رواية يمسح الدمعة بشكوى -11
عشر دقايق ورجع .. لاحظت عليه مايحرك يده اليمنى
عمر = يدك الى الحين تعورك ؟
جلس رايد على الكنبة بهدوء
رايد = شوي
قمت وجلست بجنبه وحطيت يدي على كتفه
عمر = هونها وتهون
يطالع الارض بحزن وساكت
عمر = رايد اسمعني زين ... ( التفتت للتلفون ورجعت التفت لرايد ) متى اخر مرة كلمت اختك الكبيرة على التلفون ؟
رايد بحزن = ماعمري كلمتها .. ( وتغير صوته ) هي يالله يالله تكلم خوالي
طيرت عيوني مستغرب بس سكتت ولا علقت
عمر = طيب كلمها الحين وخذ اخواتك واطلعوا على السيارة لاي مكان .. وتكلموا براحتكم
التفت رايد مستغرب
رايد = وشلون اخذهم .. عمي ماراح يسمح لهم
عمر = مب على كيفه .. انت اخوهم .. ماهن طلعات مع واحد غريب .. وماله حق يمنعك ... ( نزلت يدي عن كتفه ومسحت على ظهره ) انت مشكلتك ماعندك وسط .. يإما خايف من عمك مرة يأما بتخلص عليه مرة وحدة .. ماتعرف تواجه عمك بعقل ؟ خذ اخواتك لاي مكان وتكلموا وبعدها رجعهم للبيت .. فيها شي غلط هذي ؟
هز رايد راسه بلا و بيأس
رايد = انت مانت فاهم شي
عمر = فهمني طيب
رايد بضيق = مرة اختي الكبيرة بغت المستشفى .. قلت لها ابوديك بس هي خايفة من عمي .. تقول انت ماراح يجيك شي .. بس هي راح يضربونها اذا طلعت من دون علمهم
عمر = وليش تطلع من دون علمهم ؟
التفت رايد يطالعني مستغرب
رايد = وشلون اجل اخذها للمستشفى
عمر = اتصل على عمك بالتلفون وقل ياعم ابي اخذ فلانه للمستشفى .. و بس
رايد بصراخ = بعيي
عمر = وليه يعيي مب على كيفه .. اخت طالعه مع اخوها .. فيها شي ؟ مشكلتك انك خايف منه .. ابن امه يعيي ... وماله حق اصلا يعيي ..
سكتت رايد يفكر و سكتت انا .. الصراحة ابي اسأله ليه اخته الكبيرة تبي المستشفى بس خفت يعصب علي اذا سألت عن خصوصياتها .. لو دانه اقدر اسأله عنها بس اخته الكبيرة صعبة
ورفعت حواجبي لما تذكرت شي .. صح رايد قالي مرة يوم كنا بالاستراحة ان اخته مجنونة او حاجة زي كذا ... والحين يبي يوديها المستشفى .. لا يكون اخته الكبيرة مختلة عقليا
طالعت رايد ولقيته الى الحين متردد
عمر = يله اتصل عليهم الحين .. وقل بكرة ابي اخذ فلانه للمستشفى
التفتت رايد لي بخوف = وبيوافق ؟
تمللت منه
عمر بملل = ومن اليوم وش اقول ؟ اقولك ماله حق يوافق او مايوافق .. انت اخوها ... يله رح كلمهم
رايد بتردد = طيب وشلون اخدهم ماعندي سيارة
عمر = خذ سيارتي .. يله قم كلمهم
قام رايد وجلس على الكنبة القريبة من التلفون وحط التلفون بحظنه .. ورفع راسه كأنه يفكر
عمر = وش فيك ؟
رايد وهو يفكر = احاول اتذكر رقمهم
اخذ عشر دقايق ورايد يتصل وكل شوي يرد عليه رقم غلط ويرجع يحاول بارقام قريبة من رقمهم لين اخيرا جابه صح
رايد = الوووو .. هذا بيت ابو بندر ؟ ...... آآآ .. عطيني عمي ........ ايه انا رايد ......... عطيني عمي ابكلمه ...... لا الحين ابيه عطينيااه ........ تو الصلاة باقي عليها انا بس ابكلمه شوي ......... ( رفع رايد نظره لي وهمس يوجه كلامه لي ) الحين بيكلمني
هزيت راسي بايه اشجعه
فجأة ارتبك رايد والتلفون باذنه
رايد مرتبك = الووووو .. عمي انا رايد ( وسكت شوي يسمع كلام عمه ) انا مب صايع انت اللي طردتني يعني انت اللي صيعتني مب انا
هزيت راسي من اسلوب رايد بالكلام
رايد = ابي اخذ اخواتي بكرة ... ابي اخذهم بالسيارة .... ليه ... اباخذهم شوي وارجعهم .... مب على سيارتك بسيارة خويي ... ليه لا طيب ؟ ....... ( رفع نظره لي وبعدها نزل نظره للارض وهمس باسم اخته عشان ما اسمعه ) مريم تبي المستشفى ( ورجع صوته طبيعي ) وانا بوديها واباخذ دانه معنا
بغيت اضحك على اسلوبه .. انا شفت اسمها بكرت عايلتهم .. واعرف ان اسمها مريم .. الغبي وشوله يهمس باسمها عني خايف اعرف اسمها يعني ؟ .. شكله نسى انه عطاني كرت العايلة بنفسه .. صدق بزر .. يذكرني يوم كنا مراهين بالمتوسط كل واحد يتحدى الثاني باسم امه .. انا عرفت اسم ام فلان وانا عرفت اسم ام علان
انتبهت على صرخة رايد
رايد بصراخ = ليه لا طيب ليه لا ( وتغير صوته ) انت ليه معنا كذا وش سوينا لك
اشرت لرايد بيدي عشان يطالعني وهمست له
عمر = قل هن اخواتي واتحداك تمنعنا .. رايد خلك قوي
نزل رايد نظره للارض وعاد كلامي لعمه
رايد = هن اخواتي واتحداك تمنعنا ... ابجي بكرة واخذهم ... ( سكت شوي يسمع عمه وبعدها رفع صوته منقهر ) الا ابخذهم .. ( وتغير وجهه شوي ويبكي )
يوم شفته قرب يبكي .. اشرت له بيدي بسرعة يعني سكر بوجهه .. ما ابي عمه يعرف انه ضعيف وعلى طول يبكي
سكر رايد السماعة وطالعني وهو شوي ويبكي
رايد = عيااا
عمر بعصبية = وش فيك انت ... اقولك خلك قوي .. تقوم تبكي
رايد وهو يمش خشمه بيده = مابكيت
عمر = شوي وتبكي
لف رايد وجهه عني وسكت
عمر بتنهيدة = وش قال ؟
رد علي رايد وهو لاف وجهه عني
رايد = يقول انت صايع مابيك تاخذهم
عمر = ماعليك منه ... بكرة انا وانت نروح لحارة جدي تاخذ انت السيارة وتاخذ اخواتك وروحوا للمكان اللي تبون
التفت رايد بيأس
رايد = بس هو عيا
عمر = ماعليك منه اقول ... هن اخواتك وانت اخوهم .. انت بس كلم اختك وحددلها الوقت عشان تصير جاهزة
التفت رايد لي
رايد = وشلون اكلمها ماراح يعطوني اياها اكلمها
عمر = ماعندها جوال ؟
رايد = لا
سكتت افكر .. فجأة سمعت الجامع يذن للجمعة
عمر = نشوف بعدين وشلون تكلمها .. قم تروش
طاعني رايد و راح يتسبح .. ماطلبت منه يروح يتروش لله .. ابي أي شي يشغله عني عشان افتح البيبان الداخليه ولا يحس اني حابسه
استغليت غيابه ورحت افتح الباب الداخلي للحوش ... مدام اني عنده ماله داعي اقفل عليه ... اما اذا رحت للجامعة وقتها صح اقفل عليه وهو مايدري
طلعت للحوش ولقيت السكينة وعكازي طايحات بالارض على وضعهم البارح
اخذتهم ودخلت البيت .. تسبحت وطلعنا للجامع انا ورايد
الساعة 2 الظهر
جالسين بالارض انا ورايد ونتغدى وكالعادة غدا مطعم
ماد رجلي بسبب الجرح ورايد جالس بالارض مقابلني وياكل بشراهه .. وكل ماحط لقمة بفمه شكا من يده اليمنى
رايد بعد ماحط اللقمة بفمه = يدي تعورني
عمر وعيني على الصحن = احسن عشان مرة ثانية ماتفكر مثل تفكيرك امس
رايد = انت دفش تضرب بقوة
رفعت راسي له
عمر = والله مادري من اللي امس شوي و يقطعني شرايح لحم .. المهم ماعلينا .. اسمع .. وشلون الحين تكلم اختك الكبيرة تتجهز تطلعون بكرة بالسيارة ؟
رايد = يالله يالله كلمت عمي بالتلفون تبيني اكلمها هي .. مافيه الا اروح لها اليوم للبيت مثل دايم واقولها تتجهز بكرة
طيرت عيوني .. هه بعد جنونه امس بيدخل بيت عمه .. يحلم
عمر = تحلّم بس تحلّم .. روحه لبيت عمك انسى
رايد مستغرب = ليه وشلون اشوف اختي اجل ؟
عمر = وانا مقترح عليك تاخذهم بالسيارة ليه .. عشان تشوفهم بعيد عن عمك .. انت بعد خبالك امس .. انسى تدخل بيت عمك مرة ثانية .. تفهم ؟
رايد = ماني مسوي شي .. بس ابشوف اختي واقولها تطلع بكرة .. ابكلمها مثل العادة بالملحق وقت الظهر ... هم دايم بهالوقت يتغدون مايدرون عنا اننا بالملحق
اهااا عشان كذا مايروح لاخواته الا الظهر .. عشان وقت غداهم
تنهدت وسكتت شوي افكر
عمر بتفكير = امممم اسمع المغرب نروح لحارة جدي .. امس دانه ماطلعت تلعب بالشارع الا المغرب .. خذ ورقة واكتب لاختك الكبيرة وارسلها مع دانه
ابتسم رايد بفرح
رايد = صح .. فكرة
ابتسمت معجب بذكائي
عمر وانا نافخ صدري = طول عمري ذكي
خلصنا من الغدا وجلسنا على التلفزيون نتفرج وكل واحد معه بيبسيه
فجأة التفت رايد لي
رايد = صح عمر .. امس الساعة 10 بالليل جا نايف و طق جرس الباب وطوّل وهو يطق
التفتت لرايد منصدم
عمر = لا يكون فتحتله
رايد = لا انا مافتحت الباب .. بس رحت فوق لغرفتك اشوف منهو وشفته نايف
سكتت منقهر من نايف .. هذا الى الحين مانمسك
عمر = وش يحسب نفسه هذا .. اببلغ عليه ( واخذت جوالي )
رايد بخوف = لا لا لا .. تكفى لا تبلغ
التفت معصب من رايد هالخواف
عمر بعصبية = ياخي وش فيك خايف منه
رايد بخوف = قلتلك هددني بدانه
عمر بصراخ = تراك معطيه اكبر من حجمه ... ياخبل مايقدر يسوي شي .. اصلا راح ينمسك .. وش بيسوي وهو ممسوك
رايد = هو قال لا تحسب اذا بلغت علي اننا انتهينا ... يمكن يرسل احد .. وبعدين هو صح راح يمسكونه بس شهر شهرين و يطلع
سكتت .. صح كلامه ... اذا مسكته الهيئة شهر شهرين نقول خمس شهور وياخذون منه تعهد ويطلعونه ... صح ... نايف وسعد مشكلتهم ماهي كبيرة عشان ينسجنون سنه سنتين ... هم بس يشترون من العامل
نزلت جوالي على الطاولة الصغيرة وانا افكر بنايف وسعد
نقز رايد يوم سمعنا جرس الباب فجأة .. والتفت لي بخوف
رايد = اكيد هذا نايف
التفتت لرايد منصدم
عمر = اذكر القط يجيك ينط .. وش جابه الحين
رايد = انا ادري
نزلت البيبسي اللي بيدي وقمت
عمر = خلك هنا ابروح اشوف
رايد = بتفتحله ؟
مارديت عليه واخذت عكازي .. راح احتاج هالعكاز اكيد و طلعت للحوش .. وش يحسب نفسه هذا .. انا راح اربيه ... على باله اني مثل رايد خواف ... افتحله وافتح لابوه .. ويأنا ياهو
وفتحت باب الشارع معصب وكلي استعداد للهوشه والبكوس
فجأة شفت وجه مصعب قدامي
عمر مستغرب = مصعب ؟
ابتسم مصعب
مصعب بابتسامة = السلام عليكم .. جيت اشوف ضيفك
قطبت حواجبي .. ضيفي ؟
تذكرت اني علمت مصعب عن رايد ..
حط مصعب يده على صدري ووخرني عن طريقه ودخل الحوش متوجه داخل البيت
التفتت لمصعب
عمر = هيييييه انت على وين .. اظني الى الحين ماسمحتلك تدخل
التفت مصعب لي وابتسم بمرح
مصعب = يابن الحلال مابيننا رسميات ... وبعدين بيتك مافيه حريم .. عادي ادخل على طول .. ياخي مافيها شي
التفتت للباب وسكرته بقوة معصب .. مسكوها علي .. بيتك مافيه حريم بيتك مافيه حريم ... اخ يالقهر صاير بيتي سبيل لكل من هب ودب .. اول نايف والحين مصعب وقبلهم اغصبوني الشباب اسكن رايد عندي .. ليه .. لان بيتي مافيه حريم
صدق البيت اللي مافيه حريم يصير ماله هيبه .. يصير عش للي ماله عش
التفتت لمصعب
عمر بعصبية = حتى ولو مافيه حريم .. مالك حق تدرعم بهالشكل
ومشيت قدامه اعرج .. سمعت مصعب يكلمني وهو يمشي وراي
مصعب = طيب وش فيك معصب ...
دخلنا الصاله عند رايد
قام رايد منصدم يوم شاف مصعب ... واخذ شوي عشان يستوعب
مصعب بفرح = رايد عاش من شافك ... ( ولما شاف رايد واقف وفاهي ) وش فيك ماعرفتني ؟
ضحك رايد بفرح وراح لمصعب وسلم عليه
رايد = مصعب اشتقتلك والله ...
مصعب = ههههههه .. وينك يارجال ( والتفت لي ) اثرك ساكن مع ولد عمي وانا اخر من يعلم
جلست على الكنبة وقعدت اتفرج عليهم
واقفين بنص الصاله ..
رايد = مصعب دايم اتمنى اشوفك واشكرك على كل اللي سويته معي ... انت الوحيد اللي وقف معي لين امشي مرة ثانية على رجولي ..
مصعب = يارجال ماسوينا شي ... وينك اختفيت ؟ انا سمعت ان عمك طردك
نزل رايد راسه بحزن
رايد = ايه
عمر = بتظلون واقفين كذا
التفت مصعب لي وضحك ..
مصعب = ههههههههههه والله عمر اخر شي تخيلته رايد يسكن معك هههههههههه
وجا وجلس بجنبي على الكنبة
رفعت حواجبي وانا اطالعه .. على كل شي يضحك هذا .. الحمد الله والشكر
واحد على كل شي يصيح والثاني على كل شي يضحك
جا رايد وجلس على الطاولة الصغيرة قدامنا
رايد = مصعب .. انا من زمان اعرف ان عمر ولد عمك ...
قرب مصعب وجهه من رايد
مصعب = صح تعال .. وشلونها رجولك .. خلصت جلساتك بالمستشفى ؟
وقعدوا يتبادلون الاخبار بينهم .. وانا جالس واتسمع لهم ويوم خلصوا من بعض .. التفت مصعب لي ومد يده وحطها على الشاش اللي براسي
مصعب = وانت ماعلمتنا امس من وش هذا ؟
نزلت يده عني بضيق
عمر = لا تحشر خشمك واجد
شفت بطرف عيني مصعب يطالعني و ساكت وكأنه انجرح من معاملتي معه قدام رايد
قام رايد يوم شاف وضعنا ووجه كلامه لمصعب
رايد = آآآآ .. مصعب .. ابروح اسوي شاهي.. دقايق
وطلع من الصاله
اخذنا شوي وانا ومصعب ساكتين... انا اطالع التلفزيون وساكت .. ومصعب الى الحين يطالعني وساكت
فجأة همس لي مصعب بصوت خفيف
مصعب بهمس = عمر .. انت ليه معي كذا .؟
مارديت
مصعب = احاول اتقرب لك بس انت تبعد
مارديت
مصعب = يوم عرفت انك ضفيت هاليتيم عندك ... فرحت قلت والله عمر كبير بس يبي نتعرف عليه اكثر ... امس طوال الليل افكر فيك اقول لنفسي انا عارف ان ولد عمي طيب بس كثرة الهوشات بينا من يوم كنا صغار بعدتنا عن بعض
نزلت راسي وانا اسمعه
مصعب = مشكلتنا كبرنا والى الحين الهوشات بيننا
وسكت يحتريني اتكلم بس مارديت عليه
مصعب = صدقني عمر لو اشوف هالشاش براس اخوي معاذ والا سعود افزعله وماهي بعيدة يكون هذا اخر يوم بعمره ... ونفس الشي معاذ وسعود معي لو كنت انا المتضرر .. بس انت مين يفزعلك .. ماعندك اخو عضيد لك بهالدنيا ... وفوق هذا متكبر ومغرور على عيال عمك ... انا مستعد افزعلك على اللي ضربك واكون سندك بس انت بعدتني عنك والى الحين تبعدني عنك
همست بألم
عمر بهمس = ما احتاج لاحد .. من يوم طلعت على الدنيا مالي سند .. من يوم طلعت على الدنيا وانا وحيد .. من يوم كنا صغار لما نتهاوش اشوفك انت ومعاذ توقفون مع بعض وانا لحالي بينكم جت على هذي ( واشرت على الجرح براسي ) ... ما احتاج لك ولا لغيرك ... واللي ضربني اقدر اخذ حقي منه .. اتطمن ما احتاجك
مصعب = شفت يوم اقولك متكبر .. ماتصدقني
عمر = وفوق هذا اخذتوا امي الانسانة الوحيدة اللي ساكنه معي .. كأنـــ
انفعل مصعب وقاطعني بصراخ
مصعب بصراخ = اللي يسمعك يقول انا اللي ماخذها ... ابوي بغى حرمة ثانية وماشاف الا امك انسب وحدة له .. لا تتعذر بامك .. انت هذا اسلوبك معنا من قبل مايتزوجون امك وابوي
رفعت راسي اطالع التلفزيون وهمست
عمر = لا تطول صوتك علي ... شف اسلوب معاذ معي ثم تعال كلمني .. ( والتفتت له ) عمرك وقفت بوجه اخوك عشاني ؟
مصعب بتحدي = هذا انت قلتها اخوي
طالعته منجرح بس تكمتها بصدري ( والتفتت للتلفزيون ) صح معه حق اخوه .. انا وحيد واببقى طول عمري وحيد
مصعب = معاذ على الاقل مايغلط على احد وماهو مغرور مثلك
ابتسمت بسخرية
عمر = هه صح مايغلط .. لدرجة اني ما انقلبت بسيارتي ابد
مصعب = ذيك المرة كانت مزحة وماكان يقصد ... وفوق هذا انت حشرتني مع معاذ واخذت مكافئتي وانا مالي ذنب ( وسكت شوي ) عمر انا ولد عمك وامد يدي لك ومستعد افزعلك للي ضربك او لأي شي تبيه .. بس لا تردني
عمر = ماحتاجك
مصعب = عمر صف قلبك شوي
مارديت
مصعب بتنهيدة = ليه قلبك اسود
جيت ابرد عليه بس سكتت يوم شفت رايد يدخل علينا ومعه صينية الشاهي
* رايد *
نزلت الصينية على الطاولة الصغيرة ومسكت يدي اللي عورتني من شيلة الصينية والتفتت لعمر و مصعب .. سمعت صوت مصعب عالي وانا بالمطبخ بس ماميزت منه شي ... والحين سكتوا يوم شافوني ... احس الجو متكهرب بينهم
صبيت شاهي ومديته على عمر بس حرك يده يعني مابي
ومديته على مصعب واخذها
اعتدلت واقف محتار اروح عشان يكملون كلامهم والا اقعد ... انا اعرف ان عمر يكره عيال عمه .. بس وش اللي بينهم وليه .. مدري
طالعت عمر ولقيته منزل راسه ويلعب بالعكاز اللي راكزها على كتفه
اخيرا قررت اجلس عندهم عشان مصعب بس .. من زمان عنه .. صبيت لنفسي شاهي وجلست على كنبة مستقله عنهم
نزل مصعب الشاهي على الطاولة الصغيرة والتفت لي بابتسامة
مصعب = رايد من زمان وانت هنا ؟
هزيت راسي بلا وانا اشوف عمر الى الحين سرحان
رايد = لا .. ( وطالعت مصعب ) كنت باستراحة شباب بس صارت مشكلة بالاستراحة وجيت هنا مع عمر ( وابتسمت له ) مصعب انت جاي هنا صدفة والا انت عارف اني هنا ؟
التفت مصعب لعمر وبعدها التفت لي
مصعب = علمني امس عمر انك هنا ( وسكت شوي ) اقول رايد مين اللي فالق عمر براسه ... تعرفه انت ؟
التفت عمر لمصعب
عمر = ياهو انت حشري
مصعب = حشري احسن من مغرور ومتكبر ( والتفت لي يحتريني اجاوب )
ابتسمت معجب بمصعب .. الصراحة احبه اكثر من عمر
رايد = تهاوش مع نايف
قطب مصعب حواجبه مستغرب وعدل نظارته
مصعب مستغرب = مين نايف .. وليه ؟ اخاف ولد عمي هو الغلطان كعادته .. رايد تعرف سبب الهوشة انت ؟
التفت عمر للتلفزيون ووجه كلامه لمصعب
عمر = مالت عليك ... تقول ابفزعلك واخر شي تبي تحطني انا الغلطان
التفت مصعب لعمر وهمس
مصعب بهمس = انا ماقلت انك غلطان انا ابي اعرف سبب الهوشة بس
عمر وعينه على التلفزيون = اكرمني بسكوتك ما ابي منك شي
تدخلت بالكلام قبل يتهاوشون والصراحة ماعجبني اسلوب عمر مع مصعب
رايد = آآآآ .. نايف كان يبيني وعمر يبي يدافع عني وتهاوش مع نايف وطاح على الطاولة هذي ( واشرت على الطاولة الصغيرة ) .. بس
مصعب = كان يبيك انت ؟
رايد = ايه ... وعمر تهاوش مع نايف يدافع عني .. بس هذي كل السالفة
ابتسم مصعب والتفت باعجاب لعمر وسكت وهو يطالعه
بس عمر ماعبره ولا التفت له ... يطالع التلفزيون وساكت
مصعب بفرح = راعي فزعات ولد عمي ( والتفت لي بمرح ) هذي العناوين عطني التفاصيل
ضحكت مستانس ومعجب فيه .. يمزح ويضحك احسن من عمر اللي ماعمري شفته يمزح وفوق هذا دفش
و قبل ارد عليه .. التفت عمر لمصعب وصارخ بوجهه
عمر بصراخ = ياخي انت احد مسلطك علينا .. وش تفاصيله اللي تبي .. شفت رايد خلاص توكل على الله .. وبعدين ياهدر فيه احد يجي وقت القايلة .. ابي انام
تضايقت من اسلوب عمر مع مصعب ... ليه كذا ياعمر .. مصعب مايستاهل اللي يطرده بس سكتت ما اقدر اتدخل .. البيت بيت عمر مااقدر اقول شي
مصعب = رح فوق ونام .. ماحد منعك ( اخذ شاهيه وقام وجلس بالكنبة اللي بجنبي والتفت لي ) ما عليك منه .. علمني بكل السالفة
التفتت لعمر ولقيته يطالع مصعب وهو معصب .. ورجعت التفت لمصعب وعلمته عن نايف بكل شي .. انه يشري خمر من عامل وكان يرسلني وووووووو الى اخر شي .. يوم يطق نايف الباب علي امس وعمر ماهو موجود
مصعب مستغرب = امس جاك هنا بالبيت بعد ؟ .. يعني شكله مصر اللي اسمه نايف هذا ؟
رايد = ايه .. بس مادري وش يبي مني .. والله اني ماعلمت الهيئة بس هو عيا يصدق
التفت مصعب لعمر = نايف هذا يدرس معنا بالجامعة ؟
عمر بضيق وهو يطالع التلفزيون = خلك على جنب مالك دخل فيه
مصعب = يله عاد .. معنا بالجامعة والا لا ؟
التفت عمر معصب
عمر = ياهو انت نشبه ( وزفر بضيق ) ايه كان .. بس الحين مايجي عشان الهيئة ماتمسكه
مصعب = خلاص عطوني اسمه كامل وانا ابلغ عليه
شهقت وصحت بصوت عالي
رايد = لااااااااااا .. هو مهددني باختي دانه .. تكفى لا تبلغ عليه
وعلمته بكل شي
مصعب بعصبية = حقير .. اثره بعد يعرف اختك
قعدنا فترةو انا ومصعب نسولف ونتكلم
شفت عمر ينعس وهو جالس .. اخذ شوي وانسدح على الكنبة وهو متضايق
عمر = افففففففف هذا ماهو ناوي يروح ... ( والتفت لمصعب ) ودي انام ياهووووو .. توكل على الله رح
قرب مصعب راسه لي وهمس
مصعب = الله يعينك عليه .. وشلون متحمله انت
ضحكت بس ماعلقت
اخذنا شوي وانا ومصعب نكمل سواليف .. احيان عن نايف واحيان عن حقي اللي اخذه عمي واحيان وشلون اعتمد على نفسي وارجع لاخواتي
لين اذن العصر وحنا الى الحين نسولف
التفتنا لعمر ولقيناه متمدد على الكنبة و نايم
استغليت الفرصة وقربت لمصعب وهمست باذنه خايف من عمر يسمعني
رايد بهمس = مصعب لا يكون زعلت من اسلوب عمر ... تراه هو كذا دفش
تنهد مصعب وهو يطالع عمر
مصعب بهمس = انا اعرف انه يعاني من الوحدة بس مشكلته مغرور ومايحب الا نفسه
رايد = لا بالعكس هو طيب ..
مصعب = عجزت افهمه ( والتفت لي وقام ) المهم انا طالع
وصلته للحوش وعطاني رقم جواله بورقه وراح .. يقول اذا احتجتني او جاكم نايف اتصل علي
دخلت البيت وانا مستانس بزيارة مصعب .. ولقيت عمر الى الحين نايم
المغرب
طلعنا انا وعمر لحارة عمي .. وان شاء الله القى دانه تلعب بالشارع وارسل لمريم رساله معها مثل خطة عمر ... مدري ليه خايف من عمي ... ماراح يسمح لها تطلع معي
تنهدت متضايق .. اذا تذكرت كلام عمر تشجعت بس على طول يرجع لي الخوف مرة ثانية
على قولت عمر اخت واخوها طالعين مع بعض فيها شي ... سترك يارب
* الجزء الخامس عشر *
وصلنا الحارة وفرحت لما شفت دانه تلعب مع بنت صغيرة ما اعرفها
وقف عمر السيارة قدام بيت جده ونزلت
رايد = دااانه
التفتت لي دانه وجت تركض .. جلست لمستواها وضميتها .. والله من زمان عنها
شلتها ورحت لعمر اللي جالس بالسيارة ودانه لافه رجليها على خصري وتوزع قبلات على وجهي من حماسها
ركبت السيارة وانا اضحك عليها
رايد = ههههه دانه .. ( وحبيتها مع خدها مشتاق لها )
جلستها على حظني ودانه كل شوي تسأل وينك .. وليه ماتجي .. ومادري ايش
قاطعتها
رايد = وش تسوين برا ؟
دانه = العب
التفتت لعمر ولقيته متركي على بابه و عاقد يديه قدام صدره و يطالعنا مبتسم وساكت
رايد = ابكتب لاختي الحين .. معك ورقة وقلم ؟
التفت عمر للمرتبة الخلفية واخذ من دفاتر الجامعة واخذ قلمه ومدهم علي
عمر = خذ وعطني دانه
اخذت الدفتر و عطيته دانه وجلسها بحظنه
شقيت ورقة من الدفتر وبديت اكتب
( مريم انا رايد .. ابجي بكرة ونطلع انا وانتي ودانه بالسيارة ونروح للمستشفى .. اذكرك كنتي تعبانه .. وبعدها بنروح لاي مكان المهم نجلس مع بعض .. تجهزي بكرة ابي امرك الظهر الساعة .... )
وقعدت افكر صح الساعة كم يجي عمر من الجامعة .. التفتت لعمر اسأله ولقيته يدغدغ دانه وكل ماضحكت دانه ضحك هو
رايد = عمر ... بكرة متى تطلع من الجامعة ؟
التفت لي عمر
عمر = اممم الساعة 2
رايد بخيبة امل = الساعة 2 مايمدينا على المستشفى ...
سكت عمر وهو يطالعني مستغرب
عمر = مستشفى ؟ .. ليه وش فيها اختك بالضبط ..
سكتت ومارديت ... انا بنفسي مدري وش فيها .. اذكرها اخر مرة شفتها تشتكي من ظهرها وقالت ان لها موعد فايت
انتبهت على صوت عمر يغير السالفة وحسيته انحرج من سؤاله ... يقول لمصعب انه حشري وهو حشري مثله
عمر = آآآ ... اقدر اطلع الساعة 12 .. عادي اخر محاضرة عندي مو مهمة
نزلت نظري للرساله وكملت
(تجهزي بكرة ابي امرك الظهر الساعة 12 .. ردي علي بنفس الورقة وعطيها دانه ... وانا بالشارع احتري ردك )
صفطت الورقة واخذت دانه من عمر وجلستها بحظني وقعدت افهمها
رايد = دانه عطي الوقة هذي آآآآ ( والتفتت لعمر ولقيته يطالعنا .. قربت فمي من اذن دانه وهمست ) عطي الورقة هذي مريم ( وابعدت عنها بس سمعت ضحكت عمر والتفتت له مستغرب ) وش فيك تضحك ؟
عمر وهو ماسك ضحكته = لا ولا شي
استغربت وش فيه هذا .. التفتت لدانه مطنشه
رايد = لا يشوفها احد الورقة هذي .. ترا اذا شافها احد بيضربونك .. هااااه فهمتي
دانه بخوف = يضربوني ( وبرطمت )
رايد = ايه ( وقربت وجهي لوجهها ) عطيها بس مريم ... لا احد يشوفها معك
وخليتها توقف على ركبها وهي بحظني وحطيت الورقة بجيب بنطلونها البني
رايد = ومريم بتعطيك ورقة هاتيها لي ( وطالعت دانه شاك انها فهمت شي ) دانه فهمتي علي
هزت دانه راسها بايه
طلعتها من السيارة وراحت تركض داخل البيت
وجلسنا نحتري ... التفتت لعمر
رايد = عمر ما انت داخل بيت جدك ؟
عمر = لا
وجلسنا بالسايرة ساكتين
اخذت اكثر من ربع ساعة احتري على جمر ... ومتوتر
واخيرا طلعت لنا دانه تركض
فتحنا باب السيارة لها ودخلت من عندي واخذت الورقة منها اقرا رساله مريم
( احمد الله واشكره انك بخير والله ماانام الليل خايفة عليك
ياعمري ياخوي ما اقدر اطلع معك وش يفكني من عمي اذا رجعت تعبت منهم ابي اذا طلعت اطلع مرة وحدة ولا ارجع )
بغيت ابكي من رسالتها ... عصرت الورقة بيدي منقهر
ودي اطلعها واريحها منهم الحين بس كيييييف
انتبهت على صوت عمر
عمر = وش فيك ؟
التقتت لعمر ودانه بحظنه وانا اجاهد دمعتي ..
رايد بحزن = تقول خايفة من عمي اذا رجعت
عمر = مسوين جريمة انتم ؟ ياخي ذكرها انك اخوها شفها يمكن ناسية
نزلت نظري للورقة ومارديت على استهزاء عمر
عمر = اكتب لها وفهمها انك اتصلت على عمك امس وعطيته خبر وبعدين هي طالعه معك ماهو مع غريب
صح نسيت اقولها اني اتصلت على عمي
شقيت ورقة ثانية من دفتر عمر وبديت اكتب
( مريم انا امس اتصلت على عمي وقلت له اني ابي اخذك .. وبعدين انتي بتطلعين معي .. ( وتذكرت كلمة عمر وكتبت نفس الكلام لها ) اخت طالعة مع اخوها فيها شي .. ماعليكي منه .. اتحداه يسوي شي وهو عنده خبر اني ابمرك بكرة .. تجهزي بس بكرة ابي امرك الظهر الساعة 12 )
وعطيت الورقة دانه وراحت تركض داخل البيت
عشر دقايق وجت دانه واخذت الورقة منها اقرا رد مريم
( صح كلامك بس والله خايفة
طيب الشكوى لله عشانك بس ابطلع و ابي اخذ اخبارك ياخوي
بس رايد ابيك تآجل الطلعة انا عندي موعد بعد يومين وعمي ماهو فاضي يوديني
خل الطلعة بعد يومين )
التفت لعمر ولقيته منحني على دانه ويحبحبها
رايد = عمر خلاص بعد يومين بنطلع .. اختي عندها موعد بعد يومين
رفع عمر راسه من دانة والتفت لي
عمر = طيب اطلعوا بكرة وتمشوا وبعد يومين اطلعوا روحوا للمستشفى ( وحط يده علي يدي ) اكسر الخوف اللي بقلبك وقلب اخواتك ... اطلعوا وخلوا عمكم يفهم انكم مانتوا خايفين منه ... قو قلبك ياشيخ
طالعت عمر افكر بكلامه
اكسر الخوف .. صح ماعلينا من عمي .. ماحنا ماخذين منه شي .. السايرة سيارة عمر وماعلينا من احد
نزلت نظري و شقيت ورقة من دفتر عمر وكتبت
( طيب بكرة نطلع نتمشى ونشوف بعض .. وبعد يومين نطلع للمستشفى .. من زمان عنك وعن دانه .. من زمان ماجلسنا مع بعض ... لا تخلين عمي يسيطر علينا ... يكفي اللي اخذه منا ... خلينا نطلع بكرة العصر ونتمشى و بعد يومين نطلع لموعدك الظهر ... تكفين اطلعي معي انا بعد ابي اخذ اخبارك .. بالملحق ماناخذ راحتنا )
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك