رواية انا الضحية وانا الجلاد -4

رواية انا الضحية وانا الجلاد -4

الفصل الخامس

"في غرفة نجود"

تقلب نجود أوراقها بتضجر, تفتح الدروج بعصبية, ثم تصرخ:

ياربيه... وين الملزمة؟؟هذا وقته..!!

_تربت أم عبد العزيز على كتف نجود_وتقول:

وش أخبار نجيدتي؟

نجود: بخير يمة.. بس مالقيت ملزمتي حقت الداتا بيس..

شفتيها يمه؟

أم عبد العزيز: خلينا من هالخرابيط .. أنا جيت بسألتس..

فكرتي باللي قلت لتس؟ موافقة..أقولهم يكلمون الرجال..

نجود: يـــــــــوه يمــــــــــــــه ..أنا قلت كم مرة ...

مابي.. مابي خلاص الموضوع أبيه يتسكر..

أم عبد العزيز: وشلون يعني الرجال ينشرا..

لا تفوتين عليتس الفرصة.. ماتدرين يجيتس زيوه ولا لا..!!

نجود: مابي أعرس الحين...دراستي صعبة ماقدر..

أم عبد العزيز: إذا بلاتس دراستس أقولهم ينتظرون ...

نجود: لا..ماقدر أشيل هم عرس ثلاث سنين وهم دراسة بعد!!

أم عبد العزيز: ليه أجل كنت موافقة على سعود وما قلتي هم ولا غيره..

_تنتفض نجود وتعض على شفتيها_

أم عبد العزيز: يا بنيتي ترا سعود مات .. الله يرحمه

وين تدفنين نفستس عشان واحد بقبره

نجود: يمـــــــــــــــــــــــــه واللي يرحم والديك خلاص...

سعود مات بس ما مات بقلبي.. ما قدر أنساه...

أم عبد العزيز: فكري بالموضوع زين الرجال ماعليه كلام..

وهذي فرصة من ذهب يمكن ماتحصل مرتن ثانيه..

وسعود الله يرحمه مااااااااااااااااااااااااااااااات

مااااااااااااااااااااااااااااااااااااااااااااااااا ااااااااااااااااااااااات

افهمي هالكلمه وش تعني..

_وخرجت أم عبد العزيز غاضبة وأغلقت الباب خلفها بقوة,

فتحت نجود الدرج وأخرجت سلسال ذهبي تتدى منه ألماسة براقه على شكل دمعة,

نظرت إليها وشهقت , ثم ضمتها وبكت بحرقة وهي تقول_:

سعود ... والله تمنيت تشوف هديتك علي..

عمري والله ما بنساك... الله يرحمك ويجمعني بك بالجنة...

بس والله يا عمري ماراح ألبسه لأحد غيرك...والله...

_ نورة تفتح الباب بعنف وتدخل_

نورة: نجيدة ليش غايبة الــــــــــ... نجود ليش تصيحين؟

إيه عشان أمي تبي تدبستس بالخاطب الجديد..

تصدقين شفناو أنا ونجلاء يوم يجيب أمه ذاك اليوم...

والله وسيم.. لا تصيرين كمخة وتعيين تراو مزيون..

نجيدة ... عاد بلا دلع... إذا ما تبينه أنا بآخذه..

نجود: بالله يانوير فكين منوه مابيه...

نورة: يا غبيه حلو.. طويل ورزه ..صح مب أبيض

بس السمار حاليه حلو مرة... وش حلات سكسوكته...هع

نجود: أحسن من سعود عاد؟

نورة: أممممممممممم تبين الجد ولا صديقه هههههه أعرف أنكت؟؟

سعود جسم رياضي وفاتح ومملوح وحليل ومدرهم ..بس مات!!

نجود: أقول إنقلعي عن وجهي .. يالله إذلفي...

نورة: لا خلاص العب عليتس ما مات ..هذاو تحت يسولف مع مجيد...

نجود: إنقلعي لا أفلقتس بالدباسة..

نورة_وهي خارجة_: الحين قلنا مات زعلت وقلنا حي زعلت

وش نسوي له...؟

ثم تقف وتلتفت على نجود_ :أما اليوم فاتس نجلاء سلخت بدوروه الماصلة...

تحاول تسوي نفسه فاهمه عند الأبلا.. تقول...

ثم تمسك الباب وتصرخ بغضب_أوريتس يا نجودوه أنا الغلطانه اللي أسولف عليتس..!!

متبلده هالبنت ... رحم ربي سعود اللي مات ولا عاش معتس..

************

الساعة السادسة صباحاً في صالة بيت ناصر"الجد"

البنات يجلسن على المائدة, كاميليا تصب الشاي, وتعد الشطائر..

كاميليا: عذبة.. تبغي ساندوتش جبن ولا زعتر..كروسان تبغي..

عذبة: توست جبن سايل.. رشي عليه شوي زعتر

ليلى: وع.. عليك ذوق..

عذبة: أنا اللي باكله ولا أنتي...!!

نجلاء: مو مشكلة الذوق.. بس حرام السايل!!

تذكرين ماكنا نلقاو عندهم..ولا بدولة أوربية يبيعونه..

قاعدين يكبون عليكم زبايلهم..يختي كولي شي صحي

ليلى: يعني تبغينها تاكل زيك ... الحمد لله قرف..

ولا أحد ياكل سلطة وبيض على الصبح..

نجلاء: أقول يازينتس ساكته..من زين أكلتس

برجر ولا بطاطس مقلي ..قمة الخربطة الصحية

شوفي نشاطي ونشاطك ...

أنتي تقل عجوز بس تسدحين وما تقوين تشيلين القرطاسه من الأرض..

ليلى: أقول مو زيك يالعربجية... بس ياااااااع يووووووووع

طق وطقاق وقال إيش نشاط..

نجلاء: لو سمحتي لاتقولين عن عربجية يا تريلة..

_تصرخ عذبة_: خلالالالالالالالالالالاص ..

كل صبح ضرب وضريب..

وش ذا ...

نجلاء.. باكل جبن حامض عشان ماتزعلين

ليلى.. خلي العالم بحاله..بس تدورين شي

تطنزين عليه.. ما عليك كلامها صحيح..

ليلى: بسم الله..إلا بتروحين يا عذبة للجامعة اليوم؟

عذبة: يعني وش مقومن وأنا ما نمت إلا الفجر..؟

إيه بروح..

نجلاء: وش دريها إنتس مانمتي !!

ماتطلع من صومعتها ..24 ساعة على اللاب توب..

ترا كثرة الجلسة عليه مو صحية..

ليلى _بسخرية_: صدق والله؟

عذبة.. شلون قبلوا الجامعة ترجعين؟

أدري بتقولين صباح الخير..

بس من زمان بسألك وأنسى ..

ولا من شفتك وذكرت تصيرين مع جدو..

تشخبطين أنتي وياه وتحسبون

..

عذبة: لا.. اللاب توب مسوي عمايل..

كم لي راجعة أدرس؟

ثلاثة شهور!!

بس يالله .. بآخذك على قد عقلك..

دخلت على الوكيلة حقت القسم وشرحت لها ظروفي

وقلت لها إني ما بفوت فرصتي..

وحرام أخلي الترم يفوتني بكمل دراستي مع دفعتي..

ليلى_وهي تمضغ الكروسان_: أمممم وافقت؟

نجلاء: لا عيت وهي الحين تدرس غصبن على فرق خشم الوكيلة

عشان ليلى أختها محد يقدر عليها!!

ليلى: يوو أنتي عليك ثقالة دم.. مدري على مين طالعة؟

كملي عذبة..ماعليك منها..

عذبة_تضحك_: وأنتم لازم خناق كل صبح؟

ليلى: أنا اليوم اللي ما أتخانق فيه مع نجلوة أحس إنه غلط..

عسولة مع إنها ثقيلة دم!!

نجلاء: ماعليك زود...

عذبة: عوداً على ذي بدء..الله يجزاها خير تفهمت موقفي مرة

وتابعت الموضوع بنفسها وبعد قالت لي..

أشجع فيك طموحك وحرصك..

تصدقين عاد ما توقعتها كذا مرررة حبوبه..

وطلعت معي ووصلتني حد الموظفة المعنية

وأكدت على سرعة نزول جدولي..

نجلاء: شكلك قاعدة تقرين الأخبار ...

أجل أكدت على سرعة نزول جدولك...

ههههه

عذبة: كملي السلطة يا شاطرة ...أكملك ليلو..

ويومين.. وهي داقتن علي بنفسها وتقولي تعالي داومي

جدولك نزل..

ليلى: يا قلبي عليها.. تستاهل والله منصبها ..

وع مو مثل وكيلتنا الغثة اللي ما نشوفها

إلا بالتكريم .. هذا اللي فالحة فيه..

نجلاء: وأنتي كد طلبتي منها شي وعيت؟

ليلى: لا

نجلاء: كد دخلتي عليها وطردتك؟

ليلى: لا

نجلاء: كد إحتجتوا شي ولا نقصكم شي وماعطتكم وجه؟

ليلى: لا

عذبة: أجل حرام تحكمين على الحرمة..

نجلاء: يختي السعودية لحمك لحمك إن ما حبك رحمك

الحين حنا المدرسة السعودية تختلف عن غيرها

إلا ما ندر حبوبة وتخاف على مصلحتك

ولو كانت غثة شوي.. تعذرينها..

ليلى: يووووووووه ذكرت أبلا حصة الله يذكرها بالخير..

دايم تخانقنا لامن سوينا شي غلط..

بس والله ولا أحد يزعل منها يبين إنها تبي مصلحتنا..

عذبة: الله يخليهن بنات الوطن مافيه زيهن..

ليلى: ودايم كاشخات على سنقة عشرة..

نجلاء: وأنا بناظر لبسهن.. كشختهن لهن

بس المهم حبوبات ومخلصات!!

عذبة: الله على الوطنية!! بس نجلاء تراتس تأخرتي..روحي ..

نجلاء: ليتي بالجامعة .. وجع دوامكم ثمان!!

ودي أقعد وأسولف معكن... مرررررررر يمركن مير..!!

_تنهض نجلاء بخفة وتذهب للبس عباءتها_

كاميليا روحي معها وصليها حد المدرسة

كاميليا: بس هي تبغي تنزل بعيد عشان تمشي كثير..

عذبة: لا .. بتمشي وش كبر الحديقة تمترها طول بعرض..

بس تنزل عند باب المتوسطة..

كاميليا: خلاص مافي مشكلة أقول لنجلاء..

عذبة: الله يجزاك خير.. أصيلة والله ..

ليلى: ههههه .. اللي يسمعك يقول كاميليا ملفي خلف ...

عذبة: يا حبيبتي الله من أبو واحد ولد أكبر العوايل..

ولا يوفي ولا يعترف بالأصول..

هذي من يوم أمي حامل بنا أنا وسعود وهي عندنا..

عمر أمي ما شكت منها..

عاشت مع أمي مر الحياة وحلوها..

وحتى يوم توفى جدي لأمي وقفت معها

بالعزاء وأجلت زيارتها لبنتها..

ويوم ماتوا أمي وسعود..

ما تقولين إلا وحده من أهل البيت..

تذكرينها وقفت معكم قبل لآجي..

دخلت معك المستشفى.. ونامت جنبك زيها زي أمك..

والحين قايمه بالبيت كله تدير الخدم

وتنتبه لناصر ما تقولين إلا أم رحوم..

وتهتم لجدي مثل ما كانت أمي تسوي..

ليلى_ بحزن_: عذبة خلاص..

لا تذكريني ذيك الأيام..

عمري ما تخيلت دنياي بلا أمي

الله يرحمها ويرحم سعود

أه بس على ذيك الأيام

_وتنهض لتغير ملابسها وتستعد للجامعة_

*********

الساعة السابعة في منزل المرحوم أبو عبد الله"

عبد المجيد ونجود وفيصل يتناولون طعام الإفطار

عبد المجيد: فيصل.. الحين أنت ليش تقوم قبل أبوي؟

فيصل: أحب أروح بدري.. وبعدين شغلتي تختلف شوي عن شغلة أبوك

نجود: هـَـوْ!! الحين أنت مب تشتغل مع أبوي بالشركة؟

فيصل: إيه بس أنا غالبا أمسك الشغل المشترك اللي مع عمي..

وهذا يبي من مزاج صافي عشان أتخانق كل يوم مع عمي الله يهديه

عبد المجيد: وش حادك يا خي.. خل الجمل بما حمل.. وكمل دراستك..

نجود: وليه عمي يخانقك.. عمي هادي مرة..

فيصل: هادي بس بالشغل حار ويبي كلش تمام..

ولامن قلت هذا فيه غلط ولا أبديت رايي..

قال أنت زي أبوك .. أنت الفاهم وحنا الدبش ..

ويالله سنة على بين ما يفهم وجة نظري..

عبد المجيد: طيب لامن فهمك وجهة نظرك على ما قلت..

يسكت؟

فيصل: إيه يسكت ويسوي اللي أبيه بس موال يومي لازم أسمعوه..

ودايم ما يلقى الا أنا يحط حرته من أبوي الله يرحمه فيه..

عبد المجيد: يا عمري عمي .. الطوفة الهبيطه بهالبيت..

حتى أخواني الصغار يحطون حرتهم فيك..

اليوم محمد يقول منب دارس وش حيت فيصلوه ما يدرس؟

نجود: عمي.. بسألك ليه عمي شايل بخاطره على جدي وش سوا فيه؟

أنا أعجز أفهمه ... يحبنا ويعطينا وصايرن أبونا

بس مع كذا دايم يطلع منه كلام يدل على إنه مو طايق أخوه..

فيصل: كذا عمي حكة لسان ولا طيب..بعدين ما قلت لمحمدوه

إني أقوم من فجر الله زيوه

هو يقابل الأستاذ يشرح

وأنا أقابل عمي يتحلطم..

عبد المجيد: لا .. ترا عمي ما يبيع بك ولا يشري..

يحبك وحتى يوم عذبة عيت تآخذك زعل مرة

نجود: إيه هو من عادته ما يضايق بنات ماجد ولا يزعلهن..

بس بسالفة الخطبة مرة ضيق على عذبة عشانك..

يقول فيصل رجل يشد فيه الظهر...

عبد المجيد: إيــــــــــــــه طلعت العلوم .. يالجحدة...

وينتس يوم حنا نسألتس وتقولين عذبة ما تقولـّي شي؟

إلا كل علوم عذبة عندتس بس أنتي سكتم بكتم..

إيه صحيح فيصل.. متى بتخطب عذبة أظن خلصت عدتها ولا بتخلص

فيصل_بتململ_: وبعدين معك أنت وأبوك؟

بكيفي متى ما بغيت خطبت اللي أنا أبي!!

وإذا عذبة مضيقتن صدرك إخطبه أنت.. كبرك تراه..

من زينه يوم لفظة مشاري تبونن آخذه..

تخلي مشاريوه ينفعه..

نجود: خير عذبة طايحتن لك أنت وولد أخوك..!!

خسارة أصلاً عليكم.. مجرمين.. فرحين عليها وهي بنت عمكم..

_وتنفجر باكيه_

عبد المجيد_يرشف الشاي يصوت مسموع_:

أقول تقلعي يالدلوعة..فيصل

يعني لو بتقدم له ما تزعل؟.. مب شينه تراه..

فيصل_بغضب ويسحب إصبعة على رقبته لتهديد عبدالمجيد وينهض_:

إنقلع عاد الشرهه مب عليكم.. على اللي يفطر معكم..

بزران يأجسام هرشه!!!

*****

"في غرفة عذبة"

جلست عذبة على مكتبها, أمسكت الدفتر الخاص بوالدها, وكتبت له:

أبي العزيز...

عذراً ... لم أكتب لك كثيراً هذه الأيام..

لا أدري بماذا أعتذر ... ولكن كثيرة هي المرات التي احتجت أن أكتب لك..

فيمنعني شلال من الحزن ينساب من قلبي لم أشأ أن يفطر قلبك..

والدي العزيز... ثلاثة شهور مرت على طلاقي,

وأربعة شهور على وفاة أمي وسعود,

وخمسة أشهر وثلاثة عشر يوم على زواجي,

أرئيت كيف تجتمع الفرحة والحزن,

أربعة أشهر غريبة.. مرعبة

فقدُ أحبة.. وتخلي آخرين..

أبي لا أعرف كيف أصف الثلاثة أشهر

التي مرت أطول ما يكون

لم تزل منها ليلة لم أبكي فيها , أصرخ أناديك,

أشعر أنك قريب مني تشعر بي ,

الكل يراهن على وفاتك... عداي أراهن على عودتك..

حتى جدي تغير, وإعذرني إن أخبرتك كيف...

أشعر أنه يأس من عودتك...

تخيل.. كتب كل أسهم شركته باسمي..

وقسم أملاكه بيننا ... أنا وناصر وليلى ..

وكتب بعض العقارات باسم نجلاء...

حتى جدتي لم ينساها..أوقف لها بعض العقارات

وكتب الدور الذي يملكه بجانب الحرم المكي باسمها..

وأوقف لأمي وسعود ولك وله الكثير

ليله البارح قال لي كلام أفجعني .. غير أفكاري تماماً..

قال لي " يابنتي لا تظنين كل من ضحك بوجهتس صديق..

أنا كتبت هالحلال باسمتس أخاف ياخذونه عيال أخوي..

ترا الفلوس تنسي الأهل المودة والقرابة ...

يا بنتي حلالي كله تحت يدتس..

بس تراه مب لتس لحالتس.. لا تسلمينه إلا بيد ولدي

إن الله رده ولا بيد ناصر لامن كبر...

والله يعينتس على الشقاء..

أخاف أموت ويروح حلالي ..عشان كذا

أنا حطيته باسمتس عشان محدن ينازعتس بوه...

وعشمي بتس إنتس لبوه ولا حدن قادرن عليتس"

أشعرني حديثه أنني أعيش بغابة.. يأكل الضعيف القوي..

ليلة البارح لم أنم..أحسست بخوف بالغ وقلق..

شعرت بحاجتي إليك..

أحسست بعدم الأمان والرهبة...

إحتجت أن أدس رأسي بحضنك وأنام بلا خوف

كما كنت أفعل بصغري...

والدي الحنون..

مشاري لم يتصل... أو يعتذر ..

أشعر أن في طلاقي تدبير من حاقد

ولكني لا أعلم الكيفيه..

ولكن اليوم الصباح اتصلت منى بنت خالتي وقالت ستأتي لزيارتنا..

شعرت بفرحة عارمة ,لدي شعور قوي يخبرني

أنها ستخطبني لمشاري مجدداً..

رغم أنها كانت متضايقة من زواجي بأخيها,

ولكن تظل ابنه خالتي وتحس بي..

والدي العزيز أنتظر عودتك...كل صباح ومساء..

*********

"في سيارة عبد المجيد"

عبد المجيد: نورة!!!!!

قالوا لك سواق تعالي قدام وجع...

نورة: معليش أنت سواقتك الله بالخيرمابي ييبس الدم بعروقي وأنا ما وصلت...

عبد المجيد: وجع الشرهه على اللي جاين لمتس!!

بس وش أسوي لامن الله بلان بأخت علـّة...نصبر كم نوير عندنا؟

أصبر وأمري على الله

نورة: وش صايرن لك اليوم ... وديع؟؟؟

بالعادة

_وتقلد صوت عبد المجيد_

"هين أوريتس يالقردة إن ما ما محطت العقال على ظهرتس

ما صير مجيد"

نجلاء: الله ياخذ شيطانتس يانوير...

لالالا مايمدين .. تدرين إن لتس مستقبل زاهر بالتقليد...

مجيــــد وش عندك اليوم جاي؟

وش بوه أبو ياسين ومراد وراهم ماجو؟

عبد المجيد:ليـــــه ماترحبون بجيتي؟

هذا وأنا تاركن شغلي وجاين لمكن!!

نجلاء: لا والله مو قصدي .. وش دعوا

_وتلتفت على النافذة وتفتحها ثم تصرخ_

هيـــــــــــه أنتي يا قدور

أحسن تعالي إركبي قدام تراو فاضي

مابوه أحد..

غطي وجهتس يا بدوروه يا الماصلة لاأغطيه لتس ببقس...

ناس قليلة أدب وماتستحي..!!

نورة: خليه تذلف بنت ما تربت كل ما يجي مجيد تطير عيونه بوه...

تقل أول مرة تشوف شاب وسيم طالعن على أخته!!

_وتلتفت على عبد المجيد_ والحين أنت وخشك لامن جيت ليش تكشخ؟

تبي البنات يناظرونك.. أدري عشان كذا أنت تجي..

_ عبدالمجيد يوقف السيارة ويترك المقود

ويلتفت على نورة بكامل جسدة محاولا الوصول لها لضربها فيما إحتمت هي

بنجلاء وأخذت تصرخ_

عبدالمجيد: أنا أجي عشان البنات يا الحمارة!!!

أوريتس الشغل زين الحين ..

نجلاء: تكفى مجيد واللي يرحم والديك مو قدام البنات

لا تفشلنا ..تكفى مجيد عشاني!!

_وأمسكت بيديه بقوة محاولة إبعاده عن نورة, نظر عبدالمجيد إليها

وهي تمسك بيديه وتبسم, ثم أرخى يديه بين يديها_

وقال:

طيب.. تآمريـــــــــــــــــن أمر..

_إنتفضت نجلاء ونظرت ليديه فدفعتهما بقوة وأبعدت رأسها عنه,

عاد عبدالمجيد لمقعده وهو يتبسم, وأخذ ينظر للمرآة ويعدل من وضع شماغة, فيما ظلت نجلاء صامتة وتفرك يديها_

نورة: والله ترا بقول لأبوي

عبد المجيد _بذعر_: وش بتقولين لوه ؟؟؟؟

نورة: أقوله يتوطى ببطنك لو تضربن...

لا عمرك تجيبنا مانبيك... خذ محاضرات مسائية وفكنا من شرّك..

شف سعود وهوأقوى منك ماعمره ضرب نجلاء..

ليتك أنت الميت وهو الحي..

عبدالمجيد_يتنهد_: الله يرحمة بس أنتي صيري زي نجلاء وأصير زي سعود

نورة حبيبتي فكري بالكلام اللي قلتيه

وصدقين لو قالته نجلاء لسعود كان موّته..

نجلاء: سعود هادي ولا يضرب...سعود مؤدب...

عبدالمجيد: وش قصدك؟

يعني أنا قليل أدب!!!

نجلاء: لا ... بس سعود كان مؤدب.. تنكر؟

عبدالمجيد: لا .. بس كنتس تقصدين شي...

نجلاء:...... لا..بس سعود .......غير...

نورة:الله يرحمة .. حسافة مات...وحسافة بعد خالتي فرح وعمي ماجد..ماتوا!!

نجلاء: وجع أبوي ما مات ..

عبدالمجيد: إي والله سعود غير..بنات تبون شي بارد بنزل للبقالة ؟

نورة: إيه أبي ببسي وشبس كاتشب, وعسكريم مص اللي بالتوت,و وش بعد....

عبدالمجيد: بس يكفي لو بنتظرك كان فضيت البقالة...ويلتفت على نجلاء ويبتسم_

نجلاء وش تبين؟

نجلاء: ولا شي...

نورة: بدينا بشغل الحياء.. أقول إخلصي ولا مجيد تدري

جب له حليب بارد طازج هذاك اللي يشربه أبوي الصبح..

***********

"في حديقة بيت الجد"

عذبة تدور بين الأزهار, تتأمل الحديقة الفسيحة المزدانة بأجمل

أنواع الزهور والأشجار, إنحنت وقطفت جورية حمراء

وإتكأت على نخلة باسقة, وأخذت تتأمل الجورية, وتتلمس أوراقها

الحمراء الفاتنة, تنتشي رائحتها, وتتسجلب الذكريات معها,

في هذه الأثناء دخلت نجلاء من خلال الباب الذي يربط

فناء القصر بقصر عمهم وأبناءه,بعد أن أوصلها عبدالمجيد,

نجلاء رأت عذبة تحت ظل االنخلة, فتسللت بهدوء نحوها,

وحين قدمت وجدت عذبة تقطع أوراق الجورية التي بيدها

وهي تغني: قولي لي ياورده إذا يحبي... ما يحبني

لو أقطع حبه حبه ..

وإن قلتي لي ما يحبني, قولي لي

وش أسوي, وأنا اللي موت أحبه ..

يا ليته يدري بي كم قلبي

بحبه يعتذب متى يدري ..

قولي له

لو يدري عن قلبي

أنا أشهد

بأنه بيحبني ويعرف قدري ..

حيرني أقوله ,, ما أقوله عن

شوووقي وإحساسي وحرررت ناري ..

أو أسكت و أخبي, وما أطري لأي حد

أبي أتحمل وأداري...

نجلاء سحبت وردة بيضاء صغيرة وأخذت تكمل:

قولي لي ياورده إذا هي تحبي أوما تحبني

لو أقطع حبه حبه ..

وإن قلتي لي ما تحبني, قولي لي

وش أسوي, وأنا اللي موت أحبه ..

يا ليتها تدري بي كم قلبي

يحبها تعبتني متى تدري ..

عذبة: بسم الله ... من متى وأنتي هنا؟

نجلاء: من أول الوردة...؟_وتضحك _

عذبة: الله يخس بليسك.. إلا من هي اللي تحبك؟

بدور؟؟

نجلاء: وععععععععععععععععععععععععع

أنت يا كمخة.. ولا ماتفهمين حركات العيون...

عذبة: يعني أنتي ما تدرين إن كاني أحبتس ولا لا؟

نجلاء: إلا أدري بس بتأكد إذا أنتي تحبيني أكثر من مشاري ولا لا؟

عذبة: أها الحين عرفت أنتي ليه تكرهين مشاري.. تغارين؟

نجلاء: لا كذا أنا أكرهه لله في الله هو وأهله..

إلا أخته الصغيرة شمس وولدهم ذاك أبو عمامه..

عذبة: الله ياخذ بليسك يا نجلوه إسمه راشد..مب أبو عمامة..

نجلاء: راشد!! يخسى.. راشد خالي وبس ... كل من ولد سمى راشد؟

إلا ما جاوبتين...تحبينن ولا تحبين مشاري أكثر؟

عذبة: الله لا يبين غلاك... انتي لك حب ومشاري له بعد حب..

نجلاء: أنتي تتهربين من الإجابة..

صح؟

عذبة_تتنهد_:لا أتهرب ولا شي... بس مشاري ....

لا..أنتي أكيد أغلى.. أنتي أختي وروحي...

ولو تساوم الدنيا كلها بتس ما تخليت عنتس..أنتي زيادة على إنتس

أخت وبنت عمه ..أنتي وصية أمي..أمي ماتت وهي توصين عليتس..

والله لا مشاري ولا جدين مشاري يجي غلاتس..

نجلاء: يعني لو بيراجعتس مشاري .. بتتركينا؟

عذبة: مستحيل..إذا يبيني جد .. يجي هنا عندكم...

وين أخليكم ..أنا مجنونة... نجلاء؟

نجلاء: نعم...ياروح نجلاء..

عذبة: ليش وجهتس أصفر .. أنتي تعبانه ولا مرتاعة..

وش بتس... لا تكونين خايفة إني أتخلى عنكم..؟

نجلاء: وشو!! أنا وو.. ووجهي أصفر..

عذبة: متخانقة أنتي وبدوروه مرتن ثانية؟

نجلاء: لا...بس....اليوم....

عذبة: اليوم وشو؟

نجلاء_تسحب نفساً عميقاً_:

نورة تخانقت هي ومجيد..وضاق صدري عليهم..

عذبة: ياشيخة!! دوري يوم ما يتخانقون هالأثنين..عادي..

يالله عاد بلا دلع... فقع قلبي عليتس خفت أحد مضايقتس بشي!!

نجلاء: طيب ولو أحد ضايقن وش بتسوين له؟

عذبة: شوفي يا نجلاء.. والله اللي يأذيك بكلمه وحدة لأنكد عليه عليه حياته كله..

فاهمه...أنتي نجلاء ولو... بس خلي أحد يضايقتس شوفي وش بسوي بوه..

_تضم نجلاء عذبة وبقوة وهي تقول_:

عذبة..أنا أحبتس مووووووووووووووووت

الله يخليتس لي يارب...الله يخليتس...

يتبع ,,,,

👇👇👇

تعديل المقال