رواية انوثة خيالية بالرغم من الملابس الرجالية -19

رواية انوثة خيالية بالرغم من الملابس الرجالية -19

منى : أطمن الدكتور جاي الحين يشوفك ...بس ما ابغى تحس علي الخالة بدريه وعبير ...

سعود" بخوف":... الدكتور هشام ...؟!

منى "بتردد":..لا مو الدكتور هشام ..الدكتور اللي بيجيك الدكتور عبد الرحمن ...

سعود :.. يعني هو الحين اللي مسؤول عني بدال الدكتور هشام. ..

منى : لا هذا تخصصه غير ...أ ..أأ... الحين يجي وبتفهم منه ...

..دخل الدكتور عبدالرحمن ...وراح لغرفة سعود ...

الدكتور عبدالرحمن :...السلام عليكم ...

سعود : وعليكم السلام ... انت الدكتور عبدالرحمن ...

الدكتور عبدالرحمن :..ايه انا الدكتور عبدالرحمن أخصائي ذكورة ..

سعود "فتح عيونه ..وطالع في منى بتوتر"....

الدكتور عبدالرحمن "حس بتوتر سعود":.. سعود اسمعني الإصابة اللي عندك وهي كسر الحوض ..ممكن تأثر عليك مستقبلا من ناحية الإنجاب ... فانا جيب اليوم عشان تتعاون معاي بعمل بعض الفحوصات والإجراءات ..وان شاء الله تكون سليمه ...بس ودنا نطمن ونطمنك بعد ...

سعود "مسح على وجهه بيده":...اوف يا ساتر ..."ورجع يطالع في الدكتور"... انت متأكد يا دكتور انه ياثر ...

الدكتور عبدالرحمن :.. للاسف ايه ممكن ياثر ...بس كل حاله تختلف عن الثانية ...و انا حبيت أقول لك بعد ما اتفقت مع الدكتور هشام ..لان أي تأخير في الكشف والفحوصات ممكن ما يكون في صالحك ...

سعود "بصوت خافت":... ايش نوع الفحوصات اللي تحتاجونها ...

الدكتورعبدالرحمن :.. الفحوصات عادة تكون عندي في القسم ..بس بسبب ظروفك الصحية وانك ممنوع من الحركة ... راح يكون كل شي هنا في غرفتك ...

سعود "هز راسه موافق"........

الدكتور عبدالرحمن :.. لا يا سعود ما ابغى اشوف الحزن في وجهك ...اللي ربي كاتبه بيصير ... ابغاك تكون قوي ومتماسك ..وانا لمعرفتي ان الموضوع حساس حبيت اكلمك فيه لوحدك بس..وانت لك حرية القرار اذا ودك تخبر احد او لا ... واذا تحب الفحوصات تكون سريه حتى تطلع النتيجه ..كمان هذا شي راجع لك .. واحنا ما نبغى نستبق الأحداث ...فيكون هالشي محصور بيننا فقط مبدئيا... ...

سعود" طالع في منى ":..لو سمحتي ما ابغى احد يعرف باللي قاله الدكتور لحد ما تطلع نتيجه الفحوصات ...

منى "هزت راسها موافقه ...وابتسمت":.. ان شاء الله خير لا تقلق ..

الدكتور عبدالرحمن :.. اوكي اتفقنا ..الحين ملفك صار عندي .. أي وقت تحب نبدأ ..خبرني ..عشان أرسل لك ممرضين من عندي .. وياليت يكون قريب يا سعود...يالله استاذن ..."وطلع من الغرفه "..

منى "طالعت في سعود ":... شد حيلك ..هي كلها فرضيات ...وان شاء الله الواقع غير. ..

سعود "غمض عيونه ...":..ممكن تتركيني لحالي ...

منى ... استجابت لرغبة سعود ... وطلعت من الغرفه .....وتقابلت هي وعمر بصالة الجناح ........

عمر "ابتسم بس شافها":..منى ....كيفك ...؟!

منى "ردت له الابتسامه":.. تمام ..وانت كيفك ..؟

عمر :الحين صرت زين ...."لف يطالع في غرفة عبير وسعود":.. ايش فيهم مقفلين غرفهم...

منى : الدكتور مر عليهم اليوم وخبرهم عن وضعهم ..وشكلهم زعلوا لما عرفوا انهم مطولين عندنا بالمستشفى ... ففضلوا ينامون ..

عمر : نوم العوافي ...اهم شي لقيتك ... خلينا نروح مكان نسولف فيه غير الجناح هنا ...

منى "بحرج ":.. امممممممم ...اوكي نروح الكافتيريا ...

عمر : حلو ...يالله ....

طلعوا مع بعض واتجهوا للكافتيريا ... وجلسوا قدام بعض ... بعد ما طلبوا ...عصير بارد ............

منى :.. عمر ...انا اسفه على اخر مره اني فهمتك غلط ...

عمر :... لا بالعكس موقفك مافيه شي ...بس انا توقعت اني امون امزح معاك ... الا بالله هالوجه "وياشر على وجهه".. وسيم ... ههههههههههه

منى : ههههههه ... لا تقول عن نفسك كذا ... انت شخص روحك حلوه ...

عمر "بلع ريقه":..أخ بس ...انتي الحلوه والله ..."حط يده على فمه"... اسف اسف .. لا تفهميني غلط ...

منى :هههههههه

عمر "بارتياح": ايه اضحكي يا زين ضحكتك ...

منى "حمر وجهها":...عمر خلاص ... الا قول لي ..ايش ناوي تدخل تخصص ...

عمر "بسرعه":..تمريض ...هههههههه... لا والله ماعندي ميول طبيه بالذات انا ... بس احتمال مهندس او طيران...قدمت في كذا جامعه بس ..لسى ماجاء الرد ...

منى : حلو ... باي جامعه...

عمر : بالإمارات ....

منى : اها ...انت بالإمارات يعني ...صح وقته قلت لي انك امك وصلت من الإمارات ولا شفتها ...

عمر : ايه ابوي شغله هناك ومن يوم انا صغير نقلنا معاه ولحد الحين ...بس نيجي للرياض في الإجازات او مناسبات..سعيده او مثل هذي تعيسه ....

منى : عشان كذا ما علقت ليه سعوديه وكاشفه وجهي لانك متعود على بنات الإمارات ...

عمر : والله بالعكس بنات الإمارات بعضهم محتشمات كثير...بس لان دبي تعتبر مدينه متطورة جدا جدا ...فيها اغلب الجنسيات ...الوضع مختلف ...

منى "رن جوالها":... هذا جوالي وقته على علاج احد المرضى ...معليش لازم اروح اعطيه العلاج ...

عمر : ياليتني مريض عندك ... وانتي تعالجيني ....

منى "وقفت":... سلامتك ..لا تقول كذا ...يالله باي...

....وطلعت من الكافتيرا... وعمر يتابعها بنظراته .... والله انك أجمل وارق بنت شفتها ...يا ويل قلبك يا عمر .......

...................................

بعد اسبوع ......

عبير على الكرسي المتحرك ... في غرفتها ...ومعاها سمر ...

عبير "بفرح": ... مو مصدقه اني بطلع البيت ...فرحااانه مرره ...

سمر"ماسكه الكرسي" : فرحانه عشانك بتطلعين والا فرحانه لان وائل اللي بيوصلك البيت ...

عبير "تلف على سمر .. وتضربها":... اسكتي فشلتيني ...الا صح وين عباتي اللي طلبتك تجيبيها ....

سمر : يو و و و و و وه نسيت اجيب لك عبايه ....

عبير : والله ...وكيف بطلع بالله الشارع وانا كذا ...

سمر : دقيقه خليني افكر .....

................. في غرفة سعود .......

وائل ..دخل بتردد عند سعود ... بعد ما مر أكثر من أسبوع ما شافه ولا كلمه ...بس قلبه ما طاوعه يبعد أكثر ....

سعود "لمح وائل عند الباب ..مو مصدق": وائل .........وائل "بفرح".... تعال يالقاطع ...

وائل ""ابتسم من مقابلة سعود ":... سعود ...ياخوي ...كيفك ..."وقرب منه بخطوات سريعه ...وحضنه "........

سعود :... اخيرا يا وائل تذكرتني ...تذكرت اخوك سعود...

وائل : ..اعذرني يا سعود ... والله قلبي ...يحترق عليك كل يوم ودي اشوفك ...بس ....

سعود : زعلت من كلامي ....انت اكثر واحد تدري اني وقت الزعل ..اقول كلام ما ادري عن نفسي... وبعدين انت تصدق لما اقول لك ما ابغى اشوفك ....

وائل "ابتسم":..والله ما صدقتك ....بس قلت اريحك من وجهي ...

سعود "تغيرت نبره صوته":... لا تتركني يا وائل ...تكفى ...عبير بتطلع اليوم ...وانا بجلس لحالي بالمستشفى ....لا تتركني ...

وائل "مستغرب نظرات سعود":... سعود ... وش فيك كلك حزن وهم ... تحب تتكلم واو تقول لي ...

سعود :..لا لا مافيني شي ....انا بخير...

وائل : لا والله منت بخير ...ولا انت عاجبني ....بروح اودي سمر وعبير بيتكم ... وارجع لك على طول ....طيب

سعود : طيب ....انتظرك ....

وائل : مع السلامه .............

طلع وائل لصالة الجناح ...

وائل "بصوت رافع":.. سمر ...يالله اطلعوا ....

سمر "طلعت من الغرفه":..طيب طيب..."وطلعت تدف الكرسي المتحرك ..اللي عبير جالسه عليه .. وهي بدون عبايه .. راميه طرحه خفيفه على وجهها .. ومغطيه رجلها بشرشف السرير ....."..يالله ....

وائل "غصب عنه طالع في عبير.. وابتسم":.. كيفك يا عبير.. والحمدلله على سلامتك ...

عبير"بصوت خافت":...الله يسلمك ....

وائل "يطالع في سمر":...يالله لبسي عبير عبايتها ....

سمر "ارتبكت":..أ أ ..ا... خلاص لابسه ....يؤؤ...بقول الصدق ..نسيت اخذ عبايه لعبير...

وائل "يطلع عيونه":... نسيتي ...وانا كم مرة ذكرتك ..."يطالع في عبير"... مستحيل تطلع كذا .....

عبير"انحرجت من نظرات وائل لها ... وقربه منها":..

وائل "كأنه تذكر شي ...وابتسم":... دقيقه انتظروني ..

طلع وائل وخمس دقايق وهو راجع لهم ...وبيده كيس .. اعطاه لسمر ..

وائل :..تذكري عبايتك اللي من سنه وهي عندي بالسيارة تقولي احتياط ...هذا وقتها ...

سمر "كأنها تذكرت":..اي والله ........."وانشغلت تفتح الكيس وتشوف العبايه"...

وائل ... طالع في عبير ...اللي حس انها ارتبكت لما طالعت في العابيه وتذكرت انها لبست هالعبايه من قبل ... وتذكروا مواقفهم مع بعض في المزرعه .. من عيونهم ...

سمر : وش فيك سرحت في زوجة المستقبل ... يالله اطلع عشان تقدر تلبس العبايه ....

وائل : طيب طيب ...انا على كراسي الانتظار برا ...لا تتاخرون

..........................

في فلة ابو سعود ....كانت ام سعود ..طايره من الفرح برجوع عبير للبيت ... جهزت لها سرير في الصالة ... وكانت جدتها وزوجات أعمامها وعمتها نوره والبنات مع ام سعود في فلتهم ....

وائل ...طول الطريق وهو مبسوط ... وخاصة لما يتذكر ان عبير معاه في نفس السيارة ..وصارت خطيبته ..وكمان مصالحته مع سعود....

وائل "طالع في المرايا ..وعبير بلثمتها المعتادة ..والجذابة بالنسبة له": ...ناقصك شي ...؟!

سمر "جالسه ورا جنب عبير ":.. لا ...

وائل : انا ما كلمتك ...

سمر : ههههههههههه ...ادري ...

وائل "عصب": انطمي اجل ....

عبير "ضحكت ": هههههههه

سمر : تضحكين علي هاه... يا قليلة الخاتمه ...

وائل : خليها تضحك وش عليك منها ...

سمر : والله احس الود ودك رميتني من السيارة ...ياخي انا اختك من امك وابوك ..

وائل "ياشر على راسه":... على راسي والله اختي ...بس ..."عصب"...اسكتي اشوف عبير اذا ناقصها شي ..قبل لا تروح علينا المحلات ...

سمر : هذاك انت تعرف اسمها ..ثاني مره ناديها باسمها وريحني ...

وائل "يغيض سمر":...عبير ...عبير ....عبورة ...عبورتي ....

عبير"كانت بترد عليه ...بس سمعته يدلعها ... نزلت راسها .. وبصوت واطي ":.. وائل ..مشكور مو ناقصني شي ...

وائل "ميل راسه ": اوكي عبورة ....

سمر : صدق ما تنعطى وجه ...ترى البنت بتفطس علينا والسبه انت ....

وائل "ضحك بصوت عالي ":.هههههههههههههه ليه وش سويت انا ... عشاني دلعتها ...طيب بتصير زوجتي ...

عبير"مغصها بطنها بس قال زوجتي .....وحمر وجهها ..وعرقت ... ومسكت يد سمر وضغطت عليها بقوه ..دليل توترها "..

سمر :... وائل خلاص ... جد والله البنت مو متحملة كلامك ياخي ... توها طالعه من المستشفى ...

وائل "حس فعلا ان عبير توترت زيادة": .. طيب سكتنا ...بس عشان عيون بعض الناس .."وغمز لها في المرايا"...

عبير"نزلت راسها "... " ياربي منك يا وائل احرجتني قدام سمر.. عمري ما شفتك تتكلم بهالشكل ... اشتقت لك والله ..."

..........................................

وصلوا البيت اخيرا ..... وقف وائل سيارته قدام فلة عمه ابو سعود .... ونزل من السيارة ...واخذ الكرسي المتحرك وحطه قدام باب عبير... ونزلت سمر تساعدها ....وائل بعد شوي عنهم ...بس كان خايف ان سمر ما تقدر لها ..وخاصة ان رجل عبير الثنتين مجبسه لحد الركبة ...يعني صعب سمر تشيل عبير .. بس منعن للإحراج .. فضل يبقى بعيد..خاصة ان الكل واقف عند بوابة الفله ينتظرونها تنزل من السيارة ..

عبير"تحاول تحرك جسمها تنزله من السيارة":.. سمر امسكي يدي ..

سمر "تمسك يدها .. ":..يالله ..شوي شوي ...

عبير"بخوف":..خايفه والله ... السيارة مرتفعه ... ليه ما جاب سيارة صغيره ...

وائل "سمعها":..انا جبتها قاصد عشان تكون واسعه بالنسبة لك ...

عبير"دمعت عيونها":...طيب مو قادره انزل ...اخاف رجلي تضرب بالارض...."بصوت عالي "..ماما ...ماما ...تعالي ساعديني ...

سمر : عبير بلاش خوف ..وين تطلع عمتي لك تساعدك ...

عبير"بكت":... لو سعود بخير كان ساعدني ...طيب وين عمر ...

ام سعود "من عند الباب":...عبير... وش فيك تاخرتي يمه ... اطلع لك ...

وائل "يقرب ويبعد مو عارف ايش يسوي لها .."......

الجده "كانت لابسه طرحه على راسها ..طلعت راسها تشوف ليه تأخروا":... وينكم يا بناتي ... يا جعلني فداك يا عبير...."وطالعت في وائل "... وائل ...ساعدهم يمه ساعدهم ..هي خطيبتك ...

عبير"بصوت عالي": لا ...ما ابغى احد يساعدني ابغى سعود .."وبكت"

وائل "يأشر لجدته":.. هي مو راضيه ...

الجده "طلعت قريب من عبير":...يا بنتي ابوك ماهو فيه ولا احد من أعمامك ... خلي وائل يحملك ..ويدخلك بالصالة ...

عبير"ما تبغى وائل يساعدها ...فنزلت بسرعة من السيارة ..واصطدمت رجلها بالأرض..وصرخت بقوه مع بكا":..أأأأأأأأأأأأي....رجلي رجلي.....

وائل "قرب منها بسرعة وشالها بين يدينه ... وعبير من شدة الألم ما حست بنفسها ... ولا اعترضت ... وائل كان خايف عليها ... ولف على جدته ..اللي أشرت له يدخل بها للصاله ...دخل وائل للصاله وهو شايل عبير..اللي شوي تبكي وشوي تمسك رجلها ... أشرت له عمته نوره انه يحطها على السرير .... قرب وائل من السرير ببطي ... حس انه ما وده يتركها ... غصب عنه ضمها بقوه لصدره.. وهو ضاغط على خصرها وعند ركبتها.. من شدت ضغطه خلى عبير تنتبه له ..طالعت فيه بعيون مليانه دموع مستغربه حركته ... اكتفى وائل انه غمز لها وابتسم ...وهو ينزل جسمه عشان يمددها على السرير وهمس في إذنها ....".راح اشتاق لك ".....وطلع بسرعة ..في وقت اختفت فيه كل الوجوه .. ولم يبقى في ذاكرة وائل ... الا عيون عبير .. وصرخه عبير... ودفئ جسم عبير..

................................

في المستشفى ...بعد خمسه أيام ... وسعود وحيد بعدما طلعت عبير.. وتركته ....وخاصة ان نتيجه فحوصاته عند الدكتور عبدالرحمن اليوم ...فهو متوتر كثير ...

عند سعود في غرفته كان متواجد الجد ... وابو سعود .. وابو عبدالله وابو خالد ...وابو وائل ...و وائل ....و عمر....

وائل "لاحظ ان سعود متوتر":... سعود فيك شي ...

سعود "هز راسه بمعنى لا"...

وائل "ابتسم له ": تدري شكلك مو عاجبني كذا ما تضحك ..ولا شي ...بس انا بقول شي اخليك تنبسط ...

سعود: وشو ....

وائل "رفع صوته ..يكلم جده وأعمامه ":.. يا جماعه انا بغيت اقول لكم شي ..واتمنى ابوي ما يزعل مني ...

ابو وائل "ابتسم له ":.. والله هالايام يا وائل صرت تخوفني الصراحة ...عندك قرارات مفاجئه ...

وائل :ههههههههه... ايه يا يبه ..عندي قرار .."وطالع في سعود"..

سعود"يحاول يفهم وش يقصد وائل "...

وائل :.. انا لما صار الحادث لسعود وعبير... قطعت وعد على نفسي اني اذا قام سعود بالسلامة اني بزوجه أختي سمر ...

الكل : تفاجا ...وأولهم سعود ...

وائل "طالع في سعود":... وان شاء الله يبه ما تردني ..ولا انت يا عمي ابو سعود ..اعتبروني ابو البنت وابو الولد ...

عمر : متاكد قطعت وعد عشان سعود وسمر ..والا انت وعبير هههههههههه

وائل "انحرج":... اسكت انت ...

سعود "ما فرح بالخبر.."... بس ..مو وقته يا وائل ...

ابو وائل : والله انا ما عندي مانع ....سعود والنعم فيه ....

سعود "مسك يد وائل":... الله يخليك انسى الموضوع الحين ...انهي الموضوع ...

وائل "بتعجب":.. ليه ...انت غيرت رأيك بسمر...

سعود"ما يدري كيف يخلي وائل ينسى موضوعه هو وسمر":... اختك مو راضيه فيني ...افهم ..ما تبغاني ............أ أأأأ تبغى تخلص دراستها ...

وائل "منصدم":..كييييييف ..؟!... وش عرفك....

سعود : من عبير....

وائل : متى ...؟!

الجد : خير وش فيكم ...وائل وش فيك...

وائل "ما يدري ايش يقول":... أ أأأأأ ...بناحل الكلام في الخطبة لحد ما اسأل سمر...يمكن تبغى تخلص دراستها ...خلاص انسوا السالفة ..

عمر :ههههههههه رهيب قررت ووعد .. والحين انسو...

وائل ""طالع عمر بنظرات قويه ":. ايه لازم أشاور البنت ........ انا طالع يبه الشركة .. تيجي معاي ....

ابو وائل :.. لا يا وائل ..عبدالله وخالد بالشركة ...روح لهم انت ..........

طلع وائل ..وهو مضايق ..حس انه لخبط الدنيا ..."المفروض ما تكلمت الا لما شاورت سعود .... بس انا ايش عرفني ان سمر رفضته ...وليه ترفضه أساسا ... فيه شي بالموضوع ..."..

طلع سيارته ...و راح للشركة ...........

.............................

الممرضه منى ...بعد ما تأكدت ان الكل طلع من عند سعود ... دخلت عنده ..واتصلت على الدكتور عبدالرحمن ...

سعود : ..طلعت النتيجة ..؟.....

منى "بابتسامه":.. ايه طلعت انا شفتها قبل لا ادخل عندك ...

سعود "بخوف":... ايش طلع ...

منى : يا سعود خلي إيمانك بالله قوي ....انا عند حسن ظن عبدي بي ...صح ..

سعود : ياااااااارب ..ياااااااارب ...

الدكتور عبدالرحمن دخل ... و هو ماسك ملف سعود ... جلس على الكرسي القريب منه ...وحط رجل على رجل ... وبدا يتكلم ....

الدكتور عبدالرحمن :... فحوصاتك يا سعود طلعت ...وانت رجل كبير وراشد ... يعني راح تفهم ايش أتكلم عنه ...

سعود "بترقب":... أسمعك يا دكتور ...

الدكتور عبد الرحمن :... اتضح ان عندك .. فعلا مشكله في الإنجاب بسبب الحادث ...

سعود "غمض عيوونه بقوه ...":..لا حول ولا قوة الا بالله ...

منى " حطت يدها على كتفه تواسيه..":.. لا تيأس ...الدكتور لسى ما خلص كلامه ....

الدكتور عبدالرحمن : ..هو فيه علاج لك بس راح يكون بطي .. و...

سعود "يحك وجهه بتوتر .. وقاطعه " :... يعني انا عقيم ...

الدكتور عبدالرحمن :... لا يا سعود انت مو عقيم ... أطفال الأنابيب والحقن ألمجهري ..فعال جدا في حالاتك...

منى : وانا اعرف ناس كثير عندهم أولاد وبنات من تقنيه أطفال الأنابيب او الحقن ..

سعود : وليه اتعب بنات الناس معاي .... وبإمكانهم يلاقون رجال كاملين ..

منى : وليه انت مو كامل ...الرجال الكامل الصدق هو المحافظ على صلاته واللي راضي باللي الله قاسمه له ... وياما فيه رجال ما عندهم امل يجيبون عيال وراضين ..انت على الأقل عندك أمل ..

الدكتور عبدالرحمن :... فعلا كلام منى صح .. "وقف"... سعود لا تيأس .. وربي يكتب مافيه الخير .... استأذن انا ..

وطلع الدكتور عبدالرحمن .... وطلعت وراه منى اللي صار تعرف طبع سعود ..يحب يجلس لوحده اذا تضايق او زعل ...

.....................................

عمر ... تذكر انه ما مر على منى ...رجع يدور لها ..ويسال عنها ...لحد ما لقيها بالاصنصير...

عمر : منى حبيبتي وينك ...؟!

منى "بفرح":..هلاااا عمر ....

عمر "سحبها من يدها وطلعها من الاصنصير":... تعالي هنا ليه ما تردي على جوالك ... خوفتيني عليك خطيبتي..؟!

منى "تغيرت ملامح وجهها":..عمر أبغى أتكلم معاك بموضوع ...

عمر : قولي اللي تبين باسمع لك من اليوم لبكره ... وحشتيني ...

منى "بجديه":... عمر خلاص..

عمر : انتي تفكرين اني العب عليك صح ...بس والله كلمت امي ..وماعندها مانع اننا نسوي خطوبه الحين ...وحتى العمر تقول مو مهم ..

منى "كانت تمشي وعمر ورآها يتكلم .. وقفت في استراحة الممرضات .. وجلست":..اجلس يا عمر ...

عمر "جلس":.. أمريني قلبي ...وش بغيتي ...

منى "بجديه":..دام السالفه وصلت للارتباط .. فانا لازم أقول لك شي و اتمنى تفهمني ..

عمر "بخوف":.. ايش افهم ..تكملي منى ...

منى ..."نزلت راسها .. وخاصة ان عمر مركز في عينها يبغى يعرف ايش تقصد ":... انا يا عمر تزوجت عرفي بدون أهلي ما يدرون...من قبل سنه ...وهو تركني وطلقني ...

عمر "مصدوم ورجع ظهره لورا": ..عرفي ؟!!!...واهلك ما يعرفون ...مين وكيف ؟!

منى "دمعت عيونها":..كان ولد جيراننا اللي شقتهم قدام شقتنا .. كنت اشوفه كل يوم بالدرج...لحد ما حبيته ... ولما حس اني فعلا حبيته ..بدا يلعب لعبته القذرة ...بانه يستغل انشغال اخوي الوحيد ... وأوهمني انه بيتزوجني بس لازم اجلس معاه ونفهم بعض اكثر ... وعلمني ايش يعني عرفي ..و ..و وبعدين صار اللي صار ..

عمر "يطالعها بعيون مفتوحة":..وهو وينه الحين ...

منى : مدري... ولا ابغى ادري...بعد فترة نقلنا من شقتنا ..ولا عاد شفته ..الا مره اخته جابت لي رساله وداخلها ورقه مقطعه ..منه يقول .. فيها انا طلقتك .. والله يوفقك مع غيري ....

عمر""عصب":... نذل ...وحقير...."وطالع في منى "... حتى انتي مو صغيره حتى تغلطي هالغلطه ...يعني عمرك 21 سنه وقتها ...وين عقلك .....انا اللي اصغر منك ..ما سويتها ولا افكر فيها ...بس للاسف ...

منى "بكت من قسوته":... يا عمر لا تظلمني انا محد نبهني ولا احد رباني مثلك ...ماعندي ابو ولا ام ..بس جدتي الكبيره واخوي ...حرام عليك لا تظلمني ...

عمر "ضرب بيده على الطاوله":... ولو ... ولو .......... ما اقدر اعيش مع وحده من سنه غلطت اكبر غلطه في حياتها ......."وبهدوء".انسي عمر ...."وطلع مسرعه من عندها "...

منى :... حرام والله ...حرام عليكم ...محد يسامحني .. ولا احد يفهم اني تبت ... ايش اسوي بعمري انتحر يعني ...آآآآآآآآآآه ....

... عمر ومنى ... قصه حب لم تتعدى الشهر ...لم يكتب لها النجاح .. بسبب وضع عاشته منى ... ولم يعشه عمر ... ولكن منى ..تعتبر بنت ..ونحن في مجتمع لا يغفر للبنت ...

........................................

الجزء هذا طويل ...اتمنى تستمتعوا في قرأته ....تحياتي للجميع

<<<<<<<<<<<<<<<<<<<<<<<<<<<<<<<<<<

الجزء السابع عشر ( قبل الاخير)

<<<<<<<<<<<<<<<<<<<<<<<<<<<<<<<<<<<<

مر على سعود أسبوعين من لما عرف بوضعه الصحي الخاص بالإنجاب ... ومازال في المستشفى ...

عبير ... راجعت المستشفى مرتين خلال الأسبوعين ... وتعبت كثير من الروحه والرجعة ... وحالتها في تحسن بطيء...

........في فلة ابو سعود .......

عنده بالمجلس ابوه ..واخوه ابو وائل ...

ابو سعود دخل بالقهوه في المجلس و واضح عليه التعب والإرهاق ...

الجد : يا ولدي يا صالح ارتاح ...

ابو سعود "مبتسم بتعب":..مافيه تعب ...الله يحييكم ...

ابو وائل : والله شكلك مو عاجبني يا صالح ..

ابو سعود "يصب القهوه":.. خلوها على الله .. لي اكثر شهر من أيام الحادث وانا ما انام زي الناس ...الحمدلله على كل حال ...

الجد :..الحمدلله ربي سلم ...وخلاص انتبه لنفسك انت ... اولادك ان شاء الله انهم بخير ...

ابو سعود :.. كيف انتبه لنفسي واولادي الاثنين طايحين وكل واحد يبغى له من يساعده في كل شي ...

ابو وائل : متى بيطلع سعود ...؟!

ابو سعود : .. والله احتمال بعد اسبوع ... مع اني والله ودي يبقى في المستشفى ..على الاقل حتى ويقدر يعتمد على نفسه في القومه والقعده ...كفايه عبير ..

ابو وائل : عبير ما فكت الجبس في الزيارة الاخيره .؟

الجد : لا ما فكته شفته برجلها ...

ابو سعود : ايه ما فكته بس وقتها فكوه سووا اشعه للرجل ..وباقي ما تجبست ... فرجعوا الجبس ...

ابو وائل :.. الله يعين ...اذا احتجت مساعده او شي ...لا تتردد تكلمني او تكلم وائل ...ترى مافيها شي ...وباي وقت ..

الجد "ابتسم":.. و وائل صار ولدك يا صالح ...

ابو سعود : ..ما تقصرون كلكم ... وائل وأولاد عمه يساعدوني عند سعود ..اما عبير .. فانتوا عارفين ما عندها الا انا وامها...

ابو وائل "وكأنه يفكر بشي ":... الا اقول يابو سعود ... ليه ما تسوون خطبة عبير و وائل الحين ...وعشان يساعدك بعد في مراجعات عبير ...

ابو سعود : لا لا .... مو وقته ...

الجد : الا وقته ...وكلام محمد صح ... على الاقل ترتاح شوي ...ومهما كان ترى الشباب يستحملون الحركه والروحه والجيه ..مو مثلك ...

ابو سعود :.. صلوا على النبي يا جماعه ..الموضوع مو خبط ولزق... ترى ما صار بينهم شوفه شرعيه ... ومنها نشوف رأيهم هما الاثنين ... وبعدين ...نفكر بالخطبة .....

ابو وائل : اذا على الشوفه .. وائل بالبيت خله يجي ويشوفون بعض .. وانتهينا .......

ابو سعود "متردد":... والله مدري..... بس مو وقته خطبه .. سعود بالمستشفى ...

الجد : اهم شي العقد ... يعني لما يطلع سعود ... نسوي حفله صغيره .. نكتب الكتاب ... وعشان يقدر وائل يطلع ويدخل بدون محد يتكلم عليكم ....

ابو سعود : خير ان شاء الله بشاور ام سعود .. وعبير واعطيكم خبر...

ابو وائل "طلع جواله":وانا بكلم وائل يجي...

الجد "مبسوط":..خير ما تسوون يا اولادي..

طلع ابو سعود الصالة ... وجلس على سرير عبير ... و نادا ام سعود اللي كانت بالمطبخ ...وطلعت بسرعه بس سمعت صوت ابو سعود ...

ام سعود "ماسكه الشاي": ... جاهز جاهز الشاي يابو سعود ....

"وتفاجات انه جالس عند عبير "... اخوك راح ....؟!

ابو سعود : لا لا ...بس تعالي اجلسي ... وطي الشاهي عندك .. ابيكم بموضوع كلكم ...

الجده : خير يا صالح وش عندك ...

ابو سعود "طالع في عبير":.. وائل بعد شوي بيجي ويبغى يشوفك عشان نتم الخطبه اخر الاسبوع .........

عبير "فاتحه فمها ..":هاه ........وين ........الحين الحين يعني اليوم ...!!!!

ام سعود "بزعل":وش تقول يا صالح الله يهديك ... وضع البنت ووضعنا ما يسمح اننا نسوي لا خطبه ولا شوفه ....

عبير : أي والله ولا انا مستعده ..

الجده : انت يعني موافق يا ولدي...

ابو سعود "تغيرت ملامحه للحزن": .. والله يمه انا تعبت ...لي اكثر من شهر مع اولادي في المستشفى ما صرت قادر اسوي شي ... اهملت شركة الشرقيه ..والشركه هنا ... والاوضاع ملخبطه ..

فاخوي محمد شار علي قبل شوي انه تتم الخطوبه على الاقل عقد القران ..عشان وائل يقدر يساعدني على الاقل اذا انا مو موجود بالبيت ...

ام سعود "تاثرت من كلامه":... معك حق يابو سعود ... خلاص سوي اللي تشوفه ...

عبير : كيف يعني راح املك واخوي سعود مو فيه ...

ابو سعود "ابتسم":ابشرك سعود بيطلع ان شاء الله بعد اسبوع ... "وطالع فيها باستفهام"... يمديك باسبوع تشتري فستان الملكه يا عروس ...

عبير "بزعل .. وتطالع في ارجولها": عروس ..برجل مكسورة اقصد رجلين ...!

دق جرس الباب..

ابو سعود "وقف": هذا اكيد وائل ...."لاحظ ارتباكة عبير"... يالله يا بنتي استعدي وعدلي شكلك ..."وطالع في ام سعود ...." .. لا تتاخروا.. خمس دقايق ...طيب ...

ام سعود :..طيب طيب ....

اخذ ابو سعود الشاهي...وطلع لمجلس الرجال ...

وائل جاي ركض ..والبسمه ما فارقته ....لما عرف من ابوه انهم يبغون يسوون الشوفه اليوم .... بعد ما فتحوا له الباب دخل مجلس الرجال ..

وائل "والفرح واضح عليه":..السلاااام عليكم ....

الكل : وعليكم السلام ...

....جلس وائل معاهم ..وهو ينتظر موعد لقائه مع عبير ....

عبير.... مرتبكه .. ومو عارف ايش تسوي ... مره امها طالعه لغرفتها مره شغالتهم ....

عبير"بصوت عالي ":... سينا .. وعلبة الإكسسوارات جيبيها لا تنسينها ...

سينا " وهي ترجع علبة المكياج":... تيب تيب ..ابير...

الجده : يا بنتي تراك ربشتي نفسك والشوفه كلها دقيقتين ... خلاص يابنتي مو محتاج كل هذا ... بسم الله عليك قمر ...

عبير :.. الا والله يحتاج .. هذي شوفه مره بالعمر ...

ام سعود .. ساعدت عبير انها تلبس التايور ..

عبير"وهي جالسه على سريرها ":..هاه حلو ... بس التنورة قصيره ...

ام سعود : ما عندك تنوره طويله ...

عبير "تهز راسه بمعنى لا "...

الجده : حلو حلو يا بنتي خلاص ...

سينا "جابت علبة الاكسسوارات":.. تفضلي ..

عبير "مدت يدها لامها ":..دقيقه سينا ... ماما ساعديني اجلس جنب جدتي ...

ام سعود :..انتظري اجيب الكرسي المتحرك ...

عبير "بسرعه":.. لا لا ....ما ابغى الكرسي باجلس جنب جدتي ..على الكنب ...

... عبير ..ما كانت تبغى وائل يشوفها وهي عاجزة ... وخاصة انه كان خاطب من قبل .... جلست عبير جنب جدتها ... وعطتها امها شرشف تغطي فيه ارجولها ...بشكل مرتب ... :... انا جاهزة ....

عبير .. لابسه بلوزه خضراء ساده كمها كت .. وتنوره نفس اللون فيها ورود حمراء كبيره ... لبست معاها سلسال اخضر .. وخاتمين واحد احمر و واحد اخضر ... وفكت شعرها ... مع روج احمر هادي .. وكحل ومسكرا .. طلعت مرره انيقه وجذابه ...

ابو سعود ...ابتسم لوائل بعد ما كلمته ام سعود بالجوال ..... وقف وائل بسرعه ... ومشى بخطوات سريعه ....

وائل "وكله لهفه":.. وين يا عمي عبير ...

ابو سعود "ابتسم": بالصاله ... "ضربه على كتفه".. روح عندها جدتك معاها ..

وائل "انحرج":... طـ طيب ....

دق وائل على الباب المقسم من جهة مجلس الرجال اللي يفتح على الصاله ... وجاه رد من جدته ...

الجده "بصوت عالي شوي":.. ادخل ادخل يا وائل ....

وائل "بس سمع صوت جدته ... ارتبك .. عدل شماغه بشكل سريع تنحنح ":... احم احم .... بسم الله ...

ودخل الصاله .. ونظراته تسبقه ... لمح ان جدته بس هي وعبير اللي موجودات ..ارتاح ان عمته ام سعود مو موجوده ... قرب اكثر منهم .. والابتسامه على وجهه...

في هاللحظه ... وقفت كل شي بالنسبه لوائل ... واخيرا ..عبير قدامه ... وقف شوي يتامل شكلها مع انه مو قادر يشوف ملامحها مضبوط ..لانها كانت منزله راسها وشعرها مغطي عليه .... تحولت نظرته لجدته ... وقرب منها ....

وائل "ركع يسلم على راس جدته ... تحولت نظرته لعبير ..اللي رفعت شعرها وطالعت فيه بشكل عفوي .. وماكانت تدري انه يطالع فيها .. ارتبكت ونزلت راسها بسرعه ...

وائل "ابتسم": ... كيفك يا جده ... طيب نسيتينا هاه...

الجده : الحمدلله بخير... لا والله ما نسيتكم ...بس انت عارف محد يجلس بالبيت عند عبير اذا صالح وبدريه راحوا عند سعود ..

وائل "وهو لسى واقف قدام جدته ..لف على عبير.. وبصوت كله حب ":.. كيفك عبير ..؟

عبير " زادت ربكتها لما سمعت صوته .. ": الــحمــ ...ـد لله" ...

الجده : اجلس يا ولدي ..

وائل .. لف وجلس على اقرب كنبه منهم ... وهو يطالع في عبير ..

"آآآه يا عبير... يا زينك والله.. اشتقت لك ولسواليفك وهبالك .. ولعيونك ... "

الجده "طالعت في عبير لقيتها منزله راسها مره":.. يؤيؤ .. وش فيك يا بنتي ..كيف بيشوفك وائل ... ارفعي راسك "وتمسك بدقن عبير وترفعه "... لا تستحين هذا بيصير زوجك ...

عبير" حمر وجهها بزياده ... ورفعت راسها .. وبطريقه مرتبكه صارت تحط شعرها ورا اذنها "...

وائل ... متكي على الكنب وحاط يده على خده بطريقه قابظ كل الاصابع ما عدا السبابه على وجه ... وكانه مستمتع بمنظر عبير وهي خجلانه ...

الجده " وقفت ": بروح اجيب العصير ....

عبير "بهمس": ..جداااه لا تقومين ...

الجده "سمعتها بس طنشت"..

عبير .. تابعت جدتها وهي رايحه للمطبخ ... وما انتبهت الا بصوت وائل ......

وائل "عدل جلسته وثنى ظهره وتكى على ركبته ":... كيفك اليوم احسن ؟!...

عبير " منحرجه ..":الحمدلله ...

وائل "ابتسم .. وبصوت واطي ":.. ليه منحرجه مني .. نسينا ما كلينا ....

عبير"انصدمت من كلمته .. وطالعت بشكل سريع فيه بعيون مفتوحه "

وائل "ركز بعيونها ...وغمز لها ":.. اشقت لك وربي .....

عبير "نزلت راسها بسرعه .. وابتسمت بحرج " ..

وائل "لمح غمازاتها ":.. لا انا كذا ما اقدر .. شكلي بجيب المملك اليوم ...

دخلت الجده ... وهي تحمل صينيه العصير... وقف وائل بسرعه واخذها منها ...وحطها على الطاولة ...

الجده : خذ يا وائل العصير....

وائل "شرب العصير":.. تسلم يدك يا جده...

الجده "كل شوي تطالع في عبير .. تبغى تعرف ايش صار بينهم .. وبعدين طالعت في وائل "...خلاص يا ولدي ... نقول تم ...

وائل "يرجع الكاسه على الطاوله ": تمين بعد مو تم واحد ..."لمح عبير وهي تضحك "... طيب أسالي عبير يا جده مو بس انا بتزوج ..

الجده "لفت على عبير ": ... هاه يا بنتي ... موافقه ..

عبير " شابكت يدها في بعض .. وبشكل متوتر صارت تلعب في الخاتم تلفه وترجعه.. ابتسمت"...

الجده "طالعت في وائل ..وابتسمت ": ..البنات يستحون ..مو مثلكم ..

وائل " يطالع في الخاتم اللي بيدها... وقف ":طيب ....انا بطلع مع انه ما ودي ...بس بطلع بكرامتي قبل لا احد يطردني ...

الجده : ما عاش مين يطردك يا ولدي ... ماله داعي هالكلام...

وائل :.. خليني بس املك يا جده بنقل عفش غرفتي هنا ...ههههههه " من شدة ضحكته طالعت عبير فيه ..طالع فيها .. وقرب منها .. ومد يده لها "...يالله اشوفك على خير عبير ....

عبير "بلمت تطالع في يده .. مدت يدها بتردد ... وبحركه سريعه من وائل ..سحب يدها .. وضغط عليها ... جلس شوي يتامل شكلها كاخر مره ...

وائل "يطالع في الخاتم اللي بيدها ... ومد يده الثانيه ... وسحب الخاتم من اصبعها بكل هدوء ...هالحركه خلت عبير تطالع فيه مو فاهمه .... ثنى جسمه شوي عليها .. وما زال ماسك يدها بيده الثانيه والخاتم ماسكه بيد ووقفه قدام وجهها":. ..تسمحين لي اخذه .. مقاس للدبله ... مع اني... "وطالع فيها فوق لتحت" ما تحمل الاحمر انا ...

عبير ... انحرجت ..من حركاته معاها ..وقدام جدتها بعد ...

الجده : خذه خذه ...يالله روح المجلس ....

وائل " فك يد عبير...بعد ما ضغط عليها للمره الاخيره ..وكانه يودعها ":.. أشوفك يوم الملكه ..

وطلع وائل ...من الصاله ... ونظرات عبير تلاحقه ... مو مصدقه ان اللي جالس يصير لها حقيقه ..كانها بحلم ...تحسست يدها اليمين ..ومكان ما مسكها وائل ... وتذكرت نظراته وكلامه ... حست انها بعالم ثاني ... لدرجه ان جدتها وامها يباركون لها وهي مكتفيه بابتسامه ...

وائل ... قبل لا يدخل مجلس الرجال ...وقف شوي يتذكرها ... حس ان ملامحها بدات تختفي من خياله ..من شدة ما كان يحاول يتذكرها ضم يدينه على وجهه وهو ماسك خاتمها ... وغمض عيونه وابتسم بعد ما شم عطرها على يده ...صار يشم العطر .. وهو مبتسم ...

حس على نفسه ... عدل شكله ... واخذ شهيق زفير.. حتى صار طبيعي شكله ...دخل على المجلس ... وعلى طول وقف عمه سعود .. اللي بس شافت جاي يركض ..ويسلم عليه ...ارتاح باله ...وسلم وائل على جده وابوه .. وباركوا له ...

يتبع ,,,,

👇👇👇

تعديل المقال