رواية ياخاطفي وين القي عزتي في زمان المذلة -103
رغد( مالت عليكم ويش عاجبكم فيه يرفع الضغط هو وتصرفاته الغبيه ..ماغير يلاحقني درب يسد مايرد)
صحى من نومه قبلها أخذ له دش ينشطه بعد مالبس وتكشخ التفت على السرير وشافها نايمه ولا هي حاسه بازعاجه
باسل: والله غريبه ويش فيها هذي ؟
مشى لها وتردد قبل يصحيها طالع ساعته وشاف انها تأخرت بالنوم:هنادي ...هنادي
كانت منغمسه بأحلآمهآ ..كل تعب الايام اللي راحت بان عليها الليله الماضيه
باسل بعد شعرها عن وجهها ومرر يده على خدها بشويش ...ارتسمت على جبينها علامات الأنزعاج:هنوده قومي يالله الساعه صارت 9
هنادي تبعد يده: خلني أنام
باسل: والفطور ؟!..انا جيعان
هنادي فتحت عيونها بكل صعوبه:تدل المطبخ "غطت نفسها بالشرشف" لاتزعجني اذا شبعت نوم قمت من حالي
تركها وطلع للصاله جلس على الكنبه وشغل الـ tv حتى يضيع طفشه بعد ساعه من جلسته ماقدر يتحمل الجوع اكثر ..وقف وراح للمطبخ فتح الثلاجه وطلع له لبنى واخذ قطعة توست ودهن فيها رجع للصاله يأكل وهو يفكر بهنآدي اللي ماكلفت نفسها تقوم وتجلس معه على الأقل ..سمع باب الغرفه أنفتح
أمآ هنآدي ماقدرت تنام بعد مآ صحآهآ قامت تروشت وغيرت ملابسها وتعطرت بعطر هادي ..شافته متمدد على الكنبه ورامي عكازه على الأرض
هنادي: افطرت وألا لا ؟
باسل: توك تذكرين
هنادي بتأفف: يعني مآ أفطرت ؟
باسل بنفس نبرتها: يهمك افطرت وألا مآ افطرت ؟
هنادي :ويش فيك انت ؟
باسل: ألا ويش فيك أنتي ؟من أمس منتي طبيعيه
هنادي :سلامتك مافيني شي
طنشته ودخلت المطبخ تسوي لهآ فطور ... جهزت لها صينيه تفتح النفس وريحة الكآبتشينو ماليه البيت ..اخذت الصينيه وطلعت عنده ..وقفت عند الكنبه اللي جالس عليها
هنادي: شيل رجولك ابي اجلس
باسل: على وسع البيت ضاقت عليك الا تجلسين هنا؟
هنادي ميلت فمها: بتبعد وألا شلون
نزل رجوله وهي قربت الطاوله منهآ وحطت الصينيه عليها ..جلست وسمت بالله وبدأت تأكل
مد يده على كوب الكابتشينو وأخذه
هنادي: طيب أستئذن على الأقل
باسل ببرود: من قالك ما تسوين لي والا ناسيه اني زوجك
هنادي كملت اكلهآ بهدوء والجو بينهم متكهرب والصمت هو سيد الموقف ...طاحت عينها على رجله وتقشعر جسمها
هنادي: لاعاد تلبس شورت وألا برمودآ مآحب اشوف عمليتك
باسل مد رجله على طولهآ: لآزم تتعودين عليهآ
هنادي : انت شايف كيف رجلك مشوهه
باسل:ويش اسوي هذي هي العمليه
هنادي:طيب شيل رجلك مابي اشوفها
باسل: ياكثر تذمرك وطلباتك
سحبت الكوب من يده:ماقد طلبت منك شي الا انك تشيل رجلك هذي
باسل يستهبل عليهآ:تبيني اقصها مثلا ؟
هنادي: ويش دخلني فيك اهم شي ما اشوف هالغرز الطويله عاد رجلك ماشاء الله تقول عامود كهرب من طولها
باسل انفجر بالضحك:عيدي اللي قلتيه
هنادي رفعت حواجبها بتعجب: ياباسط ويش قلت عشان تضحك هالضحك كله ؟
باسل:عجبني تشبيهك البليغ
::
في الرياض
كآنوآ مجتمعين على الفطور
ندى: يمه بروح معكم تكفون
أمهآ: لا يمه خليك هنآ
ندى بأصرار:رايحه يعني رايحه لا تعارضون
ابو فهد:خليها تروح يام رياض تشوف اخوه وزوجته بدل ماتزعجنا
ندى: أسمعي الراي الزين
هزآع: اوووف منك ياندى ماتشبعين من الزن
ندى تقلب عيونها: كيفي ويش دخلك انت
هزاع لف على ابوه: عاقبها يبه ولاتاخذونها معكم
ابو رياض ابتسم:هذي الغاليه عندي طلباتها اوآمر
ندى ضحكت عليه: هههههههه لقط خشتك الحين ..محد ينافسني بالغلا
ام رياض: كلموآ فطوركم وخلوآ السوالف لا تلهيكم
ندى: يمه تكفين خلينا بعد نمر ولد فهد ميته على مآ أشوفه بالصور ماهو وآضح
هزاع دخل عرض: ويش تشوفين صغير مره ما تميزين منه شي
ندى: ياحول انت كل شوي ناط لي خلني اكلم امي على راحتي
أبو رياض:يابنتي مو على أي حال نشوفه يمكن الزياره ممنوعه عنه
ندى بتحدي: مالي شغل والله لاخلي فهد يدخلني واشوفه
هزاع: تحسبين الدنيا على كيفك ..اقول روقينا نبي نفطر
ام رياض بعصبيه:خلآص اسكتوا
بعد دقايق اتصل فهد على هزآع
هزآع: هلآ ابو راكآن عمرك طويل
فهد يضحك: اجل تتكلمون عني
هزاع: أي والله ندى ازعجتنا تبي تزور زوجتك وولدك مع امي
فهد: زين ..انا قريب من البيت بجي افطر عندكم واخذهم معي اذا رجعت
هزاع: الله يحيك بس اسرع شوي ترانا على فطورنا
فهد: غمض عين وفتح عين تلقاني قدامك ..مع السلامه
ام رياض: ويش فيه اخوك
هزاع:قريب من البيت بيجي يفطر عندنا
ام رياض: يالله هالولد ماشاف يوم حلو بحياته ..اكيد ماله نفس يجلس ببيته لحاله بدون زوجته
ندى: يكسر خاطري والله لآ أم تهتم فيه وزوجته تعبانه
ابو رياض:هو رجال ويش كبر يعرف يصرف نفسه واذا احتاج شي ماراح نقصر معه حتى لو بيجي يعيش عندنا هو الداخل وحنا الطالعين
ثوآني وألتفت لمصدر الصوت
فهد: ماتقصر يابوي ...السلام عليكم
الكل : وعليكم السلام
ام رياض:ياحي الله من جانا ..حياك يايمه
سلم على ابوه وبآس راسه قرب من خالته وباس وجه كفهآ وراسها:كيفك حالك ياخالتي
ام رياض:بخير دامك بخير ...بشرني عنك وعن مرتك
فهد سحب كرسي جنب هزاع وجلس:والله حالتها صعبه كل يوم تنتكس اكثر
ندى شهقت: ياقلبي عليها
أبو رياض: امس بديتوا الكيماوي زي ماقلت لي؟
فهد: أي والله وهذا اللي زآد تعبهآ اكثر
ام رياض:الله يقومها لك بالسلامه
فهد:آمييين الله يسمع منك ياخالتي
ندى: فهد ليش ماتسفرها برى اكيد علاجهم احسن
فهد ابتسم:كلهم نفس الشي هنا والا برى بيعطونها نفس العلاج ونفس العلميه نسويها هنا احسن
هزاع: الله يكون بعونك ...وولدك شخباره ؟
فهد ابتسم:الحمدلله بخير كبر شوي عنه اول
ندى بحماس: تكفى ودني له ميته على ما اشوفه
فهد :شوفي اعلمك من الحين نرحب بالمدح ولا نقبل بالنقد
ندى ترفع حاجبه: اجل ولدك ماهو حلو صح اعترف
فهد يضحك: بعيوني هو ازين طفل بالدنيا ...بس بعيونكم مدري
ندى:خلاص انا أبت لك في الأمر
ابو رياض: ههههههههههه ياويل راكان منك
ندى: شدعوى يبه شوفني ويش زيني بس اكيد ركوني يهبل اذا ابوه فهيدان وامه شوآقه ربي يشفيهآ
ابو رياض:وأنا أشهد
أم رياض: يمه فهد مد يدك وأفطر شوف وجهك كيف صاير أصفر
فهد أبتسم : والله اني ميت جوع
ندى: أجل كل والا تبي تتصور مع الاكل
هزآع ضربها على ظهرها بشويش: ياثقل دمك
ندى: مآهو أثقل منك
ببيت أبو مهآ
أتصلت على سحر تطمنهآ
سحر: طيب بصحي مهآ وأقولها
رغد:احتمآل نطلع مانجلس بالمستشفى
سحر: طيب يصير خير
رغد: مع السلامه
بعد مآقفلت من رغد مشت لغرفة مها وصحتها
مها: خليني اكمل نومتي
سحر: قومي ريم بالمستشفى
بعدت يدها عن عيونها وبصوت خايف: ويش فيها ؟
سحر:تعبانه ومآت اللي ببطنها
مها جلست بسرعه مآهي مصدقه اللي تسمعه:ويش قاعده تقولين ...أكيد تكذبين
سحر جلست على السرير المقابل لمها: والله مآ أكذب من بعد الفجر راحوا للمستشفى بس ماحبيت اصحيك واخرب نومتك
مها تدور جوالها: مين راح معهآ ؟
سحر: رغد وسيف معهآ ..تقول احتمال يطلعون
مها: ياحياتي عليها امس ماكان فيهآ شي أكيد عين وصابتهآ
سحر كشرت: استغفر الله ويش الخرافات هذي ..هذي حكمة رب العالمين بعدين ماتذكرين انتي اول صار معك نفس الشي
مها غمضت عيونها وهي تتذكر اسوء ايام حياتها: أستغفر الله العلي العظيم
سحر: بتقومين والا شلون ؟
مها تطالع الساعه: سديتي نفسي من على الصبح "نذكرت هنادي "ودي اتصل على هنادي خايفه عليها
سحر ابتسمت: لا تخافين عليها هنادي كبيره وتعرف تتصرف وتدبر أمورهآ
مها بحزن: لا والله اكثر وحده فينا ضايعه وماتعرف تتصرف هي هنادي بس مافي احد فينا فاهمها الا شوق الله يقومها بالسلامه
سحر: ياربي بنسوي مناحه الحين
مها طلعت جوالها: بتصل عليها واتطمن بعدين اكلم رغد
سحر تهز كتوفها بسلبيه: أتصلي خلينا نشوف اخبارها ولو بنزعجها من بدري
مها ضحكت واتصلت عليها وبعد رنين مطول وصلها رد هنادي
هنادي: صباح الخير
مها حطت سبيكر : صباح النور والسرور ...الف الف الف مبروك
هنادي: الله يبارك فيك
مها: بشريني عنك ويش مسويه في صبحيتك ؟
هنادي ببرود: عادي زي كل يوم
مها تضحك: معقوله زي كل يوم ؟
هنادي: ايه معقوله ونص .. المهم كيف بعد امس عسى ماتعبتوا ؟
مها: والله نص ونص بس عماتي وبناتهم ساعدونا فيهم الخير
هنادي: اخواتي كيفهم ؟
مها: كلهم بخير
هنادي: احتمال اجيكم اليوم
مها طلت بسحر اللي تاشر لها عشان تصرفها: لا حبيبتي ويش تبين فينا انبسطي مع زوجك واتمشوآ لآحقه على زياراتك لنا
هنادي بشك: تصرفين هآه؟
مها:لا مو قصدي بس انتي عروسه اركدي شوي واسمعي كلام زوجك مو من اول يوم ودني عند اهلي ويش بيقول عنك
هنادي: يخسي يقول شي انتم عزوتي والا هو بحريقه
مها: يؤؤؤ لايسمعك الحين ..خلاص بقفل قبل تجيبين لنفسك مشكله
هنادي تضحك:هههههههههههه يالخوآفه
مها:يالله انتبهي لنفسك والله الله بالسنع والزين
هنادي تسايرها: ايه هين
مها: والله اني غاسله يدي منك بس ويش اقول غير الله يهديك ..باي
هنادي تضحك:باي وسلمي على البقيه
مها: يوصل .."قفلت الخط وطالعت سحر
سحر: احس هنادي ماتبي باسل
مها عقدت حوآجبهآ بأستغراب من كلام سحر:ليش تقولين هالكلام؟
سحر: اممم حسيت من كلامها وتصرفاتها حتى لما كانت تروح للسوق بالعافيه تروح ولاهي مهتمه بالزواج من اساسه
مها: جاهله وصغيره بالعمر على هذي المسؤليه الزواج مو سهل زي ماتتخيلين
سحر:ادري انه مسؤليه بس تلميحات هنادي غريبه والدليل كلامها قبل شوي يأكد لي انها تكرهه وماتبيه
مها ميلت فمها: خلاص تزوجت وراحت بيت زوجها الله يسعدها وويوفقها معه
سحر: آآآمين
مها تغمز لها: الا انتي ويش اخبارك مع قيسك
سحر حمرت خدودها وردت بحياء: الحمدلله لي مده ماكلمته انشغلت بدراستي والامتحانات بعدين زواج هنادي
مها:الله يوفقكم ..انا ما أرتاح الا لما اشوف كل وحده فيكم مبسوطه وسعيده في حياتها
سحر رفعت عيونها لفوق: ياترى ويش ينتظرنا بالمستقبل ؟
مها وقفت: قومي قومي خشي المطبخ سوي فطور وانا بصلي واصحي رنومه واجيك
سحرضربت راسها: يوووه ماسويت قهوة ابوي
طلعت بسرعه وراحت للمطبخ تجهزت فطور لهم وقهوة ابو مها المعتاده
بعد مآ أنهت مكالمتهآ طلعت من الغرفه ..أندق باب الشقه
لف عليها: مين اللي جاي الحين ؟
هنادي: مدري قوم شوف ..تركته ورجعت للغرفه تدور شآحن لجوآلهآ ..سمعت صوت باسل يناديها طلعت للصاله وشآفت بيده باقة ورد كبيره وفخمه وألوآنهآ تأسر العين
هنادي بأعجآب: وآآآآآو تهبببل
باسل فتح الكرت وقرأ اللي فيه بصوت عالي: الف مبروك ..جمع الله بينكما على خير "روان"
هنادي قربت منه وسخبت ورده وشمتها: ياحياتي عليها
باسل سلمها الكرت والباقه:ذوقهآ رفيع
هنادي: ايه ذويقه فديتها
باسل: حطيها على الطاوله وتعالي جنبي
هنادي تتخصر: ليش ويش في؟
بآسل جلس ومد رجليه على الكنبه ورجع يديه ورى رقبته: وين تبين نسآفر ؟
هنادي :ماتفرق معي سافرنا وألا ماسافرنا
باسل ابتسم: معقوله ؟
هنادي بعدت رجوله وجلست: معقولتين بعد ..انا بودي بس ازور شوق واتطمن عليها
باسل : ابشري راح اوديك لها بس بعد مانرجع من السفر
هنادي:وانا مابي اسافر مايهمني السفر كثر ماتهمني راحتي وسعادتي بحياتي
باسل طالعها بنظرة تعجب: كلام حلو وعين العقل
هنادي :توك تدري اني عاقله ؟
باسل: والله تصرفاتك تشككني بعقلانيتك
هنادي كشرت: مخليه العقل لك يابو عقل ..المهم ترى أنآ ابيك توديني لشوق
باسل: طيب بوديك بس كمان ابي نسافر نتمشى مع بعض
هنادي تهز كتفها:انا عندي دراسه
باسل ابتسم بخبث: ومن قالك بتكملين هنا ...بأخذ أوراقك وتروحين معي لجده
هنادي فتحت عيونها على الأخير: من جدك تتكلم ؟
باسل يضحك:هو اصلا كم بقى على أجازة الصيف كم اسبوع بعد الأختبارات بتسحبين اوراقك وتحولين لجآمعه جده
هنادي بأعتراض: مستحيل انا ابي هنا جامعتي مريحتني
باسل طالعها بنظره غريبه: بالله مريحتك ؟
هنادي بقوه: ايه ومعي صديقاتي انت بتوديني لمكآن مآ اعرف به أحد لآصديقات ولا أهل
باسل: انا شغلي هنآك وبيتي قصر ويش كبره وألا عاجبتك هذي الشقه
هنادي بسخريه:يوووه نسيت انك ولد عز منت متعود على هذي العيشه
باسل:ايه مآني متعود وانتي لازم تتعودين على حياتي أنا
هنادي:مآهي هنآدي اللي تتغير عشآنك
بآسل أبتسم:حـــلــــو "احتد صوته" كلآمي هو اللي بيمشي رضيتي وألا مآرضيتي
هنادي:انا ماراح أترك المدينه واهلي اذا والله مصّر اننا نكمل مع بعض أمآ أذا انت ماتبي خلاص احسن حل الأنفصال
صرخ عليها بصوت حآد:تونآآآ ..بدري من أولهآ أنفصآل ؟ أجل ليش وآفقتي من ألاساس
هنادي تتخصر:أسئل نفسك لآ تسألني ..شوف ياباسل أذا تبيني تنفذ اللي ابيه
باسل مسكهآ بقوه مع ذرآعه:مآعآشت اللي تمشيني على كيفهآ ..بتروحين ورجلك فوق رقبتك ولاتخليني امنعك من دراستك
هنادي تألمت من مسكتهآ:أترك يدي أتركهآ
باسل: ياتتعدلين معي وألا بتشوفين شي ماعمرك شفتيه
هنادي سحبت بدهآ بقوه ونفخت عليه: ويش بشوف
بآسل: أنآ أوريك اللي بتشوفينه بس لآ تستعجلين "بنبرة أمر منتهيه " ومن اليوم جآمعه هنآ تحلمين فيهآ لو تموتين مآتكملين هنآ
هنادي انقهرت: نشوف مين اللي يضحك بالأخير
باسل بسخريه:نشوف ياهنآديووه
قآمت معصبه وسكرت باب الغرفه بقوه هزت أركآن البيت وصرخت بأعلى صوتهآ" الله يأخذك يآ حقققيير"
عصب من كلامهآ قآم وهو يعرج بشكل وآضح ونسى عكآزه طآيح ..فتح الباب بقوه شآفها جالسه على السرير تبكي
هنادي: ويش تبي في كلام نسيت تقوله ؟
بآسل تنهد حاول يتمالك نفسه حتى مآيعصب: انتي ويش يرضيك ترى جننتيني
هنادي: اللي ابيه انك تنقلع عن وجهي وتفكني هاللحظة
بآسل بنظرة أحتقار: عاجبك هذا الأسلوب اللي تكلميني فيه
هنادي بحقد: ويكثر عليك بعد
بآسل جلس على كرسي التسريحه :شوفي يابنت النآس من أولهآ بقولك تبين عزك وكرآمتك مآتنهآن تبلعين لسآنك هذآ اللي يبي له قص وألا بتشوفين أشكآل وألوآن الأهآنه ..ثاني شي حركآت الأطفال تبطلينهآ ترآك بالغه وبالعشرين يعني مآيحتآج افهمك ويش تسوين
هنادي تمسح دموعها: وويش بعد ؟
باسل:تحسسيني انك زوجه مو عدد زآد بحياتي بدون فايده
هنادي :وصل مسجك تقدر تتفضل برى ابي اكون لحالي
باسل قام وخلاها لحالها والف فكره تطري بباله
:::
:::
:::
وصلوآ المستشفى بعد زحمة الشوآرع يوم الجمعه
قربوآ من المكآن الذي تقطن فيه حآليا ..زآدت قبضتهآ على كف فهد
لف علي يدها وابتسم:ويش فيك ؟
ندى:خآيفه اني مآ أتحمل منظرها
ام رياض بتأفف:بتقلبينهآ بكآء خليك برى احسن
فهد: اذا بتدخلين لآزم تتحملين ومآ تبكين قدآمهآ ترى تتأثر بسرعه
ندى أخذت نفس طوويل وزفرته بحراره:خلاص بمسك نفسي
أم رياض: يالله ندخل ...سبقهآ فهد وأمهآ أمآ هي قربت بتردد لآخر لحظة
سمعت صوت فهد :لآ الحمدلله صايره أحسن وجهك منور
أم رياض:الحمدلله على سلامتك يابنتي قدآمك العافيه
شوق بصوت قريب للهمس:الله يسلمك
ام رياض جلست على الكرسي: طمنيني عنك عسآك أحسن
شوق هزت رآسهآ: زي ماتشوفين
فهد مسح على شعرهآ:وجهك يبشر بخير
شوق ابتسمت:الحمدلله
ام رياض تتلفت بالغرفه:وين ندى مآجآت
فهد رفع راسه وشآفه وآقفه عند الباب بدون ماتتحرك :ادخلي ويش فيك وآقفه
ندى أنصدمت من شكل شوق الشاحب الخالي من أي حيآه متمثله بجسد تفارقه الروح ..مشت بخطوات متثاقله وقربت من السرير تحآول تمنع دموعهآ ابتسمت بحبح ومدت يدها تصافحهآ
ندى: ماتشوفين شر"باستها على جبينهآ وبدآخلها تتألم على شكلهآ نحفت بشكل وآضح عظآمهآ يتحلفه الجلد الهزيل "
شوق بتعب وآضح عليهآ: مايجيك الشر
ندى: مبروك ركوني يتربي بأحضآنكم
شوق وفهد بصوت وآحد:آآميين
ام رياض:يمه شوق فهد يقول أنك مآ تأكلين
شوق: مالي نفس
فهد: هآوشيهآ ياخاله عجزت وانا احاول فيهآ شوفي كيف نحفانه
ندى تتأمل شكل شوق ونظرآت فهد الكسيره اللي ماتفارقهآ( يالله ماتخيلتهآ كذآ اسبوع وصارت بهالشكل ..يارب شآفهآ وعآفهآ)
ام رياض: لا يابنتي لازم تأكلين حتى الادويه يكون لها مفعول والا ماتبين تشفين ؟
شوق: ما أقدر أكل أي شي أحطه بفمي أرجعه قرفت عمري
فهد: مشكلتك عنيده
ام رياض: بتأكلين يعني بتأكلين أذا مو عشآننآ عشان ولدك اللي محتآجك
شوق نزلت دمعتهآ: إن شاء الله
فهد: ليه الدموع الحين
طلعت شهقه من صدرهآ ماقدرت تكبتهآ وتحآربهآ اكثر طلعت من عندهم بسرعه وعيونهم متعلقه فيها
فهد بعد عن شوق:بشوفهآ ورآجع لكم
شوق مسحت دمعتهآ وتبسمت: تبكي على حالتي ؟
أم رياض اللي تتحكم بنفسهآ لأبعد حد: لا يمه بس ندى دمعتها قريبه
شوق: ياحليلهآ ابيها ترجع عشان أسولف معها وتتأكد أني بخير
ام رياض: يرجعها فهد الحين
برى الغرفه
فهد: ويش قلنا قبل ندخل ؟
ندى تبكي وبصوت متقطع:ماتوقعتها كذا ..لودريت ماجيت
فهد جط يده على كتفها: هذآ أللي ربي كاتبه يالله مسحي دموعك وتعالي داخل
ندى :لا ماراح ارجع
فهد:وبعدين ؟!
ندى:خلني اشوف راكان بالأول وبعدين نرجع
فهد ابتسم لها: يالله طيب نروح نشوفه
ندى عدلت طرحتها ومشت مع فهد وهي ماتدل أي مكآن بالمستشفى بعد مآوصلوآ للحضآنه وقربوآ من رآكآن
ندى : ياناس عليه يجنن طالع على ابوه
فهد يضحك:بالله طالع علي؟
ندى: اممم تبي الصدق ماهي باينه ملامحه
فهد يقرصها بشويش:اجل لا تنصبين علي
:::
:::
:::
بعد العصر
رجعوآ لبيت أبو مهآ ..كآنت تعبانه جدآ ونفسيتهآ مُتعب أكثر
سيف:لاأوصيكم عليها أي شي تحتآجه كلموني
رغد: إن شاء الله
دلخت أغراض ريم ولحقتهم للغرفه ..لقت سحر تلحفهآ وتشربهآ مويه
سحر:لاتزعلين ريومتي خيره لكم
ريم:كنت متعلقه بحملي كثير
رغد: ربي يعوضكم بأحسن منه لاتحزنين
سمر تقفل كتابها: يالله عاد ريومه ابتسمي ماتسوى علينا نزعل ربنا كريم وبيرزقكم درزن عيال ودرزن بنات توك صغيره بتحملين وتولدين لين تقولين بس
رغد تضحك:ههههههههه خذوآ الحكمه من افوآه السفهآء
سمر كشرت :انا من السفهاء يالشينه
رغد: لا حشآك ..يالله سحر انتي ومها اهتموآ بريومه انا ميته تعب بكره وراي كرف ماهو طبيعي بنام عشان اصحى اذاكر واشوف ويش ينتظرني
سحر: خلاص اعتمدي علينا
سمر وقفت:انا بتصل على شهد أقولها عن اللي صار
سحر: بدري..كلمتهآ يمكن تجي المغرب
سمر رجعت جلست: الله يريحك كنت بأخذ لي مشوار على الفاضي
دخل ابو مهآ الغرفه بعد ما تنحنح
مهآ:حياك يبه تفضل
ابو مهآ:زآد فضلك يابنتي ..بشريني عنك ياريم
ريم وملامح الأرهاق والتعب مرتسمه على وجهها البريئ:الحمدلله بخير
ابو مهآ:يالله شدي حيلك هذا اللي ربي كاتبه لك
ريم:الحمدلله على كل حال
مها: على قول سمر العمر قدآمك
سحر وقفت وابتسمت: انا وسمر بنروح المطبخ عشان نجهز العشاء بدري
مهآ: خذوآ حسآب شهد معنآ
سمر: أنا بتصل عليهآ عشآن اتأكد أذا بتجي وألا لا ؟
أبو مها: يكون أحسن
بعد مآطلعوآ سمر وسحر بقى لحاله مع مها وريم
ابو مهآ:ما كلمتوا هنادي ؟
مهآ ابتسمت: الا كلمنآهآ مبسوطه مع باسل الله يتمم عليهم
ابو مهآ:إن شاء الله ...الا وين رغد ؟
ريم بصوت مُتعب:راحت تنام تعبت معي اليوم
ابو مها يطالع الساعه: يمديهآ نآمت وألا باقي ؟
مها: والله مدري يبه تبي اروح اشوفها اذا صآحيه؟
ابو مهآ وقف: لالا انا بروح اشوفهآ ..تركهم وأتجه لغرفة رغد
مهآ بشك: تتوقعين أبوي ويش عنده ؟..وجهه ماهو عاجبني احس ورآه سالفه
ريم تنهدت بتعب:كل خير بس انتي اتركي اللقافه عنك
مهآ ترفع حآجبهآ:والله غريبه ..اقول بروح اتصل على زوجي سفهته من يوم جيتكم وبكره بغييب عن الدوام بسبتك
ريم ابتسمت لها:أخلي سيف يجيب لك أجآزه ؟
دق باب غرفتهآ ووصله ردهآ
رغد:تفضل
فتح الباب وعلى شفايفه ابتسامه حنونه وبعيونه نظرة أبوه ...نزلت نظارتهآ وقفلت الكتآب بعد ماعدلت جلستهآ
رغد:نورت الغرفه يالغالي
أتسعت بسمته: الله لايحرمني منك يابنتي
رغد:تفضل يبه أجلس
ابو مهآ جلس ونظره جديه:رغد يبه انا بكلمك بموضوع المفروض أكلمك فيه من مده بس أنتي أدرى بالظروف اللي صارت لنآ
رغد استغربت نبرة ابوهآ ونظراته الجديه لها:خير يبه ويش هذآ الموضوع ؟
ابو مها: انتي أنخطبتي
رغد أنصدمت وشهقت بصوت عالي:شنوووووو؟!
ابو مهآ:أسمعي اللي بقوله زين وأنتي حره بالأختيار انا مآغصبت خوآتك اللي قبلك ولا راح أغصبك المهم عندي رضآك وموآفقتك
رغد بتنهي الموضوع :يبه انا رافضه الحين همي الوحيده دراستي ؟
ابو مها: يابنتي خليني أكمل كلامي الولد كلمني بنفسه وكلمتني أمه وحتى يوسف توسط له عندي
رغد فتحت عيونهآ على الأخير ماهي مستوعبه كلام أبوهآ: ويش دخل يوسف ؟
ابو مهآ:لأن هذآ صديقه وأسمه عبدالله ولد نآس وطيب بس عيبه أنه متزوج أرملة صديقه عشآن يربي عياله بعد مآوصآه عليهم
رغد بلعت ريقهآ وتمالكت نفسهآ ..حست بقوه تسري بجسمهآ أستغربت مبنعهآ:يبه أنـــآ رآفضه لايتعب نفسه وينتظر ردي ..وهذآ أنت قلتهآ متزوج ويش يبي فيني أنآ
ابو مها: الولد شاريك وامه كلمتني يبونك وزمآن خطبوك بس صارت لهم ظروف ومآتمت الخطبه
رغد:زمآآآن مآهو الحين ...انا مستحيل أتزوجه لآسباب أولهآ انه متزوج ثانيهآ انا صغيره وإن شاء الله بيجيني اللي أحسن منه (وثالثهآ سآمحني يابوي مآ أقدر أقوله )
ابو مهآ يحآول يقنعهآ: استخيري يمكن يتغير رآيك ماتدرين الخيره وين
رغد بحده: هذا الموضوع بالذات ماراح أستخير فيه مآبيه ولا أبي اتزوج بالمره عاجبتني حياتي هنآ
ابو مهآ بدأ يفقد الأمل: يعني خلآص هذآ الرد النهآئي ؟
رغد غمضت عيونهآ وأخذت نفس طويل:ايووه هذا ردي النهآئي
ابو مهآ وقف: الله يكتب لك اللي فيه الخير ويرزقك بأبن الحلال
رغد ابتسمت لأبوهآ: آآآمين يالغالي آآآميييين
طلع من عندهآ وتركهآ تسرح بعالم آخر من الأفكآر والأوهآم
{ رغد }
متى تتركني بحالي ياعبدالله وربي اني كرهتك ومليت منك كل هالسنين مآقدرت تنسيك اللي كآن ...مستحيل انسى اللي كآن بيننآ أبدآ ولآ رآح أنسى كذبك وخيآنتك لي ..بكل جراءه جاي تتكلم مع أبوي كأني الظالم وأنت المظلوم ..انت اخر شخص ممكن افكر فيه تبت من حبك حتى لو بقى في داخلي منه أثر أكتويت بألف نآر ونار بسببك
رجعت لكتابها متجاهله كل اللي صار بينها وبين ابوها ..بالرغم من كبت قلبها واحاسيسهآ الميته
:::
:::
:::
عند الثنائي المختلف
{ هنآدي & باسل }
رمت العطر من يدها وقفت تتأمل شكلها بالمرايا ..من صغرها ماتحب أي أضافات جماليه عليها مكتفيه بطبيعتها وملامحه الطفوليه التي تزيدها جمال ..يزيد ضيقها تقمصها لشخصيه تغايرها تماما
هنادي بتأفف:ياربي اكره هذي الخرايط اللي بوجهي "لفت عن يمينهآ ولاحظت قصر التنوره" أوووف يعني مايصير البس بجآمه أريح وأستر وأحسن بعد
دق جوآلهآ وفرحت لما شافت الرقم:هلا رونتي
روآن بنبرة وله:وحشششتيني مووووووت
هنادي ضحكة من قلب:وأنتي أكثر
روآن:كيف بعد الزوآج
هنآدي:طففففش
روآن:هههههههههه بدري على هذا الكلام
هنادي:ماني متعوده اكون لحالي دايم البيت مليان الحين ماغير راسي وراسه
روآن:بتتعودي مع الأيآم
هنآدي تذكرت: ثآنكس على الورد ياحلوو
روآن:عجبك؟
هنآدي: مررررره يكفي ألوآنه ترد الروح
روآن: انا متصله أتطمن عليك أخليك تشوفين زوجك لآيقول عني مآ أستحي
هنادي:ههههههه اوك أذا لقيت وقت أتصلت عليك
روآن:أوكِ لاتقطعيني
هنآدي:افا عليك قولي غير هذا الكلام
روآن:يالله باي حبي
هنآدي:بآآآي ..قفلت جوالهآ والقت النظره الأخيره على شكلهآ وطلعت من الغرفه ...شآفته متمدد على الكنبه بعشوآئيه ونآيم ..شكله هآدي ومنغمس تمآمآ بأحلآمه ,,جذبتهآ ملامحه السمرآويه قربت منه بشويش وحاولت مآتطلع أي صوت يزعجه ويصحيه
هنآدي( ياربي هذا له كم وجه كل يوم أشوف له شكل ..الظآهر من الكحل والبلاوي اللي علموني خواتي عليهآ خربت النظر عندي قمت أشوف اشكال والوآن ..أممم طيب الحين هذآ كيف أصحيه ؟!..وألا أخليه نآيم أحسن لآيغثني بكلامه )
أخذت الريموت تقلب بالقنوآت لكن حست بالملل لفت على جهته واستغربت هدوئه بالنوم باين عليه التعب ..وقفت قبال ولمسته مع كتفه وهزته بشويش
هنآدي:بآآسل ..بآآآسل قوووووم
ماحصلت رد منه زآدت بهزه وبدأ نبضهآ يزيد:بآآآآآآآســـل ...بآآآآآآســــــــــــــــل
لمست جبينه حرارته عآديه جلست جبنه وبخوف :بااسل ويش فيك ..رد علي
بآسل ببرود كآد يقتلها:ويش تبين ؟
هنادي بعدت شعره عن وجهه: أنت حي مآ مت ؟
باسل فتح عيونه يطالعهآ:لو كنت ميت تتوقعين أرد عليك ؟
هنادي عضت شفايفهآ بقهر كانت بتموت من الخوف وهو لآ يبالي حرك يده:كأنك مضيقه المكآن علي ؟
هنادي انقهرت وحطت يدهآ على خصرهآ:ويش قصدك ؟
بآسل ابتسم:ماقصدي شي بس شوفي المسآحه صغيره مره
هنآدي عناد فيه مآ بعدت وقلبت بعيونها:بالعكس وسيعه بس كل وآحد يحدد اللي ينآسب حجمه
باسل يرفع رجله: لو سمحتي بعدي عشان رجلي بمدها زين
هنادي تتكي وتتمدد بعناد: ماعليش عندك السرير روح تمدد وتبطح فيه على كيفك
باسل:طيب الحين جايه مصحيتني ليه ؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك