رواية حافظ عهود الحب يومك تبيه -12
مها : ماعليه انا بتزوجه وبغير من اطباعه وش يدريك يمكن ربي يهديه على يديني
ماجد : وانتي تضحين بنفسك عشان تهدينه !! انتي قاعده تحرقين نفسك على حساب غيرك
مها( بضعف وصوت مبحوح ): طلبتك ياماجد خلني اتزوج واقنع ابوي وخالد .. انا موافقه لاتوقفون في طريقي انا كنت انفذ كل اللي تطلبونه وتامرونه انا بس ابي تحققون هالطلب لي وتوافقون تكفى طلبتك
قام ماجد منها وهو منصدم من حال اخته ..انتي اكيد فيك شىء والا وحده ماينقصها شىء مال وجمال وعايشه بأحسن حال تتزوج واحد حتى تعدله ماااادخلت عقلي يامها ما اقتعنت (ويأشر لراسه)
مها والدمع ينزل : اذا انت تبغى اللي يفرحني وافق و قل لهم يوافقون ماجد اول مره اطلبك
ماجدالتفت و قرب منها ومسك وجهها بين كفوفه وارفعه لوجهه : انتي ليه تبينه ؟ ليه قولي لي ؟
مها بنظرات كسيره ودمعاتغزيره وصوت هامس : طلبتك وافق
تنهد وتركها وهو متضايق لحال اخته تبكي عشان عبدالرحمن !!!!عبدالرحمن اللي كانت تكرهه !!طلع تايه في خطاويه مايدري وين يروح من بيعطيه حل وشور ...
اما مها (بكت من ضعفها بكت قهر ساكن بين ضلوعها بكت حظها العاثر تمنت تكون قويه مثل عهود وتكون لها شخصيه مستقله مثل العنود ..اطلقت زفرات حزن واهااات الم دمعات تغسل جفونها وتسيل خدها ..
الحزن/
حالة تجي وتروح من دون صوت !
والفرح /
دايم يجي ويروح في بلبله ،!
بعض البشر /
يختنق ويموت بس بسكوت
والبعض حزنه ليا منه حكاه يقتله !
ـــــــــــــ
راح لابوه وهو مايدري يصدق اللي سمعه !! مها تبي عبدالرحمن !!الى الان مو مصدق حاس نفسه بحلم
دخل المجلس على ابوه ..
السلام عليكم
ابو ماجد: وعليكم السلام
ماجد : يبه انا توني جاي من مها.............
( تنهد بضيق )....و هي تبيه ومصره على رائيها
ابو ماجد بضيق : هذا اللي انا كنت خايف منه ..مدري احس البنت فيها بلااا
ماجد : حتى انا مدري حاولت فيها بس هي تبيه وتبيكم تقتنعون عن نفسي ماني مقتنع ماني مقتنع (ويدق صدره)
ابوماجد: ولا انا مو مقتنع
ماجد طير عيونه : يعني بترفضه
ابوماجد :انا لو على كيفي كان رفضته من اول ماسمعت الخبر بس انا خااايف على مها ..مها حساااااسه ومالها شخصيه وفوقها ما ابي شىء يضايقها وما ابي اكسرها وانت عارف وضعها من بعد اللي صار لها انكسرت وانا ما ابغى اكسرها
ماجد : وش الحل ؟
ابو ماجد : خل سلطان يجي هو واخوه وبعدين نشوف
ماجد : ابشر
ـــــــــــــــــــــ
عصر اليوم الثاني :
نجلا :تجين عندي والااجيتس ؟
ساره : خلاص تعالي انا قلت لامي بنروح للمجمع عشان الاتفاق
نجلا: خالتي وافقت ؟
ساره : افا عليتس اقنعتها اليوم قعدت عند راسها لين وافقت
نجلا: اجل ابروح اتجهز واعلم قليلة الحلا نجودوه(نجود)
ساره : لا بتعجبها الطلعه خاصه انها بتحقق امنيتها
نجلا : وش هالامنيه الشينه !! الناس تمنى تشوف خشش زينه وهي بتشوف الشين كله
ساره :ههههههههه خليها تبرد تسبدها العوض والا الحريمه ......يالله بسرعه حتى يمدي نروح لاتنشب امتس في حلوقنا وتفر راس امي علينا
نجلا : هذا البلااا تصدقين بنات خالتي منيره يشكووووون منها يقولون تدخل في حياتهن ويقولون خلوها تفكنا من تدخلها في امورهن الشخصيه تخيلي خالي بدر وداهن الملاهي والاسواق قامت تدعي وتحوب عليهن تقول انتن سلق ماتنعطن وجه من العصر وانتن بالسوقه والملاهي خلصتن فلوس بدر انتن وجيهكن قويه مغسوله بمرق ومن هالحكي قسم بالله فشلتنااا
ساره :ايه عاد امتس غير لانها ماراحت معهم والريال مايطلع منها الا بطلعت الرووح
نجلا :اما الريال مايطلع الا الصوره طاقه اللطمه من الغبره تبطي ماتطلعها وتموت فيه حتى فلوسي اللي عطانيها عمي نايف يوم يفوز قبل امس بسباق الخيل خذتها
ساره (شهقت ):خذتها !!
نجلا بزفره : ايه قالت عطيني الفلوس والا ياويلتس
ساره : وانتي يالغبيه عطتيها على طول كشش عليتس مير وجه يستاهل..نجودوه عطتها ؟؟
نجلا : لاماعطتها قالت عمي قال هاتس يانجود لتس ماقال لامتس
ساره : خخخخخخخ تعجبني
نجلا : ايه بس طلعت امي الفلوس من عيونها ذاك اليوم امي تكلم الدكان طلبت مقاضي البيت قالت يمه ابي ببسيه قولي ليه وتسكر امي التلفون قالت انتي عندتس فلوستس اكلتس منها واللي هنا بفلوسي وانتي لحالتس وانا لحالنا
ساره : يؤؤؤؤؤ امتس والصلخ اللي يشوفها يقول تكد عليكم من حلالها !!
نجلا : اقول يالله لاتجي بعد تحرمنا من السوقه تراني اعرفها تنشب وتغث
ــــــــــــــــــــ
السلام عليكم
العنود : وعليكم السلام
ماجد: وشلونكم اليوم ؟
العنود : بخير ..وشلون الشغل اليوم ؟
ماجد : اليوم الشغل الحمدلله زين
العنود :مضايقك شىء ؟
ماجد بضيق : مها مصره تبغى عبدالرحمن
العنود فتحت عيونها : بتوافقون ؟!!
ماجد : مدري عن ابوي وش يفكر فيه بس بيقابل اليوم سلطان واخوه
العنود : انت ماتدري وين الخيره فيه ولاتضايق ابوك
ماجد بزعل: الخيره تاخذ عبدالرحمن !! انتي من صدقك تحكين !!
العنود : انا ماقلت تاخذه بس انت ماتدري يمكن يعتدل على يدها ؟
ماجد بعصبيه : هذا انتي قلتيها يمكن يمكن مو اكيد
العنود : انت معصب الحين هدي الوضع اختك عندك الى الان شف وش اللي خلا اختك توافق عليه
ماجد : انتي وش تقصدين ؟
العنود : انا ما اقصد شىء معين لكن اختك ليه وافقت ترتبط فيه رغم انه موب كفؤ!
ماجد : يعني لعب عليها بحب وغيره !!
العنود: اختك موب راعيت حركات كذا وانت عارف هالشىء ..
ماجد بنفاذ صبر : يووووووه انتي كلامك بالقطاره
العنود : هد اعصابك وماراح يصير الا الخير..بروح اجهز القهوه
ماجد : انا بروح لابوي
ـــــــــــــــــــ
سلطان : عبدالرحمن شف الحين بندخل عليهم اياني واياك تحكي فاااهم
عبدالرحمن : ليه اطرم !! والامانيب رجال حتى احكي معكم !!؟
سلطان : لو كنت رجال كان تركت ذا البلا اللي تلتحه كل ليله وتصدم بذا الجدران من الفلاحه
عبدالرحمن : اقول انت جاي تخطب لي والا تسبني !!؟
سلطان : والله لو ان ابوي ما وصاني عليك وان ربي ما يسئلني عنك والله لا اتبراء منك ولا ابتلي في بنت الناس بسبتك
عبدالرحمن : الحين تحمد ربها انا خاطبها عجوز قدها بتصك الاربعين ما اعرست وبعد تمن علينا !!
سلطان بعصبيه : اقوووووول شكل السالفه بتطول اسمع زييييييين لا تحكي ولا شىء فاااااهم ترا ان حكيت جبت العيد وطردوك واحلم احد يزوجك
عبدالرحمن : الا بعد يحبون يدهم وجه وقفى انا ماخذ بنتهم العانس
سلطان : يالليل هذا بيجيب لي الجلطه يا اخي انت فهمت وش اقول لك ؟ لاتحدني اقوم واكفخك
عبدالرحمن (يحط يدينه عند وجه لحمايته ) : خلاص ابشر اللي تبيه يصير
نزلو من السياره ..
ــــــــــــــ
سمعو الجرس واتجه خالد للباب
سلطان : السلام عليكم
خالد : هلاااااا وعليكم السلام
سلطان : وشلونك ؟
خالد : بخير وشلونك انت؟
سلطان : الحمدلله
خالد : سمعنا انك بتروح لجده ؟
سلطان : ايه كنت بروح امس بس الحجوزات فل مافيه الا يوم الاحد
خالد : اقلط حياكم
قلطهم لداخل المجلس واستقبلهم ماجد وابوه
وبعد السؤال عن الاحوال
سلطان : عمي انت عارف ان جيتنا نبي بنتك مها لولدك عبدالرحمن على سنة الله ورسوله
ابو ماجد : عبدالرحمن وش يشتغل او وشلون بيصرف عليها ؟
عبدالرحمن : انا عندي العماره اللي وارثها من ابوي تجيب لي كل سنه خير
ابو ماجد : بس ياولدي قعدت الرجال في البيت مهيب حلوووه في حقه البيت لنسوان
عبدالرحمن يصرف : ان شالله بدور وظيفه
ابو ماجد : انا عندي لك وظيفه
عبدالرحمن (والله النشبه): وش الوظيفه ياعمي
ابو ماجد : انت ماعندك شهاده لكن بدخل في قسم الارشيف عندي بالشركه
سلطان بسرررعه قبل لا يحكي اخوه : وهو مواااافق ياعمي
عبدالرحمن دق سلطان بكوعه (وبصوت واطي انا اشتغل بالارشيف هذا الناقص )
ابو ماجد : وش قلت ياعبدالرحمن اشوف الشغله ما اعجبتك ؟
عبدالرحمن وهو يشق ابتسامه على وجهه: موافق ياعمي انا حسبت ولدك واكيد الشىء اللي تشوفه بصالحي هو الصح .
ابو ماجد : خلاص اجل الله يقدم اللي فيه الخير
عبدالرحمن :طيب مها موافقه على العرس ؟
ابو ماجد :مها موافقه مبروك
عبدالرحمن وسلطان نطو يباركون لبعض ولعمهم فرحانين
اما بالجهه الثانيه كان فيه شخصين ملتزمين الصمت مجبرين اختهم تروح لشخص مايناسبها كل واحد بداخله يغلي حقد وغل وقهر من اللي يصير
قطع عليهم حبل افكارهم سلطان مبروووووك
ماجد با ابتسامه باهته الله يبارك فيك
خالد ببروده: الله يبارك فيك
ـــــــــــــــــــــــــ
مها في غرفتها من سمعت الجرس وهي تدعي ربها ان الله يبعده عن طريقها
يصرفه عنها ...تعبت من التفكير ضاقت بها نفسها حاااسه انها مخنوووق من اللي يصير كرهت عنجهية امها وتسلطها واستغلالها كرهت ضعفها وخوفها جلست على الارض طوقت ركبها بايدينها ونزلت راسها عليها تركت لمدامعها تجري على خدها يمكن يخف الالم ..يمكن اصحى ويكون حلم ...
ودي ابكي لين مايبقى دموع
ودي اشكي لين مايبقى كلام
من جروح صارت بقلبي تلوع
ومن هموم احرمت عيني المنام
انطفت في دنيتي كل الشموع
والهنا مايوم في دنياي دام
ان شكيت الحال محدن لي سموع
وان سكت الناس زادوني ملام
ــــــــــــــــــــــــــــــــــــــــــــــ
دخل عليها وهو موحاس بالدنيا من الفرحه شافها قدامه وعيونها كلها لوم وعتب
طالعها وهو حاس بنظراتها : ماراح تقولين مبروك ؟
ساره : على وشوو؟
سلطان بأبتسامه ونظره متفحصه : مها وافقة على عبدالرحمن
ساره سكرت عيونها تحاول تستوعب اللي تسمعهفتحتها ببطء : انت من صدق تكلم وافقوا؟؟
سلطان رافع حاجبه وبسخريه : ليه هالمواضيع فيها كذب ؟؟
ساره حاسه الدنيا ضاقت بعيونها مشت بخطى مثقله مصدوومه من اللي تسمعه معقوله ! ابوي وافق !ابوي !! ماني مصدقه !!!!!!!!!! ياربي وش صارفينا وش صار ! دخلت غرفة هنوف وسكرت الباب واسند ظهرها عليه وصارت تنزل بشوي شوي للارض
هنوف مفزوعه : يمه يمه وش فيك ؟
ساره بصوت مخنوق ودمع يذرف: مها مها
هنوف ودموعها تنزل : وشفيها خالتي ؟
ساره : بتتزوج وغطت وجهها
هنوف طيرت عيونها مستغربه: طيب واذا بتتزوج كل الحريم يتزوجون وش فيها !!؟؟
ساره وهي تبكي : بتتزوج عــ (وسكتت غضمت عيونه بقووووه ...*بنفسها* وش اقول لك اقولك عمك السكران !والا اقول عمك راعي الخادمات !!!!! وش اقول ياربي ..اااااااااه خليها في القلب تجرح لاتطلع لبرا وتفضح
ـــــــــــــــــــــــــــــــــ
يبا ماتحس انك تسرعت واعطيت عبدالرحمن الموافقه ؟
ابو ماجد: ياولدي البنت تحبه وانا ما ابي اكسر نفسها مها مغلوب امرها دوم ونفسي اشوف الفرحه بعيونها ما ابغى اكسر خاطرها وهي تبيه وانت عارف مها منطويه من بعد الحادثه اللي صارت .
خالد : انا اللي مستغرب البنت تغيرت 180 درجه اول لاجت سيرته تكرهه ما تطيقه والحين تبيه !شىء يحط العقل بالكف
ماجد : واللي مستغرب اكثر انها تطلب انكم توافقون !! لو كنت ما اعرف مها كان شكيت بجهه ثانيه بس مها اعرفها موب راعية حركات كذا !
تدري يبا احسن شىء انك وظفته عندك بالشركه وتحت عينك منها يعرف نفسه مراقب ومنها يحاول يثبت وجوده ان كاان عنده احساس اصلن
ابو ماجد : تمنيت ازوج بناتي من احسن الشباب لكن مها حظها الله يزينه
آآآآآمين
ـــــــــــ
ام خالد : خلاص انا بتصل في اختك واشوف وش رايها ؟
عبدالله : ايه اتصلي واليوم مهوب تطولين
ام خالد : ابشر بس قم عني تراك ازعجتني راسي يلج من بربرتك
عبدالله : سلامت راستس تبين اجيب لتس بندول ؟
ام خالد : الله يسلمك لا شوي ويهون
عبدالله : خلاص اجل انا بطلع تأمرين على شىء ؟
ام خالد : سلامت عمرك
عبدالله : الله يسلمك ..التفت لامه : يمه تراني بروح لشايب اتمصلح معه لا ينشب فيني ويهون وغمز لها ههههههههه
ام خالد : ايه تراه يدور هالايام احد يزعله
عبدالله طير عيونه : وانا عاد القراده مسويه معي صدااااقه قويه
ام خالد ههههههه اجل الحق عليه لايزعل وتخرب كل السالفه
عبدالله : طيران ههههههه
ـــــــــــــــ
هيييييييييييي انتن يالخبلات تدرون وش صار يالغبيات ؟
نجلاببروده : وش صار ياالمنتفخه ؟
نجود بسخريه : نعم يالعنز خييييير وش عندتس
ساره بقلق : ما الومكن ماتدرن وش صار ؟
نجلا(بنفس شينه) : يالليل ما اطولك انتي بتحسين والا اذلفي عن وجهي مغير مادريتو مادريتو خير وش عندتس
نجود تلفت على اختها نجلا : هذا طبيع سويره تحب تسوي عندها علم وعندي قب وخبر وهي ما عندها ماعند جدتي
ساره بزعل : اقووووول اسمعي اسمعي يا نجيدوووه امس مارحنا للمجمع ؟عشان نشوف اللي خبري خبرتس ؟
نجود : ايه
ساره : اليوم رحت مع امي لسوق تبي اغراض البيت ورحت معها
نجود تقاطعها : اكييييييييييد لازم تروحين انتي عشان تقدرين تخمين لتس بلعه والا انتي بتطوفين الزريط مايصير ماتصيرين سويره
ساره بحقد : خيييييييييير انا في وين وانتي في وين ؟
نجلا : ساره كملي ماعليتس من المهبوله ذي وتأشر على نجود
ساره : المهم شافوني وانا نازله من السياره والحقونااا لين باب بيتناااا
نجود مطيره عيونها : وانتي يالبقره وش عرفهم انه انّا اللي نكلمهم ومواعيدينهم بالمجمع وهم اصلن ماشافونا؟؟
ساره : اسمعي يالبقره بما ان امس رحنا المجمع حضرتس رديتي على الجوال وهم كانو بمحل الجوالات اللي جنب المحل اللي كنتي فيه وطلعتي من الباب وانت تسولفين مريتي من جنب باب المحل وسمعو صوتس فخلوو رفيقهم يكمل بربره معتس وتبعونا ليييييييين ركبنا السياره ولان رفيقهم بالمجمع(اللي تبربرين معه) متأخر ماقدرو يلحقونا بالسياره وش سوو ؟؟؟؟؟؟؟؟ لطشو رقم السياره واليوم شافوها والحقوووني !!
نجود بروووووعه : كذااااااااااااااااااااااااابه
ساره : والله انا خااااااااااايفه وش الدبره ؟!!
نجلا ترفع يدينها : انا مالي دخل فيكن
ساره تستهزئي : قولي قسم !! كلنا سوى
نجود تلطم وجهاااا: الحين وش نسوي !؟
ساره : ابشرتس بعد يقول عرفت انتو من ! انتي ياشوق بنت وقال اسم ابوي بس اريام بنت عمك صح ؟ و رغد بنت من؟؟ وكمل يتطنز هو ووخشته اممممم شوق واريام ورغد اساميكن اللي اخترتوها تهبببببببببببل
نجود بصدمه : وش قلتي عساتس ماخرتي اللي تعرفينه
ساره : لاااااا وين انا من قال اسم ابوي وانا طاقتني الرعده ركبي قامت تصافق تقولي محطوطه على خط 220 .. والله لو يدري ابوي والا عماني والا يوووووووووووه عبدالله وخالد وراكان موووووتنااااااااااا حلاااااااااال عند هذولا
نجلا تدق صدرها : قالته العنود لنا بس ما طعنا قالت انتن شايلات جوال حتى اذا احتجتو شىء تتصلون بس لا تنسون ان فيه شباب يستغلون الجوالات بالاتصالات ويغرونهم بالكلااااااام وا ابوانكم عطوكم الجوالات واثقين فيكم وبتربيتهم لاتضيعونها اما انتي يانجود وش ردتس لها ؟؟قلتي لها قلتي اكيد ان شالله الاموب ان شالله الاو اثقين ان ماراح نكلم مثل بنات اللي اهلهم ماربوهم !!!!!!!!
تحسفتي على كلمة ان شالله وربي عاقبناااا
ساره : اناا خااااااايفه لو درا ابوي والا عماني والا عيال عمي نااايف والله عبدالله بالذات يطحناااااااااا طحن
نجلا : بسسس تراني خلااااااص ماعاد اقدر استحمل
نجود :بعد صمت : شوفن بنحط الجوالات على الصامت اغلب الوقت حتى ما احد ينتبه لا رن الجوال ومنها لا دقو علينا وسئلو نقول غلطانين اما هم مانرد عليهم ونخليها لاطلعنا بدروجنا حتى ماننكشف
ساره : بس كذا بننكشف بسهوله خاصه امتس تحب تفتش وتدور على الزلات وحب الاستطلاع لو مشتغله في الجمارك اصرف لها
تمنيت ارحل لعالم عليه الفاتحه تقرا...
ورفض موتي يواجهني بوجه القادم المخفي...
ياترى شفتو جسد ميت ورفض يستقبله قبره...
انا هذي معاناتي واظن اللي مضى يكفي..!
ــــــــــــــــــــــــــــ
البارت العشرون
ـــــــــــــــــــــــــ
ماكل من يضحـك بوجهـك يحبـك
تضحك اوجيه اقوام وقلوبهـا سـود
كم ضاحكٍ قدمك اليـا غبـت سبـك
لو يعجبك هرجه اليا صرت موجـود
ترك الردي علاج روحـك وطبـك
وملايمـه ذلـه وشرهـه ومنـقـود
طبع الـردي وقـت الشدايـد يكبـك
مثل السحاب اللي بلا بـرق ورعـود
وخـل اعتمـادك واتكالـك بربـك
واحرص على رفقة هل الطيب والجود
الووووو
السلام عليكم
العنود : هلاااا وعليكم السلام
ام خالد : وشلونتس ؟
العنود : الحمدلله ازقح وشلونتس انتي وابوي والعيال ؟
ام خالد : كلنا طيبين وبخير
العنود : الحمدلله دوم يارب
ام خالد : امين واياتس ..وشلون رجلتس واهله عساهم طيبين ان شالله
العنود : الحمدلله طيبين طاب حظك وفالك يارب
ام خالد : امين يارب ومن يقول .. عنوده عبدالله ناوي على العرس ومحتاره من البنت اللي تناسبه وعمتس ام علي اشغلتني تقول ياخذون بنات عمهم عيالتس وانا ما ابيهن
العنود بزعل : عمتي وش دخلها هي وراها متشتغل خطابه اصرف يلبق لها !!ام خالد بحده : عنود هذي عمتس احترميها
عنود : يمه انا ماقلت شىء بس ماتلاحظين ان عمتي تدخل فينا هي خايفه نخطب بنتها ويوافق خالي وهي ماتقدر تقول لا عشانك وعشان ابوي عشان كذا تزحلق اخواني عن طريق بنتها
ام خالد : من قال لتس ؟
العنود : وااضحه ماتبي فيها ذكاء وهي تظن ان واحد من عيالتس يفكر في بنتها وهي تبي تقلد اختها في كل شىء وش ماسوت اختها تبي مثلها
ام خالد : وش دخل اختها ؟
عنود : يمه عمتي ام بندر ترز بناتها عند عيال عمهن سعد تبي رهف ياخذها ولد سعد الكبير عمتي ام علي تبي بنتها ياخذها ولد سعد الثاني تقلد اختها
ام خالد :وانتي وش دراتس ؟
عنود : عمي كم مره تحتسي انا بنتي بياخذونها من عيالنا اللي بالرياض لانها عايشه غير ومدلعه وكنها تقول تعالو واخطبو يا عيال سعد حتى بنتها مريضه من حركة امها
ام خالد : بلاه موبزين في حقها تعرض بنتها على الناس !!!
عنود هههههههههه: لامهوب عشان كذا
ام خالد مستغرب : اجل وشوعشانه ؟
عنود : بنتها خايفه سعود ياخذ غيرها
ام خالد :سعود اخوتس
العنود: ايه هي تبي سعود وحتى هو يبيها والكل عارف بها الشىء
ام خالد :اقول انتي خبله تجيبين حتسي شين
العنود : يمه انتي تحسبينه كلام وكذب بس هذا الصدز انا البنت قالته لي وولدتس مره يحتسي لي عن سيارتهاول ما اشتراها له ابوي وقال انهم باركو له ومن ضمنهم وحده ماصرح بأسمها مايدري انها قد قالت لي انها باركت له بالسياره .
ام خالد : ياعزتي لي من هالجيل اللي لايستحون ويفضحون ..و(بزعل )اقول اخوتس عبدالله من تشوفين تناسبه ؟
عنود : يمه انا من زمااان وانا نفسي بـ وديان بنت خالتي ام منصور
ام خالد : بس يمه بنت خالتس حياتهم غير عن حياتنا
العنود : يمه البنت عاقل وراكده والخير الحمدلله ماعلينا قصور وانا يهمني طيب البنت ما ابي عوبا تجي وتقعد تلاسن يمين ويسار وتنقل اختك قالت امك قالت ابوك واخوك
ام خالد : ايه انا بعد ابي كذا بس لاتنسين البنت مدلعه وعايشه في الكويت
العنود : وش عاد لاكانت عايشه في الكويت!هذي اختها خذت ولد عمها وهو ساكن عندنا ؟
ام خالد : اهل لكن هو ساكن بالرياض
العنود : على هواتس انا قلت اللي احسها بتعيش معنا .
ام خالد : مدري انا بكلم ابوتس واخوانتس واشوف .
العنود : ايه احسن
ام خالد : يالله ماتشوفين شر ان شالله
العنود : ولاتشوفينه
ــــــــــــــ
ماسكه تليفون وتسولف والله كاسره خاطري من فتره وهي ماتطلع من غرفتها
ساره : لاتلومينها تزوجت واحد ماكانت تمناه لعدوتها
عهود : طيب ليه وافقت محد غاصبها!!!
ساره : اتوقع عشان الوصيه
عهود : وصيه !! ترمي نفسها بالنار عشان وصيه !
ساره : انا هذا اللي اتوقعه
<<مطوله في توقعاتك وتحاليلك انتي واختك ؟؟
التفتت سار مفزوعه : سلطان
سلطان والشرار يتطاير من عيونه : ايه سلطان ماخلصتي تحليل وتوقعات !!
ساره بهمس: عهود يالله سلطان عندي مع السلامه
<<ما انتظر رد اختها سكرت بسرعه التلفون
سلطان يطالعها من فوق لتحت وهو يصك على اسنانه : اسمعي يامدام اليوم بروح لجده جهزي شنطتي بسرعه
ساره بهمس : حصلت حجز!!
سلطان : لا بروح بالسياره مع واحد من الربع
ساره : ان شالله الحين اجهزها .. وبعد تردد اقول سلطان
سلطان وهو يقلب بالقنوات : خييير
ساره : انا بروح انام عند ماجد
سلطان التفت لها ويصك على اسنانه : حتى تفرين روسهم ويغيرون رايهم في عبدالرحمن !!!!!!!!
ساره بخوف : لالالا والله ما ادخل بس انا خايفه انا هنا لحالي مع عيالي
سلطان بسخريه : انتي تخوفين بلد بحالها ..بكلم سالم يجي عندك
ساره : سلطان انت من جدك تكلم !!تبغى سالم يجي عندنا !
سلطان بملل: خلاااص طسي لاهلك (والفت لها واشر باصبعه في وجهها)بس ياويلك لو غيرو اهلك رايهم في عبدالرحمن فاهمه ؟
ساره : ابوي عطاك كلمه وما اظن يثنيها
سلطان : هذا احسن شىء في عمي
ساره طالعت فيه وهي رافعه حاجبها : بسسس !! (خزها بقوه ) خـ خــ خلاااص بروح اهز شنطتك احسن لي
سلطان : واحسن لي بعد
ــــــــ
خوذي هذا ورشي بالغرفه منه وحطي المعمول في الغرفه
ليليان : فرشا حقي سرير سوي غير ؟
العنود : ايه خوذي اللي في الكبت البيج والغرفه الثانيه حطي الاحمر
ليليان : بس مفرش كلووو انتي جديد !!
العنود :احسن جديد انا ابغاك تحطين الجديد
ليليان : بعدين انتي وين سوي بدل فرشا سرير ؟؟
العنود : ليه سوق مسكر !! ومفرش اول فيه اسوي تبديل
ليليان : سوري
العنود بهدوء: ليليان مدام ساره وبيبي كلو يجي هنا هذااا بيت مدام ساره سيم سيم اناااا طيب انا مايبي مشكل وجنجان
ليليان : اوكي سوري مدام
كان فيه اشخاص يسمعون الكلام اللي دار بينهم وما انتبهو لها دخلت عليهم السلام عليكم
التفتو لجهة الصوت
العنود بأبتسامه : هلااا وعليكم السلام
نوف : انا جيت لك ابغى تشرحين لي بالنحو والرياضيات
العنود : ابشري تعالي بالصاله راحو لصاله ..اجلسي .. يالله وريني وش اللي تبغين اشرحه لتس ؟
نوف : المعادلات س وص
العنود : بسيطه هذي مايحتاج يالله نبداء
ـــــــــــــ
جواهر : اووووووووف زهقت من البيت طقت كبدي
ام عبدالرحمن : تحملي من بغى الدح ماقال اح
جواهر : يمه خلااااااااص مافيني صبر الحين لي اسبوعين وانا مغير معتكفه بها البيت كله على اساس يبين في عيون مجود ولا بااان ماتحرك اصلن حتى شغل ام يوسف ما غير حالهم!!
ام عبدالرحمن : انا قلت لك اتركيه عنك وتزوجي بندر بس انتي مصره تبين ولد عمتك وام يوسف شغلها قديم قد قلت لك ماينفعكم بس انتي عنيده
جواهر : يمه كم مره قلت لك انا ابيه عنااااااااد بس عناااد في القرويه وعهودوه
بس تمدحه صديقة عمتي صيته
ام عبدالرحمن : عمتك صيته ماتدري وين ربي حاشرها تنفخ نفسها في الجمعات وترز خشمها ولاتعرف تصرف في ابسط الامور ..اما بندر عنده خير يغرقك فيه يالخبله كل فتره يسافر والبنات ميتات عليه وانتي تبين واحد مايهتم فيك ولا عطاك وجه
جواهر : يووووووووه يمه انا ما احب ماجد بس (وتصك على اسنانها)ابي اكسر خشم عهود والقرويه ابغاه يتزوجني ويشوف الفرق بيني وبين القرويه واحسسه انه كان غلطاااااااان لما تبع نصيحة اخته وام يوسف بصبر عليها شهر ان ماتغير شىء غيرتها ورحت لبركيه
ام عبدالرحمن : انتي الحكي معك ضااايع بقوم احسن لي من مقابلك
جواهر تحرك يدها بلا مبالاه
ـــــــــــ
في مجلس ابو خالد جالسين يتناقشون عن زواج عبدالله
ابو خالد :خلاص اللي تبونه انا مالي دخل في الموضوع هذا انتي وولدتس
عبدالله : انت الخير والبركه اذا انت مالك دخل في الموضوع اجل من له دخل ؟
ابو خالد: ايه يازين حتسيك هالحين كله عشان العرس !
عبدالله يضحك : والله ماقلت الا الصدز
ابو خالد : اهلها منا وفينا وعارفينهم وعاقل على كلام امك واختك وثقيله هذا اهم شىء وانت وش رايك
عبدالله : عنود من مبطي وهي تقول انها داخله مزاجها وانا خايف تكون مدلعه مررره وتقعد تنشب لي كل شوي بدلعها وانا كل شىء الا الدلع فيني حساسيه منه
ابو خالد : البنات اغلبهن دلوعات وانت تبي لك وحده جلفه !!
عبدالله يضحك : لا بس ما ابيها مدلعه لحد المصاخه
ام خالد: هذا يعتمد عليك انت تقدر تخفف من دلعها وتخليها تعامل بطبيعتها بدون زياده والمره طبيعتها فيها هالشىء والخيل من خيالها والفرس من ركابها
عبدالله : يعني مدلعه !!!!!!
ام خالد : ايه مدلعه ودلال واخلاق بسس مؤدبه وماتحكي
ابو خالد : اهم شىء الحكي يكفيناا اللي عندنا فلانه قالت وفلانه سوت
ام خالد: الله يهدينا واياهن
عبدالله : امين
ام خالد تقوم :يالله انا بدخل للبيت تبون شىء!
ابو خالد : سوي لي كبتشينو
ام خالد : ابشر
ــــــ
مليكه نزلي شنطة عبدالله وماجد تحت ...هنوووووووف اخلصي كل هالوقت تشيلين ماصارت ترى لانقصك شىء وماخذيناه مو من بعد البيت
هنوف مبوزه : يمــــــــــــه ليه انتي تعصبين هالايام كثير تكفين فكي العقده
ساره :اقول امشي قدامي لاحط حرتي فيك
هنوف ترفع يدينها : لا خلاص كيفك على راحتك الحين اطلع شنطتي
راحت لغرفتها وشالت شنطتها وهي من داخلها فرحاااااااانه ومبسوطه بتكون مع تؤمها الروحي نوف واخيرآ من زماااان ما نامو سوى بغرفه وحده <<<سمعت صراخ امها تناديها نطت من الخوف : جيت جيت
ساره : انتي يبي لك يومين على ماتحركين ياالامبراطوره
هنوف تدق صدرها : اكييييد امبراطوره مو انا بنت سلطان
ساره بسخريه : انعم واكرم
هنوف : رووووق ياحلووووووو الزعل مو لايق لك
ساره مسكتها من يدها ولفتها : انزلي الدرج انتي ماتنعطين وجه
هنوف وهي تنزل الدرج : يمه حبيبتي لاتعصبين والله امزح معك
ساره :طيب خلصيني ترا تاخرنا على خالك
هنوف : ابشري
ماجد يصاارخ يمه يمه تاخرتووووووووو يالله ابغى اروووووووح بسرعه
عبدالله : انت مطيح عندهم مايمديك تشتاق لهم
ماجد : انا ابي اقعد عندهم بس امي تقول لا
هنوف : حبيبي لان امي عارفه انك ماتنعطى وجه
ساره تدقها بكتفها : حتى انتي ماتنعطين وجه لو اعطيك وجه راح اليوم وانتي تسولفين
عبدالله : خخخخخخخخخخخ لقطي وجهك
هنوف مبوزه : يمه هالايام صايره كبريت
ماجد : احسسسسسسسن خلي امي تسكتك
هنوف: عشتووووووا حتى انت
قاطعها ساره اقوووووووول خلصوني اطلعووووو
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك