رواية غفلتي دفعتني حياتي -6
دقايق والكل في بيت أبو سعود.... الكل سلم على أم سعود وأبو سعود.... بعد دقايق دخل أبو رائد مع زوجته وعياله.... بعد ساعة مشى أبو نواف مع زوجته وعياله لبيت أهل عبير....
أبو نواف: نواف... ليه غيرت الثوب ولبست بدلة
نواف: رنا وريم قالوا لي ألبس بدلة
رنا: إيوه يبه عشان يصدقون أنه أجنبي
نواف: ما عليك يبه... إذا رجعنا لبست الثوب
دخل أبو نواف مع نواف لبيت أهل عبير.... حاطين كراسي وطاولات برة لأن الجو صاير حلو.... أنفجع نواف من الفسق اللي شافه.... عبير وأخواتها ما يتغطون من أقاربهم.... مشى ورا أبوه وهو يتاحشى يناظر اللي حوله.... سلم على أبو مساعد وأخوان عبير وعيال خوالها وعيال خالاتها....
جلس نواف جنب واحد من عمره.... وأبوه جالس مع الرجال.... قرب ولد صغير من نواف وقال: أنت ليش عيونك زرقا
ضحك نواف: ههههههه مثل عيون أمي
الولد: وينها أمك
نواف: أمي عند أهلها في بريطانيا
وقف نواف لما شاف أبوه وقف وقال: يللا يبه
أبو نواف: دقيقة أسلم على أم مساعد ونمشي
رجع نواف وجلس بعد ثواني شاف أبوه يأشره له يجي.... لكن نواف ما رضى.... توهق أبو نواف وقال لريم تروح تناديه....
قربت ريم وقالت: هااي نواف
رفع نواف رأسه وابتسم لما شاف ريم غيرت لبسها.... تنورة طويلة وبلوزة بكم طويل.... ولافه الحجاب على رأسها....
نواف: أهلين ريم
ريم: قوم يا بابا... جدتي تبي تسلم عليك
نواف: يا بنت ترا جدتك ما تقرب لي
ريم: قم بس قم ما راح تغازلك
قام نواف وهو مرتبك خصوصا وهو يسمع تعليقات البنات.... راح سلم على أم مساعد ووقف جنب أبوه اللي يسألها عن أحوالها....
التفت نواف لما سمع رنا تناديه: هلا رنا
رنا: تعال معنا
نواف: وين
رنا وهي تأشر بيدها: هناك
نواف: لاااا خليني مع أبوي أحسن
مسكت ريم يده وقالت: ما عليك... يللا تعال
مسكت رنا يده الثانية وسحبوه لين عند المسبح.... ناظر نواف اللي حوله طاولات فيها أكل أغلبها فاضيه.... بعض الشباب جالسين لحالهم والبنات لحالهم....
أشر على اثنين وقال: ريم ليه هذول جالسين لحالهم
ناظرت ريم وين ما أشر وقالت: اهاا هذول عيال خوالي ومخطوبين
جت رنا وهي تلهث.... رفعت رنا الناي وقالت: نواف ناظر ها الناي... خالي توه شاريه
خذه نواف وناظر فيه تذكر لما كان يعزف على الناي في ألمانيا.... بعفويه قرب الناي من فمه وهو يتذكر الأستاذة فيوليتا.... المدرسة الألمانية اللي كانت تعلمه.... تخيل كتاب النوتات قدامه والطلاب قباله....
عم السكوت المكان لما سمعوا صوت عزف ع الناي.... أبو نواف وعبير وريم ورنا كانوا مذهولين.... أول مرة يعرفون أنا نواف يعرف يعزف ع الناي.... نواف يعزف وهو مغمض عيونه وتمر عليه ذكريات قديمة.... سعود وزوجته جوانا والمدرسة فيوليتا....
فتح عيونه بعد ما انتهى من العزف.... تفاجا لما شاف اللي حوله اللي يصفق واللي يصفر.... عض شفايفه حتى ما يبتسم لأنه نسى نفسه.... التفت لأبوه وعبير وابتسم وهو يرفع كتوفه....
ريم وهي تصفق: فنااان والله أنك فنان... من متى تعرف تعزف عليه
نواف: من سنين... تعلمتها في ألمانيا
رنا: وأنا أقول هنا ما عندنا دروس على الآلات الموسيقية
نواف: هههههه تحلمين تدرسين موسيقى... - عطاها الناي وقال: رنووه خذي الناي ورجعيه مكانه
خذت رنا الناي وراحت لداخل....
ريم: نواف... جد قول من علمك تعزف
نواف: فيوليتا
ريم: ايش
نواف: أستاذة فيوليتا... مدرستي الألمانية يوم إني في ثاني أبتدائي هي اللي علمتني عليه
ريم: أجباري هو
نواف: لا أنا اخترته وبعدين أمي جوانا هي قالت لي لما سألتها
ريم: اهاا
سكت نواف لأن مر عليه ذكرى حزينة.... قال يغير الموضوع: أقول ريم... الحين أنتم تجلسون هنا على طول
ريم: لا... بعد ساعه ندخل والغدا يكون جاهز
رن جوال نواف: الوو
بعد الترجمه: مرحبا... أريد التحدث مع نواف
نواف: من المتحدث
ـ : أنا صديق قديم لنواف... هلا لي بالتحدث معه
استغرب نواف: أنا نواف... من المتحدث
ـ : ألم تعرفني يا نواف... أنا وليد
نواف: ههههههههه عمي وليد... وش أخبارك
وليد: بخير جعلك الخير شلونك أنت وشلون أبوك
نواف: الحمد لله... كل عام وأنت بخير
وليد: وأنت بصحة وسلامة
نواف: داق علي وتكلمني ألماني ليه
وليد: بغيت أتأكد من اللغه... عساك ما نسيتها
نواف: ولو كيف أنساها
وليد: عموما تجي معي ألمانيا
نواف: جد
وليد: أكيد... أنا حكيت مع أبوك من فترة وعلى أساس بعد العيد... كلمة وقلي وش رايه
نواف: اوكيه... أنا أقوله
وليد: أخليك الحين... سلام
ريم: نواف من هذا اللي حكيت معه ألماني
نواف: هذا وليد صديق عمي سعود الله يرحمه
ريم: الله يرحمه
رن جوال نواف وناظر فيه.... شاف أبوه يدق عليه، التفت حوله وشاف أبوه يأشر له يجي.... مشى مسافة والتفت لريم ورنا اللي واقفين مع مجموعة بنات....
رفع نواف يده وماسك جواله بإبهامة.... قال وهو مبتسم: بااي بنات
ريم ورنا وبعض البنات: باااااي
مشى نواف وهو يضحك.... فجاة رفع يده ومسح الدمعة الخاينة.... لأنه تذكر عمه سعود وحياته في ألمانيا.... ركب جنب أبوه في السيارة وهو ساكت.... ناظر النافذة وتنهد مشتاق لسعود ولجوانا ولألمانيا بكبرها.... حس بيد على يده والتفت لأبوه....
أبو نواف: نواف... قل الله يرحمه تراه محتاج لدعواتك
استغرب نواف كيف عرف أبوه أنه يفكر بسعود.... قال: يبه أبغى أروح ألمانيا... أبغى أشوف أمي جوانا
أبو نواف: من فتره كلمت وليد صديق أخوي... وعلى أساس بعد العيد
نواف بسرعة: عمي وليد دق علي من شوي وقالي
أبو نواف: اهاا... خلاص متى ما بيمشي بتروح معه... أنبسطت الحين
نواف: أكييييد
أبو نواف: اليوم عيد وسع صدرك... وما له داعي تكدر على نفسك
نواف: اوكيه
وصل نواف لأرض ألمانيا مع وليد.... وبعد ما راح عليهم يوم في النوم من التعب.... راح نواف مع وليد للقرية اللي كان ساكن فيها سعود....
نزل نواف من السيارة وناظر المكان وذكرياته ترجع له....
وليد: ها يا نواف... تعرف وين كان ساكن عمك
نواف: أكيد... عموما أنا بجلس عند جوانا ألين نرجع للسعودية
وليد: اوكيه على راحتك... انتبه لنفسك
ناظر نواف الأرض الخضراء اللي قباله.... رفع الكاميرا وصور الطبيعة اللي حوله.... مدد إيدينه وكأنه يطير، غمض عيونه والهواء يلعب في جسمه من كل جهة.... نفسه يركض في ها الأرض الواسعة.... لكن قلبه ما يسمح له....
فتح عيونه وناظر القرية من بعيد.... بيت جوانا بعد كم متر من القرية.... التفت لما سمع صوت عربة جاية ويجرها حصان.... جالس عليها رجال ومعه صناديق فاضية.... أشر له نواف ووقف الرجال حصانه....
نواف بعد الترجمة: مرحبا أيها الصديق
الرجال: أهلا... هل لي بخدمة
نواف: هلا لك أن توصلني إلى تلك القرية
ابتسم الرجال: لا بأس أركب
لما ركب نواف قال الرجال: يبدو أنك سائح... من أين أنت أيها الفتى
نواف" أخاف أقولك سعودي.. تقول أرهابي".... قال بكذب: أنا من بريطانيا... وفي الحقيقة لست سائحا بل جئت لزيارة أحد معارفي
الرجال وهو يحرك اللجام: منذ متى لم تزره
نواف: منذ عشرة أعوام أو أكثر
تفاجاء الرجال: عشرة أعوام؟؟
نواف: أجل... فلقد ربتني إمرأة ألمانية إلى أن اصبح عمري 8 سنوات... وبعدها جاء أبي وأخذني عنده
الرجال: شي مؤلم
نواف: صحيح لكنني لا عرف لماذا تركني والدي عندها... إذا كان سيأخذني منها في النهاية
الرجال: هل تعتقد بأنك سترى المرأة
نواف: اتمنى ذلك... فزوج المرأة قد مات منذ سنين وأظن أنها لن تغادر القرية
الرجال: اتمنى أن تلتقي بها
نواف: شكرا
وصلوا للقرية ونزل نواف بعد ما شكر الرجال.... مشى نواف وهو يناظر حوله.... هذي القرية نفس الكراتين اللي كان يتابعها في التلفزيون.... أغلب الناس واقفين عند بضاعتهم اللي معروضة على طاولات....
وقف نواف لما سمع صوت رجال يصرخ على بنت.... لأنها كانت تبي هوت دوق من اللي يبيعه.... وملابسها تدل أنا ما عندها فلوس....
قرب نواف من البياع وقال بعد الترجمة: هل لي بفطيرة لو سمحت
البياع: حسنا
رفع الهوت دوق وحطها ع الفطيرة.... حط عليها الخلطات ولفها بمنديل ومدها لنواف.... مد نواف فلوسه وأخذ الهوت دوق وهو منقرف منه.... راح للصغيرة ومده لها....
استغرب البنت: لي أنا
نواف: أجل... خذيه فإنه لذيذ... وفي خاطرة" يييييع "....
خذته البنت وقالت: شكرا
كمل نواف طريقه وهو يصور كل شي حوله.... حس بأحد يسحب بنطلونه.... نزل الكاميرا وناظر البنت اللي مدت له وردة....
قالت ببراءة: هل تشتري مني الأزهار
ابتسم نواف وقال: حسنا أريد كل ما لديك
أخذ كل الورد اللي في سلتها وعطها فلوس.... انبسطت البنت بالفلوس اللي عندها.... وركضت الين اختفت بالزحمة.... مشى نواف الين طلع من القرية وبعدها بكم متر وقف عند باب البيت اللي له فيه احلا الذكريات....
دق الجرس وفتح ولد الباب: نعم من تريد
ناظر نواف بالولد اللي عمره 8 سنين وقال: هل هذا منزل جوانا راسل
الولد: نعم أنه بيتها
نواف: هل لك أن تناديها
دخل الولد بعد ما صفق الباب بوجه نواف.... ثواني وطلت جوانا من الباب الشبكي.... وفتحته حتى تستوعب الولد اللي واقف وبيده ورد أحمر....
قالت بتردد: نـ.. نـوا..ف
ابتسم نواف وقال بعد الترجمة: كيف حالك يا أماه
ضمته جوانا وقالت بالفصحى: نواف... صغيري... - ونزلت دموعها.... مسكت ذراعه وهي تناظر هذا هو نفسه.... بعيونه الزرقا وشعره البني.... أنفه الطويل وفمه الصغير بس أنه كبر....
ابتسمت جوانا: لقد كبرت يا نواف وأصبحت رجلا
نواف: لن أستطع أنساك يا أماه... فقد أصبحت أبتاع الأزهار التي تحبينها
جوانا: تعال يا بني أدخل
دخل نواف وقبل ما يجلس مد لها الورد وقال: هذي لك
جوانا: أشكرك يا بني... عن إذنك سأحضر الزهرية
جابت الزهرية وبدت تنسق الورد فيها....
نواف: أماه من هذا الصغير
جوانا: أنه ابني محمد... فلقد تزوجت برجل مسلم وأسمه عثمان
نواف: هذا جيد فلقد تابعت حياتك
جوانا وهي جايه: الحمد لله... - جلست جنبه وقالت: بني لقد غيرت أسمي لأسم عربي... أسمي عائشة
ابتسم نواف وناظر حوله: لم يتغير المكان كثيرا... فمازال كما كان
عائشة: هذا صحيح... أعذرني يا نواف فقد أعطيت ابني محمد كل العابك
نواف: لا بأس فاليلعب بها كما يشاء
ظل نواف أسبوع عند جوانا لكن خاب ظنه.... لأن ألمانيا تغيرت بغياب عمه سعود.... بس أنبسط أنه شاف جوانا وكيف استقرت حياتها....
وصل السعودية مع وليد وناموا بفندق.... ولما ارتاحوا كل واحد رجع لأهله.... دخل نواف وشاف ريم ورنا جالسات بالصالة....
نواف: السلام عليكم
ريم ورنا: وعليكم السلام
ركضت له رنا وضمته.... ابتسم نواف وقال: لها الدرجة مشتاقه لي
رنا: إيوه... البيت بايخ بدونك ما فيه حد يتهاوش معي ويضربني
خربط شعرها: هههههههههههه جد أنك مهبولة
وقفت ريم ومدت يدها له: الحمد لله ع السلامة
صافحها نواف: الله يسلمك
جلس نواف وخواته حوله....
نواف: أجل وين خالتي وأبوي
ريم: أمي ف المستشفى... للأسف توفى الجنين
نواف: لا حول ولا قوة إلا بالله... أبوي معها صح
رنا: إيوه... نواف وش سويت في ألمانيا حلوة
نواف: هههههه هذي ألمانيا تقولين حلو ولا لا... عموما أنا صورة صور كثيرة... بس إن شاء الله المغرب آخذهم المحل عشان يظهرونها
بعد كم يوم....
نواف اللي كان يتمشى ف المجمع مع ربعه....
نواف: وش فيكم يا الشياب... بسرعة تعبتوا
خالد: إيوه والله تعب... احنا من ساعة ندور
جلس رائد: أنا بتسريح وإذا خلصتوا دقوا علي
بندر: وأنا بجلس شوي
نواف: بروح أشتري لي كم غرض وجاي... لا تتحركون
راح نواف وكان بيشتري له كم بدلة.... بس ما عجبه شي رجع لنفس المكان وما شاف أحد.... رفع جواله ودق على بندر....
بندر: الووو
نواف: هذا اللي بيموتون من التعب... وينكم
بندر: احنا عند محل { ..... }
نواف يلتفت حوله: وين بالضبط
بندر: تعال قدام وتشوفه
مشى نواف وهو يتلفت.... أما ربعه كانوا داخل محل ويناظرونه وهو يدورهم.... أنفجروا ضحك لما شافوه صدم بوحدة....
نواف اللي كان يدور ربعه.... أنفجع لما صدم في بنت وطاحت ع الأرض وأكياسها معها.... أرتبك نواف كيف يتفاهم مع ذا الأجنبية....
قال وهو مرتبك: سوري
بدا يجمع أغراضها وهو يسب نفسه.... وقفت أسماء وهي تناظر أخوها نواف.... شافت صور كثير له لكن الحين صار غير.... ابتسمت لما وقف ومد لها الكيس....
نواف وهو متوهق ما يعرف انجليزي أبدا.... قال: forgive me
مشى عنها بسرعة قبل ما تهذر معه انجليزي وجد يتوهق.... شاف ربعه من بعيد يضحكون.... وراح لهم....
نواف: كلوا تبن
بندر: خطير يا نواف خطير ههههههههه
رائد: كان جبت لنا الرقم
نواف: أي رقم أنت ووجهك... والله إني توهقت زين طلعت مني ها الكلمتين... - دخل يده بجيبه بياخذ الجوال وما لقاه.... ضرب جبهته بخفيف وقال: آآآف
رائد: وش فيك
التفت نواف لخيالها اللي راح: حطيت جوالي في كيسها
خالد: ههههههههههههه أحلى ترقيم والله
نواف: بروح آخذه هذا جوال مو هدية
تقدموا وشافوها تمشي وبيدها كيس....
نواف: كيف أقولها
بندر: كلمها ألماني
نواف: والله مو وقت مزحك
خالد: أنا عندي الحل... - طلع جواله ودق على نواف....
أسماء كانت تمشى ومو منتبه للشباب اللي يلحقونها.... سمعت صوت جوال يرن.... استغربت هي ما عندها جوال لأن أبوها وعدها إذا راحت ثالث ثانوي بيشتري لها واحد....
فتحت شنطتها يمكن جوال أخواتها من الرضاعة.... داخل شنطتها بالغلط لكن ما فيه أي جوال.... مشت شوي وهي متأكدة إنا الصوت من عندها.... انتبهت على نور في كيسها.... دخلت يدها ورفعت الجوال نوكيا N78....
ناظرت الشاشة بو الخل يتصل بك.... ناظرت حولها وشافت أربع شباب يتاهمسون ويناظرونها.... تقدم لها نواف وهو مبتسم بإرتباك....
ابتسمت أسماء لأخوها وهي تعطيه جواله.... خذ الجوال بدون ما ينطق بكلمة وراح لربعه....
مشت أسماء وراحت لأخواتها من الرضاعة.... وقالت: بنات تتوقعون من شفت
أختها غادة: من شفتي
أسماء: شفت أخوي نواف
غادة: جد
أسماء: إيوه والله... كان ودي أسلم عليه بس ما عرفني
سارة: وليه ما قلتي له أنك أخته
أسماء: فشلة كان مع أصحابه
يتبع...............
اليوم الثاني....
أبو نواف لما شاف ولده جالس بالصالة قال: نواف تجي معي
نواف: وين يبه
أبو نواف: دام عبير والبنات معزومين... تعال معي باخذك مشوار
ركب نواف مع أبوه السيارة ونواف يناظر الطريق وهو مستغرب.... المشوار أخذ منهم نص ساعة.... استغرب نواف من الحارة اللي وصلوا لها.... وقف أبو نواف سيارته عند بيت ونزل.... نزل نواف معه....
نواف: يبه هذا من بيته
أبو نواف: بيت ولد عمي أبو طارق
دق أبو نواف الجرس وفتح أبو طارق الباب....
أبو طارق: يا هلا والله أبو نواف... وأخيرا جيت أسماء من ساعة تنتظرك
أبو نواف: أنشغلت شوي... شلونك زياد
نواف استغرب" من أسماء اللي تنتظر أبوي.. لا يكون متزوج على عبير.. أحسن تستاهل يا رب تكون زوجته "....
أبو طارق: نحمده على كل حال... وأنت
أبو نواف: بخير... وهذاني جبت معي نواف اللي تبي تشوفه
أبو طارق: ما شاء الله نواف رجال
سلم نواف عليه: شلونك عمي
أبو طارق: الحمد لله... حياكم تفضلوا
أبو نواف: لااا... ما عليك أمر بس ناد لي أسومة أبغى أخذها معي
بعد دقايق طلعت أسماء.... ركضت لأبوها وضمته: بابا وأخيرا جيت
نواف ناظرها وانصدم هي نفسها البنت اللي صدم فيها بالمجمع من فترة....
أبو نواف: نواف هذي أختك أسماء... ها يا أسماء شفتي نواف
أسماء: ما عليك بابا تقابلنا في المجمع من يومين
أبو نواف: جد
أسماء: إيوه... - وحكت له اللي صار....
بعدها ركبوا السيارة وأسماء تسولف مع أبوها.... أما نواف فضل السكوت.... كملوا الطريق الين وصلوا عند البيت.... نزلت أسماء وهي عارفة الطريق.... أما نواف ناظر البيت وهو مستغرب....
نواف: من بيته هذا
أبو نواف: هذا بيت أمي
نواف: أمك؟؟
أبو نواف: نواف يمكن أنت ما تعرف... لكن أم سعود هي مرت أبوي
تفاجاء نواف: ايش
أبو نواف: إيوه هي مرت أبوي... وهذا بيت أمي وأخواني من أمي
فتح عمر الباب وقال: أسووومة... وأنا اقول منهو جاي لنا
ضمته أسماء: كيفك عمووو
عمر: أنا بخير... شلونك أنتي
أسماء: عااال العال... جده داخل
عمر: أكيد... بس مع مين أنتي جايه
أسماء: مع بابا سالم... لا وجا معه أخوي نواف
عمر: وينهم فيه
أشرت أسماء بيدها: ناظرهم عند السيارة... يللا بروح أسلم على جده
دخلت أسماء وسلمت على جدتها وعماتها.... تقدم عمر لأخوه وولد أخوه وقال: حيا الله سالم
سلم أبو نواف عليه: الله يحيك... شلونك عمر
عمر: الحمد لله... - سلم على نواف وقال: وأخيرا جيت يا شيخ
ابتسم نواف وما رد....
أبو نواف: شفته جالس بالبيت... قلت أجيبه معي
عمر: حياكم تفضلوا
دخلوا داخل والكل ينتظر يشوف نواف.... أستحى نواف لأن العيون عليه.... مشى ورا أبوه وسلم على جدته....
أم سالم: هلا يمه هلا بوليدي... شلونك يا يمه
أبو نواف: بخير جعلك الخير... شلونك أنتي
أم سالم: الحمد لله... وينه وليدي ما شفته
سلم نواف وباس رأسها وقال: وش أخبارك يمه
ضمته أم سالم: طيبه يا يمه... شلونك أنت عساك بخير
نواف: بخير ونعمه
أم سالم: وكيف عبير معك... إن شاء الله تعاملك زين
ناظر نواف أبوه وقال: إيووه
طلعت سلمى من المطبخ وقالت: سااالم
راحت له وضمته وباست رأسه.... هي متزوجه لكن أبو نواف يحل محل أبوها....
أبو نواف: شلونك سلمووه
سلمى: يوووه يا سالم... صرت أم وتقولي سلموه
أبو نواف: ههههههههه لأنك تذكريني برنا بنتي... والله أنها طالعه عليك
عمر: وليه ما جبتها معك
أبو نواف: هي وأمها معزومين
عمر: صحيح حتى نهلة راحت معهم
سلمى: ما شاء الله الصلاة ع النبي محمد... هذا نواف
أبو نواف: ايش رايك فيه
سلمى: نسخة من أمه... كأني أشوف مونيكا قبالي
ابتسم نواف" مونيكا؟؟ وأخيرا عرفت أسم أمي "....
أبو نواف: وين وعد
دخلت وعد اللي بالكلية: أنا هوووون... - سلمت على أخوها: كيفك أبيه سالم
ابتسم أبو نواف: الحمد لله... شلونك أنتي وش مسوية بالكلية
عمر: ياهووو سالم... وش فيك من تشوفنا تسأل عن الدراسة
أبو نواف: بعد أخواني وأخاف عليكم
عمر: من سنين تقول ها الكلام
ناظرت وعد بنواف: سالم هذا ولدك
أسماء: يجنن عمه... صح
وعد: من فترة كنا ف المجمع وشفته... قلت يا زين ها الأجنبي... ما دريت أنه ولد أخوي
أبو نواف وعارف تفكيرها: تبين صورته
وعد: أكيييييد... خلني أكشخ فيه عند البنات
الكل ضحك على وعد اللي مجلسها ما ينمل.... جلس أبو نواف مع عياله يسولف مع أمه وأخوانه.... بعد فتره دخلت نهلة وسلمت على أبو نواف ببرود وراحت فوق.... ما تبي تجلس مع أبو نواف وهو خان صديقة عمرها عبير....
أبو نواف: وش فيها نهلة... كلما جيت تسلم علي وتدخل وما أشوفها
أم سالم: عمر رح ناد أختك
عمر: اوكـ... - وما كمل كلمته لأن جواله رن وقال: روحي أنتي يا سلمى... عن أذنكم بروح أكلم ندوش
وعد: يللا قريب نفتك من عمور وندوش
أبو نواف: يمه إذا قاصرك شي عشان زواج عمر قولي لي
أم سالم: إن شاء الله
وقفت سلمى وقال أبو نواف: وين رايحة
سلمى: بروح لنهلة
وقف أبو نواف: أنا بروح أبي أعرف وش سالفتها
راح أبو نواف فوق وشافها جالسة بالصالة.... قرب وجلس جنبها، تنرفزت نهلة بس ما قالت شي....
أبو نواف: دام أنك مو مشغولة يا نهلة... ليه ما تجلسين معنا تحت
سفهته نهلة وهي تناظر المجلة....
أبو نواف بطولة بال: نهلة... كذا مرة أجي وأنتي تسلمين وتدخلين وما أشوفك... وش فيك علي
نهلة ساكته وما ردت....
رفع أبو نواف يده ولف وجهها له عشان تناظره وقال: أحاكيك أنا... وش فيك علي
رمت المجلة ووقفت وقالت: ما أبغى أكلمك... ولا أبغى أجلس معك يا خاين
راحت غرفة وعد وسكرت الباب.... أما أبو نواف ظل ثواني يستوعب.... كلمة خاين ما يسمعها إلا من عبير والحين قالتها أخته.... وقف وراح وراها....
دخل الغرفة وقال: وش تقصدين بالخاين
ما ردت عليه وهي معطته ظهرها....
قرب منها ومسك ذراعها ولفها لجهته وقال: وش تقصدين يا نهلة
نهلة مقهورة: إيوه أنت خاين... كيف تبيني أجلس معك وأنت تخون صديقة عمري عبير
أبو نواف يحس بالدوامة ترجع مرة ثانية.... قال: أي خيانة اللي تتكلمين عنها
نهلة: سالم أنا لما كنت أمدح عبير لأمي بوجودك... ما ظنيت أنك بتتعلق فيها وتقول لأمي تخطبها لك... صحيح فرحت لكن شهرين وقتلت فرحتي أنا وعبير
أبو نواف مقهور ما يدري وش السالفة: بعد أنتي تعرفين السالفة... قولي لي ليش عبير تظن إني خاين لييه
نهلة: بالله عليك وحدة تشوف زوجها يضم بنت غريبة وش بتفكر فيه
استغرب ابو نواف: متى
نهلة: تذكر العزيمة في بيت أبو مساعد... شفناك أنا وعبير واقف بتهوية بيتهم... شفناك تكلم بنت وبعدها رمت البنت نفسها عليك وضمتك وأنت تضحك
سكت أبو نواف وهو يتذكر ذاك اليوم.... أما نهلة كانت تشوف رد فعله.... التفتوا الأثنين لما سمعوا صوت صينية طاحت وتكسر ما عليها....
سلمى كانت جايه وبيدها صينية عليها كاسات عصير.... سمعت كلام أختها وطاحت الصينية من يدها لأنها متفاجاءة.... أبو نواف ناظر بسلمى وسلمى ناظرته.... لأن نهلة تتكلم عنهم....
قربت سلمى من اختها وقالت: نهلة... أأ..أنا اللي ضميت سالم
نهلة: ايش
سلمى: سالم ما خان عبير... أنا اللي ضميته
بدت سلمى تفهم أختها السالفة اللي صارت من سنين.... أما أبو نواف من هول الصدمة طلع من الغرفة.... جلس بالصالة اللي فوق وحط يده على جبهته.... وشريط حياته يمر عليه.... كيف زعلت عبير وكيف حاول يراضيها بدون فايدة.... إلى الآن تعايره بالخاين وهو ما يدري وش السالفة.... وف الآخر تقصد أخته سلمى....
جت نهلة له وقالت: سالم... سامحني يخوي ما توقعت أنها سلمى
ناظرها أبو نواف بعتب: دام أنك عارفه ليه ما قلتي لي... هانت عليك حالتي بعد ما تركت عبير بدون ما أعرف السبب
نهلة: هذي صديقتي يا سالم
أبو نواف: وأنا أخوك... حرام عليك يا نهلة 20 سنه وعبير إلى الآن تتهمني بالخاين... وأنا ما أعرف وش قصدها
جلست نهلة جنبه: سامحني يخوي... الله يخليك سامحني
ناظرها ثواني وتنهد وقال: حصل خير يا نهلة... بس الله يخليك لا تقولين لها أي شي... خليني أنا أتفاهم معها
نهلة وهي تمسح دموعها: طيب
وقف أبو نواف وقال: أنا رايح لها
نزل تحت وقال: يللا يمه أنا ماشي... تبين شي
أم سالم: يووه يا يمه منت متعشي معنا
أبو نواف: المرة الجايه... أخوي داق علي ومدري وش فيه
أم سالم: ف حفظ الله... تعال مرة ثانية
أبو نواف: إن شاء الله يمه... - التفت لعياله وقال: يللا يا عيال
وقف نواف أما أسماء قالت: لا بابا أبغى أجلس هنا
وعد: إيه سالم خلها تتعشى معنا
أبو نواف: طيب... عمر ما عليك أمر وصلها لبيت أبو طارق
عمر: اوكيه
استغربوا لأن العادة يترجونه عشان يرضى تجلس.... طلع أبو نواف مع نواف لسيارة.... نواف كان ساكت وهو يفكر بعماته الجدد.... أما أبو نواف كان تفكيره عند عبير وكيف يشرح لها الموضوع....
رن جوال نواف: هلا
ـ :......
نواف: لا أنا طالع مع أبوي
ـ :............
نواف: هذا احنا راجعين البيت
ـ :....................
نواف: لا انتظروني جاي
ـ :..........
نواف: اوكيه باي
وصلوا البيت نزل نواف وراح لربعه اللي ينتظرونه.... أما أبو نواف مشى وهو ما يدري وين بيروح فيه.... وكل تفكيره عند عبير، كيف هي مظلومة.... وأي وحدة بتفكر نفس تفكيرها....
وقف سيارته عند بيت ناس.... وسند رأسه لرتبت السيارة وغمض عيونه.... عشرين سنة وعبير تعايره بشي ماله ذنب فيه.... تتهمه بالخاين وهي الخاينه... وأشياء كثيرة تدور في باله....
بعد فترة رفع الجوال وشاف مكالمات لم يرد عليها..... كلها من عبير، ناظر ساعته 10 ونص.... من ساعتين وهو يفر الشوارع.... مشى ودق عليها....
أبو نواف: الوو
عبير: سالم وينك فيه
أبو نواف: كنت عند أمي
عبير: نهلة تقول أنك من ساعتين طالع
أبو نواف: درت الشوارع... عموما إذا تبين شي قولي لأني راجع البيت
عبير: لا
أبو نواف: يللا مع السلامة
وصل أبو نواف البيت وشاف رنا تتابع التلفزيون....
أبو نواف: نااانه وين أمك
رنا: ماما فوق وريم بغرفتها
راح أبو نواف لغرفته وشاف عبير جالسة ع الكرسي الهزاز....
قرب منها وقال: عبير ليه تقولين عني خاين واللي ضمتني هي أختي... ليه تنفرين مني وأنتي ما سمعتيني
سكتت عبير ثواني وقالت: طيب أنا بقولك كل شي من البداية... بس أجلس منيب ناقصة تجيك جلطة من اللي بتسمعه وأتوهق فيك
جلس أبو نواف بطرف السرير وقال: قولي أسمعك
وقفت عبير عن الهز وقالت: سالم... أنا أنفر منك لأن قلبي عند غيرك
وقف أبو نواف بصدمة: ايش؟؟
عبير: إذا تبي تفهم أجلس... لا توهقني فيك
جلس ودمه يفور لأنه مو يقدر يسوي شي.... مو مكفي اللي جالسة معه بالمجمع والحين طلع لها ثاني" حسبي الله عليك يا عبير ".... قال من بين أسنانه: ومن هو هذا
عبير مبسوطة لأن مبين إنا أبو نواف مقهور: يوسف الـ...
فتح عيونه وقال: أأ.. أبو ريم
وقفت عبير وقالت: إيوه تهاوشت معه وطلقني... رحت لأهلي وريم ما كملت الست شهور... بعد فترة جا حتى يرجعني بس لأني صغيرة... ما رضيت وطلبت الطلاق وهذا اللي صار... كنت أظن أنه ما راح يقدر يستغني عني... لكن بسبب أخواته الحسودات طلقني... لأني ما أعجبهم لا في لبسي ولا في شي ثاني
أبو نواف كان يسمع وهو مستغرب.... أول مرة عبير تتكلم عن زواجها الأولي....
عبير وهي واقفة عند الأوظه: بعد سنتين سمعت أنه تزوج وصار لغيري... وأنت تقدمت لي وما وافقت عليك الا عشان أقهره... ومثل ما توقعت رفع قضية حتى يأخذ ريم مني... لكن هو مو قد عايلة أبو مساعد... بهذلته الين تنازل عن بنته... تدري ليش
ما رد لكن عيونه تسأل....
ناظرت عبير بعيونه وقالت: لأني أحبه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك