رواية غرام وانتقام -40
طلع من غرفة عمه وهو كسير وخطواته ثقيله لقى نواف باستقابله
جاسم بصوت بكي عمي مات يا ليت نعجل بدفنه
تاثر نواف من شكله صديقه
كمل جاسم وين غرفة خالتي
نواف بحزن خالتك ماتت اول ماوصلت للمستشفى
جاسم وهو يبكي رفع جواله واتصل على فيصل
في بيت ام جاسم
كان فيصل يفطر بالصاله وامه عند الجوهره سمع صوت جواله رفع الجوال شاف رقم جاسم طالع بالسعه 11 الظهر
طلع للمجلس رفع الجوال على اذنه
فيصل هلا جاسم
انفجع من صوت جاسم وهو يبكي
فيصل برعب وش فيك تبكي وش صاير
جاسم وهو يشاهق تعال مستشفى نواف بسرعه وسكرت من غير لا ينتظر رد اخوه
طلع فيصل بسرعه من البيت وهو يدعي بقلبه ان يكون خير مع انه مستبعد الخير من بكاء اخوه وصل للمستشفى وقف بموقف خطا
دخل المستشفى سئل عن اخوه وقالو له عن قسم العنايه خاف وش يجيب اخوه بقسم العنايه بخطوات مسرعه وصل للقسم وانصدم من شكل جاسم ونواف
قرب منهم وقلبه بدت دقاته تسرع من الخوف يطالع بجاسم الي واضح انه منهار
فيصل برعب وشفيكم تبكون وش صاير
قرب منه نواف وضمه عمك وخالتك الله يرحمهم ماتو محروقين
انتفض جسم فيصل بحضن نواف وصار يبكي بعد لحظات رفع نفسه من حضن نواف
فيصل شلون بنوصل الخبر لجداتي وشلون بيتحملن
نواف لا تقولون لناس انهم محروقين قولو حادث سياره
جاسم جداتي لازم يجن الرياض ويحضرن عزاء عمي وخالتي
نواف نسيت هند وغاده لازم احد يقول لهن مهما كان ابوهن
جاسم بالم كانهن بيهتمن بوفاته بكلم خالد يقول لهند لانه عندها بالديره
التفت على اخوه فيصل انت روح الديره قول لجداتي وانا بقول لامي
تاكد فيصل ان جاسم يتهرب من الديره بسبب وجود هند فيها
فيصل بحزن بعد ما نخلص اجراءت الوفاة بطلع لديره وبجيبهن معي
نواف اتركو الجوهره لي بقول لها
جاسم وهو يبكي انا طالع للبيت تعال معي نواف ما قدر اقابل امي بشكلي هذا اخاف عليها تنهار وهي راعية ضغط وسكر
نواف لما نحلص الاجراءات اروح معك
في بريطانبا
في الجامعه
دخلت غاده وفهد الجامعه
فهد اذا خلصتي القاك بنفس المكان الي كنا فيه امس
غاده ا ن شا ء الله
مسكت غاده بيده وصلها للكلاس وكمل طريقه بيلحق على محاضرته بعد ساعه طلعت غاده من محاضرتها ورجعت لمكانها فهد جلست وكانت مشغول نظرها بالكتاب
سمعت صوت انثوي ناعم يكلمها رفعت عيونها شافت بنت جميله وناعمه كثير متحجبه ووجها خالي من المكياج وواضح انها منحرجه
البنت ممكن اجلس معك انا وحيده مالي صديقه بالجامعه ارتحت لك
غاده بابتسامه تفضلي انا جديده بالجامعه وخايفه من التعارف
البنت بابتسامه خجوله نفس حالتي صار موقف اول مادخلت الجامعه وبعدها صرت وحيده
غاده انا اسمي غاده الفهد من السعوديه من الرياض ثالث سنه طب اسنان
البنت انا ندى الفضل من السعوديه ومن الرياض لنا خمس سنوات هنا لان ابوي توظف سفير بابريطانيا وانا وحيدة اهلي وادرس ثالث سنه طب اسنان يعني معك
غاده تشرفت بمعرفتك واتمنى نصير صديقات لاني بصراحه ماعندي الا صديقة وحده وتركتها بالرياض واتمنى تصيرين بديله لها بابريطانيا
ندى ان شاء الله وش رايك نروح للكفتريا طلعت من البيت من غير فطور
غاده بحرج اسمحي لي ما قدر مواعده اخوي يلقاني هنا
ندى لك اخو بالجامعه هنا
غاده ايه يدرس علوم سياسيه سنه ثالث
فهد من بعيد لمح غاده تتكلم مع بنت ولما قرب وكشف هويتها فرح وبدا قلبه يدق بقوه
وصل لعندهم وقطع عليهم كلامهم
فهد وعيونه على ندى السلام
رفعت ندى نظرها لفهد وارتبكت وحست بحراره بجسمها وشعور حلو بوجوده
غاده هذا اخوي فهد الي قلت لك عنه
ندى تحاول تتصنع البرود سبق وتعرفنا على بعض بظروف سيئة
قامت ندى ما تبي نظراتها تفضحها قدام فهد
غاده وين ندى اجلسي معي
ندى مضطره اطلع للكفتريا تعالي معي وطالعت بفهد وكملت اذا سمح لك اخوك
فهد كان مركز معها خذيها معك على الاقل ادخل محاضرتي وانا مطمن عليها
فهد في نفسه يبعد هلي ما تدرين عندي يوم المنى تصيرين صديقه لغاده يمكن يتحقق الي ابيه
قامت غاده وهي حاسه ان فيه شي بين فهد اخوها وندى وجيهم كاشفتهم قررت لرجعت البيت تساله
غاده فهد بتلاقيني بالكفتريا
فهد بكون مع صلاح اذا خلصت محاضرتي جيتك
كملن طريقهن وتركن فهد لما شافهن بعدن جلس على الكرسي بمكان ندى وهو هيمان وعاشق
طلع تنهيده من قلبه من زمان عنها وشوفتها هزته هز
تذكر ذاك اليوم لما دخل الجامعه وشاف شباب يتحرشون فيها وهي تحاول تقاومهم وواحد مد يده على حجابها لما شاف الموقف قدامه صابه الجنون والغيره على بنت ديرته انطلق عليهم مثل الصاروخ وبسبب بنيته الرياضيه تمكن منهم اول ما شافت فهد انخشت ورا ظهره مستنجده فيه هددهم لو شافهم مره ثانيه بيقتلهم خافو منه ومن قوته انحاشو
التفت عليها يطمنها تطمني راحو مره ثانيه اجلسي بمكان فيه زحمه علشان محد يتجرء ويسوي شي
ندى بوجه احمر من الحياء مشكور على مساعدتك جيت بالوقت المناسب
فهد ما سويت الا الواجب
ندى بابتسامه اخذت قلب فهد ممكن تزورنا بالبيت
انتفض فهد من كلامه وبعصبيه انا انسان اخاف ربي ماني من الشباب الي تعرفينهم ماجي بنات بشقق او بيوت الظاهر فهمتي مساعدتي لك غلط
تفاجئ من عصبيتها وصار تنفسها سريع من الغضب
ندى بعصبية وبصراخ اشـــــرف منــــك ومن اشكـــالك وكلــــن يـــرى النـــاس بعيـــن طبعــــه لــو دققــــت بكــــلامي زيــــن كــــان سمعــــت انـــي قلــــت بيتنـــا مو شقــــه كنـــت ابيـــك تجـــي البيـــت ابي ابـــــوي يشكـــرك ردا لجميــــلك لكــــن منــــت بكفـــو انا بنت نــاس واخـــاف ربـــي قبـــل لا اعرفــــك
تركته من غير لا تسمع منه رد وهو حس بتانيب ضمير وصار يلعن تسرعه
ومن ذاك اليوم وهو يراقبها من بعيد خايف عليها تتعرض لنفس الموقف ولاحظ انها بنت محترمه واعجبه كثير اهتمام ابوها فيها يجيبها بنفسه ويرجعها بنفسه ما اشغله منصبه عن بنته من ذاك اليوم يحمل بقلبه حب كبير لهاما صار بينهم احتكاك او مقابله من بعد ذاك اليوم انبسط كثير لما شافها مع اخته
صحاه من تفكيره صوت صلاح
صلاح يالاخو لي ساعه اكلمك الي ما خذ عقلك يتهنى فيه
فهد بحزن يا ليتها تدري عن الي بقلبي
صلاح جلس بجنبه وش تخربط
فهد بحب شفتها وسمعت صوتها
صلاح بحماس شلون وكيف
فهد لقيتها جالسه مع غاده شكلها شايله علي من ذاك اليوم اول ما شافتني قامت وستاذنت يا ليتني اعتذرت لها لكن ماعندي شي اقوله لها
صلاح قوم خل الحب وخرابيطه انا جوعان اخر شي اكلته عشا البارح
قام فهد رايحين للكفتريا وصلوها وشاف صلاح غاده وانسحر من شكلها كل يوم احلى من اليوم الي قبله على ان وجهها خالي من المكياج والحجاب مغطي اغلب وجهها مع هذا جمالها مبهر
شاف طاوله قريبه منهم قرب منها وجلس مقابل غاده بيبي يمتع عيونه بشوفتها ويبي يطرب اذنه بصوتها
غاده تسولف مع ندى مانتبهت لهم
وهو قاط اذنه عندهم مع كل كلمه من غاده وضحكه يحس بحساس حلو يتغلغل بروحه يتمناها ما تسكت
صلاح في نفسه وش فيك يا صلاح لا تنهبل وتحبها هذي شكلها ما تبلعني كل شي فيها يخلي الواحد غصب يعجب وينبهر فيها
عند غاده وندى
ندى مدت لها المنيوم اطلبي عازمتك
غاده مدامك عازمتني اختاري على ذوقك
ندى اختارت لها ولغاده سندويشات مشكله مع عصير برتقال
ندى ياليت غاده تزوريني بالبيت تتعرفين على امي متاكده بتحبينها امي روحها شبابيه
غاده ان شاء الله لازم اخذ موافقة فهد ابي اغير جو
ندى انا بقوم اخذ لك اذن نطلع اليوم مع بعض ونمر البيت وترجعين اذا رجع فهد لانه ما يطلع الا العصر
استغربت غاده معرفتها بجدول اخوها تاكدت ان الي شاكه فيه صح
قامت ندى وهي مستحيه خايفه يفشلها فهد ويرفض
قربت من طاولتهم وركزت على فهد الي تفاجئ من قدومها وقلبه صار يدق بسرعه كان جالس ينتظر صلاح يجيب الطلب
ندى بصوت مرتبك وبحياء فهد اذا ما تمانع انا عازمه غاده تروح معي البيت واذا طلعت العصر من الجامعه مر عليها وخذها
فهد بارتباك مستغرب شلون عرفت انه يطلع العصر تاكد انها مهتمه فيه مثل ماهو مهتم فيها
فهد وعيونه عليها ماوده تغيب عن عيونه وانبسط كثير من التطور بعلاقتها مع غاده مستحيل يرفض هذا الي يتمناه
فهد بهيام ابشري خليها تروح معك والعصر بمرها لاني احاتي مابي اخليها وادخل محاضرتي
ندى بحياء اكثر وهي تبتسم ابتسامه ذبحت قلبه
ندى باحراج ودي اطلب طلب ثاني اخاف تفشلني
فهد بحب وصوته ذايب ماعاش من يفشلك
انحرجت من رده وتكلمت بارتباك انت جدولك متضارب لجدول غاد ه وهي معي بنفس الكلاس ونطلع مع بعض ابيها تطلع معي كل يوم نتغداء سوى وانت تستلمها من بيتنا
فهد ما نبي نضايقكم
ندى بابتسامه بالعكس ما تدري اش كثر فرحانه اني تعرفت عليها وكملت بحزن ماخفى عن فهد الي اوجعه قلبه
كملت بحزن تعرف انا وحيده اهلي ولا لي صديقات كان غاده طايحه لي من السماء تكفى لا تردني
فهد اوجعه قلبه من ترجيها خلاص لك حق فيها اكثر مني واعتبريها اختك
ندى مشكور
جت بتمشي سمعت صوت فهد ندى شلون عرفتي جدولي
انحرجت ولا ردت وكملت طريقها لطاولتهم
تاكد من الي في باله انها تحمل بقلبها مثل ما يحمله لها لازم يتقدم لها رسمي يخاف تطير
عند غاده
وصلت لها ندى وهي فرحانه جلست بكرسيها
ندى وهي تبتسم الحمدلله وافق وكل يوم بتروحين معي انا اوصلك
غاده مستغربه غريبه شلون قدرتي
ندى وهي تلعب باصابعه واضح عليها التوتر
ندى بتغير الموضوع وش رايك نطلع لسوق اليوم مدام طالعين بدري
غاده ياليت ميته اغير جو لكن خليها ليوم ثاني اليوم بتعرف على امك
ندى خلاص بكره
عند فهد
عيونه مافارقت طاولتهم سرح بتفكيره فيها وفي اهله بيوافقون يخطبونها له وهو ما تخرج خايف يرفضون او مايعجبهم اختياره يمكن معرفة غاده لها تكون بصفه
صلاح جلس وهو يشوف صديقه سرحان ناده مارد عليه حط يده قدام عيونه
صلاح يالاخو من الي ماخذ عقلك اكيد الي بطاولة الي قدامنا
فهد اصدر تنهيد اااااااه ياخوي جتني كلمتني وشعلت بقلبي نار كنت اضن الي فيني اعجاب طلع حب
صلاح باستغراب خير وش تبي فيك
فهد بهيام وذوبان فديتها تبي تريحني من غاده تبي هي الي توصلها كل يوم واليوم بتاخذها لبيتهم
تبيها تتعرف على امها
صلاح اللهم لك الحمد تكلم عدل وش فيك ذايب انتبه لا تذوب ولا اقدر اجمعك
فهد الله يبلاك بمثل ما بلاني
صلاح لما سمع هالكلمه عينه طارت لغاده الي جالسه قدامهم وهي مشغوله عنه
صلاح فال الله ولا فالك ياشيخ
في الرياض
بيت ام جاسم
بعد ماخلصو من الاجراءت كلهم ركبو بسياره فيصل والي يسوق نواف وجاسم جنب نواف وفيصل ورا لانهم منهارين دخلو البيت وكانت ام جاسم طالعه من المطبخ شافتهم تروعت من اشكالهم
ام جاسم بخوف وش فيكم وش صاير
كلهم نزلو عيونهم بالارض مايقدرون يتكلمون
قربت منهم قولو صبيتو عضامي وش صاير
قرب منها نواف وسحبها وجلسها على كنبه بالصاله
نواف ياعمه انتي مؤمنه بالقضاء والقدر وتعرفين ان كل شي مقدر ومكتوب
ام نواف بنفذ صبر قول وش صاير
نواف راشد وموضي سو حادث الله يرحمهم
ام جاسم بصبر انا لله وانا اليه راجعون
وصارت دموعها تنزل
استغربو من ردت فعل ام جاسم ظنو انها بتنهار لكن ايمانها قوها وقت المصيبه
ام جاسم وهي تمسح دموعها امي وخالتي درو
فيصل بصوت مبحوح من البكاء انا بروح اقولهم
ام جاسم كلنا بنروح لديره ناخذ عزاهم هناك
فيصل والجوهره تعبانه
ام جاسم ان شاء الله معليها شر اذا ماراحت معنا ترجع بيتها ام نواف مراح تقصر معها وانت يا نواف ادخل عند الجوهره وقول لها
نواف ان شاء الله عمتي
التفتت على جاسم وانت قلت لزوجتك
جاسم لا انتم اذا رحتو قولو لها مع جداتي
ام جاسم بزعل وش هالكلام يا جاسم انت الي بتقول لها وتصبرها
جاسم كانها بتهتم زين مسوت عيد يمكنها كانت تنتظر هالخبر من زمان
ام جاسم بصرخه جـــاسم بنت عمك لو احترقت وذاقت الظلم من ابوها بنت اصول ما تفرح بموت ابوها الحين تروح لها و بنلحقك
جاسم يلتفت على فيصل يبيه ينقذه من اصرار امه
جاسم يحاول يتهرب يمه عندي شغل ماخذت اجازه
ام جاسم بشك وش بينك وبين زوجتك من زمان مسافرت لديره مو من عوايدك قبل كل يومين وانت هناك قولي يا جاسم
جاسم بوجع طلقتها
ام جاسم بعصبيه انت صاحي اطلقها وهي ماكملت سنه حتى انت بتظلمها مثل ابوها ما فكرت بنظرت الناس
جاسم بحزن يالغاليه طلقتها مكره هي الي طلبته وانا حلفت مارفض لها طلب وهذا طلبها يمه ما ترضينها لولدك يغصب وحده عليه
ام جاسم هزت راسها لاوالله ما رضاها لك الله يهديها ويرزقك بالي تعرف قدرك
جاسم اعتصر قلبه من دعاء امه هو يبيها ولا يبي غيرها ما يتخيل وحده غيرها تكون زوجته وتكون ام عياله اذا ما كانت هند مستحيل تكون غيرها هي الوحيده الي اخذت عقله وملكت قلبه وروحه
ام جاسم بحزن موجع الله يصبرك يولدي وتنساها
طالع فيها جاسم مستغرب كيف امه كاشفته معقوله صار كتاب مفتوح الكل يقراه
ام جاسم الي قالبك وغير حالك حبك وعشقك لبنت عمك ادري كل ليل تسهر وتعاني بسبتها وخوك نفس حالتك مع اختها لا تحسبوني ما حس فيكم موجعني حالكم الله يقرب البعيد ويفرحكم ويحنن قلوبهن عليكم
جاسم من قلب امين
ام جاسم كلنا بعد دفن عمك بنروح لديره واولنا انت لان عزاهم بالديره عند امهاتهم
جاسم بيتهرب ما قدر
قاطعته ما نتظرته يكمل ام جاسم عزاء عمك بتحضره مو لازم تشوفها عندك ملحق الرياجيل خلك هناك استقبل المعزين
جاسم ان شاء الله اقولك من الحين بجلس ثلاث ايام العزاء وبعدها برجع
ام جاسم يصير خير
دخل نواف على الجوهره وقال لها عن وفاة عمها وخالتها ما تاثرت كثير لانهم مختفين من حياتها لكن غصب دموعها نزلت من خبر الوفاة المفاجئ خيرها نواف تجلس ولا تروح مع امها لديره اختارت تجلس خايفه على بنتها من تغير الجو
اخذ جاسم جواله وارسل رسائل لكل الي يعرفهم يخبرهم عن وفاة عمه وخالته علشان الدفن والصلاه عليه
بيت عبد الرحمن
كان جالس مع نوره يسولف سمع صوت رساله في جواله اخذ الجوال من على الطاولة شاف رساله من جاسم استغرب وش عنده خاف على هند رفع الجوال وفتح الرساله وانصدم شافت نوره زوجها مصنم وهو يقرا الرساله
نوره عسى خير وش فيها الرساله
عبدالرحمن منصدم ابو هند وزوجته ماتو
نوره بصدمه لا اله الا الله متى وشلون
عبدالرحمن مدري الدفن والصلاه بكره
نوره ان لله وانا اليه راجعون وانت بتحضر الصلاه والدفن ولا حقدك عليه بيمنعك من الاجر
عبدالرحمن خلاص ما يجوز على الميت الا الرحمه والحين بين ايدين ربه
نوره وهند من بيقول لها
عبدالرحمن خالد عندها واكيد جاسم بيرسل له واكيد بيحضر الصلاه
في الديره
هند اخذت العلاج من عمران ودخلت غرفتها واكلت العلاج ونامت
وخالد كان عند العمال من الصباح افطر عندهم وطلب لهم فطور حس بتعب قرر يطلع يريح فوق وبعدها ينزل
طلع دخل غرفته مالقى غاده عرف انها تحت عند الجدات لانها تنبسط عندهن
دخل الحمام ياخذ شور من تعب الشغل طلع لبس بجامته وانسدح على سريره سمع صوت رساله فتحها شاف خبر وفاة راشد وزوجته قام فتح الدولاب طلع ثوب وشماغ ونزل نادى الشغاله وطلب منها تنادي له غاده
جت غاده وهي مستغربه وش يبي فيها خالد
خالد غاده انا رايح الرياض وبصرف العمال يمكن اجي بكره بالليل
غاده بخوف وش صاير صاير لاهلك ولا اهلي شي
خالد ابو هند مات مع زوجته وبكره الصلاه والدفن لازم اكون موجود
غاده بصدمه شلون ماتو وهند منت بقايل لها
خالد هند بكره بتدري مع جداتها ذا احد سال عني قولي عنده شغل ضروري بالرياض اياني وياك تقولين شي لهند
غاده بحزن حاضر
طلع من عندهم ركب سيارته مسافر لرياض
في الديره
بيت ابو مطلق
مطلق بغرفته يجهز شنطته عنده امه وخواته والبنات يساعدنه وهن حزينات وفرحانات حزن على سفره اول مره يبعد عنهن وفرحانات انه توظف وظيفه حلوه وراتبه حلو بعد ما كان فاقد الامل مطلق لاحظ الحزن مرسوم على وجه امه وخواته
مطلق يمه اذا تبيني اجلس فداك مليون وظيفه ولا اشوف الحزن بعيونك
ام مطلق الله يوفقك وش تجلس ما صدقنا بالوظيفه
مطلق باس راسها يمه كلها اسبوع وجيبكم عندي
ام مطلق ما قدر اترك الديره
مطلق مشغل بيجيب خالتي هناك يرضيك يالغاليه انا اكون بديره وانتم بديره
ام مطلق قلت لبوك
مطلق ايه قلت له وهو ما يقدر يترك نياقه وانا وعدته اوفر لها مكان هناك وهو وافق
ام مطلق واخواتك الي مبسوطات بالدراسه
فزت فاطمه وتكلمت مطلق وعدنا ندرس هناك محو اميه ناخذ السنه سنتين يمه كل شي مطلق لقى له حل
ام مطلق الله يكتب الي فيه خيره
دخلت منيره عليهم يمه ابوي تحت جالس عند قهوته وانتم متجمعين هنا وتاركينه
نزلو كلهم لقى ابو مطلق جالس قدام القهوه
ابو مطلق بحب يابوك جهزت اغراضك لا تنسى شي
مطلق باس راسه كل شي جاهز يعز علي اسافر واتركم لكن انت على وعدك انكم تلحقوني
ابو مطلق اهم ماعندي نياقي دربي دربهم
مطلق بحب ما يطاوعني قلبي احرمك منها انا بدور لها مكان نظيف
ابو مطلق بحب ياجعلني مابكيك وافرح فيك واشوف عيالك بارين فيك مثل مانت بار فيني
مطلق سحب يد ابوه وباسها الي ابيه رضاك ودعواتك علشان اتوفق
ابو مطلق رفع يدينه لسماء يارب انك توفقه وتسهل طريقه وتجعل له بكل خطوه سلامه
الكل امين
في بيت عبد الرحمن
دخل محمد الصاله لقى امه وابوه جالسين ساكتين على غير عادتهم
محمد السلام
امه وابوه وعليكم السلام
قرب وباس راس امه وابوه وش فيك ساكتين
عبدالرحمن راشد وزوجته ماتو
محمد كان واقف من قو الخبر جلس على الكنب
محمد ان لله وانا اليه رجعون بناته درن بالخبر
عبدالرحمن جاسم بيقول لهند وانت الليله تسافر لغاده تقول لها لاني بغيت اتصل على فهد يقول لها اخاف لنهارت ينهار معها تعرف تعلقهم بعض
محمد الحين بطلع اجهز شنطتي وبسافر اخاف يجيهم الخبر عن طريق صلاح اخو نواف لازم الحق قبل لا يوصل الخبر لغاده
طلع فوق جهز شغلات خفيفه ياخذهم معه بعدها طلع للمطار
انتشر خبر وفاة راشد وزوجته وبيكون الصلاه عليهم بعد صلاة العشاء ( اكرام الميت دفنه )
بيت عبدالرحمن
دخل خالد الصاله لقى ابوه وامه جالسين قرب منهم باس راسهم
نوره ياهلا فيك وانا امك وينها غاده
خالد عند هند
عبدالرحمن انت وش الي جايبك
خالد الاجر ياب و خالد بتحضر الصلاة والدفن
عبدالرحمن اكيد الله يكتب لنا الاجر يله تراني جاهز يله نمشي انصلي العشاء ونلحق الصلاة عليه
خالد محمد وينه ماشوفه
عبدالرحمن سافر لغاده يقول لها
خالد زين سو
طلع مع ابوه يصلون العشاء بالمسجد القريب من المسجد الي بيصلى على راشد فيه
جاسم شايل عمه وهو متاثر كثير ومعه خالد ونواف وبسام وموضي شايلها فيصل نفس حال اخوه متاثر وشايلها معه ابو بسام وابو نواف
وعبدالرحمن
قليل الي حضرور جنازته وصلوهم لمثواهم الاخير ودخلوهم قبرهم وحثو عليهم التراب متجردين من اموالهم ما بقى لهم غير اعمالهم
بعد ماخلصو مراسيم الدفن كلن رجع لبيته
جاسم وفيصل وامهم بعد الدفن طلعو كلهم بسياره وحده الي يسوق جاسم و كان كاره روحته لديره لكنه استسلم لرغبة امه انهم يستقبلون عزاهم بالديره
عند خالد
طلع مع ابوه لبيتهم وصلو البيت لقو نوره مجهزه لهم العشاء
نوره بتنام هنا الليله ولا في بيتك
خالد بنام عندكم
عبدالرحمن متى ترجع الديره
خالد بعد بكره بالليل عندي كم شغله بالشركه اخلصهم وهند طلبت مني اكلم مرزوق علشان ولده وليد يتوظف بشركة الطايف ولازم يداوم هاليومين
عبدالرحمن زين سوت مرزوق يستاهل هو وعياله ماحتاجين ان ولدهم يتوظف يساعدهم من بعد عملية القلب وهند مارضت انه يشتغل ومشية راتبه وهو جالس بالبيت
في بريطانيا
طلعت غاده مع ندى من الجامعه الي وصلهم ابوها
ندى يبه هذي صديقتي غاده الفهد
ابوها يقرب لك عبد الرحمن الفهد
غاده بحياء ايه خالي
ابو ندى يا سبحان الله الدنيا صغير خالك صديقي وكنا جيران من بعد ما سافرت انقطعت عني اخباره يبوك عطيني رقمه
غاده فتحت على رقم خالها ومدت الجوال لابو ندى
غاده هذا رقم خالي
سجل عبدالله ابو ندى رقم جوال عبدالرحمن
وصلهم لبيته و كمل مشواره راجع لشغله دخلن البيت استقبلتهم امها الي واضح انها صغيره بالعمر الي يشوفها يقول اخت ندى رحبت فيها بحرار ندى كلمتها من الجامعه وقالت بتجي معها غاده
جلسن بالصاله وام ندى بالمطبخ مع الشغاله تجهز الغداء سوت لهم كبسه سعوديه ومقبلات وحلويات
حطت الاكل على الطاوله وجلست معهن
غاده تسلمين خالتي كانك تدرين اني مشتهية الكبسه فاتت فهد
ندى حمرت خدودها لما نذكر فهد وهي بقلبها تتمنى يكون معهم راحمته من اكل المطاعم
ام ندى جعله عافيه ولا يهمك الاكل كثير وبتاخذين معك اكل له
غاده استحت لا ما يحتاج يا خالتي
ام ندى انتي مثل بنتي وخوك مثل ولدي يا ليت تبطلين الحياء مني الاكل مطبوخ من غيرك ما تدرين اش كثر فرحتي ان ندى لقت لها صديقه وبتصيرين بنت ثانيه لي
جلسن ياكلن وام ندى تغصب على غاده تاكل بعد ماخلصن جلسن بالصاله سوالف ام ندى تركتهن لحالهم وصارت تجهز اكل فهد حطته بصواني تحفظ الحراره
الساعه اربع وصل فهد لبيت ندى كلم غاده وطلب منها تطلع له
طلعت ومعها الشغاله محمله بالاغرض حطتهم بالسياره من ورا ركبت غاده قدام ومشو لشقتهم
فهد التفت شاف الاغراض ما شاء الله وش كل هالاغراض
غاده ام ندى غصبتني اخذ غداء لك وتقول تعتبرك ولدها ابشرك
فهد قولي
غاده عمي ابو ندى طلع صديق ابوك من زمان
فهد فرحان كثير من التطورات والي بتساعده بزواجه من ندى
فهد وش غداكم
غاده بابتسامه مراح تصدق خلها مفاجئة تشوفها بالبيت اخاف توقف سيارتك وتاكل بالطريق
وصلو للبيت وشال الاغراض وهو متشوق يعرف وش الاكل لانه مل من اكل المطاعم
دخل الاغراض المطبخ وفتح الاكل وشافه كبسه اشتاق كثير للكبسه وكان الاكل كثير
فهد كانها داريه اني مشتاق للكبسه
غاده انا الي مالي الا يومين اشتقت لها كيف انت
فهد والله كريمه ام ندى مرسله كثير شكلي باخذ الاكل عند صلاح ونتغداء سوى
غاده حرام تلاقيه مثلك متلهف على الطبخ السعودي اطلع له انا بنام اذا جيت لا تصحيني
اخذ فهد الاكل وطلع من شقته وطق على شقة صلاح الي طلع له معصب
صلاح خير ما توقع انك اشتقت لي ماتخلي الواحد يرتاح
فهد الشرهة علي الي جايب غداي وقلت تشاركني فيه
صلاح شنو غداك
فهد بابتسامه جهز السفره مخليه مفاجئة
دخلو وبسط فهد السفره على الارض وحط الصواني جلس صلاح وفتح الصواني وتفاجئ بالكبسه
صلاح يرمش بعيونه بعدم تصديق انا بحلم ولا بعلم والي اشوفه صدق ان الي قدامي كبسه
فهد ههههههههه ايه ما طاوعني قلبي اكلهم لحالي قلت تشاركني
صلاح لو ماكلهم لحالك كان ذبحتك لا تقول ان اختك الي طابختهم
فهد جالس على السفره ههههههههه كثر منها غاده تطبخ كبسه
صلاح وهو يتربع على السفره اجل من الي مسوي اجر فينا
فهد وهو بدا ياكل فديتها خالتي ام ندى
صلاح ام حبيبت القلب لنا الله
فهد لا وازيدك من الشعر بيت طلع ابوها صديق ابوي
صلاح شكل البعيد بيقرب
فهد بحب ان شاء الله
صلاح غريبه وش ذكرهم فينا لنا ثلاث سنين نشفت بطونا من اكل المطاعم
فهد غاده كانت عندهم وهي الي جابته معها
صلاح على ذكر غاده اختك هي مرتبطه شي
فهد رفع حواجبه وش عندك يالاخو
صلاح بارتباك ودي اناسبك
فهد متفاجئ غاده ماره بتجربه ماضنتي بتوافق على الزواج الحين اذا متاكد من قرارك اجله بعد التخرج يمكن تغير فكرتها عن الزواج
صلاح ماني مستعجل لكن حبيت يكون عندك خبر هي تدرس وانا ادرس قلت اخطبها الحين والزواج بعد الدراسه
فهد بجديه لكل حادث حديث ولا تنصدم اذا رفضتك هذاني حطيت عندك خبر
صلاح اذا رفضتني مراح يتغير شي من علاقتنا انا خطبتها ابي نتقرب من بعض اكثر ويصير بينا نسب
فهد تغد برد الغدا مو وقت هالسوالف
كملو غداهم وصلاح من دخله منقهر ان غاده بترفضه وميت يعرف التجربه الي مرت فيها لكن استحى يسال فهد يمكن السالفه خاصه ومحرجه لصديقه فكر يكلم نواف يستشيره بخطبته لغاده وكيد نواف بيقوله كل شي عن غاده
في الديره
جاسم واهله وصلوا لديره على الساعه 12 دخلو بيت جداتهم شافو الكل نايم وجلست ام جاسم وعيالها بالصاله
عند هند
صحت هند من نومها وانصدمت لما شافت الساعه وحده بالليل فاتتها الصلوات قامت بسرعه توضت وهي تستغفر ربها اول مره تجمع صلواتها كله بسبب العلاج اكيد فيه نسبه منومه
بعد ما خلصت الصلاه لبست لبس بيتي بجامه فضفاضه البطلون احمر مقلم بالاسود والبلوزه احمر ساده ينزل لفخذها لبست شبشب فرو احمر وتركت شعرها مسدول مالها خلق تلمه
طلعت من غرفتها طقت على غرفة غاده ما سمعت رد تاكدت انها وخالد نايمين
نزلت تحت ولا انتبهت للي كان جالس بالصاله فيصل غض النظر وجاسم اشتعلت نيران العشق والوله والشوق والحرمان بقلبه شوفتها بعد الي صار فجرت مشاعره وبقوه
طلعت برا بتتاكد من شغل العمال
ام جاسم انا رايحه عندها وانتم ياليت تدخلون المجلس غلطكم جالسين بالصاله والبيت فيه بنات مو محارم لكم
قام جاسم مع فيصل ودخلو ملحق الرياجيل وجاسم تفكيره شارد عندها يفكر بردت فعلها لدرت عن ابوها
ام جاسم اطلعت ولحقت هند لقتها عند اسطبل الخيل
ام جاسم قربت منها وخافت انها تخاف طلعت صوت وهي تمشي التفتت شافت ام جاسم ركضت لها هند وضمتها
ام جاسم بحب كيفك يابنتي
هند الحمد الله انتي الي كيفك مفاجئة حلوه متى جيتي
ام جاسم الحمد لله انا بخير
مسكتها ام جاسم وقربتها بفرشه مبسوطه بالحوش وجلستها وجلست معها وللحين يدها ماسكه بيد هند
هند حست فيه شي مو طبيعي صاير واضح من شكل ام جاسم
هند بقوه خاله قولي وش الي جابكم لديره بهاليل اكيد شي قوي
ام جاسم ايه تعرفين يابنتي ان الموت حق علينا كلنا وكلنا بنموت اذا مو اليوم بكره
هند بتوتر وخوف الله يخليك قولي الي عندك تعرفيني قويه
ام جاسم اليوم ابوك وموضي سوو حادث وماتو وندفنو بعد صلاة العشاء
هند ما تكلمت لاحظت ام جاسم برودة يدها طالعت فيها شافتها مصنمه وعيونها مبققه شكلها كان يخوف
ام جاسم هزتها بقوه كانها صخره ما تتحرك صرخت بصوت عالي
ام جاسم جااااااااااااااااااسم الحق علي
جاسم سمع صرخت امه من غير شعور ركض لين وصل عندها تفاجى وانصدم من شكل هند
جاسم بخوف قلتي لها عن ابوها
ام جاسم وهي تبكي ايه ومن بعده وهي كذا الحق عليها لا تموت بين ايدينا
جاسم قرب يده لفمها تنفسها كان طبيعي حط يده على قلبها دقات قلبها منتظمه
جاسم يمه انا بطلعها فوق لغرفتها وبعطيها ابره مهدئة الي فيها صدمه من قو الخبر
شالها جاسم وراسها على قلبه وصل لغرفتها شافها مسكره دخل غرفته شم ريحتها ماليه الغرفه
سدحها على سريره وسكر عيونها ونزل تحت لسيارته بياخذ شنطته الي فيها عدته الطبيه
قابلته امه يولدي ما يجوز الي تسويه تراها ماهي حلالك
جاسم بقهر انا الحين دكتورها ولا تبيني اتركها تموت
اخذ شنطته وطلع فوق فحص عليها كل شي طبيعي عطاها ابره مهدئة قرر يطلع ويطلب من امه تجي عندها لان وجودها قدامه فوق احتماله ما يبي يتعلق فيها اكثر وهو مقرر انه ينساها قبل لا يطلع القى نظره اخيره وداعيه
جاسم في نفسه بالم ووجع شوفتك فوق احتمالي اااااااااااه من قلبي الي يخوني كل ماشفتك ااااااااه ياليت الكره بايدي كان زرعته بقلبي بدال الحب والعشق الي ماله علاج الا بموتي يمكن موتي يريحني من مرض العشق الي باليني
نزل تحت قابل امه الي كانت جالسه على نار بصاله
ام جاسم بشر عنها يولدي
جاسم بخير بكره بتصحى بكره ياليت تنامين عندها يمكن تحتاج شي
ام جاسم بحب وسع صدرك وان امك بنام عندها
طلع من عند امه كسير دخل المجلس كان فيصل ينتظره
فيصل ليش امي تصارخ
جاسم تنهد بعمق هند تعبت لما درت عن ابوها
فيصل باستغراب غريبه توقعت تفرح لمات
جاسم كنت نفسك ضنيت انها ما تهتم بوفاته انصدمت بانهيارها من الخبر
فيصل وش في حالتك منقلبه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك