رواية خليجيات في الامارات -15

رواية خليجيات في الامارات -15

الحلقه الخامسه عشر

ملاك وهي تغير الكماده .. بدت تقرا على مايد ..

ملاك : مايد .. مــــايد

مايد : لا رد ...............

ملاك : ميود رد علي دخيلك

مايد بدا يون وبس .. ومن كثر ما الحراره مرتفعه ما تكلم رد غمض عيونه ..

ملاك ردت غيرت الكماده .. الين حست ان الحراره بدت تنزل وترجع طبيعيه ..

تجدمت ملاك عن الكبت وطلعت لها فراش .. وفرشته ع الأرض ورقدت عشان لو حرارة مايد ترتفع ترد تغير له الكماده ..

,

الساعه عشره الصبح .. مايد فتح عيونه على ضوء الشمس وشاف روحه بحجره ملاك .. بدا يتسوعب اش صار بليل .. مسك راسه حس راسه يعوره .. رجع حط راسه ع المخده وغمض عينه ..

رد فتح عيونه وهو يسمع صوت موبايل يرن بالحجره .. يلس .. شاف ملاك راقده ع الأرض ..

قام من ع السرير .. روح صوب ملاك ..

مايد : ملاك .. ملاك

ملاك : لا رد

مايد : ملاك قومي

ملاك لفت ويهها الجهه الثانيه

مايد : ملاكك تراج تأخرتي ع الكليه

ملاك : ما بروح

مايد : انزين نشي ارقدي فوق انا قمت

ملاك : مابا خل يغيرون الفراش مافيني أمرض

مايد مشى وقال : برايج ..

شكلها المكسينه كانت سهرانه طول الليل .. الله يهديها جان توعيني واروح المستشفى أحسن لي .. بس صدقها وين كان فيني حيل .. أنا روحي ما اتذكر شو صار لي ..!

................ : مــــايد

مايد لف شاف أمي فاطمه : صباح الخير أمي

أمي فاطمه : صباح النور

مايد : هلا أمي اش فيج متروعه

أمي فاطمه : وانا يايه اوعيك الصبح ما شفتك في حجرتك .. رحت حجرة ملاك شفت الماي والكلينكس .. تروعت قلت ليكون مستوي بك شي

مايد ابتسم : لا أمي ما فيني الا كل خير

أمي فاطمه ابتسمت : أكيد ياامي

مايد : هي أمي خلاص صرت أحسن .. بس ملاك حليلها تعنت معاي بليل

أمي فاطمه : جان توعيني

مايد : وانا اش دراني عنها .. ما كنت أعرف عن روحي

أم فاطمه : عيل ملاك شكلها ما بتداوم اليوم

مايد : وين فيها شده

أمي فاطمه : يلا عيل روح تسبح بماي بارد عسب الحراره تطلع من جسمك .. وتعال تريق معاي

مايد : انشالله أمي

أمي فاطمه : يلا أترياك

/

.

/

بدور : وينها ملاك ..؟

أريج : ما أدري ما ترد عليه

روان : ولا علي ..!

شوق : غريبه اش فيها عاد

نور : والله ما أدري ما كلمتها بعدني

روان : ليكون صاير ببيتهم شي

نور : لالا مستحيل تشوفون عندها ظروف من كذا ما جت

اريج : يلا انشالله تكون بخير .. وتتصل عقب شوي نتطمن عليها

نور : انشالله

شوق : والله الكليه ما تسوى بدونها شي

اريج : اي والله

بدور : يلا انشالله ما فيها الا كل خير

شوق : انشالله

نور : طيب اتصلو على تلفون البيت

اريج : اي أنا أعرف رقم بيتهم

نور : اجل اتصلي

اريج : أوكي ..

البنات تيمعو حوالين اريج .. واريج اتصلت على بيت ملاك ..

مايد رد عليها : السلام عليكم ..

اريج : وعليكم السلام

مايد : هلا أختي .. بغيتي شي ...؟؟

اريج : ملاك موجوده

مايد : راقده ..

اريج : خير فيها شي مب مداومه

مايد : لا ما فيها شي .. اتصلي بها عقب

اريج : اوكي شكرا ..

مايد : العفو ..

بعد ما صكرت التلفون ..

نور : طمنينا ..؟؟

اريج : الظاهر اخوها اللي رد ويقول انها نايمه

شوق : خير ..؟؟

اريج : يقول ما فيها شي

نور : يلا الحمدلله

بدور : بعدني مب متطمنه

اريج : بتتصل بروحها لما تقوم

نور : الله يستر ...

/

.

/

يوم الاثنين الصبح ..

البنات ملتمين حوالين ملاك ..

دخلت بدور .. وقالت : يا مرحبــــــــــــــــا يا مرحبا

ملاك ابتسمت : هلا بدور

بدور : اسفرت وانورت واستهلت وأمطرت

ملاك تضحك : غبت يوم وجذي ههههههه

شوق : اي والله لو أكثر جان صدق تجننا

ملاك تبتسم : زين زين عرفت بغلاتي عندكم ..

نور : فديتك انتي غاليه من غير ما تتغلين هههههه

ملاك : فديتكم أنا

اريج : طمنينا على مايد

ملاك : اشوفج مهتمه فيه هههه

اريج : يالدبه يلا قولي شخباره

ملاك : تمام بس البارحه بليل كان مسخن وايد

نور : عنده أخته ممرضه ههههه

ملاك : اي ههههههه

بدور : يلا زين عرف قدرج

ملاك : ههههه اي عرف قدري بس هاليوم رقدت ع الأرض .. ظهري تكسر

روان : يالمسكيييييييييييينه هههههه

ملاك : تريي بييلج يوم

شوق : اي صح نسيت أخبركم ..

البنات : خير

شوق : تخيلو من بيزورنا ع الخميس

نور : أدري ههههه

شوق : ادري انج تتدرين بس الباجي ههههه

روان : منو ..؟؟

شوق : عيال عمي سعود من الكويت

بدور : احلفي بس

شوق : والله

بدور : ياحظكم

شوق تبتسم : لأنهم باجازه نص السنه ..

اريج : اهني المدارس بعدهم أمس بدو امتحانات نص السنه وع الأسبوع الياي بيخلصون

شوق : المهم انهم اييون ههههه

نور : الله يعيني

ملاك : اي انتي جذي محبوسه عاد الله يستر جان يو عيال عمهم نور ما بتظهر من الحجره هههههه

نور تضحك : اي والله ههههههه

ملاك : وأنا بعد عندي خبر حلو ..!!

البنات : خير ...؟؟

ملاك : تخيلو شو ..؟؟

نور : ليكون انتي الثانيه عيال عمك بيجون ..؟؟

ملاك تضحك : نحن وين وعيال عمي وين الله يخليج .. ههههه

روان : عآد ..!

ملاك : راشد ولد أمي فاطمه بيي يوم الأربعا بليل

بدور : له له

ملاك : اي والله

اريج : خلص دراسه ..؟؟

ملاك : هي ومعاه الشهاده

بدور : خلاص يفتح مستشفى ونشتغل عنده ممرضات ههههه

ملاك : يبيله تصدقين هههههه

نور : أكيد أمه فرحانه

ملاك : فوق ما تتصورين وبعدين متغرب كل هالسنين لازم تفرح أمه بشوفته

بدور : ع قولتهم قرت عينها بشوفته

شوق : فديت الصواريخ اللي تطلقها بدور ههههههه

اريج : ونحن عمي بيي بس يقعد يوم

نور : ماشالله تطورات اليوم وأخبار جديده

,,,

مرت الأيام .. الين يا يوم الأربعاء .. يوم وصول راشد للبلاد .. تغرب كل هالسنين في الخارج بس رجع وهو رافع راية بلاده وطبيب .. أمه أكثر وحده بتفرح بوصوله .. ولدها الوحيد

مايد شاف راشد في المطار وأشر له ..

راشد ابتسم لـ مايد وتقدم عنه وتخاشمو .. وحضن راشد صديق الطفوله ..

مايد : نورت البلاد

راشد : منوره بأهلها

مايد : اش حالك ..؟؟ طمني عنك انشالله كنت مرتاح

راشد يبتسم : أنا بخير .. بس خلاص من اليوم بكون مرتاح انشالله دامني رجعت للدار

مايد ابتسم : دوم يارب ..

راشد : انت اش حالك ..؟؟ واش حالك الوالده وملاك وموزه ..؟؟؟

مايد : بخير كلنا بخير ياخوي

راشد : البلاد تغيرت وايد

مايد : عشر سنين ياخوي مو شويه

راشد ابتسم : هي والله مب شويه ..

مايد : يلا نروح نخلص اجراءات ونرد البيت عسب تشوف الأهل وتريح

راشد : هي لأني من أسبوع مب راقد عدل

مايد : الله يعينك ياريال ..

/

.

/

شوق : نواري أمانه قولي هذا حلو ولا هذا ..؟؟

نور : ولا واحد

شوق : يلا قولي ...؟؟

نور : قلت لك ولا واحد والله

شوق تبتسم : انزين شو البس ..؟؟

نور : التنوره البنيه مع القميص البرتقالي

شوق : حلو ..؟؟

نور : اي والله أحلى من هذيل

شوق : بشوفه عاد

نور : لييييه هم متى بيجون ..؟؟

شوق : باجر الساعه اثنعش الظهر بيوصلون مطار دبي

نور : بيجون بدري

شوق : اي ما بييون بليل

نور : بنكون في الكليه

شوق : لا باجر محد مداوم

نور : لييييه من قال ..؟؟

شوق : يالذكيه ناسيه ان باجر ماكو جدول ولاشي

نور : اي زين ذكرتيني

شوق : تهقين راشد وصل ..؟؟

نور : أكيييد صارت الساعه تسعه بليل

شوق : ملاكوه اش بتسوي ..؟؟؟

نور : ولاشي .. هم مثل الأخوان ربو مع بعض

شوق : هبله وطول عمرج بتظلين هبله

نور : وليييه يعني ..؟؟

شوق : مو كل اللي ربو مع بعض تفكيرهم جذي .. فكري شوي نواري فكري .. وافهمي قصدي

نور : يقولون اللبيب بالاشارة يفهم .. بس أنا شكلي فهمتها

شوق : أشك الصراحه هههههه

نور : اخلصي يلا اختاري لك لبس حلو

شوق : خلاص التنوره الجنز والقميص التركواز مع الككاوي

نور : حلو .. بس البسي شيلة سوده

شوق : أوكي .. اصلا ما عندي شيلة تركواز مع ككاوي

نور : طيب مو لازم تخلطين يالهبله ترا لون واحد عادي مو لازم الوان الدنيا بالشيله

شوق تبتسم : أوكي أوكي خلاااص أكلتيني ..

/

.

/

مايد يبتسم : روووح ريح شوي بو سنيده

راشد يبتسم له ويقول : بقعد مع الوالده شوي

أمي فاطمه تشوفه وتقول : فديتك ولدي .. الله يحفظك

مايد يبتسم : تراني أغااار

راشد : ياريال اسكت لاذبحك انا صار لي سنين محد يدلعني خلني اليوم اتدلع ع كيفي

مايد : ههههه اليوم وبس

راشد يبتسم : أمي صح موزي متى بتيي ..؟؟

أمي فاطمه : اليمعه انشالله

راشد : انشالله

أمي فاطمه : عاد عيالها كبرو

راشد يبتسم : بنشوفهم انشالله

مايد : يشبهونك ههههه

راشد : أكيييد حلوين .. صح ملاك وينها ..؟؟

أمي فاطمه : ملاك صارت حرمه خلااااص

راشد يبتسم : كبرت ههههههه

مايد : هي هي خلاااص الحين ماشي توديها الدكان وياك ههههه هذاك أول

راشد : عادي بنوديها الجمعيه هههه

مايد : عسب أدفنك جدام البيت ههههه

أمي فاطمه : بلاكم يا عيال

راشد : استحملي امي صار عندج ولدين لازم يتفاتنون أربع وعشرين ساعه

مايد : ههههه دافعي عني أمي أوكي

أمي فاطمه : الله يهديكم بس

راشد : يلا عاد أنا بروح بريح شوي

مايد : نوم العوافي

راشد : الله يعافيك

أمي فاطمه : راواك حجرتك مايد

راشد يبتسم : أمي ترا نحن ربينا في هالبيت وين بننساه ههههه

مايد : روح ارقد يلا بسولف مع أمي شوي

راشد : تصبحون على خير

مايد وأمي فاطمه : وانت من أهله ..

/

.

/

.

/

مر يوم الخميس بسرعه ... الكل يتريا يوم الجمعه يوم اليمعه .. اللي أهله بيزورونه واللي ناطر ناس ما شافهم مده .. واللي واللي واللي .. وكلن له حكايه .. وبحر من المفاجئات تنتظره ..

/

.

/

.

/

يوم الجمعه الساعه عشره الصبح ..

أم عبدالعزيز : شوق .. يمـــا شوق

شوق يايه ركض من المطبخ : هلا يما

أم عبدالعزيز : اش صار ع الأكل ..؟؟

شوق : العيش بروحج سويه بس السوالف الثانيه أنا ونور قاعدين نسويها

أم عبدالعزيز : انزين انتي روحي ساعدي نور وبييكم بعد شوي

شوق : انزين يما

نور وهي تقطع السلطه : خير اش تبي خالتي ..؟

شوق : ماكو بس تسأل عن الأكل

نور : شوق تعالي ساعديني شوي

شوق : يما منج .. الحين مو انتي اللي قايله ما أحب أحد يساعدني

نور : اي بالدراسه مو بالمطبخ

شوق : كله واحد

نور : لأ مو واحد

شوق تبتسم : لا واحد يلا روحي مناك

نور تضحك : يالعياره تتحججين

شوق : اي اتحجج ههههه

نور : الله يراويج هههههه

شوق تطلع لسانها : اقول انجبي وكملي شغلج

الهنوف تدخل المطبخ .. شوق : الهنوف وين أمي ..؟

الهنوف : وأنا اش دراني روحي شوفيها بروحج

شوق : أعوذ بالله بس سألنا

الهنوف تروح تشرب ماي : وجاوبتج

شوق تطالع نور وتأشر لها بمعنى مينونه .. نور تبتسم لها وتقول اسكتي ..

أم عبدالعزيز تدخل المطبخ : ها اش سويتو بنات ..؟؟

شوق تبتسم : الله يابج

أم عبدالعزيز : خير ..؟

شوق : الحين ارش عليه الكزبره ولا ..؟

أم عبدالعزيز : لا لا انطري قبل لا نقدمه أحسن عشان شكله يطلع مرتب

شوق : أوكي

أم عبدالعزيز : وانتي نور ..؟؟

نور : خالتو بعدني ع السلطه

أم عبدالعزيز : ويه ع ايامنا نحن كنا نخلص الطباخ بهالمده

نور تضحك : ترا ايامكم ما كان فيه سلطه

أم عبدالعزيز تضحك : مو لهالدرجه عاد ههههههه

شوق : بسكم حجي يلا خلصو عشان نلحق على صلاة الظهر

أم عبدالعزيز : شوق اتركي اللي بيدج وروحي قومي ضاري خل يتسبح عشان يروح المسيد

شوق : مابي .. الهنوف روحي قوميه

الهنوف : مابي أنا بروح داري .. امتحانات نص العام بدت

شوق : أوف .. تسمعينها كأنها دافوره وهناك طل أعوذ بالله

أم عبدالعزيز : بلا حجي زايد يلا روحي قومي أخوج خل يروح المسيد

شوق : انشالله ماميتو تامرين أمر انتآآآآي

أم عبدالعزيز : يقطع بليسج يلا روحي بسررررعه هههههه

شوق تمشي .. وتروح حجرة ضاري عسب توعيه من الرقاد .. الين وصلت فوق .. أول ما وصلت طالعت حجره عبدالعزيز ابتسمت .. الحين نواف راقد بعده والله لو بيدي اروح أقومه بس خساره .. اي صح نواف نايم بغرفة عزوز وعمي وولد عمي الثاني وينهم ..؟؟ يلا خل اروح اقوم ضاري وبرجع بسأل أمي ..

دقت باب حجرة ضاري ودخلت .. تجدمت شوق عن السرير ..

شوق : ضاري .. ضاري قوم بسك نوم

ضاري : لا رد ....

شوق : ضاري قوم ولا بخبر أمك

ضاري : لا رد ....

شوق : ضــــــــــــــــاري قوم ولا بييب سطل ماي وأجبه عليه .. وبعدين اليوم يوم الجمعه و .............

قاطعها وهو يرفع اللحاف عنه ويقول وهو معصب وفيه رقاد : زين رهام لعنبو ابليسج حشرتينا ..

شوق تنصدم يوم تطالعه وترجع ورا .. : آسفــــه ع بالي ضاري ..

نواف يطالعه منصدم ومستغرب ويبي يضحك : شــــــوق

شوق تنزل راسها مستحيه تبي تمشي ..

نواف وقفها وهو يقول : أعوذ بالله طبق الأصل من رهاموووه أختي .. اسلوب ماكو كللللللللللش

شوق .. أنا اللي ميته عليك واليوم ياي أول كلمه أسمعها منك اسلوب ماكو .. نزلت راسها ..

نواف : سمحي لي ما عرفتج كان فيني نوم تدرين عقب السفر ارهاق ..

شوق : لا عادي

نواف : اشلونج ..؟؟ انشالله جينه باباتي

شوق تذكرت اسلوبه الدفش والمضحك وابتسمت : جينه وجبنه وقشطه .. انت اش لونك ..؟؟

نواف : تمام الحمدلله ..

شوق : شخبار أهل الكويت ..؟؟

نواف : كلهم بخير الحمدلله يسلمون عليكم

شوق : الله يسلمهم يارب .. يلا عاد قوم عشان تروح المسجد

نواف : انشالله .. وتعملي ترا هذا مو أسلوب تقومين فيه الناس .. باجر لو زوجج بيكره حياته هههههه

شوق نزلت راسها واستحت : يلا عن اذنك ..

نواف : اذنج معاج شوكه

شوق لفت وتذكرت هذا لقبها اللي تكرهه وهي صغيره وابتسمت : نونو

نواف : اقول اطلعي مو كافي خربتي نومتي ..

شوق ابتسمت وطلعت ..

يالله هذا نواف .. ياربي سنتين وتغير جذي .. والله ما اصدق ياربي عليه بعد أهبل ويجنن .. والله ان خوووش طفل .. هع لو سمعني بس ..! بس بعده حبوب واجتماعي .. يا ربي .... موقف لا أحسد عليه ..

نور وهي تقطع : شوووق

شوق : لا رد

نور : شوق يا شـــــوق ..!

شوق لفت تطالع نور : هلأا ..

نور ابتسمت : اللي ماخذ عقلج يتهنا به

شوق ابتسمت : ماكو أحد غيرج

نور : اي اي علينا والحبايب موجودين

شوق : ملييييييييقه نوووروووه اسكتي ترا اللي فيني مكفيني

نور تبتسم : له له له خير اش صاير

شوق : اش صاير بعد

نور : ليكون لعنتي حلت عليك

شوق تبتسم : اي الظاهر هذي حوبتج ههههههه

نور : اش صار ..؟؟

شوق : بدال لا اقوم ضاري قومت نواف

نور تبتسم : نــــــــــواف

شوق : ايه نواف فيه أحد غيره يعني

نور تضحك : لا احلفي بس يا شيخه

شوق : والله

نور : ويو ويو ويو .. تفشلت المسكينه

شوق : نور اسكتي لا افر عليج اليدر

نور : اش صار انزين

شوق : بعدين بخبرج الوضع الحين ما يسمح ..

.................. : شاللي ما يسمح ...؟؟

شوق ونور يلفون مصدومات .. شوق تتأتأ : ماكووو ...!

عبدالعزيز يفتح الثلاجه : انتي اللي تقولين ..!

شوق : اي سوالف بنات

نور : انت من متى هنا ..؟؟

عبدالعزيز : يهمج ..؟؟

نور استحت من أمس وهو طايح عليها الا يبي يكلمها .. نور : لا بس أسأل ..

عبدالعزيز : عاد خلاااص ما بجاوب .. شوق طلعي لي ريوق

شوق : انشالله

عبدالعزيز : نواف هم بيتريق معاي

شوق : وعمي وولده براك ..؟

عبدالعزيز : لا لا تريقو خلاص

شوق : أوكي ثواني

طلع عبدالعزيز .. شوق : كنا بنروح فيها

نور ابتسمت : يلا طلعي لهم فطور

أم عبدالعزيز تدخل المطبخ وتقول : بنت انتي معاها يلا كملي اللي بيدج ..

نور تبتسم : انشالله خالتو

يتبع ,,,,

👇👇👇

تعديل المقال