رواية انا الضحية وانا الجلاد -40

رواية انا الضحية وانا الجلاد -40

يعني هم جايين جايين... كان كسبتي قدر عنده .. بدل ما تزعلين وتقولين مرت أخوك ومرت خالك!!

نجود: هــــــــــــــــــــو!!

مافكرت به ذي... بس هو المفروض يشوفه من نفسه..

نورة:خلينا من المفروض تعاملي مع الواقع مب مع اللي مفروض يصير...

هو شايف إنه صعبه يحطهم عند أخوه...

وأنتي بدل ما تراعينه وتسايرينه تزعلتي والمفروض ومالفروض..

ترا بيحط بقلبه لو ما بين...

هو يمون عليتس مالا يمون على أخوه..

أو إن أهله ما يبون مرت أخوه ذي...

أو أي شي يخليه يصر على رايه.. بس هو ما يقدر يقول لتس...

نجود: طيب...

نورة: المفروض إنتس قلتي له ولو إني تعبانه وأتوحم بس التعب يهون وأرضيك..

نجود: نورة يالجنيه ما جت ببالي...

طيب هم الحين بيجون بكرا...

وأنا ما إستعديت... مرة مالي خلق...عاد هو بيجيب كلش من برا..

بس علي أرتب البيت وأوجه الشغاله...

نورة: وشــــــــــــــــــــو!!

تجيبين من برا!!!!!

نجود: وه يا نورة !!

لا تقولين عاد إطبخي... أنا زهقانه !!

نورة: إيه إطبخي... ذولا لامن عزموا مدوا السماط من ذا لذا...

ولمن تجيبين من برا وش بيقولون ...

بيقولون إيه...ياعمري يا ولدنا على هالرفلاء.. اللي طول عمره متعودتن توكل توكيل..

ياخبله أنتي الحين تحت المجهر... وهذي أول عزيمه...

وبيحطون بالهم إنتس ببيت أهلتس ماتطبخين ...

فلا تخلين حمولتس ياخذون عنتس فكرة شينه..

نجود:يمه... بس مابي حيل أتزهل عزيمه

والله لو بي حيل مب مشكله..

ليتي ساكنه بالرياض...

نورة: إسمعين...

عندي فكره...

نجود: وشي يا أم الأفكار..

نورة: الحين كلمي خالتي موضي...

قولي له تقرص لتس...

وتكزه وخالد مب بالبيت...

وكلمي ندى بنت خالتي هيا... خليه تزين لتس ورق عنب...

و...إمممم عاد شوفي وش تقدر تسوي معه...

نجود: هــــــــــو!!

أستحي...

نورة: لا تستحين... أصلاً خالاتي كل مايصير عند وحده عزيمه..

كل وحده منهن تاخذ شي تسويه..

ولا بعد يكزن شغالاتهن وبعض البنات...

والله ترا يفرحن .. ذولي خالاتس...

نجود: طيب ... ما أجيب قرصان من برا ...

وأطبخهن بالبيت..

نورة: لا... خالتي بدريه ذاك اليوم تقول إن القرصان إن صار من برا ما ينفع...

نجود: إخس... وش تفرق؟

نورة: والله إتصلي عليه وإسأليه...

نجود: بس الحين دايخه ... ما أقوى أصلب طولي ...

نورة: أقول أها عن الدلع....

شوفي يا مره... الحين خلي الشغاله تبدأ بحلى.. همن

لامن أحريتي جيه خالد قومي للمطبخ وكمليه...

عشان لامن دخل يشوفتس وأنتي تعبانه تشتغلين عشان أهله...

بس عاد لا تسوين نفستس نشيطه...

عشان يحس بالتضحيه...

همن قولي له ما أبي شي من برا كلش بسويه هنا...

ولامن قال ليش... لا تقولين يالخبله اللي قلت لتس....

وتخرين الطبلون بيعيي وبيجيب من برا..

قولي له ... مايصير جاين من سفر وياكلون من برا...

ما تحمل كبودهم الدهن ...

نجود: نورة يا خطيرة... جد أنتي قصيميه أباً عن جد..بس منين جبتي هالدهاء!!

نورة: هذا موب دهاء..هذا إسمه حسن تعامل...

وإجلسي مع خالاتي بس يومين تطلعين بشهاده أكاديميه بالحشيمه..

بس لا تسوين كل اللي يقولونه ... تراهن يدلعن رجالهن بزياده...

بعدين يركبتس خالد...

نجود: نورة .... كم شكل أسوي؟

نورة: أنتي لا تسوين إلا الرز والقرصان...

أنتي تعبانه... بس لا تطلعين من المطبخ... يعني قطعي السلطات وأشغلي نفستس بشي ..

سوي أشياء خفيفه...

إيه... ندى خليه تسوي لتس شكلين من المقبلات...

وإذا بعد بتتكرم وتسوي زياده مافيه مانع.. وخليه تكزهن أول ما يطلع خالد بكرا لدوامه....

عشان يمديتس تزبطين الدنيا وكأنتس أنتي اللي مسويته...

نجود: طيب والحلى؟

نورة: شوفي.... ما كثر الله إلا من الحلى ...

إفتحي عالم حواء وإنقشي لتس كمن شكل...

وخلي الشغاله تسويهن... وأنتي ناظريه...

عشان لا من سألوا الحموله تعلمينهم عن الطريقة ويقالنتس أنتي اللي مسويته...

وإيه بعد... ترا خالتي بدريه تسكب المكرونه بالشاميل أطعم من أي شي...

خليه بعد الله لا يهينه تسوي لتس...

نجود: نورة... انا مكلمتس أبشكي لتس وقلبتي راسي!!

يمه يا نورة تخوفين.... والله الظاهر يا نوير بتاكلين قلوب حمولتس...

عطين دروس أنا أدربي دميجتي على عماي...

نورة: عشان بس تعرفين قيمتي...

إيه إسمعي آخر شي...

نجود: وشو بعد؟

نورة: خلين أكلم هيله... تجيتس بدري...

عشان تصف السماط وتقلط معتس وتقدم...

أنتي تعبانه... أخاف تفنقسين عاد وننفضح...

نجود: إيه... هيله... أستحي منه..

وش أقول له... تعالي عاونين!!

نورة: لاحووووووول أنا قلت لتس أنتي قولي له!!

نجود: أجل!!

نورة: أبكلم نجلاء وأبشكي له إنتس تعبانه...

وليت هيله تعاون أختي المريضه اللي رجله عزم أهله...

ونجلاء بتكلم عليه وبتقول لو تروحين لنجود إنه فرثا وتعبانه...

وعنده خوالتس ... ليت تجيت بدري تعاونينه...

وهيله طبعاً ما تقصر... وأنتي عاد سوي نفستس متفاجأه إنه جت...

وإشكري له فزعته...

ويا دار ما دخلك شر..

نجود: والله يا النوري... منتب سهله... ياحبيلتس بس...

ياحوووووول اللي ماله خوات...

نورة: مب أي خوات... يحول اللي ماله خوات سنعات مثلي...

نجود: إيه والله يالله بروح أقول للشغاله تبدا بالحلى وأبدور حلى زين..مير ما تخبرينلي حلى!!

نورة: وش قالوا لتس عندي رجل وأطبخ له...

ياجودي إن دخلت المطبخ أقول للطباخه تسوي لي شي حلو!!

عمى صدقت ذي إني ربه منزل...ترا ما أنا إلا دبشه بالمطبخ!!..

نجود: بسم الله قلبت العجوز!!

نورة: أقول تقلعي أبكمل نومتي..

إيه صح... لامن جيتي لزواج عزوز... ترا بتسوين لي حلى...بدل أتعاب

نجود: أقول بدينا بالمنه...مع السلامه...

******

________________________________________

******

"غرفة ليلى"

تجر نجلاء فستان ليلى الأبيض وتمط شفتيها قائلة:

ليلى... أنتي متأكده إنه مقاستس؟

ليلى_وهي ترتب أدوات التجميل_: إيه...

جربته...مره مقاسي...

نجلاء: ما أدري .... يووه... والله إنه مادخل مزاجي...

من يوم تختارينه ...

ليلى: أهم شي عاجبني...._يرن جوال ليلى_

نجلاء: من اللي دق ليلوه...وراه الوجه حمر!!

أشووووووووووووه...

_تجر جوال ليلى_

كلوكلوكلويش!!

زين فكر عزوز يتصل!!

توه يقوم من الغيبوبه...هههههههههههههههه

_ليلى صامته وتنظر للرقم_

نجلاء: هيه... ردي!!

ليلى_بصوت متهدج_: خايفه....

ليش توه يتصل....

من إسبوع مملكين...

وش يبي الحين؟

نجلاء: أقول ردي قبل ما يقطعه!!

ردي ولا أبرد أنا!!

_يصمت الجوال_

ليلى: وه

نجلاء: خبله.....

ليلى: أستحي.... وش يبي الحين؟

من الملكه وهو مقزز وتوه يفطن!!

نجلاء: لا يصير بس عايف!!

ليلى: لا... يوم دخل سلم عادي وسولف ...

حتى يمزح ولا كأن جنبه مره غريبه... كأنه أنا ليلى البزر...

حتى وهو بيشربني العصير كب على ثوبي...

وأخذ منديل وقال لي إمسحيه وهو يضحك...

وطلع على هالطلعه...

وش يبي الحين؟

نجلاء: يمكن إشتاق لتس؟

ليلى: تشتاق له العافيه ... بس أنا ما إشتقت له...

نجلاء: إخس...

_يرن الجوال مرة أخرى_

نجلاء: ردي يا بنت وخلي عنتس العناد...

ليلى: لا

_أخذت ليلى الجوال وفتحت المكاله على المكبر_:

ألو...ليلى...

_تعض ليلى شفتها بغضب بينما نجلاء تسد فمها لتواري ضحكها_

ليلى: نعم...

عبدالعزيز: هلا والله ... وش أخبار الحلوين؟

_تشد نجلاء يدها على فمها وهي تحاول أن تكتم نوبة عارمه من الضحك_

ليلى:أ..أل..الحمدلله...

عبدالعزيز: عندتس أحد؟

ليلى:هاه....

عبدالعزيز: ليش يالله تتكلمين بوه أحد عندتس؟

ليلى: إيه.....

عبدالعزيز: أها... زين أنا أبي أجي أشوفتس... أقدر أجي الحين؟

_تنظر ليلى لنجلاء مستفهمه, فأشارت نجلاء لها بأن ترفض_

ليلى: لا...

عبدالعزيز: أفاااااااااااا...

ليلى: مو... بس..الحين...صعبه.. خلها المغرب...

عبدالعزيز: المغرب...المغرب...

إلا صح... لا تلبسين وتكلفين على نفستس ... أنا أبجي بالحديقه ومانيب مطول...

فنجال قهوه وأنا ماشي...

خلاص ...؟

ليلى: خلاص...أنا...أنتظرك...

عبدالعزيز: بأمان الله...

ليلى: مع السلامه.........._ترمي الجوال على الأرض وتتنهد_

نجلاء: أحلى يالحياء............... حلوه الحمرة الطبيعيه....

ليلى: وش يبي؟

أبقعد لمين لمغرب على أعصابي!!

نجلاء: لا... صيري بعد مطيورة وأول ما يقول لتس أبجي قولي تفضل...

وبعدين ناظري شكلتس بالمرايه... خاطه هالبلاء على وجهتس..

وشعرتس عليه صاع دهن!!

ليلى: إيه صح.....

نجلاء: إخس... هذا وهو عارف إن عندتس أحد... لو ما عرف وش قال؟

ليلى: قال عندتس أحد ماقال محطوط على السبيكر ونجلوه الملقوفه تسمع!!

لودري كان صك السماعه...

نجلاء: عزوز ما يهمه....

بس أنتي اللي رحتي في خرايطها...هههههههههه

***********

"بيت سعد"

تصرخ نواعم : وين رايح السواق!!

_تأتي زوجه والدها "سارة" مسرعه_: تبغين السواق الحين؟

نواعم: لااااا أبيه بكرا... وين راح؟ أدق على غرفته ما يرد...

وجواله مشغول...

سارة: معليش نواعم... أنا ... أرسلته... أمي وأختي يبون السوق...

أبكلم عليه يرجع...

نواعم: لا والله!!

رايح لأهلتس بآخر الرياض... ومتى بيرجع ؟

سارة: حقك علي ... مادريت إنك تبغينه... توقعت إنك بتنامين الحين...

نواعم: أنام ما أنام ما أحد له شغل بسواقي...

يختي قولي لأبوي يجيب لك سواق ولأهلك سواق وخلي سواقي لي!!

_في هذه الأثناء يدخل تركي قادماً من دوامه, سارة بوجهها الطفولي الجميل وملابسها الأنيقه, تقف وجله بينما نواعم مستشيظه غضباً , وتصرخ وتتوعد_

تركي: نواعم!!

خير تصارخين على خالتي سارة؟

نواعم: خالتك مو خالتي... وبعدين شلون أقول لوحده كبري خاله..

شكلك يضحك وأنت تقول لها خاله...

تركي: نواعم!!

وش السالفه..؟

سارة: ياربيه... نواعم خلاص حصل خير... هذا السواق بيجي أكلمه الحين...

_وترفع السماعه وتتصل بالسائق, يتقدم تركي ويقطع الإتصال وهو يقول_:

مو الأول نفهم السالفه..

نواعم: ووووه... كزت السواق لأهله ..وأنا أبي الحين أروح لبيت خالتي أم عبدالعزيز... أبسلم على أمي نورة وأم عبدالعزيز وأروح للبنات مجتمعين عند بيت عذبة.. وعلى بين ما يجي السواق إلا البنات شربوا القهوة...

بيجي من جنوب الرياض لشمالها... وخذ زحمة شوارع وحالة..

أوووووووووووووف

سارة: والله يا تركي مادريت إنها تبيه... لو أنا داريه ما أرسلته...

تركي: نواعم لا تصيرين سخيفه....

أنا أوديك من بعد بيت أم نورة عاد!!

نواعم: لا... أنت تعبان توك جاي من المستشفى كارفينك كرف... وتبي تمسك فراشك بس..

ما أبي أتعبك..

تركي: عادي...مابه تعب بس إمشي...

نواعم: مانيب ......

تركي:طيب دقي على نورة ترسل لك سواقه!!

نواعم: أوووووووووه تفشلت منه من كثر ما أدق عليه اليوم... وبعدين نورة مرسلته يجيب له غرض...تو قالت لي..

سارة: طيب عذبة... عندهم سواقين .... ماترسل واحد لك...؟

نواعم_تنظر لسارة بطرف عينها_:

إسمعي ... أنا هالحين أبروح أكلم عذبة... بس آخر مرة تصرفين بسواقي بدون إذني فاهمه؟

تركي_يجر نواعم بيدها نحو الباب ويخرجها للحديقة ويغلق الباب خلفه_:

نواعم... إستحي على وجهتس يا حيوانه!!

أنتي ما تحترمين أحد...

نواعم: لا أنا ما أحترم سراقات الرجاجيل....

تركي_يشد يدها بقوه_: هي ما سرقت أبوك أبوك هو اللي طق بابهم وخطبها...

ولوما حاجه أهله والديون اللي على أبوه ما رضت تتزوج واحد بعمر أبوه...

فاااااااااااااااااااهمه... حطي نفسك مكانها....

نواعم: أأأأأأأي.... يدي....

تركي: شوفي يا نواعم... لو فيها شر كان طيرتك من البيت...

مير إحمدي ربك إنها متحمله قله أدبك...

فاهمه...

نواعم: أي... طيب قل لأبوي يجيب له سواق ...

تركي: أكيد بيجيب عشره بس يفتك من لسانك..

*******

*******

"في الحديقة"

يجلس عبدالعزيز على كرسي الخيزران ويضع رجل على الأخرى, يهزها بتململ, نورة ونجلاء يراقبنه من شرفة غرفة عذبة, بينما ليلى تقف متوترة بالمطبخ...

ليلى: عذبة... ما أبي أروووووح

_ترتب عذبة جلابية ليلى التركوازية, وتسحب خصلات شعرها من خلف إذنيها وهي تهمس_: لا تحطين شعرتس ورا إذانتس ..تطلعين تقل عنز..!!

ليلى: وش يبي؟

عذبة_بشقاوة_: مشتاق لتس... الله الله يذكر أيام الشوق بالخير...

ليلوه عيشي هاللحضات قد ما تقدرين..

هذي أحسن أيام العمر ... أيام التدليع...

ليلى: وه... مامن ورا عزوز تدليع...

عذبة_تشد يدي ليلى وترفع عينيها لتلتقي بعيني ليلى_:

مافيه رجل ماعنده تدليع... لا تصدقين كلام نجلاء ونورة عنه..

أنتي وشطارتس.. تقدرين تخلينه خاتم بيدتس...

عبدالعزيز إنسان.... وأكيد له نقاط ضعف... حاولي تستفيدين منه...

يالله ... روحي ... مل الرجال...

_تسحب عذبة الصينية من يد الطباخة وتمدها لها _

يالله يا أحلى عرووووووس من قدك.. عزوز ينتظرك...

هههههههههههههه

الطباخة: مدام عزبة... خليني بساعدها... تاتوصل بالسلامة...

خايفة تفلت الصينيه من إيديها...

عذبة: لا أنا أشيله هاتي...

_تأتي من خلف ليلى وتدفها بالصينيه_:

يالله بسررررعه........

_عند باب البيت, تمد عذبة الصينيه ليلى وتهمس_:

يالله... الله يوفقتس...

_تخرج ليلى وتصل للطاولة المقابله لعبدالعزيز, تضع الصينية على الطاولة يقف عبدالعزيز ويصافحها, يشد يدها لتجلس على الكرسي الآخر_

_في غرفة عذبة_

نورة ونجلاء تطفئان أنوار الغرفة وتقفان بالشرفة , تراقبان المشهد

نورة: خخخخخخ شوفي عزوز يسلم بحرارة...يا حليله أخوي...

نجلاء: لاعاااااااااااد شوفي ليلى وجهه ضاع...

نورة: هع... داخ عزوز مع هالتركواز...والعيون المكحولة... شوفيه ...

نجلاء: ليلى تضحك... وش قال له؟

_تدخل عذبة_

عذبة: هو!!!

بنات وش بكن... يافرعونيات قاعداتن تراقبن ليلوه!!!

نورة: تعالي لا يفوتس... أنا ما أستبعد أي شي يصير الحين...

نجلاء: تعالي شوفيهم...

عذبة: الحين أنتن مب حرام عليكن والله ترا هذا تجسس..

نورة: أجل ليش جايتن تركضين!!

عذبة: هااااااااااااااااه!!

أنا جايتن لغرفتي... وبعدين من أذن لكن تدخلن غرفتي!!!

نجلاء: نورة تعالي.. تعالي للصالة .. نطفي اللمبات ونشوف وجه عزوز...

_تركض نجلاء وتتبعها نورة_

عذبة: هيه... إستحن على وجيهكن...

هين بس خل دوركن يجي أوريكن!!

********

________________________________________

"بيت سعد"

تجلس نواعم على السرير و تتصفح مجلة , يدخل تركي ويرمي معطفه الأبيض على سرير نواعم ويسحب كرسي ليجلس مقابلاً لنواعم, ترفع نواعم بصرها وتعود لتتابع القراءة, يجر تركي المجلة وتمسك بها نواعم, يشدها ويشد معها نواعم فتسقط على الأرض, يرفع المجلة ويرمقها بنظرة إستحقار ويرميها خلفه, تصرخ نواعم:

هيه... خير أنت داخل غرفة ولا حلبة مصارعة!!

تركي: لمن ماتقدرين اللي يدخل عليك تستاهلين اللي يجيك!!

نواعم: مو الأول أنت تحترم نفسك وتطق باب الغرفة قبل ما تدخل!!

تركي: كان الباب مفتوح على مصارعيه...مهجوج على ما قالت أمي نورة...

نواعم: أووووف هذي سارة طلعت ولا قفلت الباب...هالمرة همجيه ما أدري متى بتحترم النظام...

تركي: نواعم... لا تحطين حرتك من فراق أمي وأبوي بها ...

هي مالها ذنب.. وهي تحاول تتقرب منك... خلاص.. إعتبري وجوده زي أي وحده من الخدم ولا زميلة بالبيت...

نواعم: إيه... أبحاول... والله الجد إنها طيبة بس ما تعرف الأتكيت...

تركي: لا والله...!!!

نواعم: طيب هات المجله...

تركي: أنا زهقان بدل ما تهتمين بي... تسألين عن المجلة...

نواعم: بسم الله عليك أخوي وش متعبك؟

تركي: أنا ضايق خلقي من أمي...

أبسألك...

نواعم: أمي!!

تركي: إيه أمي... من بعد الزواج ما كلمتها... كم مرة ألقاها داقه على جوالي...

مادقيت عليها للحين... والله ما حصل لي من جهه.. وأخاف أفش خلقي فيها زود..

نواعم: إيه هي تسأل عنك... بس لا تخاف قلت لها إن عندك عملي كثير...

تركي: مهما كان العملي ما يروح حقه... بس أخاف لامن كلمتها أنفعل زي المرة اللي راحت وأضيق خلقه...

نواعم: تركي.... أمي عارفه إنك ماتبيها تتزوج...

وتزوجت... بتتوقع إنك بتزعل..

تركي: نواعم... اليوم وأنا أفكر بالمرة المناسبة لي... سألت نفسي ...

سؤال بسيط... بس مالقيت له إجابه...

نواعم: وشو ؟

تركي: خذي المجله..._يسحب المجلة ويرميها على وجهها_

نواعم: أآآآآآآآآآآآآآآآآآآآآخ... تروك!!

يا حماااااااااااااااااااااااااااااار

_يمسك رقبتها بيده ويدفعها على السرير بعنف ويشد يدها خلفها بيده الأخرى_

نواعم: آآآآآآآآآآآآآآآآآآآآآآآآآآآآآآآآآآآآآآآآآآآآآآآه.. ..

تروووووووك... أع...

تركي: أنتي ما تتوبين... مو قله أدب تقولين لي حمار!!

نواعم: وععععععععععععع ..... تروك ريحتك خايسه تكفى روح إتحمم...

وع... والله تقرف...

تركي_محرجا يتركها ويأخذ معطفه خارجاً_: الله ياخذك يا أم لسانين....

نواعم: خل الباب مفتوح تروح الريحة...

تركي_يدفع الباب بقوه نحو الجدار_: وجع!!

نواعم_تهمس_: وه يا الله الواحد يكذب عليه عشان ينقلع...

هه... لقيته والله فكه منه...

يبدأ السالفة ويقطعه... أدري يبين أترجاه يقول لي!!

بس هين يا تروك....

"يالكذاااااااااااااااااااااابة"

_تركي يضع يده على خصره ويتكأ على الباب_

نواعم: وعععععععععع إنقلع!!

تركي: والله إنك كذابة... هه والله مابي شي... شكيت بنفسي!!

نواعم: ههههههههههههه

والله حلو وجهك يوم حمر!!

تركي: هين والله لأرده لك!!

فشلتين عند سارة , قعدت بالصالة أتشمشم نفسي تقل منب صاحي!!

وطارت عيونه المرة ذا وشبوه إنهبل... بس هين يا خواشن...

نواعم:هههههه .. وش سألت نفسك؟

تركي: إنزلعي !!

نواعم: لا تقلد أبوي!!

تركي: لا الحين أبقلد مجيد وأبجلدتس عشان تعرفين...

نواعم: عاد حرام عليك... ماعندي أم تفزع لي...

تركي: أفااااااااااااااااا.....

بدينا بالتبكبك!!

**************

________________________________________

**************

"في الحديقة"

ليلى: بس... شلون نسكن الشرقية!!

أنت ماقلت لنا!!

عبدالعزيز: أدري .. بس.. توهم يقبلونن..

وأنا ما أبي أضيع على نفسي هالفرصة... جامعة الملك فهد ماتتفوت...

ليلى: ياربيه.. يعني جامعة الملك سعود ما فيها تخصص هندسة!!

وشلون أنت متخرج منها وبالآخر ما يعينونك فيها..

دكتوراه هندسة ما تلقى بالرياض جامعة تعينك...

عبدالعزيز: إسمعين يا ليلى... جامعة الملك فهد متميزه أكثر...

وبعدين من تخرجت من الثانوي وأنا نفسي أدرس فيها...

لكن الوالد رفض ودخلت سعود...

وسعود أكيد لو بتقدم له بتعينن لكن أنا أبي فهد ما أبي سعود!!

ليلى: ياربيه يا عبدالعزيز... والله مايصير!!

طيب وش تبي بالشرقيه مالنا أحد هناك..

و...

ومافيه مثل الرياض والله مافيه مثل الرياض حرامن عليك

الناس يدورون واسطات عشان يجون عند أهلهم وأنت الوظيفة ببابك وتروح وتبعد..

عبدالعزيز: ليلى أنا قررت.. تبين تجين معي حياتس ربي...

بتعيين من حقتس.. بس أنا أبروح...

ليلى: صاحي أنت!!

عبدالعزيز_ينظر لها نظرة حادة_: وش رايتس؟

ليلى_ترتبك_: عبدالعزيز...

عبدالعزيز: إسمعي... قدامنا العطلة الصيفية كله... يمدينا نرتب أمورنا...

البيت جاهز... بيت أبوي اللي بالخبر..

ونعيد تأثيثه... شوفي الأسبوع الجاي... قبل مانسافر برا..

نروح الشرقية ونشوف البيت وش ناقصة...

ووش يبي...

وإذا تبين سلمناه شركة تأثيث تعيد تأثيثه وإذا جينا بس ننقل ثيابنا...

ليلى: لا... البيت بنعيش فيه شلون نخلي أحد غيرنا يختار ألوانه وأثاثه!!

عبدالعزيز: طيب براحتس... أنا أول ما ردوا علي الجامعة

أجلت السفر وألغيت الحجوزات أول أسبوع...

نروح للخبر نشوف البيت... تختارين ألوان الصبغات والديكورات اللي يبي لها شغل...

وإذا جينا عاد نبدأ نأثث... وتبين من هنا أو من برا مو مشكلة عندي...

ولو بدت الدراسة ...نستاجر لنا بفندق حد ما يجهز البيت... وش قلتي؟

ليلى_بعد طول صمت_: إه... بس أنا ما أبي بيت أهلك...

عبدالعزيز_بغضب_: وليه؟

ليلى_أغروقت عيناها_: نسيت إن بيت أهلك جنب بيت أبوي هناك...

صعبه أشوف البيت اللي طلعنا منه قبل ثلاثة أيام من الحادث مع أمي وسعود...

والله صعبة علي...

عبدالعزيز:آآآآآآه....بس الأصعب إنتس تستلمين لهالمشاعر...

ليلى_تنفجر باكيه_: سهل تتكلم مادامك ما جربت...

ماجربت تفتح عيونك من النوم وتلقى الناس حولك كل اللي تعرفهم جايين لك ليش؟

أنت ما تدري... تشوف بوجيههم الرحمة والحزن تسأل ولا أحد يرد عليك...

تدور حضن ترمي فيه خوفك ما تلاقي... لأن الحضن اللي بيضمك مات ولا يحتضر بالمستشفى...

ماجربت تقوم من النوم تعبان ولا توقف إلا عند باب غرفة أمك ولمن تحط يدك على الباب بتطقه تذكر إن هاللي بالغرفة مستحيل ترد عليك...

ومستحيل تحط يدها تتطمن على حرارتك...

ومستحيل تحط راسك بحضنها وتقول تعبان يمه...تعبان...

ماجربت تناظر بوابة البيت كل ما تفتح ... تنتظر أخوك

وبالآخر ممكن أي أحد يجي إلا هو...

ماجربت تنهان وتنداس تحت الرجلين ولا يفزع لك إلا بزران...

ماجربت فقد الأهل والأحباب والعزوه ماجربت... والله ماجربت...

كلكم تقولون لا تستلمون... حنا ما إستسلمنا... بس حنا بشر ونحس

ومانقدر نخبي أكثر من كذا...

ما نقدر نضحك والقلب يغلي مهما كابرنا....

لا تقولي مشاعر .... هذولا أهلي.... كل أهلي راحو ما بقى لي إلا أختي...

قبل لا أنام كلمت أمي وقالت لي بتتأخر هي وسعود

نمت وأنا أنتظرهم وما رجعوا أبد...

ما رجعوا...

_ينظر لها عبدالعزيز بتأثر, فيما هي إنحنت تبكي بحرقة, شد عبدالعزيز كتفيها بقوه, وهمس_:

كلنا أهلتس... قومي غسلي... لا تخلين إبليس يفرح عليتس...

يالله قومي ...

_في الصالة العلوية الجانبية_

نورة: ليش تصيح وتهاوش!!

نجلاء: يمه ما أدري... أبروح أشوف...

نورة: أنتي خبلة... وين تروحين!!

نجلاء: أخاف إنه مسوي له شي والله لأتوطى ببطنه عاااد...

نورة: لا... وين ... عزوز ما يسويه... أعرفه أخوي...عمره ما ضربن...

شلون يزعل خطيبته ...

نجلاء: ما أدري!!

*********

"في غرفة عبدالمجيد"

يقف فيصل متكأ على الكرسي الذي يجلس عليه عبدالعزيز ويقرأ معه الأوراق..

عبدالمجيد: فيصل... أحس هنا فيه غلط...

فيصل: لا... شف هنا.... نفس العدد واللي هنا زاد ...

بعد لمن تقسم الأعداد بتعطيك نفس النتيجه.. شي طبيعي...

عبدالمجيد: ماشاء الله!!

فيصل: خبره يا شيخ خبره...

عبدالمجيد: طيب شف هذا العرض... أنا وماهر وافقنا عليه ... بس عذبة شوي متردده...

فيصل_يأخذ الملف_: هههههه نفس تفكير عمي سبحان الله...

عبدالمجيد: ههههه وش يدريك؟

يتبع ,,,,

👇👇👇

تعديل المقال