رواية انا الضحية وانا الجلاد -27
ترا أبوي مشتب يبيك تحت...
عبدالمجيد: نورة وش يبي!!؟
نورة: مادري معصب مرة...وبس يتحلطم...
عبدالمجيد: ياربيه!! طيب تتوقعين ليش!!؟
نورة: يمكن..أنا أقول يمكن.. دري إنك تاركن الدراسة...
لأنه يقول عنكم بطالين!!
عبدالمجيد: مصيبة!! نورة قولي ما لقيته...راح عند محسن..عند إبليس بس مابي أنزل..
نورة: إسمع ...أنت إنزل وأنا أبروح أقوم أمي نورة تنزل ..تفزع لك..
عبدالمجيد: تفكن!!
نورة: أفا عليك...أبوي ما يسكت إلا إذا هي سكتتوه...
خبره انا تراي...
"في الصالة"
_ينزل عبدالمجيد, وهو يتظاهر بعدم الإكتراث...ولكن يداه ترتجفان_
أبو عبد العزيز: هلا والله ...هلا بالفالح...
شاطر.. معطل هااااااااااااااه..
ثلاث شهور تداوم بالشركة.... وأنا آخر من يعلم!!
ليش تترك الدراسة!!
عبدالمجيد: .................................
أبو عبدالعزيز: تكلم إنطق...!!
ليش تركت الدراسة..!!؟
عبدالمجيد: ما أحبه يبه...مليت خيست بالجامعه ربعي تخرجوا وأنا أحوس بنفس المستوى!! قلت أشوف رزقي بلا من هالدراسة اللي دافنن به عمري...
أبو عبدالعزيز: لا يا شيخ!!
خذ شهادتك ذي دور لك على شركة توظفك..بشهادة الثانوي...
من اليوم ورايح... الشركة ماتطبه...
والراتب اللي أدفعه لك مقطوع...تبي دراهم إشتغل بشهادة الثانوي!!
عبدالمجيد: يبه طيب الحين أنا شايل الشغل كله...
ومب لازم شهادة... هذا حلالكم.... وأنا أبشتغل به أولى من الغريب..
أبو عبدالعزيز: تخسى!!
أولاً هذا مب حلالك.... حلال عذيب وخواته... وأنت مالك إلا الفضلة...
ثانياً...أنا بما أني مدير الشركة ما أوظف إلا ناس أكفاء ومعهم شهادة جامعية!!
أما شهادة الثانوي ذي أبوظفك به سواق عند خواتك بدال مراد...
وخل مراد يسوق بي... ويقضي أشغالي..هذا إذا تبي راتب..
ولا إحمد ربك إنك تآكل ببيتي وتشرب..
الجدة أم عبدالله: هذا مب بيتك يا عبدالله!!
هذا بيتنا كلنا...ومجيد موب ولدك لحالك..مجيد ولدي!!
أبو عبدالعزيز: هلا يمه... الله يخليتس... بس الولد لازمن يتربى...
والفلوس اللي تجيه بالساهل خله يعرف قيمته ...
عشان بكرا ما يضيع لامن ضاعت عنه...
أم عبدالله: كلامك صح... بس مالك حق تعزله من شغل الشركة..
منتب راعي الحلال... ومجيد عنده معرفة بالشغل..هذي تجي مكان الشهادة..
مجيد الحين يكلم عذيب...ويطلب منه توظفه إذا هي عيت يصير سواق..
وإذا وافقت هي تسوق كروة شغله... وأنت ما عليك منوه..مب؟
أبو عبدالعزيز: زين يمه... كلامتس صح...
بس أنا بعد لي معه حساب ثاني؟
تعال معي للمكتب..فيه كلمة راس أبيك به.. يا .. الفالح!!
عبدالمجيد: تآمر يبه... هذاي جاي...
*********
"في مكتب عذبة"
عذبة تقلب الأوراق وقد بدت عليها العصبية, رفعت رأسها وصرخت:
كاميليا!! وين الملف الأسود...
ياربيه كان هنا!!
كاميليا_تأتي مسرعة_: شوفي هنا مدام!!
عذبة: يووووووووووووووه الله لايعمي دلايلنا...قلت أكيد إنتس مرقيته..
شوفي خوذيه وخوذي هالكيس الأبيض..ووديهن لنجود..
قولي له تسلمهن مجيد يد بيد..خلاص!!
كاميليا: أوكي مدام...لكن...أنا
أنا أبغى كلام معك...ممكن..؟
عذبة: سمي .. وش تبين؟
كاميليا: I'm missed my family…
I spend must my life with you…
You are my family, but now I want leave to my country..
My mother is old woman ..
My children now are young …
So, all my family needs me!!
Please, forgive me...
I know, my work now is important for you…
But I am the most important for my family!!
Sorry… I can't still in here...
(أنا أفتقد عائلتي.. قد قضيت أغلب حياتي معكم..فأنتم عائلتي..
لكن الآن أريد أن أغادر لوطني...أمي عجوز..أبنائي شباب..
لذلك كل عائلتي تحتاجني..
رجاء سامحيني...
انا أعلم أن وظيفتي الآن مهمة لكم...ولكني أكثر أهمية لعائلتي!!
عذراً...لا يمكنني الإستمرار هنا...)
عذبة: كاميليا!! وأنا!!
هناك عندهم أمك..أنا هنا من عندي!!
لا..مستحيل تروحين...
ما أقدر أتحمل المسؤليات...
شوفي أزيد لتس الراتب..أعطيتس اللي تبينه... بس الله يخليتس إجلسي لو مو عشاني..
عشان نصوري..نصوري يحتاجتس!!
كاميليا: sorry madam!!
Nasser will be better with madam Maha!!
You are strong. You can administrate the house with out me!!
I believe that!!
(عذراً مدام..ناصر سيكون بحال أفضل مع مدام مها!!
وأنت قوية ..أنت تستطيعين إدارة البيت بدوني!!
أثق بذلك!!)
عذبة: كاميليا ... مالي وجه بعد كل هاللي سويتيه إني أرفض لك طلب...
أنتي وقفتي معي يوم كثير من الناس تخلوا عن...
أنتي نعم الصديقة والمربية والمديرة...
والله يعين البيت كله على فقدتس...
مير أنا بسألك ... وأنتي أكثر وحده أثق برايه...
ناصر... من أحسن له ..يعيش هنا معي ومع خواته ولا مع عمتي مها؟
أمي بتسامحن لو عطيته مها؟!!
كاميليا hhhhhhh, my dear
You are busy women,
While Nasser needs to family,
Mother and father...
You may be a mother but who are the father?!!
Believe me; he will be well with mr.Fahad and madam Maha
And madam Fara7 will be happy for that!!
So, do the correct and don't think what will be happen!!
Also, this step will be the solution for a lot of troubles..
(أوه عزيزتي, أنتي سيدة مشغولة بينما ناصر يحتاج لعائلة, أم وأب...
أنتي ربما تكونين كأم لكن من يكون الأب؟!!
صدقيني, هو سيكون بخير مع سيد فهد ومدام مها,
والسيدة فرح ستسعد لذلك!!
لذلك, إفعلي الصح ولا تفكيري ماذا سيحدث!!)
عذبة: والله إنتس صادزه...
بلكي نرجع الفرحة للبيت مرتن ثانية...
________________________________________
"في مكتب أبو عبدالعزيز"
عبدالمجيد: سم يبه؟!!
أبو عبدالعزيز: أنا مانب أبوك!!
بوه ولد يسوي بأبوه كذا!!
عبدالمجيد: حقك علي يبه.. بس أنا أدري إنك بتزعل..
ماحبيت أضيق صدرك..كان ودي أقولك انا بوقت مناسب...
أبوعبدالعزيز:الدراسة بحريقة!!
دراستك لك...وأنت اللي بتاكل به علقه...
تحسبن يوم أنا حريص على دراستك عشاني..
أنا أبيكم تصيرون رجال وتعتمدون على أنفسكم...
الرجل اللي ما معه شهادة وش يبغى به!!
مير خلنا من الدراسة...
الحين ليش تفصل رأفت ومحمد وعلي!!
خير هو على كيفك!!
مالي راي ما تشاورن!!
وتفصلهم مرتن وحدة!!
من بكرا بيرجعون وأنت اللي بتروح تعتذر منهم...
أنت ماتدري عن غلاهم عندي!!
عبدالمجيد: فصلتهم!!
أح ماتوقعته تسويه...بس أنا مالي دخل..هي اللي فصلتهم..مب أنا..
أبوعبدالعزيز: عذيب!!
ووش أدري عذيب إنهم متأخرين بشغلنا!!
أنت سوسة النخلة قال لي علي كل شي...
ترجعهم من بكرا ومثل ما أنت زنيت على عذيب تفصلهم تزن عليه ترجعهم..
عبدالمجيد: أها...علي اللي قال لك إني تارك الدراسة...
مير يا يبه أنا مازنيت على راسه ولا شي..
هي طلبت تقرير مستعجل ومفاجئ..
أرسلت أبو ياسين وقالت خلال ساعة وحدة تعطونه التقارير..
وربعك ذولا مالقيتهم..
آخذين إجازة من أنفسهم...
طلبت من الأقسام حقاتهم تقارير عن العمل اللي أنجزوه..
وتأخروا... ومع ذلك كلمت عليه وقلت له إنه فيه ناس ماخذين إجازة..
وبيتأخر تسليم التقارير....وطبعا ماقلت له إنهم طالعين بدون إذن...
هي يوم تسلمت كل التقارير... من بكرا كلمت علي وقالت أبكلمهم...
قلت له مهب موجودين... عصبت وقالت الشغل متأخر بسبتهم..
وصارت تلاشط وتهاوش... وبعدين سكرته وكلمت مدير الموظفين..
وصارت تخانقه ليش تسمح لهم بإجازة بدون علمي..
وحنا وقت حرج وما أدري كيف..قال له هو إنهم ما أخذوا إجازة من عنده..
يعني متغيبين بدون عذر..هنا هي ولعت...
كلمت علي وقالت لي رح وتفاهم معهم ثمن كلمت وقالت لا..أنا بتفاهم معهم..
والظاهر إنه فصلتهم...
أبوعبدالعزيز: والله وطالت يدتس ياعذيب!!
لا... هذي رفعت راسه.. يبي له قص رقبة...
أنا أوريتس شلون تنزلين الناس مقاماتهم...
عبدالمجيد: طيب يبه ماتدري من حطت بدالهم؟
أبوعبدالعزيز: من ما حطت ما يهمن بس هم بيرجعون يعني بيرجعون..
تدري رح الحين وناد عذيب القملة ذي.. وجبه بذا...هنا فاهم!!
لا تروح يمين ولا يسار...إنقلع!!
عبدالمجيد: أبشر يبه... بس شوي شوي عليه ترا لسانه طويل...
أبوعبدالعزيز: مخوفتك!! أقص لسانه ورقبته بعد!!
ما بقي إلا بزران يرفعون روسهم علينا!!
*********
"في الحديقة"
عذبة تتصل بالجوال على فهد...
ألو .. السلام عليكم..
فهد: وعليكم السلام والرحمة...شلونتس عذبة؟
عذبة: الحمدلله وشلونك أنت...وشخبارك بشر عنك؟
فهد: الحمدلله..تمام التمام إلا شخبار نصوري؟
عذبة: بس نصوري!!
فهد:..............
عذبة: فهد ...أنا أبيك تفهمن...
حرام اللي قاعد تسويه بمها.. والله حرام..
فهد: رجاء عذبة.. الموضوع منتهي وغير قابل للنقاش..
عذبة: متى بترجع من السفر...؟
فهد: بعد بكرا إن شاء الله..
عذبة: زين أبجهز ملابس نصوري... وأبقول لمها تستعد ترجع لبيته ورجله وحياته..
فهد: عذبة!! لا... أنا مابي ناصر..
أنا كنت أبي مها تأيس من بس...والله أبيه تجيب هي وتشوف حياته..
عذبة: ناصر يبيك!!
فهد... الدنيا كله ما تسوى إحساسك إن فيه أحد يحبك ويحميك...
لا عيال ولا حلال.. أهم شي بها الدنيا الأمان..
وإسألن أنا...
لا تحرم مها الأمان مثل ما إنحرمت منه أنا...
فهد.. أنت يمكن تنسى مها...
بس مها بتتذكرك بكل لحظة تقسي عليه الظروف...
مها لو تزوجت أحد غيرك ما راح يكون معه مثلك..
فهد: وش يضمن..إن شاء الله يصير أحسن من..
عذبة: مستحيل...وحدة مطلقة بعد 10 سنين وين بتلاقي رجال...
إلا مطلق وعنده درزن عيال...
أو واحد معدد...وتقعد تصالي هالحريم والجوار...!!
فكر بعقلك.. تكفى..ترا تكفى تهز الرجاجيل!!
فهد: وسعي صدرتس يا عذوب...
وإن شاء الله ..يرزقة ربي من واسع فضله...
عذبة: طيب مو عشان مها...عشان مساعد أخوك...
أنت عارف إن مها مثل أمه...
حرام يعاني مرتين بشيء ماله ذنب به!!
يكون ضحية زواج الأجنبية...
وضحية تضحيتك بمها عشان الخلفة!!
ياخي فكر بعقلك!!
فهد: عذبة اللي أعرفة إنتس إنسانة عقلانية...
وحرمة بعقل رجال... وقفي بموقفي شوي...
وتخلي عن عواطفتس...
وصدقين بتعذرينن وبتأيدينن...
عذبة: هذا آخر كلام؟
فهد: آخر كلام...
عذبة: ترا ما بقي على قضية العدة إلا يومين...
فهد: قلت لتس آخر كلام...
_في هذه الأثناء تأتي آني وتخبر عذبة بطلب مجيد لها_
***********
"في مكتب أبي عبدالعزيز"
أبو عبدالعزيز: أهلاً وسهلاً...عسى ما كلفنا عليتس وجبناتس لنا!!
عذبة: لا ...وش بغيت؟
أبو عبدالعزيز:أقول ... من الآخر مافيه أحد تشاورينه ؟
عذبة_تشير لعبدالمجيد_: إلا دايم أشاور هذا...مجيد..
أبو عبدالعزيز: لا والله!!
ومن قال لتس شاوريه؟
عذبة: أنا حرة نفسي ما أنتظر أحد يقول لي أشاور مين...
أبو عبدالعزيز: وأنت _وينظر لعبدالمجيد_ مشيرن عليه
تعيزل وتبيزل بالشركة بكيفه؟
عبدالمجيد: لا...هي تشاورن بنطاق الشغل!!
أبو عبدالعزيز: ليش تفصلين رأفت ومحمد وعلي..؟
عذبة: لأنهم سبب في تأخير الشغل...التأخر في كثير من المراحل بسببهم!!
أنذرتهم كم مرة..وفي الآخر البشاوات آخذين إجازة
من أنفسهم وراتبهم ماشي ...وكل هذا وتقول ليش فصلتهم...!
أبو عبدالعزيز: الحين كل الموظفين مالقيتي تحطين حرتس فيه إلا هم!!
إسمعي أنا المدير للشركة..وهم بيرجعون رضيتي ولا زعلتي!!
عذبة: عفواً...أنت مدير الشركة وأنا صاحبة الشركة...
أنا مو مستعدة أخسر سمعة شركتي عشان ربعك!!
أعتذر بشدة...أتمنى لو تطلب مني غير كذا!!
أبو عبدالعزيز: وش أفهم من كلامتس!!
عذبة: .........
أبو عبدالعزيز: أنتي وش حاسبتن نفستس؟
أنتي بزرة..أنتي ولا شي...أنتي قاعدة تثبتين نفستس بالأوامر!!
إسمعي يا عذيب ... إن ما رجعوا بكرا أنا أترك لتس الشركة..
وأروح لشغل المعارض وخلي سعد يجي لتس!!
أنتي ما يأدبتس إلا سعد...
ولا اللي يناظر خاطرتس ويرحمتس ماترينه شي!!
عذبة: أوه يابو عبدالعزيز...أنا ما ودي تطلع من الشركة!!
لكن اللي يؤسفني أكثر هو بقاء مثل هالمتسيبين بشركتنا...
وأقول لك قبل لا أروح
أنا مو محتاجة رحمتك...مشكور سيدي
واللي مربين ماجد الله يرده
لا سعد ولا غيره يقدر يغير شي من اللي ربان عليه أبوي!!
عن إذنك.. بروح أدور أحد يجي مكانك!!
_تخرج عذبة وسط ذهول أبو عبدالعزيز وإبنه_
عبدالمجيد: يبه قلت لك... كلش يجي بالهداوة!!
أبو عبدالعزيز: ...................
معقولة اللي قالته!!
شلون يمشي الشغل بلاي!!
إي والله ما هميته ولا شي!!
مجيد سمعته ... تتحدى!!
عبدالمجيد: يبه الله يهديك أنت عارفن إن عمي ناصر الله يرحمه أعرف ببنته
يوم كتب الشركة باسمه...هذي رجل لابس عباة!!
أنا أعرفه... ما يهمه أحد!!
أبو عبدالعزيز: إسمع ياوليدي...
إن طلبت منك تصير بدالي لا تعيي...
ما يصير نخليه لحاله...مهما صارت قوية هي مرة وضعيفة!!
********
"في مطبخ بيت عذبة"
نورة: نجووووووووووووووووول إبلعي!!
لا سجن ولا بلاوي هع هع هع!!
نجلاء: هههههه ... والله يا عذبة خطيرة!!
نورة: كلنا أنا عذبة ومجيــــــــــــــــــــــــــــــــــــــد!!
سمعتي هاه مجيد!!
نجلاء: أقول نورة... عذبة ليش عيت عليتس تكلمين أبو بدور؟
نورة: قالت أخاف تخربين الطبخة...
بدق الحديد وهو حامي....
وكلمته هي... وتوعدته...وقالت له أنا بنسى اللي صار عشاني وعدت إختي..
خخخخخخخخخخخخخخخخخخ
والله لو تشوفينه يوم قال له إنه ألغى الشكوى
قامت تطامر وتصيح..ونست إن مجيد فيه...
نجلاء: أح ومجيد يناظر!!
نورة: لا غمض..هههههه
نجلاء... بندر متى يجي لمكم؟
نجلاء: لا حول ولا قوة إلا بالله العلي العظيم!!
أنتي وبندر ذا!!
تدرين بقول لتس شي.. بس لا تزعلين!!
نورة: وشو!!؟
نجلاء: وما تصيحين!!
نورة: لا...قولي وشو؟
نجلاء: حصة بتاخذ بندر...حصة بنت خالي عبدالرحمن أخو أمي عذبة اللي بالقصيم...
وبيجون بعد إسبوع يجهزون...
نورة: هـــــــــــــــــــــــــــــــــــــــــــــــــ ــــــــــــــــــــــــــاه!!
_وبدأت شفتاها ترتجفان_
نجلاء: معليش يا نوير...
بس أنا قلت لتس عشان تنسينه!!
وترتاحين..ترى بندر مادري عنتس!!
نورة: متى!!وليه!! وشلون!!
نجلاء: نورة حبيبتي... معليش أنا قلت لتس دايم...
الحب ما يجيب إلا المشاكل!!
نورة: طيب أنا أحبه!!
نجلاء: هو مادري عنتس وأنتي صغيرة...
نورة: حقيرة... أنا أكرهتس!!
نجلاء: شكراً...
"في الحديقة"
عذبة تتحدث بالجوال بعصبية مع عمتها ريم...
ريم: طيب ... حاولي فيه!!
عذبة: أووووووووووووهووووووووووووو
أنتي غبية ولا تستغبين!!
ماعليش عمه بس تراتس تغثين..
أقول تيس تقولين إحلبيه!!
ريم: ليتي عندكم... كان ما خليته يطلقه!!
عذبة: بس توك تمنين تصيرين عندنا!!
ريم: وش قصدتس يا عذبة؟
عذبة: ولاشي... بس اللي إيديته بالأميه مب مثل اللي إيديته بالضو!!
أنتي مبردة وبس بهالجوال تحطين حرتس بي!!
تراي صرت عندكم مثل الطوفة الهبيطة!!
كل من إنقهر من شي حط حرته كله بي..
تعبت والله منكم...
ريم: أنا وش دخلي بعيال عمتس وفيصل لامن غثوتس...
وش سويت لتس أنا!!
عذبة: إيه ما سويتي شي!!
يوم سالفة بنتس وأنتي مزعجتن أميني ..بنتي يا عذبة!!
بنتي أننا ما أفلت به إلا لكم..!!
بنتي لا تضرونه.. وكأني أنا اللي مسببه المشكلة!!
ولا كأن المسؤل عن هالغلط أنتي وأهله وهي...
ريم: أنا وش دخلي!!
أنا بعيدة..بعيدة مو بكيفي أرجع أضف بنتي عنتس!!
أنتم اللي خليتوه تتعلم كاراتيه..
عذبة: سعود بطل عالمي بالكاراتيه ولا تعدى بعمره على أحد!!
الغلط غلطكم كلكم اللي جحدتوا أبو نجلاء وكتمتوا على الموضوع..
لو كانت نجلاء قبل تسمع عن أبوه وعن اللي صار
كان قدرت تدافع عنه قدام كل البنات..
لكن إذا كان مجرد طاريه تتحاشونه وكأنه عار فهذا اللي خلاه تسوي اللي سوته..
ريم: أوف!! أنتي وش بتس شايشة اليوم!!؟
إسمعي حاولي بفهد مرة ثانية..
عذبة: أقول عمه... أنا كلمته ... الحين دورتس!!
ريم: زوجي ما يرضى!!
عذبة: عاد شوفي لتس دبرة...
_أنهت عذبة الإتصال وهي في قمة التوتر.. وقفت تحت النخلة التي كان يجلس تحتها دوماً جدها فتبسمت وأغروقت عيانها بالدموع وهمست:
إيه الله يرحمك يالغالي... شايلن هموم وهموم ولا كنت داريه..
يا بركة وجودك...آآآآآآآآآآآآآه..
ياحبي لك..ويافقدي لك.. الله يرحمك ويجمعنا كلنا بجنات النعيم...
_تعالى صوت من خارج أبواب القصر, صوت إمرأة تتجادل مع الحارس, إقتربت من البوابة وتسمعت للصوت_
الحارس: معليش يا حجة.. بس والله ما أدرش!!
السيدة: أنا أبدخل أبدخل... إيش يعني ما تقدر؟
الحارس: البشوات منبهين عليا مدخلش حد حتى أستأزن..
خليني أكلم الستات وهم اللي بيدخلوكي!!
السيدة: أنا أبغي بنت ناصر!! هو يعرفني.. قلهم أم علي عند الباب!!
_إقتربت عذبة من البوابة وظهر ظلها على الباب الزجاجي الملون وطرقت الباب_
عذبة: عم حسنين... خله تدخل..حياتس الله يا عمة تفضلي!!
الحارس: حاضر يا ستي...بس لما بتدخلي كل الغلابة اللي بيوأفوا عند البوابة كل يوم
حتعمل مهزلة!!
عذبة: ماعليك...
السيدة: كش على وجهك !! شوف الناس الكريمة مو هالعمامة!!
عمى يعمي عيونك!! بلا.._وتدفعه وتدخل_
ربي يرزقكم من واسع فضله يا كريم!!
_تدخل المرأة ثم سلمت على عذبة بحرارة_
عذبة: تفضلي داخل يا عمة!!
السيدة: أم علي...أنا أم علي...
عذبة: حياتس الله أم علي.... تعالي من هنا ندخل...
أم علي: لا يا بنتي... أنا أبكلمك هنا..أنا جيت من حي بعيد...
وما أبغى أتأخر...
عذبة: على أمرتس...وش أقدر أخدمتس فيه؟
أم علي: معليش.. بس أتعرف عليك الأول... أنتي إيش تكوني للشيخ الله يرحمه ويوسع عليه..؟
عذبة: أنا حفيدته..
أم علي: طيب إندي لي على أمك...
عذبة: أمي!! الوالدة متوفية..
إذا كان فيه معاملة بينك وبينه أنا اللي راح أحله بإذن الله..
أم علي: بسم الله عليكي يبقى أنتي هنا المسؤولة..
يا بنتي تعبت من الوقفة أه_وتجلس على الأرض وتجر طرف جلابية عذبة للأرض_
عذبة: عمه..أبروح أجيب لتس كرسي!!
هنا قريب..
أم علي: لا يا بنتي... إجلسي معاي..
أبغى أقول لك كلمتين وأخرج...
عذبة_تجلس وهي تتأمل السيدة المنقبة والتي يظهر عليها البؤس الشديد والفاقة_
إسمعي يا بنتي...أنا وحدة غلبانه... زوجي زمان يمني كان يشتغل سواق عند جدك..
وبعدين أنخبط بحادث ومات وترك لي أولاد ...
ومن يومها والشيخ رحمة الله عليه وهو يصرف علينا..
أشترا لنا بيت بجنب بيت أبوي.. وكل راس شهر يرسل لنا طعام..
ويرسل لنا فلوس... زوجت بناتي وأولادي...
وإستغنيت...روحت لمكتبه وقلت له أنا خلاص مو محتاجة..
ومن يومها وإنقطع..لكن قبل سنة إترملت بنتي...
والبيت أمتلى بزورة.. والحال صعبت...
رحت للشركة قالوا لي أتوفى... رحمة الله عليه..كان أبو لبناتي....
آآآآآآآآآآآآآآآآآآآآآآآآآآآآآآآآآآآه
والله حزنت عليه كثير.... وبكيت...
الله يرحمه...فقدناااااااه
عذبة: الله يرحمه...مو بس أنتي فقدتيه...كل شي هنا فقده..
أم علي: شوفي يا بنتي...أنا ما أبغى تعطوني لي...أنا مستورة أشتغل بالنهار بجامعة...
ولكن بنتي صعبت عليها الدنيا..وهي ما معها الجنسية عشان تترزق...
بوظيفة.. ولا حاجة...
عذبة: تشتغلين بجامعه.....!!
أم علي: أيوه يا بنتي أنا مستخدمة هناك!!
عذبة: عمه إكشفي وجهتس!!
مافيه رجال هنا..
أم علي: حاضر يابنتي!!
_وكشفت أم علي عن وجهها فذهلت عذبة_
عذبة: عمه أنتي تشتغلين بنفس المبنى اللي أدرس فيه!!
أنا طالبة بالجامعة...
أم علي: والله يا بنتي!!
عذبة: عمه إذا ما عندك مانع...أبرسلك الحين مع السواق..
ويوصلك لبيتس... ومن بكرا إن شاء الله بتوصلتس مقاضي البيت...
بس أنتم عددكم كم!!؟
أم علي: سبعة..أنا وبنتي وأولادها خمسة!!
عذبة: زين يا عمه لا يصير خاطرتس إلا طيب!!
بس لا تنسون جدي من دعاؤكم!!
أم علي: والله أنا وبناتي وأولادي دايمن بندعي له!!
إلا أبسألك سؤال!!
هو ولده الغايب رجع؟
عذبة: لا...الله يرده سالم غانم..يارب يا كريم...
لحظة عمه بدخل داخل أبخلي السواق يجهز السيارة..
لحظة..!!
_هرولت عذبة للداخل..كلمت السائق ليدخل السيارة..
وفتحت حقيبتها..فتحت المحفظة.. ثم صرخت:
أوووووووووووه منس يا نجول ما تبقين فكة!!
فتحت الدرج وأخرجت خمس مائة..
رفعت أحد الملفات فوجدت مائتان...
أدخلت يدها بجي قميصها المتسخ فوجدت عشرات وريالات
ضحكت ورمت بها على الدرج..
أعادت النظر للمحفظة..فتحت أحد الأدراج الجانبية...
وتبسمت حين أخرجت منه ألف ريال
وركضت عائدة للسيدة ولكنها لم تجدها_
عذبة: يوووووووووووه راحت أم علي!!
ياقلبي عليه طلعت من عندي إيدينه فاضية!!
ياخزياااااااااااااااااااااااااااااااااااااه من الله..!!
_إتصلت بالسائق_
عذبة: ألو أبو ياسين...إحفظ بيت المرة ذي...أنت تعرفه!!
أنت كنت تروح له قبل!!
أها يعني هي صادقة...زين... قل له إني أبرسل له الحين حاجة..
لامن وديته تجي أعطيك إياه وتعطيه..زين..سلام..
**************
غاليتي وفاء...
ها أنذا أعود مرة أخرى لأستشيرك ولكن هذه المرة بأمر خاص بي...
ربما وجدت فيك خبرة وممارسة لهذه الحياة..
وربما وجدت فيك أخت تتفهمني..وتنظر بزاوية بعيدة...
تنظر للأمور كماهي لا كما يجب أن تكون أو ما نظنه يكون..
وربما وجدت فيك إمرأة تشاركني القوة والمسؤولية وتقدر الأقنعة التي يجب أن أرتديها...
أي ما كان... أحتاج منك إنقاذي...فأنها أسير للهاوية...ولا أرى غيرها رغم فراري منها..
...
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك