رواية انا الضحية وانا الجلاد -2
أفنان:وشفيك عاد يالفقمة... ليش مبوزة... بدل مشاري ألف منهو يتمناك...
بعدين عادي هذا عمتك أم نجلاء ...
تطلقت وهي عندها بنت ما ضرها تزوجت طبيب وكملت دراستها...
والحين تدرس هي وزوجها برا...
عذبة.... صيحي عادي والله ما أعلم أحد... أعرفك لامن صارت الصيحة فثمك..
عادي ... مافي وحدة تتطلق ما تصيح...أدري أنك تحبينه وما تتخيلن الدنيا بدونه..
عذبة:.......................
تتجه أفنان إلى عذبة وتقف أمامها...
تنظر إليها ... وهي تنتفض كطير مبلل... تمسك بقوة بكتفيها وتنفضها...
وتصرخ بها: عذبة ابكي... اصرخي...عادي قولي انك خسرتي مشاري...
ترا كلن يفقد أحبابه .. هه هذاك فقدتي سعود وأم سعود وأبو سعود...
يعني مشاري ماهو أول واحد تخسرينه عشان تكابيرن... يالله صيحي ...
طلعي اللي بصدرك... عذبة مشاري خلاص تركك ...
إعتبريه مات وصيحي عليه...صيحي...صيحي...
تنفجر عذبة وكأن صوتها ونشيجها قنبلة إنفجرت بوقت واحد...
بكت بحرقة ...وضمتها أفنان وبكت معها....
بعد ما هدأت عذبة قليلاً الجوال يعاود الرنين...
أفنان تأخذه وتنظر إليه: شوفي ..خالتي أم الغلا يتصل بك...منهي؟
عذبة: خالتي وش تبي؟ يا ربيه ما أقدر أكلمها....
أفنان: انقطع... يووووه شوفي ثلاثطعش مكالمة من خالتك لم يرد عليها...
عذبة: وش عنده ؟
أفنان: هه , هذا دقت يالله خليها تنطق هي وولده اللي ما يسوا قرش...
عذبة: لا تقولين كذا عن مشاري... عطيني برد عليها...
أفنان :ياقوي قلبك... تقدرين ماتصيحين...
عذبة: أنتي عارفتني زين أقدر أتحكم بدموعي... جيبي...
أفنان: لا ... أخاف تصيحين وتدري أنك شفقانه على ولدها...
عذبة وهي تأخذ الجوال بقوة : أقول جيبي أفنانوه ..والله ماصيح...
:ألو..
الخالة فاتن((أم مشاري)): السلام عليكم... عذبة...
عذبة:سمي يا خالة...
الخالة فاتن:وش السالفة... ليه يا بنتي تبين مشاري يطلقك... مو حرام عليك تهدمين بيتك بيدك...
عذبة: وشو...
الخالة فاتن:قهرني ... والله اليوم الصبح طردته من البيت, وأبوه زعل منه ...
عذبة: بس أنا...
الخالة فاتن: يابنتي عارفة وش بتقولين ... خواتي ... أمي ماتت من بيرعاهم...
أخوي الصغير...خلي أخوك مع عمتك ونجلاء رجعيها لأهلها
وليلى تدبر عمرها سنة سنتين وهي متزوجة...
أما أنك تدمرين بيتك عشانهم.. لا..
والله لو فرح حيه ما رضت ...الله يرحمك يا أختي...
شوفي يا عذبة أنا حاولت بمشاري يرجع لك وهو يقول مستحيل أرجع لوحدة
ما تبين... ترا مشاري يحبك.. ليش تسوين فيه كذا...
عذبة :..................
الخالة فاتن: والله وهوا يقولي يبكي ...
مشاري يحبك بس تراك بتندمين عدد شعر راسك إنك تخليتي عنه...
الله لا يسلطك على نفسك... عنيدة... طالعة لأبوك...
ماورث لك إلا العناد ورفعة الخشم...
الله يجبر وليدي ولا أنتي تنسينه...
مانب داعيه عليك ينحرق قلبك زي ما حرقتي قلبه ...
أنتي بنتي بعد وقطعة مني... الله ... وتنفجر باكيه وتغلق الخط..
يسقط الجوال من يد عذبة وتتمسك بكتف أفنان , وهي تنتفض...
تمسكها أفنان وتجلسها على السرير...
وتقترب منها هامسه: وش تقول ...؟
عذبة:............
أفنان: ليش تخانق صوتها طالع من السماعة...
الحين بدل ما تعتذر عن اللي سواه ولدها تتصل تخانق....
عذبة: ماتصدقين يا نجلاء .... آآآآآآه ... تقولي ليش تطلبين الطلاق...
أفنان: الحين مشاريوه قايلها أنك أنتي اللي طالبه الطلاق...
يمكن خاف منها تراها تروع... تسمحين أقول عنه حمار لا كلب أحسن ...
عذبة: كلب!!! لو كان كلب ماسوا اللي سواه.. الكلب وفي...
أفنان أنا مادري الحين أنا الضحية ولا الجلاد....
بس أكيد فيه شي خلا مشاري يقول اللي قاله...
مستحيل مشاري يتخلى عني بهالسهوله الا فيه سبب...
أفنان : دقي على أمه وقولي لها كذاب...
عذبة: لا... وألف لا... وتقف ثم تضرب بالطاولة وتلتفت عل أفنان...
شوفي روحي الحين وقولي لجدتي السالفة وقولي لهم
تقول عذبة: لامن سألوا الناس ليش تطلقت يقولون هي تبي الطلاق,
عشان تنتبه لأخواتها, وما تقدر تعيش بدبي بعيدة عنهم وهم ماعندهم أحد...
بسرعة...
وبكت...
أفنان: ليه طيب تتظاهرين.. يعني أبي أفهم...؟
الحين لو بتكلمين خالتك وتسألينها أحسن مما تستمرين بالكذبة...
عذبة: حبيتي مشاري والله إنه مجبور على الطلاق ... أدري أنه يحبن ...
ومستعد يسوي أي شي لجل يرضيني...
بس فيه شي هو اللي مخليه يضغط على عمره ويكذب على أهله...
وبعدين تبين الناس يشمتون فيني ... تبين فيصلوه يفرح علي...
لا ... والله ما صير مضحكه لهم... مو كفاية أخسر حبيبي تبين بعد أخسر كبريائي...
يالله تكفين قبل الخرارة ليلى ماتروح تسولف على بنات خالي بالتفاصيل..
ولا تدرين بنزل أنا...
وتركض بسرعة خارجة من الجناح....
أفنان : طيب اصبري لي أنا ... يا.. هيه ... منهبلة كرامة هالبنت...!!
ياعذبوه يالفقمة اصبري...
تصدم أفنان بعذبة عائدة للجناح وهي تركض بقوة...
أفنان: أي... بسم الله ..كسرتيني .. وش بك تمشين ميتين وتلطمين وجهك
....انهبلت هالبنت هيه انتي بكامل قواك العقلية...؟
عذبة تقفز في أنحاء الغرفة وتقول: انكشفت انكشفت... ياويلي انكشفت....
هم تحت تحت جايين...
الفصل الثالث
بالصالة الرئيسية جلست نجود ونورة بنات عبد الله " أبو عبد العزيز" ابن عمهم,
ونواعم بنت سعد ابن عمهم, الجدة ترحب بهم: يا هلا ومسهلا ...
يالله حيي هالبنات.. شلونكن ... ؟
نجود: الحمد لله يا عمة ... انتي شخبارك
و................................شخبار عذوب؟
الجدة: يالله لك الحمد... كميله ... مها نادي كميله تخليهم يزهبون القهوة...
مها: كاميليا... القهوة جاء ضيوف...
تنزل ليلى: يؤ .. انتم من متى هنا ؟ ليش عمتي ما خبرتيني؟؟؟
نواعم: شوي ... صحيت من النوم ونجود تصارخ علينا قوموا بنروح لعذبة...
حتى تصدقين مامداني ألبس!! ازعجوني.... قلت روحوا الحقكم مارضوا...
الجدة: الله وكبر ... غاب القمر صار هلال من بعد بنات عمتس عاد....
طول عمركم حيسي ديسي....
نوير... وش حزنتس على هالقصير قضى القماش ومالقيتي لـــُه وصلة!!...
نورة: خخخخخخ .... عمه الحين أنا كاشخة فيه وانتي تطنزين...
يا عمه هذي الموضة... وبعدين هالحين ليلى هذاه لابسه قصير...
ليش ماتشوفين الا انا...
الجدة: ليلوه قومي غيريه نفرة تنفر جلدتس...
ليلى بغضب: طيــــــــــــــــــــــب يمه...
نجود: عذبة وينها؟
مها وهي تصب القهوة: لحظة اخلص وادق على غرفتها تنزل
أكيد مادرت انكم جايين...
تنزل أفنان من الدرج... وكل الأنظار تتجه إليها...
نجود: أفنان !!! ماشاء الله من متى وأنتي هنا؟
أفنان:من أمس جيت ونمت عند عذبة ... و بجلس عندها أسبوع...
نجود : ليه عذبة ضايق صدرها مرة... يا عمري
والله مو سهله...وينها؟
أفنان: لا عادي ... صح هي يضيق صدرها خايفه شوي من كلام الناس,
تعرفين كلام الناس مايرحم... وهي الحين تستحم وبتنزل بعد شوي...
نجود: شلون عادي؟ أنا ما فهمت... يعني هو ليه طلقها...
وبعدين عذبة تحبه يعني شلون ماهمها يوم طلقها؟
أفنان: هه ... خالتي ما قالت لكم _ وتنظر للجدة_ أصلا عذبة طالبة الطلاق
عشان تجلس مع خواتها... تعرفين صعبة تخليهم لحالهم وتجلس بدبي...
تقول وصية أمي بخواتي لازم أنفذها لو أبيع الدنيا كلها..
الجدة تنظر لمها وتقول: إيه بنيتي مهوب مرتاحن قلبه وهي بعيدة عن خواته...
نواعم: قمة الجنون ... الحين تتخلى عن حبيبها وبيتها وتتطلق
عشان هالقردتين والقرد الصغير..!!
:" قرد يتعلق بكشتك يالبقرة... الحين حنا قرودة...!!
تبين لك طراق يعدلك هالنعفة... الله لا يرحم هالوجه "...
_ نجلاء تطل من الصالة العلوية , ببجامتها وشعرها الذهبي الأجعد المنكوش_
الجدة: بسم الله الرحمن الرحيم... يا نجلوة ترا ترويع الآمنين حرام...
فيه شي اسمه مشط كدي شوشتس... تقل باخن بتس بس...
لابعد كشة صفرا ... مير لو شعرتس اسود أهون شوي...
نورة: بسم الله ... الحين انتي قولي السلام عليكم... بعدين تعالي
أنا ببلغ عنك مع الإرهابيين.. صدق تروعين... يمه...!!! مير تعالي تقهوي ...
نجلاء_ وهي تنزلق على درابزين الدرج الخشبي_: والله ما جاني الشعر الأصفر اللي ما عجبك
إلا من بنتك...و الحين وش السالفة منهو اللي يتخلى عن حبه عشانا حنا القمور.. احم..
أفنان تعظ على شفتها خشية إنكشاف اللعبة وتنظر لمها وللجدة بقلق...
الجدة: مهبوله هالبنت وين عصاي امسجرة لمين تعظ الأرض..
ترا ينكسر وتطيحين.. والله العيال مايسوون هالحركات...
نجلاء: الا يمه ترا اللي معلمن عليه سعود الله يرحمه
دايم انتزحلق انا وياه ونتسابق بعد... نجود صح؟
يتغير لون وجه نجود... وتضلله غمامة من الحزن ...
نواعم: الحين يومنك أنتي وأخوك مهابيل بتدخلين بنت عمي بالسالفة ليه؟
نجود: حرام عليك تتكلمين عن الميت كذا.. الله يرحمه ويغفر له... وتصمت ...
نجلاء: وش أنا قلت... بس تذكر دايم الله يرحمة يقول لنجود إنه أسرع من...
يعني أنا قلت هي تزحلق معي؟! ...فاضية تبين شي تطنزين عليه...
مير ما جمع إلا وفق... نواعم وليلى...
تنزل ليلى مع عذبة وهم يتهامسن ...
نجود: هلا والله ... نعيماً...
عذبة: ينعم بحالك يا عمري... شخباركم... ليه وش فيك ضايق صدرك ...
ترا الدنيا ما تسوى... يالله افردي هالوجه..
تنظر نجود لعيني عذبة ثم تبتسم... تنتفض عذبة
وتشعر أن نجود قرأت كل شيء في عينيها.....
نجلاء : عذبة ترا اليوم جمعة!!! والبنات جايين كلهم ولا بعد فيه أفنان وخالتي مها...
عذبة: يعني؟
ليلى: مايبيلها واضحة ... يعني ترا بنطلع اليوم...
مها: لا .. صعبة...
الجدة: وراه يا كافي يامها ... خليهن يطلعن ويستانسن...
ممديات على الحجرة بالدراسة...
إلا إطلعن وإستانسن... بس ترا ابو ناسين بيروح معي دبرن لكن سواق....
بتقضى للدار وبمر حريم الجيران الأولين عندهن اليوم دايرة ببيت أم الـ....
عذبة: زهير مع جدي يعني مين بيودينا... مافيه أحد...
نواعم: طيب فيه سواقنا وسواق نجود...
نورة: خير إن شاء الله وأنا مالي داعي ... قال سواق نجود قال..!!!
سواق نورة ونجود...
نجود: تبون الجد ما لنا فيه غير الإسم ,أربع وعشرين ساعة مع عبد المجيد...
مرة ينقل مفارش من الخيمة.. مرة يطبخ للشلة بالبر...
ومرة ومرة ومرة.. وماتقضي هالمرات...
نورة: ايه ولامن قلنا نبيه ... قال روحوا مع سواق أمي نورة...
والله يقهر مجيدوه...
نجلاء: من الآخر... نقدر ناخذه بعد الغداء مباشرة...
ولا تدرون بروح أقول للطباخة لا تسوي غدا بنتغدا برا...
وبعدين نروح للثمامة..
عذبة: خلاص فصلتوا ولبستوا...
نجلاء: أنتي عذوبي الحلوة اللي ماتقدر تقول لا لنجلاء... صـــــــــــــــــــــــح؟
مها: ترا أنا بروح بيجي فهد الحين بنروح وترا بناخذ معنا ناصر... خلاص عذبة؟
عذبة: ايه الله يجزاك خير ... والله نصور يموت على فهد...مرررة..
نجلاء: ويكرة مشاريوه مرررة رغم ان نصوري يسوى عيونه , بس مايطيقه...
أخوي عنده ذوق بسم الله عليه...
عذبة: نجلوه وبعدين معك!!!
نورة: أنا بصراحة في كلام يقرقع بخاطري من زمان وما قلته... بس الحين بقوله
واللي يصير يصيرولا تزعلين مني ياعذوب بموت لو ما قلته..ممكن؟
ليلى: ياي والله شكل الكلام يخوف .. أحذرك ..ترا عذبة شرسة ...
يعني منطقة ألغام فكوني حذرة...
نجلاء: قولي وأنا بمسك عذبة لا تطقك...
مها: قولي يالله ....
نورة تعدل من جلستها وتأخذ نفس عميق وتقول: احم احم ...
نجلوة اقظبي هالعفريت _تقصد عذبة_... بسم الله ....
_وترفع صوتها بأسلوب خطابي وتسد أذنيها_ الحين هذا المدعو مشارويه
وش فيه تحبينه... دب وعيونه تقل نسر تخرع ...
ثقيل دم ومو سعودي وساكن بالإمارات ,وأمه ماهمها إلا شكلها ,
وخواته ثقيلات دم , ومستواه المادي ولا يقرب لمستواك
وأنا ما أحبه وأكرهه وودي أجلده وقعدت أصيح يومنك أخذتيه ,
المفروض تآخذين واحد يقدرك زي عمي فيصل مثلاً, ولا مجيدوه ولا عزوز ,
ولا متقطعة مرة خوذي من عيال خالك اللي بالخبر أصرف ... آآآآآآآآآآآآآآآآآآآآآآآآه
وبس الحمدلله ارتحت... اجيبي...
نجود: بس يا نورة خير ... انتي ماتعرفين الأدب ... أوريك...
أخلي عبد المجيد...يوريك الشغل..
عذبة: لا عادي خلي البنت ترتاح , وأكيد فيه غيرها يسأل هالسؤال...
ليلى : حبيبتي من قال لك مشاري مو سعودي... هو سعودي
من الشرقية وأهله كلهم بالشرقية, بس هو عايش بالإمارات
عشان أبوه هناك يشتغل.. وبعدين لو سمحتي لا تتكلمين عن خالتي بهلأسلوب...
نجلاء: طيب هي وجه نظرها كذا...هي تشوف انها كذا,
يعني بالغصب تغير رايها عشان ماتزعلين...
عذبة: نورة حبيبتي الزواج ماهو نزهه أختار اللي أبيه
بناء على أشياء ترضي اللي حولي ولا ترضين ,
وبعدين كونه ساكن بالإمارات مو عيب ترا أنت ماجربتي طيبتهم وأخلاقهم ,
أنتي لو سكنتي هناك بتحسين إنك مابعدت مرة عن وطنك,
شعب حبوب ومتمسك بالعادات, وقريب مرة من عاداتنا وتقاليدنا ,
ويحترمون السعوديين ويعتبرونهم إخوانهم.
مها: إي والله شوفيهم بالحرم كيف مؤدبين ولا يأذون,
حتى لامن رحتي لمهم بديرتهم رحبوا فيك... أنا بصراحة مرة أحبهم...
وعموماً ترى أهل الخليج واحد .. ولا فيه فرق كبير بينهم...
نورة: أقول قلبتوها محاضرة عن خليجنا واحد.. أدري أنهم طيبين
بس مهما يكن مو بالديرة و بعيدة...
عذبة: ما فيه بعيد على الطيارة.... هو صح مو زي لو كنت بالرياض عند خواتي ,
وهذا اللي خلاني أختار الرياض و خواتي على مشاري ودبي...
وبعدين أنا ما خذته عشان شكله, أنا ارتحت له وما ارتحت لغيره..
والخيرة فيما أختاره الله...وعلى فكرة بشهر العسل أزعجونا البنات
من كثر ما يتلصقون فيه...والله انه مزيون وطخمة و طويل ورزة..
بس شوي ثقيل دم..
كانت عذبة تتكلم وتحاول تخفي ألمها من كلام نورة الجارح...
وكانت تضغط على الفنجال...لتخفف توترها...
نورة: يعني ما كنت تحبينه... بس عشانك إرتحتي له؟
نجلاء: يا الملقوفة وش دخلك ... تحبه ولا تحبك...
ياحاشر نفسه بين البصلة وإشرتها ماينوشك منها غير ريحتها.....
ايه بنات وين بنطلع اليوم...
عذبة: الجمس مع جدي يالله نروح بسيارتين...
نجود : لحظة خلين أكلم مجود عشان يعطينا الجمس حقنا و يترك لنا مراد .
*****
عبدالمجيد وعمه فيصل في المجلس, عبد المجيد متمدد على الجلسة الأرضية,
وفيصل يقلب في أوراق الشركة,
عبد المجيد يحاول لفت انتباه عمه: فتولي, فتو.. مبسوط الحين, هع هع,
فيصل: لا
عبد المجيد: اتحدى , ولا يمكن حتى الآن ما بردت كبدك منها...
فيصل: مجيد... عطني الملف الأسود هذا...
عبد المجيد: يا برد اعصابك ياشيخ.. انت ماتحس...
فيصل: لا... مات احساسي من عرفتك...
عبد المجيد: والله لو انا منك كان ادق الحديد وهو حامي..._ الجوال يرن_
وه وش تبي ذي...
نعم... مشغول.. بروح اصلي..انتي يا كثر ما تزعجيني...
طيب المطلوب...خذيه مابيه من زينوه..
لالا تعالي ليه ما تروحن مع ابو ياسين ... ايه صح...
وين بتروحون ... عجيب...
فيصل: يا النشبه خل البنت ... مابقى الا تسأل وش لون سروالها ..
عبدالمجيد: عيب يا عمي ... البنت تستحي... لا !!!
..ايه.. الثمامة أجل..طيب بنروح معكم... بسم الله_ بفزع_..
فيصل: اكيد انها نورة ... عاد هي مقطعه ام الحياء...
عبد المجيد : متى؟ امممممممم طيب انا ..... خلاص اعوذ بالله ما قلنا شي,
الله يخلي لك امي وابوي...بس شوفي العود تراه مو حقي حق صديقي.. والله ..
لا تصدقين بس لاتقولين لأبوي..هاه..
انتبهوا له.. لا تخربه نورة الدبا ذي..زين؟.. الله يسلمك..
فيصل: احسن ما يأدبك الا نورة...
عبد المجيد: لا نورة ذريقه من نظرة ترتعب ... هذي نجيده...
والله يا أهلي بيخربونها ... لو يحصلهم يخلونها نسخة من عذبة..
تروح وتجي ولا تدق لي بال... بيكبرون راسها ..
فيصل: يمكن احسن لها بس لا تاخذ مشاري بذبحها..
عبد المجيد: لا يا شيخ أنا اللي بذبحها... الا ما تلاحظ شيء..
فيصل: ياكثر ملا حظاتك يابو راس...
حط هالورقة بالملف الأزرق... بلا قرق...يالله.
عبد المجيد: اسمع عاد ... البنات يبون يطلعون ...
يعني عذبه اكيد بتصير معهم...
فيصل_يترك ما بيديه ويرفع نظرة لعبد المجيد_:طيب؟؟
عبد المجيد: شكلها ما همها... غريبة؟... والله شي يحير ...!
أنا أتجسر بسأل نجود بس عارفها ما تقضب خبر وبالذات عن عذبة...
فيصل: ليش هامتك...؟ ياعيني ضايق صدرك عليها... اكيد انا منهارة ..
لكنها تكابروالدليل انها وافقت تطلع تعرف هي ماتحب تطلع من البيت نهار الجمعة ...
دايم يطلعون وهي تقول بحل دروسي مرة و مرة بتنام ومرة ماتحب طلعات الجمعة...
ولا يعني خافيتك... لو ما يجي من الموضوع كله إلا شماتتنا به...
مسكينه تصدق ارحمها..كسرت خاطري..
مادري لو سعود حي وش سوا بمشاري؟ فعلا مو رجل..!!
عبد المجيد:إيه سعود...والله ما غاب لحظة عن بالي...الله يرحمه, تصدق عاد
عجزت أتأقلم مع موته عجزت أمسح رقمه من جوالي.. وجواله مازال بدرجي..
تذكر يوم يعطيني أشحنه...مكتوب إنه يكون معي..
فيصل: الله يرحمه, إلا عذبه وش شعورها الحين... أخوها مات وزوجها طلقها..
والله ما يستاهلها..
عبد المجيد: انت ما تحس توقعتك بتطير من الفرحة لمن يصير الطلاق...
لكنك نفسك نفسك مشغول بهالأوراق...و لا بعد مسوي فيها رحوم..
لا حبيبي هك على غيري ... ساعات أحسك فعلا ما تحس!!
فيصل:................ الا أحس ... بس عذبة هذي ... _ثم صمت ونظر للأعلى...
عبد المجيد: ياهوه على العشاق .... فيصل عجزت افهمك...
على كثر ما جلست معك تزيدن حيره... الا وش رايك تاخذ ليلى ...
أجمل بنات العايلة..
فيصل: حرام عليك تبيني انجلط.. ثقيله دم .. خذها أنت ...
تعال وين بيروحون البنات ؟...
عبد المجيد: وأنا رحت هذاي لازقن بخشك...منتزة بالثمامة..
وش رايك ننكد عليهم انبسط على التنكيد... ههههه
عبد المجيد: عمي وأعرفك...ههههه والله فكرة بطرانه...
*********
في السيارة
أثناء الطريق لأحد منتزهات الثمامة... عذبة طوال الطريق صامته ,
وليلى لاتكف هي و نواعم عن التذمر تارة والسخرية بنجلاء ونورة تارة أخرى,
بينما نورة ونجلاء لا تأبهان بهما وهن يلعبن بعود وجنده في مؤخرة السيارة "الجمس",
نجود تتحدث بالجوال , وأفنان لم تأتي معهم من أجل إكمال بعض الواجبات والبحوث...
نجلاء: والله كذابة... اقول لاتهكين بس... اسمعي.. "دن دن درن " والله خطيره..
ليلى: اقول لا يحسبونك خالد عبد الرحمن...
نورة: يالله.. يالله غني لخالد أغنيه حلوة..
نجلاء: ما حفظت ... انا ما أسمع... الأغاني حرام....
ليلى: اقول... خليها مستوره...
نجلاء: والله ما أسمع ... صح عذبة....؟
عذبة:.....
نواعم: هه علينا ...؟
نجود: خلي العود يا خبلة ... والله يذبحك عبد المجيد..
نجلاء: بسم الله... وانا باكله... خلينا نكتشف المواهب....بعدين مجيد حليل...ليت كل الرجال زيه..
نورة: بلاه والله مارنع راسك بقنعة ملكية... راسي يوجعن للحين منه امس..
نواعم: إيه خلينا من مجيد الحين..
خلوا خالد عبدالرحمن يتحفنا ... يالله غني... "شدوا يمتهم جنوب عن الديرة..."
ليلى: ياربيه تذكرني ببوي .... الله يجمعني فيه....ياربي وينه الحين؟؟؟؟؟
نجلاء: احم احم اسمعوا... شدوا يمتهم جنوب......................._وهي تغلظ صوتها تحاكي صوت خالد عبد الرحمن..
نواعم: هههههههههههههههه والله طقاقه حتى كملت راكبه بشنطة السيارة ,
بس شوفي لا تنزلين لامن وصلنا من الشنطة.... يحسبونا طقاقات ...
نجلاء : بنزل من وراء.... واللي ما يعجبه لا ينزل معي...
*******
"في المطعم"
تجلس مها وزوجها فهد على طاولة الطعام , فيما كان ناصر يدور حولهم,
تارة يبحث عن أكبر الكراسي, وتارة أخرى يلعب بسيارته تحت الطاولة..
مها: نصوري تعال وش تبي...
ناصر: مابي ثي... ثوفي الثيارة تدخل بالمواقف...بابا فهد...
أبي بكرا تثري ثيارة حمرا ... ذي ثيارة عذبة...
فهد: عذبة؟... ما شاء من متى عذبة لها سيارة...
مها تنظر بأسى :... هذي سيارة البنات اللي شراها
جدهم ... بس عذبة اللي إختارتها...
الـ bmw اللي صار فيها الحادث...
الله لايعيدها من سيارة...
_ودمعت عيني مها , رفع فهد وجهها ومسح دموعها,وابتسم_
فهد: الحمدلله على قدر ربي.. لا تذبحينن
ترا ما اتحمل أشوف دمعتك...
تراي ابيع دنياي ولا أشوف دمعتك
دخيلك لا تبكين عندي ...
يالله يالمها...
_وأخذ يمسح على شعرها برفق _
مها: نصور تعال شف وش تبي....فهد حبيبي وش مشتهي...
فهد: مشتهي رضاك وأشوف بسمتك..
مها تضحك: الله يخليك لي ترا عاد بموع...جد عاد..
فهد: ذوقتس حلو...
مها: وانت ناصر..؟
ناصرينظر لفهد ويضحك: أنا بعد ذي بابا .. أبي ذوقث حلو..وعثير أناناث...
مها _تضحك بقوة_: الله ياخذ شيطانك على مين طالع ذهين؟
_ينظر ناصر لفهد ويبتسم, ثم يقول_:على ماما مها...
يضحك فهد بقوة ويصرخ: بعدي والله نصوري...
تلتفت مها على فهد بغضب مشوب بضحكة مكتومة: الحين استانست؟
أوريك يانويصر... لا والله تقلد فهد بكل شي حتى
بذهانته...
فهد: لا والله وش دخله فيني؟
مها: هذا العيال يقلدون أبوتهم..._ثم تصمت وتحاول أن تغطي
القنبلة التي جرتها بمشاعر فهد دون قصد_إيه هو ماعنده أبو ... و.. والله رسلك
له ..
فهد _يحاول أن يتظاهر بعدم الإكتراث _: ايه الله يرد له أبوه..
ناصر تبي ذوقتس حلو أجل...؟
ناصر: إيه وعثير أناناث...
يضحك فهد ويرفعه لصدره ثم يقبله... يلتفت ناصر ويضم فهد بقوة
ويقول: بابا فهد أنا أحبك كثير... أكثر من ثيارتي ذي... تعال عندنا..
ثر ولدنا .. ولا أبونا
عند بوابة المنتزة...
نجلاء: مراد ... افتح شنطة ورا...
ليلى: مجنونة.... عذبة شوفي أختك ....
عذبة:............
نواعم: مراد ... لا
نورة: الا افتحه ما عليك منهن....
نجود: فضحتونا.... لا مراد ... لا تفتحها لهن...
نورة: انتي بالعصلاء... تقدرين تنطين ... نطي وروحي افتحيها لي بسرعة نجلوه تسمعين انتي..
نجلاء منحنيه على العود وتدندن وتهز رأسها: الا اسمع ولكني داخلة جو...
وتقفز بحركة خفيفة وسريعة للمرتبة الأمامية وتنزل..ثم تتجه لتفتح الباب الخلفي للجمس...
تسحب العود.. وتحمله بحركة غير مباليه على كتفها...
نورة: أخس يالقوة... هيه أنتي ساعدين...
ليلى: عذبة شوفيها... فضحتنا ذي... شوفي هالشباب هناك يضحكون عليها...
عذبة: ............
ليلى: هيه أنتي ما تسمعين...
عذبة: الا بس وش اسوي لها..
نجلاء: هع والله فله... عذبة ماله خلقي اليوم... نورة يعني الدجة جايه.
نورة: الحين انتي تخافين من عذبة العصلاء هذي...ماتخوف...
نجلاء: عذبة تخوف لامن عصبت تصير وحدة ثانية... أعترف انها الوحيدة اللي أخاف منها,
تصدقين أحيانا لامن بغيت شي من أمي الله يرحمها وعيت ,
ازعجها وبعدين تخلي عذبة تزجرن وأخاف... مادري يمكن عشاني أحبها أخاف تزعل...
ياربيه تصدقين اني متحسفه ...
نورة: يمه!! شوفي الهرش هذا... يناظرنا
نجلاء: افقع وجهه الحين بماي كياغيه... الا وين البنات؟؟...ايه هذاهم هناك...
نورة : يلحقنا....يمه بدق على مجيد...
نجلاء: شكلي بفقع وجهك انتي مب هو.. وشوله مجيد تبين يفضحنا شرط امك ماتخلينا نطلع مرة ثانية الا معها...
تسرع نورة وتمسك بيد نجود وتتبعها نجلاء: اصبري دحروج وين تخلينن أوريك ... _وتنادي عذبة_عذبة .. عذبة اصبري...
عذبة: اركدي يا نجلاء ترا مالنا خلق مشاكل... هذا مراد راح يجيب المفتاح حق الشالية...روحي انتي ونورة جيبوا هالآنسات...نواعم وليلى لا يبعدون...
نجلاء: هم بزران... مانب رايحة...
عذبة: ليه مسويه شي... شكلك خايفة..؟
نجلاء: هه لا ماسويت شي .. بعدين من يقرب مني سدحتوه.. ولزختوه لزخ...
أعطيه توبي أوشيرو ماواشي غيري!!
عذبة: أقول يا أمي عذبة روحي لألزخك أنا..لاقيتن مافهم هالخرابيط تنصبين علي...
ترا مالي خلق أجمعكم تقل غنم.. ترا ها الطلعه كلها عشانك...
نجلاء: والله ما نصب مو صدقتن إسألي ســعـو....
_تضع يدها على فمها حين تذكرت أن سعود ميت_
عذبة: وبعدين بتروحين؟
نجلاء: طيب من عيوني الخضراء ..نورة تعالي ... شوي بس...
خذي العود أزعجن..ولا عطيه مراد يشيله...
نورة: لا مراد بعيد وأخاف يضيعه يضيع روحي مجيدوه..
في منتصف الممر بين نواعم وليلى وعذبة ونورة لحق الشاب ومعه شابين آخرين بنجلاء ونورة.
الشاب: ياهوه يا راعي المزاج أموت بالرايقين...عطيني وجه...
أشوف العود أدندن أروق معاكم..
نورة: بسرعة... الكلب تسمعين وش يقول...
نجلاء: انطم يا قليل الأدب...
نورة: لا تحارشينهم... تراهم قليلن ادب ولا تربوا..
الشاب : يا حلو هالعيون... ليه تفتني العيون السود ما دري؟ بس شوي بكلمك كلمة..
نورة : يمه يعنين بسرعة اركضي نرجع للبنات ولا نسوي شي... انا خايفة..
نجلاء: اخ بس لو ما كان علي عباية كان فقعت وجهه...
يسرعان في المشي نحو عذبة ويسد الشابين الآخرين الطريق عليهما ,
الشاب1 : على وين يا حلوين...والله اني مو وحش... خلينا نتعرف حذوا الرقم.. ب
س وكمان عازمكم على كافيه...
نجلاء: وخر يا عديم الأخلاق... لو كنت أختك رضيت لها ... وخر لأسويك كفتة..
أحذر ك ترا معي دان شودان..
الشاب1: أحب الكفته من هالأيدين أنا..وشو دان شودان أكلة صينية؟؟
_ويضحك بقوة_
نورة: يا أغبياء ... يعني الحزام الأسود
_يضحك الشباب بقوة_الشاب2: على مين تلعبها...!
الشاب3: حنا مخفات نصدق!! الغزلان هذي معها حزام أسود
قولي أبيض يمكن يعني هه نصدق
بس أسود مرة وحدة... باين أحلامكم كبيرة!!!
تندفع عذبة نحوهم وتتبعها نجود وتحاول إبعاده
وهي تخلع الصندل : شفت هالنعلة ترا بتتوسط وجهك اذا ما ذلفت...
الشاب1:يؤ مقاسك صغير أشوف كم... _ويمسك بيد عذبة ويجرها نحوه_
عذبة: يا كلب وخر والله لأضيع مستقبلك... نجلاء نادي الهيئة تشوفي أحد يفزع...
نجلاء تلتفت يمنه ويسرة, المكان في زاوية منعزلة حيث لا أحد يشاهدهم من الهيئة أو رجال الأمن :وليه فزعة والله ما أخليك نورة شوفي شغلك...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك