رواية يمسح الدمعة بشكوى -4
وطوال الوقت ماحد كلم الثاني ... لا انا كلمته ولا هو كلمني .. هو بحوش الاستراحة وانا بالغرفة
ساعة ... ساعتين واجتمعوا الشباب للسهرة
جلست مع الشباب على العشب ضحك ووناسة واغاني ورقص
من يوم جوا الشباب نسيت موضوع رايد .. ومدري وينه اصلا اول ماجوا الشباب اختفى
شفت مشعل يقوم من عندنا وراح لاحد الغرف شوي وجا وجلس بجنبي
وصاح باعلى صوته عشان الشباب يهدون عن الازعاج شوي
مشعل بصراخ = شبااااااااااااااااااااااااااااااااب اسمعونيييييييييييييييييييي
وقعد يكررها لين اسكتوا اخيرا
مشعل = شباب ... ودي اعرفكم على رايد ... ولد اصغر منا بواجد ... عمه طارده وماله احد يروح عنده ... اذا ماعندكم مانع نبيه يجلس بالاستراحة لين يدبر عمره .. وش قلتوا ؟
منصور = كم عمره يعني ؟
مشعل = صغير ... توه متخرج من المتوسط ... هو مايدرس الحين ... يعني المفروض باولى ثانوي
عبد الله = معقول ماله خوال شي ؟
مشعل = له ... بس ماهم ببريدة .. مدري وين بالضبط ... وهو مايبي يسافر لهم ... يقول عشان اخواته
قال احد الشباب بوقاحة = خله يعرفنا على اخواته وابد ماله الا اللي يسره
مشعل بضيق = اهاا بس
منصور = عادي خله يجلس .. هو الولد اللي شفته اول مادخلت الاستراحة ( وقعد يتلفت ) اختفى مدري وين راح
مشعل = بالغرفة هذيك ... بس شباب تراه مفلس ماعنده شي ... مانبيه يقط شي ... اوكي شباب ؟
التفت سعد ونايف لبعض وبعدها التفتوا لنا
سعد = زين ... بس ترا بنستخدمه ؟
استغربت
عمر = كيف يعني تستخدمه ؟
سعد = الصراحة صارت العين علينا انا ونايف ... مانقدر نجيب اللي نبيه من البنقاليه
سعد ونايف يجيبون من البنقالية خمر يسهرون عليه ... ياما حذرناهم مايجيبون هالشراب ... بس مافيه فايدة منهم ... هالاثنين يوم من الايام راح يجيبون لنا مصيبة
مشعل مسغرب = يعني تبون رايد يجيبه لكم ؟
نايف = ايه ... خل رايد يجي نبي نشوفه
التفت منصور معصب على نايف وسعد
منصور معصب = ماحد بيودينا بداهية الا انتم ... بسببكم الهيئة بدت تشك باستراحتنا
طلع رايد من الغرفة متوجه لنا .. يقدم رجل ويوخرها .. متردد مدري خايف منا مدري مستحي
مشعل = تعال رايد تعال
فجأة جت رساله على جوالي
طلعت الجوال ولقيت الرساله من عمتي مها وشهقت منصدم
( مبرووووووووووووووووووك قريب بتصير اخو
الف الف مبرووووك ياعمر )
وش ... رفعت راسي ماني مصدق .. كيف يعني ... وشهقت يوم استوعبت امي حامل
وشلون .. ماتوقعت انها تحمل ... هه انا بيصير لي اخو
حطيت يدي على راسي احاول استوعب
كيف ... مالها الا شهرين ونص متزوجة ..
انا ابصير اخو ... اكيد عمتي تسوي علي مقلب ... لأني سحبت عليها اليوم ... الا اكيد
قمت ورحت لغرفة التلفزيون
ابتصل على امي اتأكد ... بعد ماصار عمري 20 يصير لي اخو .. معقول
واول ماضغطت على اسم امي ويدخل رايد علي بالغرفة
فصلت الاتصال والتفتت على رايد
عمر = وش جابك عندي ؟
رايد متردد = ابي اجلس معك ... ماعرف احد
عمر = اطلع بس ابكلم
رايد = مدري وين اروح ... ماعرف احد هنا ومشعل يقول بيروح
عمر بعصبية = خايف يكلونك الشباب ... رح بس
نزل رايد راسه وطلع
واتصلت على امي وفعلا اكدت على استحياء كلام مها
ضحكت مستانس
عمر = ههههههههههههه ماني مصدق يمه ... انا بيصير لي اخو
امي بهمس = الحمد الله
سكتت امي شوي
امي = اول مرة تتصل علي بعد ماتزوجت
سكتت ومارديت
امي = لا تقطعني وانا امك ...
عمر = يمه انا مليت من الوحدة ... كرهت البيت
امي = قلتلك تعال عيش معي ... انت مانت عند غريب ... عند عمك اخو ابوك
عمر = ماتعودت اسكن عند احد ( وابتسمت لما تذكرت اخوي اللي بالطريق ) يمه ترا انا اللي بسميه
ضحكت امي
امي = هههههههههههههههه فرحتك عندي بالدنيا كلها ...
عمر بابتسامة = طيب يمه ابخليك الحين ... ترا ابمرك بكرة
سكت امي شوي بعدها ردت مستانسة
امي = يعني بتتغدا عندي ؟
الصراحة ماكنت ناوي اتغدى ... بس يوم شفت فرحتها ماحبيت اردها
عمر = ايه ... ان شاء الله
امي بفرح = خلاص احتريك ... لا تبطي علي ... ولا تسرع
عمر = ان شاء الله ... مع السلامة
قعدت افكر باخوي الجديد ... او اختي
واااااااااااااااااو اول مرة انطق كلمة اخوي
وقعدت اكررها عدة مرات مستانس عليها ...
فجأة جت رساله بجوالي فتحتها ولقيتها من عمتي مها
نصها ( صح ترا البشارة لي )
ضحكت مستانس وردت عليها برساله
( لك اللي تبين )
شوي وجتني رساله منها
( ابي مية ريال على كل واو في كلمة مبروك بالرساله الاولى )
سكتت مستغرب ورجعت على رسالتها الاولى وشهقت
مالت عليها ... امحق عمه
الثلاثاء
كنت بكفتريا الجامعة جالس لحالي احتري مشعل ومعي كوب قهوة
سرحان وافكر بحياتي ... اللي صدق مليت منها ... الصراحة الصراحة ودي اتزوج ودي شي يملي علي حياتي
حتى اخوي اللي فرحت فيه وهو بعده ماجا ... ماراح يسكن عندي ... شي طبيعي يسكن عند ابوه ... ماراح استفيد شي
ياربي افاتح امي والا جدي ... بس وشلون ماني متوظف
لا لا صح ... عندي مكافأتي وراتب ابوي ... وش يمنعني اجل
والا اقول لعمتي مها تقول لجدي ... لا لا ... مها مرجوجة راح ترجني وترج جدي وجد جدي
انتبهت من سرحاني لما شفت معاذ دخل الكفتيريا
ابتسمت .. صح هذا يصير اخو اخوي بعد ..
اووووه صح اخوي يصير ولد عمي .. ضحكت على اخوي وولد عمي بنفس الوقت
شفت معاذ اخذ طلبه وجا متوجه لي ومعه كوب القهوة وجلس قدامي
معاذ = ماشاء الله جالس لحالك ... وين ذراعك اليمين مشيعيل
رديت على اخو اخوي بابتسامة ... مدري وش فيني اليوم صاير مسالم
عمر بابتسامة = ماشاء الله اشوفك لحالك ... وين نصفك الثاني مصيعيب
سكت معاذ شوي
معاذ = مر شهرين على سالفة كفرة سيارة مصعب ... نشوفك ماذيتنا بشي غيره ...
ابتسمت
عمر = قل انك خايف مني
معاذ = لا والله ماني خايف منك ... قسم بالله باردها لك ياعمر ... لولا ابوي كان خليتك تغير كفراتك الاربع مو كفرة وحدة
عمر مستغرب = لولا ابوك ؟
معاذ بعصبية = ابردها لك ... صدقني ابردها
ضحكت اغيضه شكل عمي مهاوشه عن شي و الله اعلم وش ...
سكت معاذ معصب شوي
معاذ = انت ماتسوي شي الا من ورانا ... خوّاف مانت رجال وعمرك ماراح تصير رجال
سكتت وبعدها نزلت نظري لكوبه وبسرعه مديت يدي واخذت الكوب وكبيت القهوة على ثوبه
قام معاذ متفاجأ وشهق متعور من حرارة القهوة
يوم شفته وقف قمت واقف مثله
عمر بعصبية = نشوف الحين من الرجال
عصب معاذ ومد يده واخذ كوبي بسرعة بس مسكت يده اللي ماسكه الكوب امنعه يكبه علي
تجمعوا الشباب الشويين اللي بالكفتريا وفرقونا
معاذ بصراخ = اوريك ياعمر ... اوريك ... قسم بالله ماراح اسكت عنك
وطلع معصب
ناظرت كم يدي اللي جاها شوي من القهوة
وطلعت من الكفتريا بصمت ... سمعت احد الشباب وانا طالع يقول
= المشكلة عيال عم
طلعت من الجامعة ... ابطنش المحاظرات .. مالي خلق لشي
العصر
رجعت للاستراحة بعد ماتغديت عند امي مثل ماوعدتها
وتوني جاي من عنيزة
دخلت غرفة التلفزيون وانسدحت على الكنبة ابي انام
شوي ودخل رايد ووقف عند الباب
عمر بنعاس = وش تبي تطالعني ؟
رايد = عمر ابي سيارتك شوي
قطبت حواجبي مستغرب
عمر = ليه ؟
رايد = تكفى بس شوي
رديت عليه وانا اتثاوب
عمر = لا
رايد = تكفى والله جوعان مرة
قطبت حواجبي وبعدها عصبت عليه
عمر بعصبية = تلعب علي انت ... وش دخل الجوع بسيارتي ياخبل
رايد = ابروح للمطعم والا بوفيه او أي شي
ايه صح المطاعم والبوفيات بعيدة عن استراحتنا
عمر = انت من امس ماكلت شي ؟
رايد = اكلت الفواكه اللي بالمطبخ الباقي حلى وبباسي .. وامس الشباب اشوفهم ماتعشوا ... انتم دايم ماتتعشون ؟
ضحكت بالعادة يتبرع احد الشباب بعشى الا امس صدفة ماشتهينا شي ... ولا احد طلب اصلا ... على حظ رايد
عمر = طيب انت تقول ماعندك فلوس وشلون بتشتري
رايد = مشعل عطاني ... تكفى ابي سيارتك شوي
طلعت المفتاح من جيبي ومديته له
عمر = نص ساعة بس وترجع
ابتسم رايد بفرح واخذ المفتاح مني
رايد = طيب
وطلع بسرعة
صارخت بصوت عالي عشان يسمعني
عمر = اذا تأخرت ياااااااااااااااااااااااااااويلك
سمعت رايد يرد علي من بعيد
رايد = طيييييييييييييييييييييييب
ونمت
المغرب
قمت من النوم وطلعت من الغرفة وانا مكسل
تلفتت ادور رايد ... اذكره قبل انام اخذ سيارتي
دورته بالاستراحة كلها ولا لقيته
طلعت برا وماشفت سيارتي
طيرت عيوني مستغرب ... الله من يوم اخذ سيارتي ماجا .. قلت نص ساعة بس ... اخذت نفس معصب ... هيّن يارايدووووه اوريك
وجلست احتريه معصب
ربع ساعة وشرّف الاخ
عمر بصراخ = وين كنت ؟ ماقلت لك نص ساعة وتعال
رايد بخوف = رجعت بعد نص ساعة والله ... بس يوم شفتك نايم رحت لحارتنا شوي
قمت معصب وتوجهت له ولويت يده
عمر بعصبية = مدامك شفتني نايم ليه تطلع فيها مرة ثانية بدون استئذان
وسحبت المفتاح منه
رايد بخوف = رحت شوي لحارتنا كنت ابي اشوف اخواني .. ماطولت والله
عمر بصراخ = ابلع لسانك واسكت
سكت رايد وسكتت
اخذت شوي وسألته
عمر = شفت اخوانك ؟
هز رايد راسه بلا
عمر = ليه ؟
رايد بحزن = عمي بالبيت
سألته وانا عارف الجواب
عمر = انت تدرس ؟
رايد = لا
عمر = ليه ؟
رفع رايد راسه لي
رايد = انت قلتلي ابلع لسانك واسكت .. ليه تكلمني الحين ؟
مالت عليك ... الشرهة على اللي يكلمك
رحت لغرفة التلفزيون وخليته
* الجــزء الســابع *
* رايد *
السبت ... الساعة 7 الصباح
طوال الليل نايم والحين منسدح على الكنبه عيا يجيني النوم وطفشان مدري وش اسوي ..
لي اسبوع بالاستراحة هذي ... امس الحمد الله ماجوا الشباب ونمت طوال الليل .. الصراحة ماعجبوني الشباب اللي يجون دايم هنا ... كلهم اكبر مني بواجد
اتضايق اذا جوا يسهرون ... اضطر ادور مكان اجلس فيه لحالي بس هم عددهم واجد ... اروح للمسبح والقى 2 او 3 فيها اروح لغرفة التلفزيون والقى واحد هناك ... المطبخ هو المكان الوحيد اللي ماحد يطول فيه ... ياخذون من الثلاجة اللي يبون ويطلعون
اففففففف لي اسبوع ماشفت اخواني ... اخر مرة رحت لقيت عمي بالبيت وخفت يشوفني ... مدري وش اسوي عشان اشوفهم
ياليت اتوظف ونرجع انا واخواتي لبيتنا ونصير احرار
مليت لا شغل ولا دراسة ولا صداقة
انتبهت على منبه جوال عمر اللي نايم بالكنبة اللي قبالي ..
تحرك عمر وطفى المنبه و تمغط شوي وبعدها جلس بكسل
شوشته منفوشه ويالله يفتح عيونه من النوم
حطيت يدي على خدي يوم تذكرت الكف اللي عطانياه اول ماجيت الاستراحة
ماراح انساه هالكف ... اذني عورتني من قو الكف ... اهب عليه وعلى يده
الصراحة من بعدها صرت اخاف من عمر ... و اذا جوا الشباب ومالقيت مكان اجلس فيه اظطر اجلس عند عمر .. ما اعرف من الشباب الا هو و مشعل ...
ومشعل ارتاح له اكثر من الدفش عمر ... بس مشكلة مشعل مايجلس
انتبهت لعمر مرة ثانية ولقيته جالس و راسه مايل على جنب ونايم
تنهدت .. ياحظه يدرس ... ناديته عشان يقوم
رايد = عمر .. ( ورفعت صوتي ) عوووووووومر
انتبه عمر لنفسه وطالعني شوي وهو مكسل وبعدها قام و طلع من الغرفة يغسل
الصراحة مستغرب من عمر هذا .. ماله بيت .. ماله اهل ... دايم قاعد بالاستراحة
الشباب يرجعون بعد الفجر لبيوتهم الا هو
مدري وش قصته ليه ما يروح لبيتهم ... طوال جلوسي في الاستراحة ماعمري سألته سؤال خاص ... اخاف منه الدفش
ربع ساعة ورجع عمر وراح للشماعة ولبس ثوبه المعلق والتفت لي
عمر = انت تقول بيتكم بحارة جدي ... صح ؟
انا اللي اعرفه ان ابو فهد جارنا الطيب يقربله لاني كنت اشوف عمر يجي لحارتنا ويدخل بيت ابو فهد .. بس وش صلة القرابة بينهم .. مدري
معقول ابو فهد الطيب يصير جد لعمر الدب .. سألته عشان اتأكد
رايد = مين جدك ؟
رد علي عمر وهو ياخذ جواله ومحفضته ومفاتيحه
عمر = جدي ابو فهد ... قالي مشعل مرة انك من نفس حارة جدي
رفعت حواجبي مستنكر .. اللي اعرفه ابو فهد جد مصعب .. وهذا يقول ابو فهد جده بعد ... معقول عمر ومصعب اخوان والا كيف ؟
جلست وسألته
رايد = مصعب اخوك ؟
التفت لي عمر مستغرب
عمر = مصعب ؟ لا .. مصعب ماهو اخوي .. ولد عمي
ابتسمت اثره يقرب لمصعب هالكثر .. اشتقت لمصعب مرة .. هو الوحيد اللي علمني عن العلاج الطبيعي ووقف معي لين تشافيت
رايد بفرح = مصعب ولد عمك ... انا احب مصعب واجد .. وينه هو صار مايجي لحارتنا .. من زمان ماشفته
عمر بعصبية = مالك عليك وعلى اللي تحبه .. الحين انا اسألك عن بيتكم تقوم تسألني عن مصعبوه وينه
سكتت مستغرب من عصبيته والصراحة خفت يجيني كف على الطاير
قرب مني عمر وانحنى علي وانا جالس
عمر = بعد ماطلع من الجامعة ابمر جدي ... تبي امرك وتروح معي للحارة تشوف اخوانك ؟ والا تبيني ادور لك على مصعب يرضعك (وقرب وجهه من وجهي
) يالبزر
انقهرت من كلمة بزر بس من الخوف رديت عليه بهمس
رايد بخوف وبهمس = انا ماني بزر
عمر = تبي امرك تروح لاخوانك والا لا ؟
رايد = أي والله ودي اشوف اخواني من زمان ماشفتهم
اعتدل عمر واقف
عمر = طيب ... راح امرك بعد ماطلع من الجامعة
وطلع .. ابتسمت فرحان انه عرض علي الروحة معه
يارب يارب اشوف اخواني اليوم ... مدري مريم وش صار عليها ... اخر مرة كانت مدري كيف .. ماهي مريم اللي اعرفها
رفعت يدي للسماء ... يارب يارب نرجع لبيتنا ... يارب ارجـ
= ول عليك اكلت كل اللي بالـ
نزلت يدي متفاجأ من دخول عمر فجأة علي وقطعت دعوتي
قعد يطالعني عمر ساكت وماكمل كلامه اللي كان يبي يقوله
سألته عشان اعرف وش كان يبي يقول قبل يشوفني ادعي
رايد = آآآ .. هاه .. وش تبي ؟
سكت عمر شوي وهو يطالعني وبعدها طلع من دون أي كلمة
استغربت من سكوته فجأة وطلوعه بصمت .. وش كان يبي يقول
الظهر الساعة 2
حطيت يدي على بطني جوعاااان
امس ماتغديت .. ولا جوا الشباب بالليل عشان اتعشى معهم ... وعمر امس طالع من المغرب ومارجع للاستراحة الا الساعة 3 اخر الليل ونام على طول
والثلاجة صارت فاضية ... مافيها شي اكله ... جوعااااااااااااااان
رجعت للثلاجة وانا ماسك بطني من الجوع ...
يمكن ناسي تفاحة .. برتقاله نسيت اكلها او شي .. فتحت الثلاجة و زفرت بضيق لما شفتها فاضية
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فاصل إعلآني ^_^ / ..
جميع الحقوق محفوظة لي .. لا احلل مسح اسمي مع على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
المشكلة مامعي ولا ريال عشان اشتري أي شي
طلعت من المطبخ ورحت لغرفة التلفزيون وانسدحت على الكنبة احتري عمر اللي تأخر ... اففففف كل هذي جامعة ...
شهقت لاااااا .. لا يكون سحب علي وماهو مارني ... ودي اشوف مريم ودانه
رحت اقلب في القنوات لين اخيرا سمعت صوت عمر يناديني
قمت بسرعة وطلعت من الغرفة ولقيته بالمطبخ يدورني
يوم شافني وهو يجي
عمر= يالله انت امش
هزيت راسي ومشيت بصمت ... جوعان مرة امس ماتغديت ولا تعشيت واليوم مافطرت
وحنا بطريقنا للحارة التفتت لعمر اللي يسوق وسألته
رايد = عمر .. وشلون اتوظف ؟
التفت لي عمر وبعدها التفت قدام
عمر = ماحد بيوظفك
رايد مستغرب = ليه ؟
عمر = لانك بزر
عصبت
رايد بعصبية = انا ماني بزر ... انا كبير
عمر = كم عمرك ؟
التفتت عنه بضيق = مالك دخل
عمر = تسألني وبعدين تقول مالي دخل .. كم عمرك ؟
التفتت له معصب
رايد = وش دخل العمر بالوظيفة ؟ انا ابتوظف غصب عنك
عمر = طيب ... قلي كم عمرك ؟
رايد = 15 سنة
وتذكرت اني توني داخل على 16
رايد = لا لا عمري 16
عمر = ههههههههههه ( والتفت لي ) يقالك تكبر نفسك ... كذا والا كذا بزر ... شف ياحلو اول شي انت توك مامعك شهادة ثانوي .. والايام هذي ماتلقى احد يوضفك الا بشهادة الثانوية واكثرهم يطلب خبرة
رايد = مافيه وظيفة بشهادة المتوسطة ؟ ( وتذكرت ان ملفي بالرياض ) صح .. شهادتي بالرياض
ونزلت راسي منقهر من عمي
عمر مستغرب = بالرياض ؟ ... وبطاقتك الاحوال معك والا بالرياض بعد ؟ والا صح انت اعتقد مالك بطاقة لانك تحت السن القانوني ..
التفتت لعمر وانا زعلان
رايد = انا الى الحين بكرت العايلة .. ماقصيت بطاقة احوال ( وكملت وانا شوي وابكي ) يعني مافيه امل اتوظف
سكتت عمر ولا رد علي
رايد = عمر رد علي ابي اتوظف
التفت عمر لي = تشوف الوظيفة بجيبي ... اهل الجامعات ماتوظفوا بيوظفون بزر توه متخرج من المتوسط
رايد = بس انا محتاج
عمر = هات كرت العايلة حقكم .. وابشوف الشباب يمكن احد يعرف واسطه يوظفك
وسكت بالتالي سكتت عنه
بالطريق شفت مطعم فاتح وصرت اطالع المطعم لين تعديناه ... ياربي جوعان ماني قادر اصبر .. التفتت لعمر متردد
رايد = عمر جوعان ... ابي أي شي اكله
رد علي وعمر وعيونه قدام
عمر = اذا كان صاحبك عسل لا تلحسه كله
رايد مستغرب = كيف يعني .؟
عمر = يعني لا
رايد بترجي = تكفى جوعان مرة ماكلت شي مـ
عمر = قلت لا يعني لا
رديت بصوت واطي منقهر
رايد بهمس = دفش
تنهدت وطالعت قدام وانااحس باحباط .. شكلي ابموت جوع ... ماعندي دخل وعمر يقول ماحد بيوظفني .. ياربي وش اسوي .. ماني قادر اتحمل
شوي ووصلنا الحارة ووقف عمر سيارته قدام بيت جده .. طالعت بيتنا ولقيت سيارة عمي واقفة عند بيته ... اوووووووه عمي هنا بعد ... لازم اشوف مريم واكلمها
نزلت بسرعة من سيارة عمر ورحت متوجه لبيتنا .. ابي اشوف مريم ماعلي منه
... وبدون تفكير ركبت على سيارة عمي وبعدها ركبت على الجدار ..
وبعد ماتأكدت ان الحوش فاضي .. اعتدلت جالس فوق الجدار فجأة سمعت صوت عمر يكملني من تحت
عمر = اللي يشوفك يقول برعصي فوق الجدار
نزلت نظري لعمر اطالعه ولقيته واقف تحتي على طول
رديت عليه وانا الى الحين منقهر منه بس ماقدر اطول صوتي اخاف احد من بيت عمي يسمعني
رايد بصوت واطي = وانت صرصور
ضحك عمر و اشر لي بيده وهو رايح يعني مع السلامة وراح متوجه لبيت جده .. طبيت على الحوش .. ونزلت نعالي اخاف احد يسمع ورحت على الملحق حافي وحمدت الله يوم شفته فاتح ولقيت غرفتي على حالها ... طلعت من الملحق ورحت على دريشة المطبخ ابي اشوف مريم .. طليت من الدريشة وشفت مريم تغرف الغدا ... طالعتها منصدم ... مريم متغيره نحفانه مرة وهالات سودا تحت عيونها كانها مانامت سنين وشكلها تغرف الغدا وهي سرحانه ... والدليل انها مانتبهت لي مع ان الدريشة قدامها شوي ...
ضربت الدريشة على خفيف كأنه باب عشان تسمعني
نقزت مريم بخوف يوم شافتني وبعد ماستوعبت شهقت وتوجهت لي بسرعة وفتحت الدريشة
مريم = راااايد ( ودمعت على طول ) وين كنت ... خفت عليك والله ... وين كنت ليش ماتصلت ... ارجع تكفى يارايد مالـ
اشرت لها يعني اشششش و قاطعتها خايف احد يسمعها
رايد = لا تطولين صوتك اخاف احد يسمع .. تعالي للملحق ( والتفتت على القدر اللي كانت تغرف منه ) هاتيلي ولو شوي تكفين ... جوعان مرة ماكلت شي من امس
ورحت للملحق وجلست احتري مريم
شوي وجت مريم للملحق ومعها صحن غدا ... نزلته على الطاولة وجت وضمتني
رايد وهي تبكي = رايد والله خفت عليك ( وابعدتني عنها ) ليش طلعت ... احتريتك ترجع
رايد بحزن = عمي طردني ... طلبت منه راتب ابوي وعيا وفوق هذا طردني ( وطلعت دموعي غصب ) مريم ابي راتب ابوي ... انا مامعي شهادة ثانوي عشان اتوظف ... والله والله يامريم مامعي ولا ريال
جلست مريم على السرير وغطت وجهها بيديها تبكي
جلست بجنبها وانا امسح دموعي وشكيت لها
رايد بصوت باكي = مريم يمر علي يوم يومين بدون ماكل شي ... وشهادتي بالرياض ومامعي شي اسافر ... وخوالي مابي اتصل عليهم ... مابي اروح للرياض واخليكم هنا ... ( ومديت يدي وهزيت مريم اللي مغطيه وجهها وتبكي ) ردي علي ... قولي لعمي يعطينا راتب ابوي ( وبكيت )
رفعت مريم راسها والتفتت لي
مريم بصوت باكي = ياليته على راتب ابوي وبس ... عمي باع بيتنا ( وزاد بكاها )
طيرت عيوني منصدم
رايد = ووووششش ... بيتنا من متى ؟
مريم وهي تبكي = من زمااان ... بس انا توني دريت
قمت معصب
رايد = وشلون ينباع وحنا ماندري ... بيتنا لنا مو لعمي
مريم = وعمك ولينا ... قدر يبيعه الكلب ... حسبي الله عليه ... كنت على امل نطلع ... عجزت اتحملهم ... وانت رحت وخليتني ... تكفى رايد ارجع ... مالي قدرة عليهم لحالي ... والا خذ دانه معك ... تكفى رايد لا تخليني
رايد = كيف يصير ولينا وانا موجود ... انا رجال .. مايقدر يبيعه بدون ما ادري
مريم = انت قاصر
رايد وانا ابكي = كيف يعني قاصر .. يعني قصير ؟
ردت علي مريم وهي تمسح دموعها
مريم = يعني انت تحت السن القانوني عمرك اقل من 18
انقهرت ... ياذا السن القانوني اول عمر قال ماتتوظف لاني تحت السن القانوني والحين عمي باع بيتنا لاني تحت السن القانوني
رايد بصراخ = واللي عمرهم تحت السن القانوني مالهم رب ... ابي بيتنا ... ابي اتوظف .. ماعلي منكم
سكتت مريم تبكي وانا اطالعها منقهر
رايد بصوت باكي = بعدين انتي عمرك فوق 18 ليش خليتيه يبيع بيتنا .. لييييييييييه
مريم = انا بنت ... عمي وليي كان عمري فوق 18 والا حتى عجوز ..
بكيت منقهر .. لا بيت ولا وظيفة ولا دخل ولا دراسة ولا شي
جلست بالارض بيأس وغطيت وجهي بحضن مريم وبكيت بقوة بصوت مسموع
رايد = ليه عمي يسوي كذا فينا .. وش سوينا له ... مريم تكفين ابي راتب ابوي
اخذنا شوي على وضعنا وحنا نبكي
تذكرت كلام عمر ورفعت راسي عن مريم وطالعتها
رايد بصوت باكي = مريم ابي كرت العايلة حقنا ... يمكن القى احد يوظفني
ماردت علي ولقيتها سرحانه
هزيتها وعدت عليها كلامي
مريم بفكر سارح = هاااه
استغربت منها وشفيها ماتستوعب كلامي بسرعة ... مثل اخر مرة قبل يطردني عمي كنت اعيد عليها الكلام ولا تفهمه بسرعة .. تسرح وانا اكلمها
رايد بصوت باكي = مريم ابي كرت العايلة حقنا ... يمكن القى احد يوظفني
مريم = مع عمي ... انا طلبته منه قبل شهرين عشان اتوظف ... بس عيا
رايد = ليه مو علي كيفه
مريم وهي تمسح دموعها = عيا مايبيني اتوظف واطلع من البيت كل يوم .. انا ابطلبه منه عشانك ... بس ما اعتقد بيوافق يعطينا كرت العايلة ..
رايد = ليه .. كرت العايلة لنا مو له ... وش يستفيد منه ؟
مريم = مايقدر يستلم راتب ابوي الا عن طريق الكرت
شهقت بخوف
رايد = تكفين مريم الا الكرت لازم اخذه
حطت يدها على شعري
مريم = انا ابحاول اطلبه .. بس اذا عيا مالي قوة اعانده واتهاوش معه ... انا تعبانه ... مليت منهم تعبت ( وكأنها تذكرت شي ) صح رايد انت وين الحين .. وين تنام ؟
رايد = انا قاعد باستراحة مع شباب
شهقت مريم بخوف
مريم = تكفى رايد لا يضيعونك ... مالي بالدينا غيرك ... بيتنا وراح .. لا تروح انت بعد ( وبكت )
قمت وجلست بجنبها بصمت .. زعلان على بيتنا اللي راح ... وشلون يبيعه وحنا ماندري
مريم بصوت باكي = عطني رقم استراحتكم .. مابي اخبارك تنقطع عني
تلفون الاستراحة ماعرفه و سكتت احاول اتذكر ... طوال الايام وانا بالاستراحة ماشفت تلفون فيها
التفتت لمريم
رايد = ماعرفه الحين واظن مافيها تلفون ... انا ابسأل واشوف واتصل عليك
مريم = لا تتصل على البيت .. ماقدر اكلمك
رايد = ليه
مريم بحزن = مايخلوني اخذ التلفون ... واذا اتصلوا خوالي وكلمتهم يجلسون عندي وماخذ راحتي ولا اقدر اشتكي لهم .... ابي اعلمهم ان عمي طردك بس مدري وشلون منهم .. مايخلوني براحتي
رايد = لا مريم .. لا تعلمين خوالي اني طلعت من بيت عمي ... اخاف ياخذوني للرياض وانتم يخلونكم هنا
سمعنا صوت ينادي مريم وقمنا مفزوعين
رايد بهمس = اذا عرفت تلفون الاستراحة كيف اعطيك اياه ؟
مريم بهمس = ماتقدر تمرني مرة ثانية ؟
رايد = مدري ... عمي متى يصير ماهو موجود ؟
مريم = الوقت هذا مناسب .. يصيرون هم مشغولين بالغدا
وركضت مريم لباب الملحق والتفتت لي
مريم بخوف = انا ابروح قبل يجي احد ويشوفك ...
رايد = انا ابطلع الحين وابمر مرة ثانية عشان اخذ الكرت
مريم بصوت باكي = انتبه على نفسك رايد
رايد = حبيلي دانه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك