رواية انا الضحية وانا الجلاد -41

رواية انا الضحية وانا الجلاد -41

"في غرفة عبدالمجيد"

يقف فيصل متكأ على الكرسي الذي يجلس عليه عبدالعزيز ويقرأ معه الأوراق..

عبدالمجيد: فيصل... أحس هنا فيه غلط...

فيصل: لا... شف هنا.... نفس العدد واللي هنا زاد ...

بعد لمن تقسم الأعداد بتعطيك نفس النتيجه.. شي طبيعي...

عبدالمجيد: ماشاء الله!!

فيصل: خبره يا شيخ خبره...

عبدالمجيد: طيب شف هذا العرض... أنا وماهر وافقنا عليه ... بس عذبة شوي متردده...

فيصل_يأخذ الملف_: هههههه نفس تفكير عمي سبحان الله...

عبدالمجيد: ههههه وش يدريك؟

فيصل: أدري... فعلاً رايه صحيح ولو عمي حي قالك نفس الشي...

لأن شف... فيها مجازفة ... وفينا نكسب وفينا نخسر...بس المكسب ما يغطي القيمة حقت الخسارة..

عبدالمجيد: إلا... يغطي ونص!!

فيصل: لا... مهب الخسارة المادية نعني الخسارة المعنوية...

يعنمي بيأثر على سمعة الشركة لو خسرت بس ما يضيف له ذاك الزود لو ربحت .. موب؟

عبدالمجيد: صح... بس هي ما قالت كذا...

فيصل: تقول ..._ويقلد صوتها_ما أدري ما أحس إنه بينفع...صح؟

عبدالمجيد: هههههههه ... نفس الكلام كأنك سامعه...هههههه

فيصل: أنا كنت أجلس معه ومع عمي ...

إذا ما عجبه شي تقول كذا...

عبدالمجيد: طيب عمي كان يقولك كذا؟

فيصل: هو موب يقوله كذا ... بس كل واحد ياخذ الخبرة بطريقته...

يعني مثلاً عذبة تعتمد على حدسه أكثر.. هي متبرمجه على إنه ماتسوي شي يأثر على الشركه إلا إذا ضمنت النتايج... بس بالضبط ما تقدر تقول لك ليش هي رافضة... هي بس تقول ما تحسه ينفع ...

لكن عمي كان يقول ما شفت أحدن سلك هالطريقة ونفع..

وأنا قلت لك ...

وبالآخر كلنا معلمنا واحد... وإن إختلف السبب اللي عطيناك إياو..

عبدالمجيد: وسعود؟

فيصل: سعود!!

الله يرحمه كان مقزز... ما يهتم... على ما كثر ما كان عمي يحاول يعلمه ما بوه فايده...

تعلمه منا ... يطلع لك منا... سنه نحسب ونربط مع عمي... وبالآخر لامن سأله عمي

قال إصبر ... وتطق أتسبدنا ما طلع لنا شي... عطه أرقام وعمليات يطلع لك...

بس يفكر تفكير واقعي ما عندك أحد...

عبدالمجيد: كان شاطر مرة بالجامعة....

فيصل: إيه مثل ما كان يقوله عمي الله يرحمه أنت فيد دراسة بس....

منتب فيد شغل ومناطح دراهم...

عبدالمجيد: ههههه... عاد عمي ما يتحمل أحد ما يمشي معه على الخط...

فيصل: عشان كذا كان ينبسط على عذيب... تمشي معه على الخطين إن بغى...

عبدالمجيد: ليش كان يهتم يعلم عذبة على الشغل ؟

فيصل_ينظر للشرفة ويتنهد_: كان يقول لي أنا أحس إن هالولد مب عايش...

ومالبناتي أحد....

عبدالمجيد_يقوم من الكرسي ويقف مقابلاً لفيصل_: شلون؟

فيصل: من راح ماجد وهو متغير... من راح ماجد إعتبر إن بناته لازم يعتمدن على أنفسهن... كان يقول لي أنا ما أبي بناتي يطيحن لأحد...

أبيهن هن يوقفن على رجليهن...

ولامن قلت له وسعود... قال لي سعود مب دوم معهن...

كان يحرص على عذبة وليلى أكثر من سعود

بس ليلى ما تعطيه وجه...

وبعد زواج عذبة تعب عمي مرة.... ما قال لي بس حسيته خايف من شيء...

وصار... سعود مات.... وهو تعب وماجد تأكدت موتته...

ورجعت عذبة... وطاح الحمل على راسي...

عبدالمجيد: أآآآآآآآآه... لو عمي يشوف عذبة الحين كان ينبسط...

ينبسط مررررررررة...

فيصل: خبل... رحمه إنه ما شافه الحين...

عمي أبو... يبي بناته يعشن حياتهن بطوله وعرضه...

يبيهن يعيشن وينبسطن بلا هم بلا مشاكل...

عبدالمجيد: هـــــــــــــــــــــو!!

أجل ليش يحط كلش بإسم البنات ويخلي عذيب المسؤول؟

إلا هو ما يبي أحد يشيل الشغل عنهن...

فيصل: هه... مشكلتك ما تفهم...

ياحبيبي عمي خايف من اللي صار إنه يصير...

ولمن صار... مابيده إلا يحط الهم براس واحد يرتكي له أهون من عياله كلهم...

عبدالمجيد: شلون يعني؟

فيصل: عمي حط الهم ببطن عذبة... خاف يلحق الهم الباقين...

بس الهم الحين أكبر بكثير مما تصوره عمي...

عبدالمجيد: طيب وأنت... مادامك تعرف الهم ... ليش ما تفزع!!

حرام عليك ... عمي يوم يموت..مات وهو مرتاح إنك سند لبنته...

فيصل: والله رضيت بالهم والهم ما رضي فيني!!

بنته اللي تبي الهم ولا تبيني ... شسوي له أنا!!

مو صغيرة ولسانه يلوط إذانه وقشرا... عذبة ما أخذت من طيبت أبوه...

عبدالمجيد: ماخلت منه شي... بس ظروفة تختلف عن ظروف أبوه...

عذبة تعيش حرب مع أقرب الناس له...

وأبوه كان يعيش الحب مع من حوله...

فلا يعني حقد اللي عايش بالحجيم شر...

ولا حب اللي عايش بالجنان طيبه...

فيصل: يمكن... بس عذبة هي أللي أبعدتن عن طريقه... حاولت أعتذر منه..

والإعتذار الوحيد اللي قبلته مني هو إني أبعد عن وجهه...

_طرقات على باب الغرفة_

عبدالمجيد: مين؟

_يفتح تركي الباب وهو يغني_:

تروكي جاكم...حيوه...تروكي جاكم بوسوه...

فيصل: وععععع من زينك نبوسك!!

تركي_يغلق الباب ويجلس بالكنب المجانب للباب وهو يضحك_:

أفا يا عمو... يا فتفت.. هذا وأنا جاي من الدوام تافلن العافيه.. وجاين أسلم عليك!!

والله ما تستاهل...

عبدالمجيد: الحين أنا أبي أفهم... ليش راقي لغرفتي... نورة نايمه لو طلعت من غرفته!!

تركي: من زينك أنت وأختك... لو طلعت كان هجيت... بسم الله الرحمن الرحيم...

جنيه وأخت جني ولا بعد قايمة من النوم !!

تلقى تحت شعرة جني متشعمط!!

فيصل: هههه هذا وأنت جاين من المستشفى...

أجل لو جاي من فراشك وش تقول؟

عبدالمجيد: تروووووووووك... البيت له حرمة!!

تركي: ماله رجال!!

فيصل: هههههههههه

عبدالمجيد: أنا جااااااااااااااااااااااد أتكلم...

تركي: هون على نفسك خيو!!

نورة عند نجلاء... يوم ألبق سيارتي سألت الطباخة .. قالت " نورة ونجلاء بيتطلعو على خطيبو لليلى إجى بيزور"

مادام عزوز ماجاء نورة مب جاية...

عبدالمجيد: هالنمسه ما تخلي أحد بحاله!!

فيصل: أجل خطيبو لليلى إجى بيزور!!

والله خرت لك الطبلون... أشوفك مسنتر كل يوم عند باب مطبخ عذيب

لا تصير عاشق هالعجوز الشامية!!

تركي: لا حبيبي أنا مو ذوقي خايس مثلك أدور طباخات ...

فيصل_يحمر وجهه غضباً_: ترووووك!!

تركي: فتفت... من كان بيته من زجاج فلا يرمي الناس بالحجر!!

*************

"في الصالة"

تدخل ليلى وهي تمسح دموعها تمسك عذبة بذراعها وهي تقول:

تعالي... وش بتس؟

ليلى: وش مابي!!

_تنزل نورة وتتبعها نجلاء مسرعتان بالدرج ويقفان على آخر عتبه_

عذبة: وش صار؟

ليلى: ماصار شي... الشيخ يبي يروح للشرقية وأنا آخر وحده يعطيه خبر...

نورة: عزوز بيروح الشرقية!!

ماقال لنا شيء!!

عذبة: شلون بيروح الشرقية؟

ليلى: تعين هناك ... بيدرّس بجامعة الملك فهد...

عذبة: وه... بس هالصياح عشانكم بتروحون هناك!!

ليلى: إيه قولي دلوعه زي ما يقول عزوز بيه...

نجلاء: أكيد دلوعة... وقعدت تصيحين عنده...تستاهلين يقول عنتس مب دلوعه وبس إلا ...............

ليلى: نجلوه إسكتي!!

نورة: هههههه... أشوف الأوضاع متعقده بينهم...

والله ياهل عزوز كمخه... مافادت فيه دروس فيصل ومجيد!!

نجلاء: أقووووووووول وخروا هالإثنين عن الرجال بس...

ترا مابلاه وحاسه إلا فيصل وعبدالمجيد..

لو بينفعون ذولا أحد كان نفعوا أنفسهم!!

ليلى:هههههههههههههههههه

نجلوه ههههههههه

والله إنك صدقتي...

عذبة: لا صدز دلوعه تو تصيحين والحين تكركرين!!

نورة: وش تسوي تضرب على نفسه حداد..

إلا كركري وإستانسي يا مريت أخوي...

عذبة: وجع إن شاء الله يالمصلحجيه...

أشوف بديتي تشبكين مصالح من الحين!!

نجلاء: أفاااااااااااا عليتس... نورة مصلحجيه من الدرجه الأولى...

نورة: أنتي ياعذبوه جيبي المملك لتس أنتي وأختس..

هذا فيصل بذا وبيقعد إسبوعين وبيسافر معنا...

تزوجيه وسافري معنا...

وااااااااو وناسه... بس طبعا جيبي معتس إختس الصغيرة حرام تخلي مامتها...

نجلاء: إيه صح... عين الصواب لك إختي!!

عذبة: نوير... فكين من شرتس.. أنتي الحين بس تبين من هالزيجه نجلوه

فكينا وزوجيه مجيد بيه... وخليه تسافر معتس وفكين من شرتس... وه!!

تعالي ليلى...تعالي قولي لي وش صار...

بس طبعاًً فوق بعيد عن المبزرة المتطفلين!!

_تمسك بيد ليلى وتسحبها للدرج , فيما نظرت ليلى لنجلاء ونورة بخبث وأسرعت لتسبق عذبة, نظرت نورة لنجلاء بغضب قائلة_:

نجلوه.... لازم نعرف اللي صار!!

نجلاء: حلمي... إذا ناظرت ليلى كذا إعرفي إنه حطت براسه ماراح تدرين عن شيء...

نورة: وأنتي خبله ... بتروحين بتقولين له وش صار...تكفين ليلى قولي لي وش صار!!

نجلاء: أجل شلون أدري؟

نورة: إممممممممممم.... إسمعي... لا تسوين نفستس مهتمه...

وإذا سألتس ليلوه عن شي قولي ما أدري...

يعني إزعلي ...

نجلاء: يوووووووه... تبينن أزعل على أختي وهي بتتزوج بعد إسبوع!!

نورة_بخبث_: لو كانت عادتس إخته كان قالت لتس...

نجلاء: نورة!!

لاتصيرين شر!!

نورة: خخخخخ وأنتي صدقتي!!

بس سوي نفستس زعلانه ... ودقي الكلام ... وهي بتقول لتس كلش...

وهذا وجهي..

نجلاء: وش أسوي بوجهتس؟

نورة: عطين بوكس.........................أمزح...أخاف تختلط ملامحي!!

نجلاء: شدعوه... بس قهر اليوم مارحت للنادي...كله من لقافتس!!

نورة: لا والله!!

من اللي تحمس معي... أنا ما غصبتس.. أقدر أجي حتى لو أنتي مب بوه...

مير ترا نواعم بتجيكم بعد شوي........

شفت سيارة أبو التواريك عند باب مطبخكم وقفت ونزلت نواعم وراحت لبيتنا..

أكيد إذا رجع عزوز بتجي...

نجلاء: إيه متواعده هي وليلى ما أدري وين بيروحن... بس الظاهر بيروحن لخبيرة تجميل... بزران فاضين...

نورة: الحين ورا حنا ما نروح معهن!!

نجلاء: الحين شلون تبينن أزعل وتبيننا نروح معهن!!

نورة: إسمعي.... إزهليه علي وخلتس زعله....

نجلاء: ياسلام تروحين لحالتس!!

نورة: لا!!

أنا أبقول أبروح وإلا غصب أبروح ... وأخلي عذبة تخلين أروح...

همن إذا وافقوا لي.... أقولتس تعالي يا نجلاء ... وأنتي قولي لا لا ما أبي مالي خلق...وسوي نفستس زعلتن مرّة..

نجلاء: إيه... وروحي لحالتس وأنا زعله!!

نورة_تجلس وهي تمسح وجهها بعصبيه_: ياخبله إجلسي وإسمعين!!

نجلاء: لا منب جالسه ... أمي عذبة تقول لا تقعدين على البلاط البارد يضر أرحامتس!!

نورة: وأنتي بقالتس أرحام من تمغيط رجلينتس بالكاراتيه!!

نجلاء: نوووووووووووووووووورة!!

الأرحام مب بالرجلين!!

نورة_تشدها_:إجلسي إن بغن يصيرن بالمريء بس فكينا...

أنتي إزعلي وأنا أبغصبتس آخذتس معي...

أصلاً هالثنتين ما يبنن أصير معهن يقولن تفشليننا !!

أنتي تفكينهن من...

نجلاء: وجع إن شاء الله!!

أنا أعفج حنوكهن لو يقولن هالكلام عنتس!!

نورة: هو نسيتي بعد يقولونه عنتس!!

نجلاء: لا والله!!

نورة: هـــــــــو!!

يوم نتهاوش حنا والبزران ذوليك!!

نجلاء: هههههههههههههه

والله ياهن بزران ....

نورة: والأبزر منهن حنا!!

نجلاء: أقول... بتجي نواعم الحين وحننا نخطط...قوه لغرفتي ولا غرفة الضيوف...

نورة: مانيب متحلحه ... وه تعبت من الركض والطبقة!!!

نجلاء: ياعجوز قريح!!

**********

"في الصالة (بيت أبناء العم)"

أم عبدالله تتحدث بالهاتف , ونواعم تجلس بجانبها بتململ..

تغلق أم عبدالله الهاتف وتلتفت على تواعم:

وشلونتس يا بنتي!!؟

نواعم: بخير يمه...

شخبارتس أنتي..؟

أم عبدالله: أنا بخير ونعمه... مير رجيلاتي وه..هالرمازتن لاقط رجلاتي...الحمدلله اللي آصل الحمام وأقدر أصلي على كرسي...

مابي خلاف..مابي خلاف...

نواعم: وين خالتي أم عبدالعزيز؟

أم عبدالله: إيه ما تبينن عند أم عبدالعزيز!!

نواعم: لا يمه... من متى وأنا جالسه عندتس وما عطيتين وجه تكلمين بالتليفون...

أم عبدالله: الحين تجي هه إسمعي حسه تسولف مع تركي...

_تنزل أم عبدالعزيز وتختمر بالشرشف, تتحدث مع تركي ويتبعها عبدالمجيد وفيصل وعبدالعزيز_

تركي: ياولد...ياولد...

عبدالمجيد: ياولد...

نواعم: وه... ذولا منيل طلعوا يمه!!أبي جلال بسرعة!!

أم عبدالله: هههه فوق... خوذي هالجلال جنبتس...

إيه توي مصليه...

أم عبدالعزيز: نواعم بنيتي!!

ياهلا والله... أمس كلمت أبوتس أسأل عنتس...

مالتس حس ولا رس هاليومين..؟

نواعم: شسوي... تعرفين توي أعطل.... توي أرتب أموري عقب الإمتحانات والحوسة...

تركي: خطير... أختي يا خالة ماتجلس أبد... ما أشوفه إلا ترتب غرفته ومكتبه...

إلا قولي أخزن نووووم ولا أقرا مجلات!!

فيصل: لا حووووووووووووول...

أنت ماتعرف تسكت... اللي يشوفك عاد يقول مابوه أسنع منوه...

بس كني أشوفتس ماعندتس نيه تقومين تسلمين ولا مانتب مسلمه علي نواعموه!!

نواعم:..................

أم عبدالله: عزوز وليدي وش أخبارك؟

عبدالعزيز_يبتسم فتظهر أسنانة البيضاء, ويحك ذقنه الخفيف, إحمر وجهه الأسمر,وكمش عيناه الصغيران بخجل_: تمام...

فيصل: نواعموه!!

أجي أحب راستس بعد!!

أم عبدالله: أقول شلون تقوم تسلم عليك وبوه هالهرشه!!

بعدين ما أذن الأخير يالله روحوا صلوا!!

تركي: إحم إحم ... إختي حيويه ما أدري كيماوية...

ما تحب تتحرك في حضرة رجالن أجانب!!

يالله يا شباب هيا إلى الصلاة!!

_ويضع يديه على كتفي عبدالعزيز وعبدالمجيد ويجرهما للخارج_

أصققاي ... الحلوين المخطوبين ... لا المخطوب والمفركش...

ههههههههههههههه

عبدالعزيز: تروك ما توضيت وخر....

تركي: أقول لا تدخل على أختي أروح وأدخل على ليلوه!!

توضا من الملاحق اللي برا!!

_يدفعهما تركي خارجا ويعود ليغلق الباب وقبل أن يغلقه يدخل رأسه ويصرخ_

خوذي راحتك ست خواشن!!

المكان خالي من الطحوش!!

سلااااااااااااااااااااااام جدتي ... سلام مرت عمي...مب سلام عمي أبشوفك بالمسجد!!

_أغلق الباب_

نواعم: وه يا عم فشلتن شلون أقوم .. والجلال ما أدري وش يبي ... لو بقوم طلعت سيقاني....!!

_وتقوم لتسلم على فيصل_

فيصل: لا والله... !!

لوما إنتس بنت أخوي كان زعلت...

أم عبدالله: أشون قلبك رحوم مير يا وليدي ههههههههه

فيصل: يالله أبروح ألحق على الصلاة مانتب نافعتن لا أنتي ولا سيقانتس هاللي تقل خبز فرنسي...._ويخرج مسرعاً_

نواعم: عمى!!

أم عبدالعزيز: لا يابنيتي ما يصلح هاللبس... البيت كله شباب ...

شوفي تورطتي يوم نزلو...

أصلاً شلون تطلعين من البيت وعليتس قصير لو نزلتي من السيارة ولا صار لتس شي...

تطلع سيقانتس الله يستر علينا...

نواعم: خاله... سشوي هذا الموجود بالسوق!!

أم عبدالعزيز: لا يا بنتي موب هذي حجه... أنتي ما تخلين سوق ماتروحين له...

أكيد بتلقين... شوفي البنات نجود ونورة وعذبة ونجلاء ولا ليلى الله يهديه من ربعتس...

أم عبدالله: إي والله لو الموطة تقول إلبسن طويل وساتر لبسن!!

مير خليهن عنتس لامن قلنا لهن شيء قالن مانلقى !!

من دور لقى مير هن مب باغيات....

نواعم: هههههههههههههه يمه الموضة....

أم عبدالله: أللي هي!!

شوفي سارة مرت أبوتس كله ملح يوم تجينا ذاك اليوم عليه الضافي...

مب زيتس وعع...

نواعم_تمط شفتيها بإمتعاض_: زين يمه مع السلامه ...

أنا بروح للبنات ببيت عذبة...

تبون شي؟

أم عبدالعزيز: إصبري خلين أجيب لتس شرشف صغير وخفيف...

نواعم: لا... باخذ عباتي....

_تقوم نواعم وتتجه للباب وتتبعها أم عبدالعزيز فتمسك بكتفها عند باب البيت هامسه_:

نواعم...

نواعم: سمي يا خالة؟

أم عبدالعزيز: وش لي عند

نواعم: عيوني... أنتي أمي اللي ما ولدتن...

أم عبدالعزيز: أبي منتس شي وتقولين تم!!

نواعم_تضحك_: تم حتى قبل لا أسمعه... وش بغيتي؟

***************

***************

"في الحديقة_بيت أبناء العم_"

تركي: ذبحتن والله ماتستحي على روحه!!

عبدالعزيز: إيه الله يهديهن... بعض البنات هن اللي يدورن الشر لأنفسهن..

فيصل: تروك.... غريبة...!!

تركي:أصلاً المرة إذا فصخت عباته فصخت الحياء معه!!

والله ياهي بهذلت بي... وأقول لمحمد ويقول لي لاتعطيه وجه... إنصحه..

سلمان: إلا لخه طراق خل وجهه يفرك بالأرض...

قلة أدب...

عبدالمجيد: هههه أقول أنت يالبلطجي... إلا أغديك تاخذ لك ماصورة وتصبخ به راسه...

تركي: ههههه لا... إلا العنف.... أنا أقول يا مجيد لو تعطيه قنعه تنسيه إسمه...

فيصل: لو قنعات مجيد له مفعول كان خففت شر نوير مير أخفي لاه تحفز الشطانه...

عبدالعزيز: هههههههههه أشوف نورة تويز علي تو من بلكونه غرفة عذبة ...

فيصل: أدري ماتفوت عليه هالفرصة!!

تركي: للحين هي ملقوفه؟

سلمان: وإلى يوم الدين....

عبدالمجيد: ههههههه أقول تركي... وش أخباركم مع مرت أبوك؟

تركي: حليله....

مابه شر... بس أبوي طاير بين السماء والأرض....

فيصل: إيه هذولا الرجال لامن أعرسوا التالية طلع لهم علومن ثانيه...

سلمان: تروك وأنت متى بتعرس؟

تركي: إيه... أنا فكرت بالموضوع تفكير عميق ... وفكرت وفكرت ...

عبدالمجيد: وفكرت وفكرت وبعدين هل قررت؟

فيصل: وفكرت وفكرت بعدين وش قررت...ولا مازلت في طور التفكير؟

عبدالعزيز: أكلتوا الرجل!!

سلمان: عوداً على ذي بدء... وش قررت؟

تركي: إكتشفت الحين اللقافة منين جايتن نوير!!

كل العايلة ملاقيف لاحووووول ولا قوة!!

عبدالعزيز: إلا بالله العلي العظيم...._ويرشف الشاي بهدوء_

فيصل: إنجز!!

تركي: قررت إني آخذ وحده....

سلمان: أشوا أحسبه ثنتين...ههههههه_يضحك بقوه ويضرب كفه بكف فيصل_

فيصل: هههههههههه طيب وحده... وبعدين؟

تركي: والله ثنتين مب شينه؟

عبدالعزيز_يضع بيالة الشاي على الطاولة ويتنهد_: أقول أنت إذا تزوجت وحده أضمن لك مانتب مفكرن بالثانيه...

تركي: لا عاد!!

عبدالمجيد: طيب منهي المرة؟

تركي: إيه أنا قررت آخذ وحده...

سلمان: دارين إنه وحده...................إنجز!!

تركي: طيب جايك بالكلام!!

وه حر... أبي شي بارد... دق على المطبخ خلهم يسوون لي شي بارد...

عبدالمجيد: مررررررر

إصبر شوي بندخل العشاء...

تركي: دق وأنت ساكت...!!

فيصل: دق مجيد دق... خله ينجز علينا ذا!!

تركي: ياحظي متحمسين تدرون منهي؟

فيصل: إيه...

تركي: أهم شيء إعترفتوا....

عبدالعزيز: إسكت واللي يرحم والديك أدوختنا ولا عندك كلام!!

تركي: لا عناد أبتكلم!!

قررت آخذ وحده_يضحك بينما يضع فيصل يده على وجهه بغضب_ وحده أصيله

تقدر الحياة الزوجية وتكون جاده...

فيصل: قالوا لك تسوي إعلان بقناة فضائية أنت؟

تركي: لاو الله جاد... أنا أبيها تقدر الزواج والبيت حتى لو ماقدرتن أنا ..

أبيه تحط بيتها أهم شي بحياته.. ما أبيه تتوظف ولا تدرس..

تاخذ شهاده وبس... وتجلس بالبيت وتتوظف ببيته..

أبيه تقدر إن البيت مسؤولية وعطاء مب مظهر إجتماعي!!

أبيه مرة زي أمك وأم عبدالعزيز....

سلمان: ومنهي تعيسة الحظ ذي؟

عبدالمجيد: والله شروطك خطيرة ترا البنات ما يحبون رجلن يحجرهن بالبيت!!

تركي: أنا منيب حاجره... أبعطيه كل شي تبيه ومراح أمنعه من شي...

بس هي بعد تعطي بيتي وعيالي حقهم...

عبدالعزيز: _يمد بيالته لسلمان_صب السلمي...

كلامك ذهب ياتركي... صارن الحريم الحين يطلعن يربن عيال الناس بالمدارس ويخلن عيالهن للمربيات والتلفزيونات..

ماتلاحظون الجيل التالي ما لأمه داعي... همج وبزران مجمعه وهم رجال بلحى!!

فيصل: مو كل موظفة تهمل بيته!!

تركي: أغلبهن وبالذات الطبيبات.... لا بغيت تدعي على أحد قل جعل بيتك تولاه طبيبة...

فيصل: هههههههه حلوه ذي...

طيب أنا كنت أروح الصيفيات مع عمي لبيت ماجد الله يرحمه... أمهم وهي طبيبه ماتخليهم لحالهم...

متفاهمه هي وصديقته... ويتناوبن على الجلسه مع البزران...

تركي: إيه وكانت تقول الله يرحمه " لولا مدام أمينه كان زماني ماكملت دراستي ولا إشتغلت "

صح؟

وحتى يوم جت للرياض صارت تتناوب مع ماجد وعمي ناصر....

يعني منين بتلاقي صديقات زي هالثنتين ومنين بتلاقي وحده مثل فرح...

كانت تضغط على نفسه عشان بيته وحتى يوم راح ماجد وإنقطعت أخباره

تركت الوظيفة... أنت رجعت لكلامي يا فيصل... أنا أبي وحده تقدس بيته...

وتحطه بالمقام الأول ... هذي عملة نادره... أشوف معنا طبيبات آخر ما يهتمن فيه أطفالهن...

عبدالمجيد: صح... وظيفة الطبيبة ماتناسب طبيعة المرأة...

وخصوصا بنظام المناوبات والخرابيط هذي...

تدرون إن فرح دايم تقول" ولا وحده من بناتي أبسمح لها تدخل طب..."

يمكن المدرسة تقدر تهتم ببيته أكثر..

سلمان: والله تبون الجد... لا والوظيفة ولا غيره.. راجع لإهتمام المرة نفسه ببيته وعياله...

تركي: بس الوظيفة تنهك المرة اللي تهتم بعياله... تلقاه تفكر عند مين يجلسون والناني وش توكلهم وتخاف لا الناني تسوي لهم شي...

وإذا جت من الدوام تحاول تعوضهم عن غيبته عنهم...

وبالنهاية هي اللي تدفع ثمن الوظيفة ...

عبدالعزيز: صح...

عبدالمجيد: طيب منهي هذي اللي تقدر الحياة الزوجية؟

تركي: ههههههههههه ماقررت...

سلمان: ياخذ بليسك!!

والله إني كنت عارف إن ما عندنا أحد!!

تركي: صادووووووه...ههههههه

***********

***********

"في غرفة فيصل"

يدخل عبدالمجيد ويجلس على سرير فيصل ويضع يده على ظهر فيصل ويصرخ:

هيــــــــــــــــــــــــــــــــه للحين نيم ....!!

فيصل: وجع إقصر حسك...طبلة إذني إنفجرت...

بتطلع اليوم معي ولا بتروح للشركة؟

عبدالمجيد_يحك شعره ويكمش عينيه_: إممممممم ما أدري... بس لو بـتأخر خمس دقايق إن إتصلت عذبة تقول" مجيد للحين نيم يالمدير؟"

فيصل: جنب!!

وش يدريه عنك؟

عبدالمجيد: هههه تستهبل أنت؟

ماهر لو يفقدن شوي دق عليه يسأل ليش تأخرت...

ما أدري ليه تسمح لكل الموظفين يتأخرون إلا أنا!!

وليش هالماهر مايتصل علي مباشرة... أستغفر الله مصدق إن الشركة ملكه..عمى!!

لأبوي وعماني منه...وه ...

فيصل: أشين شيء بهالدنيا تصير تحت سلطة مرة ... ولا بعد عذيب...

عقدتن بحياتي ....الله يعينك...

عبدالمجيد: بس والله أحسن من الدراسة...

فيصل: أكيد ياعمي من قدك... تركت الجامعه وصرت مدير عام ...

هذي مايحلم به ولا دكتور كارف عمره يدرس...

مجيد... أنا تو أفكر بشيء وجع راسي...

من زمان وأنا أفكر فيه... بس الحين بسألك عنه...تجاوبني بصراحة...

عبدالمجيد: لاتقول الفلوس اللي عطيتن منيل؟

مراح أجاوبك...

فيصل: لالا

عبدالمجيد: وشو؟

فيصل: ليش ماقلت لي إن ليلى كانت له علاقة بقطعة هالـ(.....)ـي مؤيدوه؟

أنا المفروض أول واحد يدري... ليش ماقلت لي؟

عبدالمجيد:دريت....!!

صعبة أقولك... أنت لو كنت بمكاني منعتك رجولتك تسويه...

فيصل: بس أنا المسؤول عنهن...

مو يعني عذبة قالت لك لا تقول لأحد تسمع كلامه خايف تطردك من الشركة يعني!!

_يعتدل عبدالمجيد بجلسته ويزم شفتيه ثم يقول_:

لا... أنت صح المفروض إنك تدري بس مو من...من عذبة ...

وأنا مو خايف إن عذيب تطردن من الشغل لأنه الحين معتمده علي...

فيصل: معتمدة عليك!!

هههههههههههههه

حلوة ذي يا شيخ... لا تستبعد تفتح يوم وتلقى نفسك تجدع وجهك يقبلونك بوظفية سكرتير ونعمه...

هذي نسرة وماتنومن... عيوني لا تصدق عمرك مرة...

_يتعالي نفس فيصل ويصد وكأنه يستحضر مواقف مؤلمة مرت عليه_

عبدالمجيد: ما ألومك لأنه طردتك...

بس أنا مهما سويت مايجي شي عند اللي صار منك...

فيصل: مجيــــــــــــــــــــــــــــــــــــــد حتى أنت؟!!

عبدالمجيد_يمسك بيد فيصل ويحاول تهدئته_:

لالالا... لا تفهمن غلط...

أنا أقول هي منجرحة منك لأنه تحبك...

والمرة متطرفه بمشاعره...

وإذا حبت حبت بجنون وإذا كرهت كرهت بجنون...

أنا أبقولك ببساطة...

عذبة إرتمت تحت رجليني تصيح, وتحبب رجليني إني أسكت على الموضوع,

أنما عمري ما شفت عذبة اللي خشمه يشق السماء تذل نفسه لهالحد...

حط نفسك مكاني.. والله لو تودي نفسك للمشنقه بس ما ترده...

هزتن كلي... وصارت تقول حط نفسك مكان سعود...

ولو كنت مكان سعود مستحيل أبقول لك هالشي...

ومستحيل أكسره زود ماهي منكسرة...

بس أنت جيت معصب وليش ماقلتوا لي وليش ما ليش وفجأه بردت...

أحد قالك... أكيد عذبة ولا تركي...

صح؟

يتبع ,,,,

👇👇👇

تعديل المقال