رواية انا الضحية وانا الجلاد -53
أفنان: راح كرته!!
عذبة: كرته وكرت جده....خخخخخخخخخخخخخخخخخخخ
أفنان: والله محمد غطى عالأولي والتالي!!!
عذبة: فديته... قبل شوي متصل... مسويه ثقل ما رديت...
أفنان: لاوالله .... ما تبين يسمع صوتك عقب الصياح!!
عذبة: تحرينووووووووووووووووه؟
أفنان: هههههههه مافهمت...
عذبة: يعني تهقينه؟
أفنان: إيه أحريه ونص!!
"بيت سعد"
تركي: هيلة... أبوي تغدى؟
هيلة_تضع الصحن مقابل تركي_: إيه .. أخذ علاجه .. وقلت له إنك بتتأخر ...
تركي: طيب وين سعد؟
هيلة: مع جده... أخذه عنده بالغرفة..
تركي_بغضب_: الحين أبوي عنده أشغال الدنيا وتبلشينه بولدتس؟
هيلة_باشمئزاز_: ترا حايمتن تسبدي من ولدك ذا!!
ما يكفي هاللي ببطني ... أستغفر الله ... وبعدين أبوك اللي أخذه...
تركي_ينظر لها برفق_: للحين تحسين بالغثيان؟
هيلة: من قمت وانا يالله أرفع راسي.. اليوم مرة جايبن الوحم ربعه... وولدك صياح وكن مالي شغله غيره...
تركي: أكلتي الحبوب .. يمكن تخفف شوي..
هيلة: والله كن الجدار اللي آكله موب أنا...
تركي_يضع يده على كتفها وينظر لها مبتسما_: طيب ليش ما تاكلين.. ترا الجنين آخذ كفايته وأنتي اللي جسمتس بينهد..
هيلة: الله يعين....
تركي: إيه صح دريتي؟
هيلة: وشو؟
تركي: نواعم ماقالت لتس شي؟
هيلة: لا.. نواعم ما جت من ثلاثة أيام... ليش وش فيه؟
تركي: سارة جابت بنيه..
هيلة: ما شاء الله!!!
من قال لك؟
تركي: كلم علي رجله... اليوم الصبح... مريت عليهم قبل لا أطلع من المستشفى.. تهبل بنيته ما شاء الله..
عاد إن شاء الله اليوم تمرين نواعم وتروحين أنتي وياه تقهونه وتباركون له قبل لاتطلع من المستشفى..
هيلة:تركي....بتقول لأبوك إنه ولدت ؟
تركي: إيه... ليه؟
هيلة: حبيبي لا تقول له ماله داعي.. يعني شف يوم طلقته ولدت لغيرك!!
تركي: بس أبوي كان ما يبي العيال!!
هيلة: ما تدري عنه أنت.. ماله داعي تقول له ... وبعدين تعرف غلاته عنده..
يمكن شوي يتضايق ..
تركي: طيب هو يدري إن لنا علاقة به للحين ويدري بعد إننا نزوره ببيت رجله... وش تفرق؟
هيلة: والله براحتك... لكن من وجه نظري لا تقول له ... وأبوك خلقه نفسيته دمار ...
تركي: والله ... أثرك خطيرررررررررررررة!!
_ويشد شعرها_
هيلة_بدلع_: تررررركي!!
تركي: لبيـــــــــــــــــــــــــــــــــــــــــــه.. عيون تركي!!
هيلة: شعري ما سوى شي!!
تركي: لا بس بيدي دهن من الدجاج ... قت ينفع الدهن الحيواني..مغذي للشعر
هيلة: وععععععععععععع ... دجاج بعد!!!
"الشركة"
_مكتب المدير العام_
عبدالمجيد: يا أستاذ ماهر والله ما أعرف وش أسوي معه؟
ماهر: أجل مين بيعرف؟
عبدالمجيد: عذبة... هي اللي مكلمتهم .. ومتفقه معهم... صعبه أستقبل الوفد وأنا على عماي... عالأقل الأشياء الأساسية... بعدين شلون نتفق.. ما أدري وش السالفة...
ماهر: طيب ... إهي ما عطيتك خبر؟
عبدالمجيد: لا..... ما توقعت بيختارون هالوقت!!
بسرعة صار كل شي..
ماهر: طب كلمها تشرح لك كل شي!!
عبدالمجيد : مستحيل!!
ماهر: ليـــــــــــــش؟
عبدالمجيد: ما صدقنا تسافر وتغير جو... وبعدين لو أبكلمه بتجي لأن أغلب الأوراق بمكتبه.. لالا.. صعبة..
ماهر: والعمل؟
عبدالمجيد: والله ما أعرف... أكلم أبوي وأشوف....
_يرن جواله_
عبدالمجيد: هلا والله....
نواعم: السلام عليكم ...
عبدالمجيد: وعليكم السلام والرحمة... هاه .... وش فيه؟
نواعم: سلامتك يا قلبي... بس أبطلع مع هيله لمشوار صغير... خلاص؟
عبدالمجيد: أهم شي لا تصير أمي نورة لحاله... إذا أمي بالبيت أوكي...
نواعم: لا.. خالتي موجودة.. تامر على شي؟
عبدالمجيد: سلامتك..
_يضع الجوال على الطاولة _
ماهر: لازم تتصرف بسرعة...
عبدالمجيد: والله ما أدري..
_يرن الهاتف _
عبدالمجيد: ألو..إيه حطه عالخط.._يشير للهاتف_ شكلهم هم .. وش أقول؟
ماهر: إتصرف..
عبدالمجيد: ألو..ألو.. إيه نعم .. إيه... أنا... ؟
عفوا ... من يتكلم؟
أنا عبدالمجيد المدير العام...
مـــــــن؟
ما أسمع...
إرفع صوتك يا خوي...
***********
"الفصل الثالث"
"بيت الخال راشد"
_الخبر_
راشد يجمع ملابسة بسرعة بحقيبة صغيرة, يفتح الدولاب ويخرج ثوب ويضعه على كتفه ويخرج مسرعاً من غرفته, يقابله بندر
بندر: يبه ... وش السالفة؟
راشد: إمش معي للرياض الحين... يالله
بندر: الحين؟!!
راشد: إيه.. إلحقن للسيارة..
بندر: طيب يبه.. نورة به شي... وش السالفة قلي؟
راشد_يصرخ_: يا .... الحين ماهمك إلا نورة!!
مابه إلا العافية... محد بوه شي...
بندر: طيب.. يبه أنا ما إستأذنت من العمل!!
راشد: دبر عمرك... بس أنا ماشي الحين وأنت بتودين... لازم تروح معي.
بندر: طيب... أمي...
راشد: أنت وش بك اليوم صايرن تسنك إبراهيم!!!
خلك رجل وإفهم الكلام...
ماعليك من أمك...
لامن جت من السوق بتتصل أكيد..
بندر: على أمرك... يالله .... بس بمر غرفة أحمد بآخذ لي ثوب... أخاف بتطول
راشد: إيــــــــــــــــــــــــــــه.... إمش بس..
**********
لندن_
عذبة تتحدث بالجوال...
عذبة: وااااااااااااااااو روعه الجو هنا... ليتك معي...
محمد: إن شاء الله أكون معتس بعد شهرين....
عذبة: خلاص ضبطت أمورك؟
محمد: أفا عليتس.. وش دعوى تسألين هالسؤال... ضبطت أموري وجهزت كل شي... مهوب أنا فاضي الحين!!
عذبة: أنت ما تداوم؟!!
محمد: إلا ياعمري أداوم...
عذبة: أجل ليش فاضي؟
محمد: من رحتي وأنا أحس كل شي فاضي.. أجي من الدوام مافيه شي حلو أسويه...
عذبة: معليش حمودي بتقول عن غبيه.. بس... مافهمت ..
محمد: لا..لا... ينقص لساني ولا أقول لتس غبيه.... شدعوى.... قصدي ياعمري إنه مافيه عذبة نزوره.. عذوب مشغوله حتى إذا جيت أكلم أخاف أزعجه....
عذبة_باحراج_: لا.. وش هالكلام ترا أبزعل منك.... أنا بأي وقت أنتظر مكالمتك... صح أنا ما أكلمك لأني أحسك مشغول... لكن أنا وشو شغلي.... دوجان وسعة صدر... بالعكس أفرح إذا إتصلت...
محمد: لااااااااااااااه يالغلا كلش ولا زعلتس... بس الله يعينتس علي... أبزعجتس...
عذبة: فديت إزعاجك وش زينه...
_أفنان تضرب عذبة وتشير لها بأن تتعقل_
عذبة: أي...
محمد: وش بتس؟
عذبة: لا..ما....مو.. ولاشي..
محمد: صدز عذوب وش بتس؟
عذبة: لا بس... عادي ...موب شي...
محمد: عادي موب شي!!
طيب أوكي عادي موب ...عادي موب شي ولا يهمتس..
عذبة: محمد!!
محمد: لبيه يا روح محمد...
عذبة: .............. _تلتفت لأفنان وتنظر لها بغضب_
محمد: سمي .. وش بتس سكتي؟
عذبة: ولا شي ... بس أنا جالسة بكوفي... وكثرة الحركة من حولي نستن وش أبقول... معليش نسيت..
محمد: هههههههههههههههههه... أشوى حسبتس زعلتي..
*****************
"بيت عذبة"
نجلاء: ليلى ... الحين عمور وش بوه؟
ليلى: مافيه شي... !!!
نورة:مابوه إلا العافية تقل بومة ما غير يتلفت....
ليلى: والله البومة بنتك اللي ما بان من وجهه إلا عيونه!!
نورة: بسم الله على بنتي.. مرت خاله تتنحبه!!
نجلاء: لا..جد ولدتس مرة ناحف!!
مها: يمكنه حاس إنه بيجيه أخو!!!
ريم: صدز ما شاء الله!!
ليلى: بسم الله ... مها من قال لتس؟
مها: وجهتس مبين منتب طبيعية..
نجلاء: هههههههههههههه... مبروك خيتو.. وين الخمس سنين اللي بتقعدينه ما تحملين؟
ليلى_تستند على الأريكة_: وه... ترا خلقة موصله معي... مادريت إلا قبل يومين...
ريم: الله يعين على غثاهم... إلا مير وين بنتس يا نورة؟
نورة: مع أمي خل تشبع منه...
مها: كرته عند أمتس أكثر من كرت حلا بنت نجود...
نورة: والله أمي كرت بنتي أكثر عنده بس حلا الجنية كرته كله عند أبوي وسلمان..
بس عند أمي نورة جنى بنتي وبس!!
نجلاء: عارفين من زمان... من قبل لاتنولد...
يمه... خواتي لا تخلينهم يروحون الحديقة .... ترا فيه الحارس والسواويق وهن صغار وينخاف عليهن!!
ريم_تقوم_: بروح أشوف عنهن.... يختي لو نروح كلنا لبيت أمي كان أحسن!!
ليلى: لأ.. معليش.... أبي أصير ببيتنا....
مها: تبين تصيرين ببيتكم ولا عشان عزوز يمر بين وقت ووقت...؟
ليلى: إيه.... يختي أفقده إذا رحت هناك...
نورة: الله .. ليته يسمع!!
ليلى: لا.. يسمع كل يوم أحسن من كذا...
***********
***********
" سيارة بندر"
بندر: يبه قل لي تكفى وش السالفة؟
_يتوقف عند إشارة مرورية_
الخال راشد: والله يا وليدي... فيه إجتماع ببيت أبو عبدالعزيز..
بندر: من بيجي له...وش مناسبته؟
الخال راشد: أنا وأنت وسعد وعبدالله ومساعد زوج نجلاء وفهد زوج مها وعبدالله زوج ريم والعيال تركي ومجيد وسلمان وعبدالعزيز وعلى ما أظن بيجي فيصل...
بندر: ليه؟
راشد: أمس إتصل ماجد على مجيد بالشركة..
بندر_يحك شعره_: من ماجد ذا؟
راشد: ماجد أبو سعود زوج عمتك فرح...
بندر_جمدت ملامحه وأخذ ينظر لوالده ويشير بيديه غير عابئاً بأصوات أبواق السيارات التي خلفه, والتي عطلها عن السير_: ش..ش..م..ج..ج..جاد؟
راشد: أقول إمش عطلت الناس!!
_سار بندرقليلا وتوقف أمام أحد المحلات وإلتفت لوالده_
راشد: أقول لك لازم نتعشى معهم .... إمش ياوليدي!!
بندر: معليش يبه... أنا أحس إني سمعت غلط.....
وش صار ... منيل طلع بعد هالسنين... البنات عرفوا... عارف عن اللي صار!!؟
راشد: أنا ما أدري يا وليدي.. بس الي وصلن إن مجيد يقول أمس واحد إتصل علي وسألن عن عمي ناصر وكان صوته بعيد, وسألن من أنا يوم قلت له إني مجيد قال وين أبوي... وبعدين عرف مجيد إنه ماجد..
بندر: طيب يبه وينه الحين؟
وليش توه يطلع؟
مو قالوا مات....
الخال راشد: يقول إنه بغينيا وإنه كان مايقدر يطلع من القبيلة اللي أنقذوه من النهر لنهم بينهم وبين القبائل اللي حولهم حروب ومشاكل... ولو بيطلع ذبحوه... ولمن تصالحوا قدر يهج مع جماعة من المنصرين... وهم الحين بغينيا ...
بندر: يبه... أنا... أنا موب مصدق...شلون...واحد مات خلاص آيسنا منه.. ويرجع كذا... بعذر عذبة يوم تقول أبوي ما أصدق إنه مات حد ما ينعرف قبره...
الخال: هم منادينا عشان يلقون طريقة يقولون لبناته وأمه خايفين تموت ولا يجيه شي..وخصوصا إنوه.............................................. ...........
بندر_يتجهم_: إنوه وشو يبه؟
الخال راشد: إنه... موب طيب يبه.... موب طيب..
بندر: يبه... يمكن يصير لعاب.....
الخال: لا يبه... كلم عبدالله وسعد... عرفوا صوته وذكرهم بأشياء من طفولتهم مايعرفه إلا هو... ولا هم بالأول موب مصدقين... بس كان كل شوي يسأل عن سعود....
بندر_يمسح دموعه_: يبــــــــــــــــــــــــــــــه.... شكثر صعب عليه يدري باللي صار ببيته... صعب....صعب..
الخال_يشيح بنظره نحو النافذة, وتسقط دمعة_: لو كان فرح حيه....
كانت تمنى لو .........................
_إنخرط بالبكاء_
**************
"مجلس الرجال_بيت أبناء العم_"
يجلس الرجال, فهد ومساعد وعبدالله يجلسون بناحية وبالناحية المقابلة يجلس عبدالمجيد وسلمان وسعد وتركي وبالناحية الأخرى يجلس الخال راشد وبندر وأبو عبدالعزيز...
أبو عبدالعزيز: بس الحين من يروح يجيبه ويصلح أموره...؟
فهد: أعتقد إنه فيصل لازم يروح... الكل يعرف مكانه فيصل عنده.. هذا بيخفف من صدمته بولده وأبوه وزوجته..
عبدالمجيد: بس يا فهد فيصل يقول ما أقدر أجي وأخلي عذبة... يقول لو تدري وهي هناك بتنجن...
تركي: عذبة لازم تجي...
بندر: وشلون بتجيبونه ... بتشك إنه فيه شي.. وبعدين... هي محتاجه فتره راحه... عالأقل حتى تترتب الأمور...
الخال راشد: وبعدين لو تدري عذبة وماراح تسكت... بتروح هي تجيبه.. ومن بيقدر يمسكه!!!
سعد: فعلاً... لازم عذبة ما تدري إلا بعد ما يحجز عالرياض...
سلمان: الدنيا فوضى!!
تنطق... والدنيا موب على كيفه..
_نظر له الخال نظرة حارقة, فكسر عينه ثم قال_:
قصدي .. يعني الروحه لهناك مب سهله...و...
تركي: تدبره.. وأنا ما أستبعد تسوي أي شي... ما تعوزه الحيلة..
عبدالمجيد: صحيح.... عذبة ماتعوزه الحيله... ووشلون لو صار الموضوع بشوفة أبوه...
أبو عبدالعزيز: هه يا سلمان... عبدالمجيد يعرفه أكثر واحد... مافيه داعي نخلي فيه شي يشتت إنتباهنا عن جيبه ماجد..
تركي: حتى فيصل يقول لا تدري..
سعد: أنا بروح أجيبه...
تركي: يبه..!!
سعد_بغضب_: أبوك صح خسر رجلينه لكنه رجل.. وما يعوقه شي!!
الخال راشد: موب ذا قصده يا خوي....
بس...
يمكن لامن شافك على الكرسي ينغث.. وهو لاحق عالمغاث.. مانبي نصدمه بكل شي.. أنت صديق عمره.. أنت غالي عليه..
سعد: صدقت... بس كان ودي أنا اللي أجيبه....
عبدالعزيز: من رأيي.. أبوي وأبو إبراهيم(الخال راشد) يروحون له...
هم كبار العايلتين وإن شاء الله يمهدون للأمور...
بندر: طيب... بناته وش نقول لهن؟
عبدالعزيز: ولا شي... لحد ما نرتب سفره.. وإذا خلصت أوراقه... وتحدد وقت سفره نقول لهم على كل شي.. أخاف يصير شي ولا شي... وهن موب قاصرين وجع قلب وحزن... نصبر ...
مساعد: زين ما قلت يا عبدالعزيز, لو بقول لمرتي ولدت.. مايصير نشغل بالهم وتو الموضوع بأوله...
************
_بعد إسبوع_
"غينيا_بيساو_"
دلف أبو عبدالعزيز ويتبعه الخال راشد الفندق المتواضع, الأجواء حارة ولكنها تضاهي حرارة الأشواق والفرح بصدورهما, بهو الفندق مزدحم بالبيض والسود على حد سواء, طاولات مستديرة يجتمع حولها الناس يضحكون تارة ويصرخون غاضبين تارة أخرى , توقف أبو عبدالعزيز وإلتفت نحوالخال راشد متوجساً, وقف قليلاً ثم أتى الشاب الفرنسي الذي إستقبلهم بالمطار, أشار الشاب للموظف بأن يضع حقائبهم بغرفتهم, وإلتفت باسماً وهو يقول بلكنه فرنسية...:
They are nice…. This place is the best in here…
You May don’t like it, but nothing is better
قال أبو عبد العزيز بنفاذ صبر:
Where is him?
الشاب:
Aaah, there_ويشير بيده_
يلتفت أبو عبدالعزيز نحو المكان الذي يشير إليه وإذ برجل قارب الخمسين أشيب الرأس وناحل الجسد, بدت عليه سحنه طمأنينة, لوحت بشرته الشمس وأكسبته سمرة قاتمة , يتكأ على أحد الكراسي القصية ويتأمل مصحف بين يديه وبجانبه عكازه..
نظر أبو عبدالعزيز نحو الخال راشد والذي أخذ يمسح دموعه بقميصه..
إبتسم الشاب ثم قال:
He doesn't leave this book, every time and everywhere he reads it!!!
_لم يكمل الشاب حديثه حديث تركاه وإتجها نحو ماجد وهم يشقون طريقهم بين بالجموع التي إكتض بها الفندق, وقف أبو عبدالعزيز أمام ماجد وأخذ يتأمل به وشفتاه ترتعشان, أغلق ماجد المصحف ووضعه على الطاولة, نظر غير عابئاً للرجل الذي وقف أمامه, تأمله من قدميه ثم رفع بصره تدريجياً نحو أبو عبدالعزيز وهو لا يعلم من هو, وحين إلتقت عيناهما إنشقت بوجهه إبتسامه مرتجفة, أخذ يتأمله غير مصدقاً, أخذ يهز رأسه ثم همس بصعوبة:
أخــــــــــــــــــــــــــــــــــــــــــــــــ وي!!!
_إنحنى عليه أبو عبدالعزيز وضمه بقوة وهو يصرخ_:
إيه أخوك... إيه أخوك... فقدتك كايده ياخوي... فقدتك كايده.....الحمدلله اللي أحياك..
_وإنخرطا بالبكاء للحظات, ثم دفعه ماجد وصرخ:
عبدالله... أبوي مات؟
أبوي وش فيه؟
ليش مجيد بمكان أبوي... سعود مريض... صح قلي ترا أدري.. سعود موب طيب...
أبو عبدالعزيز:
أنا ألحين موب أخوك وبس... أنا جد حفيدك...
تدري ... ليلى أخذت ولدي عبدالعزيز وجاهم عمر..
ماجد:
الحمدلله... بس وين أبوي ووسعود؟
_تدخل الخال راشد, إنحنى وقبله ثم طوقه بذراعيه_:
آيسنا منك... بس أمك وبنتك... ما آيسوا منك..
ماجد_يمسك بذراع الخال راشد_: وفرح!!
الخال مضطرباً: ... فرح... فرح ما آيست منك... وجابت لك هديه.. جابت ناصر... جالك ناصر سمي أبوك....
وهو الحين رجال.. وإسم على مسمى إن شاء الله... بشرن يا ماجد عنك أنت؟
ماجد_يرفع يديه_: يارب لك الحمد ... أخذت من ولد وعطيتن ولد....
_نظر الخال نحو أبي عبدالعزيز مستغرباً_
ماجد: أكيد ... الحين عمره 9 سنين... موب...؟
طيب أمي.. أمي وش أخباره بعدي والله ما همن ببعدي إلا أمي وأبوي ....
ولا عيالي عندهم فرح ما خفت عليهم...
ياعمري أمي... أشقيته معي... والله مشتاق له حيل...
ونجلاء...وش صار عليه؟
الخال_يبتسم_: أوووووه نجلاء... تمام.... والحين بتصير أم بعد شهر ولا أقل بعد...
ماجد_يضحك_: صدز!!
صغيرة.. حرام عليكم زوجتوه... توه.. يا حليله...
من أخذت؟
أبو عبدالعزيز: أخذت مساعد أخو فهد..
ماجد_بغضب_: ذاك البزر!!
الخال: يا شيخ الحين هو محامي وأنت تقول بزر!!
بيبتلون الناس بزران؟
ماجد_يضحك_: يا حليلهم .....
طيب.... عذبة... عذبة وش صار عليه.... تزوجت.. وش درست؟
كم صار معه ؟ وش صار عليه؟
أبو عبدالعزيز: ربي كاتب إنك تجي إن شاء الله وتزفه أنت لرجله...
ماجد_ ينظر متوجساً_: ليش توه تتزوج... صار له شي... بلشت مع أبوي صح... كنت أدري..كنت أدري..... وقلت لأبوي لا...
بس......_وأخذت تذرف عينيه_
أنا أبيه تعيش وتستانس... ما أبيه ... أبوي وينه؟
أبوي مات صح؟
لو أبوي حي ما جيتوا بدونه...
أبو عبدالعزيز: عمي تعبان بالمستشفى... ما قلنا له إنك بتجي....
ماجد: أنت تكذب أبوي مات......صح؟
مات قبل لا أشوفه.... كنت أدري إنه بيموت قبل لا أشوفه... أبوي فيه قلب.. وروحتي بتأثر عليه... ذبحت أبوي يا عبدالله أنا ذبحت أبوي...
الخال: لا... تعوذ من بليس..
ماجد_يمسح دموعه_: طيب وسعود؟
وش بوه؟
الخال: ماجد... وش به رجلك؟
سلامات؟
ماجد: ..................................... سعود........ من بقى لفرح أجل؟
*******************
*******************
"بيت عذبة"
في الصالة
تجلس الجدة عذبة تحتسي قهوتها, تمد ليلى فنجالها وهي تتحدث مع نجلاء وريم ومها...
ليلى: شوفي ... ترا هالمحل موب ذاك الزود.. صح تصاميمهم إبداع بس الطعم شوي...
نجلاء: أجل وش يبغى بوه.. بروح أشوف اللي على شارع التحلية يمكن أحسن.
مها: وععععع... ذاك ما غيره لا...
مابوه زود !!
ليلى: إسمعي شوري وإطلبي من برا أحسن... ولا تدرين خلي الموضوع علي...
نجلاء: لاااه ما يكفي أنتي جهزتي الغرفة!!
ريم: الله يجزاه خير ... هذولا الخوات.... عاد صيري مع خواتس كذا...
مها: لا ريم موب كل الخوات خوات وقلوبهن على بعض...
نجلاء: من زين خواتي لامن بغيت حاجه من فوق ما وحده تحلحل وتجيبه.. لازم أنادي الشغالات ولا أروح أنا وكرشتي... يستاهلن..؟
_يدخل بندر_
ريم: هلا والله بأبو جنى...
بندر: هلا عمه... شخبارتس يمه؟
الجده عذبة: وش أخباري!!
فقعن راسي بالخربطة.... أنا مليت وبروح لأخوي..... بس أخاف من هالجنية...
نجلاء: يمه عاد موب كل شوي جنية جنية!!
حتى مساعد عرف إنتس تسمينن جنية!!
الله يرحم أمي فرح ما كانت تقول جنية..
بندر_يحك شعرة ويبتسم_: تقول عفريته....
ليلى: إي والله إنك جبتها...
نجلاء: ليلوه منهي العفريته؟
أنتي أللي أربع وعشرين ساعة صياح وتطلب... نسينا؟
ليلى: الله يحللن منه... وه عمور راعي تحجج وصياح .... ويقول عبدالعزيز من طالع عليه الولد وأنا أضحك وأسكت..
الجدة عذبة: لاااه.. مادلتس عمر وع!!
بندر: والله !!
طيب وجنى تشبه لي؟
الجدة عذبة: تقل به من لونك شوي .... وخشيشك...
بندر_ينظر لنجلاء التي فتحت فاها_: فيه إعتراض؟
نجلاء: وتسأل بعد!!
الحين البنت بيضا على أمه... نورة أبيض منك والبنت نفس لون أمه.. وخشتك كبر جنو بكبره... نورة اللي خشته صغيرة.. والله أمي اللي تحبه يصير ملاك...
بندر: أجل أمي عذبة تحبينن؟
الجدة عذبة: وراه ما أحبك وأنت ولد ماجد ولو بالرضاع.. أنت اللي نفعت بنياتي وحسيت بهن والله يجزاك خير ويقدرهن يردن معروفك أنت وأخوك وأبيك...
الله يرحمتس يا فرح من شجرتن مباركة.. من راح وليدي .. وراحت فرح وسعود وأنتم ما قصرتوا... الله يجزاكم كل خير... والله لو ودي إني أحطك بعيوني...
بس أنا مقصرة وأدري...مير أغدي بنياتي يحشمنك ....الله يرحمه أبو ماجد كان دايم يمدحكم أنتم وأبوكم... صدز لامن قالوا إن أبو ماجد يعرف اللي ورا الجدران..
بندر: لاه يمه.. ما سوينا إلا الواجب....
أنتم ما قصرتوا مع اهلي يوم أحتاجوكم والحياة أخذ وعطاء..
_وصمت فترة طويلة وهو ساهما ينظر للأعلى_
نجلاء: بندر وش عندك؟
بندر: مابي شي؟
نجلاء: ما أدري وجهك يقول إنك عندك شي؟
الجدة_تمسك بيد بندر وتشدها_: تعال يا وليدي إجلس جنبي وقل لي وش بك..
_تهمس_ إذا متضايقن من شي لا يردك إلا لسانك, تبي فلوس متضايق من نورة..وش أساعدك بوه ومن عيوني... ولا حدن بيدري...
بندر: لا .... ما بي شي... بس...
ليلى: إذا تبي نقوم ونخليك مع أمي عادي... أصلاً حنا بنطلع الحين نكمل أغراض غرفة نجلاء.. يالله عماتي.. يالله نجلاء...
بندر: لا... أنا أبيكم كلكم تسمعون اللي عندي...
نجلاء: وأخيراً إعترف إن عنده شي... قل كلي أذانن صاغيتون...
الجدة: إنطمي يالجنية... وش عندك يا وليدي...
نجلاء: الله لا يسلطنا ولا يسلط علينا..
بندر_يمسك بيدي العجوز_: يمه... هذا....................وه
_ساد الصمت عدى أنفاس بندر المتلاحقة_
بندر: ما أدري وش أقول...
العجوز: إسمع يا وليدي... ما أكثر مما صار لي وش بيصير... إذا شي شين قله خلنا نجدع همه.. ترا مابي عرقن يسقي عرق....
بندر: لا... موب شين... هو زين..
...................... هذا واحد إتصل يقول إن عنده خبر عن أبوي ماجد....
_قامت العجوز بصعوبة وجلست تحت قدمي بندر على الأرض وأمسكت بيديه وهي ترتجف قائلة_: هو لقو جثته؟
يجيبونه ... بس أبلمس لو عظامته وأبرد قلبي...
بندر_يشد على يديها_: لا يمه... يقول... إن... إنهم شافوا واحد يشبه له ويمكن يصير هو...بس موب أكيد... إن شاء الله يصير صدز...
نجلاء: بندر أبوي مات... شلون يطلع.. أكيد هذا كذاب..
ليلى: إيه كذاب ... مرة مات ومرة حي!!
الجدة: لا.. ولا كلمة.... ولدي حي... وهو اللي شافوه... إيه ولدي وبيجي..... قلبي يقول ولدي بيجي .... غصبن عليهم.....
تكفى يا بندر أحب يدك أحب رجلك_وتنحني تقبل قدميه فيما رفعها بندر بسرعة قبل أن تصل لقدمه _ تكفى يا وليدي لا تصدق أحد.. رح دوره.. لا تتكل عليهم .. رح مالنا غيرك يا وليدي... لو بوه سعود ما حديتك بس مالنا غيرك ....
أحب يدك.. تكفى طلبتك... طلبتك ياوليدي ... أبي أشوف ولدي ... أبي أشوف ولدي قبل لا أموت....._إنخرطت بالبكاء فضمها بندروجلس على الأرض وهو يقول_:
يمه إن شاء الله بتشوفينه.. كلموه وراحو يجيبونه... راح أمس أبوي وأبوعبدالعزيز... وإن شاء الله يجيبونه..
ليلى_تصرخ_: شتقول أنت...شتقول!!
أبوي ... أبوي .....راحو يجيبونه.... لا..... أبكلم عذبة ... أخاف تكذبون علينا...
بس أبكلمه وما علي..
نجلاء_تضحك وتبكي في آن واحد_: كلميه... وأنا بكلمه بعد... متى يجي أبوي...ههههههههههه
مها: هههههههههههههههههههه أخوي حي... بندر لا تستهبل... إن كان مقلب..بس جد بتصير سخيف...ههههههههههههههههههههههههههههههه
ريم: لحظة يا ناس... هو يقول واحد يشبه له.... مو أكيد... لا تفرحون البنت وتجي وتنصدم بعدين زود... لا تكلمين عذبة...
بندر_يصرخ_: ولا أحد يكلم عذبة..... عذبة بنجيبه بس لازم ما تدري... لازم تعطى علاج قبل... الطبيب النفسي حقه يقول كذا... البنت ما تتحمل صدمات زيادة..
تحتاج تأهيل...
الجدة عذبة: يبه بندر... نذر علي إن جاء ولدي لألبس جنى بنيتك ذهب من راسه لرجلينه..
بندر_يضحك_: طيب يمه ما تصير نورة أحسن......
ريم_تضحك_: طماع.. مير حتى الآن الموضوع مو أكيد...... لا تفرحين يمه..
الجدة: كولي تبن... حتى الفرح حاسدتن عليه..... إلا أكيد.... أكيد موب يا وليدي..؟
نجلاء: أمس مساعد يقول أيستي أن أبوتس ماجد يرجع... ويوم قلت له إيه.... قال يمكن يرجع مادامهم ما تأكدوا من موته.... كلش جايز..
مها: إيه حتى فهد أمس عالغداء يسولف هو وناصر ويقول له إن رجع أبوه من بيختار يجلس عندنا ولا يرجع لأبوه!!
ليلى: بندر.... قل بصراحة.... تأكدو ولا لا؟
بندر: إيه تأكدوا وشافوه .... اليوم الظهر كلموا علينا وقالو إنهم وصلو له...
الجدة_أخذت تسحب طرحتها وتسحب جيب ثوبها وهي تبكي وتنظر للأعلى وتقول_:
يا ربي يا حبيبي .. ياربي يا حبيبي .... رديت علي وليدي.. يا ربي يا حبيبي.. ياربي ياحبيبي... ياربي .. ياربي....أنت الكريم الأكرم ياربي ما خذلتن بطلبتي لوليدي لا تخذلن بجمعتي معه بالفردوس الأعلى وبنياتي وبنياته وعياله...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك