رواية كل يوم لك حال جديد يوم قريب ويوم بعيد -54

رواية كل يوم لك حال جديد يوم قريب ويوم بعيد -54

نوف يالله بس البس عبايتي...

انتظرتها عند الباب لين لبست عبايتها وطلعت معها ومشوا مع بعض لين الدرج..

رغم ان ام تركي جاية تفتح الموضوع معها بس يوم شافت باقي اثار دموع نوف على وجهها وسكوتها فضلت انها تسكت وماتتكلم,,,,

لين نزلوا تحت وكان المكان مثل ماهو ابو تركي ومرام وبس,,,

جلسوا وظلوا يسولفون عن مشاعل ومن هنا وهنا وهي بالها نصه شارد بللي طلع اكيد لانه ماله بالعادة يايكون فوق عندها ولا بالصالة ومدامه ماهو موجود يعني ماهو بالبيت!!

قطع عليهم سكونهم فتحة باب الصالة ودخول عبدالله وعبير منه,,,

وقف ابو تركي يوم شافهم وسلم عبدالله وجلس جنب ابوه اللي بعده واقف يناظر بعبير اللي بعدها بمكانها تناظر بابوه...

ابو تركي بعصبية لاهلا ولاسهلا فيك....

عبير ليش عاد ياعمي!!

ابو تركي بعصبية اكبر شوفي يابنت الناس انا ها البيت طول عمره ماشي وعايش بالسليم وعلى اساس حب وتفاهم واحترام بين الكل ؟؟بتجين انتي وبتحطين وتشيلين وتفرقين ترى مابتقعدين هنا بيتي يتعذرك؟

عبير بانفعال وانا بموت علشان اسكن هنا؟؟اصلا عبدالله بيفتح لي بيت باي مكان ابيه!!

عبدالله بعصبية تكلمي عدل مع ابوي؟

ابو تركي لاخلها تطلع اللي عندها علشان احنا بعد نطلع اللي عندنا؟

عبير لاتقعد تهددني ترى انا وراي رجال...يسواكم كلكم,,

ام تركي استغفر الله عليك...

عبدالله وقف وقال عبير..

ابو تركي لا خلها...خلني اشوف انا ناسبت منو؟حطيت يدي في يد منو؟

عبدالله انتي هيه..احترمي حالك واعرفي انتي منو قاعدة تكلمين؟هذا ابوي ماهو باصغر عيالك؟

عبير اشوف طلعت لك شخصية قدامه؟؟زين والله مالك بالعادة؟

عبدالله بصراخ عبير انتي طالق؟؟

اشوفكم بكرة على خير ان شاءالله

****

***

**

*

البارت الخامس والتسعين,,,

ناظر الكل في عبد الله اللي كان معصب مرة وهو نادرا ماكان يعصب وسكتوا وهي قالت بذهول شنو؟

عبدالله اللي سمعتيه ياعبير انتي طالق...

عبير بانفعال تطلقني!!!

عبدالله بصراخ أي اطلقك...البنت اللي ماتحترم اهلي مالها مكان بقلبي ابدا ياعبير..

عبير بصدمة ووين الحب؟

عبدالله اهلي يابنت الناس ابدى عندي من كل شي بها العالم,,,هذولا تاج راسي واللي يضايقهم ويرفع صوته عليهم ومايحترمهم لايحلم اصلا انه يكون له مكان بقلبي,,,,

عبير بصراخ على نوف كله منك انتي ياحقيرة؟

ابو تركي بصراخ انتي هيه..البيت هذا له احترامه واذا انتي ماتعرفين شي اسمه احترام طلعي برى ولاتوريني وجهك مرة ثانية؟

عبير وش دعوة انت لك كلمة من الاساس؟مو حضرة الاميرة العقربة هاذي خلت تركي يكتب البيت لها باسمها لين تتمكن منكم وتطردكم كلكم منه...

وقفت نوف بصدمة وماقالت شي...

كملت عبير بقهر وحقد انتي اصلا وحدة بنت شوارع ومنتي مربية لفيتي ودرتي على عبدالله علشان ياخذك ويستر عليك ويوم ماقدرتي تلفين عقله رحتي لتركي والله اعلم شلون ورطتيه وخليتيه ياخذك ويضبك؟

ماكملت كلامها لان نوف كانت طاحت على الارض وكلهم صرخوا باسمها.....

في بيت مشاعل..

كانت جالسة ومعها ياسمين ونورة,,,,

نورة معه احد اللحين فواز؟

مشاعل أي موظفين الشركة جايين يتحمدون له بالسلامة..

ياسمين ماعدتي عليه سالفة السفر علشان يتعالج؟

مشاعل بهدوء لا

نورة ليه ..اقنعك..

مشاعل مدري بس حاسة ان فواز فيه شي...في ششي مخبي عني؟

ياسمين مثل شنو؟

مشاعل مدري بس احسه يقدر يتحرك..

نورة ياساتر....واذا كان يقدر يتحرك ليش بذمتك بيكون كذا وضعه..خليك واقعية يامشاعل؟

مشاعل راشد له دور بالسالفة ...انا متاْكدة من ها الشي....

ياسمين وش اللي خلاك تفكرين كذا؟

مشاعل بهمس امس تحرك وغطاني وانا جنبه؟لو ماكان يقدر يتحرك شلون بيسويها؟انا مااتخيل انا متاْكدة من حركته؟وراشد جيته لهنا وراها شي....وانا بموت من كثر ماافكر؟

نورة قلتي له عن سالفة راشد واذا كان ورى الحادث؟

مشاعل وراه...راشد ورى الحادث بس فواز مدري وش وراه يقول مايقدر يسوي شي الا اذا جمع كل دليل عليه..

نورة ومطول وهو يجمع ادلته؟

مشاعل مدري هو مبعدني عن ها السالفة وتعبت من كثر مااسئله؟

ياسمين الله كريم....

نورة بيت جدي بيروحون المدينة...

مشاعل صدق!!وخالتي معهم ياياسمين..

ياسمين أي..

مشاعل بضحكة ومنتي معهم!!

ياسمين بنرفزة بزارين لا ان شاءالله بروح معهم ..

نورة بخبث واذا مارضى نوافك؟

ياسمين بتنهيدة لاهو نوافي ولالي فيه بعد!!!

مشاعل بهمس بذمتك ماحبيتيه؟؟

ياسمين مسحت دمعة وقالت بتنهيدة لو سئلتين ها السؤال قبل فترة قلت لك أي احبه بس اللحين لا...انا مجرد اذكره والهمه الكوابيس بالليل ..مقدر احبه؟

خالد دخلي برجلك اليمين....

وضحى ههه ان شاءالله....

دخلت وسمت بالرحمن..

سكر الباب وراه....

وضحى بهدوء ان شاءالله يجمعنا ها المكان مايفرقنا من جديد؟

شد على يدها وهو ماسكها أي ان شاءالله...كثري منها ياوضحى..وادعي ان احنا نسعد بعض بقد مافينا,,,

وضحى عن نفسي ياخالد نسيت الماضي وطويت صفحته وببدي من هنا حياة جديدة بتكون انت فيها كل شي..انت ابوي وانت اخوي وانت صديقي وحبيبي وكل دنيتي....وبنسى اللي صار لنا....

ضمها خالد لصدره بقوة وقال بحنان وانا ياوضحى بكون دايم جنبك...بكون ابوك وامك وصديقك وكل شي...ماودي اهديك غير السعادة وبس...وابيك تسامحيني على كل تقصير يجيك مني!!

وضحى وهي تحضنه مايجي منك قصور يالغالي....

خالد بنظل واقفين ياام وليد تفضلي..

ناظرته وقالت بصدق أي بس انا قايلة لك بتجيك بنت ماهو جايك وليد؟

ضحك عليها ومشاها معه لداخل..

وضحى ليه تضحك؟انا اتكلم من جدي؟

خالد خلاص ولاتزعلين ياام البنت؟

وضحى وش بنسميها؟

خالد بسميها وضحى طبعا..

وضحى خالد اعقل عني!!انا اتكلم من جدي....

خالد وهو يضحك وانا امزح معك,,,,تعالي قعدي بس يبى لاتتعبين ...

الليل رجع تركي لبيته ونواف لبيته وكل واحد فيهم ناوي يراضي اللي تاركها زعلانة وهو سبب زعلها,,,,,

وخلونا نبتدي بتركي...

دخل البيت وكان هادي جدا ومبين ان الكل نايم...

راح غرفته علطول.....

فتح الباب..

وكانت ظلمة وحس بنرفزة...يابتكون نايمة هنا يابتكون نايمة تحت بغرفتهم,,,,

يوم تقدم داخل مالاقها بالفراش وكان مرتب مثل ماطلع يعني انها ماهي هنا....

ترك بوكيه الورد اللي جايبه على الفراش وراح الحمام لقاه فاضي ..

طلع من الغرفة علشان ينزل غرفتها القديمة والا مرام بوجهه.

مرام تركي

تركي انتي لسه مانمتي؟

مرام كنت انتظرك؟..

تركي وليه بالله منتظرتني..

مرام علشان اقولك ان نوف ماهي هنا؟

تركي بحزم وينها فيه؟

مرام بالمستشفى...

مرت لحظات صمت حاول يستوعب فيها وبعدها قال بخوف وين؟

مرام طاحت علينا وامي ماحبت تتصل فيك قالت اذا جا تركي قولي له اني بظل معها..

تركي باي مستشفى هي فيه؟

مرام بالمواساة....

تركي رجع اخذ مفاتيحه وجواله ومرام وراه تمشي..

مرام ماتبي تعرف ليه هي طاحت علينا؟

وقف مكانه وكانه ينتظر تكمل كلامها وماطولت قالت بسرعة عبير قالت عنها اشياء وجابت بسمعتها قدامنا...

تنرفز بقوة وشال مفاتيحه بسرعة وطلع للمستشفى...

بالمستشفى الجو كان هادي للغاية..

كانت نوف تحسب الوقت بالثواني...

ماكان فيها شي بس عمها وخالتها اصروا انها تبقى الليلة هنا علشان ترتاح.

كانت خالتها جالسة تقراْ بالجريدة عند الباب علشان لاتزعجها وهي كل تفكيرها بتركي وين ممكن يكون راح؟

هاذي اول مرة يطلع ومايقول لها وين بيروح؟اصلا هي اول مرة من تزوجوا يطلع بدونها..

سمعت صوت جوال خالتها ودق قلبها هذا اكيد تركي متصل يساْل عنها....

غمضت عيونها بسرعة على اساس انها نايمة لانها ماتبي تشوفه..

سمعت خالتها تقوله برقم الغرفة وتاْكدت انه هو....

دقايق بس وانفتح الباب ودخلت ريحة عطره قبله...

حست انها تبي تبكي...شكه فيها اليوم بعدها عنه حييل...

سمعت امه تقوله تعبت شوي وجبناها واللحين هي نايمة..

تركي السايق تحت رجعي البيت معه يمه..

ام تركي باصرار لا ياتركي نوف امانتي وبظل معها لين تطيب..

تركي يمه انا معها لاتخافين بدير بالي عليها..

شالت شنطتها وقالت لاتحاول ياتركي بروح غرفة الانتظار شوي بس بكون هنا ماراح اطلع الا معها من ها المستشفى؟ولاتزعجها تراها نايمة ياتركي؟

طلعت وظل واقف مكانه ثواني وكانه متردد يتقرب منها ....

ويوم تقرب منها تنهد وباسها على جبينها وجلس جنبها ومسك يدها حست انه مضايقها وتبيه يبعد عنها ماقدرت تمسك نفسها اكثر وتكمل تمثيل انها نايمة...

لفت عنه للجهة الثانية وقال بهمس وخوف نوف..سلامتك حبيبتي..

نوف بحدة ممكن تتركني بروحي!!

فهمها انها ماتبي تشوفه وتبي تبعده عنها..

قال وهو يترجاها تلف له نوف...تعالي ياقلبي ابي اتطمن عليك..

ماقاومت دموعها اكثر وقامت تبكي وقالت بحساسية انا بخير..كثر الله خيرك..

تركي بضيق نوفي..

نوف لاتقول شي ياتركي الله يخليك...شكك فيني اليوم كفى ووفى..

تركي بدفاع نوف اتركينا من ها السالفة اللحين وبعدين بنتكلم فيها سلامتك عندي بالدنيا اللحين..

نوف ممكن تتركني ارتاح شوي بروحي ياتركي...

ظلت واقفة عند باب الغرفة حق احمد تناظر باشكالهم التحفة وهم نايمين...

ماتدري ليش توقعت احمد مايتقبل احد من العائلة لانه حتى وضحى ولؤلؤة ماتقبلهم بس يا سبحان الله قدروا سعد ومشعل ياْثروا عليه....

الباقي ابوه....لازم يكون بينهم خيط تفاهم واستجابة ولابيضيع احمد..مالها غير تخلي مشعل يكون واسطة ويحبب احمد في ابوه ويقربه منه ودور نواف لازم تكلم نوف علشان تكلم تركي يكلمه...

تنهدت وهي تبتسم...واسطات كثيرة علشان تقوله انتبه على ولدك وقربه منك بس لانها ماتقدر تنطقها,,,

تنهدت وجت بتمشي بعد ماطفت انوار غرفة احمد ويوم لفت لقته واقف يناظرها ومتسند على الجدار..

ناظرته شوي ومشت بسرعة ..

مشى وراها....

دخلوا الغرفة وسكر وراها الباب.....

لفت له وصاروا قبال بعض...

ياسمين بسرعة ترى احمد عنده ضيوف نايمين معه ..

نواف وهو يناظرها أي...

ياسمين بارتباك قلت اقولك لاتتفاجاء من وجودهم الصباح.....مارضى احمد يرجع معي الا وهم معه...

نواف وهو بعده يناظرها و انا قلت شي اللحين؟

ياسمين لا اقولك بس علشان لاتستغرب وجودهم...

قالتها وراحت قعدت عند المرايا...

جلس هو على حافة السرير..

ياسمين بدون مقدمات امي بتروح المدينة مع جدي وجدتي..

نواف أي..

ياسمين بروح معهم؟

نواف هذا قرار ولاامر ولاشنو بالضبط؟

ياسمين هزت كتوفها سميه اللي تسميه؟

نواف اذا تبين احجز لنا الاسبوع الجاي ونروح يومين..

ياسمين باعتراض لا ماابي اروح معك ابي اروح مع امي...

نواف وش الفرق بالله...يتراواللي المكان واحد..

ياسمين انا ماابي منك شي...بس الموافقة..

نواف واذا ماوافقت..

ياسمين بعناد بحجز لنفسي وبروح.

نواف بحدة سويها وشوفي وش يجيك.

تاْففت بقهر وماردت عليه....

وهو تنرفز وهو يطالع بالورد اللي جايبه..جاي يصالحها وماهو عارف وفتحت ها السيرة وماهو قادر يقول كلممتين على بعض....

نواف تعالي هنا...

ياسمين اذا جيت بتوافق!!

نواف لاطبعا..

ياسمين بعناد معناته مو جاية؟

نواف بحزم سمعي الكلام وتعالي...

ياسمين ماابيك .....افهمها...

ثارت شياطينه من ها الكلمة ووقف والشرر يتطاير من عيونه ويوم وصل لقبالها كان دمها ناشف اصلا...

نواف بحدة عيدي الكلمة اللي قلتيها؟

ظلت ساكتة وماقالت شي ومسك يدها ورفعها بقوة ووقفت على رجلها وصارت قباله..

نواف ليش ان شاءالله..

ياسمين بدفاع انا تعبانة؟

نواف وش االي متعبك ان شاءالله؟التنظيف ولا الغسيل ولا العيال اللي تصرخ وراك؟

ياسمين بهمس انت...

سمعها وظل يناظرها شوي وبعدين فك يدها وقال لها بسخرية على فكرة حتى انا ماابيك؟

وهو يمشي لسريره وهو يناظر بالورد اللي جايبه ويلوم نفسه أي صلح ذا يانواف أي صلح....انت تلعب على نفسك انت ماتعرف الا تخرب بينكم الجو ولا الصلح بعيد عنك...بعيد حييل...

عند مشاعل كان الجو شبه خانق وهي اللي جابته لنفسها...

طاري ان فواز يتحرك ويمشي طاغي عليها ومسيطر على افكارها..

لبست ثوب نوم قصير وشفاف..ولااول مرة من تزوجت ....

تركت شعرها طايح وراحت جنب فواز...

عارفة انها قاعدة تلعب بالنار وان اللي تسويه بيحرقها قبل يحرقه بس قررت تجرب...

يوم دخلت كان مغمض عيونه نايم سوت روحها تبوسه وحطت راسها على كتفه وغمضت عيونها..

هي عارفة انه جالس لانها قبل تدخل انتبهت له وبس شافها جاية بها الثوب غمض عيونه...

ظلت تنتظر وتنتظر وتنتظر لين مضت اكثر من ساعة الاربع على جيتها...

اللي كانت حاطة راسها على صدره كان محترق صحيح بناره اول مرة يشوفها بلبس كذا...

وقاعدة بحضنه بعد..وها الشي اللي تعبه اكثر واكثر...

وش اللي تبين تسوينه فيني بس يابنت الحربي؟خليني بحالي تكفين...

قرر انه يقوم ويتركها نايمة هنا ويطلع هو للصالة

بس ماقدر...حس انه في شي يجذبه لها اكثر واكثر ويقربه منها,,,

صارت يده تمشي على جسمه وهو يتنهد بقوة ومو قادر يمسك نفسه بس لو غلط ها الغلطة راح ينكشف قدامها ومو وقته يسوي ها الشي مدامه بداه...

قربها من حضنه وحضنها بقوة وهمس لها احبك موت..لاتتركيني انا ابيك..

ماكانت نايمة وكانت تسمع حتى تنفسه وكل ماتنهد طلعت هي روحها بس يوم حضنها ووقف احتارت اكثر....

ياليته سوى شي علشان يريحني....انا مااخذت منه شي وخلاني محتارة اكثر واكثر من قبل,,,

صباح اليوم الثاني....

على كورنيش الخبر....

فارس وهو يمشي جنب نورة..

فارس مابغيتي تتكرمين وتشربين معي فنجان قهوة؟

نورة ويكون بعلمك ترى اكثر من ساعة مقدر اعطيك....

فارس سكت وناظرها وتقرب وهمس لها اول مرة اشوف وحدة تشرط على زوجها كم يقعد معها؟

نورة باحراج انت تدري ان عندي محاضرات اليوم وعلى مااروح وارجع الجامعة ضاع الوقت..وانت قلت لي فطور وقلت لك لا فنجان قهوة وعلى الماشي بعد ووافقت!!

فارس وفارس...وينه من برنامجك اليومي؟

نورة بدلال مايكفي انه ماخذ تفكيرها طول اليوم؟

فارس يالله وريني؟

ضحكت وقالت وش اوريك...

فارس ابي اللي تفكرين فيه طول اليوم يطلع واشوف صدق ولاتكذبين؟

نورة امممم.....

مشاعل برواق غريبة جاي تفطرمعي!!

سكت عبدالله وماقال شي...

جلست جنبه....

وظلوا ساكتين....

مشاعل عبدالله فيك شي...

عبدالله تنهد ماكلمتي امي من امس؟

مشاعل بخوف صاير شي بالبيت؟

عبدالله بهدوء لا..

مشاعل وليش تسال اذا كنت كلمت امي ولالا...

عبدالله انا طلقت عبير امس يامشاعل؟

طاح فنجان القهوة منها وتكسر,,

مشاعل بصدمة انت شتقول؟

تنهد وماعلق بشي....

مشاعل ووين الحب ياعبدالله؟مو هاذي اللي تحبها وماتقدر تاخذ غيرها ورفضت كلامنا كلنا علشان تاخذها وقلت انا اشوف فيها شي انتوا ماتشوفونه؟

تنهد بالم وقال الا اهلي يامشاعل.....ماابي الحب اللي بيذل اهلي....

مشاعل وش اللي صار؟

اشوفكم على خير,بكرة ان شاءالله,,,,

****

***

**

*

البارت السادس والتسعين ,,,,

مشاعل بتنهيدة أي بس ..

عبدالله بتنهيدة اكبر احبها ويمكن مااكون مقتنع بطلاقي لها وانفصالنا عن بعض بس صدقيني يامشاعل هذا اللي لازم يصير...

انا اهلي عندي بالدنيا كلها ولاراح اسمح لااي انسان يهينهم ولايرفع صوته بوجههم وانا واقف اسمع واناظر...

مشاعل زين اللي شفت بعيونك...صدقت اللحين لمى كنا نقول لك انها ماتناسبك.

عبدالله بضيق ماحسيت انها قربي تبيني وتبي سعادتي!!نادرا اصلا ماكانت تدور على سعادتي..كل همها انتي ونوف وتركي ....

مشاعل هي ماهي عاشقتك ياعبدالله مثل منت متصور...ها الاشكال يخبون العشق وراهم لغرض في نفسهم...

اصلا انا من قالت لي نوف عنها بليللة ملكتي انها ماتنفع لك وانها غير عنا صدقتها لاني عارفة نوف مو من النوع الشرير ولا اللي يبي يخرب بالعكس هي فاهمة الناس عدل...

تنهد عبدالله بعمق نوف بالمستشفى يامشاعل وعبير السبب قالت لها كلام لايحتمل مدري شلون قدرت تقوله؟انا مو فاهم هي ليه تكرهها بها القدر وهم ماعرفوا بعض الا اللحين ومابينهم أي شي قبل,,,

انا منحرج من نوف حييل مو قادر احط عيني بعينها اللحين شبتقول ياترى عني شبتقول؟

احترم انها ماتبي تتكلم معه طول الليل وظل بعيد عنها ..

قاعد وعيونه عليها,,,,

مو شي سهل انه يشك فيها وهذا الشي هو حاس فيه وحاس انه ظلمها فشلون بعد تجي ذيك الادمية وتكمل وتقول عنها حكي مو زين..

ماهو قادر يرتب لها كلمات اعتذار تناسب وضعهم ولاهو قادر يحط عيونه بعيونها علشان يشوفها..

حاس انه غلط عليها وتمنى لو انه خفف شوي من عصبيته وانفعاله بذيك اللحظات..

لانه لو كان جاري عليها شي ماكان بيسامح نفسه ابدا...

اصلا هي لو مجرد طلعت من البيت كانت السالفة اكبر بس هي لان مالها حظ ماعندها مكان تروح له فااضطرت تقعد له بالبيت....بس حتى بالبيت ماتهنت جتها عبير وكملت عليها...

تنهد وهو يذكر الكلام اللي نقلته له مرام ويتخيل نفسية نواف باي مرحلة واصلة.....

وهو تفكيره كله بعبير وشلون ياْدبها ويوقفها عند حدها علشان يرد كرامة نوف؟؟؟

رجعه للواقع صوت امه تكلمه وتساله عن طلعتهم من المستشفى,,,,

جلست الصباح وهي عيونها بالورد اللي كان على الطاولة وتناظر فيه وترجع تناظر بنواف اللي نايم ,,,

لمنو كنت جايب الورد امس يانواف ياترى؟؟؟لي!!! ضحكت على نفسها وهي تقول وها الشي طبعا من سابع المستحيلات,,,,,,

لمنو اجل؟

وهل يمكن انك تفتح معي صفحة جديدة,,,لا مستحيل انت البارح قالب لي حرب جديدة فيعني مالك نية اصلا تفتح صفحة جديدة,,

اساسا وش اللي بيني وبينك علشان تكون حياتنا كذا!!!!

ليش تكرهني ها الكثر وانا ماضريتك؟

انا كرهتك أي..كرهتك لانك نكبت فيني وماجيت بيوم كان المفروض يكون يومي ويومك ونرتبط فيه مع بعض وتكون اسمائنا جنب بعض؟

كرهتك لها الشي مو لغيره بس تراني احبك موووت والله العالم,,,

بس انت وكرهك لي سالفة ثانية...ليش تكرهني الله اعلم!!!

ليش حياتنا كذا مقلوبة جحيم ماعندي أي تفسير,,,

انت ولاانا السبب؟

وهل ممكن تتصلح ونعيش طبيعي مثل باقي الخلق!!!

وهل ريم بيكون لها دور بالايام الجاية ولا هي قاعدة تقحم نفسها بحياتك وانت فعلا ماتبيها؟؟؟

ليش وضعنا كذا مو قادرة افهم..وضحى وخالد قدروا يتجاوزوا اللي صار لهم وهم مصيبتهم اكبر منا واحنا اللي ماعندنا شي مثلهم محنا قادرين نعيش يوم بدون هواش ومشاكل؟؟

وينك ياشهر العسل وينك,,,,وينك يالهدنة اللي كنتي وينك....اه وش حلاة ذيك الايام بس ياليت لو يوم منها بس ينعاد!!

فواز بهمس مشاعل...

مشاعل وهي فيها النوم هلا..

فواز كملي نومك ها انا بيمرني حسام وبروح المستشفى,,,,

فزت بسرعة وهي لسه النوم فيها بجي معك ...

فواز بحزم لا..

مشاعل ليه...

فواز لاني بكون مع حسام طول الوقت انتي كيف بتجين؟

مشاعل باصرار وهي تفرك عيونها لابجي معك مو تاركتك بحالك...

فواز نامي ياباب وانا بجيب لك حلاوة وشوكلاته وانا راجع طيب..

مشاعل فواز انا مو بيبي تسكتني كذا بجي معك؟

فواز ليه بتجين؟

مشاعل ابي اتطمن عليك؟

فواز انا بدخل قسم رجال هذا اولا..يعني كيف كل شوي تصفين سرى مع الرجال ماتقولين لي!!!

وبعدين مني بمطول حسام بيمرني ومو حلوة تجين معنا في نفس السيارة؟ولاابيك تركبين مع السايق بروحك؟

مشاعل مو مشكلة ادق لعبدالله يجي يوصلنا المستشفى انا وانت!!

فواز باصرار وحزم خلاص انتي نامي وانا مو مطول....

سكتت وبان عليها الضيق وتبسم لها علشان يراضيها

فواز حبيبي..

رفعت راسها وهي متضايقة..

فواز مافي بوسة من الصبح؟

عطته ظهرها وقالت بشهقة انت ماتبيني!!

فواز حط يده على كتفها وقال انا ماابيك؟افا من يقول كذا عاد!!!

مشاعل انت توك تقولها يافواز...

فواز حبيبي..انا ماابيك انا ماابي الدنيا اللي انت مو فيها..تقرب عاد وخلني اخذك بحضني شوي يالله لاتصير ثقيل كذا من الصبح؟

تقربت منه وقالت بهمس تدري وش مشكلتي؟

فواز وهو يحضنها شنو؟

مشاعل اني مقدر على زعلك ولااقدر ارد لك أي طلب تبيه....بس تراني بظل زعلانة لاني مابجي معك الموعد وانت وضميرك عاد!!!

ظلوا طول الطريق ساكتين,,

حتى ام تركي احترمت صمتهم وماقالت أي شي ,,

وصلوا البيت وكان ابو تركي بالصالة جلست نوف معه شوي وسولفت معه وبعدها صعدت دارها علشان تتحمم...

لفت انتباهها بوكيه الورد اللي كان على السرير والظاهر انه من البارح...

يعني كان معزم يراضيها بجيته...

كانت عارفة ها الشي بس شوفة الورد اكدت لها اكثر..

طلعت لها ثياب ودخلت تتحمم...

وركب تركي ها اللحظات وقفل الغرفة...

ظل ينتظرها تطلع من الحمام .....

لين طلعت...

قام من السرير وراح لها..

هي طلعت من الحمام وشافته وظلت تناظر فيه وماقالت أي شي بس مشت عنه..

ناداها بهمس نوف...

وقفت مكانها وهي عاطيته ظهرها وتقرب منها وصار وراها مباشرة ومايفصلهم أي شي...

مسكها من خصرها وقال بهمس وهو يقربها منه الحمدلله على سلامتك يالغالية..

نوف ببرود ممكن تفكني؟؟

تنهد وضمها له بقوة اكبر وتنرفزت هي بس ظلت ساكتة..

تركي احبك...

نوف .........

تركي ادري انك عارفة ها الشي بس قلت اذكرك فيه..

نوف بحدة تركي ممكن تتركني بحالي شوي!!

تركي بهدوء طبعا لا..

نوف ليه؟

تركي لانك زوجتي وحبيبتي...

نوف بضيق تركي انا فعلا مالي خلق أي شي فاذا سمحت اتركني اتنفس بهدوء وبعدها قول كل اللي عندك..

تنهد وقال وهو يلفها له بس اذا بردت السالفة بيصعب الاعتذار...

نوف بتحدي بكل الحالات اعتذارك مرفوض ياتركي؟

لاتفكر اني برضى عنك وانت عندك فيني ذرة شك ...

سعد اقول ياسمين..

ياسمين وهي جالسة معهم قول...

سعد اللحين فطور وفطور وقوموا فطروا واخر شي صفيتي لنا اللي بالثلاجة كله وماكلفتي على حالك تسوين شي يشبعنا؟

ياسمين هههههه قول الحمدلله..

مشعل شنو يعني تبي ...لاتنسى وراك غذى؟

سعد اخاف حتى الغذى بعد تقولين فتحوا الثلاجة وطلعوا اللي تبونه...

ياسمين شدعوة سعيدان شايفنا بخيلين ولا شلون...يبى امر من أي مطعم تبي غذاك واحنا حاضرين؟

مشعل احمد قول الصدق اختي تطبخ لكم ولا ماعندكم الا المطاعم....

سكت احمد وماعلق على شي......

بس نواف اللي توه داخل تكلم لاوالله ماتطبخ ولاتطبخ الله يخلي لنا المطاعم بس!!!

قالها وجلس جنبها مباشرة ومايفصل بينهم شي وهي تضايقت..

مشعل مسوي فاهم افهم من كلامك انك قاعد تشتكي منها..

نواف تسند وقال برواق منو قال عاد انا راضي...

سعد لالالا اذا مو راضي قول نسنعها لك..

نواف وش بتسوي في مرتي ان شاءالله؟

مشعل الخطة ب...

نواف باستفهام شنو هاذي؟

احمد لا تعلم لاتعلم..

نواف ماشاءالله حتى انت تعرفها بعد!!

ضحكت ياسمين ولف لها نواف يناظرها بس بدون مايقول شي..

سعد المهم بدل ها الضحك دبري لنا غذى يشبعنا عدل ولا بفضحكم وبقول بخيلين وماعطونا شي وخلونا بجوعنا..وانتي تعرفين بعد..

ياسمين ان شاءالله..

احمد نبي فرايديز ياسمين..

ياسمين اتفقوا مابينكم وش تبون علشان كلكم من مكان واحد...

ناظرهم احمد بترجي..

مشعل نفكر اللحين بهدوء ونسال معدتنا وش تبي تاْكل ونشوف..

بها اللحظات مال نواف على اذنها وهمس قومي بدلي ثيابك؟

ناظرت بنفسها..كانت لابسة برمودا ابيض وبلوزة حمرة بس كانوا ضياق شوي...

ياسمين لبسي مافيه شي..

نواف ابدا بس انه لازق على جسمك...

ياسمين متعودة اقعد مع اخوي كذا وين المشكلة؟

نواف المشكلة في اني ماابيك تتعودين تلبسين كذا قدام أي احد؟؟

تحلطمت بكم كلمة مافهمهم بس قال بسرعة توك معهم تضحكين ومحد قدك من كلمتك انا قلبت الضحكة والابتسامة الى نكد!!!

ياسمين بانزعاج قول لنفسك ماتخلي الجو صافي ابدا لازم تغيمه بغيومك؟

نواف بهمس اذا غرت عليك اكون خربت الجو يعني!!

ناظرته وقالت وهي تقوم من جنبه مايناسبك اصلا تغار فلا تلبس ها الدور مرة ثانية!!!!!

ام عبير بصراخ على بالكم السالفة انتهت خلاص..

ام تركي لاحوول الا بالله العلي العظيم يابنت الناس اذكري الله....ودخلي خل نتكلم داخل بهدوء..

ام عبير مو داخلة..وبرفع صوتي كله خل العالم يسمعون ظلمكم يابيت الحربي..

ام تركي اذكري الله يابنت الناس...

👇👇👇

تعديل المقال