رواية كل يوم لك حال جديد يوم قريب ويوم بعيد -26
هو صدق كان يبي من زمان ها التهور..من يوم الحفلة وهي بذاك الثوب اشتهاها..وكل يوم يمر ويشوفها بشكل جديد يقاوم نفسه لاياخذه بس اليوم ماقدر يضبط نفسه ووصلت معه للنهاية....
وبعدين هي زوجته ومحد له أي شي....
يبيها ويحبها وماهو قادر يوصل لها الشي ومايبيه يوصل..بس يوم قال لها انه يحبها كان متأكد انها ماراح تصدقه فماشال هم كبير يوم قالها رغم انها كانت طالعة من قلبه,,,
بس علامها مو راضية ترد عليه وعلى اتصالاته!!
تبيها ترد شتقول لك يانواف بس!!ماقصرت بللي سويته؟؟
البنت اكيد مستحية ونفسيتها صايرة زفت ومابتدق لك ولابترد عليك.....
اه بس اه....ربي يعلم بللي بقلبي ناحيتك يياسمين حتى لو كنتي مثل ريم بعد بحبك وماراح اقولك...انتي ماتدرين وش قد انا اعاني من زمان بسببك..من اليوم اللي كان لازم نملك فيه وماجيته؟
تنهد بقوة وهو يتذكر ذاك اليوم ويناظر بجهة ياسمين اللي كانت فيها وهو يقول كان المفروض انك تكونين بها المكان من قبل اربع سنين مضت ياعمري مو توك اليوم..
شال جواله ودق عليها من جديد وماشالته...عوره قلبه عليها اكيد اللحين جالسة تبكي منك يانواف..طيب والحل شلون بس!!مو حلوة ارجع بيت عمي من جديد وانا كنت معها..يمكن احرجها واحرج نفسي بعد!!
دق على تركي يشكيه..
تركي هلا..
نواف انا متصل اشكيك بس شكلك انت اللي متنرفز؟
تركي بضيق شوي...سالفة فيها نوف وعبدالله مافهمت منها غير شي بسيط وابي اعرف الباقي؟
نواف ....
تركي علامك صوتك متضايق...والسبب اكيد يرجع لبنت خالتي؟
نواف انا دخلت عليها ياتركي.....؟؟
بتردد كبير ردت وضحى بهدوء هلا يمه..
ام نواف هلا وغلا ..وينك ماتسالين ولاتدقين ولاكاْن عندك ام؟
وضحى وهي تمسح دموعها وهي عاطية نفسها امل ان امها بتسمعها اليوم وبتقول لها عن كل شي بينها وبين خالد..
وضحى بتعب تمهيدا للموضوع تعرفين الحمل يمه متعبني شوي....
ام نواف ليه انتي حامل؟؟؟
وضحى بغصة يمه انا قايلة لك بحفلة نواف وانتي باركتي على الماشي..
ام نواف والله ماانتبهت....
تنهدت وضحى وسكتت..
ام نواف والله انتي واخوك كبرتوني بصراحة ذاك ولده اربع سنين وانتي اللحين حامل وهو بيتزوج بعد وبيجيب عيال...
وضحى بصدمة يمه هاذي سنة الحياة وين الغلط بالموضوع؟
ام نواف كان اجلتي شوي بعد بتطيرين انتي!!
بحدة قالت يمه انا مئجلة الموضوع سنتين لمتى بعد!!
ام نواف مو هاذي قضيتنا؟
وضحى على قولتك...
ام نواف انتي بشقتك امرك...
وضحى بتعب لايمه انا متخانقة مع خالد وطالعة من البيت؟
ام نواف انتي لاتصيرين هبلة وكل يوم تاركة البيت وطالعة ترى اخرتها بيعوفك ماهو ظال معك؟
وضحى بدفاع يمه هو الغلطان..
ام نواف اذا الرجال عنده فلوس وخير مثل خالد تشوفين غلطه وتسكتين يكفي الخير اللي بتعيشين فيه؟
بمرارة قالت وضحى وكرامتي!!!
ام نواف بين الرجال وزوجته مافي كرامة لمتى بظل افهم فيك عاد ياوضحى....
وضحى كتمت غصتها وسكتت.وغيرت رايها...وش تقول وشنو تشكي ولمنو؟
ام نواف بجدية يمه وضحى انا بغيت طقمك اللي كنتي لابسته بحفلة اخوك...الالماس ..
وضحى بهدوء وحسرة قلت لك انا طالعة من الشقة بعبايتي بس..
ام نواف طيب روحي جيبيه وطلعي لاتقعدين؟
وضحى اذا تبينه روحي انتي اخذيه انا مالي رجعة لذاك المكان ابدا بعد اللي شفته من خالد؟
ام نواف وانتي يوم انك ناوية تطلعين ورى تتركين ذهبك ومجوهراتك ماشلتيهم معك؟
وضحى وهي تمسح اخر دمعة يمه تصبحين على خير بديت ادوخ وبروح انام!!!!
باخر الليل دق فواز لمشاعل..
نوف قومي دق لك فارس الاحلام...
مشاعل اوووف شكلها غيرة هاذي؟
نوف هذا اللي نقول بنقعد نسولف وش صار معنا اليوم تقولين عندك سوالف وانا اقولك عندي سوالف....
مشاعل طيب بنسولف ليه وين بنروح...بكلمه شوي...
قاطعتها نوف بتكلمينه اقل شي اقل شي ساعتين الا انا عطيتك عمري ونمت,,,
مشاعل لابتنتظريني مو قادرة ابي اقولك وش اللي صار اليوم وشوفة عينك ماصار عندنا وقت بروحنا الا اللحين؟
نوف بس مو تطولين معه ..
مشاعل لالالا شوي بس...
مشاعل سوت روحها اول شي تعدل صوتها وتحمحم..
نوف وش بيتغير ان شاءالله بتقلبين راشد الماجد على غفلة؟
مشاعل ههه زين لكن بتشوفين يالملعونة..انا ابي اطلع اللهجة الثانية بصوتي اللي هي الخجولة؟
نوف مالت ثم مالت يجي يشوفك بالبيت والله انه بينصدم....
ردت مشاعل بهدوء وهي تضحك على نوف اللي تناظرها وتغمز لها هلا..
فواز تغلي ولادلع ولاماتبين تردين؟
مشاعل حرام عليك يمكن اكون نايمة؟
فواز اوووف بدري الليلة؟
مشاعل بدري من عمرك..انا مانمت العصر؟
فواز ونوف نامت؟
مشاعل لا تبيني اسولف معها وانا النوم براسي...
نوف جت بترفع صوتها بس مشاعل ترجتها بحركات كانت تسويها وسكتت..ومشاعل تطير لها بوسات في الهواى انها ممنونة لها..
فواز انا ماراح اطول عليك بس اتصلت علشان اسمعها؟
مشاعل شنهي؟
فواز بهمس الكلمة اللي وعدتيني تقولينها...
مشاعل بارتباك انا ماوعدتك اقول شي..
فواز بتعب يالله قوليها عاد..تكفين ترى التعب هالكني مووت بس ماقدر قلت لازم اسمعها قبل ينتهي يومي..
مشاعل متى رجعت من الشركة؟
فواز توني قبل نص ساعة؟
مشاعل بصدمة ترد ها الوقت؟كل يوم؟
فواز لاتخافين على عمرك الشركة مسكرة بس كان لازم اتاْكد من بعض الاوراق والامور ويوم خلصت طلعت ..
مشاعل طيب عندك المغرب..مو انتوا دوامكم لخمس العصر مو لها الحزة؟
فواز انتي ناسية الاجتماع اللي اجلته..والله مابدينا غير على الثمان وماخلصنا الا قرابة عشر وربع وبعدها خلصت اموري ورديت...
مشاعل اوووف قلبي يعورني عليك؟
فواز بخبث علي ولاتطمنين من اللحين على نفسك؟
مشاعل بارتباك اكثر لا عليك طبعا..
فواز بهمس اصلا اذا جيتي عندي البيت ماراح اداوم بالشركة بنقل شغلي كله البيت..علشان اظل قريب منك...
مشاعل بهيام متاْكد مابيلهيك الشغل عني!!
فواز بهمس مستحيل طبعا....انا ودي بلحظة لقانا تجي بسرعة....
مشاعل ..........
فواز قوليها..ابي اسمعها...
مشاعل مستحيل استحي اقولها..
فواز الله يخليك...قوليها تكفين...
مشاعل لالالالا مقدر...
فواز معناته بكرة بنتعشى مع بعض علشان اسمعها منك بالغصب ومالك امل ماتقولينها,,
مشاعل .........
فواز مشاعل...متى ودك نتزوج؟
مشاعل بسرعة باقرب وقت طبعا,,
فواز بتصفير اوووف شكلك مستعجلة اكثر مني!!
مشاعل حاست بروحها وماعرفت شتقول..
فواز ههههه احبك...صدقيني احبك وبظل احبك لااخر يوم بحياتي...انتي وبس...وماغيرك بياخذ مكانك بقلبي,,,معناته بكرة بنحدد موعد العرس طيب,,,
اليوم الثاني الصباح بعد الساعة تسع وربع في بيت الجد,,,
مشعل بحفاوة حيا الله من جانا..هلا وغلا تفضل...
رفعوا ام مشعل والجد والجدة راسهم وحتى احمد اللي كان توه يفطر رفع راسه يشوف,,,
ام مشعل مشعل انت مو رحت المدرسة....
مشعل يمه معي ضيف,,,
دخل مشعل ودخل وراه سعد,,,
الجدة وينه الضيف؟ان شاءالله سعيدان؟
سعد شكلي مو عاجبك؟
ام مشعل بتنهيدة انتوا ليه مارحتوا المدرسة ياحظي!!
سعد اوه ه ه...هذي خالتي الغالية,,,تعالي يبى ابوس راسك...
تقرب منها وباس راسها..
ام مشعل لاتسوي روحك ترضيني...وش اللي مطلعك من المدرسة بالله!!
الجد لانهم مفكرين ماوراهم رجال؟
سعد وهو يتلفت يمين وشمال وين الرجال انا مو شايف احد؟
مشعل هههههه عجبتني...
ام مشعل ركزوا يالله ركزوا روحو انقلعوا مدرستكم يالله,,,,
مشعل يمه التلاميذ كلهم طلعوا ماظل احد بالمدرسة؟
ام مشعل وخير ان شاءالله؟
سعد والله مدري بس كنهم قالوا اليوم اجازة؟
وقفت ام مشعل وهم يناظرونها وقالت بتعب ادري عنكم تكذبون عليّ!!! شوي وبيتصل مرشدكم الطلابي يشتكي منكم دارية عنكم وعن سواد وجهكم؟
طلعت من الصالة وراحت المطبخ,,,
مشعل هيه انت فز قوم ضيف عمك سعد...
قام احمد بسرعة وراح المطبخ..
الجد وش يضيفه بعد!!انتوا ماجيتوا الا بعد ماتفسحتوا اكيد؟
مشعل انت عالم غيب علشان تدري؟
الجدة لا بس مقيولة انتوا ماتركنون بدون بلع تبلعونه؟
مشعل صلوات عليك يانبينا محمد من كل عيون حارة؟
الجد وبعدين انا مو فاتح بيتي سبيل للي يسوى واللي مايسوى,,
سعد يهمس لمشعل شكلنا بنرجع سالفة جميلة؟
مشعل وهذا اللي انا اقوله بعد!!!
الجدة علامكم تتهامسون انت وولد خالتك..زوجي الصادق ماهو فاتح ديوانية يصرف عليكم منها؟؟والله خيره كله لكم!!
سعد يعني بالعقل خيره اذا ماصرفه علينا وين بيوديه ياخذه معه القبر؟
الجدة بثقة يصرفه عليّ لاني زوجته؟
مشعل انتي ماباقي مضعد ماهو بيدك بعد وش تبين!!!
الجدة صل على النبي من عيونك الحارة...
سعد الا الصدق جدي جدتي قاعدة تقص عليك انا لو منك مااخليها تتهنى وكل يوم شاري لها مضعد....
الجد بتفكير شلون يعني!!
مشعل بنحاسة يعني انت البنات يموتون عليك لبس نفسك كشخ حالتك مو مقابل لي ها العجوزة المخرفة تتشرى لها بها الذهب والله محد بيكدها الا ورثتها ياجعلي واحد منهم!!
الجدة استح على وجهك ياصبي وش ها الكلام ؟؟
مشعل عندك جميلة مثلنا كل يوم تمر على باب بيتنا علشان تسرق منك كم نظرة...يااخي غير شيفتك خلها تشوفك بلوك جديد؟
الجد بتاءثر جميلة تجي تشوفني!!الله ياخذك يامشعل ورى ماقلت لي قبل؟
سعد وانت تبي احد يحاكيك ياجدي مقابل لي ها العجوز وعايش معها هي خلص عمرها بس انت بعدك شباب!!
الجدة بصراخ عصاتي...وين عصاتي..يااحمد جيب عصاتي..
طلع احمد من المطبخ وبيده كيس فيه عصيروبيبسي ومكسرات وبريد وجبن وكلهم على بعض..
سعد شوف الثور..فيه شي اسمه صينية يحطوهم فيه مو على بعض..ياانك سديت نفسي!!
احمد انا مااعرف...
مشعل خلاص سعد سامحه علشاني لانه ماجرب يضيف احد قبل ها المرة؟
سعد اللحين انت يابو جميلة شقلت تبي تغير من حالتك ولابتظل كذا علطول تخيب امال البنات المعجبات؟
الجد بحماس الا اكيد بتغير....
مشعل حلو....انا وسعد بنتكفل بعملية شراء الملابس لاتخاف انت مو قد تتعب علينا وانت تمشي والعصر بنجيب لك الحلاق يسوي لك سكسوة وحركات؟؟
الجد بفرح الله يعطيكم العافية...
سعد لاانا اقول احنا ناخذه على الحلاق تعرف جدي مايطلع لازم يغير جو البيت شوي...
الجد أي أي وانت الصادق..
مشعل المهم حط في بالك ان تغيرك يبيله صرف,,,
الجد موافق موافق...
سعد يالله يدك على اربعة الاف ريال؟
الجدة شهقت حشى وش بتسوون فيه؟
مشعل لو هو ذهب لها ماقالت لا..
الجد بصرامة انتي سكتي لاابيع ذهبك تراه كله بفلوسي...
سعد وين بطاقتك؟
الجد البطاقة مع خالتك ام مشعل..بس ترى محد يعرف الرقم غير ياسمين وخالد هم اللي يسحبون لي لو احتجت...
مشعل مو مشكلة انا اكلم اختي اسئلها بس انت راضي طبعا؟
الجد أي..
سعد قوم ارتاح علشان موعدنا مع الحلاق العصر..
سعد بهمس خل نحجز ونروح جدة يومين ونرجع وش قلت يابو مشيعل؟
مشعل جدة جدة وش ورانا بس ان شاءالله امي توافق؟
كانت تمشي مع نورة بالجامعة وكل وحدة تسولف عن اللي صار لها امس ومشاعل كانت بمحاضرتها ودقوا لياسمين بيشوفونها ليه غايبة ماردت عليهم وخالتهم قالت انها نعسانة ومارضت تقوم من سريرها ,,
شوي الا ويدق جوال نوف وكان تركي..
نورة ماكلمك من البارح؟
نوف بتنهيدة لا....
نورة طيب تعالي نجلس هنا وردي عليه...
جلسوا بالكافتريا وردت عليه..
تركي عسى بس ماعندك محاضرة وازعجتك؟
نوف لا بوقت المحاضرة اقفله..باقي لي ساعة الا ربع على محاضرتي.....
تركي ..........
نوف ..........
تركي شلونك؟
نوف وغيره؟
تركي نعم...
نوف بثقة انا عارفة انك تبي شي فياليت تقول وش تبي بدون ماتلف وتدور وتسال عن الاحوال...
تنهد تركي وسكت..
نوف شفت انك تبي شي..وبريحك انت تبي تسال عن البارحة صح؟
تركي نوف انا مااسمح لعبدالله ولاغيره انه يقول عليك كلمة وحدة واذني تسمع فاهمتني!!ابي افهم واعرف السالفة؟
نوف أي وبعدين...
تركي شنو وبعدين؟
نوف طيب ولاعرفت السالفة وعرفت منهو الغلطان ومنهم على حق وش بيصير؟وعلشان اريحك اكثر اذا عرفت ان عبدالله سمع كلام وصدقه في بنت عمه وش بيصير..بتتهاوش انت واخوك هذا حل برايك ياتركي؟
تركي بحدة اذا طلع هو الغلطان ادفنه ولايجيب طاريك بشي يشوه صورتك..
نوف اصحى ياتركي اصحى...مو معقول ان أي احد يجيب سيرتي ينمحي من على وجه الارض؟؟؟يااخي انت بتفترق مع اخوانك وانا السببّ!!!تركي انا ماابي اقعد في بيتكم علشان ها الشي؟انت قاعد تحارب الكل...فاهمني...بتخسرهم كلهم وبتزيد نارهم عليّ,,
تركي بتنهيدة طويلة قال برقة بس انا احبك وماابي أي احد يجيب فيك كلمة وحدة...
نوف تركي صدقني طلعتي من بيتكم بتكون الشي الانسب...
تركي مستحيل اتركك تطلعين من البيت يانوف...هذا بيتك..الا بعد الزواج لو ماحبيتي تظلين فيه؟
نوف ممكن اسكر...
تركي ليه تهربين مني كل ماانفتحت ها السيرة؟
نوف بحدة تركي لاتفكر اني مشيت لك سواتك بالامس ونسيت السالفة؟لا ابدا انا بس ماحبيت احقر اتصالك؟
تنهد تركي وقال بهمس وانا وش سويت عاد!!
سكتت نوف ونشف دمها من لهجته..
تركي بتنهيدة اكبر واكبر وهمس شله قلبها من مكانه نوف...بقلبي لك شي ماتتصورينه...بس تكونين جنبي بتعرفين..
نوف بهمس تركي بسكر..
تركي بترجي لا......تكفين لا...ودي اسمع صوتك...
نوف مقدر..
تركي باقي عندك وقت...لسه مابدت المحاضرة؟
نوف بهمس وهي خايفة من اللي بيقوله خلاص بعدين..مافيني اسمع شي اللحين صدقني انا مع البنات وماابي...
تركي بترجي نوف...احبك..لاتحرميني ابسط شي...خليني اسمع صوتك؟
نوف ....
تركي ابي اخذك بحضني وماافكك...ماابي أي شي بها العالم يشغلك عني..ابيك لي لوحدي....
سكر من نوف واتصل على عبدالله اللي رد عليه بسرعة..
عبدالله هلا تركي..
تركي اعتقد لازم نتكلم؟
عبدالله عن اللي صار البارحة؟
تركي الا اذا في شي غيره لازم نتكلم فيه؟
تنهد عبدالله وقال بارتباك تركي لاتفهمني غلط ياخوك....يعني وصلني كلام و..
تركي بحدة واي كلام بيوصلك عن نوف بتصدقه؟
عبدالله مو قضية اصدقه بس....
تركي عطني الزبدة منهي ذي عبير وش تبي وشنو قالت عن نوف؟
عبدالله بس الكلام يكون بينا!!
تركي بحدة انا محد يشرط عليّ شي...
عبدالله بهدوء عبير الفالح...بنت جيرانا..انا احبها ويوم ملكة مشاعل قلت لنوف تتعرف عليها علشان تمهد لي موضوع ارتباطي فيها بس يظهر ان نوف لها شخصية ثانية مع الناس ..
تركي شلون يعني؟
عبدالله مدري بس هذا اللي قالته لي عبير قالت ان نوف مغرورة وشايفة حالها وانها ماتبيها تكون لي وانها هي قاعدة تخطط تتزوجني!!
تركي وانت صدقتها؟
عبدالله يعني نوف عايشة معنا من زمان ومانشوفها غير بالهدوء صحيح هي واثقة من حالها بس ماهي مغروروة وتعجبت يوم قالت لي عنها عبير..
تركي والله عاد نوف اذا صارت مغرورة فهذا حقها لانها شيخة البنات اما بالنسبة انها قاعدة تخطط عليك روح وصل للي قالت لك ها الكلام وزرعت الفكرة في راسك نوف زوجة اخوي...
عبدالله بصدمة انت خطبت نوف ياتركي؟
تركي وان شاءالله تبيني اشاورك قبل لااخذها؟
عبدالله بفرح وكاْن هم وانزاح على صدره لا بس ماسمعت احد يقول....
تركي الوالد مشغول ها اليومين وبس يفضى بنتكلم بالموضوع,,,انا بسكر اشوفك بالبيت....
سكر تركي وعبدالله دق لعبير بسرعة وتمنى انها ترد عليه لانها بالعادة يانايمة يامالها خلق,,,,
عبير بنعس هلا..
عبدالله وغلا بكل الحلا..
عبير ماشاءالله رايق...بس تراني نعسانة لاتثقل..
عبدالله بغيت ابشرك نوف خطبها تركي..
عبير شفت اني مااكذب عليك يوم ماقدرت عليك وعلى ثقلك رمت حالها على اخوك واخذته؟؟
عبدالله ....
عبير وين رحت؟
عبدالله بتردد يعني هي تبي واحد فينا؟
عبير وحده اخوها طاردها من بيته ومن حياته شلون تبيها تضمن مستقبلها غير مع واحد فيكم بس!!!
على بداية المغرب في بيت الجد,,,,,,,,
كانت ياسمين بعدها بمعتقلها من الامس وماطلعت منه وكل ماجتها امها تتهرب منها وتقول نعسانة وتمشيها وهي قلبها بيحترق بناره..تلفونات نواف ماهي موقفة من الامس حتى بعد ماردت عليه وهي ماهي قاوية تسمع منه أي شي,,,,
اخر اتصال منه جاها قبل عشر دقايق وبعدها وقف...
شوي الا وامها تناديها من ورى الباب...
ياسمين بدون ماتقوم نعم يمه...برتاح شوي تبين شي...
ام مشعل أي يمه فتحي الباب عندك ضيوف...
ياسمين فزت بسرعة من فراشها وفتحت الباب وهي تتكلم بصوت عالي ولهجتها حزينة زين اللي فكرتوا ان عندكم وحدة اسمها ياسمين بين الحياة والموت وجيتوا تشوفوها؟اناماأتترككم لو غبتوا كذا..
رفعت راسها يوم سمعت صوت نواف يقول لها اسم الله عليها من الموت...بتنذبح اذا جابت ها الطاري مرة ثانية؟
ام مشعل ها...هاذي مرتك من امس وهي قافلة عليها وماهي موريتنا وجهها مدري شعندها بها الغرفة وماتبينا نشوفه....انا بروح اجهز الشاي وبسبقكم لاتبطون...
لف نواف لياسمين اللي كانت جامدة بمكانها يوم شافته قدامها بعد ماكان يناظر باام مشعل اللي نزلت تحت,,,
ظلوا ثواني يناظرون في بعض وياسمين نزلت راسها للارض بسرعة...
تقرب منها نواف ودخلها داخل الغرفة وسكر وراه الباب ووقف قلبها ...
حط الورد اللي جايبه معه على مكتبها وتقرب منها وحوط خصرها بيدينه وقربها من حضنه وقال بهمس انتي وش قاعدة تسوين؟
ياسمين ......
نواف هربانة من العالم كله؟
ياسمين بهمس فكني...ابي ابعد عنك...
نواف طيب اذا هذا اللي تبينه طيب....
كان حاضنها من ورى وفكها وتقدم قدام وصار قبالها واخذها بحضنه وراسها على صدره...وقال بهمس بس لعلمك مو هذا اللي انا ابيه وبسوي الشي اللي انا ابيه,,
ياسمين بخوف وش تبي...
نواف جاي نتفاهم طبعا ..وش تتوقعين اني ابي!!!
ياسمين بحدة وهي بعدها بحضنه وتحاول تقوم بس هو كان حاضنها بقوة على وشو ان شاءالله نتفاهم!!
نواف وهو يلعب بشعرها على مو عد العرس اللي لازم يتحدد ولاانا غلطان؟؟؟
ياسمين بدموع لاماابي....
نواف ماتبين نتزوج؟؟
ياسمين ماابيك...انت اصلا سويت كذا علشان ارضخ لموعد الزواج وانت عارف اني ماابيه اللحين؟
نواف بغض النظر عن كل النوايا اعتقد صار لازم نحدد الموعد اللحين؟الا اذا انتي ماعندك مانع ننام مع بعض كل ليلة بدون مانتزوج فهذا شي ثاني!!!
ياسمين بصراخ بعد مابعدت راسها عن حضنه وهو لسه ماسكها من خصرها انا مااسمح لك تحكي عني كذا!!!انا اشرف منك ومن كل اهلك بعد!!!
نواف وش رايك تجين تطقيني!!
ياسمين لاتحكي عني كذا مرة ثانية....
قربها منه وقال بهمس علامك صايرة كئيبة انتي مع ها الدموع وكان الدنيا قامت ومابتقعد...شوفي شحليلك امس كنتي غير شكل؟
ياسمين نواف لو سمحت..
نواف حضنها بقوة اكبر وقال بهمس تصدقين مو قادر انسى أي شي من اللي صار امس وودي اني اعيد الشي بعد!!
وقف قلبها بعد ها الكلمة,,,,,,وابتعدوا عن بعض بس انفتح الباب ودخل احمد..
نواف بعصبية وهو بعده يتنهد انت ماتعرف تدق الباب..
احمد يقول الشيبة انزلوا...
نواف شيبة بوجهك قول جدي مو تقول شيبة؟
احمد بلامبالاة العم مشعل يقول هو شيبة واللي معه عجوز النار,,,
نزلت مشاعل تستقبل فوازاللي قال انه جاي ونزلت معها نوف بعد بس بعدين ركبت نوف تاخذ شي من غرفتها والتقت بتركي عند نص الدرج وركبت وكانها ماتشوفه وهي قلبها يرقع من الخوف...
اللي هي متاْكدة منه انه قاعد يمشي وراها...
دخلت غرفتها ودخل وراها علطول وسكر الباب,,
نوف بحدة خير ان شاءالله!!
تركي بهدوء الخير بوجهك...علامك تتهربين مني!!
نوف بثقة انا مااتهرب؟؟
تركي ملاحظة من رجعتك من الجامعة للحين وانتي مو مخلية عيونك تطيح على عيوني لو بالغلط؟؟
نوف أي ...وها الشي يخليك تدخل غرفتي كذا بها الطريقة ومثل الحرامية؟؟؟
تركي بتنهيدة لانك مو قادرة تشوفين حبي لك؟
نوف بتحدي وتقوم تفرض حبك عليّ بها الطريقة,,,وبظنك برضخ اذا سويت لي كذا!!!
تركي نوف..
نوف بانفعال ملاحظ ان كل ها البيت مضايقهم وجودي!!
تركي عبدالله سخيف ولاتشيلين همه؟
نوف بتنهيدة انتظر مشاعل ومرام وخالتي بعد .
تركي بحنان نوف علامك؟
نوف بلهجة باكية قلت لك بطلع من ها البيت من زمان وجودي مضايقني اكثر من ماهو مضايقهم صدقني!!
تقرب منها تركي ومسك يدها وقالت بحدة اترك يدي واطلع برى,,,ترى بجد مو طايقة حتى نفسي,,,
تركي وكلام نواف في باله(ماقدرت امسك نفسي ودخلت عليها..كانت فرصة وماقدرت اضيعها)تنهد وغمض عيونه,,,,,
نوف بترجي تركي انا اسفة انا مااطردك من بيتك بس اتركني مالازم نكون مع بعض بمكان بروحنا والبا مسكر علينا!!
تركي اذا مشكلتك في الباب بنفتحه؟
نوف لا...ابتعد عني!!!
تركي تقرب اكثر واكثر وصار مايفصلهم شي,,,,
نوف بهمس تركي...انت اعقل من انك..
قاطعها بسرعة وهو شاد على يدها بقوة وقال في لحظات نفقد فيها عقلنا ونستغني عنه لانا مايكون وقته ابدا!!!
نوف بخوف وش تقصد؟
كانت نظراته المتوزعة عليها هي اللي تتكلم بداله,,,,
بالمجلس اللي كانوا فيه مشاعل وفواز,,,
دخلت وكان جالس ينتظرها وبيده بوكيه ورد برتقالي,,,
وقف يوم شافها مقبلة وعطاها الورد ومسك يدها,,,
فواز هلا وغلا بزينة البنات؟
مشاعل وهي تبتسم انت وش قصتك مع الورد كل مرة بشوفك فيها بتجيب لي فيها ورد لايكون بس عندك محل ورد ومو راضي تقول لي!!
فواز وهو ماسك يدها انتي مو تقولين تحبين الورد,,,خلاص بيجيك الورد كل ساعة اذا بغيتي وش تبين بعد؟
مشاعل ماشاءالله...
فواز وعلى فكرة تراه برتقالي علشان تدرين اني اغار عليك؟
مشاعل ببتسامة اصلا الاصفر حق الغيرة مو البرتقالي؟
فواز يوه..وش ها الفشلة اجل نروح نبدله ونرجع,,,
مشاعل هههههه
قربها من يدها ورفعا له وباسها....
مشاعل بارتباك فواز,,,
تقرب منها اكثر وقال احبك....
مشاعل ....
فواز طيب رفعي راسك وسمعيها عدل علشان تفهمين شلون يقولونها..
مشاعل بخجل فواز خلاص..
رفع راسها بيده وتقرب وباسها على خدودها وقال وش اللي خلاص تو مابدينا...ترى قاعد معك للصبح ...
مشاعل كانت بتبعد بس يده مسكتها وقال بهمس وين بتبعدين؟
مشاعل باعتراض فواز ابي ابتعد...
فواز قربها منه وحضنها بقوة وقال مابتبعدين عن حضني لو شيصير ؟
مشاعل لافواز لا..
صارت يده تشيل الفيونكات اللي شايلة فيهم شعرها...
مشاعل باعتراض حرام عليك ساعة وانا اسويه يدي تكسرت تجي تشيله بكل بساطة؟
فواز وهو يهمس لها بعد مافتح شعرها كله انا احب شعرك مفتوح...لاترفعينه مرة ثانية
مشاعل رجال مابتتغيرون ابدا تحبون الشعر بس طايح كذا!!
فواز وهو يضمها مثلكم ماتبدلون ها الثوب والشماغ ابدا!!!يالله تعادلنا صح؟
دخلت المطبخ وكانت امها هناك...حطت لها مويه وشربته ولفت لاامها اللي كانت تناظرها,,,,
ياسمين في شي يايمه؟
ام مشعل بهمس يمه..لاتبدين حياتك مع زوجك بنكد وزعل ومشاكل,,,توددي له وخله يشوف حبك وابتسامتك دايما,,,
ياسمين وهي مقربة تبكي يمه..
ام مشعل شوفي شحليله جاي يراضيك وجايب لك ورد معه....يمه نواف مافي منه لاتخلينه يضيع من يدك ,,,,
تنهدت ياسمين وغمضت عيونها...محد فاهم عليها,,,ولااحد داري عن اللي قاعد يصير لها؟
طلعوا الصالة وجلسوا وبدى نواف الموضوع وقال انا وياسمين حددنا موعد العرس البارحة يابنت عمي؟
ام مشعل خير ان شاءالله؟
نواف الشهر الجاي,,,بدايته,,,..
ام مشعل بصدمة الشهر الجاي؟؟يعني بعد ثلاثة اسابيع؟؟
نواف أي يابنت عمي...
ام مشعل باعتراض أي بس..
قاطعتها ياسمين اللي كانت هادية جدا وسرحانة بمعظم الوقت يمه انا ابيه كذا!!!!
ام مشعل سكتت وصارت تناظر فيهم اثنينهم,,,,
نواف كانه ماعجبك يابنت عمي؟
ام مشعل لابس استغربت يعني....بتفضي علي البيت يانواف اذا اخذتها؟
ياسمين بسرعة مو لازم اروح هناك....اظل هنا؟
نواف بشماتة أي مو لان احنا نلعب؟
ام مشعل ههههه خلاص الزواج يعني بيت ثاني يايمه,,,,يالله الله يوفقكم ويسعدكم,,,,
دخل خالد ها اللحظات وسلم وياسمين لفت للجهة الثانية علشان لاتشوفه وانتبه عليها خالد وانكسر قلبه,,,
ام مشعل زين انك جيت نواف حدد موعد العرس؟
نواف عاد مو تروح تفتن عند مرتك ترى تونا محددينه؟
خالد متى؟
نواف بعد ثلاثة اسابيع؟
خالد مو كاْنه بدري...يعني خذوا راحتكم وش له مستعجلين؟
نواف اسمعي من يتكلم يابت عمي....اللي ملكته وزواجه كانوا بيوم واحد ؟قال وش عليه مستعجلين؟
ام مشعل ههه خلاص تزوج ونسى نفسه...
قامت ياسمين وطلعت للحديقة...حست انها مخنوقة من ها الاثنين اللي قاعدين يضحكون وكل واحد فيهم مسوي لها سالفة شطولها شعرضها...بس بجد ماهي قادرة تحط عيونها بعيون خالد,,,
تنفست بقوة وجلست سرحانة,,,
ياترى وش حالك ياوضحى اللحين؟قلبي معك والله انه معك..انا عارفة ان خالد جاي يبيني اشوفك واتطمن عليك بس صدقيني انا معك مو معه ومهما كان اللي سواه مايشفع له ابدا!!!
تنبهت على صوت مشعل وهو ماد يده لها بالتلفون ونواف اللي كان قاعد قبالها وماانتبهت انه طلع وجلس معها؟
ياسمين منو؟
مشعل وحدة اسمها ريم؟
ياسمين أي بس انا مااعرف وحدة اسمها ريم؟
مشعل وهو يناظر بياسمين ونواف كنها قالت انها ام احمد؟
طلعت عيون نواف وياسمين مع بعض من الاسم اللي انطرى؟؟؟
اعتقد البارت كان طويل ودسم وتعبتواوانتوا تقرونه,,يالله حقكم عليّ مرة ثانية مااطوله ولاتزعلون(طلعي برى)
يالله ابي تعليقاتكم للاحداث الجاية وش بتكون
****
***
**
*
مرااااااااااااحب يالغلا شلونكم عساكم طيبين,,,
شكلكم كلكم متفقين على نفس الجملة (من كثر استمتاعنا بالبارت ماحسينا بطوله)هههه بس مو علي قصرت لكم بارت اليوم علشان تعرفون اني شريرة هههههه
المهم اترككم مع بارت اليوم بعد الشكر الجزيل النابع من اعماقي لكم على دعمكم وتفاعلكم معي,,,
البارت السادس والسابع والخمسين ,,,,
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك