رواية انوثة خيالية بالرغم من الملابس الرجالية -16
وائل : يا امي ..يقول عمتي بدريه راحت لاهلها ..وهو بيقعد مع اخته ...
سمر : قصدك عبير ...
وائل : اجل مين أخته ..شوق هنا مثلا .؟!....
سمر : لا بس مدري وش فيك ما تبغى تقول عبير ...
وائل "يطالعها بنظرات قويه ..": ايش تقصدي ...
سمر "خافت منه": لا لا ولا شي ...
ابو وائل : وش فيكم قلبتوا الموضوع ..الله يهديك يا سمر ...
سمر "بزعل": بابا انا ايش سويت ...دائما انتو مع وائل ...
وائل "يطالع فيها ويطلع لسانه لها": ...احسسسسسسسسن...
>>>>>>>>>>>>>>>
عمر يتصل بك
وائل : هههه ولد الحلال عند ذكره ....
الجده : عمر ..؟!..
وائل : ايه ...."يرد على الجوال".. هلا عمر ...كنا بسيرتك يا شيخ ..وينك .. ..
طال سكوت وائل...و وقف من على السفرة .. وتغيرت ملامحه ...وبعد عنهم...
الكل : يطالع في بعض وحاسين انه فيه شي ...
وائل "بصوت واطي .. ومخنوق من اللي يسمعه": ايششششش تقول انت ... وينها الحين ....
عمر "مرتبك ..": يا وائل ... اقول لك خليتها في مطعم على طريقي ... مدري وين أوديها خفت عليها ....
وائل "معصب": توك تخاف عليها .... وانت وينك ...
عمر : انا جالس احوس في الشوارع ان شاء الله اقدر افلت منهم ...بس أهم شي عبير لا يصير فيها شي ...
وائل "بسرعة اخذ مفتاح السيارة .. واشر لأهله بسرعة عشان لا يسألونه":.. انا رايح .. اتعشى مع عمر ..مع السلامه ..."طلع من البيت وراح لسيارته ... وعمر معاه على الجوال ..."....
عمر : هاه .. طلعت ...
وائل "معصب": ايه طلعت ... انت وين وهي وين ...بأي شارع ..
عمر : احنا .احنا ..كنا عند الفحيط اللي بالشمال ...
وائل : يالله يا عمر .... من جدك انت تروح بعبير أماكن مثل كذا ..كأني فهمت الموضوع ..عبير طالعه بثوب هاه...
عمر :ايه ...طالعه بثوب وشماغ ...... وائل ...السيارات ....ضيعت نصها الحمدلله ...
وائل : كم سيارة وراك ...
عمر :ههههههه والله مدري بس كثير ...
وائل "معصب": وتضحك بعد ....والله انت وهي ما راح تسلموا مني فاهمين ...والله راح تتعاقبوا .... قول لي وين المطعم اللي نزلت عبير فيه ...ايش اسمه ...
عمر : تصدق مدري بس هو مطعم ..اممممممممم... دقيقه بدق عليها ...
وائل : هي جوالها معاها ؟!
عمر : ايه ....بدق عليها باقول لها تدق عليك ...
وائل : خلاص انا بكلمها ...
عمر : تعرف رقمها ؟!!!!
وائل "متضايق ما حب يجاوبه ": مع السلامة ..
وائل "وقف عند الاشارة ": كم كم رقمك يا عبير ... ايوا ا ا ..."يضغط على الأرقام ..وهو يتذكرها وهي تنقله في المزرعة.. غصب عنه ابتسم"...
عبير .... في المطعم .. دخلت قسم العوائل ... ولما شافت عائله طلعت من الطاولة تبعهم جلست مكانهم بسرعة ...قبل لا يجي تبع النظافة ويشيل أكلهم ...حتى تضمن ما احد يدخل عليها .. جلست هي ترجف ..
عبير "وهي تبكي": يارب سلم عمر من شرهم يارب ...كله مني انا السبب ...
>>>>>>>>>>
(رقم مميز) يتصل بك
عبير "تطالع في الرقم .. مشبهه عليه":..يمكن عمر يتصل علي من جوال ثاني ..او ...برد .."فتحت الجوال .. وبصوت واطي"..الو..
وائل "دق قلبه ..وغمض عينه بقوه": عبير ...انا وائل ...انتي وينك ...
عبير "بس سمعت صوته وتأكدت انه وائل ...بكت وبصوت حزين": وائل ..تكفى الحق على عمر .. مدري ايش بيسوون فيه ..
وائل "تأثر من صوتها": عبير ..اهدي عمر بخير ... وهو اللي اتصل علي عشان أرجعك البيت ...بس قولي لي انتي وين بالضبط ...
عبير : انا ...انا مدري ...بمطعم ...
وائل : ايه ادري انك بمطعم ...طيب شوفي ما راح تلاقي منيو ..او ..او اسألي بالضبط انتي وين ..او اسم الشارع على الاقل ...
عبير "كانها توها استوعبت ": ايه ايه ... دقيقه ...ايه لقيت المنيو ...خذ العنوان ..........xxxxxxxx...........
وائل : طيب ..خلاص عرفته ...انتي بقسم الرجال ..؟.
عبير : لاا ا ا ا...انا بقسم العوائل ...
وائل : يالله انا قريب...دقايق وأكون عندك ....
عبير "بارتياح": طيب...
وائل .. وصل للمطعم ودخل قسم العوائل ..بس ما لمح عبير ولا احد يشبهها ... دق عليها ..وقالت له رقم الجلسة اللي هي فيه ..
دخل وائل عليها الجلسه ... وهو معصب كثير منها ومن عمر ....وكان ناوي يسمعها كلام ..عشان تتوب من اللي تسويه ...
وائل "دخل عليها في الجلسة .. وجت عينه في عينها .. وراح كل الغضب اللي بداخله.. وقف لثواني يطالع فيها .. وتحول لشوق ولهفه وخوف عليها..": عبير ... انتي بخير ....
عبير "فزت بسرعه ": وائل ..وين عمر ....
وائل "يا ا ا ا ه قد ايش اشتقت لك يا عبير ..نفس الثوب ونفس الشماغ ..": لا تخافين عمر بخير ..
عبير : ادق عليه ما يرد ليه ....
وائل "ابتسم ..يطمنها": مشغول يشتت السيارات اللي وراه...
عبير : كله مني .."وبكت"...توبة ...توبة أعيدها مره ثانيه .. توبه ...
وائل "مبسوط انه معاها..حب يخفف عنها ويغير الموضوع لان دموعها تخليه يضعف .. .. طالع في الطاولة ." : كل هذا الأكل أكلتيه لوحدك..؟!!
عبير"تمسح دموعها ": لا وين أكله .. ما طلبت ولا أكلت ...
وائل "بحماس": ايش رأيك نطلب شي وناكل ...
عبير : لا لا ..ما راح اقدر اكل وعمر ما سمعت صوته ...
وائل "اخذ الجوال .. وكلم عمر وفتح الاسبيكر": عمر ...كلم عبير ..عشان تطمن ...
عمر : هلا وائل ...طيب طيب...عبير ..ههههههههه ...دوختهم يا عبير ...
عبير "قربت من وائل .. وهي تعدل لطمتها ": ايوا يا عمر .. كيفك ..ليه ما ترد على اتصالاتي ....
عمر : معليش كنت مشغول ...بس انا عارف ان وائل وصل عندك عشان كذا تطمنت ...
وائل "قربي أكثر يا عبير والله اشتقت لك ولريحتك ":...قربي عشان يسمعك مضبوط ...
عبير "تطالع في الجوال ومو منتبه قد ايش قربت من وائل ..": طيب وينك الحين ...بترجع البيت ..والا بتتاخر ....
عمر : اذا قدرت باوقف سيارتي في أي مكان وباخليكم تمروا علي ...ايش رايك يا وائل ...
وائل "مو منتبه للكلام ..مركز على عبير ..يتأملها"..
عبير"لما حست ان وائل ما رد عليه ..رفعت عينها .. شافت وائل يطالعها بنظرات .. ارتبكت ..وحمر وجهها من قربها منه ..بعدت": كلم عمر ..."ولفت رجعت جلست على الكرسي .. قربها من وائل ..خلتها مو قادرة توقف على رجلها "..
وائل "لاحظ ربكة عبير .. وخجلها.. عض على شفايفه ...و": يالله يا عمر ..قول لي وين بتوقف سيارتك وانا جاي عندك...."طالعت فيه عبير بسرعه"... اقصد انا وعبير "وغمز لها ".......مع السلامه ...
عبير "حست ان قلبها بيطلع من صدرها من شدة دقه ... نظرات وائل وتصرفاته معاها ..مو قاجرة تستحمله ...وخاصة انهم في مكان شبه خالي لوحدهم..": خلينا نروح السيارة ...
وائل "طالع فيها بتمعن ..وكانه يبغى يشبع منها ...وبعدين": اوكي يالله ....
عبير "لفت تاخذ الجاكت ...ولبسته"
وائل "طالع فيها وهي تلبسه": هذا جاكيتك ....؟!!
عبير"مشغوله تضبط الجاكت والشماغ": ايه.......
وائل : بس الجو حار ... "بخبث"..ليه تلبسيه ..خايفه احد يشوف شي..
عبير " لفت عطته ظهرها وفكت الشمااغ بشكل كامل ... ": مو خايفه من احد ..
وائل "حس برغبه يسحبها ويشوف وجهها "..
عبير "لفت الشماغ.. و بسرعه "...خلصت يالله ..."..وطلعت من الجلسه "..
وائل ...تنفس بقوه ارتاح انه ما تهور ..طلع يلحقها على السيارة ...
...عبير راحت بتفتح الباب الخلفي للسيارة ....
وائل : وين وين بتركبين ...
عبير "بلا اهتمام": هناا ..ورا...
وائل "طلع السيارة": تعالي هنا قدام... ايش بيقولوا الناس لو احد شافك ورا... خطف ولد وخاشه ورا ...
عبير ".فتحت الباب وطلعت جنب وائل ..بضيق": اوف ...طفشتوني ...لا تسوين وسوي لا تسوين وسوي ...انا مالبست كذا الا عشان ارتاح من الأوامر واسوي اللي ابغاه ...."كتفت يدها ولفت تطالع في القزاز"....
وائل "طالع فيها وابتسم ": بنروح ناخذ عمر ...وتقدري وقتها ترجعي ورا وهو يركب قدام ..."شغل السيارة ومشى"...
عبير........
ساكته طوال الطريق...
وائل .. جلوس عبير جنبه فكره بشيماء ..الي ما يدري ايش وصلت بنتيجه عند اهلها ... اليوم رابع يوم ..لازم تكون قررت يا هي تنهي الموضوع يا انا انهي الموضوع ...مستحيل أتزوجها وهي تحب غيري....آه من الحب .."وغصب عنه طالع في عبير"...
عبير : خير ...ليش تطالع ....
وائل : اوف اوف زعلانه ...لا لا ما اقدر على زعلك انا ...
عبير "حمر وجهها": لا تكلمني بهالطريقه ...ما اسمح لك ...
وائل : اقول عبير ... ممكن اسالك سؤال ...
عبير"بصوت عالي": وائل ترى تعبت اليوم بما فيه الكفايه ... ريحني من الاسئله ..وشوف عمر وينه ....
وائل "تضايق انها ردته ..": طيب بس لا تصارخين انا مو سواق عندك وعند عمر ....
عبير "تأشر بعيد ..ولا شعوريا حطت يدها على يد وائل اللي ماسك الدركسون ".. شوفه شوفه هناك وقف وقف ...."طايرة من الفرح .."
وائل "ارتبك من مسكتها ليده ... اللي ما فكته": طيب طيب شفته ...
...وقف وائل ... جنب عمراللي كان واقف على الرصيف ...و بسرعه طلع ورا ...
عمر : حرك حرك ..بسرعه ..............
عبير"لفت تطالع في عمر": الحمدلله انت بخير عموري...
عمر "قرب بينهم في النص ...ولمح يد عبير على يد وائل..":..الله يسلمك بس ...
وائل "لمح عين عمر على يدهم من المرايه ... وقاطعه": عبير خلاص ترى شفنا عمر ووقفنا وركب وانتي لسى ماسكه يدي ...
عبير"فكت يدها بسرعه... وباحراج": وي وي اسفه ....
عمر "ضربها في رسها": وي وي هاه ...والله لاوريك لو عدتيها مره ثانيه ...فاهمه ....
عبير:أأأأأأي .. عورتاني ...انا ايش سويت ...
عمر "يدخل يده تحت شماغها ويسحب شعرها": ولا كلمه ولا كلمه فاهمه...رفعتي ضغطي ...
عبير "دمعت عيونها":آآآآآآآآآي ...
وائل "مو قادر يتحمل ضرب عمر لها... بصوت حازم وعالي ": ..ما اسمح لك تضربها فاهم .........
عمر "طالع فيه ":وخير مين انت عشان ما تسمح لي ...
عبير"صدمها رد وائل .. مسحت دموعها وركزت فيه"..
وائل "حس انه تورط ..فحب يرقعها": هههههههه انا بس اضربها ...مو قلت لك يا عمر راح اعاقبكم انتو الاثنين ...
عمر "ارتاح .. ورجع يتكي ظهره": وربي اني مو مصدق اننا بخير...
وائل : ترى لحد الحين ما قلتوا لي ايش الموضوع ...ايش صار لكم في التفحيط ...
عمر : معقول يوسف ما قال لك هههههههههه....
عبير"طالعت في وائل ..منحرجه": لا ما قلت له شي...
وائل "يوسف ...هذا انا اللي مسميها يوسف بالمزرعه ..يا قلبي يا عبير ".: والله لا يوسف ولا عبير قالت لي ..........هههههه.......
عمر : هذا يا طويل العمر ...قلت لها بنروح نشوف التفحيط ...
ووصيت عليها ما تتكلم ولا تطلع ... صوتها انت عارف شبهه ما يجي جنب صوت الرجاجيل شي. ..
وائل "أي والله صوتها يدوخ": كمل ....
عمر : وقفنا في مكان قريب شوي من التفحيط .. ونزلت انا ورحت اتكي على باب السيارة من عند عبير ... طبعا هي فتحت القزاز وطلعت راسها وتتفرج ... بس بدا التفحيط ... وبدات عبير الصراخ من هنا ..."يقلدها بطريقه مضحكه"..يؤ ؤ ؤ ؤ ؤ ...يمممما ا ا ا ا اه... عمرعمرعمر ..بيصدمون يا ويللللللللللي ....شوف شوف كيف يسوي ..بيطيح بيطيح ....يا ويلي ويلاا ا ا اه ..
وائل "مو قادر يمسك نفسه انفجر ضحك":ههههههههههههههه
عبير "لفت تطالع في عمر": وجع وش هالصوت معاك ...والله صوتي أحلى من كذا ...
وائل : معنى كذا انهم سمعوها ...
عمر : يو و وه ..أكيد سمعوها ...قريبين مره والشباب فوق بعض من الزحمه ...الكل لف ..يطالع مكان الصوت ...وبداو يقربون مني ...
عبير :هههههههههههههههه عاد لو شفت عمر وقتها ...بسرعه لف وطلع وسكر القزاز ...ويفحط ويضرب بواري حتى وبعدوا الشباب من قدامه ...وبسرر ر ر ر رعه ..
وائل "عجبه وصف عبير": اوف لها الدرجه ...
عمر : وحسيت انه بيصيدوني بيصيدوني ...فقلت انزلها أي مكان تهرب منهم او تاكسي ...بس لقيت المطعم ونزلتها فيه بسرعه ...ورحت أتوهم في الشوارع...
وائل "يطالع في عبير ": هاه عجبك التفحيط ...
عبير "سرحت في عيون وائل ..": كثير ...عجبني كثير...
وائل "رجع شعره على ورى .. وابتسم": شفتي كيف اني صدتك للمره الثالثة ...هههههه
عبير "بضحكه تدوخ":ههههههههه...
عمر "لفت انتباهه نظرات وائل وعبير لبعض ...فجلس يراقبهم "
وائل "فديت الضحكه انا ...يارب صبر قلبي":..أول مره المزرعة وبعدين سوبر ماركت والحين تفحيط...اشوفك كل مالك تجربين الأصعب ... المره الجايه قولي لي وين راح تكوني ...
عبير: هههههههههههه ..
عمر : راح تكون في السجن ...بس عاد الله اعلم سجن رجالي والا نسائي....
وائل , عبير :هههههههههههههه
عبير : لا خلاص ...ما عاد فيه تجربه ... اللي صار اليوم كفايه .. احس اني كنت بكابوس ... لحد ما شفت وائل ...
عمر "بزعل": ايه انا كابوس .. و وائل ملاك الإنقاذ...
وائل "بفرح": ايه ملاك غصب عنك ....ههههههههه
عبير "انحرجت": لا مو قصدي يا عمر ...بس جد كنت لوحدي خايفه وافكر فيك... بس ارتحت لما شفت وائل ..
عمر"قرب بينهم .. وصار راسه موازي لراسهم قدام ...لف على عبير ": أشوف الاخت مستانسه هنا قدام وسواليف مع ولد عمها ...
عبير "بعصبيه": عمر لا تبدأ....
عمر : بس بس قال لا تبدا قال .... ابلعي لسانك وما ابغى اسمع صوتك ..."ولف على وائل".. وقف على جنب عشان عبير ترجع ورا ...
وائل : خلاص ياخي قربنا من البيت ... وبعدين وش فيك قلبت فجأة ..
عمر : لا والله ما بتجلس جنبك ..
عبير : عمر خلاص ...
عمر : لا مو خلاص ..تراه مو محرم لك... يعني يقدر من بكرة يتزوجك ...وتصيرين حلال له ...
عبير "انحرجت": مهبول انت ...
وائل "جنب السيارة .. وبفرح": والله اقدر اتزوجها بكره ...
عبير"حمر وجهها بس سمعت كلامه و بسرعه فتحت الباب.. ورجعت ركبت ورا .."
عمر " طلع جنب وائل" :....لا تتريق ترى اتكلم جد ...اشوفكم اخذتوا راحتكم بالكلام ...
وائل : لا تبالغ يا عمر ......"طالع في المرايه يشوف عبير".... تحبوا اخذ لكم عشاء..؟!!
عبير "متكيه راسها على القزاز ومسرحه":.........
عمر: ايه وقف هنا عند الشاورما ..."نزل عمر.."..........
وائل "بتردد": عبير ... انتي متاكده ان هذي اخر مره تلبسي فيها هالثوب ...
عبير "بصوت قريب من الهمس": مدري ...
وائل : عبير ..انتي ..."اخذ له نفس بقوه".. شوفي بقول لك شي ..وأتمنى ما تفهميني غلط ...
عبير"بلا اهتمام": قول ....
وائل : انتي .... انتي..."ضحك بحرج"... والله مدري كيف اقولك .."شاف عمر راجع للسيارة ..".. برسلها لك مسج ... طيب ...
عبير"هزت راسها موافقه .."
عمر"طلع السيارة": وهذا العشاء ..جبته ...ترى حسبت حسابك يا وائل ...
وائل : ليه ماله داعي انا تعشيت...على العموم مشكور
...........
وصلوا البيت ....و وائل وقف قريب من فلة عمه صالح ...عشان عبير تدخل بسرعه .. ولحقها عمر ...اما وائل فرجع يركن سيارته في الكراج ... ومسك جواله وكتب رساله لعبير وارسلها .. "تم ارسال الرساله.. و وصل له تقرير باستلامها... ابتسم"...تكي بيده على القزاز ..ميل راسه .. ومدخل اصابعه بين شعره ... ويطالع الجوال ويدعي ان عبير ترد عليه ....
عبير ... دخلت البيت وطلعت بسرعه لغرفتها .. سمعت صوت رنه مسج ..فتحت المسج وكانت من الرقم المميز ...
>..عبير ...انتي بنت جميله ... لك عيون ذباحه .. وصوت يدوخ .. وجسم جدا جدا مثالي .. وحركاتك ناعمه... هذا كله ما راح تقدري تغطيه بثوب رجالي وشماغ .. انتي انثى بكل ما تحمله الكلمه من معنى ... وانتي مثال للبنت اللي يحلم بها أي شاب ...اهتمي بنفسك ولا تعرضي هالجمال للذئاب ..بسبب حبك ...ϑللمغامره .. اتمنى ربي يحقق اللي ببالي ...موفقه يا بنت الشرقيه <
عبير"حمر وجهها ..": ياربي هذا وش يقول ... "ورجعت تقراها مره ثانيه"... آه يا قلبي حرام عليك يا وائل ...والله عذبتني ..كل ما اقول بنساك شهامتك واخلاقك وذوقك تشدني لك أكثر ...
بس خسارة احنا مو لبعض ولا راح نصير لبعض ... "رجعت تقرا اخر شي من المسج "... يقول يارب يحقق اللي بباله ..!!!
طيب انا وش دخلني فيه هو وشيماء ...لا يكون بس حس اني أحبه ..ياربي.... "بحيره"...ارد عليه والا لا ....امممممم برد .. حرام ..اللي سواه معاي اليوم انا وعمر ما راح انساه طول عمري... "كتبت له مسج ... ورمت جوالها ..وراحت تاخذ لها دوش ..وتغير ملابسها "....
وائل ... بس سمع رنة المسج ... قفز بسرعه يفتح الجوال ..حتى انه تلخبط وهو يكتب الرقم السري كذا مره ..من فرحته ...فتح المسج اخيرا ...
>.. وائل ..اللي سويته لنا اليوم جميل راح اذكره لك طول عمري...كلامك وصلني ... وخلاص بطلت مغامرات عن قناعه.. الله يوفقك مع شيماء ..ويوفقني مع اللي اهلي وافقوا عليه ..<
وائل ..."رمى الجوال بالمقعده اللي جنبه "::.أخ بس ...فهمت كلامي غلط ...تفكرني اتمنى قرب شيماء ...والله ما اتمنى الا قربك وحبك يا عبير ...."قبض يده بقوه وضربها على الدركسون" .. ماجد أخ بس ..وربي ودي اذبحك ... آه ...ليه كذا ...ليه كل مالك تبعدين عني يا عبير ...وحبك يكبر بقلبي ....
الحارس ... لما شاف وائل تاخر في السيارة ...راح لعنده ...
بكر "يدق قزاز سيارة وائل ":.. مستر مستر ...فيه موشكيله.؟!
وائل "طالع فيه بفزع ..وفتح القزاز": لا لا بكر روح ...انا كويس..
بكر "ياشر له على فلتهم ": هدا بابا كبير هناك ... يسال انت وين ..
وائل "فتح باب السيارة وطالع شاف جده ينتظرة عند بوابتهم.. وبصوت عالي ": جاي جاي يابوي .....
الجد ...انتظر وائل ..لحد ما سكر سيارته ..و قرب منه ....وهو يطالعه بخوف ...
الجد : يا ولدي وينك جدتك مو راضيه تنام حتى تطمن على عمر ...ما اشوفه معاك ...
وائل "ماسك كيس الشاورما": شوف اخذنا عشاء ودخل هو عند عبير ..."ارتبك"... عند عمي صالح في بيتهم هو واخته ...
الجد : خلاص بروح اشوفه بنفسي ...خليه يجي جدته تشوفه تعبتني تقول امه دقت تسال عنه و وصتها عليه...
وائل : خلاص ادخل يا جدي وانا بدق عليه يجي تشوفونه ...وبعدين الله يهديكم ترى عمر مو بزر ....
الجد : عاد قول لجدتك لا تقول لي هالكلام ...
....دخلو البيت ... و وائل دق على عمر يجي يشوف جده وجدته ... اللي جاهم على طول ... وتطمنوا عليه ....ورجع عند عبير ...اللي كانت زعلانه منه ....
عمر "دخل البيت راجع من بيت ابو وائل ": الله الله تتعشين طيب انتظريني ....
عبير "ما عطته وجه تاكل الشاورما وهي ساكته".........
عمر"يمزح معاها" : يا ليتك جيتي معانا انا وصديقي يوسف يا صار لنا مغامره ..ولا في افلام الاكشن ...هههههههههه
عبير :............................
عمر "بجديه": عبير انتي زعلانه مني ...؟!... والله اسف مو قصدي..بس تدرين اللي صار فيها رقاب تعرفين ايش يعني ... وانتي تدرين كم عدد السيارات اللي كانت تطاردني ...تراها فوق العشر سيارات اذا ما كان اكثر ...يعني فعلا الموضوع ماكان لعب ..والله لو مسكوك ...بتروحين فيها ...والا يختطفونك او توصل اكبر من كذا ....فمعليش كنت بوضع لا احسد عليه ...لانه لو صار لك شي مسؤوليتي ...لازم تعذريني لما عصبت عليك ...
عبير"بزعل": طيب ليه تضربني وتسحب شعري قدام وائل ..؟!!!
عمر : الله وكبر ....الحين ما زعلك بالموضوع كله الا هذا ...ليه تستحين لها الدرجه من وائل ..
عبير "ارتبكت": لا بس وش بيقول عني بزر ...؟!
عمر "بنص عين": يهمك رأيه فيك ...؟!.... انتي تحبينه ...؟!
عبير"مصدومه ": ..عمر ايش هالكلام .... ترى وائل مخطوب ..
عمر :ههههههههه قصدك خاطب ....
عبير : ايه خاطب ...شيمووه ...
عمر "بشك": وش رايك في شيماء ..؟
عبير: ترفع الضغط ..بصراحه ..وبنت مدري كيف دفشه ...النعومه بجهه وهي بجهه..
عمر "ركز في عبير": يعني اللي افكر فيه صح ... نظراتك لوائل نظرة إعجاب ....عيني بعينك ...
عبير "بعصبيه": عمر .. ..."جت بتقوم ...وسحبها عمر يجلسها"..
عمر : ماني تاركك حتى تقولي ...انت تحبيه صح ...طيب قولي لي عادي ...طيب هو يحبك والا يحب شيماء ..
عبير "مفتحه عيونها": هييييي هييييييي ... وش عرفني عنه اذا يحب شيماء والا لا ...اتركني ابغى اطلع انام ...واذا جت ماما لا تقول لها شي فاهم ..............
عمر "وهو يطالع فيها وهي تطلع الدرج":... والله يا نظراتكم لبعض ...نظرة عشاق .."وبتحدي".والا انا ما افهم ....
.................................................
.................................................
اليوم التالي
...........
... بعد وصول ابو سعود وسعود من الشرقيه ... ابو عبدالله كلم ابوه واخوانه بدون الشباب ما عدا وائل طبعا ... انهم يجتمعوا عنده بالبيت بعد صلاة المغرب ...
الكل في بيت ابو عبدالله ...
بعد ما وزع عبدالله التمر ... وقام معاه وائل يصب القهوه ...جلسوا جنب بعض .....
وائل "يطالع في عبدالله يبغى يعرف ايش صار.. وبصوت واطي": ايش الاخبار..؟! ...
عبدالله "وجهه كان متغير ومو قادر يحط عينه بعين وائل .. نزل راسه وهز راسه": مافيه جديد ....
ابو عبدالله "وجه متغير": يا يبه حبيت اجمعك انت واخواني و وائل ... بسبب موضوع بنتي شيماء...
الجد : خير وش فيها شيماء ...
ابو عبدالله "بحزن": لها ثلاث ايام او اكثر ما تاكل وبس تبكي وقافله على نفسها الغرفه ....وما على لسانها الا انها تبغى تفسخ خطبتها من وائل .......
الجد ..ابو وائل .. وابو خالد ..: متفاجئين ...ويطالعون في وائل ...
اللي نزل راسه مو قادر يشوف نظراتهم له ..
ابو عبدالله : والله وديناها لشيخ ..ويقول يمكن حسد او عين صار بينهم ...و..."وطالع في ابو سعود"..
ابو سعود "حس ان اخوه مو قادر يتكلم": ...فعلا اخوي سلطان كلمني من يومين يقول انها تعبانه ...وانا حاولت اكملها بنفسي البنت مره متضايقه ...وما تطلب الا فسخ الخطوبه ...
ابو وائل "وجهه تغير": انتو جابرينها من أول ياسلطان ...
ابو عبدالله : لا ما جبرتها كل شي سويته شاورتها فيه ...بس الله اعلم وش صار لها ...
ابو خالد "يطالع في وائل": .. انت زعلتها والا قلت لها شي ...؟!!!
وائل "رفع عينه بصعوبه .. وهو يطالع في وجيه اعمامه المتضايقه ": لا ...ولي فتره ما تكلمني ولا ترد على اتصالاتي ...
عبدالله : وائل ماله دخل ...البنت هي اللي ما تبغى تتزوج الحين ..لا من وائل ولا من غيره ....
وائل "لا تصدق يا عبدالله هي تحب كمال وتتمنى تتزوجه اليوم قبل بكره ... بس يالله قد ايش صعب هالموقف ..."
ابو عبدالله "يطالع في ابو وائل": والله يا محمد ولدك ينشرى بالفلوس .. وانه نعم الرجل ... بس هذي حكمة ربك ...
ابو وائل : والله مدري ياخوي ..."طالع في وائل" الموضوع الحين في يد وائل .. وانا والله زعلت عليهم لاني فعلا ودي بشيماء لوائل ...بس ..اذا البنت ما تبغاه ...عاد ..الشكوى لله ..
وائل "حس ان الجو متكهرب والكل متضايق وزعلان ..وخاصة انه له دور في فسخ الخطوبه ..وقف وبكل ثقه ورفع راسه ..": اذا الموضوع صار بيدي مثل ما يقول ابوي ... فانا اقول دام شيماء ما تبغى نكمل مع بعض ...فصعب نتم الزواج ومافيه تفاهم ولا حب بيننا ... مهما صار بيننا راح تضل انت عمي وفي مقام ابوي ..وشيماء اختي بمكانة سمر... وعبدالله ولد عمي واخوي وصديقي ... والزواج قسمه نصيب ... والله يوفقها مع واحد يسعدها ويقدرها ..."وبخطوات سريعه لعند عمه سلطان ...باس راسه "..
ابو عبدالله "متاثر": الله يسعدك يا ولدي ...وانت بعد الله يرزقك باحسن من شيماء ...
وائل "ابتسم له": مشكور يا عمي ... والله يوفق الجميع ... "ورجع وائل لعبدالله ..اللي حضنوا بعض بقوه ".....
عبدالله : الله يريحك يا وائل ...مثل ما ريحتنا ...
وائل : الحمدلله على كل حال ... "في قلبه ...انتهينا يا شيماء .."
الجد ..ابو وائل .. وابو سعود ..وابو خالد ... ماكان بيدهم بعد ما شافوا تصرف وائل اللي كبر في نظرهم الا انهم يدعون لشيماء بالزواج اللي يسعدها ...ويرزق وائل بالزوجه اللي يتمناها ....
<<<<<<<<<<<<<<<<<<<<<<<<<<<<<<<<<<<<
الجزء الخامس عشر
<<<<<<<<<<<<<<<<<<<<<<<<<<<<<<<<<<<
انتشر خبر فسخ خطوبة وائل وشيماء بين الكل ... اللي تفاجئوا كثير .. وخاصة ان ملكتهم ما صار لها ثلاث شهور ....اكثر شخصين تأثروا من الموضوع "عبدالله "و"سعود".... لانهم خايفين يكون مصيرهم مثل مصير وائل ....
...........فلة ابو سعود .......
مجتمعين على قهوة المغرب ...بوجود عمر ..
ابو سعود "يطالع في عبير": وين دلوعة ابوها ما صرت اشوفها ...من لما جاء عمر وانتي استغنيتي عنا ...
عبير : لا والله يا بابا ما فيه احد يقدر ياخذني منك ... بس مشغولة مع التقديم في الجامعات عن طريق النت ...
عمر : شفت يا خالي الجامعه هي اللي مشغوله فيها مو انا ...
سعود"بزعل": الله لنا ...لو نغيب أسبوعين محد سال عنا ....
ابو سعود "مبتسم ":انت بالذات يا سعود ما نسيت موضوعك انت وسمر .. كنت باخطبها لك مثل ما وعدتك واسويها لك مفاجأه ... بس موضوع وائل هو اللي أخرنا شوي ...
عمر "متفاجئ": أحلللللى ...بتخطب يابو صالح ...حركااات ..هههههه
سعود "انحرج": يبه الله يهديك ..لا تتكلم قدام الكل ...راعي مشاعري شوي ...
الكل :ههههههههههههههههههههههه
ام سعود : ليه يا سعود والله اتمنى عرسك اليوم قبل بكره ....
سعود"بجديه": معليش أخروا الخطوبة شوي ...
ابو سعود : ناخرها لمتى يعني ...؟؟...لبعد العيد ...؟!!!
سعود "وقف": مو مستعد الحين يابوي ...الله يخليك خلني على راحتي ....وقت ما اتأكد راح اكلمك ... مع السلامه انا طالع مع وائل ..."طلع من البيت"
ابو سعود : وش يقول الولد يتاكد من ايش ...؟؟!
عمر : من مشاعره يمكن ...هههههههه
ابو سعود : يا هذا الجيل اللي مو راضي يفهم ان مافيه حب الا بعد الزواج ...."وطالع في عبير"...
عبير "فهمت نظرات ابوها ... وقفت ": بطلع غرفتي ...."وطلعت تركض لغرفتها ".................
عمر "أنحرج قاعده بينهم لوحده": طيب اتساذن انا بروح عند احمد ..ولا تنتظروني للعشاء ....مع السلامه ......
ابو سعود : انتي كلمتي عبير عن ماجد ....
ام سعود : ايه كلمتها ...
ابو سعود : وايش كان ردها ...!!!
ام سعود : ما علقت على الموضوع ... قالت انها ما تتذكر امه واخواته ...وبس..
ابو سعود :ترى كلمني على أساس يجون بكرة بس راح اقول لهم الاسبوع الجاي ....
ام سعود : خير ان شاء الله ............
................................
شيماء .. رجعت لطبيعتها .. والكل فرح عشانها ...وما يحاولون يجيبون سيرة وائل قدامها ابدا ....عشان لا ترجع تنتكس ...
عبدالله ..حس انه مخنوق له اكثر من اسبوع وهو يفكر في "وفاء".. خايف لا تكون غيرت رأيها فيه ...واكثر وحده راح تساعده في هالموضوع هي شيماء ...بعد تردد .. قرر يروح لغرفتها ...
شيماء : ادخل ....
عبدالله "فتح باب الغرفه": فاضيه اتكلم معاك شوي ...
شيماء: فاضيه .......تعال ....
عبدالله "جلس على كرسي التسريحه": شيماء ... انا تعبان لي اسبوع بس افكر في وفاء ... تكفين يا شيماء ..طمنيني هي تبغاني .. يعني تحسين انها معجبه فيني مثلا .."حط يده على راسه"..والله راسي بيتفجر ...
شيماء "حست ان سبب خوف اخوها ..من فسخ خطوبتها..ابتسمت له":..تطمن وفاء وافقت عليك بقناعه ....
عبدالله "ناظرها بشك".........
شيماء : اشوفك مو مصدقني .."أخذت جوالها ...ودقت على وفاء وحطته على الاسبيكر .."...
عبدالله "توقع انها طنشته ...بس شافها تاخذ الجوال ...وقف بيطلع من الغرفه بزعل..بس تجمد لما سمع ...."...
شيماء : الو.. وفاء ....."ابتسمت لما شافت عبدالله لف وهو مطلع عيونه ..ورجع جلس مكانه يسمع المكالمه ..".........كيفك يا وفاء ..
وفاء : بخير الحمدلله ...كيفك انتي ...معليش يا شيماء والله كل يوم اقول بجيك بس اعذريني ما فضيت ...
شيماء : مو مشكله يا وفاء ...بعذرك ...مو انتي زوجة اخوي ...
وفاء :هههههه يا زينها من فمك ....
عبدالله " وقف قلبه ..وحط يده على قلبه.."...
شيماء "ضحكت على شكل عبدالله": ههههههه المهم ..وفاء ..اللي بينك وبين عبدالله خطوبه رسميه.... يعني ان شاء الله تتم الملكه قريب .. صح...
عبدالله "يطالع في أخته مو فاهم وش تقول"..
وفاء "باستغراب ": صح ... ايش الجديد يعني ...شيماء فيه شي ..
شيماء : ايه فيه شي ...
وفاء: خير... ترى قلبي وقف...
عبدالله "يدق شيماء وياشر لها ...بمعنى وش فيك "...
شيماء "طنشت عبدالله":وفاء ....عبدالله يحبك ..وانتي اعرف انك تحبينه .... فياليت تقولوا لبعض هالكلام وتسمعون بعض ..عشان ترتاحوا ...لان اللي صار بيننا انا و وائل المفروض يكون درس للكل ...
عبدالله "ياشر لها لا "...
وفاء "تغير صوتها" : شيماء ..قولي لي عبدالله غير رايه ...؟!
شيماء: وفاء عبدالله هنا جنبي .. تكلموا مع بعض ...."رمت الجوال بشكل سريع في حضن عبدالله .. وطلعت من الغرفه"...
وفاء : شيماء ...شيماء ... لا مستحيل اكلمه ...شيماء...
عبدالله "مرتبك .. اخذ الجوال ..وحوله على السماعة... وبصوت مرتجف":. و و وفاء ....
وفاء "مرتبكه":هلا...
عبدالله "اخذ نفس ":... وفاء اسمعني انا ابغى منك كلمه وحده بس ... انتي موافقه تتزوجيني ...؟!
وفاء :......................
عبدالله : وفاء الله يخليك ...لي اسبوع وانا بس افكر فيك .. اللي صار لشيماء خوفني .. ما ودي تكوني مجبورة علي ...انا ابغى اتزوجك وانتي تحبيني مثل ما انا احبك ... "تغير صوته بشكل واضح " ..تكفين يا وفاء ريحيني....
وفاء " تأثرت.. بكلامه ":... انا وافقت عليك وانا مقتنعه ..وبعد ما استخرت كذا مره ...محد جبرني على شي ...
عبدالله " براحه": الله يطمن قلبك يا حياتي .... قد ايش كلامك ريحني ...وفاء انا احبك والله احبك من زمان وبعد الشوفه حبيتك اكثر...الله يخليك لي ...الظاهر بعد ما سمعت هالصوت .. بتهور واكلم ابوي عن ملكتنا مافيني اصبر اكثر....
وفاء "انحرجت .... جت بنقفل الجوال بس حست مو حلوه تسكر في وجهه بدون ما تقول شي ..سكتت تفكر ..وبعدين" :....مع السلامه...
عبدالله "طالع في الجوال ..واستوعب انها سكرت ": ههههههههههه
"اخذ نفس.. وباتسامه عريضه.."... الحين الواحد يقدر يعيش مرتاح ...متى اشوفك يا وفاء اشتقت لك ...........
.................................
وائل .. وسعود ... في الكوفي شوب ...
سعود "يطالع في وائل .. وهو يشرب الكبتشينو".
وائل "ابتسم": وش فيك تطالع فيني ...
سعود"باحراج": هههه لا ولا شي ...
وائل : تبغى تشوف انا مبسوط والا لا ...انا بقول لك ..."اعتدل في جلسته"...انا متاكد كل شي صار لي مع شيماء خير ...لاني استخرت ربي اكثر من مره ...
سعود : ليه ما كنت تحبها ..؟!
وائل : مافيه شي اسمه حب يا سعود ...
سعود "بنص عين":... طيب وعبير ..؟!
وائل "ارتبك .. وكان بيطيح كوب الكبتشينو من يده ": أ ..أ. .ايش تقول انت ...
سعود"ابتسم": انا اسف اني قلت اسمها كذا فجأة لك...بس انت مره غلطت وقلت اسمها بدون ما تحس ...
وائل "مقطب حواجبه .. وقاطعه": متى ...؟!...
سعود : لما جيت الشرقيه اخر مره .... لا تزعل سرك في بير..ما راح اعلم احد ... بس قولي هي وينها الحين من حياتك ...
وائل "يفرك جبهته .. بتوتر": .. باقي بعيده ...وبعيده كثير...
سعود: تكلمها ...والا انقطعت علاقتكم ...
وائل "مو قادر يحط عينه بعين سعود": غير الموضوع يا سعود تكفى ...
سعود : اسف ..
وائل "حاول يكون طبيعي ": مافيه داعي تعتذر ..ما صار شي ..
اشرب اشرب قهوتك ....
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك