رواية بلا رقيب -27
ميشو :المعذره ..
وجلست لم أعرهن انتباهي ولم تجذبني همساتهن للنظر اليهن اكتفيت بأحتساء شرابي والكتابه على ورقة الأمتحان التي تفاجئت عند جلوسي على الطاوله باني مازلت احملها بيدي..
احسست بيد تستقر على كتفــي ..
هدى :مرحبا شوشو حياتي كيفك ..
كلا يألهي ليست هي ..
قبلت خدي وهي تجلس في المقعد المجاور لي ..
ميشو :مرحبا هدى ..
هدى :اشوى تذكرتيني احسبك نسيتيني ..
ميشو :بالتأكيد لاوكيف يحدث ذالك ..
ارسلت يدها لتنزع نظارتي ولكني كنت اسرع منها ومنعتها عن ذالك ..
هدى :اشبك ميشو ياقلبي اشتقت لعيونك زرقاء خليني امتع عيني بشوفتها ..
وقفت بالسرعه وأنا اضع حقيبتي على كتفي ..
ميشو:اعذريني هدى يجب علي الذهاب ..
امسكت بيدي ..
هدى :لاميشوو تكفين اجلسي انا ماصدقت اشوفك ..
سحبت يدي بقوه ..
ميشو :ارجوك علي الذهاااب ..
وحينما خلصت يدي منها ..
ميشو :الوداع ..
وأخيراً تخلصت من الآمي بعد مراجعتي للعياده العيون .. اعرف انه تخلص مؤقت ولكنه يتيح لي الفرصه لتفكيـر بأحوالي .. فعلها السافل وكما في الفتره الأخير حطم كل توقعاتي وفعل مالم اتوقع ان يقوم بفعله ..بكل وقاحه كشف كل مارتكبـته لم تخذله شجاعته كما توقعــت .. ادهشني بتناقضاته يعترف بأمور وأخرى يستتر خلفهاويخشى كشفها الى العلن .. تسألت هل أخبر والدي كيف كانت ردت فعله هل سارع للقول انه قد تبرىء منا كعادته .. او قام بشتمي وسبي وأخبره بأنه سيأخذ له حقه منــي .. مااذا حدث .. هل أخبر والدته .. ماذا عن سوسو صديقتي العزيزه التي خدعتها ومازلت اتفنن بخداعها هل اخبرها ماذا فعلت وكيف كانت ردت فعلها .. هل تشتم بأبنة زوج امها وترغب بالأنتقام منها لصالح شقيقها هل تنعتني بأقبح الألفاظ كعادتها عندما تكره شخص ما وتتخذ منه موقف ..
فجأه شعرت بأن هناك امر غريب يحدث ..
ميشو :سفر ماذا هناك ..؟!
سفر :هذا في سياره هدي (حدي)انا ..
كلا يألهي السفله مالذي يريدونه ..
ميشو :سفر ارجــوك ضاعف من سرعتك ..
سفر :فيه اشر انا وقف ..
ميشو :كلاا سفر ارجوك لاتفعل ذالك ...
لأعلم مالذي يريدونه منا لماذا يلاحقون سيارتنا ويطلبون من سفر التوقف ويجبرونــه بمضايقاتهم للسيارتنا على ذالك ...
سمعت صوت انفجار تسبب بأهتزاز السياره ... شيء ما اصطدم بالرأسي ادى الى فقداني للوعــي .. ولم اعد اشعـــر بالحيـاه ..!!!
((5))
(..ذكـريات ..)
عسـاف ..
دق علي خلف وقال اجيــه بالمستشـفى وماقال وش فيه ولاوش يسوي بالمستشفى رحت له بالســرعه .. اول مادخلـت المستشفى دقيت عليه ..
عساف :الوو خلف وش فيك وينك انت ...
علمني بمكانه رحت له بالسرعه دخلت عليه ولقيت نايم على السرير ورجله مجبره ..
عساف :وش فيها رجلك ..
خلف :انكسرت ..
جلست على الكرسي اللي جنب سريره ومديت يدي بلمسها .. بس هو مسك يدي بالسرعه ..
خلف :وخر يدك ..
عساف :كيف كسرتها ..
خلف :زلقت بالحمام ..
عساف :اكيد عقلك ماكان معك ..
خلف :وش تبي من هالكلام ..
عساف :ولاشـي متى قالوا لك تقدر تطلع ..
خلف :مادري ماسألت ..
عساف:اهلك يدرون ..
خلف :لاا كنت قايل لهم اني بسافر ..
عساف :كنت بتسافر ماقلت لي ..
خلف :ماكنت واثق ..
سكتت شوي ويده على رجله المكسوره ..
خلف :طلقتها ..
عساف :وشووووووووووووووووو ..
خلف :طلقت الهنوف ..
عساف :زوجتك الجديده ..
خلف :اييه ..
عساف :وليه حرام عليـ ..
قاطعني ..
خلف :هم اللي طلبوا مني ...
عساف :اهلها ..
هز راسه بنعم ومارد علي ..
عساف :ندمان ..
خلف:بالعكس مرتااح ..
عساف :امك درت ..
خلف :ايه من قبل وهي قايله لي اطلقها ..
عساف :يعني جاء الطلب على هواكم .. ومن الضحيه القادمه ..من خطبت لك امك ..
خلف :ولا أحد وش هالسؤال ..
جلسنا عشر دقايق ساكتين ..
رفعت يدي ورى راسي وتسندت عليهن ورفعت رجولي على السرير .. وتذكـرت ..
ضحى :وش التخلف هذا ماتسمع انت اقوولك خذ ولد اخوك وانقلع ..
كانت واقف قريب من الباب وساكت مارديت عليها ذهوولي بالحوار اللي بين خلف والواطيه سالب كل عقلــي كانت تهينه وترمي عليه كلام اللي مافيه ذرة رجوله يحس بالأهانه منه ..كنت مركز على الأخير انتظر اللحضه اللي بشوف فيها راسها بين يدين خلف بعد ماقصه لها ..وهي تسب وتشتم فيني برد عليها بس ماقدرت الموقف شادني للآخر درجه ماصدقت عيوني يوم شفت خلف وهو يغرز اصبعه بعينها توقعته قلع عينها من مكانهــا يوم سمعت صرختهــــا ..
تصرف خلف رجع لي شوي من الثقه فيــه وانه مازال خلف اللي اعرفه ...
ظربتني على كتفــي بقوووه ..
ضحــى :ياحيوووان انقلع اطلع بررررررررررى ..
وخرت يدهاعني ..
عساف:اقدر اكسر لك يدك هذي بس مراعي انك مو على بعضك ادبي اختك عشان مايتكرر مثل هالموقف ...
ضحــى :اختي اللي يبي لها تأديب ولا ولد اخوك والله لأدفعه الثمن الحيوووان ..
عساف :هي اللي جنت على نفسها وش تبغى بالرجال تفضحه اصلاً هي لو فيها ذرة احترام او اخلاق ماسوت اللي سوته ..
ضحى :كلكم حقيرين مثل بعضكم اطلع الله لايوفقك انت ويااه ..حسبي الله عليكم وش تبغــوون فينا مضايقينا بعشتنا وش تبووووووون فينا اتررركوووونا انسووووونا نساااكم رب العاااالميـــــن ...
طلعت يوم شفتها فاقده اعصابها دايم اشوفها مسيطره ساخره بارده بس المره ذي كانت اعصابها منهاره تدعي تسب تشتم توقعت باللحضه من اللحضات انها بتجلس تصيح منهاره ...
رفست رجل خلف المجبره بقهررر ...
خلف بالصرخه :عسااااف لااااااااااااااااااا ...آآآآآآآآآآآآآآآآه ..
عدلت جلستي ونزلت رجولي من على السرير ..
عساف :تستاهل بسببك تهاوشت مع زوجتي ...
رد علي وهو ماسك رجله ووجهه منعفس من الألم ...
خلف :حسبي الله عليك انت وياه .. اصلاً انت ماكنت متهاوش مع زوجتك بالأسم ..
تنرفزت من كلمــته حسيت فيها طعنه للرجولتي ...
عساف :احتررررم نفسك ..
وبزفره كملت ..
عساف :تعايرني ياولد صالح قسم بالله لو مانت بهالحاله كان عرفت كيف ارد عليه ...
وطلعت قبل ماسمع اعتذاره اللي جالس يردده ..
ياهي حاله حتى خلف يعايرني خللف وللد اخووي وانا اللي ماعتقدتها تطلع منه بيووم ..
استاهل كل هذا بسبب تهوري ليش تركتها ليش سافررت كله عشان زوجوني ايها غصب طيب زوجوني عمتها من قبل غصب وش اللي أختلف ..
مأنلاام كنت توني طالع من مصيبة مووت زوجتـي وبنت مريضه بالمستشفى بين الحياه والموت يجوون يزوجوني الله يسامحك يبه الله يسامحك ياعمتـــي غصبتونا على بعض وشوفونا للحيــن بعد ست سنوات ندفــــع الثمـــن ..
تذكـــرت
يســرى :ابوي يبغاك تأخذ بنت مبارك ..
انصعقت فالبدايه بعدين جلست اضحك ..
يسرى :وش فيك تضحك كل هذي فرحـــه ..
عساف :فرحه هههههههههههههههههههههههههههههههههههههههه ياحليلك بــس فرحه يبغاني اتزوج بنت مبارك وهذي كم عمره 13 سنه والا اربعتش ..
يسرى :عمرها 18 سنه لااتقووول صغيره يوم أخذت عمتها كانت اكبر منها بالسنه وحــده ..
عساف :وانا كنت اصغر من عمري اللحين بالسنين ..وش فيه ابوك استخف شغال خطابه يمووت لو ماصار عرس... عنده مبارك خل يزوجه ولا ابوك يخرب من جهه ويصلح من جهه مبارك ياخذ ارملة ولده وبنت مبارك انا اخذها بس معصــــــي الا هنا وبــــــس ...
يسرى :وش فيك هاااب بأبوي .. هو ماجاب الشور من عنده البركه بعمتك وحفيدتها المصون اللي ماستحت على وجهها حاطه عينها على زوج عمتها وقدام الناس تربي بنت عمتها عشان ماتعذب مع وحده غريبه ..
عساف :والله عاد شور ابوك وعمتك واحـــد قولي لهم لو تنطبق الأرض على السمــاء مأخذتهــا وبنت عمتها على قولتهم خليها تعيش اللحين بعد نشوف من بيربيها ..
ضغطت على جوالي بقوووه وانا اشوف الصوره اللي داخله صوره التقطتها بلحضة غفله منها ضحى وهي ماسكه يد شدن راجعات من مشوار .. ربتها أيه ربتها بعد ماتزوجتها غصــب وسافرت وخليتها ارجع عشان القى زوجتي المنفيه مربيه بنتي المنســــيه ..
حركت سيارتي وانا افكر ان ضحى ماهي موجوده يعنـي اقدر اشوف شدن واتكلم معها على راحتي ويمكن اخبرها بالحقيقيه شدن ماغيرها هي اللي بتقربنـــي من ضحــى هي نقطة ضعفهــا ولازم استغلها لوكسبت حب شدن بابتز ضحــى فيها وبنشــوف يابنت مبارك يأنا يأنـتــي ..
((6))
(..أحساس أم ..)
ضحـــــى
رتبت المواعين اللي غسلتهم بعدماجففتهم بأماكنهم بالدولاب .. دخلت علي عمتــي ام مهــا زميلتي بالمدرسه واللي ساكنه معهم بالنفس البيت ..
ضحـى :هاه عمتي ام ناصر تامرين على شــي ..
ام ناصر:ايه جااي بسويلي شاهي ..
اخذت الغلايه من يدها ..
ضحى :خليه عنك انا اسويه ..
ام ناصر :لاوالله يابنيتي انا اللي بسويه تعبناك من مرضت مها وانتي اللي تقومين بشغل البيت لحالك ..
ضحــى :من كبر البيت ياعمتي خليه عنك بس وبعدين انتي مثل امي ومستحيل اخليك تشتغلين وانا موجــوده ..
ضحكت على نفـسي مثل امي لامستحيل ام ناصر الطيبه تكون مثل امي هذي مثال الحنان والطيبه ينبووع الصفا والمحبه مثل امــي اللي يكفي عشان تكون قاسيه انها تزوجت مبارك ..
ام ناصر :أجل مادامك مصره يابنتي سويلنا براد ولـ احمـد براد ..
ضحى :ان شاءالله من عيوني روحي انتي ارتاحــي ...
سويــت الشاي لنا ولأحمــد وحطيت زمزميته عند باب غرفته بعد ماطقيت عليه الباب وقفلت الباب الفاصل بين غرفته وبين الصاله .. ورجعت للمطبخ واخذت الشاي حقنا والمكسـرات ورحت فيها عند ام ناصـر ومها بالصاله ...
بعد ماصبيت ل ام ناصر ..
ضحى :مها تبغين شاي..
كانت نايمه ومتغطيه فبطانيه لها يومين على هالحال حرارتها مرتفعه وبس تستفرغ ماندري وش فيها وديناها للأقرب مستوصف من هنا وكان بقريه ثانيه اكبر من هذي عطوها خافض للحراره ومضاد حيوي بس مانفعنها حالتها نفسها ماتغيــرت ..
ردت علي بصوت مرتجف ..
مها :لاماني مشتهيه .. ابي عصير ليمون ..
ضحــى :عصير ليمون لا ذبحتي نفسك فيه من مرضتي ماتشربين غيره وش رايك اسوي لك شوربه ..
هزت راسها بالنفــي ..
ام ناصر :وديتي ل احمد مكسرات تراه يحبها ..
ضحــى :لا تشغله عن المذاكره ..
ام ناصر :ياحليله احمد من جينا هنا ماعنده غير المذاكره الله يراحم ايام كنا بالرياض الكتاب مايفتحه الا ليلة الأختبار نص ساعه ثم رماه ..
ضحــى :خواتي مثله واردى مشكلة هالجيل مايفكرون الا بحاضرهم ومتعتهم الحاليه مايفكرون بالمستقبل وقد ايش دراستهم هذي بتنفعهم فيه ..
قطع كلامنا كحه حاده من مها ..
سألتني أم ناصر بصوت مكسور وخوف واضح على بنتها ..
ام ناصر :انتي متأكده يابنيتي ان هاللي فيها ماهو انفلونزا الطيور اللي يحكون عنها بالتلفزيون ...
ضحى :لاتطمني ياخالتي ماهي انفلونزا الطيور اللي فيها هذي صخونه عاديه ..
ام ناصر :قلبي ماهو مطمني يقولون بالرياض اعدموا دواجن كثيره كلها مصابه ..
ضحى :حنا وين والرياض وين وان شاءالله ماراح يصيبنا الا اللي الله كاتبه لنا ...
أم ناصر :العيال بالرياض ماعاد يأكلون دجاج معتمدين على لحم الغنم وسمك والربيان ..
الحمدالله خواتي مايأكلن دجاج كثير هي مره بالأسبوع .. المره ذي لنزلت الرياض بشتري خروف انعبي فيه الثلاجه والأكيد اسعارهن اللحين مرتفعـــه ..الله يعين ...
زادت كحة مها وقمت اجيب لها عسل ممزوج بعصير الليمون يمكن يخفف عنها الكحه ..
وأنا امزج لها العسل مع الليمون طاحت الملعقه من يدي وسببة صوت حاد عااالي .. سميت بالله وأنحنيت أخذها خلصت اللي بيدي وطلعت أعطيه ام ناصر تطعمه مها ورجعت المطبخ ماقدرت اجلس معها وانا بحالتي ذيك.. قلبي يخفق بقووووه الم حااااد خوووف ماله مبررر يارررب عفوووك يارب جلست اسبح واستغفــر .. معقوله قلقي هذا بسبب حالة مهااا الله يشيفهاا ويعافيهاا .. لااا هالأحساس مايجيني الا لشــي يتعلق بخواااتي .. يارب سترك ياررب ..
استغفرالله ولاحول ولاقوة الا بالله اللهم إني أعوذ بك من الهم والحزن ، والعجز والكسل والبخل والجبن ، وضلع الدين وغلبة الرجال ...
نهاية الحلقــــــــــه
الحلقه السادسه والعشرون ..
((1))
وافتها المنـيــــــه
ضحــى
مسحت دمعه نزلت من عينـــي غصب يااااااه ماكنه مر شهــر على موتها كل ماحاولت انساها جاء اللي يذكرني بموتها .. مات سندي بهالحياه مات ازري مات ظهري ,, آآآآآه ياصعـب الحياه من بعــدها كل ماتذكرت انها خلااص راحت وماراح ترجـــع تخنقنـي العبره وتظلم بعيني الدنيا وأحس ان حياتي أنتهـــت .. كيف اقدر اعيش من بعــدها كيف اكل اشرب اتنفس اعيش وهي خلااص ماعادت بالدنيا ماتت ماتت ياصعــــبها من كلمــه .. ليش راحت وتركتني لمن خلتنــي .. من بعدها بستمد منه قوتــي مااااني قادره اوقف على رجلــي ماني متصوره انه خلااص مالي ظهــر أنا بــس مالي عــون بهاالدنيــا.. هي كانت سندي قوتــي ظهــري للأسودت الدنيا بوجهــي وضاقت علي تذكرتها كلمتها سألتها تذكرتها وأنشــرح صدري وقوت عزيمــي .. انا وهــي واحد كلاً قالي اني مثلها اشبه لها تفكيري نفس تفكيــرها عقلي مثل عقلها قوتي نفس قوتها بأختصار هي قدوتي وأنا تلميذتها .. واللحين راحت وتركتني ماعادت لـــي قدوه ولامصدر قووه .. غصب عني ضعفت وانهــرت عشت حياتي كلها تحت ظلهـــا .. يوم كنت قويه امر وأنهي وأتحكـــم بمصير الكل كانت هي تحكمنــــي هي كبيـــــرتي واللحين ماعاد لــي كبيــر .. لييه راحت
لييييه حتى لوكان وجودها مثل عدمه حتى لوكان الكل ماهو حاس بقيمتها يكفي انا حاسه وعارفه قيمتهــــــــا..
ملاك :ضحــى ضحـــى ..
مسحت عيونــي وبلعت ريقي ..
ضحـى :خيررر ..
ملاك :سويت لك عصير ليموين تبين ..
وجت تحط كأس العصير على المكتب وانا بكل نرفزه رميتــه على الأرض وانكسر الكوب واللي فيه انكب على الموكيت ..
ضحـى :من طلب منك تسوين لي عصيـر ..
ملاك :حسبتك مزكومــه ضحى انتي ماتبكين على ....
قاطعتها ..
ضحــى :ماالك دخل فيني خليك بنفسك اصلاً انتم من متى كان عندكم احسـاس .. من فيكم حس فيها أوحبها رغم كل اللي كانت تسويه لكم ..
ردت علي سارا بصوت باكــي ..
سارا :حرام عليك لاتقولين كذا حنا نحب جدتــــــــــــي نحبها..
لفيت عليها بقهر ودموعي تنزل ..
ضحــى :لااتقولين تحبينها لاتكــــذبين .. كلكم كذاابين ماكنتم تحبونهااا ماحد حبها ولاأحد عرف قيمتها غيــــررررري .. جدددددددتي خلاااص رااااحت راااااااحت حبكم اللحيين بأيش ينفعهااا ..
مـلاك :خلاااص ضحى كفااايه حززن اللي تسوينه ماراح يرجع جدتي ..
سارا :موت جدتي كان رحمه لها من عذاب الأمراض ...
رحمه لها ولالك هذا اللي تبادر بذهني بس ماقلته اكيد انبسطت سارا بموت جدتي هي ماكانت مرتاحه يوم جدتي عايشه وبصحتها كانت دايم تفضل ملاك عليها .. سارا تكذب علينا تكذب على الكل ماحزنت عليها مثل ماتقول وتمثــل هي تكررره جدتي تكرهااااا .. كلهم يكرهون جدتي لأنها كانت مسيطره عليهــم محد كان يحب جدتي غيـــري أنا انا وبــس احب جدتي ...
ملاك :ضحىى خلااااااص كفااايه اصحـــي البيت من غيــرك مايسوى خواتي ماحنا قادرين عليهم ...
سارا :ضحــى خواتي امانه برقبتك كلنا امانه برقبتك لاتضيــــع وتضيعينا ...
جملـــة سارا هزتنـــي من داخــل حسيت نفــسي بغيبوبه وصحيت منها أمانـــــــــــه خواتي امانه برقبتــي من قبل خمس سنين جدتي مامنتني عليهم وحاولت قد مأقدر أحافظ على هالأمانه واللحين بهالشهــــر كنت بدمـر كل اللي بنيتــــه ... حطيت راســي بين يديني بأخر عتاب لجدتــي آآآآه ياجدتي ليه رحتي وتركتيني من للي اللحيـــن من بعدك يااربي والله ماني قاادره أتحمــل خلاااص تعــبت ... المسئوليه ثقيله والله ثقيلـــه قبل كنت اسوي كل اللي اسويه بظـــلك اللحين ماني قادره اخطي ولا خطــوه احس نفســي تايهــه .. شهــر كامل وانا بغيــبوبه لاني صاحيه ولاني فاقده للوعـــي وش بسوي اللحين ماني قادره اصحى اوقف على رجــولي صعب الأمر علي صعــب تفكيري بجدتي مأزمنــــي ... آآآه يالتنــــــي بعيده بعيــده الف الكيلو مترات عن هالمكــــــان .. بس انا هنا وبهالمكان بكل مافيـــــه لازم اقاوم نفــسي وانفض عني الآلم وأرجع لقــــوتي .. ماهو لايق علي دور الضعيفـــه نفسـي ماهي راضيه باللي اسويه فيها عزتـــــــي تنهاني اني اهينهــا بضعفــي ..
بس يلزمنـــــي انام وبعــدها اصحـــى بعد ماستعــيد قوتي وأجهز دفاعاتي فيه ناس كثير تنتظــر مني المحاســـــبه وأولهم زوجي العــــــزيز ..!!
((2))
ساحرنــــــي
مـلاك
صعبه كثير حالتنا من ماتت جدتي وهذي حالة ضحــى صراخ عصبيه ونرفزه بسبب وبدون وخواتي مايحتاج اقولكم انهن يستفزن حتى بارد الأعصـاب .. صار البيت متكهرب وكنك بساحة حرب الكل يبي يمسك شـي على الثاني كلن يبي يصارخ وينفخ يأمر وينهـي ماعاد فيه أحترام بالعربي بيتنا ماله كبيـر موعشان جدتي ماتت لااا لأن ضحــى تغير حالها صارت تسرح وتغيب عن الواقع بالساعات مأدري ايش تفكــر فيه وترجع ساعتين للواقع بعصبيه غير عاديه والشــي هذا افقدها الكثير من قوة شخصيتها وأحترامها بينــا..
كثير اشياء تغيرت بالشـهرهذا وكأن اللي مر علينا مو شهــر سنــه.. فالبدايه أنهرت وخصوصاً ان سارا مره أنهارت وأثرت علـي كثير بس بعد أسبوع قدرنا نتمالك انفسنا وعرفنا ان حياتنا مستمره بجدتي ومن غيرها حاولنا نرجع البيت مثل ماكان بس هذا حدوثه شبه مستحيل مع خواتي اللي مايقدرونا ويشوفونا معهم بنفس المرتبه .. وكان ملجئنا بيت خالتي اللي صرنا نقضي فيه طوال ساعات النهار ومانرجع الا بالليل عشان ننام في بيتنا ..
بعد الموقف اللي صار لي مع ضحـى طلعت انا وسارا لبيت خالتي اللي كنا مقررين مانروح له اليوم لأن خالتي بتطلع بس بعد اللي صار قررنا نروح هناك مو لازم تكون خالتي هناك اهم شـي نبعد عن هالمكان ..
اشياء كثيـره صارت تشدني في بيت خالتــي وخصوصاً وبكل صراحــه المزيون عــــم ود آآآآآآآآه يابنات ياهو عذاب جميل جميل بكل ماتعنيه كلمة جميـل يالناس ياعالم عمري ماتوقعـــت ان على الدنيا انسان بهالجمال الفضيع هذا مستحيل يكون بشــر عااادي .. بس اللي قاهرني وحارق دمي انه هو نفسه اللي شفناه بمقطع بجوال ود وكان يغني ويبكــي آآه يالقهر كل ماتذكرت الأغنيــه انحرق قلبي من هذي اللي يحبها اخخخ يالقهر .. من طاحت عيني عليه
نازل من سيارته قلبي ذاآآآآآب ظليت واقفه بمحلي وعيونه عليــه ماقدرت احرك رجولي ولاغضيت نظري .. وانصدمت ان سارا كانت مثلــي ..
سارا:ياااااه هذا بشر ولاملاك ..
رديت عليها بقهر استغربه اللحين ..
ملاك :عيييييب وش هالكلام ..
سار وهي تنهد :يخبللللللل بس جابر احلى منه ..
من ذيك الحزه عرفت ان سار معدومت الذوق ولااجابر اللي مافيه أي وسامـه احلى من ملك الجمال هــذا آآآآآآآآآه ..
سارا :سلامتك من الآآآآه ..
ملاك :آآه ياسارااا شكلي حبيته ..
سارا :اووووف رجعنا على طير يلي ملاك ماتحسين ان كلامك هذا عيب ..
ملاك :داريه بس شسوي والله قلبي يعورني لفكرت فيه احسه ينعصر وحالي ماهو طبيعي وش اسوي سارا والله اني اشفق على نفســي الله ياخذه ليتني ماشفته ..
سارا :ودي اسأل ود عنه ...
ملاك :لاتكفين سارا ماقدر اجلس وسمعها تكلم عنه احس بتعلق فيه اكثـر انا مجنونه فيه اللحين وان كل اللي عرفه عنه انه عم ود واسمه الوليد آآآآه ياحلات اسمــه ..
سارا :بس انا متشوقه اعرف عنه الصراحه محيرني المقطع اللي شفناه له ..
ملاك :لااساارا خلاص اسكتي انسي تكفين انا احاول مأفكر فيـه وأنتي بس تذكريني ..
طالعتني سارا بقهر من ورى اللثمــه ..
سارا :انا اللحين اللي اذكرك فيه ولا انتي اللي ماتسكتني عن الهرج فيه كل ماصرنا لحالنا آآه يا ساراا شكلي حبيتــه ..
الجمله الأخير كانت تقصد تقلدني فيها ..
وصلنا السواق خالتي لين باب الفيلا اللي معطيتنا خالتي مفتاح لهــا دخلنا وانا فسخت عباتي وسارا راحت تفرج على التلفزيون وهي بعباتها ..
كنت اطلع الدرج يوم صادفت خالتي نازله ووراها شغالتها شايله عبايتها وشنطتها ..
خالتي :هلااا والله .. مثل ماقلت اني يمكن اتأخر برى خذوا راحتكم واذا تبون تباتون ..
ملاك :تهاوشت مع ضحــى يمكن نبات هنا..
خالتي :هي للحين على حالها الله يعينها ..
ملاك :مسببه لنا ضيق بالبيت عصبيتها ماتحتمل ..
خالتي :اختكم وضحت كثير عشانكم تحملوها هالأيام ...يالله مع السلامــه ..
رديت عليها السلام وكملت لفوق وأنا افكر انا خالتي تحب سارا اكثر مني بس تعاملنا بنفس القدر يالله مأقدر اجبرها تحبنــي كثر سارا عاد ساارا الدلوعه تستاهل ..
بالغرفه اللي خصصتها خالتي لنا كنت واقفه بالبلكونه انتظره كل يوم اشوفه جالس بالقعده اللي هنا وعيونه على الفيلا اللي ورى فيلتهم .. مرت عشـر دقايق قبل مايجــي اليوم كان لابس كله اسود بأسود .. طلعت المنظار وناظرته ماكان يشوفني ولاعمره نظر للفيلا خالتي طول الوقت وعيونه على الفيلا ذيك اليوم على غير العاده مالبس كاب وشعره
اللي طويل شوي طالع جنــاان ..
نفس الحركـه بالجوال كأنه يتصل على أحد ومايرد عليــه أأخخ من هالغبــي .. ونفس الحركـه اللي تعذبنــي بوسته للجوال يالناس قهرر والله قهرر ودي افهم وش قصده من ورى هالحركه ..
رفع نظارته فوق شعــره وحط الرجول على الطاوله قدامـــه وغاب بتأمل طووويل للفيلااا الحقـيره صرت اكرها واكره جلسته قدامها .. بعض الأحيان تجيني افكار غبيه اني اصررخ عليه كفااااااايه تناظرها اعميت عيونك بمطالعها.. ومرات افكر اني انزل له وبس بعدين مأدري وش بقول او اسوي .. طبعاً هذي افكار غبيه مستحيل اسويها بس بلحضات مجنونه افكر اسويها وبعدين استخف الفكره ...
شفت ود جااايه من بعيــد قربت منه لين وقفت قدامــه قالت له شـي وجلست تضحك وهو معصب منها وكأن يصرخ عليها شكلها زعلت وجلست تكلم معه بالطريقه جديه ماكان يسمعها وكل تركيزه على الفيلا قدامه هزت راسها بيأس وجت تمشــي بأتجاهنا وقبل ماتوصل صدت عليه وصرخت بصوت عالي سمعته غبـــــــــــــــي ..!!
دخلت بالسرعه للغرفه خفت تشوفنــي صكيت باب البلكونه ونزلت تحت أنتظرها انا خلااص قررت انفذ اقتراح سارا الحيره بتذبحنــي لازم اعرف كل شـي عن هالأنسـان اللي ساحرنـــــي ..
تحت لقيت سارا ومعهــا ود ول عليها كيف سبقتنــــــي سويت نفسي متفاجئه فيها ..
ملاك :ود ماشاءالله متى جيتي ..
ود :منذُ قليل ..
سارا :اعقب يالفصحى كملي سالفتك بـس ..
وضح على ود النرفزه .. وش سالفته اللي مسببه له هالنرفزه ..
ود :والغبي يحبها ..
طالعت بسارا اللي غمزت لي فهمت من حركتها ماأسأل ليش مأدري ..
ود :خلونا من سالفته الغبي وش رايكم نلعب بالبلاي ستيشن بروح اجيبه من بيتنا ..
بالسرعه قلت لها ابيها تطلع مأدري ليش احس الكلام اللي دار بينهم عن الوليد ..
ملاك :اوكي يالله ننتظرك ..
ود :غريبه ماخبرك تحبينـه ..
سارا :يالعجازه قولي ان ماودك تجيبينـه ..
ود بحسن نيه :لاوالله عادي واللحين بروح اجيبه ..
قبل ماسمع صكت الباب سألت سارا ..
ملاك :وش السالفه..
سارا :شفتي ان سارا اذا وعدت فعلــت المزيون وليدوووه يحـــــــب شوق الماصله اللي ماحبيتيها بنت عمــه ..
طالعتها بالصدمـه وش اللي قاعده تقوله يحـــــــــــــــــــــب طيب وأنااااااا ..؟!
((3))
حكايــــــه ..
ميشو
سكبت القهــوه البارده على وجهها بطريقه مفاجئه الجمت لسانها ..صرخت تحت ضحكات سعاد وكريمــــــه ..
رندا :مشاعل ياحيوااانه ..
عدت لأسكب ماتبقى منها على وجهها مره أخرى ...
رند :لااااااااا ميشششو لاااا ..
ولكن كما يقال سبق السيف العذل ..
بقيت عدت ثواني تطالعني بالنظرات أستغراب على فعلتــي تلك .. قبل ان تنسحب لدورة المياه ..
سعاد :حراام عليك ميشو والله ماهي كلمه اللي قالتها خلتك تسوين فيها هيك ..
كريمه :افاا سوسو ماتعرفين ميشو ماينداس لها على طرف واللي يرشها بمااي بالدم ترشـه ..
راودني أحسـاس بمعاني خفيــه خلف جملتها تلك لم أعرها الكثير من اهتمـامي ..
كريمــه :الاصدق سوسو عندي لك عريس لوئطــه ..
سوسو :اخخخ مابيه خليه لك ..
كريمــه :لااا أنا عندي حبيب البــي توتو ..
توتو من وماذا عــــــن فارس ..
ميشو :توتو من ..؟!
سوسو :توتو متعب ماتعرفينـــــه .!
كريمــه :لااا مايصير ازعل منك كيف ماتعرفين توتو ..
يألهــي عن ماذا يتحدثن متعب من هــــذا ..
ميشو :هل تتعمدان فعــل ذلك ..
سوسو :نتعمد فعل ايش ..
ميشو :لاشــيء انسي ماحدثتك به ...
كريمــه :ميشو شكلك دايخه وش رايك ..
قاطعتها ..
ميشو :اغربي عن وجهـــي ..
لم ترد علي فقط اكتفت بضحكتها اللئيمــه ..
سوسو :كريمه والله انك خاسيــه بس عطيني سيكاره ..
كريمــه :عادي ولاا ..
سوسو :ليش شايفتني مثلك يالمحششه ..
كريمه :عن الغلط ..
وارسلت لها صندوق سكائرها ..
سوسو :والله من اشوف هالصندوق اشتهي اللي فيه ..
أخرجت سيكاره لتضعها بين شفتيها وقبل ان تشعلها .. كانت تستقر بين اصابع ريدا ..
سوسو :يالعنك ..
ريدا :من زمان توك تدرين ..
اخرجت سوسو لها سيجاره أخرى واشارت لي بواحده رفضتها ..
ريدا :بنات وش رايكم نطرد ميشو من الشله ..
سوسو :واااي وش عامله ..
ريدا :البنت عاقله ..
كريمــه :لااعااد كلوا ولاميشو مارضى عليها لوحكي هذي حبيبتي ..
ريدا :يااااااعيني على الحب.. عندي سؤال يمكن تقولون سخيف ويمكن غبي بس ابي أجاباتكم عليه ليه كلكم تحبون ميشو ..
واخذت تضحك بطريقه هستريه ..
كريمه :ريدا وش شربتي داخل ..
سوسو :ريدا اعترفي تغارين من ميشو صـــــح ..
ريدا :لاشــيء فقط مجرد تسأل .. شفتو اعرف للفصحــى خلاص ميشو ان بحكي مثلك فصحــى وبلبس عدسات ملونه وابغى كل البنات يحبوني ..
كريمـه :بتطلعين صدق جيكره ..
ريدا :اكثر من كذا مأظن هههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههه ههههههههههههههههههه ...
عادت ضحكتها الصاخبــه لتعكر ميزاجـــي لأنها تعيد لي ذكرياتي لأرغب بالتفكير فيهــــا .. يألهــي توقفي عن ذالك لأرغب برؤيته يغرس اصبعه بعينـــــــي ..صرخت بها ..
ميشو :كفــــــى ..!!
تلى صرختي صمــت قصير ..
ريدا :ميشو وش فيك ..
ميشو :لاشـيء سأخرج لأستطيع تحمــل ضحكاتك تجلب لي الصداع ..
امسكت بيدي ..
ريدا :لااخلاص حبيبتي والله بسكت ليه ماقلتيلي انك مصدعه ..
ميشو :كلااا اتركيني سأخرج ..
كريمــه :خلاص أتركيها ميشو خلي السواق يوصلك ..
هزيت راســي بالموافقه ارتديت عباءتي على عجل وحملت حقيبتي وخرجت بالســـرعه ...
المنظــر ينعــاد امام عيناي احاول ان ازيد من سرعتي لا أريد رؤيته مره أخرى لاأريد معاودة الألم .. فركت عيني من خلف الغطاء اشعر بنفس الألم فيهـــــا ..
ركبت مع سائق كريمه وطلبت منه ايصالي الى المنزل ..
بعد الحادث الذي تعرضته له مع سفر الأخرق لم اعاود الركوب معـــه أصبحت أخشى حتى المرور من جانب تلك السياره ..
كان حادث فضيع يصيبني الحديث عنه فقط بالأعياء رغم ان اصاباتي كانت سطحيه .. كان ذالك الأسبوع الاسوء بحياتي .. خلف السافل وفعلته بعيني والحادث الذي تعرضت عليه ثم وفاة والدة ابي ...
الأمور تلك جميعاً كان لها دور كبيــر بتدهور حالتي النفسيـــه ..
توقفت السياره امام المنزل .. حدثت نفسي وأنا افتح الباب بأني أخطأت بالعوده للمنزل المواجــهه مع ضحــى ليست أفضل من ضحكات ريدا المسببه لصداعـــــي ..
أستقبلتني ضحكــة الصغيره شدن وقد توقعت انها نسيت الضحك بسبب معاملة ضحى السيئه لها ...
صرخت بأسمــي وجاءت تركض الي ..
شدن :ميشو شوفـــــي بابا ايش جاب ليه .. واشارت للعصافير الصغيره داخل القفص الذي تحمله واشارت الـــــى عساااف ..
اخذت اوزع نظراتي بينها وبين ذالك السافل .. يألهي هل فعلها النذل ..؟! .. كيف تجــرأ من اين له هذه الثقـــــه ..
ولجت الى المنزل وانا احاول استيعاب ماحدث مالذي يجــري .. الم تيأس الحيــاه من معاندتنا والسيــر ضد رغباتنا ..
الم تتعــب من تلاعبــها بنا .. الم تكتفــي بماقدرته لنا من مصائب حتــى الآن ..
آآآآآه ياعزيزتي ضحــى كما اشفق عليك استغل انهيارك النذل وفعلها الجبان اجل فعلها ..
الجميع اعتقد انه اضعف من ان يفعلها .. تصرفاته منذ عودته وحرصه على عدم اخبار شدن بأبوته لها جعل الجميــع يعتقــد ان شدن لن تعلم ابداً الحقيقــــــه وهو لن يتجرأ ابداً على أخبارها ..
لـن اصمــت لن اخذ موقف المتفــــــرج عساف ايه النذل حان وقت الأنتقـــــــــــام منك الم اتوعدك من قبل صدقني ستنال ماتستحقـــه فقط هل تعتقد انا لن نخبــر شدن الحقيقه الصافيــه ولماذا لانخبرها هل يظن انا نخشــــاه ياللغباءه ..
وعد :انتي ام الفصحى وش فيك واقفه تقل تمثـــال الحريه بمدريد مادري بالدوحــه ..
تمثال الحريه في الدوحــه ..!!! .. يال حماقة هذه الصبيه اعتقد انها الأغباء على مستوى العالم ..
ميشو :أي غباء يجعلك تتركين شدن بالخارج مع ذالك السافل ..
وعد :والله وأنا اختك ياختي من ابــي شدن تجلس مع والدها وليش مع السافل اللي تكلمين عنه بس من هو سافل هذا لاتقولين واحد من عيال الجيران الجدد اللي بأخر الحاره تراهم مره غثيثين وعيالهم كثــر النمل حتى ان امهم تقول الواحد بعشرين ريال فقط وانا فكرت اشتري لنا واحد يشتغل عندنا بالبيت بس نواف قال لي انه حرام هذا يرجع ايام العبوديه والرقيق الا صدق ميشو بسألك انتي كنتي عايشه بذاك العصــــر ..
قاطعتها ..
ميشو :توقفي عن هذه الثرثره المسببه للصداع ..
وعد :تبين اسكت اشتروا لـي بلاي ستيشن النذله ضحــى خلتني انجح وخونت فينـــي..
ميشو:وماشأني أنا ..
وعد :اووووووف اصلاً انا ليش جالسه اهرج مع كتاب قواعــد ..ياويلي يقولون قواعد ثاني متوسط صعبه ياليتني مانجحت من أولى..
ميشو :وعد أذهبي وأحضــري شدن من الخارج ..
وعــد :كم تعطينــي ..
ميشو :وكم تريدين ..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك