رواية حافظ عهود الحب يومك تبيه -7
لاحظت انه مكسور من داخله والهم طاويه قربت عنده وضمته لصدها همست له بصوتها العذب
رح لها اسئلها عن الحقيقه لاتقعد هنا تنتظر حل
ماجد : اسئلها !!مايحتاج اسئلها هي انكرتها !
ساره : من يدخل غرفتكم حتى نقول انه يمكن يسوي هالشى القذر
ماجد : انا وهي وانتوا (ساره +عهود +مها)من بيحطها منا لها !!
ساره : طيب الرقم من هو بسمه ؟
ماجد : الرقم بدون اسم ومقفله جهازها
ساره متفاجئه: يعني حرمه اللي كلمتك ؟؟
ماجد يقول السالفه وكانها يتذكرها بمراره : ايه ..تقول انها خايفه على سمعت خواتي من حركاتها لانها تشوفها كذا مره تطلع من البيت وهو يوصلها عند الباب بس هو بسيارته وهي بسيارتها والناس بيشكون في خواتك وبيقولون فيهم كلام يمس سمعتهم وانا ما ارضى لان الساكت عن الحق شيطان اخرس وقالت لي عن شكل الشنطه اللي لبستها في اليوماللي قابلته فيه يوم طلعت لموعدها واللي شالت الظرف فيها وانا كنت بالدوام واستغلت طلعتي لدوام ..من سمعت كلامها مدري وشلون وصلت للبيت حتى ماحسيت بنفسي الا وانا اعطيها كف ورميت عليها الطلاق غمض عيونه يحس بنار داخله حبه اللي مات في بداية حياته ..خيانة اقرب الناس له .. فرحته بطفله ماتت قبل يظهر على الدنيا..
ماجد تنهد بضييييق : ياساره احس بناار بصدري عجزت اطفيها فرحتي ماتهنيت فيها
ساره ودموعها تنزل على شكل اخوها وتعابير وجهه الحزينه كانت تشوفه شامخ مايهتز كانت تحسه مداوي الناس لكن هو يبي من يداويه
ساره بخوف: بسم الله عليك من الاااه ..مدري وش اقولك بس لاتظلم العنود لاتعطيها ورقتها لين تعرف الحقيقه
ماجد هز راسه بالايجاب
قامت سئلها وين بتروحين ؟
ساره بأبتسامه: بروح اجيب لك اكل
ماجد نزل راسه : مو مشتهي
ساره : اجل وشلون بتعرف الحقيقه ؟ اذا ماكليت ماراح تقدر تحرك ولا تفكر زين
ماجد :لا اشتهيت كليت
ساره : ماراح اطيعك بروح اخليهم يجهزون لك اكل على بال ماتأخذ شور وتطلع
تاكل بالصاله ومدت يدها ومسكته ووقفته يالله ادخل على بال ما اجهز ملابسك
ـــــــــــــــــــ
ابو ماجد في صالته مع خالد وتركي وام ماجد ..
ام ماجد : اقول خالد مارحت لماجد تحكي عليه ؟
خالد : يمه ماجد تعبانه نفسيته خليه على راحته
ام ماجد : رح له خله يجي لي الحين ابغااه وانا بخليه يرجع ماجد الاولي
تركي بسرعه : وش بتقولين له ؟
ام ماجد : لاتلقف انت ..... خالد قم وخله يجي لي الحين تفهم ؟
تركي تفشل من رد امه وسكت منها ومقهور من ردها
ابو ماجد : وش ناويه عليه ؟؟
ام ماجد بأبتسامه : الزعل مقدور نرضيه
ابو ماجد : ايه وش ترضينه به بتروحين تطلبين من العنود ترجع له !!؟؟
ام ماجد بعصبيه : تخسي ترجع للبيت بعد ماتركته
ابو ماجد بنفاذ صبر : اجل ؟
ام ماجد : بزوجه وحده احلى وارقى من القــ
ابو ماجد قاطعها واشار باصبعه بوجهها : انتي تسكتين ولاتدخلين فاهمه ! والا بيصير شىء ماتمنينه انا سكت طول هالفتره رغم ان تعاملك مع بنت الناس شين لو هي بنتك مارضيتي لها تحملتك عشان زوجها تبي تجمل لكن انتي مافيك جماله وقام بغضب وطلع برى ورجع اسرع مما طلع : اسمعي لو عرفت او سمعت بسسس انك جايبه له سيره عن اللي براسك ماراح يحصل لك طيب فاهمه ؟؟
ام ماجد:...
ابو ماجد بصراخ : فاااهمه
ام ماجد بخوف : ايه ايه فاهمه
فتحت عيونها بخفه تسمع اصوات حولينها تلفت تدور مصدر الصوت شافت امها وخالتها في طرف الغرفه ..تذكرت سبب دخلتها المستشفى
العنود بصوت رايح من التعب وجفاف الريق: يمه
ام خالد التفت تشوف مصدر صوت شافتها تطالع ناحيتهن بعيون ذبلاه فزت بسرعه لها
هلايمه
العنود : يمه وشقالو لتس عن ونزلت دمعها وحطت يدها على بطنها
ام خالد مسكت يدها : يقولون كل شىء زين
ام سلمان :مساء الخير
العنود : مساء النور
ام سلمان : وشلونتس الحين
العنود : الحمدلله عايشه
ام خالد : يستحق الحمد .. خليني اكلم ابوتس ابشره انتس وعيتي
ام سلمان تحاول تغير من جو العنود : اقول عنوده تصدقين
العنود :وشو
ام سلمان : مدري انتي وخشتس تصيرين ام ..ماش مادخلت مخي <<تحك راسها باستهبال
العنود ابتسمت على حركات خالتها اللي تسويها
ام خالد تجاري اختها : اقول امه العنود وخالته وجود وش بيطلع شروخي << نوع من انواع الالعاب الناريه
ابتسمت على التعليق عن اللي ببطنها
ـــــــــــــــــــــ
* ماجد وش بيسوي ؟؟
* نوف وش بيكون حالها ؟
*تتوقعون ماجد بيرجع العنود؟؟
* وام ماجد تخاف من تهديد ابو ماجد؟؟
البارت العاشر
ـــــــــــــــــــــــــــ
قرر يدق عليها رفع الجوال يدور اسمها في الاسماء
حصل اسمها (من بنات الحور)
دق عليه الجوال حصله مغلق ..اعاد الاتصال من جديد ..توقع انه ردت فعل للي صار وقرر يأجل الاتصال الى وقت اخر وعلى الاقل يلقى طرف او اثبات
على برائها
دخلت عليه ساره : هاماجد ماصار شاور؟
ماجد : دقيت عليها ولقيت جوالها مسكر (تنهد).. اكيد انها زعلانه من اللي صار وقطعت اي اتصال بينا
ساره : ماجد اتركها كم يوم حتى تهدا الامور وبعدين كلمها وتفاهم معها عطها مجال تدافع عن نفسها
ماجد حرك راسه بالايجاب وقال بضيق : وهذا اللي بيصير
ساره : يالله تعال الاكل جاهز
قام وهو حامل هموم في صدره ونزل تحت بالصاله وجابت له ساره الاكل جلست معه تبي تشغله عن التفكير فيها قامت منه سئلها وين رايحه ؟
ساره بأبتسامه: دقيقه وراجعه
حرك راسه بالايجاب
اما هي راحت للمطبخ رفت السماعه اتصلت على عهود وقالت لها تجي هي ومها في بيت اخوها حتى يقدرن يغيرن من نفسيته ..ورجعت لماجد اللي ما حرك شىء في السفره غير الماء
ساره : ماجد ليه ما اكلت ؟
ماجد : شبعت
ساره :شعبت وان ماشرب الا ماء!!
ماجد: انا قلت لك من البدايه مو مشتهي وقام بسرعه بيروح مسكته
ساره : وين بتروح
ماجد : بروح لغرفتي حاس اني هنا مخنوق
عهود ومها ونوف : السلام عليكم
وعليكم السلام
ماجد : استأذن
عهود تكتفت : وين ؟
مااجد يطالعها بأستغراب من طريقتها بالسؤال
عهود :بتروح لغرفتك صح؟ بتهرب من واقعك وتعاود العزله ! الى متى وانت كذا ؟ قبل ماتتزوج كنت غير بتعاملك لا معنا ولا مع مرضاك اللي يدخلون عليك بحاله يثرى لها من سوء نفسيتهم لخطورة اللي يعانون منه و تتغير نفسيتهم بعد ماتعطيهم دافع معنوي لمواجهة الحياه و ان حياتهم بتستمر لو حافظو هم عليها وحافظو على صحة قلوبهم لكن الحين انت وينك من هالكلام والاباب النجار مخلع !!
من اول مشكله اطلقت لنفسك الحكم بدون ماتأكد من الحقيقه ! شكيت في ولدك قبل ماتشوفه !رغم تقدر تعرف انك ابوه وانت عارف هالشىء كونك طبيب بفحص الدم بس تركتك فتره يمكن يرجع لك عقلك لكن ماشفت منك اي تقدم بالعكس تركت اللي اتصلت فيك تفرح عليك
ماجد يقاطعهاصراخ بسسسسسس (رفع يده بوجهها)انتي تدافعين عنها لانك انتي اللي اخترتيها ..تدافعين عنها ماتبين تحملين نفسك ذنب لطلاقها
عهود: انا اعرفها زين ومستحيل تكون من النوعيه الواطيه اللي تكلم عليها العنود ماتخووون ولاهي حقيره حتى تفكر مثل هالتفكير الوسخ انت شف من يبي يهد حياتك
شف من بيفرح بطلاقكم وانفصالكم ؟
ماجد بذهول : انتي وش تقصدين تشكين في امي ؟
عهود: امي ماتقدر تمشي كثير والدرج عالي عليها وانت عارف وامي صحيح ماتحبها لكن ماتفكر تفكير نذل مثل هذا
ماجد : اجل من تقصدين ؟
عهود : انت واثق من الخادمه ليليان ؟
ماجد : ماقد شفت عليها شىء شين
عهود : يعني لو احد طلب منها شىء بمقابل مادي رشوه يعني بتوافق ؟
ماجد : مدري !! تظنين احد معطيها ...
عهود : انا ما ابي اظلمها لكن هي جايه هنا تبي فلوس ومو مسلمه ويمكن احد اعطاها مبلغ محترم وطلب منها هالشىء
ماجد تحرك بسرعه ومسكته عهود : وين ؟
ماجد بقهر :بروح لها وياويلها لو اكتشفت انها سبب هدم بيتي
عهود تأفف بنفاذ صبر: لحظه انت بترجع تعيد نفس الغلط
ماجد : غلط !!
عهود : ايه غلط ..انت الحين حكمت انها هي اللي حطت الظرف والصور وغيره قبل ما تتأكد
ماجد بنفاذ صبر : وش تبيني اسوي احترت معك!!
عهود : نبي نتأكد من الشك مو نجزم فيه ونحكم على الخادمه بشىء مو اكيد انا من البدايه قلت ما ابي نظلمها وهذي سهله بقولك وش نسوي ..
نوف اللي تراقب الوضع وحاطه يدها بفمها وتقضم اظافرها بصمت خارجي لكن من داخلها في خوووف من انكشاف الحقيقه تكلم نفسها (وش بيصير وضعها !! وش بتكون نظرتهم لها !! ليليان بسفرونها لكن هي وش مصيرها!بيودونها دار ايتاام هاااه؟؟ الا اكييد هم قالو لو علمتيهم دار الايتام مكانك لالا وين مايسوونها عمي ماجد وابوي محمد مايسوونها بس انا خنتهم ايه انا خنتهم و انا نذله عمتي عهود تقوله ..بس انا انا ماسويت شىء ماسويت وبصوت طلع منها انا ماخنت ماخنت
التفتوا علي مصدر الصوت
مها : نوف حبيبتي وش فيك ؟
نوف ركضت وطلعت تركتهم مستغربين حركاتها
قامت عهود بتلحقها
ساره : عهود وين ؟
عهود : بروح اشوف نوف وارد لكم بسسسسس لحد يسوي شىء لين اجي
ماجد : وانا وش يصبرني ؟
عهود: فيه شغله مهمه لازم اتاكد منها لاتسوون شىء
طلعت عهود تركض انا ماخنت ؟انا ماخنت ؟؟ يعني نوف اللي حاطه الظرف ؟لالالا بس نوف ماتعرف لحركات هذي !! بس انا سمعتها تقولها متاكده انا ماخنت !!
وصلت عند باب غرفة نوف دقت الباب صرخت بصوت بااكي اتركوووووني ما ابغى احد خلووووووني انا مو خااااااينه انا مو خااااينه والله انا مالي دخل هم هم
حركت مقبض الباب لقته مقفل : نوف افتحي بسررعه الباب
نوف بصراخ :لاااااااااااا ماراح افتح انتو (علت شقاتها)انتوووو بتودوني دار الايتااااااااام صح لاني سكت ماراح افتح ماابغى دار الايتاام
عهووود اللي منصدمه من الكلام اللي تسمعه ومتأثره منه: نوف حبيبتي من قال هالكلام محد بيوديك دار الايتااام
نوف بتسرع : الا هي هي قالت لي قالت ان علمتيهم ماراح يتحملونك وبيودونك دار الايتام
عهود :طيب افتحي وانا اوعدك محد يوديك دار الايتام
نوف بعناد وشهقات عاليه :لاااااا ماراح افتح
عهود تركت نوف لين تهداء ورجعت لهم بخطى ثقيله رجعت لهم وهي متأثره بكلام نوف اللي سمعته وتلعن في نفسها اللي دخلو الفكره براسها
تــدري وش اللي يجرح القلب جرحيــــن
ويمـــد حبــــل الحـــزن فيـــك ويشــــــده
انـــك تناظــر طفــل مـن غيـــر ابويــــن
يمشــــي ودمعــــة سايــل فـــوق خــــــده
منظــر صعيـب ويقســـم القلب قسميـــــن
لا قــام يمســــح دمعـــــة بكــــف يـــــــده
يمشـي ولا يــدري طريقــة علـى ويـــــن
ليــن التعـــــب من كثـــر ماتــــاه هـــــده
اثقـــل حـــروف يشيلـهـا فـيـــه حرفيــــن
لا أب يــــــدري بــــــــه ولا أم تـــــــرده
في خطوتــه رحلـــة ودمعـــة وسـكيـــــن
وحــــــظ توســــد بالمــراســـي مـخـــــده
جيــت اسألـة باللـه قـللــي ولــد ميـــن ؟؟
وبغــى يجــاوب واختنــق صــوت رده
أنـــا يتيـــــم ومــا لدربــــي عنــاويــــــن
وجــــزر الحـــزن فينــي يســـاوي لمـــده
وطعــم الطفولــــة ما عرفتـه لهـا لحيــــن
وثــوب السعــــادة صـــرت مانيـب قــــده
ابكــي إلـــى من شفت غيــري سعيديــــن
ليـــن البكــــــا فينــــي يوصـــــل لحـــده
واقفـــى ورحت امسح دموعي من العيــن
وعينـــــي تناظــــر دمعتـــه فـــوق خــده
وهذا اللـــي يجـــرح القلــــب جرحيــــن
ويمــد حبـــل الحــــزن غصـب ويشــــده
* نوف واعترفها هل هو حقيقه او ردت فعل عكسيه من الخوف ؟؟
* من هم اللي تتكلم عنهم نوف؟؟
* وش ردت فعل ماجد ان عرف وتجاه نوف بالذات ؟؟ والعنود وش مصيرها ؟
البارت الحادي عشر
ــــــــــــــــــــــــــــــــ
قابلتها صدفه بمستوصف القمـــــه ..
. . بالعين راعيتها لحظه وترعانـــي
شميت انا عطرها ويابخت من شمه..
. . يدوخ ويسكر ولو ماهو بشرباني
قمت اتذكر زمان فات والمـــــــــــه . .
. . لاعاده الله نصيب يوم ودانــــــي
هلت دموع العيون ولابقى همـــــه..
. . من ماجرا لي نسيت آلام الاسناني
معها اخوها رفع كفه على فمـــــــه..
. . كنه يقول الله الستار ياقانـــــــــي
نفس الملامح ويشبه دمها دمــــــه..
. . سبحان رب خلقهم دعج الاعياني
يدري بحبي وتدري امه وعمـــــــه . .
. . حال القدر بيننا والحب سلطانـــي
يبكي ويمسح دموع عيونه بكمــــه ..
.. يبكي على شانها ويبكي على شاني
والله يالولا الحيا والدين لاضمـــــــه . .
. . واسمعه شهقه من قلب شفقانــــــــي
والحب بلوى ومنه الناس مهتمــــه . .
. . وش حيلتي والغضي دمي وشرياني
جسمي يروح ويجي والقب من يمه . .
. . القلب عنده يبيه ولايبي ثانـــــــــي
اقسم بربي وانا لي مذهب وذمـــــه..
.. لاعيش احبه ولو حبه علي جاني
شربت كاس الهوى ورويت من سمه ..
.. مامت ورتحت ولاهو بللي احياني
اضحك مع الناس والاحزان منضمـــه ..
.. كني سعيد وانا مبلي بالاحزانـــي
عندي وصيه وتالي الهرج يايمـــــــه ..
.. الموت حق على القاصي مع الداني
وان صرت فوق النعش والناس ملتمه..
.. مرو على بيتها وتشوف جثماني
قول لها الموت زم صويحبك زمــــــه ..
.. مامات حبك ولو هو بالنعش فانـــي
شلناه الى المقبره وادعي له القمـه..
.. خوذي ثوابه وجوده له بالاحساني
يالله يالمقتدر ياكاشف الغمــــــــــــه. .
. . تفرج لمن حالته دوم بنقصانــــــــي
ماجد بتسرع : تاخرتي كل ذا تراضين نوف
عهود رفعت نظرها لهم و دموعها في محاجر عيونها قالت لهم ببرود موليليان اللي حطت الظرف
ماجد: وشووووووو
ساره : من اللي حطه اجل
مها بتسرع : انتي عرفتي اللي حطه ؟
حركت عهود راسها بالايجاب
مهابهمس : نوف صح؟
رفعت نظرها لماجد تفكر وش بتكون ردت فعله لاعرف بالحقيقه ؟ وش بيكون وضع نوف عنده ؟ يوم ماسلمت على العنود سوا فيها نفس الحركه الحين وش بيكون رده بعد مايعرف ان نوف ساكته عن الحقيقه
ماجد بنفاذ صبر: ماخلصتي من مطالع وجهي
عهود : ااا امممم بقول لكم بس اسمعوني للاخير
ماجد بسرعه : يالله خلصيني
عهود : اذا بتسمعني وانت على هالحال ماراح اتكلم
ماجد يتأفف:شكلنا مطولين
عهود : اذا بتسمعوني بهدوء لين اخلص كلامي راح اعلمكم
ماجد : اصلن عرفت ما يحتاج نوف هي اللي سوت الحركه وقام بسرعه
عهود بسرعه اكبر : نوف ضحيه مثلها العنود
ماجد وساره ومها بنفس الوقت :ضحيه!
عهود : ايه ضحيه .. نوف عارفه من اللي حط الظرف ..لكن موهي ..
نوف تعرف اللي حط الظرف لكن مو هي اللي حطته ..اللي حطه مهددها ان اكتشفوا انها تعرف الحقيقه ماراح نتحملها ونحطها بدار ايتام !!
وشوووووو ..هاااااااه ...<<تعليقاتهم
عهود : هذا استنتاجي من ردود نوف وبكاها
فز ماجد بغيض وطلع بسرعه
ساره لحقته تبي توقفه لكن ما قدرت عليه اما عهود بكت بسبب حالت بنت اخوها وضيقها واستغلال برائتها
ــــــــــــــــــ
في غرفتها تنتظر دخول اهلها عليها التفت لخالتها اللي ترافقها من الصباح الى المساء
العنود: خاله
ام سلمان: هلااا
العنود : اهلي تاخروو
ام سلمان :الغايب عذره معه
العنود : الله يجعله خير
ام سلمان : امين
العنود : خاله ماقالك الدكتور اذا وافق يطلعني ؟
ام سلمان : ليه انتي قلتي له ؟
العنود : ايه امس يوم فحصتني الممرضه وتبلغه بنتيجة الفحص قلت له ابغى اطلع
وسفهني (طنشني )
ام سلمان: مقدي فيتس >>(احسن) دابله تسبده
العنود متفاجئه : ليه
ام سلمان : الحين هو دكتور ومعنده يفحصك وتخلين ممرضه تفحصك !!
العنود تضحك : خاله استحي والله ما اقدر
ام سلمان تطنز: تراه شابع من خشتس
العنود : كيفه اهم شىء ما يكشف علي وانا واعيه هههههه
ام سلمان : والله المتخلفه
العنود بأبتسامه : متخلفه متخلفه الشكوى لله
ــــــــــــــــــــ
ــــــــــــــــــــ
خرج من بيته مقهور حطم حياته بسبب كذبه ضيع زوجته وشك في ولده ما يدري وين يروح اروح للعنود اراضيها ؟؟ !لا لا وش اقول؟ اقول العنود عرفت الحقيقه !
دخل لبيت ابوه فتح الباب مايشوف احد قدامه صعد الدرج
ام ماجد : مااااجد انت هنااااا تعال ابيك بسرررعه
ماجد بتعصيب : موفاضي يمه لك الحين
امه : ترفع صوتك علي !! هذا جزاي !
ماجد بضيق نزل الدرج ونزل على راس امه وباسه : يمه جعل والديك بالجنه انا ما اعرف وش يطلع مني الحين سامحيني
ام ماجد تمثل الزعل : الله يسامح الجميع .. رح كمل شغلك خلااص مو ب لازم
ماجد جلس جنبها وحط يده من خلف ظهرها : لا يالغاليه ما فيه اهم منك انتي اساس البيت امري وش تبي وانا مستعد باللي اقدر عليه
ام ماجد بأبتسامه : ابغاك ترجع ماجد حبيبي ولدي ولد صيته اللي كلن تمناه لبنتها
ابيك تحقق امنيتي من يوم كنت صغير وانا اتمناها حققها قبل ما اموت ياولدي
طلبتك يابوي طلبتك .
ماجد : ابشري اللي امرين فيه
ام ماجد : ابيك تاخذ جواهر
ماجد فز بسرعه وبضيق : زواج ماراح اتزوج كل شىء الا الزواج خلاص انا تزوجت وحده ولغيرها ماراح اكون ولو تحبيني مثل ماتقولين لاعاد تجيبين لي سيرتها هنا
ام ماجد : بس انا من وانتو صغار اقول انكم لبعض والبنت كانت ترفض الخطاب لان محيرتها لك
ماجد: هذا غلطتكم من تخططون على كيفكم وترسمون حياتنا على كيفكم وتبونا نعيشها بطريقه اللي انتوا حاطينها ..غلط يمه غلط انتي اللي حطيتي عندها امل فيني ا نا ما افكر فيها ولاعمري فكرت فيها ولا راح افكر فيها ..
ام ماجد بحده : اسمع تبي رضاي تزوج جواهر ..سمعت ؟
وبنظرة تهديد وتأشر بأصبعها :اسمع بعد اياني واياك تقول لاحد اني اجبرتك عليها فاااهم ؟؟
ماجد التفت منصدم من اللي سمعه امه تحاول تضغط عليه وتهدده!!!!
صعد بخطىء مثقله كان جاي يبغى يتأكد من نوف حتى يرجع زوجته وام ولده
لكن دخل في سالفه جديده سالفه مالها حل الا الزواج !! وهذا مستحييييييل اسويه مستحيل اكون زوج لجواهر جواهر !!
دق الباب وماسمع رد دق ثانيه وماسمع رد حاول يفتحه لكن مافتح
قام يناديها : نووف افتحي ..نوف انا عرفت كل شىء ..نوف افتحي
ماسمع صوتها صار يضرب باقوى وما رد احد عليه
عهود ومها وساره دخلو على امهم اللي جالسه بصالتها
السلام عليكم
ام ماجد : وعليكم السلام
سمعو صوووت من الدرج التفتوا لصوت شافوه يركض بسرعه وصوت خطاويه السريعه شايلها بين يدينه ويصرخ افتحووووو البااااب افتحوا البااب ركضن يفتحن له الباب وطلع وبسرررررعه راح لسياره حاول يفتحها لكن مقفله صار يصاااااااارخ
جوزييييييييييييف جوزززززيف وصار يدور مايدري وين يحطها
جته عهود تركض وتحاول تلبس طرحتها صرخ فيها طلعي المفتاح من جيبي بسررررررعه
دخلت يدها طلعت المفتااح بيدين مرتجفه و فتحت الباب وركضت للباب الخلفي من الجهه الثاني وجلست حط راس نوف في حظنها وتحاول تصحيها تطبطب على وجهها نووف حبيبي قومي نووووف محد راح يوديك دار الايتاااااام نوووووف قومي نووووف ضمتها لصدرها خايفه تضيع من بين يدينها فتح باب السياره يطلعها منهم شالها وصار يركض فيها بالممرات يبغى يوصل لجهة الطواري جته ممرضه وطلبت منه يحطها على السرير وطلب بسرعه الدكتور يجي والتفت لها كان يبغى يصحيها لكن انصدم من شكلها نوف يطلع من فمها فقاعات !!
زمن قاسي بشر أقسى قلوب مابها إحساس
زمن حلـل قتـل طفله وطفـل لاهي في بيتـه
زمن فيه الوفا كلمه تخط بـأبيـض القرطاس
زمن لـوشاف دموعي يسمعني زغاريـته
طلع يركض يبغى يشوف الدكتور المناوب شاف الممرضه اللي دخلتهم ركض له وسحبه بيده بسرررررعه تكفى بسرررعه
دخل عليها الدكتور طلب منهم الخروج للفحص
عهود تبكي ويتردد في بالها كلامها وشهقاتها بتودوني دار الايتااام .... انا خاينه سكرت عهود عيونها وصارت دموعها تنزل بغزاره
طلع لهم الدكتور
قامو هادكتور ؟
الدكتور البنت تعاني انهيارعصبي بسبب سماع لاخبار سيئه او محزنه او مفاجئه !!
وانا مستغرب بنت في بداية حياتها تعاني من الانهيار العصبي !!
وهذا دليل على تعرض بنتكم لضغوط نفسيه مزمنه !!
البنت اعطينها مهدئ وراح ينقلونها لغرفه تنويم
راح وتركهم خلف ..تركهم يستوعبون الكلام اللي قاله
بنتكم تعاني من ضغوط نفسيه !! معها انهيار عصبي !!
جتهم الممرضه وقطعت حبل افكارهم : من فضلك روح سجل اوراق دخلوها للمستشفى
حرك راسه بالموافقه والتفت جهة عهود انتي بترافقين معها ؟
عهود : ايه اكيد وانت بترجع والا بتروــ
يقاطعها بوقع الاوراق وارجع لك بسرعه
كشيخٍ حائرٍ أبصرت يوماً ..
صغيراً قد جَفَا الدنيا ونَاحا
تُغالب عينَه العبراتُ حرَّى ...
يناغي الدمعَ قد نَسِيَ المِرَاحا
فأبصرني وفي عينيه برقٌ ...
فشقَّ الهمُّ قلبي واستباحا
فقلت ومقلتي سكبت دموعي ...
رويدك يا صغيرُ دعِ النُّواحا
فقال : أنا (يتيمٌ) ؛قلتُ :كلا...
فعينُ اليتم من فقد الصلاحا
فخالَطَتِ ابتسامتُه دموعاً...
ظَنَنْتُ الحزن قد ولّى وراحا
فقال وقد تلعثم في سؤالٍ : ...
أيا عماه أرجوك السماحا
صغار الحي نادوني يتيما.....
وكل القوم قد عافوا امتداحا
أحقاً لن يعود أبي، فمن ذا ؟! ...
يسليني ؛ لمن أشكو الجراحا ؟!
وهذا الهم شيبني صغيرا...
أناجي الدمع أرتشف الجراحا
وكل الأمنيات غدت سرابا
مع الأحلام تصطحب الرياحا
*** *** ***
تذكرت اليتيم وما حباه ...
إله الكون من خيرٍ متاحا
فقلت مغالبا حزني، وقلبي ....
كواه الحزن ممتشقا رماحا
بُنيَّ كفاكَ ألهبْتَ الحنايا...
بهمٍّ قد حَوَى حتى البِطَاحا
بُني.. بُني لا تحزن فإنّا ...
لك الأحباب فلترجُ الفلاحا
لك الأصحاب فلنمضِ سويا ...
نعيد المجد نرتقب الصباحا
فغالبْ يا حبيب القلب هما ....
وسلِّ النفس وامنحها المزاحا
فودعني يكشر عن ثنايا
وسر النفس قد بان ولاحا
وأطرق ماشيا يدعو : إلهي ...
وودعني بدمع واستراحا
الـــيتيـــم
* وش بيصير لنوف ؟ وهل بتكشف من هم اللي اجبروها على الصمت ؟؟
العنود والدها ملتزم الصمت هل هو الهدؤ اللي يسبق العاصفه ؟؟
ماجد وش بيسوي يرضي امه ؟؟ والا يرضي نفسه ؟؟
البارت الثاني عشر
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك