رواية حبيب الحب -2
سعد : مساعد انت ما تفهم أنا أبيها يعني بالعربي أحبها
مساعد : بينك وبينها شي
سعد : لا ، مو أنا اللي اتحرش ببنت عمي ، أنا أحبها من زمان واللحين اشتغلت واستقريت بدوامي أبي أكمل نص ديني وإهي اللي اختارها قلبي
مساعد : عين خير يا بن الحلال وان شاء الله تكون من نصيبك
======================
ثاني يوم السبت اتصل ابو خالد على اخوه وبشره بأن خالد موافق على نوره وقاله ابي الملجه بتاريخ 1 / 5 / 2008 .
كلم ابو راشد ام راشد بالموضوع وقالها شاوري نوره او بالاحرى اقنعيها بالغصب !!
نوره من تعرفت على صديقتها أماني قبل سنة معاها بالجامعه بكلية التربية وأتعرفت أم راشد على أهل أماني وثقت فيها وصارت تسمح لنوره إنها تطلع معاها حسب ظروفهم أو مشاويرهم الى السوق او المكتبات طبعا ما تخليها تسوق سيارتها إلا للجامعه اما المشاوير العادية فتطلع بالسايق ومعاها سيلفيا خدامتهم>> نوره واماني مدمنات قراءة القصص والروايات ، كانت نوره توها راده من مكتبة جرير حول الساعة 12.30 الظهر سلمت على امها وراحت فوق على طول تبدل ملابسها علشان تقعد مع أمها قبل الغدا لكن ام راشد اصعدت لبنتها .
ام راشد : يمه نوره ............ ودقت الباب ودخلت غرفة نوره
نوره : هلا يمه ..... اللحين ابدل وانزل
ام راشد : لالا ..... تعالي تعالي قعدي يمي >> وقعدت ام راشد على الكنبة اللي بغرفة نوره
نوره : نعم يمه خير
ام راشد : بغيتج بسالفه ....... يمه نوره انتي كبرتي وكثروا خطابج
نوره : ............
ام راشد : وأمس عمج حمد كلم ابوك واخطبج لولده خالد
نوره : ............. >>> الوجه يعطي الوان مدري ليش
ام راشد : أبي اعرف رأيج
نوره : يمه أنا ما اطلع عن شور ابوي وانتوا تعرفون مصلحتي
ام راشد : الله يكملج بعقلج اي يمه البنت مالها إلا بيت رجلها .. ... وانتي ما شاء الله عليج كامله والكامل الله عاقله ورزينه وثقيله ...... يما ترا حنا ما نغصبج فكري .
نوره : يمه مممممممــــــــ اهم شي عندي اكمل دراستي ، وانا ما عندي مانع اتزوج اي واحد بس اللي يختاره واللي يرضى عليه ابوي .
ام راشد : يا رب يا بنتي الله يوفقج ويسعدج ، يا رحمن يا رحيم اذا لبنتي نوره نصيب بهالزواجه يسر امرها وارزقها واسعدها واذا فيه عذاب لها ابعده عنها .. >> وبقلبها : الله يستر من ولد الحضريه .
بعد المغرب : بصالة بيت ابو راشد
ام راشد : هلا والله بهند حياج الله زين انج نزلتي توسعين صدرج من هالشقة اللي حابسه نفسج فيها
هند : الله يحيج خالتي ، بعد شسوي مليت بروحي والله تعبانه بس قلت بأضغط على نفسي وبنزل
تهاني : هلا هند الله يهون عليج والتوأم يصيرون دبل توامه
نوره : ههههههههههه آمييييييييييين
هند : دام قلتي جذي بعطيج واحد منهم يسليج ، عسى الله يقدني أربي هالأثنين .
ام راشد : آمين يا رب العالمين يهون عليج ويرزقج توأم بنت وولد بصحتهم وعافيتهم ويسعد قلبج انتي وراشد .
تهاني ونوره : آآآآآآآآآآآآآمييييييييييييييييييييين وكلوووووووولوووووووووش
وهند : ههههه قلبتوها عرس
تهاني >> تلفونها يرن : هلا يمه اشلونج ، الحمد لله بخير ، خالتي عندي ...... خاله امي تبي تكلمج
ام راشد : السلام عليكم ام عادل ، عساج بخير يا مال العافيه ، بغيتج بسالفه >> وبعدت عن البنات
ام عادل : أمري يا ام راشد
ام راشد : نوره قربناها لخالد ولد اخوج حمد والملجه ان شاء قريبه
ام عادل : يا عله مبارك ، ام خالد اتصلت واخطبتها
ام راشد : لا والله ولا ارفعت التلفون الخطبة من تحت رأس الرياجيل
ام عادل : الله يستر من نوال ، بس عساها راضيه لا تعقد هالزواجه وتنح وتعفسكم
ام راشد : والله هذا اللي خايفه منه مدري إهي راضيه وإلا لا
ام عادل : ويه ما عليج منها رضت وإلا بالطقاق ، هاذي بتأخذ نوره زينة البنات ، وبعدين دام انها من تحت رأس الرياجيل يا ام راشد ، خليها تولي طول عمرها شايفه نفسها . والله يوفق نوره وخالد ويسعدهم .
ام راشد : آمين . قولي لأختج ام بدر بعد انتوا عمات العيال
ام عادل : ولا يهمج يا ام راشد اقول لأم بدر والله يهني نوره ويسعدها مع السلامه
ام راشد : مع السلامه
============================
قبل الملجه بيوم اتصلت بوقت الضحي ام خالد على ام راشد وقالتها إنها بتزورها بنفس اليوم .
اتصلت ام راشد على نوره بالجامعه وقالتها اليوم بتزورهم ام خالد اتصلي على محل حلويات يوصلون للبيت >> حلو قهوه وفطاير
كانت نوره وأماني يتمشون بممر الطالبات بكلية التربية ورايحين السكوير الأول
نوره : هاذي أمي تبيني أتصل على محل يوصل حلو قهوه وفطاير
أماني : ليش اشعندكم اليوم
نوره : مرت عمي حمد .... أم خالد اللي باجر ملجتي عليه وأنا ماشفته
أماني : واي نوره اشلون تتزوجين واحد ما شفتيه
نوره : عادي يا قلبي عادي .... فيه واجد بنات مثلي على أنه ولد عمها والأهل نظرتهم نشتري رجال .... والرجال مخابر مو مناظر
أماني : نوره انتي متعلمه ومثقفه وتلبسين بدل ومو متنقبه الرياييل اللي بالشارع كلهم شافوج واللي تبين تتزوجينه ما شافج اشلوووووووووووون ماني قادره استوعب ، وبعدين وين القبول يمكن نفسج ما ترتاحله
نوره : قابله فيه دامه ولد عمي حمد
أماني : لا تيننيني إنتي بتتزوجين الولد مو عمج
نوره : أماني خلاص باجر الملجه وبعدين يمكن يطلب يشوفني بعد الملجه
أماني : واي وبذيج الساعه يكون طاح الفاس بالرأس
نوره : حلو المثل اللي قلتيه خالد الفأس وانا الرأس
أماني : واي نوره أحر ما عندي أبرد ما عندج ....
نوره : أقول سكري على هالسالفه وعطيني لستة اسامي المحلات اللي عندج كلها خليني اشوف من وين اطلب أبي شي راقي وغريب .
العصر بفيلا ابو راشد :
ام راشد بعد صلاة العصر دقت باب غرفة بنتها نوره :
ام راشد : نوره
نوره >> كانت نوره توها طالعه من الحمام بعد ما خذت شور وتبي تستشور شعرها : هلا يمه
ام راشد : اشراح تلبسين ؟
نوره : والله ما ادري يمه
ام راشد : يا يمه بتجي مرت عمج عقب صلاة المغرب وللحين منتي عارفة شنو تلبسين .
نوره : مممممممـــــــ عندي بدل بس محتاره
ام راشد : لا تحتارين ولا شي اي شي تلبسينه انتي تزهينه يا نوره
نوره : يمه ............ مو جنه الخطبه قاصرها شي يعني ........ عمي كلم أبوي وحدد موعد الملجه بسرعه ومرت عمي ما زارتنا بالمره إلا اليوم وباجر الملجه ........ووووووو
ام راشد : شنو ........... ووووووو قولي ما شفتيه انتي اللي قلتي ما اطلع عن شور ابوي
نوره : اي يمه بسسسسسسس خالد معقوله ما يبي يشوف البنت اللي يبي يتزوجها
ام راشد : ما ادري يمه ؟ مهما كان انتي بنت عمه . والزواج يا يمه قسمه ونصيب وفي ناس واجد ما يشوفون حريمهم إلا بليلة العرس . ويمكن اليوم جاي مع امه أنتي بس تزيني وألبسي عدل وأنزلي اذا ناديتج .
نوره : ان شاء الله يمه
تهاني زوجة فايز : طقت الباب >> ممكن ادخل
نوره : هلا تهاني حياج
تهاني : خالتي أنا قلت لميري لا تسوي القهوه انا اللي بسويها إهي ما تضبطها
ام راشد : تسليم يا قلبي ... مو تخليني بروحي اذا اوصلت ام خالد تعالي وقهويها ترا والله ما اقدر اصب لهم
تهاني : لا توصين خالتي أنا بصب القهوه والجاي واقدم العصير ما راح اخلي الخدم يقربون منا . لا تحاتين
نوره >>> طلعت بدله : تهاني اشرايج بهالبدله
البــارت الرابع
بعد المغرب :
وقفت سيارة خالد ومعاه ابو خالد جدام فيلا ابو راشد وألتفت أبو خالد على ام خالد : يالله انزلي
ام خالد : وين ؟
ابو خالد : اشفيج هذا بيتهم
ام خالد : هالفيلا بيتهم من متى ؟
ابو خالد :اشفيج ام خالد نسيتي إحنا بعنا نصيبنا من البيت على أخوي فهد عقب وفاة الوالد وأهو شرى البيت اللي يمه وهدهم وبناه هالفيلا .
ام خالد : عشتوا من وين له ؟
ابو خالد : وأحد قالج اخوي عليه قاصر مدير بوزارة ويملك عقارات وتاجر اسهم بالبورصة ، وإلا بعينج التاجر بس اهو اللي يملك شركة !!
ام خالد : ودام عنده ليش ساكن بهالمنطقة ؟
ابو خالد : اشفيها الرقه منطقه مثل مناطق الكويت وشوفي حواليج كله فلل فخمه ...نزلي الله يهداج .
ابو خالد : يالله خالد امش الديوانيه .
ام خالد >> كانت مأخذه معاها بنتها ريم : يالله ريم نزلي خلينا نشوف آخرت هالخطبه .
بعد ما دخلت ام خالد البيت انبهرت بالأثاث الراقي بصالة الاستقبال
ام راشد : حيا لله من زارنا يا هلا ومرحبا
سلمت ام خالد بطرف خشمها : هلا هلا ام راشد اشلونج > جنها امس شايفتها مو غايبه عنهم 10 سنين
ام راشد : بخير الله يسلمج ...... والتفت على ريم : هلا والله انتي ريم صح
ريم : اي خالتي يا هلا
ام راشد >> تطالع تهاني : هاذي تهاني بنت حماتج شيخه مرت ولدي فايز
ام خالد >> حست انها نغزه عليها لأنها ما حضرت العرس وباركت بالتلفون بس : وي أي اعرفها اشدعوه ..... هلا هلا والله تهاني اشلونج ؟
تهاني : هلا خالتي بخير الله يسلمج ....... هلا ريم عاش من شافج
ودارت سوالف عن العيال ودراستهم والأهل واخبارهم وتجنبت ام خالد إنها تتكلم عن الخطبه
بعدها بفترة اتصلت ام راشد على الرقم الداخلي لغرفة نوره وقالتلها تنزل
كانت ام خالد وريم قاعدين بمكان يشوفون اللي ينزل من السلم اللولبي ..... رفعت ام خالد عينه وشافت : بنت تتميز بالطول مثل كل عيال عايلة ابو صالح الجسم منحوت نحات والبياض هادي مو ساطع كأنه تمثال والشعر أسود بسواد الليل ومدرجات على طوله لي نص ظهرها وفيها شي يلفت النظر عيونها وساع وساع ومغريه حط الله الجمال كله بعيونها وصحيح انها جميله كلها على بعض بس العيون فتانه ...
نوره : السلام عليكم >> وقربت تسلم
ريم وام خالد : وعليكم السلام
ام راشد : هاذي نوره يا أم خالد شفتيها اشلون اكبرت
ريم >> مبهوره أما ام خالد >> مستحيل اخلي خالد يشوفها : هلا والله بجنتي هلا اشلونج نوره
نوره : بخير خالتي الله يسلمج
ريم : هلا نوره اشلونج
نوره : الحمد لله
واكملت الجلسه بتنشيف ريج نوره بالاسئله دراستج وتخصصج بتكملين بتشتغلين انتي تسوقين وبعد ساعتين استأذنت ام خالد مع إن ام راشد احلفت عليها بالعشا بس تعذرت انها مسويه رجيم وتحافظ على جسمها .
اتصلت ام خالد على ابو خالد اللي كان قاعد بالديوانية مع أخوانه وعيالهم وكان أبو خالد تكلم بالخطبه بشكل رسمي والكل باركه بس كان واحد من العيال حاس بخنقه بعدها أستأذن ابو خالد وخالد لانهم بيوصلون ام خالد للبيت .
بعد ما وصلوا البيت أمسكت ام خالد ريم وخذتها لغرفتها
ام خالد : شوفي يا ريم والله ان فتحتي حلج بكلمه غير اللي اقوله لخالد لقص السانج قص تسمعين
ريم : ليش يمه شنو بتقولين
ام خالد : سكتي سكتي وسمعي ولا تزيدين على الكلام اللي اقوله بس هزي رأسج سامعه
ريم : زين
اتصلت ام خالد على خالد اللي كان قاعد مع ابوه بصالة المعيشه علشان تكلمه وصعدلها بغرفتها :
ام خالد : يمه خالد الله يعينك شنو هالبلوى اللي طحت فيها
خالد : ليش يمه شنو صار قولي والله مالي خلق من قالي ابوي جني بنت وغاصبينها .... زين يمه ما اقدر اشوفها على الاقل قبل الملجه .
ام خالد : اسكت واسمع يمه .......... بيتهم من بره فخم بس من داخل عادي جلسات على الارض ... عارف انت اشلون بدو اهل ابوك ما خلوا طبعهم ... وعقب ساعه وعقب الحنه على مرت عمك يالله وافقت اني اشوف البنت .... تقولي احنا ما نوري بناتنا ، اللي يبي يتزوجها يأخذ بنت رجال ....... عاد هذا كلام
خالد : يعني شنو ما شفتيها
ام خالد : لا يمه شفتها وياليتني ما شفتها بطه ومتينه وقصيره وسمره وما عليها حلا كلش ما فيها زين ........... واي خالد يا حسرتي عليك
خالد : خلاص يمه كلمي ابوي وقوليله أبي أشوفها وعقب بقول إنها ما اعجبتني ومن حقي ارفضها
ام خالد : وي وي يمه أنا يالله خلوني اشوفها الدور عليك ....اقولك امها تقول احنا ما نوري البنت لريلها إلا ليلة العرس .
خالد : ماني متزوجها شنو ابوي ما يغصبني !! باجر ماني رايح الملجه وخلي ابوي يتوهق بروحه .
ام خالد : لا يمه لا تسويها أنا ماراح اخليهم يتهنون فيك مو اهم كادوا لك واعرضوا بنتهم علي ابوك وأحرجوه ، ما أكون ام خالد ان ما رديت لهم الطراق طراقين ،أنت املج وأياني وياك تقول بشوف البنت أرفض هالشي وقول عقب العرس علشان ما يكون لهم عذر باجر يقولون عقب ما شافها واهي متنقبه وكشف ويها يقول ما ابيها
خالد : يمه اشلون تخلصيني عقب الملجه بيحددون الزواج وتطيح بجبدي
ام خالد : لا تخاف انا بقولهم الزواج عقب العيد تدري احنا اللحين شهر خمسه ( مايو ) ورمضان بشهر تسعه ( سبتمبر ) والزواج عقب العيد ، خل بنتهم تجهز وما تفرح بالعرس . بنعطيهم ورقة طلاقها ونقول والله ما كو نصيب انت استخرت وما ارتحت وبس .
خالد : يمه عاد هذا حجي ، لا توهقيني البنت جيكره
ريم : انا بروح عند داليا بشوفها وينها ؟ >> خايفه لا يسألها خالد وتتوهق ما تعرف ترد
ام خالد : ماما خالد لا تردني بس ملجه بس ... ولا تشوفها ولا تشوفك ... واليوم اللي اقولك طلق طلقها
خالد : شنو تفكرين فيه يمه لا تحطيني بويهه المدفع
ام خالد : مو أهم كادوا لي من وراي علشان يأخذون ولد الحضريه ويردونه لأهله مثل ما قالوا أنا بفشلهم واخلي ولد الحضريه اهو اللي يعوفهم .
خالد : متى قالوا هالحجي ؟
ام خالد : سالفه قديمه ........... انت باجر اكشخ واملج والباجي علي . قوم بحط العشا .
وانزلوا عند ابو خالد علشان يتعشون .
-----------------------------
بشقة هند زوجة راشد : ارفعت التلفون واتصلت على امها
ام صالح : ألو
هند : هلا يمه اشلونج
ام صالح : هلا يمه .... ها بشري اشلون الثقل معاج
هند : والله يمه تعبانه بس اتمشى بشقتي مالي خلق انزل واليوم عندنا مرت عمي حمد
ام صالح : عجب ام خالد زايرتكم من متى ؟ صارلها فوق العشر سنين ما شفناها
هند : وي يمه بقولج على سالفه باجر ان شاء الله ملجة نوره
ام صالح : لا والله لا تقولين يا ليتني خطبتها لسعد بكلم ابوج لا يملجون ولد عمها اولا من الغريب
هند : يمه اي غريب نوره اليوم عمي حمد خطبها رسمي لولده خالد بالديوانية وأبوي اللحين يدري
ام صالح : الله ولد الحضريه يأخذ نوره ....... اشلون تنازلت نوال ورضت ؟
هند : والله يمه ما ادري بس السالفه صارلها اكثر من اسبوع بس ساكتين عماني وما اعلنوا إلا اليوم وباجر الملجه .
ام صالح : الله يهنيها
البــارت الخامس
-----------------
1 / 5 / 2008 يوم الملجة
ببيت محمد أبو صالح >> قبل الملجه بساعه
بغرفة سعد :
مساعد : سعد الله يهداك اشفيك خلاص البنت خذت نصيبها وبعدين اهو ولد عمها مثل ما أنت ولد عمها
سعد : بس انا ابيها وكلمت عمي فهد قبل لا يتكلم عمي حمد ويخطبها
مساعد : اي بس اهو قالك أصبر والظاهر كان قصده يشاور عمي حمد ، وبعدين خالد اكبر منك
سعد : واذا اكبر مني أنا خطبتها قبل
مساعد : سعد خلاص يا خوك لا تفضحنا قوم عماني وعيال عماني موجودين بالديوانية علشان الملجه وانت لازم تحضر
سعد : ما اقدر يا مساعد ما اقدر قلت لعمي ابيها وكلمته ويروح يعطيها خالد
مساعد : كل يأخذ نصيبه يا سعد وانت مالك نصيب معاها ، لا تفشلنا قوم
سعد : تبيني احضر ملجه حبيبتي
مساعد : استح على وجهك ، خلاص بتصير من نصيب غيرك ، اخلص قوم انت رجال اضغط على نفسك وابتسم وقلوب الرجاجيل صناديق مقفله محد يدري عنها .
تمت الملجة بين الرجال بعد صلاة المغرب بديوانية فهد ابو راشد وكانت بين رجال العائلة فقط .
أما النساء : تجمعوا ببيت ابو راشد ، العمات وبنات العمات والخالات وبناتهم وجاراتهم وباقي نساء العائلة باركوا لأم راشد ملجة بنتها ،وخاصه انه من عادة أهل نوره انه الملجه تكون بين الرجال اما النساء فما كان فيها اي نوع من الفرح غير الأستقبال لتهنئة ام العروس أما البنت تكون بعيده عن نساء العائلة >> طبعا البنات اصعدوا لنوره بغرفتها وباركوا لها وطبعاً اول الحضور صديقتها أماني . بغرفة نوره
أماني : كلوووووووووش ألف مبروك >> وباستها
نوره : الله يبارك لج >> وبهمس : الفال لج يا قلبي
أماني : آمييييييييييييين
تهاني : ههههههههه لاحقه على العرس ان شاء يا أماني ونرقص بعرسج ، الف مبروك نوره
هند : الف مبروك
نوره : الله يبارك لكم
مها : الف مبروك نوره ، وناسه بتأخذين واحد اكيد ما راح يخليج تلبسين عباية
مناهل : هذا اللي يهمج ، الف مبروك نوره
نوره : الله يبارك لج ونرقص بعرسج قريب ان شاء الله
هند : مها اللحين هذا اللي يهمج بالزواج العباية
مها : أي هذا ساكن النزهه مو مثل عيال الرقة من يأخذ البنت من اهلها لبسها عباية ونقاب
تهاني : لا مو كلهم
مها : لا والله وانتي شنو تلبسين ؟
تهاني : فايز دين علشان جذي لبسني بوشيه بعد مو نقاب ، وبعدين تعالي انتي اشدراج ان ولد خالي حمد ماراح يلبسها عبايه ونقاب
نوره : حرام عليكم لا تتكلمون عن العباية والنقاب خلوني مستانسه بين امي وابوي يا حلوهم مخليني على كيفي جنزات وبدلات وكل كيف كيفي الله لا يغير علي
مها : آمييييييييييييييييييين وأجمعيييييييييييييييييين
سلوى : هههههه الله يغربل ابليسج يا مها ، بنزل تحت عند الحريم اذا قعدت بعد شوي مها بتحرشنا على رياجيلنا
هند وتهاني : ههههههههههههههه
أماني : اللحين ما عندكم حفلة ملجه كلش
مناهل : لا ما في حفلة ملجة بس عرس .
أماني : والله صج كل ناس لهم طبعهم وعاداتهم
===================================
بعد الملجه بأسبوعين : جامعة الكويت كلية التربية – كيفان
أماني : نوره .......... نوره ............ نوره
نوره : هلا أماني يا صباح الورد والياسمين
أماني : هلا نوره
نوره : أنتي ما عندج محاضره هالحزه ليش مداومه
أماني : أبي اكلمج بموضوع مهم
نوره : اشدعوه بينا التلفون
أماني : لا الموضوع لازم اقوله بويهج
نوره : يا ماما أماني خرعتيني اشفيج
أماني : نوره أنتي مو اللحين عندج محاضره ...
نوره : اي
أماني : خلاص بعد ما تخلصين تعالي الكافتيريا انطرج
نوره : اوكي يا قلبي ............ يالله باي
بعد ساعه بكافتيريا كلية التربية.
أماني : تعالي نوره أهني
نوره : هلا أماني يالله قولي لي الشي الخطير اللي خلاج تطلعين من بيتكم قبل محاضراتج
أماني : نوره ....... أنا ما قدرت انطر عقب ما سمعت بالسالفه
نوره : اي سالفه
أماني : قلبي يعورني بس لازم اقولج .......... نوره لا تزعلين مني
نوره : اماني خرعتيني اشفيج ..... تحجي
أماني : اوكي ........... سمعيني ولا تقاطعيني ............ البارحه زارتني بنت عمي مرام أهي تدرس معانا بالجامعه بس سنة التخرج ........... ومع السوالف قالتلي سالفه عنج !!!
نوره : شنوووووووو ؟؟
أماني : سمعي نوره والله أنا مو متأكده اذا صاجه او تجذب
نوره : اي قولي جننتيني
أماني : الله يسلمج مرام صديقتها الروح بالروح غدير وهاذي البنت متزوجه واحد اسمه جاسم واهو صديق خالد ولد عمج وزوجج
نوره : زيييييييييييييييين
أماني : ومن كلام غدير تقول انه خالد قايل لجاسم أنه عمه اجبره يأخذ بنته بتحريش من امها وأهو اضطر انه يوافق على الملجه بس ناوي يطلقج بعد جم شهر ....... وبعد يقول انه امه تقول عنج عقب ما شافتج انج قصيره ومتينه وسمره وشينه وأنه امج رفضت انه يشوفج وقالت ما عندنا بنات يتكشفون على الرياييل قبل العرس ما يشوفها إلا بليلة العرس .
نوره : نعم أنا أمي تقول هالحجي .......... بس ما صار وأمي أنطرت امه تقول انه يشوفني بس اهي ما تحجت واحنا ما نقدر نبدي لازم الولد او امه اهي اللي تتحجي وبعدين امه ليش تقول عني اني قصيره وسمره ومتينه وبعد شينه ليش ليش أماني قوليلي ليش ؟؟؟؟
أماني : ما ادري نوره ؟ السالفه فيها إن
نوره : آهـ آهـ آهـ ليش يقول عن امي جذي ؟
أماني : أي وغدير قالت لمرام خلي بنت عمج توريني صديقتها نوره ابتأكد صج اهي شينه
نوره >>> نزلت رأسها : أماني أنتي وصفتيني لمرام
أماني : لا أنا اصلا طقتني البوه وتبلعمت ما تحجيت من الخرعه وبعدين ادخلت علينا امي وضاعت السالفه ما كملتها .
نوره : زين أماني ابي منج ما تتكلمين مع مرام بنت عمج عن السالفه وكل ما اسألتج قولي ما ادري ولا توصفيني لها ابدا ابد زين ؟
أماني : زين بس ليش ؟؟
نوره : آهـــــ يالقهر ابي ادوس برأس هالعله خالد ويا امه وانتقم منهم على الكلام اللي قالوه عن امي .
أماني : شنو تبين تسوين ؟
نوره : ما ادري ما ادري ............ خليني افكر بقلبي نار على امي ....بس ما اكون نوره بنت فهد ان ما اطبخ له السم ووكله اياه
أماني : واي مو جنه نوره اللي قاعده قبالي .... انتي وحده ثانيه ......... نوره بليز فكري عدل لا تتهورين .
نوره : أماني .... مرام بنت عمج بأي كليه ؟
أماني : اهي بكليه الآداب مع غدير رفيجتها اللي قالت السالفه
نوره : زين ابيج تعرفيني على غدير بس لا تقولين لها اسمي الصجي .
أماني : نوره ليش ؟
نوره : بس جذي بشوف هاللي قالت عني هالسالفه .
أماني : يا بدويه لا يكون بتيبين معاج عجره وبتطقينها
نوره : ههههههههـــــــ يغربل ابليسج يا اماني وانا راعية هالسوالف صبي شايفتني جدامج .
أماني : ما ادري انتي صج من بره تلبسين بدل وفري وكشخه بس ماجربتج اذا عصبتي شنو تسوين خو انتوا يالبدو تخرعون لي بغيتوا تأخذون حقكم .
نوره : هههههههـــــ اماني والله انج نكته
أماني : يا رب هالضحكه دوم ............. نوره لا تزعلين الله يخليج يمكن هالكلام مو صحيح ومبالغ فيه
نوره : مو علشان جذي ابي اتعرف على غدير علشان اتأكد من الحجي بنفسي
أماني : اشلون
نوره : اتصلي على مرام وشوفيها وينها
أماني : اوكي
مرام >>> أماني يتصل بك : آلو
أماني : هلا مرام اشلونج يا قلبي
مرام : بخير الله يسلمج
أماني : اقول مرام إنتي وينج اللحين
مرام : بكافتيريا الآداب قاعده مع غدير
أماني : اوكي ...... اقدر امرج
مرام : حياج
أماني : يالله نوره مرام وغدير قاعدين بكافتيريا الآداب
نوره : اماني اذا عرفتيهم علي قولي اسمي : نوره خليفه بن عبدالله الــــــــ
أماني : ليش ومنو خليفه بن عبدالله الــــــ
نوره : هذا الله يسلمج اسم خالي واهو اصلا ما عنده بنات بس عنده صبيان ، وبعدين اذا قلتي ان اسمي نوره هالاسم الكل يعرفني بس باقي الاسم محدد يدقق عليه
أماني : اوكي ...... خليني احفظ : نوره خليفه عبدالله الـــ ، نوره خليفه عبدالله الــ ، نوره خليفه عبدالله الــ
نوره : بس بس سويتيها نشيده
بكافتيريا كلية الآداب
أماني ونوره : السلام عليكم
مرام وغدير : وعليكم السلام
أماني : مرام هاذي رفيجتي نوره خليفه عبدالله الـــ
مرام : هلا والله غدير هاذي بنت عمي أماني ، أماني هاذي غدير رفيجتي
غدير : هلا والله
بعد التعارف والسوالف قالت مرام : أماني مو أنا قتلج وريني رفيجتج نوره فهد
أماني : اي بوريج اياها ان شاء الله بس اليوم ما داومت
نوره : ليش اشفيها نوره
غدير : الله يسلمج هاذي ملجت على رفيج ريلي وودي اشوفها
أماني : نوره قتلج السالفه .... غدير الكلام اللي قلتيه لمرام صج
مرام ويها عطي الوان بس غدير من النوع اللي تحب الحش ما همها : اي والله هذا الكلام اللي قاله جاسم من السان خالد بنفسه .
نوره : يعني علشان اهي قصيره ومتينه ما يبيها
غدير : اللي عرفته انه اهو ما شافها بس هذا وصف امه .... عاد نوره صج اهي جذي
نوره : اي صج بس اهي حبوبه واخلاقها عاليه ومحترمه .
غدير : والله ما ادري ، بس هذا الحجي اللي عرفته من جاسم واهو قال >> وعادت نفس الحجي اللي وصلته لها أماني من لسان مرام .
أماني ونوره استأذنوا من مرام وغدير لأنه عندهم محاضره واتفقوا انهم يلتقون كل يوم بالكافتيريا بساعه معينه يكونون كلهم فاضين فيها .
----------------------------------------------------
راشد وهند بمستشفى لندن >> كانت تنطر دورها للدخول على الدكتورة المتابعه لحالتها :
السستر : مدام هند
راشد : يالله هند قومي
هند : يالله أفـــــ حاسه بثقل
راشد : ان شاء الله تقومين بالسلامه ونفرح بعيالنا .... خلي الدكتوره تسويلج سونار بتأكد جم واحد ما يصير بس اثنين
هند : راااااااااااشد قول لا إله إلا الله ويا ربيييييي احفظ عيالي من عيوم ابوهم
راشد : ما قلت صايره مركب
هند : " قل اعوذ برب الفلق "
عند الدكتوره بعد الفحوصات : هند إنتي لازم تدخلين المستشفى باجر إن شاء الله
هند : ليش ؟؟؟
الدكتوره : شوفي هند انتي حملتي بعد علاج وعندك الحوض صغير أوي وانا موش عاوزه أازيك بأخذها من قاصرها وأولدج بعملية قيصرية وانتي دلوأتي بالأسبوع 38 وده انسب وقت للولادة .
هند : زين دكتوره ما اقدر اكمل لي نهاية حمالتي يعني اكمل 40 اسبوع
الدكتوره : ليه هند انتي اول وتاني حتولدي قيصرية ..... الافضل الوقت ده عشان ما تحصلك اي مضاعفات
هند : زين بنادي زوجي يدخل قوليله
الدكتوره : خليه يخش ، هو أنتي خايفه تأوليله وإلا ايه
هند : اي ..................
راشد بعد ما بلغته الدكتوره قام بإجراءات دخولها لثاني يوم الصبح
وهند اتصلت على امها تبلغها
البارت السادس
----------------
خالد بالشركة >> كان حاط ايده على رأسه مو مركز بالأوراق اللي جدامه من ملج قبل شهر واهو يفكر متى أمه بتقوله يطلق واشلون موقفه مع ابوه وشنو راح يكون عذره ؟ محتار ومتعذب !!! رن تلفونه >> جاسم يتصل بك
خالد : هلا جاسم
جاسم : هلا خالد وينك ؟
خالد : يعني هالحجزه وين اكون غير بالشركة
جاسم : يالحبيب قاعد بحلال ابوك تدش وتطلع على كيفك مو مثلى طاقلي كرت
خالد : والله انت اللي متعب حالك وتشتغل بوزارة طايح حظها ، اطلع واشتغل بالقطاع الخاص .
جاسم : ما لي خلق كراف ، خلني جذي شاي وقهوه وسوالف ومعامله وحده بالشهر ننجزها
خالد : والله حاله ، عزالله مشى شغل الوزارة من وراك
جاسم : اقول اخلص تعال معاي ستاربكس البدع
خالد : تدري ضايق خلقي ما ادري اشفيني بمرك وبعدين ارد للشركة
====================
ريم وخطيبها >> أسامه يتصل بك
ريم : أهلين هلا حبيبي
أسامه : هلا ، يا قلبي .............. ترا مليت متى بتحددون الملجه والعرس
ريم : واي أسامه اشفيك انا للحين اجهز وبعدين قايلتك بشهر سبعه بسافر مع امي بييب بدلة العرس من ايطاليا .
اسامه : زين وبعد ما توصل البدله شنو راح يصير
ريم : تقدر تحدد العرس بشهر عشره يناسبك
اسامه : زين نطقتي اللحين بتصل على امي تحجز كل شي ملييييييييييييت
ريم : هههههـــــــ ، خلاص جهزوا كل شي بس هاااااا اتصلوا على أمي وأسألوها أخاف لها رأي ثاني
اسامه : لالالالالالالالالالالا قلتي شهر عشره يعني عشره . يا لله باي بسوي اتصالاتي
=========================================
طلال( ولد أبو راشد ) بالكوت مع صديقه جمال >> جمال أخو جاسم رفيج خالد .
طلال : هلا جمال
جمال : هلا طلال ......... الله اش هالقعده الحلوه نوافير وكافيهات ، ما هقيت مجمع الكوت بهالحلا
طلال : اي اشعبالك ، هذا الكوت
جمال : اقول طلال أنت خالد بن حمد يصير ولد عمك
طلال : اي يا ذكي ما تشوف الاسم متشابهه
جمال : انا اشدراني ...... ما ادقق على الاسامي ... وفوق هذا اكثر من مره أي اتغدى عندكم بالديوانية ما عمري واجهته .
طلال : إي اهو لاهي بالشركة ويسافر علشان الشغل واجد
جمال : زين اهو ملج على بنت عمك وإلا اختك
طلال : لا اختي ........... تبي شي
جمال : لا يا حمش ما بغيت شي .... بس ان شاء الله عن قريب انبارك لك بالعرس
طلال : ان شاء الله ، وانت بعد شد حيلك واخطب .
====================
أم خالد ببيت أخوها تخطط لطلاق خالد >> بشاي الضحي قاعده ام خالد ومرت اخوها ام اسامه يشربون قهوه فرنسية
ام خالد : واي يا سبيجه مت من القهر اشلون لبقوا السالفه وورطوا حمد بسالفة زواج خالد من بنتهم بس والله ماني مخليتهم يتهنون فيه ..... والله لطلقها واخليهم يتفشلون .
ام اسامه : الله يهداج يا نوال ، يمكن البنت زينه وسنعه واخلاقها عاليه ويتقبلها خالد
ام خالد : ابد لو شنو تكون ، ما راح اخليها على ذمته اطلقها اطلقها
ام اسامه : كيفج ولدج وانت حره فيه
ام خالد : اقول سبيجه ، اذا تعرفين بنت وتكون جميله ومن عائله زينه قوليلي عليها
ام اسامه : هوهو ليش من له تبينها
ام خالد : لخالد طبعا
ام اسامه : الولد املج اشلون بتزوجينه ؟
ام خالد : انتي ما عليج ، دوري لي البنت بالمواصفات اللي قلتها وخلي الباجي علي .
ام اسامه >> اسامه يتصل بك : بلغ اسامه امه عن موعد الملجه والعرس وقالها قولي لعمتي ام خالد ، وطبعا تغيرت السالفه من خالد لي ريم واسامه
البــارت السابع
--------------
ستار بكس البدع
خالد : بمشي تأمر على شي
جاسم : اقعد لا تروح ، لين توصل غدير
خالد : وأنا اشغتل عندك خلاص بمشي شربت قهوتي وسولفت معاك يالله باي
جاسم : زين انطر شوي كاهي على وصول توها دازه مسج ، ما احب اقعد بروحي
خالد : يالله وهاذي قعده لين يوصل البدي قادر خو أنت تخاف تقعد بروحك
جاسم :ههاااااا قول اللي تبي بس اقعد
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك