر طالعة مع ربعها .. ليش في شي مهم ؟؟
المحامي فتحتيها ؟؟
بدر مو فاهم شي يبي مريم تفهمه يأشر لها بعيونه شسالفة ومريم ترد عليه بعيونها يعني انطر ..
المحامي يالله .. نفتحها ونشوف .. بسم الله الرحمن الرحيم .. احم .. انا السيد محمد تقي علي أكبري .. وبكامل قواي العقلية .. اكتب لكم وصيتي بوجود محامي الخاص السيد رائد الياسين .. ابنتي الوحيدة مريم اني اترك لك ثلثي ثروتي وأرصدت حساباتي في البحرين وخارج البحرين .. بالاضافة الى ممتلكاتي المنقولة والغير منقولة في البحرين وايران ولبنان .. الى جانب ما تركته لك وسجلته بإسمك وانا على قيد الحياه .. مريم اني اطلب منك الذهاب الى شيرااز لزياره امك .. فهي حية ترزق ولم تمت .. لم اخبرك بذلك لانها هي من طلب مني .. اما الثلث الاخير من ثروتي فإني اهبها تركة لابناء اخي بدر وساره وفاطمة ..
بدر فتح عينه مو مصدق ومريم ابتسمت له
المحامي وهو يكمل لقد اودعت مبلغ وقدره 25 مليون دينار في حساب ابن اخي الاكبر بدر أحمد أكبري .. ليبدأ بها حياته .. وبحساب كلا من ساره وفاطمة مبلغ 10 ملايين دينار .. كما اني قد سجلت له ولاختيه حصص في شركة أكبري بنسبة 30 % له 20 % ولاختيه 5% لكل واحده .. مريم انا اعلم انه من بعدي انت ِ وحيده وانا اردت بهذا الارث ان اقربك أكثر من ابناء عمك .. لم اترك لامكِ شي لانها رفضت تريد فقط العيش بعيداً ورؤيتك بين الحين والاخر .. اتمنى اني قد أرضيتك وارحت نفسي بعد مماتي ..
المحامي سكر الوصية ورجعها في الظرف وسلمها بيد مريم هذي وصية ابوج يا مريم .. اللي صارلج سنة ونص وانتي تأجلينها .. انفذها ؟؟
مريم طبعا .. ما يبيلها كلام .. عيال عمي ياخذون حقهم بالكامل .. ويورثون حالهم من حالي ..
المحامي وهو قايم وحامل شنطته على خير ان شاءالله اجهز كل الاوراق الرسمية واتصل لكم ..
مريم اوكي .. بس بنات عمي وحده قاصر والثانية مريضة ..
المحامي مو مشكلة اخوهم يكون الوصي عليهم ..
مريم وقفت تسلم عليه خلاص عيل .. بس لو سمحت عجل بالموضوع ابي انفذ وصية ابوي ..
المحامي ان شاءالله يومين بالكثير .. يالله فمان الله ..
مريم في امان الكريم ..
طلع المحامي ومريم راحت قعدت يم بدر بدر شفييك .. طول الوقت وانت ساكت ..
بدر تنهد بضييق ليش عمي سوى جذي ؟؟ انا ما ابي فلوس .. انا مرتاح جذي .. مريم ما ابيهم ..
مريم هذي وصية ابوي مستحيل ما انفذها يا بدر .. بتوقع وبتاخذ حقك اللي ابوي ورثك اياه كامل فااااهم ..
بدر قام ودار جسمه عنها وغلب على صوته نبرة باكية شسوي بالملايين ومي راحت .. راحت يا مريم
مريم وقفت له ومسكت جتفه مي موجوده ما راحت مكان ..
بدر راحت .. راحت من يدي يا مريم .. انتي عبالج اذا ردت نفسيتها بترضى فيني .. اكيد ما بترضى .. مستحيل تصدقني وتجذب عينها ...
قعد على الكرسي وحط يدينه على راسه مستحيل .. انا خسرتها خلاص .. خسرتها
يتبع
قعد على الكرسي وحط يدينه على راسه مستحيل .. انا خسرتها خلاص .. خسرتها
مريم لا يا بدر .. مي تحبك .. وان شاءالله تتحسن حالتها وترد لك .. وبتعرف الصج .. وبتكون مرحلة صعبة بحياتكم بتعدونها على خير وبتتزوجون ..
وحطت يدها على بطنها وضحكت لدرجة ان بدر استغرب من ضحكتها هههه .. وبتيبون عيال بعد ..
بدر ابتسم كلامها بعث فيه الامل تهقيين ؟؟؟
مريم اكيد .. يالله روح لها .. انا سمعت ان الدكتور سمح لك تشوفها من بعيد ..
بدر تحمس وتشجع اي .. اي .. زين انا بروح .. خدا حافظ ..
مريم خدا حافظ ..
ضحكت مريم وطلعت وراه بترد بيتها ظلت طول الطريق وهي تسولف مع البيبي فرحانة ومو مصدقة ان اللي داخل قاعد يكبر فيها روح الله خلقها تجمع بينها وبين حبيبها كانت طايره ومو حاطة في بالها شي حتى أمير ما فكرت بردة فعله او شنو ممكن يسوي اذا عرف
وصلت بيتها ونزلت من سيارة يوسف وعطت الهاوس كيبر السويج عشان اذا مر ياخذ السويج منها
ركبت الدور الثاني بالمصعد ودخلت غرفتها وكانت ظلام كعادتها مدت يدها تنور الغرفة الا وحست بأحد ضامها من خصرها بقوه خافت وشهقت بصوت عالي
مريم ما قاومت لانها شمت ريحته وحافظه ضمته
حملها من خصرها ومشى فيها لقريب السرير ونزلها على راحة ونزل باسها
مريم كانت مو مصدقة أمييير ؟؟
انسدح يمها وصار يمسح على شعرها بحنان يا روحه ..
مريم متفاجئة متى رديت ؟؟؟ مو المفروض ترد بعد أسبوعين ؟؟ ليش صار شي ..
أمير وهو يشم خصلاتها الظهر .. وبعدين خلاص ذبحني الشوق .. ما قدرت ابعد عنج .. مينونة اسبوع وانا ما ارقد تبينهم يصيرون ثلاثة .. تبين يردوني جثة ..
مريم كشرت في ويهه فال الله ولا فالك .. اسم عليك حبيبي .. يومي قبل يومك ان شاءالله ..
ابتسمت وباسته في خده بنعومه ليش ما قلتلي .. جان رحت يبتك من المطار ..
وبنفسها اشوى اني نزلت الاغراض هناك
أمير أشتقتلج .. ما قدرت انطر يخلص المؤتمر خلصت شغلي وييت بسرعة .. تعالي ..
مسكها من خصرها ونومها على بطنه
مريم ارتبكت خافت على البيبي ورفعت نفسها بسرعة
أمير ما اهتم لحركتها وسحبها هالمره أقوى
ومريم صرخت عليه أميييييير ..
أمير توى منتبه لملامحها وباين انها متضايقة من حركته شفييج مريم ؟؟
مريم لفت عيونها عنه ما فيني شي .. بس انت سحبتني بقوه ..
أمير بلهفة وخوف تعورتي حبيبي ؟؟؟؟
مريم ابتسمت له وحطت يدها على بطنها لا حبيبي ..
شافته هادي حبت تجيس نبضه أموووووري ...
أمير يطالعها بحب يا قلب أموووري .. تعرفيني امووت اذا تناديني أموووووري ...
مريم مدت ذراعه وحطت راسها على صدره اذا سويت العملية وحملت شتبي يكون عندنا بيبي بنت ولا ولد ؟؟
أمير باس جبينها وهي على صدره اذا سوينا العملية يصير خير ..
ما كان يبي حتى يفكر بالموضوع ولا يتنااقش فيه
مريم بدلع زين .. خلنا نسولف ..
أمير يجاريها زين اذا بس نسولف ما عندي مشكلة ..
مريم بحماس زين قول ..
أمير وهو رافع حاجب وااحد ومستنكر سؤالهاا شقول ؟؟
مريم زادت جرعة الدلع أوووه أمير شتبي نييب بنت ولا ولد ؟؟
أمير مغمض عين وفاتح عين يفكر اممم .. ما ادري .. ودي بولد اسميه سلمان على اسم ابوي .. وودي بنت تشبهج شعرها اسود فاحم وطويل وناعم مثلج وبشرتها بيضا وعيونها ..
طالع عيون مريم مثل عيونج حلوه وبريئة ولونهاا فااتح ...
مريم ارتاحت شوي ان يفكر بالموضوع وتحمست أكثر زين الولد سلمان .. والبنت ؟؟ شنو بنسميها ؟؟
أمير ليلاه .. أحب هالاسم وااايد ..
مريم ليلاه ؟؟ يعني شنو ؟؟
أمير حبيبتي هذا اسم فارسي .. ما سمعتي فيه ؟؟
مريم هزت راسها بالنفي
أمير نوع من انواع الشجر ينبت بشمال بفصل الخريف ولون أوراقه لون الذهب وبالصيف يقلب على الاخضر وشكله وايد حلو .. انتي شتحبين ؟؟ ولا ما تبين تسمين ؟؟
مريم وهي تتأمله لا حبيبي .. انت الابو وانت اللي تسمي ..
أمير ضمها لصدره يا بعد عمري ... انتي بعد امهم ومن حقج تسمين .. لكن هالحجي لاحقيين عليه توى الناس
انقلبت ابتسامة مريم الى تكشيره أمير ؟؟
أمير قولي حبيبتي ..
مريم غصت بريقها لو احمل قبل العملية ؟؟
أمير غمض عينه وبان عليه ان تنرفز رفعها من فوق صدره وقام حتى بالحلم لا تحلمين .. انا جاريتج وقعدت اسولف معاج .. مو معناه انج تفكرين بالموضوع ..
مريم لمت شعرها على جهة وحده وحاولت تتدراك نظراته زين واذا صار ؟؟؟
أمير على صوته هه .. ينزل طبعا .. مو محتاج أجادلج بالموضوع أكثر .. انا مو قاعد على اعصابي أكثر من خمس شهور واخليج تاخذين مانع عشان تحملين ..
مريم سالت دمعتها من كلامه وبدى يغلب على صوته بحة بكاء لييييييييييييييش ؟؟؟
أمير راح لجهة الدرسنغ روم مريم احنا خلصنا من هالموضوع .. سكريه احسن توني راد وتعبان .. ما لي مزاج ..
مسحت دمعتها وقامت مشت وراه ما تبيه يحس بالموضوع وضمته من وراه بخصره حبيبي آسفه حقك علي .. ما كنت ابي اعكر مزاجك ..
أمير خلاص مزاجه تعكر بس ما حب يكسر بخاطرها مسكها من يدينها لفها واخذها بحضنه اهم شي ما تفكرين بالموضوع .. أحبج ..
ونزل شفاايفه على رقبتها وشمهاا بنفس طويل
مريم بضييق ان شاءالله ..
أمير يحاول يغير الموضوع هاا .. سولفي لي شسويتي بغيابي ؟؟
مريم ولا شي يا بالشركة او المستشفى او المصح ..
أمير رفعهاا من حضنه بس ؟؟
مريم ابتسمت له اي .. وتصالحت مع يوسف ..
أمير اي صح .. ليش انتي يايه بسيارته ..
مريم تورطت اي .. عادي .. رحنا بسيارته المستشفى .. وهو رقد يم ساره وانا طلعت خليتهم ياخذون راحتهم ..
أمير عبس في ويهها بس ماييتي هني لاني نطرتج من الظهر ..
مريم خافت من نظراتهاا واشلوون ملياانة تساؤلات اي رحت بيتي .. فتحنا الوصية .. ما بتصدق شكاتب بابا فيها ...
أمير وهو يطالعها بشغف شكاتب ؟؟
مريم ثلث ثروته لعيال عمي بدر وساره وفاطمة .. والثلثين الباقيين لي ..
أمير وهو رافع حواجبه متعجب اوووه زين .. يعني بدر صار مليونير ..
مريم اي بحسابه 25 مليون ونسبته بالشركة 20% اما ساره وفاطمة عطاهم كل وحده 10 ملايين ونسبه 5% .. تصدق كاتب لي بالوصية ان ماما عايشة يعني لو فتحتها بعد وفاته كنت عرفت ..
أمير ضمها لصدره بقوه زين يستاهلون .. المهم انج عرفتي ..
مريم بادلته حضنته بس بدر يقول ما يبي فلوس .. ولا يبي شي .. يبي مي تردله ..
أمير صار يمايلهاا ان شاءالله تردله .. وساره ترد ليوسف .. وانا حبيبتي دوم بحضني ..
مريم غاصت بين ضلوعه انا على طول بحضنك حبيبي ..
أمير نزل شفاايفه وباسها في رقبتهاا أكيد .. اذا قلتلج احبج وما ابي غيرج يدخل حياتي مو غلطان ..
مريم رجعت لها نفس ابتسامة الحزن اللي قبل شوي انرسمت على ويهها ورفعت نفسها بالتدريج عشاان ما يحس أمير .. انت قلت بعد ما نسوي العملية تبي .. ليش تقول جذي ..
أمير صار يبعد خصلاتها لورى اذنها أحبج انتي يا مريم .. حتى لو يبتي لي ياهل ما بحبه كثرج .. ومستحيل اخليج تحملين وانتي تعبانة ... واذا فرضنا صار لازم نجهضه .. هذا عشانج يا روحي .. ما ابيج تزعلين مني .. انا اسوي كل هذا لاني احافظ على حياتج يا قلبي ..
مريم ابتسمت له وباسته خلاص .. انت اخذ شاور وانا بنزل اشوف العشى ..
يتبع
مريم ابتسمت له وباسته خلاص .. انت اخذ شاور وانا بنزل اشوف العشى ..
أمير يغمز لها ويضحك ضحكته الخبيثة اقوول مريومي .. انا تعبان مو قادر اتسبح بروحي .. تعالي سبحيني ...
مريم وهي تسرع خطواتها أمووور يوز .. ودش تسبح بروحك ..
أمير مسكها من خصرها ريلج على ريلي ..
مريم بدلعها المعتاااد اميييييييير .. لاااااااا .. ههههههههههه انزين .. ههههههههههههه ما اقدر عليك ..
أمير سكر باب الحمام اكيد ما بتقدرين ..
بعد ثلاثة أيام
نزلت من السياره زين يا يوسف .. وصلنا والله وصلنا احنا تحت في الباركات .. هدي اعصابك .. اوكي يالله باااي ..
لفت ويهها له أميير .. بسرعة .. باقي شوي ويوقف قلبه ..
أمير وهو يقفل سيارته بالريموت شصااير ؟؟
مريم راحت له وشبكت يده ما ادري بس نوصل نعرف ..
فوق في غرفة ساره
يوسف خلاص فقد أعصابه وقااام يصيح بصوت عااالي صحوها .. لاتخلونها جذي .. سوو لها اي شي .. حرام عليكم قاعده تختنق .. بدر قولهم يصحونها ..
بدر وعيونه على اخته معورة قلبه انطر يا يوسف الحين بيي الدكتور ..
وصلو مريم وأمير
مريم بخووف شصاااير ؟؟ ساره شفييها ؟؟
شافت شكلها وشهقت بصوت عالي وطاحت نظارتها من يدها ليش تسوي جذي ؟؟
أمير قرب منها وفتح عينها باصبعه اممم .. قاعده تصحى ..
يوسف ارتفعت انفاسه وصار يشاهق بصوت رايح تصحى ؟؟؟ يعني حبيبتي بتفتح عينها وبتشوفني وبشوفها ؟؟
أمير يتحسس نبضاتها اي .. هي بس قاعده تحلم حلم مزعج .. وان شاءالله بتصحى منه ..
مريم راحت وقفت يمها ساره .. ساره تسمعيني ؟؟ ساره انا مريم .. كلنا هني معاج .. بدر وأمير .. ويوسف ما فارقج ولا يوم ... تخيلي سارووه يوسف الشري خطبج من بدر .. وبدر وافق .. قومي شوفيه .. شوفي حبج شسوى فيه .. ضعف ودمعته ما فارقت عينه .. خلاص يا ساره حني علينا كلنا .. ترى كلناا مشتااقين لج ..
بدر أمير .. بتطول ؟؟ انا ما اشوفها تحلم اشوفها تتعذب ..
أمير ان شاءالله تصحى .. انا اشوفها بدت تهدأ شكلها بترد تدخل بغيبوبة يديده ..
الكل انصدم من كلام أمير
بس ساره صارت تتكلم بصوت عالي وترفع يدينها وكأنها تحاول تتمسك بشي ابــــ .. ابـــــــي امووووووت .. خلووووني .. ما ابي اطلع .. ما ابييييييي .. كح كحححح
دخل الدكتور المناوب دكتور محمد أمير ؟؟؟ عسى ما شر ...
أمير صافح الدكتور هلا دكتور .. انا اشوف ان الحالة قاعده تصحى من الغيبوبة ..
الدكتور المناوب قرب من ساره وقعد يفحصها مثل ما سوى أمير اي صح .. قاعده تصحى
ثواني وشهقت ساره بصوت عالي بصوت عالي وفتحت عينها
ابتسم الدكتور المناوب ورفع عينه على كل الموجودين حمدلله على سلامتها ..
نزل عيونه عليها ساره ؟؟ تسمعيني ؟؟
ساره ما كانت تشوف غيره .. تشوف دموعه اشلون تنزل بدون احساس تذكرت شي حطت يدها على رقبتها ما لقتها جلست روحها وقامت تصرخ دمعتيييي .. وين دمعتيييي ؟؟؟
الدكتور المناوب انسحب من غرفتها
بدر راح ومسك يدينها يبي يهديها خلاص حبيبتي .. لا تصرخين ..
ساره كانت تصيح بهستيريا وعيونها عليه وين دمعتي بدر .. ابي دمعتي .. مريم ابي دمعتي ..
يوسف طلعها من جيب جاكيته ووراها اياها دمعتج عندي حبيبتي ..
ساره سحبتها منه بالقوه ودارت ويهها عنه مريم لبسيني اياها ..
مريم مسكتها ولفتها على رقبتها
يوسف حس بصدها وجفاها عنه مسك يدها وهي سحبتها عنه بالقوه
مريم أشرت لامير بعيونه انهم لازم يطلعون ويخلونهم يتفاهمون وطلعوا وخذوا معاهم بدر
والغرفة فضت عليهم
ساره ما كانت تبيهم يطلعون ويخلونها بروحهاا معااه ما كانت تبيه يختلي فيهاا بس ما تعرف شنو اللي منعها
يوسف قعد على طرف السرير ومسك يدها وهي سحبتها لكنه تمسك فيها أكثر ساره انا أحبج .. والله أحبج .. حبيبتي ارحميني 5 شهور وانا اتعذب .. تعبت فرقاج موتني .. شوفي حالتي ..
ساره ويهها على الجهة الثانية انا ليييش هني ؟؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك