رواية مأساة بلا دموع -19

رواية مأساة بلا دموع -19

عفاف : تكفين لا تضيقين صدري زياده.. يكفيني اللي فيني..

غاده : ووش فيك بعد غير هالسالفه..؟

عفاف : سالفه عزيز.. ولا كأني انا اللي بأتزوج..

غاده باستغراب : وانتي ما تدرين..؟؟

عفاف : من وين بأعرف بالله عليك..؟؟

غاده : بهذي معك حق.. بس وش تقولين.. هذا قدرك..

عفاف : الحمد لله على كل حال..

غاده : زين انك جيتي معي.. ما ادري وشلون بيفكون هالجبس..

عفاف وتمزح : عمليه سهله.. مشرط وجراح.. ويقطعون رجلك..

غاده ببلاده : هااه..

عفاف : ههههههه.. امزح معك يالخبله.. شئ سهل والله.. لا تخافين.. بس خسارة ما وقعت عليه..!!

غاده : أصلا ما انتي لاقيه مكان.. ما قصرو مهند وبسام.. ما خلو اسم لاعب ولا توقيع الا كتبوه.. ما ادري وش بيقول الدكتور عني..!!

عفاف : ههههه.. يا حليلهم..هههه..

دخلت على أمها بالمطبخ بضيقة..

ام سعود : وش فيك..؟

هند تجلس : ما فيني شئ..؟؟

ام سعود : طيب تعالي تعلمي لك شغله تنفعك ببيتك..

هند : وانا ما قهرني الا بيتي هاللي تقولون..!!

ام سعود : ليش.. وش الطاري..؟؟

هند : يقول ما جد ان اجازته نزلت.. وتقريبا بعد شهر ونص.. شهرين.. ويبغى يقدم الزواج..

ام سعود : وانتي وش اللي مضيقك..؟؟

هند : تونــااا..

ام سعود : وش تونا عليه.. خلاص انتي الحين تقريبا كل اغراضك جاهزه.. وعادي لو تقدم العرس..

هند بضيقه : لا بس مو الحين..!

ام سعود : مصيرك متزوجه الحين ولا بعدين..!

هند : حتى ولو.. بعدين ارحم..!!

ام سعود : بعدين ارحم.. بنشوف اذا جا بعدين وش بتقولين..؟؟!!

هند : يووه.. يمه الحين ابغاك تفزعين معي.. تصيرين ضدي..!!

ام سعود : أنا مع الحق.. مدام الرجال عنده إجازه وانتي مجهزه ومنتهيه وشو له الانتظار.. احمدي ربك.. بنت خالتك ما عندها فرصه حتى تجهز.. دراسه وامتحانات وحالتها حاله..!!

هند : وش بنت خالتي..؟؟

ام سعود : عفاف بعد احد غيرها..!! الله يعينها هالبنت.. كل شوي سالفه..!!

هند : أي والله الحمد الله..!!

ام سعود : يالله اجل دقي له.. وقولي له يحدد الموعد مع ابوك.. خلي الرجال يستانس..!!

هند بحياء حبت امها وطلعت ركض.. وعلى وجهها ابتسامه واسعه...!!!

^،^،^،^،^،^،^،^،^،^،^،^،^،^،^

بيوم الخميس.. ركب يوسف وأبوه.. وتوجهو لبيت أبو فهد.. وهم بالطريق..

ابو يوسف : لو جايبين أخوانك او احد من اعمامك ماهو احسن..؟

يوسف : ترى ماهي الا خطبة.. وما تحتاج كل هالجيش.. بالملكة ان شاء الله والزواج.. ولا يهمك اعزمهم كلهم..!

ابو يوسف : الله يتمم على خير..!!

يوسف وعينه على الطريق وبابتسامه : آميييين..

وصلو لبيت ابو فهد.. ويوسف اول ما وقف قدام البيت.. تذكر تفاصيل المشهد اللي قبل يومين.. وعلى وجهه ابتسامه.. لبس نظارته الشمسية.. ونزل مع أبوه..

دق الجرس وما أحد يرد.. استغرب واصل الدق ونفس النتيجه..

ابو يوسف : متأكد أن هذا بيتهم..؟؟

يوسف : ايه.. متأكد..

ابو يوسف : دق ثانية يمكن ما سمعو.. او ما هم فيه..!!

يوسف بتوتر رجع يحاول.. لكن لا رد..!!

يوسف طلع جواله ودق على عفاف..

عفاف : هلا يوسف بشر..

يوسف : مرحبا.. وش ابشر.. ما امدانا.. المهم.. انتي متأكده انهم موجودين بالبيت اليوم..؟؟

عفاف : هااه.. ليش..؟؟

يوسف : محد يرد على الجرس.. من زمان وانا ادق ومحد فتح الباب..

عفاف : جوالها مقفل والبيت ما يرد من قبل امس..

يوسف : وتوك تقولين.. اففف...

عفاف : طيب فيه سيارات عند بيتهم..

يوسف : المشكله انه ما فيه أي سياره..!!

عفاف : يوووه.. والحل....... ايه.. تذكرت.. شف البيت اللي جنب بيتهم على طول..

يوسف : أي واحد يمين ولا شمال..

عفاف : يمين اتوقع..!!

يوسف : الدبلوكس..

عفاف :ايه.. ابوابها معتقه..

يوسف : ايه شفته.. وش فيه..؟؟

عفاف : هذا بيت أخوها فهد.. يمكن تحصله.. او تلاقي جواب عنده..!!

يوسف يتنهد : طيب.. زين زين.. مع السلامه..

ومشى يوسف مع أبوه ودقو باب بيت فهد.. كلها ثواني.. والباب انفتح.........

الجزء الثاني والعشرون

انفتح الباب.. وطلع شاب من هيئته واضح انه مااايع.. ويوسف ابدا ما استلطف شكله.. كان ماسك الجوال يتكلم ومندكج بالسالفه ويضحك..

زياد نزل الجوال : هلا هلا.. ( ورجع يتكلم بالجوال.. بعدين اكلمك حبي..! أوكي؟ ) ورجع يلتفت لهم.. حياكم الله...!

ابو يوسف : الله يحيك يا ولدي..

يوسف بلباقة : الاخ فهد..؟؟

زياد بوقاحه : هههههههه.. لا ما نيب فهد..!

يوسف بقهرر : طيب هو موجود..؟

زياد بلامبالاة ورافع حاجب : امم.. لا والله فهد بالشركه الحين..

يوسف : أهاا.. طيب اذا ما عليك امر ممكن اعرف ابو فهد وينه..؟؟

زياد بوقاحه : والله علمي علمك.. بس اسأل فهد أكيد يعرف..

وكل هالكلام وهم واقفين بحوش فيلا فهد..

زياد وهو طالع عند الباب : تفضلو..!

يوسف بابتسامه ساخره لابوه.. اللي فهم مغزاها.. كأنه يقول " ويـن ندخــل وانـت بــرى..؟! "

رجع زياد بعد ثواني..

وكان يوسف منزل راسه ويلعب برجله في الارض.. مــل.. ما ينـــلام..!!

زياد ومسوي نفسه متفاجئ : ما دخلتــو..؟؟ تعالو تعالو..؟؟!!

ابو يوسف تحرك لداخل..

ويوسف يحس بداخله كهرباء.. زياده على توتره.. يجي واحد مايع يتميلح قدامه... والا حنا بزران يقولنا تعالو..!! وين عايش ذا..؟؟!!

دخلوا.. وطبعا تركهم زياد لوحدهم.. وطلع لبرى..!!

وبما أن ابو يوسف ويوسف رجال اعمال.. ومعاملين كثير اشخاص.. ما هم تصرفات زياد الصبيانية.. حتى ما سألوه لا عن اسمه.. ولا وش يقرب لفهد..!!

.

.

.

.

.

رجعت تجلس مع اخواتها.. وعلى وجهها علامات الاستغراب..

غاده : وش يبغى يوسف..؟

عفاف بصدمه : يقول محد ببيتهم.. تخيلي..؟؟

غاده : يمكن طالعين زياره لاحد او شئ.. اليوم خميس وما اتوقع احد جالس ببيته الا احنا..!!

عفاف : والله انك رايقه.. احر ما عندي ابرد ما عندك..! طيب انا قايله للعنود انهم بيجونهم الخميس.. وما اتوقع تنسى هذي بعد..؟؟

غاده : اهاا.. اجل والله ما ادري عنكم..!

عفاف : بس هذا اللي فالحة لي فيه..!!

ام يوسف داخله عليهم : عفاف.. ما انتي رايحه السوق..؟

عفاف : ليش..؟؟

ام يوسف : مو بكره ملكتك.. ما انتي شاريه فستان للحفله..؟

عفاف بضيقه : ما له داعـي..!!

غاده بصوت واطي : مجنــونــه..!!

سفهتها عفاف وما ردت عليها..

ام يوسف ترفع السماعه تدق لامها : براحتك..!! هذا عرسك وانتي ادرى به.. وبعد ما احد بيحضر من الحريم..

ساره وتكلم عفاف : انتي مو اشتريتي فستان لاول مره تحددت فيها ملكتك الاولانيه.. وما لبستيه..؟!!

غاده وتبي تقهرهاا : البسيــه انـتــي..!!

ساره : والله ما احد كلمك..!

غاده بغــرور : لك الشرف تكلميني..!!

ساره وما ردت عليها رجعت تكلم عفاف : هااه وش قلتي..؟ بتلبسينه..؟

عفاف قايمه : ما ادري.. بأشوف ليلى..

وراحت لغرفة ليلى بتقولها عن السالفه... وتأخذ رأيها فيها..!!

.

.

.

.

.

" ألـمـــانــيــــــا...!! "

كانت الدهشة تعلو وجه يوسف وهو ينطق بهالكلمه..

فهد ويرد عليه ببرود : ايه والله

ولما شاف سكوتهم.. كمل : الوالده عندها موعد هناك بالمستشفى.. والوالد خذ الاهل وسافروا.!!

ابو يوسف كان ملتفت ليوسف وكأنه يعاتبه..

اما يوسف فما كان مستوعب لأي كلمه سمعها.. غير انهم سافروا لالمانيا..

فهد ويمد يده ليوسف : تقهو..

يوسف ويعطيه الفنجال : متى سافروا..؟

فهد : امس الصبح..

يوسف : ومتى راجعين بالسلامه..

فهد بتفكير : والله حسب فحوصات الوالده.. يمكن شهر يمكن اكثر..!! وتعرف الاجازه مقبله.. يعني معهم وقت..!!

يوسف مو قادر يتمالك اعصابه ووده لو يقوم له ويذبحه..

فهد بثقه : الا ما عرفت تبغون الوالد بشغلة ضروريه..؟؟ يمكن اقدر اخدمكم..!

يوسف قال قبل يتكلم ابوه : لا..لا.. ان شاء اذا رجع الوالد بالسلامه.. لنا كلام معه..

ابو يوسف قام : يالله اجل يا ولدي نستأذن..؟!!

فهد : حياكم الله..

طلعو يوسف وابوه وركبو السياره..

وبهووء فضييع.. ساق يوسف.. وما يتردد بباله الا كلمه وحده.. " ألــمــانــيــا "...!!!

.

.

.

.

.

سمعت رأي أختها.. اللي كان مؤيد وبشده انها تلبس وتكشخ.. هذا ولد عمها هالمره.. مو الغريب..!!

طلعت عفاف من غرفة ليلى.. وانصدمت بشكل يوسف داخل للبيت.. وواضح انه متكدر.. ومو على بعضه..!!

طاح قبلها.. لا يكون صار للعنود شئ..

قابلته.. لكن لف عنها.. كان بيطلع الدرج.. بس وقفه صوت أمه..

ام يوسف : بشر يا ابوي وش صار..؟؟

يوسف بصوت مبحوح : .........ما صار شئ..!!

ام يوسف : وابوك وينه..؟؟

يوسف : راح الشركه..!!

عفاف : وشلووون ما صار شئ..؟؟

يوسف : ما شفنا الا فهد..!!

عفاف : وابوه..؟؟

يوسف ويمسك شماغه بيده ويفسخه : سافرووو..

عفاف بصدمـــه.. ما قدرت تخفي شهقتها : سافروووا..؟؟ ويـــــن راحووو..؟؟

يوسف وهو يشد على اسنانه : ألمانيــــــا..

تركهم وطلع غرفته بصمت..

اما عفاف فجلست على الكنبه القريبه منها.. وعينها مركزه على غاده.. وكأنها هي اللي قالت لها الخبر مو يوسف..!!

أما غاده فهاللحظه بس.. عرفت ان احساسها كان صادق ذيك الليله.. وان الامر يتعلق بالعنود.. وأكيد اللي صار لها شئ مو طبيعي..!!

قامت بتكاسل.. ومشت ببطء بحكم انها توها فكت الجبس عن رجلها وما تقدر تمشي بسهوله في الوقت الحالي..!

أول ما وصلت عندها وتوها بتجلس.. تفاجأت بعفاف توقف.. وفي عينها دمعه..!!

انصدمت غاده.. لهالدرجه عفاف متألمه لصديقتها..!!

عفاف وتمسح دمعه طاحت على خدها قالت بصوت متألم : والله بتشوف..!! تسافر ولا تقولي..!! كلــه زعــل.. ما يــســوى عــلي والله..!!!!

وراحت تركض لغرفتها ودموعها سيل على خدها..!!

وغاده واقفه بمكانها بذهوووول.. ومو مصدقه ان هالكلام يطلع من عفاف..! او انها تفكر هالتفكير الغريب..!!!

/:/:/:/:/:/:/:/:/:/:/:/:/:/:/:/:/:/:/:/:/

بعد وصولهم للمطار بالعاصمة الالمانيه..

كانت تنتظرهم سياره بتوصلهم للشقه اللي استأجرها فهد من صديق له يعرفه.. وبيظلون فيها طول فترة اقامتهم..!!

وصلو للشقه اللي كانت عبارة عن صاله وغرفتين نوم بحمامين ومطبخ.. شقة صغيره لكن تكفي لاربعه اشخاص.. أبو فهد وأم فهد ومها والعنود اضافة الى عبوره الصغيره.. وأهم شئ تفي بالغرض..!

مها بتعب : ياربي حيلي منهد.. بأدخل أخذ لي دش وبأنااااااام..

دخلت بعدما شالت بنتها معها..

ومن بعدها دخل أبوها وأمها للغرفة الثانية..

ولا بقى بالصاله الا العنود.. اللي ظلت عيونها تدور بكل ركن من اركان الشقة الصغيره.. لمحت باب بوسط الصاله.. وشكله مفتوح على بلكونه.. تقدمت منه بهدوء وفتحته.. وفاجأها المـنـظـــر..

كان شئ خيالي.. الخضرة بكل مكان.. ومن بعيد ينشاف شلال مااء.. وجدول يمر عبره الماء وصولا الى الجزء الثاني من المنطقه اللي هم ساكنين فيها.. والاحلى انه كان تحت على طول فيه زي الاسواق أو المحلات التجاريه.. واللي دايما تعج بالناس.. والحركه الدايمه..!!

تنهدت العنود بعمق.. والهواء العليل يداعب وجهها.. وهي تتساءل بداخلها..

" وش تكون هالدنيا كلها.. وأنت كأنك مسجون وأنت حر طليق.. غريب بين أهلك.. بعيد عن وطنك وأحبابك.. والامرّ من هذا كله.. أن أحب مخلوفين لقلبك.. زعلانين عليك.. وماخذين بخاطرهم منك..!! "

رجعت العنود وقفلت الباب.. ودخلت للغرفة لعل وعسى تقدر تناام.. وتنسى... أو تتناسى همها...!!

/:/:/:/:/:/:/:/:/:/:/:/:/:/:/:/:/:/:/:/:/

حست براحة وهي تشوف زوجها يلعب مع عياله.. من زمان ما حست بهالاحساس.. كانت تفتقده.. وتفتقد روحه المرحه.. وجلسته معهم..

ابو فارس وهو جاي لها وهو يلهث من الركض : آآآاههههه.. تعبووني عيالك.. حسبي الله على بليسهم..آآآآهه..آآه..

ام فارس بابتسامه عذبه : اللي يسمعك يقول عيالي لحالي..!!

ابو فارس باستهبال : من يسمعني..؟؟ أفا أثرك دبوووس وأنا ما ادري..!!!

ام فارس : هههههههههههه..

ابو فارس بتأمل : الله يديم هالضحكه.. ما ادري وشلون كنت بأضيع هالسعاده مني.. بلحظة طيش..!!

ام فارس : بس تراك ما ضعت لا ضيعتها.. واللي فــــات مـــات..!!

ابو فارس : على قولتك.. الا شخبارك انتي مبسووطه..؟

ام فارس : أنا في قمة السعاده يوم اشوفك انت والعيال فرحانين ومستانسين.. وش ابغى اكثر من كذا..!!

ابو فارس : الله يديم السعاده وراحــــة البــال...

ام فارس : آميــن.. الله يسمع منك..!!

ابو فارس : ووش اخبار الاهل..؟ والاخوان كلهم بخير..؟؟

ام فارس : هههههههه.. وش فيك اليوم..؟؟ شكلك شـــارب شئ..؟؟

وعضت على شفايفها.. وهي تشوف شلون تغير وجه ابو فارس..بمجرد نطقها لهالكلمه..!!

ام فارس تبلل شفايفها : عبدالرحمن.. مممم.. والله ما قصدت..؟؟

ابو فارس ما رد عليها.. قام ورجع ينضم لاولاده.. ويحاول يلعب معهم..!!

وام فارس جالسه منقهره اول مره تتكلم بدون لا تحاسب على كلامها.. وهي متوقعه انها العاقله.. بلحظه فرح.. نست العقل واستمتعت بالعاطفه..!!!

.

.

.

.

.

غاده بالبيت ضايعه.. ما تدري من وين تجيبها.. من يوسف ولا من عفاف.. وكل واحد منهم مقفل على عمره بغرفته.. ولا تدري عنه..

كانت طالعه الدرج بصعوبه.. وقابلها بسام طالع من غرفته..

بسام : هلاا وغلاااا بغدوووو.. من زمااان عنك..!!!

غاده وفاتحه عيونها وتلتفت وراها : تكلمني أنا..؟؟

بسااام : مغبـــره...! أكيد اكلمك.. شخبارك بعد الجبس اللي....(ويغمز لها) ان شاء الله ما جبتيه معك..؟؟

غاده : ييي.. وين اجيبه..؟؟ صاحي أنت..؟؟ الظاهر الامتحانات مخربه عقلك..!!

بسام ويضرب جبهته : الامتحانات...!! آآه.. حطيتي يدك على الجرح...

غاده : وان شاء الله ما بديت تذاكر..؟ تراكم يالاولاد دواافير.. ما ينخاف عليكم..

بسام : قولي ما شاء الله.. لا انسدح الحين من عينك..

غاده : هههههه.. حلوه تنسدح..!! بس يالله شد حيلك.. ثانوية عامه.. نبيها تبيض الوجه.. واسمك من الاوائل على المملكه..!!

بسام : ألــلــــــــه.. الاوائل مره وحده.. خاف أجيب العيد.. وآخذ الاول من ورى..!!

غاده : هههههههههه... والله حركه... أما من ورى..ههههههه..

بسام رافع حاجبه : وما دامك فتحتي الموضوع.. ابغاك تساعديني...

غاده : اساعدك..؟؟

بسام : ايه.. خابرك دافووره.. وتعرفين تدرّسين..!!

غاده : أما دافوره.. كثر منها.. أما اعرف أدرّس.. ففيها نظر..!!

بسام : يالله أجل تعالي خذي الكتب.. ولا أقولك انقلي عفشك لغرفتي... ودرسيني..

غاده : الله على الاساليب الجديده للدراسه.. بس أخاف من زود التدريس.. تطلع المعلومات مع أذينك.. ولا ينتفخ راسك.. ويصير وش كبره...!! خخخخ

بسام : لايكثر عااد.. كل المسأله.. فيزياء وكيمياء وأحياء ورياضيات وانقلش.. واذا فيه شئ بعد باقوله..!!

غاده فاتحه عيونها : حشى كلهن تبين ادرسهن لك... يا حليلي.. حدي أدبي وش جابني لهالمواد..؟ بس تدري... يمكن أفكر.. وأتشاور مع نفسي وأدرسك وطنيه.. تراها أصعب شئ...!!

بسام : إي والله نسيتها تصدقين..؟؟

غاده : هههههههههههههههههااي..

بسام : لا تكلفين نفسك ولا عقلك.. الوطنية آخر ما أفكر فيه..

غاده: ليــش..؟؟

بسام : يا حلوة.. لانها بكل بساطه.. ما تدخل بالمعدل.. يعني وجودها وعدمها واحد..!!

غاده : أهاا... عااد هذا اللي قدرت عليه..

بسام : والله أني داري أن ما فيكم نفعه..!!

غاده وفاتحه عيونها : ولد اللذينا.. ليش تعمم..؟!

سمعت غاده صوت أحد يناديها.. وراحت وقفت أعلى الدرج.. وتطالع تحت.. والا امل واقفه..

غاده : هلا.. تناديني..

أمل تصارخ : إي.. تعالي.. أمي تبغاك..

غاده : تراني أسمع.. ما يحتاج هالصراخ كله..

أمل : طيب انزلي..

غاده : طيب..

والتفتت لبسام.. فما حصلته... غريب هالولد.. بلحظه يطلع وبلحظات يختفي...!!!

.

.

جالسه بغرفتها.. وتحس بألم بقلبها.. ليش كل هذا يصير..؟؟ لما يجي يتحقق اللي أبي..! تضيع مني صديقتي..! تنهدت بعمق.. وهي تمسح دموعها اللي ملت وجهها..!!

كان هذا حال عفاف.. وهي تحاول تتصور ليش العنود سافرت مع أهلها بدون لا تقول لها..؟!! وليش بهالسرعه وبشكل مفاجئ..!

حاولت تتماسك.. مهما كان مقدار ألمها.. إلا أن حال أخوها راح يكون أشد منها... يوسف صار له شهور وسنين يرفض يرتبط بأي وحده..! ويوم جا هاليوم.. البنت هي اللي تروح من يده..!

طلعت من غرفتها.. وتوجهت لغرفة أخوها.. بتحاول على الاقل تعرف منه أي تفاصيل ثانيه.. ممكن أنها تنفعها و تبرر لها موقف العنود المفاجئ..!!

طقت الباب.. وما أحد رد عليها.. استغربت..

فتحت الباب بهدوء.. واستغربت أكثر يوم شافت ان الغرفه ما فيها أحد.. توقعت يكون بغرفة المكتب.. ولما دخلتها.. خاب ظنها.. وتأكدت أنه للحين على طبعه الغريب.. لما تواجهه مشكله.. يطلع من البيت.. ويريح أعصابه.. ويرجع أحسن مما كان..

واللي الكل يجهله.. هو مصدر الأمان اللي كان يوسف يحصله.. ويريح عنده أعصابه..!!

/:/:/:/:/:/:/:/:/:/:/:/:/:/:/:/:/:/:/:/:/

ببيت أم سعود.. كان أبو سعود جالس مع عياله.. وسوالف وضحك.. وهند تبلغه عن قرار ماجد.. مو جرأة منها.. لكن طبيعه ابو سعود اللينه والمتسامحه.. تعطي انطباع عند اللي حوله بمصارحته بطريقه بسيطه.. وواثقه انه ما راح يفهم غلط..!!

ابو سعود : شوفي اللي يصلح لكم وانا ابوك.. وبلغونا..

هند باحراج : باقوله يدق لك.. واتفقوا على كل شئ.. وطلعوني منها..

ام سعود : وتستغنين عن معرفة التفاصيل..

هند توردت خدودها وسكتت..

وقبل لا أحد يتكلم كانت مي داخله.. وجلست لاصقه بأمها.. وكأنها- نفس العاده – تبغى تقول لها شئ وتخاف تردها.. بس ام يعود ما عطت مجال..

بعدها بشوي دخل سعود.. وواضح الارهاق على ملامحه..

سعود يجلس قريب من ابوه : السلام عليكم..

رد الكل السلام..

ام سعود : وش في وجهك متغير..؟؟ تعبان..؟؟

سعود : لا.. شوية ارهاق بس..

مي واللي بدت تتملل : يمــه..

ام سعود بضيقه : خير..؟

مي بتمهيد : بكره ملكة عفاف..!

ام سعود : وبعدين..؟؟

مي وتبلع ريقها : بنروح..؟؟

وقبل ترد.. سمعت ابو سعود وهو يقول لولده : ما علينا منهم.. الله يستر على الجميع..!!

سعود : أنا اسألك سمعت بهالكلام.. وهو صحيح...؟؟

ابو سعود بتفكير : والله ما أدري.. الله يستر علينا وعليهم..

وقام ابو سعود من مكانه : باطلع عندي موعد.. وانتي هند خلي أخوك يتفق مع ماجد على كل شئ.. ويقولي.. زين..؟

هند بصوت منخفض : ان شاء الله..

مي اللي ما قدرت تتمالك نفسها.. بفضول قالت : وش السالفه سعود..؟؟

سعود تنهد وكلم أمه : بكره ملكة عفاف لعبدالعزيز..؟؟

ام سعود باستغراب : إيه..

سعود بتأمل : الحمد لله.. الله يوفقها..

ام سعود : الحين وش سالفتك..؟ ووش جاب طاري بنت أختي فالموضوع..؟؟

سعود بملل : يقولون.. أن سامي.. اللي كان بياخذ عفاف.. ماسكينه الشرطه..!!

ام سعود متفاجئه : ليش..؟ حادث والا وش فيهم...؟

سعود بتهكم : أي حادث يمه الله يهديك..؟؟ لا ماسكينه بقضيه أخلاقيـــــه..!!

مي شهقت بصوت غير متوقع..! وهند ظلت متفاجئه..

ام سعود بتأثر : يالله الثبات... الله يستر على المسلمين.. فك الله بنت وخيتي.. الحمد لله.. الحمد لله..

هند : وشلون عرفتو..؟

سعود : علم الشر يبين.. وينتشر مثل النار في الهشيم..

ام سعود : والحين هو بالسجن..؟؟

سعود ابتسم : وهذا اللي قاهرني.. أبوه طلعه بكفاله.. وسفره خارج المملكه.. عشان يغطي على الفضيحه ومركزه الاجتماعي..!!!

هند : كنت متوقعه... سبحان الله.. هالواسطات تدخلت في كل شئ بحياتنا..!!

مي بملل : يمه.. بأروح السوق اشتري لملكة عفاف..!!

ام سعود : ومن عازمك..؟ إذا أنا خالتها مانيب رايحه.. تروحين أنتي..؟؟

مي بتحدي.. وعيونها على سعود : غاده قايله لي تبيني جنبها..؟؟

سعود بعناد : ارتاحي.. ما فيه طلعات لا لسوق ولا لغيره.. والملكة مقتصره على الاهل.. وأنتي غير مرحب فيك..!!

مي فاتحه عيونها.. قامت واقفه وشوي وتصيح : أصلا أنتو دايما كذا.. ما تحبوني.. بس تدورون اللي يضيقني.. لو أبوي هنا كان ما سمح لاحد فيكم يتحكم فيني..!!

وراحت فوق وهي مقهوره منهم..!!

وهند تطالع سعود ومخفيه الضحكه.. وسعود نفس الشئ..

أما ام سعود فظلت تحمد ربها على أنه انقذ بنت اختها من سامي الزفت واشكاله..!!!

/:/:/:/:/:/:/:/:/:/:/:/:/:/:/:/:/:/:/:/:/

بغربتها.. كانت تعاني الامريّن.. بعدها عن وطنها.. وزعل والديها..!!

التفتت تطالع عبير وهي تلعب على الارض عندها... يمكن هالبنت هي الوحيده اللي تخفف عليها وحدتها وضيقتها..

أما أمها فكانت تحاول ما تظهر اهتمامها قدام اهلها.. عشان ما يجبرونها على العكس.. وهذا بحد ذاته شئ تشكر عليه مها..

كانت تجول بنظرها ارجاء الغرفة.. اليوم المفروض ان يوسف يجي يخطبها..!! دارت تساؤلات وأفكر كثيره برأسها.. وشلون بتعرف عفاف باللي صار.. ووش راح تكون ردت فعلها..!! كانت تتمنى لو فيه كمبيوتر.. كانت دخلت النت وارسلت رساله لعفاف.. وبلغتها باللي صار.. لكن ما بيدها حيله.. واذا ابوها للحين ما ارغمها على شئ.. فهو شئ طيب.. وبوادر صلح جيده..

انتبهت على الباب اللي انفتح.. ودخلت مها وعلى وجهها شبح ابتسامه..!!

قالت مها وهي تتابع ملامح وجه العنود : بنطلع..!!

العنود ابتلعت غصتها.. ما امداها تتفاءل.. وهذا اول فال لها.. بيطلعون ويتركونها وحيده..!

قالت بدون اهتمام : وين..؟؟

مها : قال ابوي ان المستشفى قريب.. ولازم نروح له ونشوف الاجراءات اللازمه....

وسكتت..

العنود فهمت من سكوتها.. أنها انتهت.. لكن لما شافت علامات الحيرة على وجهها استغربت..

العنود سألت : مها.. فيه شئ..؟!!

مها بتردد : بصراحه... أبوي يبغانا نطلع... بس.. أنــتــي لأ..!!!

العنود منصدمه : يعني....!

وما قدرت تكمل..

مها جت وجلست جنبها : العنود.. أنتي عارفه وش كثر غلاك عند أبوي.. ومستحيل ينسى اللي صار بسهوله..!

العنود بضيقه : ليش وش اللي صار..؟؟ تقدرين تفهميني..؟؟ إذا اهلي وهم اهلي الي ربّوني ما صدقوني.. تبغين الغرب يصدقون..!!

مها : عنوده.. وش الداعي لهالكلام الحين..؟؟

العنود وتحاول تخفي عبرتها : لان هاليوم.. كان بالنسبه لكل بنت حلم.. فما بالك بي أنا.. "حبيبة أبوها "

سكتت مها.. ما توقعت العنود بهالصراحه..

سمعو صوت من برى الغرفه..

" يـالـلـه يـامـهـــا تــأخـرنـــا "

مها : هذا أبوي.. تتوقعين سمعنا..؟؟

العنود ماقدرت تتحمل.. نزلت رأسها.. وحطت يديها على وجهها.. وبدت تصيح بألم...!

مها مسحت على رأسها.. وقامت..

مها : لو شفت بحال أحسن من كذا كنت تركت معك عبير.. أو جلست معك.. لكن أمي تحتاجني معها..

وطلعت من الغرفة.. تاركة العنود وراها.. كتلة من الالم والعذاب البشري..!!

/:/:/:/:/:/:/:/:/:/:/:/:/:/:/:/:/:/:/:/:/

كان وصوله لبيت جدته.. هو أمله.. مجرد دخوله لهالبيت يعني نهاية معاناته..

ام خالد بدهشه ممزوجه بفرح : يوسف.. هلااا وغلااا.. ومسهلااا ومقربااا..

يوسف بابتسامه لترحيب جدته : الله يسلمك.. كل ذا لي..؟!

ام خالد وتجلس : واذا ما هوب لك.. من هو له أجل..!

وبعد ما جلسو وتقهوو..

يوسف : ما أنتي بحاضرة الملكه بكره يمه..

ام خالد : يا وليدي وش لي بالروحه وهي ملكة بس.. لو هو عرس رحت.. ورقصت بعد..!!

يوسف : ههههههههههههه.. أفاا.. وبترقصين بعرس غير عرسي..؟!

ام خالد : عااد أنت أعرست.. وانا قلت لا..!

يوسف : حكمة ربي.. وش اسوي..

ام خالد : الحين انت ما رحت اليوم تخطب..؟؟

يوسف متفاجئ : من قالك..؟

ام خالد بحيا : العصفووورة..

يوسف ما قدر يمسك نفسه : ههههههههههههههه.. وبعد علموك كلامهم..!

ام خالد : شفت الدنيا..!

يوسف : ايه ياميمتي.. رحت اخطب.. والعروسه طارت..

ام خالد بتعجب : هووّوو... وهي حمامه تطير..؟؟!

يوسف مبتسم على الفاظ جدته : لا.. قصدي سافرت..

ام خالد : ياحبني لك يا وليدي.. بدلها غيرها..

يوسف : لا ما بي الا هي..!!

ام خالد : الله يثبتنا.. ومن هي ذي اللي ما تبي الا هي..!

يوسف بصراحه : وحده من صديقات عفاف..

ام خالد بعد تفكير : عسى ماهيب ذيك المزيونه.. اللي جت بملكة بنت خالتك..!

يوسف متفاجئ : وهي جت للملكه..؟؟

ام خالد : والله يا ابوي ما ادري كانها هي.. بس والله انك رجال تعرف تختار..!

يوسف بفرحه : حمم.. والله..؟؟ بس سافرت يا يمه..

ام خالد بتقوم : مرد المسافر يرجع... وانا امك..

يوسف قام معها.. وكلامها يتردد بباله..

سلم عليها.. وطلع من عندها بيرجع البيت.. وركب سيارته... وباله مرتاح...!!

/:/:/:/:/:/:/:/:/:/:/:/:/:/:/:/:/:/:/:/:/

بيوم الملكه.. ترددت عفاف.. تعدل شعرها.. وتسوي مكياجها بالمشغل.. ولا بالبيت..

فمثل العاده.. راحت تشاور خواتها.. وكل وحده ابدت لها رأي.. فاحتارت أكثر.. والمشكله ان الوقت كان قريب العصر.. وما يمديها تسوي أي شئ.. حتى حجز بالصالون ما عندها..

غاده داخله عليها : هااه وش قررتي..؟؟

عفاف : والله محتاره.. احس اني ضايعه..

غاده : عمتي بتجي الحين.. وشوفي رايها..

عفاف : اذا كذا بدخل اتسبح.. واشوف بعد كذا وش بأقرر..

غاده : اووكي.. انا بانزل تحت.. تبغين شئ قبل انزل..

عفاف : لا مشكووره..

وقبل تطلع غاده سمعت عفاف تسألها : امه ووفاء بيجون..؟؟

غاده ابتسمت : لهالدرجه كلمة " خالتي " ثقيله على لسانك..؟؟

وكملت : ارتاحي ما أحد بيجي الا عمتي..

وطلعت.. وعفاف رجعت تكمل تجهيز نفسها..

.

.

.

.

.

بطريقهم لبيت اخوها.. كانت ام فارس تفكر انها تعتذر منه على اللي تلفظت فيه بحقه.. لكن اللي هون عليها انه من البارح ما حاول يناقشها بالموضوع.. او حتى بان عليه انه زعلان..!!

فعشان كذا.. حبت ان الموضوع ينتهي بسلام.. احسن من المشاده والاخذ والرد على غير فايده..!!

وصلوا لبيت ابو يوسف..

ووقف بها عشان تنزل..

ام فارس فاتحه الباب : ما بتنزل معي..

ابو فارس ويطالع قدامه : ما له داعي.. الله يوفقهم..

ام فارس فهمت انه للحين متضايق.. فقالت تلطف الجو : لا تتأخر علي.. اخاف تحلا لي القعده..!!

واللي بغته صار..

شافت طيف ابتسامه على وجهه.. وهو يرد عليها بعد ما التفت لها : ما نستغني..!

نزلت ام فارس.. وسكرت الباب.. وهو تحرك وعينها تطالعه.. وتدعي ربها يحفظه...

يتبع ,,,,

👇👇👇

تعديل المقال