رواية حافظ عهود الحب يومك تبيه -21
هنوف : مزعجتني مشتاقه لعنود ويوم جت هنا ماتبين تروحين لها ؟
نوف :عنود مو ولدها
ساره :بنروح للعنود وبنشوف ولدها
نوف :خلاص بروح معكم
ــــــــــــــ
خلني داخل حدودك واجبر بخاطر زمانــــــــي ...
اكذب في باقي وعودك واصدق بلحظه سعيــــــــده
انتشلني من برودك لو تولع بالمحانــــــــي ...
عطني احساس بوجودك وخذ كل اللي تريــــــــده
تكفا وإلى من قلت تكفا بيع خلق الله عشانــــــــي ...
لاتضيع من يديني فرصه العمر الوحيــــــــده
جيت مابيك تحقرني جيت ابيك تعز شانــــــــي ...
جيت ابي فزعه ضلوعك من مشاعرك البليــــــــده
يعلم الله شفت منك ومن غيابك ماكفانــــــــي ...
كان ماتقدر تخفف هم قلبي تكفا لاتزيــــــــده
شافهم طالعين من عنده سلم عليهم :وين بتروحون ؟
ابو خالد: عرفنا انك جيت قلنانفضي لك الجوووو
ماجد يبتسم وبداخله (ماتدري وش فينا والا لو تدري وش بينا ماخليتني ادخل)
عهود اللي دخلت وسلمت عليها قاعده تناظر بالبيبي :عنود الحين كرشك وش كبره وماطلع منه الاها الصغون !!
العنود:هالصغنون شفت الموت بسبته
السلام عليكم
عهود والعنود :وعليكم السلام
عهود :تعال شف باكورة انتاجك من يشبه ؟ لاتقول لي حرام بتحطم !!
ماجد اللي قرب من العنود وصار جنبها بالسرير :وهو يحصل لك انك تشبهينه
عهود: يوووه وش هالثقه وعععععععع اشبه ولدك من زينه انا احلى شف (رفعت البيبي وحطت وجها بجنب وجه البيبي ؟
العنود :نزليه لاينفهق تكفين
عهود : خوذيه اصلن تحمدي ربك اني شلته من زينه(قامت وحطته بحضن العنود وغمزت لماجد وطلعت)
العنود : هيييييي انتي وين رايحه
عهود : بروح عندي شغله وبجي اشوف المفعوص ..طلعت
ماجد قام من مكانه وجلس قبالها : العنود... ولدنا بحجتنا وانا بحاجتك جنبي
العنود : لا ياماجد انت بحاجة غيري مو بحاجتي ... ماجداكتفيت خلاص انا عودت نفسي اعيش بدونك (رفعت ولدها وحطتها بحضانته)
ماجد :وانا مقدر حاولت اضغط على نفسي حتى اريحك مني لاني عارف ان وجودي بحياتك سبب لتعاستك ..(زفر بضيق)حاولت ابتعد عن هنا كل شىء فكرت فيه حتى ترتاحين لكن خانتني قوتي انااحببببك لدرجة اني اكره اي مكان يذكرني بفقدانك غرفتي بيتي كل شىء تركته كل شىء العنود حسي فيني اناتعبت مافيني حيل اكثر من كذا والله تعبت انا بحاجة وقفتك معي ...عنود اذا عندك شروط اوطلبات حتى ترجعين انا مستعد انفذها كلها ولا اعارضك بأي شرط مد يده ومسك يدها اقبلي عذري
العنود وهي تحاول تصيطر على نبرة صوتها :انت اناني فكرت بنفسك والحين رجعت لي ..توقع اني بقولك موافقه ؟
ماجد يضغط عليها : مقدر على بعدك
العنود صدت للجهه الثانيه وزفرت بضيق: ماااايهمني اللي تقوله لانك قد سمعتني اياه قبل وقبلت عذرك وش سويت هاااااااااه قلي وش سويت هه ببساطه شكيت فيني اسحرك
ماجد :مايهمك !! ..(وبنبره حاده )..انتي تفرحين بتعذيبي صح ؟ ..انتي تلذذين بصدك لي ؟!!..هذا جزاي اني اعترف لك بحبي !!....طالعها مقهور منها حاس انها تستلذ بصده ... (وبحزن)للاسف ماتوقعتك كذا
العنود تطالع فيه (ذا وش سالفته بعد يشك اني استانس بتعذيبه ياناااااااس ذا وين عقله ابي اعرف وشلون دخل طب ذا !!!!!!!!! هذا بيطري ويخب عليه بعد !!!)
اندق الباب عليهم ..السلام عليكم
العنود وماجد :وعليكم السلام
ساره :وشلونك عنوده والصغير كيفه ؟
العنود : بخير الحمدلله
هنوف بسرعه راحت للسرير الطفل :ياناس صغنون
ساره : الناس يسلمون ويتحمدون بالسلامه وانتي مختصره من الرجه الدرب
هنوف : اوووووبس <<راحت تسلم على العنود وتحمدلها بالسلامه
العنود سوت نفسها ماشافت نوف: وين نوف ومها ماشفتهم ؟
ساره :نوف معنا وينها ؟
نوف اللي كانت تراقب هنوف ومعها الطفل بيدها : السلام عليكم
العنود : هلاا وعليكم السلام ..كيفك نوفه ؟
نوف : بخير ....(وبتردد)مبروك
العنود : الله يبارك فيك ..هنوف جيبي حبيبتي الولد ..هنوف جابته وحطته بيدين العنود ..العنود مدته لنوف
نوف : وش اسوي فيه ؟
العنود : وش تسوين فيه شيليه ؟
نوف : ما اعرف اشيل !
العنود :بسيطه (وعلمتها كيف تشيل البيبي )شفتي كيف سهل
نوف وعلى وجهها ابتسامه : وش بتسمونه ؟
العنود ناظرت بماجد اللي تكلم : ابوي يقول امه تسميه
العنود : عمي قال كذا !!!!!!!!!
ماجد : ايه
العنود :ليه ؟
ماجد : مدري بس هو قال محد يسميه غيرامه
العنود: اها
هنوف : احللللللللللللى دوري لك اسم حلوووو ومطور مثل وائل والا باسل
العنود: هذا اسمه معروف
ساره : معروف !!
العنود: ايه معروف ( محمد ) على عمي
*ياناس هالمره وشلون تفكر!!!!!؟؟...خافت على عيال ساره وتكتمت على عمتهم رغم انها ذاقت منها الويل واي وحده في مكانها كان نشرت وفرحت بخبر مثل كذا حتى تشفي غليلها فيها ..وتكتمت على خلافي معها وسببه عن اهلها حتى ما يصير خلاف بيني وبين اهلها ويضيع ولدي بينا حافظت على كلامنا بتسميت اول مولود لى اسم ابوي ان كان ولد اما ان كان بنت بتسميها جنى رغم انها كانت تقدر تستغل الموقف وتحط اي اسم حتى تغيضني ..ماعرفت وشلون تفكر !!
مطول اخينا في سرحانك ؟؟
ماجد : من متى وانت هنا ؟
تركي : من زماااان سلمت باركت وسولفت وقدني بروح وانت سرحان كل هذا عشان صرت ابو مايسوى!!!
ماجد: يازينك ساكت
تركي : افااا الاخلاق وراها قافله ؟
ماجد قام وتركهم
تركي : وش فيه ذا ؟؟
عهود بتردد : مها بسئلك
مها : وشو
عهود :امي اللي اجبرتك تزوجين عبدالرحمن صح
مها : من قال لك
عهود : محد قالي بس شكيت من حركتها
مها : حركتها !!
عهود : ايه تستغل طاعتك لها
مها : وشلون يعني
عهود : بتبراء منك لو ماصار الللي ببالها
مها بأبتسامه يأسه : ايه الله يهديها
عهود : لانهاقالت لي هالكلام وفكرت معناها انتي ما اجبرك عليه الا كذا لانك تكرهينه وكنت اشوفك تبكين وبنظرتك اشوف الحزن والهم حتى خالد قلت له
مها بدهشه : قلتي لخالد ؟؟
عهود :ايه قلت له شكل امي اجبرت مها بها الطريقه عشان كذا عادت نفس الاسلوب لي
مها : اها ... الحمدلله انك ماطعتيها والا كان انتي جنبي هنا مكفخه مثلي
ـــــــــــــــ
مرامووووه ووجع انا متنقع في الحر وحضرتك مادخلتي بوابة المستشفى !!
مرام : يوووووووه محسن انت وش فيك دايم معصب انا عند البوابه بس مدري وش بلااهم واحد طااااااااير بين السماء والارض من سرعته شفته داخل عليك خليته يدخل قبلنا لايصدمنا ...الووووووووووو محسن وينك محسن ؟؟ وش سالفته ذا انقطع الخط من اليوم ابربر على عمري قسم بالله هالرجال عليهم سفه يخلي الوحده تلقط خشتها
السواق : مااما في سوي حادث هنااا
مرام : بسم الله علينا ياربيه الله يلطف ياااارب
السواق : شوفي في باب هنااا
مرام : الله يعينه كل يوم حوادث السيارات ذبحت الناس شف السرعه وش سوت طاير جعلها تطير عيونه وصدم
السواق : ماما انتي شنو كلام
مرام : بعد هذا الناقص اسولف عليك يانقرش
السواق : نعم
مرام : وشو نعم
السواق : انتي يقول نقرش !!
مرام : ايه ..نقرش روح للبيت
السواق : ان شالله
البارت التاسع والعشرون
يالله خلونا نطلع حتى ترتاح العنود
العنود : ساره والله مرتاحه بالعكس لارحتو طفشت
ساره : جتى ولو بنروح بعد نشوف مها
العنود : مها وش فيهااا ؟
ساره : ليه ماقال لك ماجد ؟
العنود : لا خير وش فيها مها
ساره : زوجها ضربها
العنود : لاحول ولاقوة الا بالله وشلونها الحين ؟
ساره : منومه هنا وهي الحمدلله طيبه رضوض وكسر باليد
العنود: اهبببب ياوجهه مهاااا عاد ماتغثي ولا تغلط حتى يطقها جعلها تطقق حنوتسه
ساره : الشكوى لله راح ماجد يبي طلاقها قال الشيخ خذ اسبوع مهله ورفض اي نقاش
العنود : ايه الله يعين وعوضها ربي بابرك منه
ساره : آآآآمين يارب
ــــــــ
خزوووون وينك ماعاد اشوفك ولاتتصلين يالقاطعه
خزنه : والله انشغلت مع جدتي عندنا من جتها الجلطه وحنا نتناوب ليها انا وخواتي وخالتي سعاد
جواهر : ابي اعرف جدتك كل هذا وهي عارفه ان جدتك تعبان ويوم مات جتها الجلطه هي
خزنه : استغفري ربي لايعاقبك
جواهر : بنتحر لو جتني جلطه بخليهم يذبحوني ولا اعيش معذبه
خزنه : انتي مهبوله ..يالله جواهر جدتي جاء وقت احممها واغير لها مع امي
جواهر : تحممينها وتغيرين لها !!!
خزنه : ايه
جواهر : وععععععععع قرف اغسل لها واغير لها وعععع
خزنه انقهرت من كلمات جواهر وسكرت الخط بوجها
ـــــــــــــــــــ
بسررررررعه جهزو غرفة العملياااااااااات
:ماننتظر الدكتور طلعت يجي من بيته ؟
2 : اذا انتظرنا بيروح من بين يدينا لااازم نوقف نزيفه
3: انا كلمت وقال بيتحمم ويجي
2: يتحمم !!!!!!!!
3 : هو قال كذا
: عاد دكتور طلعت هذا باااااااااااااااارد
2: دكتور ايااااااااااااااااد بسرعه جهز غرفة العمليات وجهز الطاقم الطبي
الحاله مستعجله ماتتحمل انتظاااااااااااااا ر
اياد : اوكي بكلم لك هلاّ دكتور عصام ودكتوره داليا وبنكون بعد 10 دقايق في غرفة العمليات الكبرى
2: بسرررررررعه ...بسرعه ساعدوني بتجهيزه ..
ــــــــــــــــ
السلام عليكم
العنود : هلااااااوغلاااااااا
مرام : مبرووووووك اخيرآ مابغيتي ههههه
العنود: الله يبارك فيك
مرام : وشلونك ؟
العنود : الحمدلله بخير
مرام : جربتي الامومه خخخخخخخخ
العنود : يؤؤؤؤ مووووووووووت
مرام : ايه على قولت اختي تهاني ياكذبكن يالنسوان تصايحن وبعد سنه تعيدن نفس السالفه ماتتوبن خخخخخخخخخخخخ
العنود : الحمدلله واحد وما ابي غيره
مرام : ماغيرتي رايك ؟
العنود : ولا راح اغيره
مرام : وولدك
العنود:ماعليه ماراح يحس بالنقص بحاول اعوضه عن ابوه
مرام : هذ ا ولد لاصار شاب وش بتسوين بتلبسينه برقع وتقولين اقعد معي ؟
العنود :ياحبتس لنكد
مرام : وانتي ياحبتس لتهرب
العنود : وشلون عيالتس ؟
مرام : ابد ماعليهم طيبووون يوم جيت بطلع نشب لي فارس يمه بروح معك قلت وين قال لخالتي عنود قلت ليه تبي المستشفى تسكر ويطرد ابوك من وظيفته ؟
العنود : يووه حسبي الله على بليستس ليه تقولين كذا
مرام : وانا صادقه والله ان يدخل في كل الغرفه ويجنن المرضى ويزيد صخونتهم بحركاته
العنود : ياويلتس من الله
مرام : ليه ياويلي !! تدرين مكلم جده يقوله يبه ابي منك هديه قال وش ؟ قال عيال الحاره متوعدين فيني بيطقوني وانا لحالي مالي احد يفزع معي ابغاا كلب يكون معي حتى يعض اللي يقرب جهتي !!!!!!
العنود: ههههههههههههههه والله فله ولدتس
مرام : اي فله اليوم الثاني جده ارسل لنا كلب !!قسم بالله بغيت انحااش يوم دخله علي
العنود: ههههههههههههه حلوه تنحاشين
مرام :اي ولله انحاش مدخله علينا في المجلس شايبنا يحسب نفسه جايب ضيف !!
العنود: وربي شايبكم فلللللله ذا
ــــــــــــــــــــــــــــــ
:انت دخلته العمليات بدون حضور اهله ؟؟وتوقيعهم هذا فيه مسؤوليه
2:ماعليه انا اتحملهاا
:انت متوتر وش فيك كذا بيروح المريض بدال ماتعالجه
2:وين ياقي الطاقم وش فيهم تأخروووووووووو
:دكتور انت وش فيك ماصار لنا ربع ساعه ترى
2: لا راح المريض من بين ايدينااا وش بستفيد
:هذا راح يكون يومه
2:انت ماعندك احساس هذا تووه ماله يوم من فرح بمولوده ولدلده بحاجته وانت عاادي عندك
:غيره ايتام ام واب وش الفرق
2: اسككككككت
دخل عليهم الطاقم الطبي اسفين على التاخير يالله ندخل
ــــــــــــــــــ
بعد مرور الوقت
مرام ترفع يدها : تأخر محسن
العنود : ليه زهقتي مني ؟
مرام : عنود من الساعه 5وانا مقابلتك والحين تسع ونص ومحسن قايل لي شوي وبنطلع ومناوبته تنتهي 7 والحين شوفي كم ؟
العنود : يمكن انشغل
مرام :يمكن يوم جيت هنا واحد طاااااير بين السماء والارض مدري وش سالفته وادخل حتى ينزلني نقرش عند بوابة الزياره الا الناس مكتضه الظاهر انه صدم له احد
العنود : الله يهديه يارب ويعافي المصدوم
مرام : آآآآآآآآمين يارب الله يعين اهله
العنود : امين يارب هذا السرعه والعجله الشباب الحين كل شىء يبونه بسرعه
مرام : يوووووه ذا وش سالفته مايرد علي ..الا صحيح متى بتطلعين
العنود : بكره بطلع
مرام :غريبه يقعدونك يومين !!
العنود:حتى انا مستغربه العاده اليوم الثاني
مرام : يمكن من احم احم تغمز لها
العنود: ما اتوقع ..وبعدين وش بيستفيد
مرام تسلهم بيعونها :يكون قريب منك
العنود:تفكيرك بعيييد
مرام :مخليه لك القريب لك ..اقول بدق على نقرش يجي ارحم من انتظار محسن
ــــــــــــ
طلع من غرفة العمليات وهو اعصابه تاااالفه راح لمكتبه ورفع جواله 41مكالمه يووه نسيت انها هنااااا اووووووووف الحين وش اقولها و7مكالمات بين خالد وتركي ؟
هم اكيد مشغول بالهم على اخوهم وش بقول لهم !!
الووو هلاااا خالد
خالد: هلا محسن وشلونك ؟
محسن : بخير
خالد : ماجد عندك
محسن : هاه .. ايه عندي
خالد : اووف ليه مسكر جواله ذبحنا نصل يا اخي قلبه ذا بارد وندق على المسشفى يقولون طلع وماجاء لنا يكلمنا طيب يطمنااا هـ
محسن يقاطعه : خالد ماجد تعباااان
خالد بخوف : وشووو
محسن : ماجد صار له حادث اليوم العصر وتوني طلعت من غرفت العمليات كان معه نزيف داخلي بالبطن وكسر بالكتف والحمدلله قدرنا على النزيف والكسر وهو الحمدلله بخير
خالد بعصبيه : لييييييه ماقلت لي
محسن : اصلن من شفت الحادث قدامي ماعرفت وش اسوي الشىء اللي اسعفني عقلي اجمع القروب الطبي وادخله غرفت العمليات بعد ما اثبتت الفحوصات انه يعاني من نزيف وكسر
خالد : وهو وينه الحين ؟
محسن : في غرفة العنايه
خالد : العناايه انت مو تقول انه طيب ؟؟
محسن : الا بس العنايه حتى نتطمن اكثر
خالد : انا جاااي بشوفه ...سكر بدون ما ينتظر رده ونزل يركض مع الدرج
ابو ماجد: خالد هاااه عرفت وينه فيه ؟
ام ماجد : اكيد مبلط عند حبيبة القلب
خالد وهو يطالع في امه : صحيح ولدك بالمستشفى لكن هو بالعنااااااايه صار له حادث حرمتيه من زوجته والحين الحادث ماتدرين يمكن يحرمه من زوجته وولده
ابو ماجد : انت وش تقول ؟؟
خالد : انا بروح له تروح معي ؟
ابو ماجد ما قال شىء مشى بخطوات سريعه كأنه رافض الكلام اللي سمعه او مو مصدق طلع وصقع الباب وراه
ام ماجد الجمتها الصدمه عن الكلام ..(ماجد في العنايه..حادث ..انا حرمته !! انا احرمه !! خالد يكذب اصلن يبغى يسوي هالحركه حتى اصدقه ..ايه ايه هذي تمثيييل حتى اصدق الكذبه )
ــــــــــــــ
بكره متى بتطلع العنود ؟
ام خالد : الصباح على الساعه 10 بعد ماتشوفها الدكتوره وتشوف الولد
يطلعونها
ابو خالد : الله يطلعهم من كل شر
ام خالد : آمين
ابو خالد : بتروحن من هنا على الديره والا بتقعدن هنا كم يوم
ام خالد: لا وش يقعدنا يكفي جوجو اللي غابته من الايام بسبة قعدتنا هنا
ابو خالد: على راحتكم .. ام علي كلمتني البارح تبارك بولد العنود
وتقول ش بتسمونه ؟ قلت لها انشدي امه واهله ولدهم ..قالت : وانت ؟ قالت مالي دخل ولدي وهو ولدي ماسميت عياله ماتدخلت فيه اسمي ورع العرب !!!قالت الحين ولد العنود صار ولد العرب والله لاحرشها عليك ههههههههه
ام خالد : يووووووووووه اجل العنود بتزعل وتطنقر علينا من بيرضيهااااا !!
ابو خالد: هذا عاد العنود لاسيرت عنزها عليها خلااص محد يحتسي عليها
ام خالد : لا عاد هذي مقارنه بين عيالها وعيال خالد ياوالله الورطه ههههههههه
ابو خالد : افزعي معي
ام خالد: ايه وتنكبني وتطلع منها مثل كل مره
ــــــــــــــ
دخلو بسرعه لداخل المستشفى
وقفهم سيكيورتي : وين يا اخ انت واياه ؟
خالد : انا اخو الدكتور ماجد وهذا وابوي بلغونا بحالته وجينا نشوفه
السيكيورتي : عذرآ ما اعرفكم تفضلو من هنا لين تحصلون اللفت على اليد اليمين اصعددو لدور الرابع وهم يبلغونكم اي غرفه
*بعد ما قلت لامي ان ماجد بالعنايه ارتحت شوي مدري يمكن اكون قسيت عليها يمكن اكون ضايقتهايمكن اكون فرغت جزء من الغضب اللي فيني عليها بس لاني حاس انها السبب في اللي يصير لماجد رغم ان له شخصيه ومستقل بذاته وقوي في اتخاذ قرارته الا انه عند امي وابوي ينسى او يتناسى هالشخصيه يخاف يحز او يضايق احد منهم لو قال له كلمه وغلط عليهم فعود نفسه ان امي وابوي مايقول لهم شىء بصراحه احسده على هالشخصيه انا مقدر عليها مقدر حاولت لكن ماقدرت امي تقهرني بحركاتها احسها مراهقه في اخرالستين تسوي حركات اصغر من سنها جواهر تلعب في عقلها آآآآآآخ ياليت امي ما سوت في ماجد اللي سوته بسببها هو الحين طايح بالمستشفى بعد ماوصف لنا السيكيورتي عن مكان ماجد صعدت لدور الرابع وسئلت عن غرفته قالو غرفه رقم 3 خليت ابوي يدخل قبلي وقعدت اطالعه من خلف الزجاج بعد 5دقايق طلعو ابوي ودخلتها شفت شكله وهو ممدد مدري وش اقول حسيت اني لحالي مالي عضيد ..ماجد قدامي بلا حول ولاقوه جهاز النبض واسلاك مركبه من كل جهه الضغط والاكسجين والقلب الشاش مغطي راسه وملتف على كتفه آه تمنيت اكون مكانه بس هو يقوم تمنيت يرجع لزوجته وولده ويفرح بلمتهم حوله ..حطيت يدي على جبهته وصرت اردد الدعاء على راسه حاس العبره خانقتني كان يتمنى ترجع له زوجته بعد ماتولد كان اغلب كلامه عنهم كان عنده امل ترجع بعد ماتولد حتى من كثر ماهو متيم فيها صاريتعهد لي اذا صار هالشىء ماراح يصدق اي شىء يسمعه او يشكك في العنود واخلاقها يقول :انا سمعت في العنود وخسرتها لكن لو رجعت لي عهد علي ما اسمع وش يقولون بس ترجع لي ياخالد ادع لي ادع لي
ماحسيت الا بدمع حار ينزل حزن على حاله اللي وصل له ..دخلت علي ممرضه وطلبت مني الخروج شافت دموعي اللي حاولت اداريها قالت انه محتاج الدعاء منكم خاصه وان اصابة راسه شديده التفت عليها بقوه قلت وانا ماني مصدق اصابة راسه ؟؟الممرضه ارتعبت شكلها من نظرتي او مدري وشو منه بس الممرضه صارت تخبط بالكلام بعدين قلت وانا صاك على اسناني وش فيه اخوي ؟؟قالت وبتردد : ان الضربه اللي بالراس كانت قويه لانه ارتفاعه بعد الصدمه وارتطامه بالرصيف كان قوي وهذا سبب له غيبوبه ..مدري حسيت الدينا تدورررر فيني ولا حسيت بنفسي بعدها ..بعد ماصحيت لقيت نفسي ممدد وحاطين فيني جلكوز وشفت محسن عند راسي خانتني دموعي تذكرت ماجد كان يقول محسن اخوي ماجابته امي وتؤم روحي كان يحكي لي عن مواقفهم سوى تذكرته ماقدر اقاوم دموعي حسيت نفسي اشوف ماجد قدامي ..
ـــــــــــــــــ
.
يأم محمد اقولتس البارح سمعتها وانا في الحوش تقول لعيالها عمانكم مافيهم خير ماخذين حلال جدكم ونسوانهم محرشينهم !!
ام محمد : يويلي ام خالد صاحيه وراكده ماتجيب هالعلوم
ام نوا ف : اقول الله يرحم ابوتس وامتس انتي لارحتي لديردتكم وجلست معها ماعلى لسانها الا صلفه شايفه ابوهااا تسنه امير وابو ها رخمه وصلفه نقالت حتسي ماتسمى علم (ماتكتم خبر)
ام محمد شهقت ابوي رخمه تعقب وتخسى
ام نواف : انتي ماسمعتي شىء تخيلي تقول ان نايف لولاه ما كان اخوانه رياجيل !!
ام محمد: ياويلي مهيب صاحيه راسها فيه فري
ام نواف : انا اظنه كذا والا فيه وحده تسب حماها؟؟ والا تسب ابو حماتها صلن مافيها خير تحتسي في حماتها اللي وجهن مبارك ماتغثي
ام محمد : هذيلن النسوان اللي مافيهن غبطه والله لاوريتس فيهااا يام نواف
ام نواف :لا يالخبله تحبطين اعمالتس بالهواش والدعااء عليها اسفهيهاا
ــــــــــــــــــ
يمه وش فيك لي ساعه فوق راسك وسافهتني ؟
ام ماجد : هاه وشووو؟
عهود : خالد وينه مالقو ماجد تأخر غريبه مو عوايده ولا قال انه اليوم عنده مناوبه !
ام ماجد : ماجد في المستشفى
عهود : الحمدلله توقعت مستلم المناوبه عن احد الله يعينه
ام ماجد تطالعها وعهود تقلب بالقنوات متردده تقول لها او لاا..لو قلت لها ماراح تصبر بتروح المستشفى وان سكت بيعلمونها بكره التفتت عهود : يمه الى الان زعلانه مني
ام ماجد : زعلانه !!
عهود :عشان رفضت سويلم
ام ماجد وكأن احد ذكرها : لك وجه بعد فرحانه انك مزعلتني قومي فارقي عن وجهي
عهود : يمه تك وش حليلك ليتني ماذكرتك
سمعو ا الباب ينفتح دخل ابو ماجد وعلاملامحه اثار الحزن ركضت له عهود : يبه وش فيك
طالع ف ام ماجد اللي تنتظر منه اي خبر عن ولدها ..عهود : يبه ليه تطلع في امي كذا فيكم شىء وش فيكم قولولي ..
دخل خالد بخطوات ثقيله وهو حااس بتعب قوي حاس رجوله رخوه وجسمه ثقيل حاس انه قايم بمجهود كبير تعب هاد حيله سلم عليهم بصوت هامس وصار يصعد الدرج بثقل ويشد قبضة على الدربزين لا يطيح او تخونه قوته
عهود: خالد انتم وش فيكم ؟
خالد كمل طريقه وابو ماجد لحقه
كانت تراقبهم بنظراتها تنتظر خبر يبرد كبدها لكن نظرات ابو ماجد كانت تحرقها نظراته لها الف معنى ومعنى صرخت بصوتها : ولدي وش فيه حسووووووووو فيني علموني عن ولدي وش صار عليه انا هنا انتظر منكم خبر علموني عنه محد فيكم رفع السماعه وقال صيته تحاتيه بالبيت وقلقانه عليه رحتو تطمنتوا عليه وانا هنا بين الجدران افكر فيه انتم ماعندكم احساااااس ماعنــ..
خالد: ماعندنا احساس !! ليه وش سوينا !؟ رحنا نشوفه وانتي هنا ماتحركتي معنا ..ولدك بين الحياه والموت اصابته خطيره الضربه اللي في راسه قويه وياعالم يصحى منها او لااااا..وياليت ماتكلمين عن الاحاسيس والمشاعر لانها اشك انك تحسين فينااااا احساسك ومشاعرك لغيرنا والا حنااا ولا شىء في حياتك ..
ابو ماجد : تفاهمي معك مو هذا وقته لاقام ماجد ان شالله بالسلامه راح انفذ اللي ماسويته من 38سنه خلاص يكفيني قعدتي لين كبرو عيالك وماعندي صغار حتى اخاف عليهم ويكفيني اللي صار ولدي بسبتك بالعنايه (صوته خانقته العبره )
ماعندي استعداد افقد عيالي واحد ورا الثاني بسبتك ..صوت ارتطام على الارض قوي ركضوا جهت الصوت ...
كل مالعين إذرفت دمع يسيل
قلت هاتي دمع ثاني يغسله
مابكى يوم الفراق إلا الأصيل
دمعت المخلص تجي مستعجله
لاطراله صاحبه يوم الرحيل
شق جيبه عبرته ماتمهله
إن شكى من هم قالوله ذليل
وإن كتم همه بجوفه يقتله
ـــــــــــ
اليوم الثاني
هاه خلصت نمشي ترا تسبدي طقت من المستشفى.
ريم :قولي قسم بعد مستعجله تبي الديره عشان تفتكين منااا صح اعترفي؟
العنود تضحك :لا بس المستشفى تجيب لي التكه الله يعين اللي لهم سنين هنا
ريم : آمين ..ماقلت لتس (تحرك حواجبها )
العنود: وشووووو
ريم : احم احم اخوي بيعرس ابو غاده
العنود : صدز الف الف مبرووووك
ريم : الله يبارك فيتس
العنود : ريم صدز اخوتس تعالج من اللي يتعطاه ؟؟
ريم : ايه امي تقوله
العنود : ريم امانه لاتبلون بنت النااس بولدكم كانه ماتعالج حرااام يكفي فيه ضحيه وحده مشتته بين امها وابوهااا
ريم : امها الغلطانه والا تحمد ربها هي اللي مثلها تحب يدها وجه وقفى من جت عندنا وهي زاااينه سمنت كلن يقوله وقبل لاتعرس كانت تقول بعيرصي (ضاطور ) من الدق
العنود :لاحول ولاقوة الا بالله ..ريم صحيح هو اخوك بس خليك واقعيه واحد امه تحرشه على مرته ! واختس سعدى تحرش امك شوفيها سوت وشوفيها فعلت حتى في لبس بنتها تقلدها وتقول تقلدني ..ريم انا ام غاده تشكي لي منكم وكلامها يطلع صح ..وفوقها اخوك راعي حشيش
ريم : كذب يالعنود كذب ..هي تقول كذا حتى مايتزوج غيرها
العنود : هي كانت تجي بس ماعمرها قالت انه يتعاااطى نهااائي لانه ابو غااده زوجها وابو بنتها وماكانت تبي اي شىء يجرح غااده حتى وهي عارفه ان كل النااس عارفين ..وعلى فكره
اللي قاله عبدالله يقول جاني وهو فاقد وكان يصارخ طعني طعني بصرااخ وكنت اشوف دم ورحت معه واسئله منهووو اشار لبيت وصدقته من العجله يقول ورحت مستعجل بكفخ والتفت على رفيقي يقصد اخوك اللي مطقوق شفته يترنح وما كان في وضعه يقول كأن احد مصحيني من الغفله يقول طقيت اللطمه وانحشت قبل لا احد يشوفني ويقول عبدالله يسكر ويحشش لانه مع اخوك
ريم : العنود تبيني اقول ان اخوي يسوي هالحركات
العنود : انا ما اقول قوليها لكن اكبر غلط انكم تزوجون ولدكم قبل ماتعالجونه حتى ترضونه وتبلون بنت الناس يكفي غاده ..
ريم : العنود والله قلته لهم بس امي وسعدى يسكتني
العنود : اكيد بيسكتونتس لانتس تعلمين بالحقيقه اللي هن رافضاتها ومو مقتنعات فيها
ريم :وش اسوي طيب
العنود : مدري بس تذكري ان لتس بنت وترى الايام دواره ..اتعضي من ام نواف وام محمد اللي كانو يتهمن بنات الناس وهن في بيوتهن ربي رده لهن في بناتهم
يالله اخلصن لو اعطيكن وقت ماسكتن !!
العنود :بسم الله علي انت من وين طلعت ؟؟
عبدالله : من وين بطلع من الباب اخلصن يالله عقب الشين خلوتس تطلعين معي
العنود : ليه ؟
عبدالله : يقولون ابو الطفل لازم هو اللي يسجل ويبربس لتس اوراقتس
العنود : ايه الحمدلله انك خلصت
ـــــــــــــــ
عهود انتي من جيتي وانتي هنا واقفه روحي افطري
عهود : مالي نفس
ساره : ماجد بحاجه لدعاك مو بكاك
عهود: ساره ابي ادخل عليه
ساره : انتي مهبوله يكفي اللي صار
عهود (بعبرتها امخنوق ): الدكتور يقول بيقعد كذا طول عمره
ساره اللي نزلت دموعها : بيعيش في غيبوبه
عهود اطلقت العنان لدمعها : ليتني مكانه وهو يقوم بالسلامه
ساره : استغفري الله
قطع عليهم اصوات ركض ممرضات دخلو غرفته اصوت كلمات وتعليقات كانت تصل الى مسامعهن طلعت ممرضه بسرعه كبيره تركض الى احدى الغرف سمعو صوت جهاز القلب اعلن صوت توقف النبض اطلقت عهود صرخه افقدتها الوعي ساره تراقب الوضع بخوف رافضه تقبل الحقيقه امام عينها انزو ت بين احد الكراسي الموجوده امام الغرفه ..
احس كني فاقده كل ذاتـــي ....مدري وش الي بعدها يحتريـني
من غاب الي حضوره غناتـــي...وانا ادري ان اقصى المواجع تبيني
حاولت الملم بالقصايد شتاتــي..اثر القصايد همها محتوينـــي
وشلون ابهرب من بعض ذكرياتي...دامه جميع الذكريات وحنيــني
من قبل ما البس برقعي او عباتي ...وغلاه لابس نبضة القلب فيـني
كنت افتخر قدام كل البناتـي ...واقول هذا الي ابيه ويبـــيني
وكان الغرور بداخلي من صفاتي...وكان الجنون بدنيته يعترينــي
واليوم والله راس مال سكاتـي...نظرة وداع ساكنه وسط عينـي
اعيش فيها مابقى من حياتــي...ماهمني من ذنبها وش يجينــي
لابد ما يوم يجي به وياتـــي ..ويشوف بعيونه سوايا سنيــني
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك