رواية بصدري وجع كنت احسبه نام يا صدري -54

رواية بصدري وجع كنت احسبه نام يا صدري -54

يناسب أهلها ومركزهم الاجتماعي والمشكلة زوجتني ولد أخوه ..

بكت أكثر : الظلم رجع ي أخوي في اختك .. رجع وأحرقت قلبها وآنهيت حياتها..

طلعت أخته وهي تشوف صمته وعيونها تورمت من الصياح ..

رتيل م فاقت من صدمتها : هالشي واقع ..!

حط يدينه على جبهته وهو مندق وساكت ..

وقفت وهي تقولها : قلت لك ومن أحنا بلندن بتشوفها في خواتك وأعز ناسك ..

: اسكتي ..

: آسكت ..!

ليييه آسكت ؟!

طاحت دمعتها على الارض مباشرة : حرام وش ذنب أختك يجيبها ذنبك .. أبو سامي راح ترجع له في وحده من بناته ..آخخخ بس الله ينتقم منكم أنتم..

صرخ فيها ..

: لا تصرخ م هزيت فيني شعره ..

تقدمت وهي تحس بكل رقبتها ترجع لـ ورى وهو يجرها من شعرها ويطلع كل قهره من أبو سامي والدين اللي رجعه وبكى ونظرة آخته وحكيها كله في رتيل..!

صرخت من الالم ..م رحم حملها ولابكاها ولاضعفها وهو يجرها على العشب ويرميها في القبو ..!

وهو يصكه ويصرخ فيها : أنتي م تتدخلين في شي م يعينك فاهمه ..!

: هيييي لاتحطني هنا ..

بعنف مجنون فك الكوبرآ من قفصها وهو يرميها عليها : ذي اللي راح ترجعك لـ عقلك ..

م شفع لها صراخها وبكاها الهستري من الكوبرآ .. م تحمل لو دقيقه يجلس معها

وهو يصك الباب ويوقف عليه ويأخذ آنفاسه نسى أنها تحمل بداخلها أغلى شي يتمناه ..

جلس على الكرسي ب الحديقه وهو يناظر السما سحب السجاير وهو يدخن بشراهه رفع جواله رد على آمه صوتها ب الحيل متغير ..!

رمى السيجارة ودهسها وهو يطلع لامه بسرعه ..

فتح الجناح : لبيه ..

: متزوج مطلقه ..!

حط يده على جبهته وهو يتنفس بعمق ي كثر المصايب هاليومين ..!

رفعت صوتها بحده : ولدي الوحيد يتزوج مطلقه ..!

والمصيبه مادريت ..!

وهو يجلس على ركبه : يمه ..

بزعل واضح : منيب آمك لاتكلمني ..

حزت بخاطره حيل هالكلمه عمر آمه ماكلمته بالنبره : يمه أنا عساف ..

: منيب جاهلتك عارفه ..

:أجل متزوج مطلقه ؟

: وش فيها مو المهم بأني أبيها ومرتاح لها ومعها ..

آمه تناظره بزعل : البنات انعدموا الظاهر لاجل تأخذ مطلقه ياعساف ؟!

: رغبة قلبي يمه ..

: وآمك وخواتك وحتى أنت مافكرت بنظرة الناس ؟

راح يجن : افكر بنظرتهم ليييه بس ؟!

من متى الناس يهتمون لنا ..

آمه :شوف ي عساف فشلتني لما عرفت هالخبر ولاعرفت وين آودي وجهي من الحريم بالجلسة .. أجل زوجة ولدي الوحيد واللي صيته بين الناس يتزوج مطلقه .. لاتقول يمه البنت جميلة ومدري آيش فيه اللي أجمل منها ولا معاهم شهادات أعلى منها وعائلات أكبر ..

بنبره ضعف : أحبها يمه .. مابي كل هالاشياء دام قلبي عشقها..

آمه تناظره : عساف هالبنت مابيها تكمل معاك حياتك ..

صدمة اكتست وجهه ..

:وشو ..!

آمه : آيييه اللي سمعته تطلقها .. وأنا اختار لك اللي تناسبك ..

وقف وهو للحين مصدوم : يمه الا رتيل خط أحممر منيب مطلقها ..بعدين حامل : ولدك تأخذه بس تولد لكن تطلقها ..

: ماراح آطلقها ..

: اجل اطلع برى موب الجناح بس الا الفيلا بكبرها ولا عاد أشوفك ..يكفي أنك السبب بمشكلة أختك ..

بكل برود الدنيا : ماطلبتي ي الغالية شي بس هالطلب بنفذه لك .. وخواتي عمري ماسويت شي يضرهم واللي صار مكتوب ..

بحده : أنت السبب بكل اللي صار لاختك ..اطلع برى ..

: تذكري يمه ولدك بأنك أنتي اللي طرديته ..

فز قلب آمه من هالكلمه طلع من الجناح ونزل لتحت ..كانت شاهه ودلال توهم داخلين هم وبناتهم ..

دلال : عساف شفيك ؟

وجهه متغير : آمي طردتني

شاهه بصدمه : وشو ..!

: م تبي رتيل زوجة لي ..

طلع وهو مخنوق ركب سيارته

سارة ركضت لخالها :خااالي ..

: ساره الله يرضى عليك منيب رايق لانفاسي ..

ساره : ماعليك راح ينسون المهم أنت ..

خالها حب آحساسها فيه تعالي معاي ..

بسرعة ركضت سحبت عبايتها ..

دلال : سسسارة وين ؟

ماسمعت لامها وركضت لخالها برى ..ركبت جنبه وحرك بسيارته وهو مخنوق : جدتك طردتني لاجل آطلق رتيل ..

ضغط على الدركسون بقوة :ومستحيل اطلقها ..

ساره : وجدتي ؟

بضيق ماله حد : وجدتك ماودي بزعلها ..

ساره : آممم الحين جدتي مصدومه بس شويات وراح تكلمك ..

:ماتعرفين ي ساره جدتك قاطعت كل أعمامها بشبابها وتزوجت الوالد جدتك مالها قلب بهالاشياء إن صدت وزعلت فالله يخلف..

ساره : بس أنت ي خالي غير أنت ولدها الوحيد ..

بـ هم : جدتك ماتفرق معها ..

كمل يلف مع بنت أخته القريبه لقلبه شوراع الرياض ولا له وجهه محدده ..ونسى رتيل المرمية مع الحيوانات في القبو ونسى شي تشيله بين آحشائها منه وله ..!

.

.

.

شقة العزابية

ثامر : أنت لازم تروح لها ..

وهو منسدح : السالفه مهيب هينه كذا .. أكيد عرفت السالفة منهم ومتأكد الحين فيها شي ..

: روح لها هي الحين محتاجه بس شخص يطبطب على أكتافها .. روح لها ..

جلس : ثامر اصلاً هي تكرهني ولو شافتني راح تعتبرني منهم ..

: أبوك يقول هي تعبانه وفي المستشفى روح لها كأنك ماتعرف شي ..

سكت شوي وهو يفكر : راح تكرشني (تطردني)

: تحمل كأنك تبيها ..

: أبيها وبس ..!

:اخيراً اعترفت أنك تحبها ..

دنق بإلم : المشكلة لما حبيتها من قلبي كرهتني ..

: تقدر تجيبها خاصة إنها الحين بحاجتك حيل .. هي فرصتك آكسبها ..

: بروح لها بس ميب الحين ..

: متى أجل ؟

: مدري .. أبوي يقول من شافتهم طلبت لهم الامن عقب م عرفت سالفتهم ودخلوا لها الدكاترة ..

ثامر تألم على حالها : الله يلوم اللي يلومها .. وأنا أخوك اللي صار لها مصيبه..تصور عايش طول عمرك مع ناس مب آهلك والمشكلة أبوها وأمها أحياء وشافوا كل اللي يصير فيها وساكتين ي شيخ الله يأخذهم ..

ضحك سطام : هيي

ضحك ثامر بـ هم : والله جد قهروني أنا وش عاد بهالضعيفه ..

سطام : ب الحيل .. للحين منيب متخيل شكلها وهي عرفت كل شي ..!

: الله يكون بعونها ..

.

.

.

مكه ..

أخذو عمره من وصلوا لـ مكه يناظرها وهي تناظر من القزاز الحرم دموعها تنهمر وبين لحظاتها تعبر شهقة مميته .. غلطان ووده تسمعه وترجع له مثل أول يبي بس يقولها أنه يحبه أكثر من أي شي ب الحياة بس واضح عليها تعبانه منه ب الحيل والدليل دموعها المتناثره وعمر دمع الجوهره م نزل من شي هين..!

لا تنثر الدمع

صوت الدمع يؤسفني

غلطان أدري ولكن إسمع الآتي

و الله أحبك و لا لي عذر ينصفني

إلا أن حبّك تجاوز حبي لذاتي

واضح آنها متضايقه وهو يوقف وراها سحبت نفسها بـ آشمئزاز واضح ..

رفع يدينه وهو يبلع ريقه : جوهره ..

: هلا ..

: لاتغصبين نفسك على شي م تبينه .!

.

.

.

مستشفى آخر ..

تعبانه بكل م تعنيه هالكلمة .. كارهه كل هالدنيا ..

جدتها : كان قلت لي وصحيتني ..

محمد يمسح على شعرها : م حبينا نشغل بالك ..

: لا ماعليكم لكن مهوب شهرها ..!

م ردوا آثنينهم ..

سحر تلافت الموقف : تدرين يمه بعضهم يولدون بـ الثامن ..

: بعدي الله يخلي لها هالضنا ..

جدها : محمد هي أكلت شي ؟

: لا

جدها وهو يتعكز : كادي وأنا جدك لزوم تأكلين ..

وهي تمسك كف جدها : مالي رغبه ي جدي ..

: آغصبي نفسك ي غلا شايبك ..

دمعت عيونها تعشق جدها وحنانه عليها ..

جدها يكف دموعها بيده المتجعده :لاتبكين وأنا جدك ..

كفها بكف محمد تحت الغطا شدتها بقوة وهي تحس بقضبة إلم مميته ..ناظرها بخوف : كادي ..

جدتها قامت لها : وش فيها ؟

تروع وهو يشوفها تبكي وتتألم : اكيييد خلالاص ..

خالته بهدوء : لاتخاف حبيبي ..

كلمت الممرضة جدانها جلسوا بـ قله حيله يناظرون حفيدتهم يتم نقلها لـ غرفة الولادة ..

خالته : محمد وين تدخل معها الله يصلحك ..

: لا بدخل معها هي تبي كذا ..

: محمد حبيبي مب زين ..

الوليد ماسك الضحكه وساكت وهو يناظر ولد أخته عيونه غشاه الدمع دخل ولاسمع لـ خالته ..

سحر دقت تتطمن عليها مع الشغاله وسلمان ..وهي تجلس : الله يصلحه بس..

الوليد : تهقين راح آحب زوجتي كذا ..

: م عتقد .. الولد ميت عليها وأنا أختك ..

وهو مبتسم : حتى هي لايغرك من شافته تعلقت برقبته ..

ابتسمت سحر ..

الوليد يناظر آمه : يمه تبين آوديك للبيت ..

وهي تمسح دموعها بطرف شيلتها : لا بجلس إلين تطلع كادي..

:يمه يمكن تطول ..

: إن شاء الله يسيره مهيب مطوله ..

: وأنت يبه ..

: منيب متحرك إلين تطلع نظر جدها وضناها وآشوفهم بعيني ..

الوليد يهمس لاخته : أكثر مننا غلاها ..

ابتسمت : فديتها من يومها عايشه معهم وباره فيهم يكفيك إن أبوي م يأخذ علاجه كله الا منها ..

: لو تطلع برى البيت مشكلة ..

: لا مهيب طالعه شرطت على محمد والا م كانت واقفت على الزواج لو رفض هالشرط ..

وهو مبتسم : كان طار مخ ولد أختك ..

ضحكت سحر : أنت فاضي ..

ضحك : المشكلة إنك تسولفين معي ..

ضحكت وهي ترد على زوجها ..

غرفة الولادة ..

وهو ماسك كفوفها ونص وجهها على وجهها الجنب ويده الثانية تحت رقبتها : حبيييي كدو لاتبكين كذا..

تبكي ويبكي معها بكل لحظه ..إلمهم بكاهم نبراتهم كلها مشتركه ..

لحظات مرت عليهم كانت آطول مما يكن ..!

غمضت عيونها فجأة ..!

عَنْ أَبي هُرَيْرَةَ رَضِيَ اللهُ عَنْهُ أَنَّ رَسُولَ اللهِ صَلَّى اللهُ عَلَيْهِ وَسَلَّمَ قَالَ : « مَنْ جَلَسَ مَجْلِساً كَثُرَ فِيهِ لَغَطُهُ ، فَقَالَ قَبْلَ أَنْ يَقُومَ مِنْ مَجْلِسِهِ ذَلِكَ : سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ ، إِلَّا غُفِرَ لَهُ مَا كَانَ في مَجْلِسِهِ ذَلِكَ » .

البارت التاسع والاربعون

المستشفى ..

غمضت عيونها فجأة كأنها آسترخت فجأه ..صوت بكاء طفلهم دوى في الغرفه آختلطت دموعهم ببعض وخده المذقن على خدها آبتل بالدمع ..

الدكتورة مبتسمه وهي تمد لهم طفلهم:الف مببروك ..

عيونهم غرقانه دموع وهم يناظرون طفلهم ..وهو يمسح على وجهها : ولدنا..

ابتسامه دامعه حطته على صدرها وهي تدمع وكل وجهها مبتل من دمعها ودمعه ..

.

.

.

بيت عساف ..

: يمه خلاص زواج وتزوج والحين حامل ..

بحده : شاهه أخوك لو جاني وقال من بدري يمه اللي أبيها مطلقه لكن أخوكم طلق البنت من رجلها ..

شاهه : يمه عارفين أنه غلط وغلطته كبيرة لكن الحين هم مرتاحين ..

: أخوك يطلقها أنا م ينلعب علي ولا يسوي هالسوايا كلها تربيه يدي ..

دلال : يمه الحين وش الفايدة لو تركتيه يطلقها ..!

مهنا فايده ابداً ..

جدتهم : أركدي وش اللي تطلقينهم من بعضهم ..

وش ذنب بنت الناس تتطلق مرتين وكلها بـ آسباب ولدك وآسبابك ..!

رهف إن باقي يبيها رجلها يرجعها دامه رجال ويترك أبوه وعساف ..

نزلت رهف وعيونها كلها دموع : يمه سامي الحين راح يمر ..

امها حاز بخاطرها حال بنتها قامت لها : الله يحيه ..

دق عليها وردت وهي تمشي للمجلس مع آمها ..

دلال : يابعد عمري عليها ..

شيما : بجد أبوه حققير شدخل خالتي وزوجها ..!

آمها : الدنيا وأنا آمك دين .. لكم في قصة خالكم ورد الدين بـ رهف عبره ..

شيما : بس خالتي مالها ذنب حرام مالها خمس شهور من تزوجت ..

: الله يعين .. الا وين زوجة عساف ؟

دلال : مدري م شفتها معاه .. يمكن وداها لاهلها ..

جدتهم : ماقالت لنا

دلال بـ امتعاض : من متى لاجات تطلع تجي تقول راح آطلع ..

شاهه : دلال شفيك عليها البنت م شفنا منها الا كل خير

دلال بضيق : كذا من الله م حبيتها يكفي أخوي لامن جلس معنا كله لازق فيها عيونه ماتحترم وجودنا تغير من عقب زواجه منها ..

شاهه : م تغير كثير .. بس صعب الواحد نفسه قبل الزواج وبعده ..

قامت دلال : شاهه واضح انه تغير .. الا وين مناير ؟

شيما : في غرفتها ..

دلال : خليها تنزل وش عندها فوق ..

المجلس ..

سامي : بأخذها ونسافر لنا فترة إلين تهدأ الاوضاع ..

عمته : سامي أبوك عرف أنك رجعتها ؟

: آيييه وبتسأليني زعل آيييه زعل لكن زوجتي وأبيها ولاغلطت وهو اللي اختارها لي والسالفه لـ طلاقها كلها عناد في عساف .. ولاطاعه لـ مخلوق في معصية الخالق ..

عمته : م راح ترضخ لـ مطالب أبوك وعساف ..

وهو يوثق يدينه بـ يدين رهف ويناظر عمته : م طاوعت فيها الحين تتوقعين راح آبيعها !

: لاتلومني وأنا آمك ..

: ماعليه ي عمه .. بس أبي أخذ رهف الحين ونسافر ..

: زوجتك ولا آقدر آمنعك عنها لكن انتبه لها .. سامي لي ثقه فيك الشي الكبير خلك قدها ..

وهو يثني غترته : بعيوني ..

وهو يناظر رهف : روحي خذي عبايتك وخلينا نسافر ..

ممداها ترد الا وجواله يدق : سم يبه ..

أبوه بحده : آسمعني يـ سامي سمعت إنك رجعت زوجتك علي الطلاق طلاق(ن) مافيه رجعه لـ آمك إن م رميت الطلاق على أخت عساف لـ آطلق آمك واتبرأ منك لـ يوم الدين ..ومعك أقل من 15 دقايق تدق وتقول طلقتها والا والله يـ سامي لاطلق آمك شف عبايتها الحين جنبها ..

: يبه ..

: جاك العلم ..كأنك تبي آطلق آمك عقب هالعمر ويتشتتون أخوانك ..

صك بـ وجهه وهو ينزل جواله بحضنه ويناظرها بـ قلة حيله ..

عمته كأنها حست بـ اللي صار : مافي هالمكالمه خير ..؟

شبك يدينه ببعضها وهو يندق للحظه ورفع عينها لها : رهف حياتنا م صارت لنا وحدنا ..

قالتها وهي تجمع من كرامتها وتطلبه قبل يقولها : طلقني ..

آمها : سامي أبوك اللي دق ؟

: آييه ..

رهف وهي تشهق : يممه يبيه يطلقني والا راح يطلق آمه ..

رفع عينه فيها سمعت أكيد الحكي لف لـ عمته وعيونه خانته دنق : راح يطلق آمي ..

عمته ضاقت فيها الدنيا : ولك بالخيره لاهلك ..

قامت عمته : طلقها دامك نويت هالطلاق ..

: بس أبيها شوي ..

: تحرق قلبك وقلبها ليه .. هالدقايق لو جلستم مع بعض وشاللي راح يفيد ..!

تهدج صوته: بس شوي ..

طلعت عمته..

بلع ريقه وهو يفرك يدينه ببعضها : رهف م تركتك بـ اختياري ..

: سامي مستوعب شاللي راح يصير ..!

بصوت أقرب للبكا : أبوي راح يطلق أمي لو م طلقتك .. يعني أخواني راح تتأزم حياتهم والسبب أنا ..بعدين آمسحي دموعك م حب أشوفها ..

أمسحـي دمعـك علـى شـانـي أنــا

خابرتنـي أنّـي مـاحـبّ الـدمـوع ..!

وهي حاطه كفوفها على نص وجهها وتناظره إلين خلص من حكيه مسحت دموعها بـ آطراف آصابعها : بليز سامي لاتعلقني فيك أكثر ..

كف دمعته وظل يناظرها لفترة : راح آشتاق لك كثير لـ ضحكك مزوحنا لعبنا طيشنا غيرتنا علينا أحلامنا المرسومة والمكتوب عليها تبقى في خيالاتنا ..

راح آشتاق رهف حبيبه قلبي وعمري وأجمل شي جمعتني فيه الاقدار ..

تتابعت شهقاتها : ناوي تعذبني ..!

خلاص طلقني يـ آبن الناس ..

م سمع لها وظل يناظرها رفع جواله وهي طاحت دمعته على شاشه جواله : أبوي ..

رد بضيق : خلاص خلاص وش تبي أكثر طلاق وراح آطلقها مامرت 15 دقيقه كلها ..

أبوه : طلقها الحين ..

لاول مره بحياته ويمكن الاخيره يصك بوجهه أبوه ..!

سحبها لاحضانه : م راح آنسساك ثقي بهالكلمة كثير ..

تمسكت فيه وهي منهاراه وزاد آنهيارها وهي تسمع كلمات دلت على فك قيدهم من بعضهم ..

سحبت نفسها منه لاول مره م يرجع يضمها .. فك ساعته والمسحبه الفخمه وهو يدنق ويتركها بحضنها : بأخذ منك شي ..

شهقاتها م تركتها تحكي فكت سلسالها وحطته بكفه وهي تناظره يتوارى عن عيونها ..

يوم شافوني انا بقربك ابعدوني عنك يالغالي

مادروبي كم انا احبك يا سعادة عمري وفالي

رجعت ظهرها على الكنب وهي ضامه ساعته ومسبحته على وجهها ..دخلت آمها وشوي جدتها وخواتها ..لمتها آمها لـ صدرها : حسبي الله عليهم كانهم دخلوكم بشي مالكم فيه يد ..

وجهها عيونها آنفها كل شي آكتسى بـ الحمره صوتها المبحوح من بكاها وتعبها : يمه شوفي عطاني سامي ششوفي جدتي شاهه دلال بنات شوفوا ..

دلال م تحملت وطلعت مسحت دموعها : الله ينتقم منهم ..

مناير : شفيك ؟

: رهف تطلقت ..

بصدمه : آما ..

: شوفيها في المجلس ..حسبي الله على عمها ..

مناير : يالله وش ذنبها بس ..

.

.

.

القبو ..

صاكه عليها باب الحمام وهي تبكي م همها الالم ببطنها ولا النزيف من طيحاتها المتتابعه كل خوفها من الكوبرآ المتحرره بشكل مميت في القبو ..

صرخت وهي تشوف الكوبرآ تدخل من تحت الباب الواسع لـ فتحتها :لاآآآآآآآآ

تراجعت ببكا وصراخ لورى أكثر نصها داخل ونصها برى : لالا تدخلييين بلييييز لالا

دق جوالها صرخت بصدمه جوالها بجيب البلوزة وتوها تنتبه .. رفعت نفسها أكثر وهي تشهق وترد : نااااصر

فز أخوها من مكانه : وأنا أخو نورة (أختهم الكبيره)شفيك ؟

ظلت تبكي بخوف وصل لاخوها وهي تناظرها تكمل تدخل من نص الباب :لاآآآآآآ

حطت الجوال تحت نحرها وهي تشده بيدنها وتشهق من الكوبرآ وصوتها المرعب الغريب ..

أزارر جوالها آبتلت بمدامعها صوت آخوها المرعوب عليها وصلها ..

رفعته لاذنها ويدينها الثنتين ماسكته فيها ..

: نـ ـ ـ ـ ـاصـ ـ ـر

صوتها المتقطع طير قلب أخوها وهو في مطار دبي كلمها لاجل يتطمن عليها ويسألها كأنها تبي شي من هناك : عيون أخوك شفيييك ؟

ماقدرت تحكي وهي تصرخ الكوبرآ كل مالها تدخل أكثر ..

ضاع ناصر من تفكيره :لاتنثرين الدددمع ي رتيل قولي بس شفيييك شوي وأنا في الرياض عندك .. صوتك م عدت آسمعه عدل .. قولي بس شفيك بكاك محرق(ن) قلبي ..

لاتنثرين الدمـع قولـي لـي وش فيـك

تخالطت عبرات صوتـك وانـا اسمـع

تقطع خطوط الجو والصـوت مغريـك

ودمعك غدى نيـران بالجـوف واقشـع

ووقف شعر راسـي ودكـن دواكيـك و

ضرب اخماس اسداس بالشك واجمـع

ويبسن عروق القلب وصـارن مهاليـك

مغيـر اغـص بخافـي الريـق وابلـع

: ناصـ ـ ـ ر تعـ ـ ـال للبيت (قطع صوتها صرختها )ناصصصر حاطني( ردتها شهقتها وتمتمت وهي تكملها ) مع حيوانات

بلع ريقه وبصرخه آنتبه على نفسسه وحمد ربه إن رحلتهم نادوا لها : آيشش .. ويين ؟

تقطع صوتها : ناصصر في بيتهم القبو ..

وهو يمشي بسرعة : الله لايوفقه والله لـ آربيه نسى التعبان أن ناصر ومشاري وعبدالرحمن فوق الارض .. الحين أجيييك لاتبكين ي نظر أخوك ..

لا والله الا اجيك وشلـون مـا اجيـك

شفني عليه اقرب من الموت واسـرع

اللي ازعلك يمكـن نسـى انـي اخيـك

ولا تخيـل لاتغربـت مــا ارجــع

لاتنثريـن الدمـع حـيَّـن محاكـيـك

والله تخضع اشناب مـن شـان مدمـع

نزلت جوالها وهي تبكي وضامه نفسها أعلى البانيو سحبت كل شي عليها وهي تغطيها لاجل م تجيها الكوبرآ ..

دبي

مطارها ..

ناصر صوته متقطع من العصبيه : آسسمعني تروح الحين لبيت عساف وتشوف رتيل دقيت عليها وهي تبكي ومنهاره بالحيل روح لها الكلب حاطها مع حيوانات..

مشاري وقف بسرعه : وشو ؟

بحرقة : اقولك روح لـ رتيل وخذ معك عبدالرحمن وولد نوره كلها ساعه وشوي وأنا عندكم ب الرياض والله مهوب على رجال إن م سيلت دمه ..اسمع تقول في القبو ..

صك الجوال وعينه كلها على ساعته دمه فاير ..ظل قابض يده بـ غيض رجل فيه من الحمية لـ عزوتها تكفي بلاد وتزود ..

.

.

.

الرياض

المستشفى ..

الوليد يضحك وسحر تناظره : على هالضحك آشوف فيك يوم ..

محمد : م عليه الدنيا دين

الوليد يضحك وهو مندق يشوف ولد كادي بسريره : الله يخليه لكم ويرزقكم بره..

جا جدها من الصلاة عقب م جلس شوي في المسجد دنق وهو يسلم عليها ويبارك لها ولـ محمد : ماشاء الله ماشاء الله الله يخليه لكم ويجعله من حفظه كتابه ..

محمد : اللهم آميين ..

عطى الوليد عكازه وهو يجلس : سحر وأنا أبوك جيبي له ولد كادي ..

محمد يناظر كادي وتالي ناظر جده : سميك ياجدي ..

رفع جدهم راسه لهم وهو مبتسم ابتسمت لابتسامه جدها ابتسامه واهنه من التعب ..

: آوه ي آم عبدالله ..

محمد يناظرها ويبعد خصل من شعرها عن وجهها خالته أخذت ربطة شعر وربطته كله ..ابتسم لـ خالته ..

ظلت تناظر جدها وهو يأذن في آذن ولدها تعشقه أكثر وهو يطبق هالسنه عن نبينا عليه آفضل الصلاة والتسليم ..

جدتها : بسم الله عليه صحته زينه وهو بـ الثامن ..

سحر تتكلم عنهم : آييه الحمدلله الله يخليه لهم ..

جدتها : راح يطلع معك ؟

كادي بصوت تعبان : إن شاء الله ..

الوليد يصوره وهو بحضن أبوه ويرسله لـ سلمان وعيال سحر ..

محمد وكادي يناظرونهم ..

: كلم خالتي بلغها وعمي ..

ابتسم لها : إن شاء الله ..

.

.

.

بيت عساف ..

مشاري يناظر السواق : أقولك وين القبو ..

عبدالرحمن ومحمد(ولد نورة) ..

تقدم فيهم السواق : هذا ..

حاول يفتحه أكثر من مره الباب قوي جداً ..

صرخ فيه عبدالرحمن : تعاااال ي كلب لبيتكم تعال ي حيوان ..

عساف : وش فيك ؟

مشاري سحب الجوال بحده : والله إن م جيت الحين يـ عساف م تنام الليلة الا بـ قبرك ..

استغرب واستنكر حكي مشاري معه ..!

: أنا جاي الحين ..

صك بوجهه وشاف محمد يكلم رتيل ويهديها م قدر يكلم أخته مصدوم أكثر شخص في الدنيا صدمته مهيب أي صدمة ..

صديقه الروح بـ الروح عشره عمر يعمل كذا ..!

تكئ على الباب وهو يدفه بس يده خانته حسها تحركت من محلها ..

محمد : خااالي ..

عيال شاهه ودلال يناظرون بصدمة ..كل اللي عرفوه بإن زوجة خالهم محبوسه في القبو مكان الرعب بالنسبة للكل وكذلك المجهول ..

عبدالرحمن شد شعره بعصبيه وهو يناظر البوابة الرئيسيم متى تفتح ويدخل عساف ..

مشاري يده جاها إلم مميت وقلبه محروق حرق من حسبة أخته ..

أم عساف وخواته وجدتهم كلهم كرهوا تصرف عساف ..

أم عساف تناظر من ورى القزاز العاكس بخوف : ولدي مهوب طالع منهم سالم ..!

جدته : الله يستر .. وراه عساف آستخف على تالي ..!

دلال شايله ولدها بـخوف : الله يسسترنا بستره .. شوفوا ذاك شلون يشد شعره..

شاهه ساكته وتناظر بخوف ..

أمهم : وينها رهف ؟

شيما : آتركوا خالتي بروحها اصلاً تعبانه نفسيتها ..

دخلت سارة .. فز قلب جدتها وعورها اخذت جلالها وطلعت ..

مشاري بحمقه : آفتح الباب ..

الخوف بدأ على ملامحه من عدة آشياء أهمها رتيل وطفلهم ..

: م فيه أحد هنا ..

صرخ عبدالرحمن فيه : طططلع اختي ي كلب طلعها

تفلت عليه وهو يضربه فكوه عنه عيال خوات عساف ومحمد ..

سحب منه المفتاح وهو يفتح الباب م قدر ..

: هييي قم حاط رقم سري للقفل ي كلب ..

قام وهو يناظر عبدالرحمن حاول يضربه ودفه محمد : افتتح الباب وأنت ساكت لا ينتثر دمك فيذا ..

رفض يفتح الباب إلين آجبرته امه : افتح الباب

كان صوتها محتد وضايق ..

: يممه ادخلي لـ داخل ..

: عساف آفتح الباب لهم .. م يكفي كل اللي صار .. ضناك في رحمها م خفت عليه..!

تقدم وكل همه هالطفل .. ولو إنه عقب معرفة أخوانها معجزه رجعتها له..

دفه عبدالرحمن ودخل للقبو ..بكى اخته المرمية بين هالحيوانات المهانه الذليلة..

بلع ريقه وهو يرفع الافعى ..

: ي جعلها تلسعك لسعه توديك للمقابر ..

بـ نظره : تهقى بـ فكها على رتيل وسمها فيها ..!

صوت أخوانها رجع لها آمل ثاني للحياة ..

بكاها مشاري وهو يشليها وهي تشهق .. شالها وطلع فيها لـ برى القبو ..

حط ولد اختها جوالها بجيبه وهو يركض لـ آم عساف : جيبي لنا عبايتها ..

عبدالرحمن يناظر أخته كلها دم .. من وجهها راسها حتى شكلها تنزف ..!

رفع عيونه من اخته لـ عساف وبلع ريقه وهو يتفل بوجهه ويصفقه كف رجعه له عساف بسرعه وعيال اخته تجمعوا عليه ..ركض محمد لـ خواله آثنين آبعد واحد والثاني بعد ..

مشاري : لولا نزف أختي وجروحها م كان طلعت من هنا الا وواحد مننا على المقبره ..

مشى ورى عبدالرحمن ومحمد الشايل لـ خالته الفاقده للوعي عقب شوفتها لاخوانها وولد أختها ..

جلس على الارض وانهار بكل م فيه من هاللحظه عرف بإنها حُرمت عليه ..

خسارته مهيب وحده لالا ..

خسر رتيل ومشاري ويمكن طفلهم ..!

.

.

.

يوم آخر ..

المستشفى ..

غرفة الجوري ..

رفضوا الدكاترة خروجها نفسيتها حالتها مو مستقره ابداً ..

: دكتورة امنعي الزيارة نهائياً م أبي آشوف أي شخص ..

الدكتورة : منعت الزيارة من البارح .. (جلست الدكتورة ) الجوري متأكده الانهيار اللي صار لك البارحة كان نتيجة صدمة عصبيه كبيرة جداً تمحور بكل الضغوطات وصار هالانهيار لذلك فضلت وبعد الحديث مع الاطباء بإن الافضل تأخذين كم جلسه مع آستشاري نفسي ..

: دكتورة لو كل صدمة تجي رحت لـ دكتور نفسي آعتقد كان الحين من آشهر مرتادي العيادات النفسية .. دكتورة آصبح لدى مناعه كبيرة جداً ضد أي صدمات رغم عن آنف صدمة البارح ..

ظلت تناظرها الدكتورة ..

يتبع ,,,,

👇👇👇

تعديل المقال