رواية انا الضحية وانا الجلاد -54 البارت الاخير

رواية انا الضحية وانا الجلاد -54

ما تأكدوا من موته.... كلش جايز..

مها: إيه حتى فهد أمس عالغداء يسولف هو وناصر ويقول له إن رجع أبوه من بيختار يجلس عندنا ولا يرجع لأبوه!!

ليلى: بندر.... قل بصراحة.... تأكدو ولا لا؟

بندر: إيه تأكدوا وشافوه .... اليوم الظهر كلموا علينا وقالو إنهم وصلو له...

الجدة_أخذت تسحب طرحتها وتسحب جيب ثوبها وهي تبكي وتنظر للأعلى وتقول_:

يا ربي يا حبيبي .. ياربي يا حبيبي .... رديت علي وليدي.. يا ربي يا حبيبي.. ياربي ياحبيبي... ياربي .. ياربي....أنت الكريم الأكرم ياربي ما خذلتن بطلبتي لوليدي لا تخذلن بجمعتي معه بالفردوس الأعلى وبنياتي وبنياته وعياله...

_بندر يدق يدها_وهو يقول_: وأنا يمه..

تكم العجوز:ياربي لا تحرمن شوفت وجهك الكريم ووليدي وأبوي وأمي... ياربي لا تحرم بندر من فضلك وترزقه بأحسن ما عندك وتسكنه الفردوس الأعلى وأبيه وأميمته وأخوانه وأخياته... ياربي يا جبار تفضلت علي وجبرت بخاطري....ياجبار المنكسرين جبرت كسري.. ورديت روحي.. ياربي إرزقن شكرك وحسن عبادتك وتوفن راضي غير غضبان... ياعزيز يا منان

من لي غيرك ياربي ... أكرمتن وهديتن وأصلحت ذريتي..يارب لك الحمد والشكر والثناء الحسن..

_تلتفت على بناتها وهي تبكي وتقول_: هذا ربي... مادعيته وردن... مارجيته وخيبن... ما شديت عظاي بحوله وقوته وكسرن.. ربي كريم..

إدعي ربي يا مها بقلبن مخلص يرزقتس الذرية الصالحة ما يردتس... يرزقتس ولو بعد حين... كلن آيس من ولدي وآنا ما آيست.... كل ليله أقوم وأشكي لربي وجدي على وليدي... وشوقي له... تسع سنين وأنا ما خالطن بيوم شك إن ولدي حي.... لا تصيحن الحين... قومن صلن وإشكرن ربكن إن الله رد لنا ولدنا وأبونا ودنيانا....

قم يا بندر...الله يبشرك بكل خير ويبعد عنك كل شر... الله يسخر لك بحوله وقوته..

ويفتح الدنيا بوجهك زي ما فتحته بهالعلم الزين..

نجلاء قومي كلمي عمتس متعب.....

نجلاء: !!!!!!!!

بندر: يايمه مانبي الخبر يطلع نخاف تدري عذبة..

الجدة: أنا ما نب قايلتن له...... أنا أبيه يختار لي أربعين بعير من أحسن ما عنده..... أبذبحهن جميع .... وأطعم كل المساكين اللي أعرفهم وأفرحهم برجعة وليدي_خنقتها العبرة وغطت وجهها بشيلتها الناعمة وأخذت تبكي_

*************

لندن_

"الفندق"

تجلس عذبة ببهو الفندق وأفنان تتحدث مع النادل..

عذبة: أبي شاهي دماغي بينفقع....

أفنان: طيب طلبت لتس قهوه.. خلاص أنا بآخذ القهوة وأنتي خوذي الشاهي.. شوفي فيصل وأحمد جايين...

عذبة: وش عندهم جايين لمنا؟

_وقف فيصل وجلس أحمد_

عذبة: وش عندكم؟

فيصل: أبقول لتس شي وبمشي...

عذبة: طيب إقعد إستريح...

فيصل_يجلس_: أنتي لازم ترجعين للسعودية... وأبروح أحجز لنا كلنا...

عذبة: خيــــــــــــــــــــــــــــر وبأمر من مين...؟

فيصل: نجلاء على وشك ولادة... لازم تصيرين معه... شلون تولد ..

أفنان: وخيــــــــــــــــــــــر حنا بنولده...

أحمد: هو ما يكلمتس!!

عذبة: إنطم ولا تتكلم مع أفنان كذا...

أحمد: أنا أنطم!!

عذبة: إذا ما تحترم ضيفتي ما تحترمن..

أفنان: عذبة بترجعين؟

فيصل: أكيد بترجع....

عذبة: لاحول ولا قوة إلا بالله... منب راجعة واللي موب عاجبه يبلط البحر... فيصل لا تصير مالغ وتملي على قرارتك... أنت عمرك ما أحد تدخل بك ولا تحب أحد يتدخل بك ... فعامل الناس بمثل ماتحبهم يعاملونك!!

روحه مانب رايحه... ونجلاء متفقه معه قبل لا أروح وبعدين باقي على ولادته إسبوعين... ولانيب راجعه للسعودية قبل ما أروح فرنسا وسويسرا...

فيصل: بس...

عذبة: آسفة... لازم أروح باريس.. حاجزه هناك ومزبطه أموري...

أحمد: طيب إن ولدت نجلاء!!

عذبة: نجلاء عنده أمه وليلى ونورة ومها وأمي عذبة وخالتي فاتن بتجي للرياض خلال هالأسبوع!!

فيصل: أنتي عارفه نجلاء... أنتي أهم عليه منهم كلهم..

عذبة: وأنا عارفتك.. أنت موب عشان هالسبب جاي.. يارجال قل ليش تبين أرجع للسعودية... ولا مع السلامة...

_نظر أحمد لفيصل بدهشة_

فيصل: براحتس أنا كنت مابي نجلاء تقعد لحالة...

عذبة: فيك الخير .... بس خله تقعد لحاله موب ضاره..

_يخرج فيصل من الفندق غاضباً ويلحقه أحمد_

أحمد_يمسك بذراع فيصل_: فيصل.... وش بنسوي به؟

فيصل: مرعبه... صايره مرعبه....هه الله يعين محمد باشا...

أحمد: طيب شلون عرفت؟

تتوقع واصله خبر؟

فيصل: لو واصله خبر كان جيت الفندق ومالقيت بوه أحد كان الحين هي بالمطار تركض تدور حجز... بس هي صارت تفهمن خلاص.. ما أقدر أمثل عليه..

أحمد: طيب شلون نجيبه للسعودية...

فيصل: مالنا غير أفنان... هي اللي تقدر تجيبه..

أحمد: يع.. هالعبده أم لسانين...!!

فيصل_يلتفت_: شف عذبة راحت فوق.. أفنان جالسه لحاله..فرصة

أحمد: هالمشفوحه تكمل القهوة اللي معه...والله ما أدري وش لاقيتن به عذيب...

فيصل: خل الحلطمه عنك ورح ناد أفنان.. لازم أقول له تقنع عذبة

أحمد: هذي ما تنفع!!

فيصل: تروح ولا أروح.. وتشوفن عذبة معه وتجي تسأل وش عندكم؟

أحمد: إيه بس عذبة راحت!!

رح كلمه أنت ..

فيصل: عذبة إذا ما بغيته بالمكان تطلع بوه......... وإسأل مجرب..

أحمد: يالله نناديه..نناديه وش ورانا...

****************

"غرفة مها"

مها: تتوقعين يا نجلاء ناصر..... بياخذه ماجد؟

نجلاء: يووووووه خلي ماجد يجي.... مشتاقتن له... بس خايفه عليه من الرجعه..

مها: أنا أسألتس عن ناصر!!

نجلاء: إيه بياخذه... وش على بالتس.. وبعدين الحين بتصير عذبة متزوجه وأبوي بيخفف عليه من الشغل والمسؤوليات... وبتتفضى لناصر.. وبيرجع يعيش معهم..

مها: بس هو ولدي!!

وفهد... حرام ينحرم منه... تعود علينا وصار ولدنا...

نجلاء: لازم الحق يرجع لأصحابه... وبعدين من بعد بيتس عن بيتنا... تعالي كل وقت..

مها: كثر مافرحت برجعه أخوي كثر ما خفت أنحرم من ولدي..\

نجلاء: لو أنتي سامعتن كلام فهد ومتزوجه واحد ثاني وجايبتن عيال..

مها: نجــــــــــــــــــــــــــــلاء!!

أنتي جربتي العشرة... والولف والمحبه ... لو كنتي بمكاني وش بتسوين؟

نجلاء: برقص وأغني ... يعني وش بسوي..

مها: تتركين مساعد؟

نجلاء: لوكنت أنا اللي ما أجيب عيال تركن مساعد..

مها: أنتي غريبة... عجزت أفهم عليتس..

نجلاء: لا.. بس أنا وحده علكته دنياه... وما أفكر لليوم... أفكر باليوم وبكرا وأمس.. عشان أحط رجلي بطريق أعرف نهايته والمخرج منه..

مها: قومي إنقلعي.. أبنام......

نجلاء: والله عجزه... قومي أنتي إنقلعي وأنتي طالعه شغلي التلفزيون.. ولا تدرين خلين أكلم نوير تجين بذا...

مها: وه منتس أنتي وياه...

**********

_لندن_

أفنان: بس حرام.... فعلاً البنت كانت محتاجتن لتس...

عذبة_تمشط شعرها_: لا تقرقين واجد..... مانيب رايحه..

أفنان: عذبة .... مصرة بكرا تروحين باريس..

أجليه.. تكفين...

عذبة: من جيتي من تحت وأنتي منتب طبيعيه.... أهلي بهم شي؟

أفنان: لو بأهلتس شي أبجي وأقعد أسولف عادي....

عذبة: إيه بكرا بروح باريس وبقعد إسبوع .... وبعدين بروح سويسرا... وبقعد إسبوع ثاني وبعدين أرجع للسعودية..

أفنان: طيب... أنا عندي حل يرضي الطرفين...

عذبة: الأول أعرف منهم الطرفين اللي بترضينهم؟

أفنان: أنتي..و.. ونجلاء..

عذبة: وأنتي مصدقة إن نجلاء تبين أرجع له؟!!

أفنان: إيه!!

عذبة: لا تصدقين يا قلبي هذا فيصل طابخن له له طبخه عاد أنتي أعرفي نهايته عاد.. بس من كثر ما شفت منه ماعدت أصدقه لو يقطع نفسه قدامي.. ياحبيبتي نجلاء هي اللي مقترحه علي الروحه وهي مختاره معي الأماكن ومبسوطه مرة إني طلعت ووسعت صدري... وإذا كلمته عادي مو مبين بصوته إنه ضايق صدره..

أفنان: أنتي ماتدرين!!

عذبة: أنا ما أدري ببنتي!!

نجلاء مثل بنتي... نجلاء كنت أشيله معي وين ما أروح... وتذكرين يوم كنا صغار.. وبعد ما كبرت ما تقول سره إلا لي..

أعرف من وجهه إذا هي مبسوطه ولا متضايقه... ولا نيب راجعه إلا إذا ولدت..

وبعدين أنا مو بشر مو إنسان مو حقي أعيش حياتي.. حتى السفرة بينكدون علي وبيجيبونن علشان سبب سخيف.. من اليوم ورايح أنا ماراح أسمح لمين ما كان ينكد علي لو لحظة من حياتي...

أفنان: حتى لو كنت أنا؟

عذبة_تلتفت على أفنان وتتأمل بعينيها_: أفنان.... أنتي وراتس بلى....

لكني ماراح أرجع للسعودية قبل لا أخلص الأسبوعين...

أفنان: عذبة عشاني...

عذبة: وش بتس أنتي؟

أفنان: زوجي كلم قبل شوي معصب .. سمعتيه تو...

عذبة: عمى يعميه!!

الحيوان هذا ليش معصب!!

أفنان: لا تقولين عن صالح كذا!!

عذبة_تبتسم_: لا... زعلان ... ولا أنتي اللي مشتاقه له؟

أفنان: كل الثنتين..........

عذبة: بس بروح لباريس.. بس باريس... خلاص بنرجع قبل بأسبوع!!

أفنان: أووووووووووه

عذبة: طيب.... شوفي إن لقينا حجز دايركتلي من باريس للرياض رجعنا بس لازم أمر باريس...ولو إن قلبي موب مرتاح.. فيه وراكم بلا......

أفنان: وشو بلا... صالح ومل من الجلسه لحاله وبعدين بنتي الصغيرة راعيه صخاين... قلبي موجعن عليه..

عذبة: ياسلام على قلب الأم اللي توه يحس...!!

أفنان: بصراحه أنا من زمان ودي أرجع.. بس يوم شفت حتى أهلك ودهم ترجعين تشجعت أقول لك...

عذبة_تنظر لها بريبه_: طيب... يصير خير... هو أنا كم عندي من أفنان...بس بمر فرنسا..يعني بمره..

*************

_بعد خمسة أيام_

_الرياض_

"بيت عذبة"

العجوز تدور بالصالة وتصل لعتبات الدرج ثم تعود لتقف أمام الباب الزجاجي وهكذا..وهي متزينه بالحناء , تقف أمام المرآة وتنظر لنفسها ثم تعود وتقف عند الباب وتنظر للخارج ثم تبتسم وتعود لتقف أمام الدرج وتنظر لأعلى ...

نجلاء متمدده على أريكة بجانب الدرج وتراقب جدتها.

نجلاء: يمه.. وش بتس؟

الجدة: وش مابي.. ودي أفرك الساعة... لمين تجي الساع عشر...

نجلاء_تلتفت على الساعة الجدارية الكبيرة المعلقة بالدرج_: أهاااااا... عشان كذا تقل بتس طلق رايحه جايه تناظرين الساعة!!

أقول يمه تليني عشان لامن جاء أبوي تصيرين نشيطة...

الجدة: وه بس... والله لو درت لمين يجي وشفته نسيت التعب ورجعت بنت... تحرينوه مشيب؟

نجلاء: يمــــــــــــــــــــــــــه!!

الحين رجلي بدا يشيب وتبين أبوي ما يشيب... لو ما يشيب به إلا الغربة!!

العجوز_تجلس على الأريكة وتتنهد_: إيـــــــــــــــــــــــــــــــــــــــــــه ياوليدي..

تغربل بدنياو... ياعيني عين وليدي لامن جاء ومالقى سعود وفرح وناصر..

نجلاء_تحاول أن تخلق إبتسامه_: يمه... كله إسبوع ويشوف فرح وسعود.. وناصر بذا هه شوفيه بالقبو...

العجوز_تتكأ وتقوم دون أن تهتم لنجلاء_: دريسا... دريسا... تعالي شوفي هالثريه ما نظفتنه!!

ماجد ما يحب يشوف ذرة غبار.... وليدي عنده صدر!!

نجلاء_تضع يدها على رأسها وتهمس_: الله يعين راميسا عليتس!!

الحين أبفهم شلون شافت هالغبار!!

العجوز: نجلاء... شوفي مها.. قولي له وين البخور؟

نجلاء: يمه حرام عليتس... مها نيمه.. تونا أولت الصبح وأبوي موب جاي إلا بالليل وشو له بخور وكتمه!!

العجوز: يامال الآفه.... عجزتن تروحين إزقحي له!!

والله لوما هالكرشة إن أسجتس بالعصاء...وين ليلى وريم؟

هالفاجرات لهالحين نيمات!!

نجلاء: أح فاجرات!!

لا ما نامو... ليلى راحت مع عبدالعزيز... وأمي بالمشغل مع شهد... بتقص شعره..

العجوز:مالت عليهن.. أقول إنغزيه على أم عبدالعزيز_وترفع سماعة الهاتف وتجلس_

نجلاء: أبشري_تهمس_الله يعنينن عليتس بس!!

**********

_فرنسا_

عذبة تدور بأحد المحلات, رفعت قلم فاخر ونظرت له ثم إبتسمت ونظرت لأفنان التي بدا عليها القلق..

عذبة: فنو وش بتس؟

أفنان: بتجيبين لي جلطة!!

خلاص... خلينا نروح المطار..

عذبة: يوووووووووووه ما خبرتس عجله كذا.. مير شوفي هالقلم .. ناعم صح؟

يصلح لطبيب كشخة.. صح؟

أفنان: إيه.....................فكينا..

عذبة: أبوي كان يحب هالماركة.. تصدقين دايم يشري قلامه وسعود يشلح... أبوي يقول له دايم والله لو أنت تلبس مقاس سروالي كان ما تقصر تشلح سراويلي..

أفنان: خلاص إشريه لأبوتس..

عذبة_تخرج بطاقة الصراف وتنظر لأفنان_: والله.. والله لو أبيع الدنيا كله... وأضمن أخم أبوي بس مرة... لأبيعه...

أفنان: ماعلى الله شي كايد..اللي رد يوسف لأبوه يرد لتس أبوتس..

عذبة: صدقتي.... أبشريه.. يمكن يرجع أبوي..

أفنان: ومحمد؟

عذبة: وبشري ثاني لمحمد... بس الأحلى أكيد لأبوي... فديته وينه الحين؟

أفنان: ماتدرين... يمكن يكون قريب.. أقرب مما تتصورين...

عذبة: أفنان.. أحمدوه العله يدق..

أفنان: بعذره تأخرنا..

عذبة: ينطق أنا ماجيت على حساب أبوه!!

أفنان: طيب ردي!!

عذبة: لا.... بطلع وبروح للمحل الثاني ومتى ما طاب اللي ببالي بروح....

*****************

المطار_

يجلس فيصل وهديل منتظرين قدوم عذبة وأفنان وأحمد...

هديل: أنا أبعرف الحين هي على كيفه تحوس العالم حوس!!

فيصل: إيه على كيف كيفه.. من بيمنعه؟

هديل: هالحين هالطرطور اللي جاي معه إيقاله اخوه ليش ما يأدبه ويجيبه من شوشته؟

فيصل: لأن هذي مدام عذبة... من هي صغيرة وما أحد يقواه.. حتى أخوه الصدقي ما يقواه... كذا عمي رباه.. وللأسف.... كان يبيه تصير كذا..

هديل: بس عمك مات!!

أنتم مو رجال!! ماتعرفون تربونه؟

فيصل: هه.. حاولو.. بس لأنهم رجال مايقدرون يتقيوون على مرة .. وخصوصا إنه صارت وحيده..

هديل: بس هذي مو مرة.. هذي شرسه..هذي... بجد هذي رجل لابس عباية...!!

فيصل_ينظر للساعة_: جاء الموعد وهي ما جت!!

بتهبل بي هالبنت... أخ لو مسكته عفسته...

هديل: فيصل... تكرهه؟

فيصل_ينظر لها بطرف عينه_: أقول... ماتلاحظين إنتس بديتي تخنبزين؟

هديل: أنا لو هي بنت عمي كرهته..

فيصل: وأنا مستحيل أكرهه...

هديل:!!!!!!!!!!!!!

فيصل_يبتسم_: لأنه بنت عمي..

_ينادى للرحلة, ويقوم فيصل وهو يلتفت حوله بقلق_

*******************

_الطائرة القادمة من غينيا_

يجلس ماجد بين أبي عبدالعزيز والخال راشد, ينظر لما حوله بقلق ثم يتنهد..

الخال راشد: ماعليه يا بو سعود.. الدنيا ما تصفى لحد..الحمدلله بتروح الحين وبتشوف بناتك.. وأمك...وخواتك.. تلقاهن الحين طايرتن قلوبهن ودهن بك....

أبو عبدالعزيز: وتشوف نصوري.. ماتقول إلا عمي ناصر الله يرحمه.. كنه أياو بلكاعته وضحكه ومزوحه... والله لامن جاء لمنا أموت من الضحك عليه.. ورجل يصب القهوة و يجلس مع الرجال..... ما شاء الله عليه أكبر من عمره..

ماجد:.......................... طيب يوم يولد.... ولا.. الحين تقول إن عذبة برا صح؟

الخال راشد: إيه .. راحت توسع صدره وتونس.. تدري... بتاخذ واحد يشتغل بنفس شغلك... و..

ماجد: شلون... شلون أبشوفهن ويشوفنن... خايف... أكسر بخواطرهن.. وأمي.. أمي.. خايف عليه..

الخال راشد: لااااه.... أمك ... لا تخاف عليه يا جبل ما يهزك ريح...

ماجد_يبتسم بسخرية_: هه يا بو إبراهيم لا تغرك المظاهر...أمي... إيه بس..

***********

_الطائرة_

تجلس عذبة بسرعة وتربط الحزام وهي تلهث...

أحمد: هاه ياستي... مستانسه الحين؟!!

عذبة: خلاص موب أنت الحين بتروح للسعودية قرت عينك... موب ركبنا!!؟

فكنا واللي يرحم والديك!!

أفنان: وش لوه داعي تأخرنا... والله ما تسونا ركضنا هالركض.. لو حنا متقدمين لو شوي!!

شوفي كل الناس راكبين .. هه بتطير الطيارة...

عذبة: أحسن عشان ما نمل من الإنتظار..

_بعد نصف ساعة_

عذبة: بروح للحمام...فنو... هيه..

أفنان: وش تبين؟

عذبة: أقول ... موب تبين نرجع للسعودية رجعنا لاتقعدين تزمرين كل شوي ما صارت!!

أفنان: أقول إنقلعي... ولا تبين أجي أحفظك!!

أحمد: أص فضحتننا!!

عذبة_تقوم_: أقول والله لو أنا معلقتن بكم على هالنفسيات الخياس الله لا يبلانا!!

_تتجه للحمام وتمر بجانب فيصل ثم تتوقف وتنظر له بدهشة_

عذبة: فيصل!!!!

فيصل: بدري؟

عذبة: ليش جاي معنا!!

فيصل: حبيت أمر أشري فستان قبل لا أروح...

عذبة: فيصل... لا تستهبل.. أهلي بهم شي؟

فيصل: أقول... لا توسوسين... ماهنا إلا العافية...

عذبة: فيصل أنت تكذب علي.. وأفنان تكذب علي... إيه كلكم تكذبون أهلي بهم شي وأنتم ماتبون تقولون لي... صح؟

فيصل: أقول لتس ما هنا إلا العافية..

_تقترب عذبة من فيصل وتمسك بطرف قميصه_

عذبة: فيصل لااااااااااااااااااااا تكذب علي!!

أنت تكذب... أهلي وش بهم.. وش بهم... أنا قلبي كان يقول لي إن أفنان تكذب ... بس الحين تأكدت.. فيصل..

فيصل_يحاول أن يبعدها_: تعوذي من بليس.. مالقيت حجز إلا على هالطيارة..

عذبة_تشد على قميصه_: لا تكذب علي!!

فيصل: عذبة.. عذبة خلاص.. مافيه شي...

_هديل ترقب الموقف بغضب عارم وحين إقترب فيصل من عذبة , محاولاً أن يهدئها وهو يشير لأحمد الذي أقبل مسرعاً, لم تستطع إحتمال الموقف ووقفت ثم دفعت عذبة بقوه وهي تصرخ_:

يالحيوانه يالقذرة وخري!!

ما فيه شي يا هانم .... أبوتس بيوصل السعودية بعد كم ساعة وأنت تصارخين ...

ما تبين تروحين تشوفينه طبي من الطيارة ماحد غصبتس على شوفة أبوتس!!

_أمسك فيصل بهديل ورماها على الكرسي بغضب شديد وهو يصر أسنانه_: إنطمي ...

عذبة_تحاول النهوض_: أنا حيوانه أنا قذرة.. بس لا تقولين إنتس تكذبين علي... صدق أبوي بيرجع..صدق..

أحمد_يمسك بعذبة_: عذبة تعوذي من بليس...

عذبة_تنظر لأحمد_: أحمد جد... صدق الكلام اللي تقوله ذي!!

أنا ماراح أسأل فيصل.. فيصل دايم يكذب علي..

أنا أسألك..رد..رد علي........

أحمد: تعالي أجلسي... نتفاهم.. مايصير تخلينا فرجه للناس...

عذبة_تبعد يديه بغضب وتصرخ بصوت عالي_: ماهمن الناااااااااااااااااااااااااااااااااااس

أنا أسألك عن أبوي!!

أبوي.. خل الناس يتفرجون ماهمون... وش بيشوفون يعني وحده تسأل عن أبوه.. أنا أسألك.. أفنان!!

أفنان... صدق أبوي بيجي..

_أمسكت أفنان بها وهزت رأسها_

فيصل: عذبة... أبوتس طيب.. ولقيناه.. والحين هو جاي للسعودية..

_إلتفتت عذبة على أفنان وهي تحاول أن تصدق الخبر_

أفنان: إيه... إيه صادق..

_ترتمي عذبة على الأرض ساجدة وهي تبكي_

فيصل_يلتفت على هديل_: وأنتي حسابتس عسير... خربتي كل شي.. والله لو يصير له شي لا تلومين إلا نفستس!!

*****************

الرياض_

"بيت عذبة"

البيت مفعم بالحركة , جميع المصابيح الداخلية والخارجية مضاءة , وجميع النوافير والشلالات تعمل, الخادمات مشغولات بتجهيز مائدة العشاء, وليلى ونجلاء والجده يقفن عند الباب الداخلي وهن يرقبن البوابة الخارجية, شادن وشهد يجلسن بالحديقة..

ريم: يمه إجلسي... عاد لامن وقفتي بذا بياصلون بسرعة..

العجوز: ما يدعين قلبي... ودي أكحل عيني بوه ..

نجلاء: أكيد الحين.. الحين بيجيون من شوي كلمت مساعد.. يقول إنهم طلعوا من المطار..

ليلى: ياربيه... مو متخيله... أشوف أبوي ثانيه.. ليت أمي فرح معنا..

نجلاء: وليت سعود بوه.. وعذبة؟

صح... عذبة متى بتوصل؟

مها: بعد ساعتين تقريبا..

العجوز: الحين ذولا ليش عيوا أروح للمطار؟

مها: يبونتس تشوفينه على ركاده.. وبعدين كل الرجال رايحين له عالمطار... وبيجي وبيجلس عندنا.. موب طالع..

نجلاء: يمــــــــــــــــــــــــــه.. فتحو الباب.. دخلوا...دخلوا..

العجوز: إي والله... هذاهم... ياربيه.. إفتحي الباب كله أسرع له يدخل..

_تقافز الأطفال , وتوقفت السيارة مقابل باب المنزل, نزل بندر مسرعاً وفتح الباب الأمامي, مرت لحظات ثم ظهر ماجد , صرخن البنات وبدأت العجوز بالنحيب, ساعده بندر على النزول من السيارة ومد له عكازه, إلتفتت ليلى على نجلاء وهي تضرب وجهها وتقول:

نجول... رجل أبوي مقطوعة!!!

أبوي متغير... متغير.. !!

العجوز: ياعيني عينه.... ولدي...ولدي...

نجلاء_صرخت_: مانبي صياح... خلاص ملينا..صياح وصياح.. اليوم بنفرح.. بنفرح.. مانبي دموع الله يخليكم.. مو عشاني عشان أبوي..

_ووقفت أمام الباب وزغردت بصوت عالي_

_نظر ماجد لبندر وضحك ثم قال_: أكيد ذي نجلاء!!

بندر: من غيره طويل لسان!!

_دخل ماجد البيت ثم نظر للجميع وإبتسم, أقبلت أمه وضمته بقوه وهي تتلمس ملامحه, ثم وضعت رأسها على صدره وأخذت تشمه وهي تقول:

الله لا يحرمن ريحتك يا قلب أمك وهناه... جعل يومي قبل يومك..

_إتكأ ماجد على كتف والدته ثم جلس على أقرب أريكة, إرتمت نجلاء بحضنه ولحقتها ليلى...

دخل ناصر ومعه عزام ووقفا مقابل ماجد

ناصر: يبه.. الحين هذولي كبر قريح وجالسات بحجرك!!

نجلاء: يالدب إنقلع.... ماصدقت أشوف أبوي بعد ما تبين أجلس معه!!

ليلى: ما جلست بحجره!!

ماجد: نغرت..؟

سبحان الله يمه.. فعلا تسنه أبوي.. تصدقين إني عرفته بالمطار بدون ما يقولون لي إنه نصور... تعال تعال يا بابا... أجلس هنا..

نجلاء: لا.. يضايقن..خله هنا..

ليلى: لا والله يضايقن أنا.. !!

العجوز: أقول وخرن... غمتن وليدي.. ولا أحد يجلس جنبه. قومن... قومن.. هذا مكاني, _وأخذت تدفع ليلى وتضرب نجلاء بالعصاء, وجلست بجانب ولدها وأمسكت بيده_ هالحين كل وحده بتروح لرجله وتنسن أبوكن وأنا أللي أبقعد معوه... تقلعن لا أبوكن لا أبو قطاش.!!

ماجد: هههه... حيا الله أم ماجد... إلا أنتي يا مها ما جاتس شي مالتس ولا عيل؟

مها: مالله كتب..

ناصر: إلا ..أنا ولدهم يبه...

ماجد_نظر لناصر ثم نظر لمها التي إحمر وجهها_: الله يرزقتس...

مها: ناصر.. أنت منتب ولدي.. أنت ولد أهلك..

ناصر: أنا ولدتس وولد أهلي.. مثل نجلاء... بنتنا وبنت أهله... موب يبه؟

ماجد: صدقت يا وليدي صدقت.... أنت ولدي وتجي تزورن وتقعد عن مها....وأنتي يا ريم عساتس متوفقه وماعندتس خلاف؟

ريم: الحمدلله.. هذولي بناتي.. وهذا ولدي ما شاء الله رجل...

ليلى_ترفع عمر لوالدها_: خذ يبه.. هذا الخليفة عمر...

ماجد_يمسك به ويقبله_: ما شاء الله ... كله أبوه.. لامن جت البنت إن شاء الله تصير عليتس.

نجلاء: لا.. دايم الشين يصيطر على النسل.. لا تأمل يبه!!!

ليلى_بغضب_: ألحين اللي يسمعتس أنتي وخشتس يقول رجلي شين؟

ماجد: إخس... إخس... وهو زين؟

ليلى: يبه.. ما سرع ما فرت راسك؟

ماجد: هين يا ليلى لا تزعلين الوعد بعد شهر شوفي الإنتاج وش بيصير...

نجلاء: إلا يبه.. ترا بي توأم... ولد وبنت إن شاء الله....

ماجد: ما شاء الله... الله يعينتس على صياحهم...

العجوز: وبتسميهم فرح وسعود.. ونكمل...

ماجد_يبتسم بحزن_: وهو يعوض فرح وسعود أحد يمه؟

العجوز: الله اللي أخذك وردك.. يجمعك بهم بجنات النعيم..

ماجد: متى بتوصل عذبة.. قلبي طاير عليه..

ليلى: إيه معلوم غلات عذيب عندك... كلنا بكفه وعذيب بكفه..

ماجد: وعندتس شك!!

هذي سميه الغالية.. أم ماجد...

ريم: وسبحان الله ... إسم على مسمى.. كله أمي ما إختلفت عنه بالطبع شوي!!

العجوز: بلاه من قرادته!!

مها: لا والله.. صبرت ونالت.. وقفت وقفه عشان تصون بيتك يا خوي.. ولا لو هي مب مثلتس كان ما قوت....... إلا زين تاخذ حقه...

ماجد: إيـــــــــــــــــــــــــــــــــــــــــه... والله إن أمي صادزه وأنتي بعد صادزه..

نجلاء: يبه... ترا أبنام عندك..

العجوز: هو !!

ماجد: خليه يمه... هذي طلعت من عنده القعده وبتلت القعده.. خلاص.. نامي عندي ... بس تعرفين مابي داخل طالع عالحمام..

نجلاء: ههههههههههههههههههههههه يبه ما نسيت شرطك ذا!!

مسبب لي عقده!!

الحين كل ما قمت للحمام عندني مساعد بيهاوشن ولا يطردن!!

ناصر: والله أنتي تطردينه زي ذاك اليوم!!

ماجد:ههههههههههههههههههههههههههه فضحتس !!

وراه طاردته..

نجلاء: هين يا نصور...

ليلى: ما شفت شي يبه.. هذي الله يعين رجله عليه...

نجلاء: عالأقل أنا قرفت من ريحته أحسن منتس ياللي زعلتي إسبوع عشان سيارة!!

ماجد: طلعت الفضايح... إصبرن علي بس.. والله ما وحده تلف وتدور إلا أمشيه على الصراط المستقيم...

مها: أبد عيك بهن!!

نجلاء: يبه عاد لاتصير شيطاني..

العجوز: إلا خلنه يأدبكن... مدلعات..

_بعد مرور ساعة_

يفتح الباب الداخلي بعنف وتدخل عذبة, تلتفت ثم تركض نحو والدها وترمي نفسها تحت قدمه وتضع رأسها على فخذه وتقبلها وهي تبكي, يكب عليها الأب بحنان وينزع طرحتها, تمسك بيده وتقبلها وتضمها, تضع يديها على ركبتيه,وتحاول النهوض لتضمه فترى قدماً واحدة, تتلمس بيدها لتتأكد فتتلاقى عينيها بعيني والدها , نظرت له بأسى ثم نهضت وضمته بقوه وهمست:

أنا .... أنا... بحلم ولا علم يا يبه؟

ماجد_يقبلها_: بعلم يابنتي... بعلم...

عذبة: يبه... كل يوم أحلم بك... بس لا قمت ما لقيتك... أخاف أقوم ولا ألقاك يبه...

ماجد_يرصها على صدره_: لا ياعذبة.. ما راح أبعد عنتس ... أنا معتس لين الله ياخذ أمانتي...

عذبة: ضمن يبه. خمن إدفنن بصدرك... أبي أنام بحضنك وأبي أتغبى بحضنك وأبي أبكي لك وأشكي لك... أبيك تغطين عن الكون كله.. ما أبي أشوف بهالدنيا إلا أنت... أنت وبس... وبس...

ماجد_يضمها ويمسد شعرها_: هذاي معتس.. لا تصيحين مابي أشوف دموعتس... يكفي .. يكفي... يكفي ياعيون أبوتس...

عذبة: ما أقدر يبه أوقف.. هذي عيوني عكس الناس... إذا زعلت شحت علي بدموعه وإن فرحت ماتوقف الدمع....

ماجد: يبه... بشرين عنتس... أنتي مبسوطة... مرتاحه.. ولا....

عذبة: أنا مرتاحه .. يبه أنا أسعد إنسانة.. مادق الحزن يوم بابي..

ماجد_بحزن_: يابوي ... أنا أحس بتس...

عذبة: أدري.. أدري إن كل يوم أنت معي... بحزنه وفرحه.. بس أنا من شفتك نسيت كل شي... كل شي.. كل شي..

وعشاني عارفة إني بنسى كل شي... كتبت لك كل شي..

ماجد: ما نسيتي؟

عذبة_تهز رأسها وهي تضحك_: من قلت لي إكتبي لي كل اللي يصير بغيابي.. وأنا أكتب... أكتب... أكتب.. كنت عارفه إنك بترجع... قلبي يقول لي إنك حي... وتحس بي... تفكر بي.. والله أنا....يبه.. أنا موب مصدقه إني بحضنك!!

ماجد_يضمها_: وأنا موب مصدق إنتس بحضني!!

******************

_بعد شهرين_

"بيت ماجد"

نجلاء: ليلى......... شوفي..

ليلى: ياربيه.. وراه ذا كذا!!

مها: أقول... بيجون الحين يكملون ما خلصوا... بس نجلاء ترا فرح طايرن قلبه فوق أزعجت العروس روحي خوذيه.. وبطريقتس خوذي سعود من نصور لا يملعوه..

نجلاء: والله لو أنا ام أربع وأربعين رجل!!

مها: عاد ذولا عيالتس!!

ليلى: مها.. الحين الطاولات ما يصيرن كذا!!... لازم يتناسقن مع الورد المزروع..

مها: دارين... هذاهم جايين بيرتبونه من جديد بس هذا أولي... وعلى بالتس الحين بس ذولي الطاولات!!

فاتن: بنات.. الحين ماجد فوق عند عذبة؟

مها: إيه بغرفته...

فاتن: ودي أروح أشوف محتاجه شي.. لازم تاكل أخاف تدوخ... لازم أحد يغصبه تاكل...

مها: لا تاخفين يا فاتن ماجد عنده... أكيد بغصبه وتو مرقين له عصير وفواكه..

فاتن: إيه.. بس ما يمنع تأكدين.. زين أنا بروح الصبابات أتأكد من التنظيم.. أخاف يحوسونا...

_توجهت فاتن نحو المطبخ وأقبلت الجدة_

الجدة: مها... الحين بس ذولي الطاولات؟

مها: يمه أنا بعلق على جبهتي موب بس ذولي الطاولات.. بيجيبون ثانيات.. وبيجيبون ورد زياده عشان يرتبون المكان... ترا باقي على جيه الناس أربع ساعات تقريباً ليش لاجينا؟

الجدة: طيب.. نجلاء وبزرانه وينهم؟

ليلى: فوق فوق... راحت ترضع فرح...

الجده: وسعود ياحول ما يرضع؟

ليلى: ما أدري... مها... روحي إلبسي الحين.. بعدين أعرف بتنزقين وكلن بيسحبتس من جهه...

مها: إي والله إنتس صادزه... إلا كاميليا ما وصلت؟

ليلى: إلا راح أبو ياسين يجيبه هي وبنته...

مها: ما دريت إن بنته بتجي معه!!

ليلى: وين أنتي عايشة...

مها: والله هالإنسانة تستاهل كل خير.. فعلاً الواحد ينعرف بالأزمات..

ليلى: إيه.. والله إنتس صادقه..

***********

"غرفة عذبة"

تصفف الكوافير شعر عذبة, وماجد يلقمها قطع الفاكهة وهو يضع منديل أسفل فمها..

عذبة: أحس تقل إني بزر..

ماجد: قلت لتس.. كل الناس تكبر إلا الضنى... يشيب وهو بعين أبوه صغير..

عذبة: شفت أمي عذبة.... حلوف ما تجي تسكن ببيتنا ويوم جيت علطول جابت عفشه..

ماجد: ماتنلام.. أنا مجرب شعوره....

عذبة.. من خاطب نجود لسعود؟

عذبة: هو قال لأبوي ناصر... ليه؟

ماجد: غريبــــــــــــــــــــــه!!

عذبة: وشو الغريب؟

ماجد: وش سوى يوم مات سعود؟

عذبة: ضاق صدره... بس أحس اللي ضيق صدره أكثر موت أمي...ليه؟

أنا كنت حاسه إنه في شي غريب.. وتأكد لي بسؤالك..

ماجد: سعود.. لو مامات بالحادث كان ما كمل الخمس وعشرين...

عذبة: وشو؟

ماجد: أنا إستغربت ليه أبوي يخطب له وهو عارف إنه بيموت.. وليه كان حريص إن يزوجه وهو صغير..

عذبة: مافهمت!!

ماجد_يتنهد_: سعود... فيه مرض بالأعصاب....... تذكرين المرض اللي جاء بدريه بنت خالي عبدالرحمن.. يوم صارت بالأربع وعشرين تعوقت..

عذبة: شلون؟

ماجد: أنا فرحت إن سعود مات قبل لا يجيه المرض.. لكن إنقهرت ليه أبوي يبه يتزوج!!

حرام يجيه عيال ويروح ويخليهم.. حرام يتعذب وهو يدري إنه بيترك يتمان..

عجزت أفهم أبوي..عجزت أفهمه..

عذبة:..........................

ماجد: عذبة... أبيتس تسامحين أبوي.. صح هو سوى أشياء غلط.. وتحسين إنه به قاسي وما يحس.. لكن صدقين أبوي يحاول يحافظ على بيتي باللي سواه..

عذبة_تمسك بيده وتقبلها_: يبه.. أنا صح تعذبت.. وتعبت.. وإنجرحت وإنهنت.. لكن إذا ذكرت إني حافظت على بيتك وبناتك .. على إسم عايلتنا... وحلالنا... حمدت ربي.. ونسيت كل شي.. أصلاً أنا نسيت كل شي.. من شفتك... خلاص.. أنا أسعد إنسانه بقربك......خلك جنبي.. أبي أحس بك بكل لحظة..

****************

تــــــــــــــــمــــــــــــــــــــــــت....

عــــــــــــــــــــــــــــــــــــذبـــــــــــ ــــة الــــــــــــــعــــــــــــذوبــــــــــــــــــ ـــــــ

تجميعي زهور حسين

منتديات غرام

تعديل المقال