رواية بصدري وجع كنت احسبه نام يا صدري -47
ناظرته للحظه وآشرت ب آييه ..
قام وهو يأخذ جواله ويشغل القرآن تركه قريب وهو يأخذها ويضمها لصدره ويغطيها : نامي وعليك آمان الرحمن من كل شي تخافينه ..
بيت جد كادي ..
الوليد : عاد مدري نامت ..
وهو يعدل شماغه وبلهفه لها : لالا مانامت ..
ضحك خاله : عارف أنك ماتبي وجهي رح لها ..
ضحك : تصبح على خير أجل ..
خاله وهو يضحك : وأنت من آهله ..
دخل خاله لغرفته وتقدم لـ غرفتهم أخذ آنفاسه كأنه أول مره يدخل عليها كله توتر من ردة فعلها ..تنفس ودخل وهو يصك بهدوء الباب كانت توها بتنام والنور طافي فزت من السرير وبخوف : ميين ؟
شغلت الابجوره وفهت بصدمه : محمممد
ابتسم : جيتك ..
ركضت من فوق السرير لـ رقبته بسرعه وهي تصيح وتعاتب :حقييير اششتقت لك سسسخيف ..
وهو مبتسم وشايلها : وبعد ..
صارت تبكي تحت رقبته لفتره وهو يجلس وهي بحضنه رفع وجهها : بعد عيني..
وهي تكف دموعها : آشتقت لك والله ..
رجعت لحضنه : ترى سخيف ..
ضحك : آشتقت لك ..
: واضح ..
: والله ثم والله آشتقت لك بالحيل ..
مسحت دموعها : والدليل ؟
: أني جيت لك ..
: عقب وشو ؟
: كادي لو أمك وأبوك أحياء وطلبوا منك طلب راح تلبين لهم الطلب والا راح تجين لي ..جربي شعوري حسي فيني آمي وأبوي ذولاي ..
بدموع وهي تبعد عنه : مقدر آجرب شعورك لان آمي وأبوي ميتين ..
كره لسانه وزلاته هاليومين كاثره ..!
وقف وراها : كادي ..
: ليتك ماجيت ..
: آفا ..
: قلبت مواجع غافيه عني من زمان ..
باس جبهتها : آسف ..
: وش آسفك راح يفيد يعني ..!
وهو ماسك كفوفها : ماتشفع لي جيتي من أبها وطيارتي بكره 11 الصباح .. واللهفه اللي بخاطري عليك .. والمزاج التراب من وقت الزعل إلين هاللحظه..والرصاصه الطايشه اللي كانت راح تجي بين المحاني ..
رفعت عينها بسرعه بعينه : وشو ..؟
: ربك ستر وسلم ..
تعقلت برقبته وهي تبكي : ولاتقولي ..وتقول هناك آمااان ..وتقول بعيد..
: كادي عمري الحين أنا بخير ..
بعدت عنه : محمد تكفى لاترجع هناك .. استقيل الله يخليك ..
ابتسم : طيب اسمعيني خلينا نسهر الليل سرى ولا أخذت علومك وعلوم هالحلو..
حطت كفها على كفه اللي آمتد لبطنها اللي بدأ يبرز : هو بخير بس آمه لا..
: وشاللي مضايق آبوه غير ضيقه آمه ..
تحاول تطلع من مودها الكئيب وتبدل ضيقته : آشتقتي لي بجد ؟
ابتسم : ذايب ذوبان ..
وهي تصرف نظراته : ناحف ومنقلب لونك ..
ضحك وهو يكف باقي دموعها برموشها : عاش مصرف ..
ضحكت : آفف منك ي أنت .. ضمني لك ..
ضحك وهو يضمها : أكثر ؟
بجنون : حلالك ..
ضحك وهو يبوسها : الله لايحرم محمد هالضحكه ..
.
.
.
اليوم الثاني ..
الوليد : مابعد نمتم ؟
: لا ..
: مب صاحين .. كادي خفي عليه ياخالك ..
ضحكت وكملت تحضر الفطور ..سمعت صوت جدها صحى : حمودي روح شوف جدي صح ..
مشى محمد لاجل يسلم عليه ويجلس وياه ..
الوليد : كدو تراضيم ؟
وهي تنزل القشطه : آييه .. خايفه عليه كان راح يصاب ..!
آنصدم خالها : متى ؟
: قبل فترة .. بس الله ستر ..
: الحمدلله اللي سلمه .. بنت خفي عليه من الزعل تلاقينه يهوجس فيك وجا للرصاص ..
ضحكت من قلبها على خالها ..
دخلت جدتها وابتسمت وهي تشوف وجه كادي منور بجيه محمد لها ارتاحت براحتها وهي تدعي إن الله مايفرقهم ..
.
.
الفندق ..
مسكت يده : لاتخليني هنا ..
ابتسم : على بالي نايمه ..
وهي تجلس : وين بتروح ؟
: بقوم آغسل وآطلب لنا فطور وعقبها آوديك لاهلي وآروح آشوف سالفة الصوت البارح ..
: ممم أبي آمي ..
: خليها بعدين لازم الحين نروح لبيت آهلي وحتى فهد مسوي عزيمة غدا .. وحلو بإن آمك تجي وتشوفك قبالها ..
ماردت ..
: فجر خل نروح آول لشقتنا نأخذ ملابسنا من هناك ونبدل وعقبها آوديك لاهلي وارجع آشوف السالفه ..
: لالا ماروح هناك ..
ابتسم ورجع جلس على السرير : لاتخافين وش لزمتي معاك .. أنا شاك بشي معين بس بتأكد ..
بخوف : وشو ؟
: الصوت البارح الله يكفينا الشر صوت شخص ملبوس ..
: شلون ؟
: يعني فيه جن بسم الله الرحمن الرحيم ..
حطت كفها على فمها : تمزح ..
: منيب متأكد لكن بشوف السالفه ..
وهو لمح الخوف متأصل بوجهها من البارح : ماثقين فيني ..
: ليه ؟
: ملامحك مخطوفه من البارح .. عروستي لايقولون آخوانك روع أختنا علينا ..
ابتسمت غصب من آبتسامته : آييه آفداك ..
قومها معه ودخلو لاجل يغسلون ..طلب لهم فطور أكلت شوي وآكتفت : أذا أكلك كذا راح تطحيين بأي لحظه ..!
رسمت آبتسامه : اللي مر فينا البارح مو شوي ..وماراح آتطمن إلين آشوف شاللي صار ومصدر الصوت لانه شي مرعب ..
: حتى قبل السالفة ماتعشيتي ..!
: لان مالي نفس ..
ابتسم وقومها معه : مابيك تذبلين ..أخذتك من بيت عمي وش زينك وأبي تكونين معي أفضل ..
غسل ورجع لها .. أخذت عبايتها وهو ابتسم وهو يناظر ثوبه : ماحب يكون الثوب كذا ..
ناظرته وهي تلف الشيله : آممم موب معفوس حيل ..
حط الغتره على كتفه وهو يمسك كفها وطلعوا من الفندق لـ شقتهم ..
من دخلوا للشقه وهي ماتركت يده وهو مبتسم عليها وماسك نفسه لايضحك : شوفي مافيه صراخ لاتخافين ..
شدت على كفه أكثر : يمكن شوي وتصرخ ..
رفع حاجب : مين ؟
: الصوت نفسه ..
: لا بإذن الله مهنا الا كل خير ..الحين أذا تبين تبدلين ملابسك وحضري لك كم لبس لاننا بنرجع الفندق إلين آشوف السالفة وحلها ..
دخل معها للغرفه وهو يناظر يدها بيده وابتسم .. حست فيه يناظر يدها فكتها بسرعه وانقلب لونها ..
ضحك وهو ينسدح ماحب يحرجها أكثر تغطى باللحاف لاجل تأخذ ملابسها براحتها .. تحركت من مكانها بهدوء وهي تطمنت عقب ماغطى نفسه وهي تطلع لها ملابس من الشنطه أخذت كل المهم ودخلت لاجل تأخذ شاور وتجهز للعزيمة ..
تحرك عقب ماسمع صك الباب وهو مبتسم ..أخذ له ملابس وهو يدور ثوب طلع له ودخل حمام ثاثي أخذ له شاور سريع وطلع له شماغ جديد لبس وعدل العقال وهو يناظر ساعته : ي حب البنات للشاور ..
رش عطر وطلع يتأكد من الصوت ومصدره ..
سمى بالله وهو يدق باب الشقه المقابله لشقتهم .. تنفس بهدوء ..لف على انفتاح الباب : السلام عليكم ..
الرجال : وعليكم السلام .. سم ي الاخو ..
: معاك عبدالعزيز صاحب الشقه المقابله لكم ..
: الله يحيك .. تفضل ..
ابتسم : لاتسلم ..بس بغيت آستفسر عن صراخ البارح قوي من عقب 12..!
الرجال بحزن : سامحونا أزعاجنكم لكن بنتي معاها مس وبالليل تشتد حالتها ..
تأزم عليها : لاحول ولاقوة الا بالله .. الله يشافيها ويعافيها ..
: اللهم آمين .. والله ي خوك تعبنا من حالها والمشكلة رافضة تروح لـ شيوخ ..
: طيب الحاله من مبطي معها ؟
: لا .. مالها فتره ..
: جب لها شيخ يقرأ عليها وبأذن الله تتعالج ..
: حاولنا وتعبنا ..
: جب الشيخ وكلموها بالهدواه واللين وراح تطيع ..
: بنحاول والله كريم عساها تطيع ..
: الله يشفيها ومرضى المسلمين ..يلا عن أذنك وعذراً على التطفل لكن سكنت البارح وشدني الصوت .. عموماً أي شي تحتاجه بس دق علي وابشر بعزك..
: الله يجزاك خير .. يشهد الله إني مفتشل منك ومن الجيران خاصه بعضهم متأذين من الصوت لكن ظروفي ماتسمح لي اخرج وخاصه إن اللي مستأجر عنده رجال طيب ومساعدني بالحيل وصابر بالتأخر بالايجار لكن الله يعلم إنها ظروف ..
ابتسم : هونها كل مشكله ولها حل .. عن آذنك ..
رجع لـ شقته وكله فخر بأخوه فهد لانه تأكد أنه مساعد الرجال ولاأحد له علم ..
ابتسم وهو يشوفها ..
: وين رحت ؟
: لجارنا ..
: قال شي عن الصوت ؟
: آيييه ..بنته الله يعافيها معاها مس ..
: ي حياتي الله يشفيها ..
وهو يقرب لها : ي حياتي أنا ..
دنقت ..
وهو مبتسم ويرفع وجهها له : لبى هالوجه ..
ضاعت ملامحها وابعدت عنه ضحك وهو يرجع يرش عطر : مشينا بس .. بس فجر حطي لي كم لبس معاك .. إلين نحل هالمشكله ..
وهي ماتناظره : وين ملابسك ؟
ضحك من صوتها الخافت ولاناظرته تقدم حط له وعطاها وهو يغمز لها : ماصار شي ترى ..
طلع وهو يفك جواله من الشاحن ويناظر المكالمات ..
ابتسم على ربعه وش يبون غير المقالب ..
شافها طلعت شال عنها الشنطه ووعقبها صك الباب ..
: أول مره ماروح صلاه الجمعه مع فهد ..
: يمكن مابعد راح ..
ناظر ساعته : لا راح فهد يحب نبكر للمسجد ..
: تونا عشره يمكن مابعد راح ..
: ان شاء الله ..
.
.
.
بيت جد كادي ..
: خلاص بتروح ..
: آيييه لازم ..
: ضروي خلك شوي ..
: رحلتي 11
: بس 11 على نهايته ..
سكت ..
: طيب راح تجي قريب ؟
: إن شاء الله ..
: طيب ماينفع تجلس هنا وتقول أنت مريض ..
: ماقدر لازم آروح ..
وهي تمسح دموعها : طيب هالحقيرين راح يروحون عننا ..
: الحوثين ؟
: آييه ..
: بعون الله قربنا نخلص منهم ..
: طيب مافيها شي لو نقص شي واحد من الافراد ..
:لازم آكون هناك ..
تنفست وهي تمسح دموعها من ثاني : طيب راح تشتاق لي ؟
: محروق من شوقي عليك ..
ضمها لحضنه وهو يهمس لها ويهديها باسها وكف دموعه : آشوفك على خير .. ووعد أقرب موعد نطلع فيه بجيك لهنا مباشره بس لاتبكين كذا ..
طلع من غرفتهم شاف سلمان سلم عليه ونزل تحت ..
سلمان وهو يوقف على باب غرفتها : خلاص كدو بيرجع ..
ماردت على خالها ونزلت وهي تشوفه يسلم على جدانه ويطلع مع خالها الوليد..
تمتمت بهمس : آستودعك خالق الدنيا ومافيها ..
سيارة الوليد ..
: تبي تمر لـ سحر ؟
: ي ليت ..
.
بيت آهل لمار ..
ضحكت فجر وهي تشيل ولد فاطمه ( أخت عبدالعزيز الكبيره) : لاتصصيح عيب أنت كبير ..
أسيل : هو كذا استغفر الله ..
: يدنننن .. هدا هدا حبيبي لاتصيح عيبب صرت كبير ..
فزت على صوته : صادقه مفروض الكبار مايصيحون ..
انقلب لونها : جيت ..
وهو يشيل ولد أخته ويسلم عليه : آيييه تو من شوي من الصلاة .. أسيل عطيني عصير ..
حضرت له وهو يجلس ويشرب : مابعد جا أحد ؟
أسيل : لا .. بس خواتي من البارح هنا ..
: آييه سلمت عليهم قبل الصلاه ..
ناظرها : ترى فهد حجز لنا على دبي رحلة لمده آسبوع دام ماراح نسافر لاجل دراستك ..
ماعلقت ..
وهو مبتسم ويسولف لـ أخته : لاتفوتك فجر البارح آثرني تزوجت بيبي ..
تلقائيا طلعت معها : عبدالعزيز ..
ضحك معها وهي تضحك ومنحرجه : لا بقول بس لـ آسيل ..
آسيل تحمست : وشو وشو ..
وهو يشرب ولد أخته : شوفي أسيل طقتها اللقافه .. خلاص أجل بهون لاجل ماحرج مرتي ..
: عزوزز والله أن تقول شفني حلفت ..
ضحك من قلبه على اللقافه : ماصار شي بس بنت عمك دلوعه وخوافه ..
: لاتقول عن الصوت ؟
: الا ..
: آيييه شوف فجر ولمار خكريات ..
دخلت لمار : بعينك ..
ضحك عبدالعزيز وهو يقوم يسلم على لمار ماشافها مع خواته وامه : هلا لمور..
سلمت على أخوها : شخبارك ؟
: عال العال ..
جلست على الطاوله : آسيل جيبي لي ماي ..
: أفطري لمار ..
ابتسمت لاخوها : بس بشرب ماي ..
: لازم تأكلين ..
حبت فجر العلاقه بينه وبين خواته واهتمامه الواضح فيهم ..جات تطلع ناداها : وين ؟
: بروح لـ عمتي ..
حط ولد أخته بحضن آسيل : قبل ماتروحين لامي تعالي أبيك بشي ..
أخذها وطلعوا لـ غرفته : فجوره هذي هديه بسيطه جداً البارح كنت بعطيك آياها قبل سهرتنا لكن اللي صار فكرش آم الليلة ..
بهمس : شكراً ..
فتح العلبه وركب لها الدبله وهو يبوس موضع الخاتم وكفها : ترى لونك للحين مخطوف ي بنت .. خذي راحتك ترى خواتي يحبونك وأمي بعد ماتتخيلين لما قلت بتزوج شكثر فرحت ولما قلت فجر زادت الفرحة ..
: صدقني عمتي آعتبرها بمقام آمي والبنات بـ غلا منى وغاده ..
وهو يضمها من كتوفها لصدره : كلامك يخليني آتأكد وآثق للمره الالف بإن اختياري صح ..
ضاعت بحضنه : لاتحاولين الفكه بتركك بكيفي ..
: الناس تحت عيب والله ..
ضحك : لا مب عيب عندي ..
: بليز ..
ضحك أكثر عليها : طيب نزلنا ..
دخلت لـ داخل وهو مشى للمجلس شاف مساعد ولافي وسامي وسليمان ( أخوان فجر الكبار) سلم عليهم وجلس: حياكم الله ..
: الله يسلمك ..
.
.
.
شقه الجوري ..
رتيل معها جات لها قبل صلاة الجمعه ..
: ي زين هالشي .. حلو كذا أبي آعيش وحدي ..
وهي تعطيها عصير : حلو تحسين نفسك مستقله عن الكل .. بس الوحده تذبح خاصة بأوقات تكونين محتاجه أي شخص معك ..
: طيب سطام مايجي ؟
: نادراً .. حتى احنا متفقين نبعد عن بعض هالفترة ..
: لييه ؟
: آممم لان علاقتنا متدهوره بالحيل .. خاصة عقب زواجه والحين حمل آمجاد ..
: صدقيني جوري كل شي بأجره بأذن الله ..
وهي مبتسمه : عارفه والله يعوضنا خير ..
: تغارين عليه ..
وهي تحرك ساعتها بهدوء : كثثير .. أكذب على نفسي بأوقات كثيره لما آقول مايهمني بس كل ماشوفهم سوى ويدلعها ويهتم فيها آغار عليه بشكل لايطاق..
: يعني تحبينه ؟
: ججداً .. قلبي غبي عارفه بس ماقدرت آحكمه خاصة لما كنا مع بعض وقبل شيل الرحم كان غير معي بشكل محد يتوقعه شخصيته مره حلوه بس مشكلته مزاجي (بإلم) ويعشق بنت خاله ..
ظلت تناظرها بحزن ..
: حتى فرحته بحملها غير عني تماماً لما حملت حسيته آنصدم وماحب هالشي برغم إني سألته وقال لا فرحان .. بس مع بنت خاله عرفت إن شعوره كان كذب ..
: وتحبينه برغم كل ذا ..!
: الشخص الوحيد اللي عطاني حب (بغصه ) ولو هو كذب .. كنت محتاجه أحد يضمني يحتويني خاصة عقب اللي سواه أبوي فيني ولقيته وعطاني كل شي بس كل شي كذب × زيف × خداع ..!
:تطلقي منه..
رفعت راسها وابتسمت بإسى : تخيلي برغم كل المشاعر اللي يكنها لي من عدم حب رافض يطلقني ..!
بقهر : لييه ؟
: يقول أبوي راح يزوجني لـ غيره وأكيد بيكون شخص مب زين ..
ضحكت من قهرها : شفتي كيف بس ..!
: بلا في شكله .. يعني فيه كائنات حقيره مثل عساف ..
ضحكت الجوري : ريتو بسألك بجد ..
ب اهتمام : وشو ؟
: لو طلقك عساف تضمنين يأخذك طارق ..
سكتت بتفكير وعقب لحظات : اكيد اصلاً طارق يحبني حيل ..
: شلون عرفتي آنه يحبك ؟
: آحساس بداخلي عمره ماخذلني ..
: يمكن يحبك بس يمكن آهله يوقفون بوجهه لو بغى يأخذك ..
: آممم آقولك شي أقوله للمره الاولى .. عارفه بأن طارق يحبني بس أننا نجتمع ثاني ماظن .. والحين طريقتي بالتعامل مع عساف مب لاني آبي اتطلق لاجل آرجع لـ طارق .. لالا مب سبب آبداً كل تعاملي معه بسبب زواجنا وتدخله ب آشياء كثيره ماتخصه ..
: آغفري له كل هالزلات لاجل البيبي ..
: مستحححيل لا آغفر له ولا آنسى ولا آححبه لان قلبي لـ طارق وبس ..
: ريتو ترى الدنيا تغير شوفي لكم من الفراق تقريباً خمس شهور والحين أنتي على ذمه رجال ثاني وحامل وبعد كم شهر راح تصريين آم ..تخيلي ولدك يحس لوللحظه بإنك تحبين غير أبوه ..
وهي تشرب عصير : فيني طبع لما أحب أحد احبه بجنون ولما آكرهه كذلك.. فما آقدر آبدل هالشي ..
: لازم تجبرين نفسك ..
: عقلي وقلبي مع طارق ..
: بس حرام ..
: آخخ بس ..
: ريتو مايهم شي .. لاتتبعين قلبك خليك طالبه لـ رضا الله ..
: الجوري طريقة فراقنا حقيييره بشكل .. فيها استغلال وتفعيل لـ شي آسمه سلطه والدين ومال وجاه وذا اللي مب تاركني آتقبل عساف ..
: أنسي كل هالاشياء وخلي تفكيرك منصب على رضا الله سبحانه وتعالى ..
سكتت وهي ضايقه حكي الجوري جاها على المحك ..
الجوري : تبين ورق عنب ..
وهي تتنهد : أبي شوكلت ..
ابتسمت الجوري : ولدك راح يطلع دب دام وحامك هالشي ..
بضيق : غبي على آبوه ..
ضحكت بشكل : وجع لاتقولين عنه كذا .. ريتو ي هبله قطعه منك ..
حطت كفها على بطنها وهي تشوف الجوال : لامن ذكرنا القط قام ينط شوفيه يتصل ..
ضحكت الجوري : ردي كان آسلوبك زين والا لاتردين ..
ضحكت وقامت مع قومه الجوري : اتخيل شكلي آعطيه اسلوب زين..
:ههههههههههههههههههه تعالي على طاري كلمه سويس شخبارها مع مصعب ؟
: تقول تمام .. ولو أني متأكده أنها ماعطت الولد ريق حلو ..
ضحكت الجوري وهي تشيل الصينيه : عاد مصعب ي حبي له يسكت ولايتكلم..
: ويحبها حححيل .. لايفوتك تسأله عن مشيتها تغيرت ويقول لها آييه ..
:ههههههههههههههههههههههههههههه ي عمري عليه ..
:هههههههههههههه ماشفتيه قريب ..
: آخر مره بعرسهم ..
: طيب عرف إنك نقلتي للشقه ؟
: لا ..
: كلميهم يجونك ..
ابتسمت : فكره مهيب بطاله .. راح آكلمهم على نهاية الاسبوع يمروني ..
رتيل : آفف يدق ..
ردت وهي تتذمر : ها ..
وهو يقوم من الصاله : ها بعد ..!
وببيت صديقتك ومن غير آذني ..!
: مركب رادار ؟
: لعيون الهيته والفرفره الفاضيه ..وبعدين معاك ؟
: وش تبي الحين ..
: يٌقال لو عرفتي شاللي آبيه نفذتي ..
: شوف الحين أنا ببيت الجوري وفي بيتها آصنصير وصلني لشقتها من غير تعب .. وجالسه يعني ولدك ب آمان ..
: أنتي شخبارك ؟
: بخير ..
: طيب باقي معاك النزيف ؟
: ترى راح من زمان ..
: من حركتك الواحد يده على قلبه ..
: طيب تطمنت على كل شي .. بروح آتغد مع صديقتي ..
:الاشياء الضاره ابعدي عنها ..
: لا ..
: لاحول ولاقوة الا بالله .. رتيل ..
: استغفر الله بس .. الحين لو قلت ابعدي راح ابعد مثلاً ..!
لا طبعا .. بصك صح مابي اسمع صوتك ..
: العصر راح آمرك بشقه صديقتك أختي راح تمر الليلة ولازم تكونين موجوده..
: أختك مين ؟
: رهف ..
: ترى مالي خلق أحد ..
: من متى لك خلق أحد ي مدام .. اختي بتجي الليلة ولازم تكونين موجوده وعقبها كلمي آخوك أذا تبين ترجعين لبيت آهلك ..
: تخيل آصدقك ..
بعصبيه : من متى كذبت عليك ؟!!
: أنت من متى صدقت ..!
المهم بجي للبيت أخوي راح يجيبني ..
:لالا .. أنا بمرك ..
: شوف تبي أجي مع أخوي والا ماراح آجي ..
بتعب واضح منها : طيب طيب ..
صكت الجوال ..
الجوري : مستحيله أنتي ..!
كان التعجب على صوت الجوري واضح ..
: آحاول أكون معه مثل مايبي بس مجرد سماعي لـ صوته أكرهه آكثثثر ..
: الله يهديك ..
وهي تبتسم : آمييين ..
ضحكت الجوري ولفت تكمل تحضير الغدا وهي تساعدها ..
.
.
.
بيت عساف ..
المغرب ..
عدلت شكلها وهو يناظرها ولانزل عينه للحظه عنها ..
: فيه شي ؟
: الكلى كيفها معاك ؟
: عادي ..
: ماتألمك ؟
: بين وقت ووقت ..
قام وهو يلفها له : وين موضع الالم ؟
تغصب نفسها تتغير معه وهي تأشر على موضع الالم : هنا ..
حط كفه : هنا ؟
: آييه ..
: المشكله الحين الحمل ولازم نوقف العلاج لاجل مايتضرر الجنين ..
: آييه عارفه ..
: تقول الدكتورة لازم تتبعين نظام بإنك تبعدين عن الاشياء الضاره لاجل يخف التهاب الكلى ومايتطور إلين تولدين ونرجع للعلاج لو ماراح ..
: آوككييه .. بس أختك راح تجي ؟
: لا .. راح يجون ناس من طرف الوالده ..
: ليه ماقلت ؟ جهزت نفسي على آنها بس آختك ..
وهو يلمس خدها بهدوء : خليك كذا فاتنه وش ناويه تسوين أكثر ..
اجبرت نفسها تبتسم له ..
: لحظه الحين بحكينا الهادي جد يعني واقع ..
وهي ترش عطر على مجرى نبضها : لييه ؟
حط يده على خدها : آحس أني بحلم مستحيل تتكلمين معي كذا ..
ضحكت : بنزل ترى تحت ..
تنفس : رتيل ..
: خلاص راح آنزل مو حلوه بحقي الضيوف يجون وأنا هنا ..
مشت لـ صاله الجناح وهي تشيك على شكلها للمره الاخيره ابتسمت بثقه مجنونه ..رفعت عينها ويده على خصرها وهي ساكته برغم الشي اللي بقلبها له بس حكي الجوري آثر فيها كثير ..
سلمت على عمتها وجدتها وشاهه ودلال والبنات ..وهو يجلسها جنبه : ريحي ظهرك ..
ساره تناظر خالها : خالي اعتراف صريح تخاف عليها أو على البيبي ..
ويده من ورى ظهرها ومبتسم : الاثنين ..
: رتيل ماتغارين من اليبي ..
ابتسمت : عادي ..
: طيب أنتي مين آغلى عندك خالي أو اليبي ..
بكذب بكل آحساسيسها ومشاعرها وحتى عقلها : عساف ..
مناير صفقت: آآآآوه بصراحة عساف تفوقت عليك رتيل ..
وهو يهمس لها : وش سوت لك صديقتك ؟
برفعة حاجب : ليه ؟
: من رحتي ورجعتي وفيك شي ..
: عساف خصري ترى ضاغط عليه ..
ابتسم وهو يبعد يده : ها ؟
تنفست بعمق وماجاوبت ..
دلال : بسم الله توكم بالجناح والحين تتهامسون ..!
رفع راسه : ترى رتيل ممدى آمس طلعت ..
: بس أنت كنت طول الوقت معها بالمستشفى ..
: ولايضر لو همسنا لـ بعضنا للحظات ..
وقف وهو يشوف رهف تدخل : مرحبا مليون ولايسسدون ..
ضمها وطول بـ سلامه وحمل لها عتاب قوي : أخوك تقطيعين فيه كل هالفتره..
رهف وهي تبوس أخوها : مرآ سوري ..
: الليلة تنامين هنا ..
ضحكت آمهم : رح لـ نسيبك تلاقيه بالمجلس ..
: طيب بروح بس بوريها شي ..
رجع مسك كف رتيل : شوفي رتيل زوجتي عارف شفيتها بالعرس..
ابتسمت رهف : متغييييره حححيل ..
ضحك : ححلوه..
وهي تضحك مع أخوه وتسلم على خواتها وبناتهم : رتيل ترى أنتي اللي جبتي راسه عقب صد عن الزواج ..
ضحك : لاتكبين عشانا ..
ضحكت جدته : ماقالت الا الصدق ..
مشى من جنبها : آنتبهي لنفسك وللبيبي ..
: رهوفه الليلة تنامين هنا آوكككي ..
ضحكت : آيييه اصلا قايله له ..
ضحك ومشى مزاجه رايق بشكل لايعقل عقبها بدأ تقبل رتيل له وتصريحها بإنه آغلى من طفلهم شعور يحسه لايصف ابداً .. عكسها هم بدأ يعتلي خاطرها وتسأولات ي ترى هي بالطريق الصح أو العكس ..!
جلست رتيل على دخول أم فهد وقفت وهي تشوفها سلمت عليها وهي متأكده آنها شافتها من قبل ..من غير نظرات آم فهد الغريبه لها ..
رهف وهي تجلس قبالها : آيييه كيف الحمل معاك ؟
: تمممام ..
: تكفين رتيل ترى عساف ميت على الببيبي آنتبهي يصير له شي ..
ابتسمت ..
أم فهد : مشالله مبروك على الحمل ي رتيل ..
ابتسمت : الله يبارك بعمرك .. آمم كأنك شايفتك من قبل ؟
آم عساف : أكيد بالعرس هذي زوجة آخوي ..
تذكرت بأنها مادخلت الا ل نص القاعه وآغمي عليها وماشافت غير صديقاتها وآهلها ..
وهي تتمم : ممكن ..
جات شاهه : يمه عساف يبيك وأنتي ورتيل ..
قامت آمهم ..جات رتيل تقوم ..
جدتها : آمشي على هونك ..
: إن شاء الله ..
شافت آم فهد الاهتمام المجنون فيها وحتى آبتسامه رتيل مافارقتها حست بـ قهر على حال أخوها اللي رافض الزواج وهذي فرحانه هنا ..!
ماعرفت بالخافي المستور ..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك