رواية انوثة خيالية بالرغم من الملابس الرجالية -18
ماجد : ما حليت بنظرك الا لما خطبتها ....
وائل "بقهر":... والله لو ما كنت خاطب وقتها ...انك تحلم شوف .."ويحط يده قدام وجهه " .. تحلم تفكر فيها .. بس الحين "وقبض يده بقوه وبنبرة تهديد"... ان فكرت فيها بعد اليوم ... او نطقت اسمها على لسانك ...او شفت وجهك في الشركه ...ما ظنتي احد وقتها بيلومني لو صار لك شي ..
ماجد "ارتبك .. ":. اصلا بقدم استقالتي ...."وطالع فيهم كلهم بنظرة حقد"... عن اذنكم ... "وراح للاصنصير "....
ابو عبدالله : والله مو مصدق .. معقول هذا ماجد اللي كلنا نثق فيك ..يطلع منه كل هذا ...
ابو خالد : الحمدلله ان الحريم في البيت ولا شافوا وسمعوا اللي سمعناه ....الله المستعان ...
ابو سعود "منهار وبالقوه يفتح ويقفل عينه ..."........
وائل "كان لسى واقف نفس وقفته وهو يكلم ماجد ... وكانه يحاول يتذكر ايش قال له ..."
عمر "بصوت قريب من الهمس ":...وش قلت وش هببت ... انت من جدك تبغى عبير ... وكنت تفكر فيها من زمان ...
وائل " حس انه فعلا قال كلام كبير مو المفروض يقوله بس استفزه ماجد ..وطلع منه بدون ما يحس ..."...
الجد : كفو ...كفو والله يا وائل .... بعد ما شفتك اليوم تطمنت ان الشركه بتكون بخير ...من بعدي وبعد اعمامك ...
وائل " لف جهة جده .. وهو منحرج": بعد عمر طويل يا بوي .. وانا ..انا اعتذر منكم اني طردته وتعديتكم ....
ابو وائل : لا ما عليك ...اصلا واضح انه كان وده ينطرد ... "ابتسم لولده"... وباقي اعتذاري وينه ...؟؟؟ ... خطبت عبير وانا ما عندي خبر ...
وائل "حط عينه بعين ابوه ":... يبه ..انا ...انا ...."ومسح على وجهه " ...."وطالع في عمه ابو سعود ... قرب منه وجلس عند رجله ...".... عمي ...ادري مو وقته الكلام اللي قلته بس انا صادق في كل كلمه قلتها ...
ابو سعود ""طالع فيه وغصب عنه نزلت دموعه":...يا حسرتي عليك يا بنتي ...راح خاطب وجاء خاطب وانتي ما تدرين ..."ومسك شماغه وحطها على وجهه وبكى "......
الكل : تأثر من شكل العم ابو سعود ...
الدكتور هشام ... كان جاي مسرع وحوله ثلاث ممرضين ...متجهين بسرعه لغرفة سعود ........
الكل وقف من منظرهم .. وطالعوا في بعض بخوف... يارب استر....
خير وش فيه سعود ...؟!!!!!!!!!!!
انتهى الجزئين ....صح واحد حلو و واحد حزين .. بس ...اتمنى يعجبكم ...وانتظر توقعاتكم .....
الجزء السادس عشر
<<<<<<<<<<<<<<<<<<<<<<<<<<<<<<<<<<<<
تأخر الدكتور عند سعود وما طلع يطمنهم .....الكل متوقع أسوا الاحتمالات ....
طلع الدكتور هشام أخيرا ...
ابو سعود : خير يا دكتور ... وش فيه سعود..
الدكتور هشام "ابتسم": ابشركم ...سعود فاق من الغيبوبه ...والحمدلله وظائفه الحيويه ..ممتازة ما تاثرت ...وهو متذكر كل شي .........ويسأل عنك يابوسعود ....
ابو سعود "وهو رافع يده للسماء ": اللهم لك الحمد ...
الكل : فرح ...الحمدلله الحمدلله ........
عمر "بفرح": بروح ابشر خالتي بدريه ..."وراح يركض من الدرج ... مو قادر ينتظر الاصنصير ..ونزل تحت في استراحة الحريم يخبرها "...
ابو سعود : اقدر أشوفه يا دكتور ...
الدكتور هشام : بخليك تشوفه بس رجاء بدون إزعاج ...وياليت اليوم بس انت تشوفه ... او انت وامه بس...
ابو سعود : طيب يا دكتور .. ما راح أزعجه....
الدكتور : تفضل ..."وفتح له باب الغرفه ودخل ..."
ابو سعود "يطالع في سعود .. اللي يفتح عينه ويسكرها .. وهو متمدد على السرير وما يتحرك ...":... اللهم لك الحمد .... "قرب منه ومسك يده"...الحمدلله على سلامتك يا سعود ... شد حيلك وانا ابوك ... خابرك قوي ...الله يقومك بالسلامة...
سعود"انتبه لصوت أبوه .... وبصوت خافت ": ... يباه...
ابو سعود"بفرح":.... هلا يبه ... ارتاح ارتاح ..لا تتكلم ...
سعود"بصوت متقطع ": يبه ...عبير .."دمعت عيونه"..عبير وينها ...؟!
ابو سعود : عبير بخير ...بخير ياولدي انت قم بالسلامة ...
سعود : ابغى اشوفها ...وينها ....
باب الغرفة يفتح... داخله ام سعود .. وهي تبكي .....
ام سعود "قربت من سعود":...يمه سعود انت بخير....الحمدلله على سلامتك....
سعود"ابتسم من بين دموعه": يماه .. ...يماه ".. ونام "...
ام سعود : ...سعود يمه انا جنبك ... ما بنتركك ....
الممرض : معليش هو نايم ...لسى معطينه إبرة مهدي قبل شوي ... تقدروا تطلعوا الحين ..واذا صحي راح أناديكم تشوفونه ...
ابو سعود : طيب طيب...يالله يالله يا ام سعود خلينا نطلع ..........
طلعوا ام سعود وابو سعود من عنده .... وراحوا مع بعض لغرفة عبير..لعل وعسى تكون حالتها تحسنت ...
ام سعود "تسال الممرضة اللي تتابع عبير": بشري يا بنتي ...صحيت عبير....
الممرضة منى : يا خاله تطمني عبير بخير ان شاء الله ...بس العملية اللي سوتها في رجلها الثنتين ..عمليه مو سهله ..عشان كذا فضل الدكتور تبقى على المهديات والمنومات كذا يوم وبعدين نخفف الجرعه عنها ...وان شاء الله تصحى وتكون بافضل حال ...
ابو سعود : متى ..متى ...بيخفف لها الدكتور المنوم والمهديات ...
منى : يا عم ..."وابتسمت" .. عبير .. بنت قويه ...ماشاء الله ..وراح تعدي ألازمه اللي هي فيها ...انتو ادعوا لها بس ..
ام سعود :......يارب ...يارب...
بعد أربع أيام ......................... اخيرا صحيت عبير ................ وطلبت تشوف امها وأبوها ...اللي فرحوا كثير لما شافوها تتكلم معاهم .........
عبير"تبكي ": وين وين سعود ... تكفون لا تضحكون علي سعود ايش صار له ....
ام سعود : والله ان سعود بخير ....بس هو ...."وبكت من شكل بنتها"...
عبير "تطالع في رجلها المجبسه": ايش صار لي ...ايش فيها رجلي انكسرت ..؟!!!..بس تالمني مره ....ااآه ...يا ماما تعبانه ...قولوا لي وين سعود ...
ابو سعود : اذكري الله يا بنتي ...قلنا لك سعود بخير وهو من يومين طلع من العناية وراح غرفة خاصة ... عقبالك يا بنتي ما تطلعين من العناية ...
عبير"تبكي .. وتلف بوجهها يمين ويسار ....": مو قادرة أصدقكم ...ابغى اشوف سعود بعيوني ...عمر تكفى ...ابغى اشوف سعود..
عمر : يا عبير ..والله سعود بخير..."باستسلام.."...دقايق اصورة لك فيديو وتشوفينه ....
عبير: ايه ايه صورة ..............
الممرضة منى : يا جماعه أهدوا شوي ...عبير ما يصير انها تتوتر كذا .... انا لازم اكلم الدكتور ...يجي يشوفها ....
عمر "يطالع في منى بنظرات ترجي": دقايق الله يخليك ...بس أروح اسوي معاه مقابله واوريه عبير ... عشان ترتاح ...
منى "ما قدرت على نظرات عمر لها": طيب بس بسرعة ...
عمر "عض على شفاته" : هوا .....
نزل عمر يركض ...لحد ما وصل لجناح سعود ...اللي انتقل له بعد ما طلع من العناية المركزة .....
عمر "فتح الباب بسرعه ": ...سعود.. سعود ...
وائل وعبدالله وخالد واحمد ... كانوا جالسين عنده بالغرفة .....
عبدالله : خير..خير وش فيك أركد انت بمستشفى ....
عمر "بفرح" : سعود... عبير صحيت .. وتسال عنك .... وتبغى تتاكد ...انك بخير... "طلع جواله "....
الكل فرح لعبير.... بس فرحه " وائل "كانت غير .....
سعود : والله ....عبير صحيت ..."دمعت عيونه ..."...
عمر : لا لا ما نبغى دموع ...الحين بصورك فيديو ...تكلم ... وقول اللي نفسك فيه ...."ضبط جواله على الكاميرا"... مستعد ...
سعود "مسح دموعه ...وابتسم": ... مستعد ..."اشر له عمر " ...عبير... أول شي الحمدلله على سلامتك ... اقصد ..اقصد سلامتنا ... انا بخير الحمدلله ... واليوم انا بخير اكثر لما عرفت انك صحيتي ..."دمعت عيونه غصب عنه"... اشتقت لك ... لو كنت اقدر اجيك كان جيتك .. بس ...بس ..."حط يده على وجهه"....
عمر "لف الكاميرا على أولاد عمه": يالله تكلموا عشان بس تتأكد .. خالد ..!!!..
خالد : اللي اقدر أقوله انا ... الحمدلله على سلامتكم ..وانكتب لكم عمر جديد ...
عبدالله "لف عمر عليه": آه ايش اقول ...الله يعينكم على أكل المستشفى ..ههههههههههه
احمد "لف عليه عمر": الحمدلله على سلامتكم ....وبسس خخخخ
عمر "لف على وائل" : هذا الشخص بالذات ... كان متابع من أسبوع معانا في المستشفى ...انا متأكد ان بكره بيلبسونه بلطوا الدكتور ..دام انه مرابط هنا 24 ساعه ..هههههه ..كلمتك دكتور وائل ....
وائل " مبتسم طول الوقت اللي يتكلم فيه عمر ..والكاميرا عليه .. ":.أطول أسبوع في حياتي فعلا ...كأنه سنه ....بس الحمدلله على سلامتهم ...وان شاء الله نحتفل قريب بطلوعهم من المستشفى ...
عمر : حفلتهم والا حفلتك أنت وعبير ...هههههههه
وائل "بحرج": أتمنى والله ....ليه لا ....
عمر ........ "وقف التسجيل ":...يالله انا بطلع خايف منى تزعل مني...
احمد : ههههههههههه والله محد عرف لك الا منى ....
عمر : أخ بس فديتها والله ...ههههههههه... "وهو طالع من الغرفه"... باي
عمر طلع يركض ...لغرفة عبير ....فتح الباب بشويش ... وحصل عبير ..مسترخيه ....والممرضه منى عندها ....
منى "انتبهت لعمر ":... معليش هي الحين أخذت مهدي ...اتركها ترتاح اليوم ...
عبير "انتبهت لعمر ... وبصوت خافت": .....سعود ...
منى "باستسلام ": ...ادخل بسرعة بس بدون ما توترها ...
عمر "اشر على عينه ": ... من عيوني ...
عمر "جلس جنب عبير ..على السرير ..وشغل لها الفيديو ...":... يالله شوفي سعود ....
عبير "بس شافت شكله وسمعت صوته": يا قلبي ياخوي ..." ودمعت عيونها ...وضحكت بصعوبة ..لان المهدي بدا مفعوله "...سعود عايش ...صح عمر ...
عمر : ايه صح شوفي كل أولاد عمي موجودين بعد.. صورتهم عشان تتأكدي ...هذا خالد ..عبدالله الدب همه من بطنه...هههه ... وهذا احمد ... وهذا وائل ...
عبير"ركزت في وائل ...وخاصة انه أطول واحد تكلم في الفيديو بعد سعود .. كانت مركزة على شكله .. وكان لها شهور ما شافته .. فرحت انها قدرت تشوفه ...غصب عنها غمضت عيونها قبل لا ينتهي المقطع"
عمر "حس ان رأس عبير ميل عليه .. خاف عليها " : عبير ...عبير..."
منى "قربت منها .. تعدل راسها": لا تخاف هذا مفعول المهدي ...
عمر " طالع في الفيديو .. وكان صوته وهو يقول لوائل ..حفلتهم والا حفلتك انت وعبير...!!! .." ... اوف ..اشوا انها ماسمعت الفيديو كامل ..
منى "تضبط وضع عبير.. وبفضول": .. ليه .. فيه شي المفروض انها ما تسمعه ... انت مو قبل شوي صورتهم ...
عمر "يحك خشمه": الا توي صورتهم بس ...بس احنا تكلمنا عن حفلتهم ... وعبير ما تدري ان خطوبتها من ماجد انفسخت ..وخطبها وائل ...
منى : انفسخت وانخطبت وهي بالعناية..."ابتسمت" سبحان الله ..
"وراحت تجلس على المكتب اللي في ركن الغرفه .. المخصص للمرضيات المتابعين لحاله عبير .." ...
عمر "مشي وراها وجلس على الكرسي المقابل لها ": ... منى ..احس اني ...اني ضايقتك كثير...اعذريني .. ترى كنت متخربط هالاسبوع فوق ما تتصورين ... حتى أمي جات امس من الإمارات ولحد الحين ما شفتها ... عبير وسعود أخواني من الرضاعة بس انا ما اعتبرهم إخواني بس ..إخواني وأصدقائي وأهلي ..وكل شي...
منى "ابتسمت": لا تقول كذا ما أزعجتني ولا شي ... احنا أصعب حالات تمر علينا هي الحوادث ... فحالات المصابين بكفه ...وحالة اهلهم لما يعرفوا بكفه ثانيه ...فمتعودين ...
عمر "بكل ثقه":.. بس اكيد مافيه احد بوسامتي قد مر عليك ...
منى "رفعت حواجبها": ..وش تقصد ... يعني لاني عطيتك وجه معناه دايخه على وسامتك ...
عمر : لا لا تفهميني غلط ...
منى "نزلت راسها تكتب الملاحظات على حالة عبير":.. لو سمحت هنا غرفة عناية مركزه ... تفضل انتظر برا ..."وطنشته"...
عمر "هز راسه بمعنى طيب... وطلع وهو يفكر فيها ":...
.............................
الشباب في غرفة سعود ... استأذنوا يطلعون ويزورونه في اقرب فرصه ...
سعود : احس اني تعبتكم معاي ...كل يوم جايين لعندي ...
احمد : ما عليك يا شيخ نغير جو ....
سعود : طيب معليش يا شباب .. انا ابغى وائل لوحده شوي ...
وائل "حاس ان سعود متغير": اوكي ...
خالد : يالله بدينا حركات الأنساب ...
عبدالله "تذكر أخته شيماء ..وتضايق شوي " : يالله يا خالد واحمد ..مشينا ..
طلعوا من الغرفه ... وقرب وائل من سعود ...
وائل : خير يا سعود ...
سعود "مركز عينه بعين وائل": ..حبيبتك عبير...هي عبير أختي ؟؟!!
وائل "تفاجأ وطالع فيه بتوتر ": ...
سعود "بعصبيه":جاوبني ....
وائل " يهز رأسه بمعنى ايه ":... ...
سعود : يعني كنت تضحك علي .. تقول لي عن مشاعرك تجاه أختي .. وانا مثل الغبي ..اسمعك واشجعك .. واصبرك ...ولا بعد سميتها حبيبتك... وانت فرحان بشكلي وانا مو فاهم شي ....
وائل : سعود انا ....
سعود : بس ..بس ..كافي ما ابغى اسمع منك شي ... انت قلت لي انك سمعت صوتها وحبيتها وكلمتها ... ممكن اعرف كيف ...
وائل :... طيب انت تكلمت عن أختي سمر قدامي ... وما زعلت منك...
سعود"معصب" : لان نيتي شريفه .. وقلت لك أهلي كلهم يعرفون وانا جاد اني ابغى أتزوجها ... بس انت تحب عبير وانت مملك على شيماء ..والحين جاي بكل برود تستغل وضعنا .. وهروب ماجد ... وتتقدم لها في المستشفى ...
وائل "يحاول يضبط أعصابه لان وضع سعود الصحي ما يسمح له يعصب بزيادة":.. سعود اهدأ ... انت اكثر شخص يعرفني ...
سعود : للأسف طلعت واحد أناني ... نذل .. تستغل قربي منك عشان تقرب من اختي ...
وائل "ما قدر يسمع أكثر... وقف وعطاه ظهره":... سعود ... انا طالع ....
سعود "بلا اهتمام":... اطلع ..بس لا عاد تتعب نفسك وتيجي المستشفى مره ثانيه ...
وائل "غمض عينه بقوه ..وقبض يده بقهر .. وطلع":... مع السلامة
.......
فتح وائل الباب ...وحصل عمر واقف عند الباب ... و واضح انه سمع اللي صار بينهم ... تركه وائل ونزل من الاصنصير و وجهه كان متغير من كلام سعود ....
عمر "دخل على سعود .. اللي كان لسى معصب":.. سعود ايش صار بينكم ...أصواتكم طالعه لبرا ...
سعود :................
عمر "قرب منه":... ايش الكلام اللي قلته لوائل .... من جدك يا سعود ...
سعود "بقرف":...طلع إنسان حقير ...
عمر "متفاجئ": مين تقصد وائل ....؟؟!!!!
سعود : فيه غيره .......
عمر : معقول تقول عن وائل كذا .... حرام عليك يا سعود ..تدري ان وائل من له أسبوع وهو جالس هنا بالمستشفى ..اول يوم يروح بيته أمس ... تدري انه كان ينام وهو جالس على كراسي الانتظار ..
سعود : يستغل الظروف عشان رغباته ...
عمر "بقهر": أي رغبه ... والله اني افقده احيانا والاقيه في مصلى المستشفى من شدة البكى اسمعه وهو يدعي لكم ... وكان متابع حالتكم مع الدكاترة اول باول ... حتى انه عرض عليهم يجيب لكم دكاترة من مستشفات ثانيه لو ما تحسنت حالتكم ...وبالاخير تقول له هالكلام ...
سعود " بندم": طيب ليش يضحك علي ... يتغزل في أختي قدامي وانا غبي مو فاهم ...يقول انه يحبها قد كلمها قد قابلها .. وين وكيف .. هذا اللي بيجنني ... مو راضي يتكلم ....
عمر "فهم ان وائل حافظ على سر عبير":... وايش فيها لو حبها ..حرام ... بالعكس اعتبرك صديقه الوحيد ... وقال لك اللي بقلبه .. بعدين ...اختك تحبه ... تدري والا ما تدري ...
سعود "متفاجئ": ..ايششششش تحبه من متى ...؟!
عمر : مدري ...بس هذا اللي حسيته ...واكيد انت بعد حسيت في اختك ... ومتاكد انك حسيت على وائل ... والمفروض هذا الشي يخليك تحترم وائل اكثر.. انه ما صرح بحبه لانه خاطب ..وحتى بعد ما فسخ الخطوبة ... ما فكر يلعب على احد ...
سعود "يفكر في كلام عمر وهو مقتنع .. بس تضايق لانه ما قال له"..
عمر :.. سعود .. لا تخسر وائل كصديق ولا كنسيب ... والله اللي صار له يكفيه ... "وكان طالع من الغرفه "... يالله انا رايح توصي شي ....
.......... دق تلفون غرفه سعود...
عمر "يطالع في سعود":... رد !!!!
سعود "بتأثر": .. مالي خلق رد انت ....
عمر "يرفع السماعه":.. نعم .... ايه غرفة المريض سعود صالح .. اها .....اها ..... طيب طيب.... مشكورين .... مع السلامه ...
سعود : خير ....
عمر " يقلد صوت اللي كلمه":... هذه غرفة المريض سعود صالح ... حبيت اقول لكم ...انه بناء على طلب الأستاذ وائل محمد الذي قدمه لإدارة المستشفى ... قبل ثلاثة أيام ...بنقل المريضين سعود صالح وعبير صالح ..في جناح ملكي غرفتين كل غرفه بدورة مياه مستقلة مع صالة استقبال ... وسيتم بعد قليل نقلهم لها ... ونعتذر عن تأخير الطلب ....
سعود "بتعجب": ننتقل الى جناح ملكي !!! ...
عمر "ابتسم " :... ايه بناء على طلب الأستاذ وائل ... سعود اذا فضيت اليوم كلم وائل ... ترى كسرت خاطر الرجال وهو اللي وقف معاكم ... مع السلامه يا سعود ..."وطلع من الغرفة "
سعود " زفر بصوت عالي ورجع رأسه على المخده " :او و و و ف ... انا ايش اسويت .. ...
......................
......................
انتقل سعود ... وعبير اللي طلعت من العناية ...للجناح الملكي ..اللي وائل سوا المستحيل حتى وأمن لهم هالجناح في نفس المستشفى...
في اليوم التالي ...
الأعمام والجد والجدة وعمتهم نوره... عند سعود بغرفته اللي بالجناح ...
نوره : الحمدلله على سلامتك يا سعود ...
سعود : الله يسلمك يا عمتي ... ليه تعبتي نفسك وجيتي من الإمارات ..
نوره : لاتعب ولا شي ...معقول ادري ان احد من أولاد إخواني صار لهم شي واجلس ... لا والله باجي بنفسي اطمن عليكم ..
الجده : وليش ما جبتي معاك شوق مسكينه ... لوحدها هناك..
نوره : ماهي لوحدها يا امي ... ابوها هناك وعمتها ... وكلها يومين وراجعه ..
الجد : مين وصلكم يا نوره ...
نوره : انا وبنات أخواني جينا مع وائل ...
ابو وائل : و وينه وائل ... على الأقل يطلع يسلم على ولد عمه ويروح..
سعود "انحرج من نفسه ... أكيد ما يبغى يطلع لاني زعلته امس "..
نوره : لا يقول عنده شغل بالشركه ما يقدر يتأخر ....
الجد :.. بس سلطان وسالم في الشركه ...بيخلصون الشغل ...
ابو سعود : اتركه يا محمد ... وائل له أسبوع وهو واقف معانا ما تركنا ولا ساعه ...لا ليل ولا نهار ...الله يسعده ويوفقه وين ما يروح ..خله يشوف أشغاله وأموره ومره ثانيه يمر علينا..
نوره "ابتسمت تطالع في صالح":.. اقول ياخوي هو صدق وائل خطب عبير....
ابو سعود :... انا اجلت الكلام بهالموضوع لحد ما يطلعون من المستشفى ...
الجده : على خير ..وان شاء الله يطلعون بالسلامه قريب...
......عند عبير في غرفتها ...سمر وشيماء و وفاء ونجوى ...
سمر "جالسه جنب عبير على الكرسي .. وبصوت واطي .. ومبتسمه ":... وربي لما سمعت خبر خطوبك انت و وائل طرت من الفرحه ....
عبير "مو مستوعبه":. ايش ..ايش تقولين ...
سمر "بصوت واطي ":... وطي صوتك ..تبغين شيماء تسمعنا ...
عبير "مبلمه تطالع في سمر ":... ايش قلتي ... انا ... لمين ...؟!!! ومتى ..؟؟!!!
سمر "تركز في نظرات عبير اللي واضح انها ما تعرف":خطبك لما ماجد تركك....
عبير"فاتحه فمها ":... هاه...
سمر : يؤ .... شكلي جبت العيد ....
عبير"بترجي": سمر قولي لي كل شي ..ايش صار..
سمر.... باستسلام ... قالت لعبير كل شي ..من لما جاء ماجد وتركها واستقال ..و وائل طلبها من وقتها من ابوها ... والكل عارف بخطبته لها ...
عبير "مصدومه وهي تسمع لسمر ...":. كللل هذا صار وانا ما ادري ...
وفاء "قربت منهم":.. وش فيكم لكم ساعه تتوشوشون مع بعض .. شي خاص خلونا نطلع ...
سمر : لا ابد لا خاص ولا شي ...
عبير "طالعت في شيماء ... وتذكرت يوم ملكتها هي و وائل... "
شيماء "حست على عبير .. وفهمت نظراتها "...
نجوى :... يالله ابغى أروح البيت ...
شيماء "قربت من عبير..": ..عبير ممكن أتكلم معاك شوي ...
سمر :... انا بروح اقول لبابا يودينا البيت ..........."وطلعت من الغرفه وراحت لغرفة سعود"...
نجوى و وفاء ... بعدوا من عند شيماء وعبير .. عشان يتكلمون على راحتهم ...
شيماء "جلست مكان سمر ... جنب عبير ..وابتسمت ":... عبير ... اول شي الف الف مبروك على خطوبتك انتي و وائل ... ثانيا..انا ما راح اخذ موقف منك ...والمفروض حتى انتي ... احنا بنات عم ومثل الأخوات ... وربي فرحت لكم ...
عبير " تطالعها بلا اهتمام":... مشكورة
شيماء "حست ان عبير متضايقه منها":... تدرين .."ابتسمت".. قريب راح انخطب لشخص يحبني وأحبه ..."غمزت لها".. بس خليه سر بيني وبينك ..
عبير "كانها ارتاحت":... والله ...
شيماء : والله ... ويمكن نعرس بيوم واحد ...
شيماء , وعبير : هههههههههه..
نجوى :.. بسم الله ..مجانين انتو تضحكون لوحدكم ....
وفاء : ما عليك منهم قومي البسي عبايتك يالله الحين سمر تيجي ...
..................
سمر . طلعت الصاله اللي بالجناح .. وراحت عند غرفة سعود ... وبتردد .. دقت الباب .. وفتحت لها عمتها نوره ...
نوره : سمر ... !!!
سمر "راميه الطرحه على كتفها ومبعده عن الباب.. وبصوت واطي " : ..عمتي نبغى نروح البيت ..قولي لبابا يوصلنا ....
نوره : طيب... "دخلت تكلم ابو وائل ... وتاخر على سمر "........
سمر " ملت وهي تسمع أصواتهم ..ومحد طلع لها "... الظاهر نسيوني هنا ...."ميلت تدخل راسها من عند الباب تشوف وين ابوها عشان تأشر له يجي "...
سعود "من لما سمع اسم سمر وهو كل شوي يطالع في الباب ....لحد ما حس ان فيه احد يدخل راسه بشويش.. ولا احد منتبه لها الا هو لان سريرة قدام الباب على طول... غصب عنه ابتسم .." .. هذا شعرها الأحمر ..هي سمر ...
سمر "...فجأة ... الا عيونها بعيون سعود المبتسم ... رجعت رأسها على طول وهي تناقز من الربكة والإحراج " : يؤ يؤ يؤ ...يا فشلتي ...
نوره : يا خوي ..بنتك سمر ..برا تنتظرك ... شكلها طفشت ...
سعود "وهو مبتسم .. ويحاول يرفع صوته عشان تسمعه سمر": اجلسوا يا عمي ليه مستعجلين ..
ابو وائل : تسلم يا سعود ... "ويطالع في ابو سعود"... أي شي ناقصكم ... كلم وائل ..سامعني يا صالح ...
ابو سعود : الله يعطيكم العافيه كلكم ...
نوره "تكلم امها ":... بتجين معاي يا امي ....
الجده :..اخاف السيارة ما تكفينا ...
ابو وائل : لا ما عليك يا يمه ... انا جايب معاي الجمس ...
الجده "وقفت تلبس عبايتها": يالله اجل ... بروح اسلم على عبير قبل لا نطلع .....
الكل .. طلع من الجناح .. وبقي بس ابو سعود عن أولاده ... اللي ترك سعود ... وراح لعند غرفة عبير ....
ابو سعود "ابتسم لها وهو واقف عند باب غرفتها" : عبير .... كيفك يا بنتي اليوم ....
عبير "ابتسمت له":.. بخير الحمدلله ....بابا ادخل ...والله اشتقت لك ...
ابو سعود "دخل وجلس بالكرسي القريب منها":...انا والله اللي اشتقت لكم وبيتكم اشتاق لكم وكل شي اشتاق لكم ..
عبير :.. يأأأأأأأه اشتقت لبيتنا ...
ابو سعود : ...انتي قومي بالسلامه انتي واخوك ... وابشروا باللي يسركم ..."سكت شوي ".... عبير ...
عبير "طالعت في ابوها "...
ابو سعود : ادري مو وقته بس حبيت انك تعرفي .. ان ...
عبير "مثل ما توقعت "...
ابو سعود :... ان ماجد ..ماله نصيب عندنا ... حتى انه استقال من الشركه ...
عبير "نزلت راسها ... "...
ابو سعود : و ولد عمك وائل ..طلبك مني ...
عبير "بصوت خافت":..طلبك مني ... لان شفقان علي ..!!
ابو سعود : لا يا بنتي لا تقولين كذا ... والله لو ما طلبك مني ...انا كنت مستعد اني اكلمه عنك ... ولد عمك سوا معانا جميل عمري بحياتي ما انساه له ...
عبير "متفاجئه":..لهالدرجه يا بابا ...
ابو سعود "بجديه":..اي نعم ... لهالدرجه ... وبعدين هو ولد عمك .. وأولى من الغريب ... بس بالنهاية هو اللي طلبك ... وصدقيني لو مو عارف معدن وائل ..ما وافقت عليه ...
عبير "نزلت راسها":... طيب ... اللي تشوفه ..
ابو سعود "ابتسم ":.. الله يوفقك يا بنتي ... ويسعدكم يارب ...
عبير "كانها سمعت فتحتة باب ..":... كان فيه احد جاء ....
... شوي ودخلت الممرضه منى .................
منى "داخله مبتسمه":.. مساء الخير .... كيف مريضتنا الحلوة اليوم ؟؟!...كيفك يا عم صالح ....
ابو سعود "وهو طالع من الغرفه ":.. بخير يا بنتي جعلك بخير. ..
عبير :..اهلين منى ...وين الغيبة ...لي يومين ما شفتك ....
منى :...محد عندك ...
عبير : لا ...
منى "بتردد":..يعني عمر مو موجود ..حتى عند أخوك ...
عبير "ابتسمت":...عمر ..!!!...ههههههه لا محد عند سعود ... بس تعالي هنا.."وتطالعها بنص عين".. ايش بينك وبين عمر ...بسرعه اعترفي لانه يسال هو كمان عنك ...
منى "بحرج":..يسال عني ...!!!... ليه ..؟!
عبير : والله انتي اللي بتقولين لي ليه ...
منى "تعطيها العلاج":.. خذي ..... "وجلست على حافة السرير".. احس اني كنت سخيفه معاه اخر مره ...هو حب يمزح معاي بس انا ...
عبير "شربت المويه ... ورجعت الكاسه على الطاولة ..تكمل كلام منى ":.. انتي أخذتي الموضوع جد...
منى : ايه ....مو القصد ...بس تعرفي انا ممرضه وسعوديه ...ولما يشوفوني كاشفه وجهي ... يفكرون اني بنت سهله واي واحد يقدر يكلمني ويمزح ويضحك... انا لازم احط حدود بيني وبين الرجال بالذات ...انا صح والا خطاء يا عبير ..
عبير"معجبة بكلامها":.. والله صح ..وعين العقل .... "وحطت يدها على كتف منى"... واذا على عمر ما عليك منه ....الا ذكرتيني ... منى انتي كم عمرك ..؟
منى :.. 22 ... وانتي ...؟!
عبير "متفاجئه":.. والله شكلك صغيره ...انا يا ستي عمري 18 ..وكمان عمر عمره 18...
منى : يعني عمر رضع معاك ...
عبير: ايه وش عرفك انه بيننا رضاعه ...
منى " سرحت تتذكر اول ما شافت عمر ..ايام الحادث .. وابتسمت ":... عمر اول شخص عرف بالحادث .. واول شخص يوصل المستشفى وكان منهار وتقريبا قال كل شي عنكم في ساعه وحده ... وبعض مواقفكم ..كان شوي يبكي وشوي يضحك ...
عبير"دمعت عيونها": ... يا قلبي يا عمر ...
منى "انتبهت انها تكلمت عنه أكثر من الازم":..أ أأ...طيب خبريني انتي عن وائل ...
عبير "حمر وجهها":... حتى انتي تعرفي عن وائل ...
منى : هههههههههه بصراحه اول مره يمر علي وحده في العنايه المركزة بين الحياة والموت ويروحون الخطاب ويجونها خطاب ...
ههههههههههه
عبير "تطالع في رجلها بحزن":..ايه فعلا بين الحياة والموت ....
منى :...ما اقصد يا عبير ... وان شاء الله قريب تفكي الجبس .. و ترجعي تمشي احسن من اول ...
عبير : ياليت يا منى يا ليت ... وربي معاي خوف اني ما اقدر امشي بعد كذا ...الا متى الدكتور يمرني عشان اسأله ...
منى :..دقيقه واشوف لك ...."وراحت عند ورق الملاحظات اللي باخر سريرها .."... اممممممممم ...الدكتور بيمر عليك بكرة الساعه 4 العصر ...
عبير : والله ...اخيرا ..........
>>>>>> سمر يتصل بك
عبير "بفرح":... هذي سمر ...
منى : طيب انا بطلع ...سلمي عليها ....باي...
عبير :.. باي .....الو ...سمر ...هلا والله ..........
......................................
اليوم التالي ............
في المستشفى ....
الدكتور في جناح سعود وعبير ... وتحديدا عند عبير ومعاها امها والممرضه منى ....
عبير :... دكتور طيب متى افك الجبس ...
الدكتور هشام : يا عبير لا تفكرين بالجبس ...انتي سويتي عمليه ترميم للعظام ... وترى هي عمليه مو سهله ...اهم شي انك تمشي على العلاج اللي وصفته لك ... وتتغذي مضبوط ... وربنا يسهل ...
عبير : طيب ..يا دكتور ..الجبس مره ثقيل على رجلي الثنتين مو قادره حتى اني احركهم ....
الدكتور :...طبيعي يا عبير....
عبير: طيب خلاص اذا بس اخذ العلاج ..بروح بيتنا ...
الدكتور : بس لازمك متابعه ...
عبير: بجيكم كل يوم اذا تبغوا ...بس اكتب لي خروج ...
الدكتور "يطالع في ام سعود":.. الظاهر بنتك عبير هذي عنيده ...
ام سعود :.. والله انها ما تقصر ...""وتطالع في عبير".. اسمعي كلام الدكتور يا بنتي هو ادرى بحالتك ....
منى : لهالدرجه طفشتي منا ..
عبير "بزعل ":... طيب ...أمري لله ...
الدكتور ...ابتسم لها ... وراح لغرفة سعود ...اللي كان واقف معاه ابو سعود ...
ابو سعود : هلا يا دكتور ...
الدكتور : هلا فيك يابو سعود ...ايش اخبارك يا سعود اليوم...؟
سعود : الحمدلله على كل حال ...بشر يادكتور ان شاء الله بتكتب لي خروج ...
الدكتور : ههههههه ..يابو سعود ..ايش فيهم أولادك شكلهم فعلا طفشوا منا ....
منى : ههههه توها عبير قالت نفس الكلام ....
ابو سعود : انتو بتعلموني بأولادي اكيييد ...ما يحبون القعدة والخنقه ...
سعود : والله تعبت يادكتور على ظهري بس ولا امشي ولا اروح ...
الدكتور : طبيعي يا سعود ..كسر الحوض يكون صعب لانها منطقه ما نقدر نجبسها ...فلازم لها راحه فقط ..حتى ترجع العظام تلتئم لوحدها ... بس انت قد ما تقدر قلل حركه ...
سعود : ان شاء الله ....
ابو سعود :... وعبير يا دكتوركيف شفتها ....
الدكتوره :..انا ماراح اخبي عليك انت بالذات يابو سعود ... اللي صار لرجل عبير... شي صعب .. وعلاجها راح يطول .. ويمكن ياثر في المشي ...بس نقول ان شاء الله ما نوصل لهالمرحله ..وتقدر تمشي بعد فك الجبس......
ابو سعود: لاحول ولاقوة الا بالله ...
الدكتور :...الله يصبركم يارب ... ويقومهم بالسلامه ...يالله استاذن انا ... "طلع من الجناح "
ابو سعود : مشكور يادكتور ....
منى "بتردد ... ":عمي ابو سعود ...معليش بس مجبورة أخبرك ان إدارة المستشفى كانت تسال عن وائل محمد .. ممكن تخبرونه يكلم الإدارة ضروري اليوم ...
سعود : خير وش فيه ....
منى : أكيد شي يتعلق بالأمور المالية ...
سعود "عصب":..يعني مافيه الا وائل ...أعمامي كلهم موجودين ...
منى :.. الأستاذ وائل هو المسئول ... عن إذنكم ..."وطلعت من الغرفه"...
ابو سعود : والله مستغرب امس وائل ماجاء مره ..ولا اليوم اللي قبله ...
سعود ..نزل راسه ... وهو متحسف على اللي قاله لوائل ...
ابو سعود : يالله يا سعود ... انا بطلع تبغى شي ...بروح الشركة ..
سعود : ما ابغى الا سلامتك ...
.................
...................................
طلع ابو سعود من الجناح.. وكانت الممرضه منى تتابعه لحد ما تاكدت انه طلع من المستشفى .... دخلت الجناح بهدوء ..وكانت تتمنى ان عبير وامها ما يشوفوها وهي داخله عند سعود ...
منى "فتحت باب غرفة سعود ...بدون ما تدق .. وبصوت واطي": ممكن ادخل يا سعود ...
سعود "تفاجأ منها":... ايش فيك ..ليه داخله كذا ...
منى "تأشر له يوطي صوته":... وطي صوتك سعود ...
..قربت منى من سعود ... اللي خاف من طريقه دخولها وكلامها معاه ...ولكنه هدي لما شافها مسكت التلفون اللي على الطاولة اللي جنبه ... تكلمت بشكل سريع وقفلت السماعة ...وطالعت في سعود تطمنه ...
منى : أطمن الدكتور جاي الحين يشوفك ...بس ما ابغى تحس علي الخالة بدريه وعبير ...
سعود" بخوف":... الدكتور هشام ...؟!
منى "بتردد":..لا مو الدكتور هشام ..الدكتور اللي بيجيك الدكتور عبد الرحمن ...
سعود :.. يعني هو الحين اللي مسؤول عني بدال الدكتور هشام. ..
منى : لا هذا تخصصه غير ...أ ..أأ... الحين يجي وبتفهم منه ...
..دخل الدكتور عبدالرحمن ...وراح لغرفة سعود ...
الدكتور عبدالرحمن :...السلام عليكم ...
سعود : وعليكم السلام ... انت الدكتور عبدالرحمن ...
الدكتور عبدالرحمن :..ايه انا الدكتور عبدالرحمن أخصائي ذكورة ..
سعود "فتح عيونه ..وطالع في منى بتوتر"....
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك