رواية توأمي لكن انا غير ومالي مثيل وراسي عنيده -26
حصين وهو يلعب بالسبحه:قال لي مازن اللي صار بس ما فهمت كل شي
معاذ:وش اللي ما فهمته أنت تشك فيني
حصين:انا لو اشك فيك كان ما خليت أختي عندك بس قل لي وش صار بالضبط
معاذ:ابد اتصلت علي وحده وقالت لي غصون طاحت عليها رحت لها على العنوان اللي عطتني إياه ولما رحت فتحت لي وحده وكانت متغطيه وبعدها قالت لي بسرعه دخلت ولما وصلت في نص الصاله لفت علي وفكت لثمتها توني بلف وجهي إلا أشوف غصون ولا عاد فهمت وش صاير
حصين وهو يحك دقنه:اممممم طيب وبعدين
معاذ بعدها طلعت غصون ولا عطتني فرصه افهمها شي ابد
حصين :طيب تعرف من هذيك البنت
معاذ:لا لأني لما رجعت لقيت البنت مستأجره الشقه ليوم واحد بس وهي مفروشه
حصين:والرقم
معاذ بضيق:بدون اسم
معاذ وهو يمسك رأسه:والله ما عاد ادري وش أسوي مع أختك
حصين:طيب ليه ما تخلي مازن يقول لها اللي صار
معاذ:مو راضيه تسمع اي شي ولا تصدق اي شي الا اللي شافته ويا ليتها شافت شي بس شافتني واقف مع البنت
حصين وهو يفكر:لا تضيق نفسك وعطني شوية وقت أفكر وبعدها أرد عليك وألقى لك حل إن شاء الله
معاذ:إيه والله يا أخوك فكر ودور لي على حل
حصين هو يأشر للنادل:نشرب الحين قهوه وبعدها يحلها الحلال
معاذ:يا رب
&
لبسوا وتعدلوا ووصلوا المكان وهم ينتظرون
سجيه اللي لابسه نقاب واصل لنص خشمها:أقول قلتي لهم
بانه اللي متلثمه:أيه قلتلهم يقابلونا هنا
أمجاد اللي متلثمه هي الثانيه:خلونا نستنى شوي إذا تأخروا اتصلنا
بسام :بانه يله ندخل أبغى ادخل
بانه:استنى شوي حبيبي
سجيه:ليش ما لبستوه بدله أحسن من الثوب وهالحمدانيه اللي مسوينها له
بانه:لا يا عمري فديت اخوي لازم يكشخ صح بسوم
بسام:إيه علشان يحبوني كلهم
أمجاد:هههههههه الولد من الحين مخترب
سجيه:إيه عاد هو جرح وهو صغير هجل لا كبر بيذبح البنات
بانه:بسكم لا تخربون اخوي
شوي إلا رن جوال بانه وردت:الو
دانه:الو وينكم
بانه:إحنا في السياره انتم وينكم
دانه:سيارتكم لونها اسود
بانه:إيه
دانه:خلاص شفناكم
بانه:يله
سكرت من أختها
أمجاد:ها وش قالت
بانه:هذولا جاو
سجيه:زين
&&
عند دانه
الجده:ها وش قالت
دانه:هم أهل السيارة السوداء
الجده:زين هجل نزلنا ويا مقعد قل لسلطان عن مكانا
مقعد:إن شاء الله
رفع جواله وكلم سلطان و بعد دقايق جاهم
دانه وهي تشوف بانه تنزل من السياره وتضمها:حبيبتي هههه
ونزلت لبسام وشالته:حياتي لبى الحلوين انا أخبارك بسومي
بسام:زين
سجيه وهي تشوف السيارتين:هي قالت البنات وهذول مو بس البنات إلا القبيله كلها
أمجاد وهي تطالع مقعد:اوووف وش جابه هالعله
سجيه:ههههههه مو هذا اللي كسرك يالمكسوره
أمجاد طالعتها بحقد وسجيه اختفت ضحكتها وسكتت
الجده لام يوسف:أقول يا بنيتي
أم يوسف:سمي يمه
الجده:ذكريني أقول لمقعد بعد ما نخلص من بيت الحيوانات نروح لام راكان
أم يوسف:أم راكان وش الطاري
الجده:نسيت أقولك هي عازمتنا
أم يوسف:والبنات
الجده:نروح بهم كلهم وش فيها بيت أم راكان ما فيه احد
أم يوسف :على خير إن شاء الله
شافت بنتها تنزل وشهقت وهي تشوفها:وش ذا
مدى وهي تطالع رجولها:زنوبه
آم يوسف:وليه جايه بها
مدى:مريييييييييييييحه بشكل عجييييب
أم يوسف:دائما مفشلتنا الله يصلحك..وراحت وخلتها
مدى:ياربي وأنا كله يتحلطمون علي استغفر الله بس
أما عند مقعد فأول ما عيونه طاحت عليها ابتسم وهو يشوف نظرات الكره والغضب منها وهو واجه نظراتها بابتسامه بريئه لأبعد الحدود ما تحتوي إلا على الطيبه والحنان
&&&&
توأم لكن انا غير ومالي مثيل وراسي عنيده
البارت السابع عشر
أتمنى ينال إعجابكم
جالس في غرفته ولحاله سمع جواله يرن رفعه ورد بعد ما شاف اسم المتصل:الو
:الو يبه
الجد:هلا حصين ها جبت اللي وصيتك عليه
حصين :إيه جبت عنوانها
الجد وهو يأخذ ورقه وقلم:عطني إياه
حصين:شارع (....) بيت (....)
الجد:زين عرفته
حصين:يبه تبغاني أروح معك
الجد:لا ما يحتاج
حصين:على أمرك
الجد:مع السلامه
حصين:مع السلامه
صك من حفيده وهو يطالع العنوان وصفط الورقه وحطها بمخباته وقام علشان يقول للخدم يجهزون القهوه علشان يامن
&&&&
جات لهم:سلام يا بناتي
أمجاد باست رأس الجده وسجيه بعدها
الجده:أخباركم يا بناتي
أمجاد بطيبه:بخير جعلك بخير أنتي وشلونك يا جدتي
الجده:بخير وطيبه طاب حالك
سجيه بهمس:من متى الذرابه
أمجاد:انطمي
سجيه وهي تلف وجهها بقهر من أمجاد شافته ودققت ونزلت النظارات تنظفها ورجعت لبستها وشهقت ولفت وجهها
أمجاد والباقين طالعوها وهي بلعت ريقها
أمجاد وهي تهمس لها:وجع يوجعك فشلتينا وش فيك
سجيه وهي مرتبكه:ها ..ل..ولا شي
أمجاد بتهديد:يا ويلك لو تسوين حركات تفشل زي عادتك
سجيه:اوووف منك كله تهددين
أمجاد طالعتها ولفت وجهها عنها
شافوا البنات جايين جهتهم
وسلموا عليهم
مدى وهي تسلم على سجيه:اتئبلنا تاني
سجيه:ايوه يا أختي قبتي العيش معاكي
مدى:عيش هههههههههههه الله يرجك همك بطنك
سجيه:هههه داير شنو يا زوله تتضحكي علينا
مدى:ههه وش هاللهجه أعربيها
سجيه وهي تعدل نظارتها:لهجه سودانيه مرفوعه ونصبت بنطق سجيه
مدى وهي تضرب كفها بسجيه:هههههههههه حلوه
الجده بهمس:يا ويلي ناقصين خبال
أم سلطان وهي فيها الضحكه:خليهم يستانسون
الجده وهي تمسك برقعها:هذا وجهي إذا هالمهبل ما فشلونا ولا قصو وجيهنا داخل
أم سلطان:ههههههههههه
الجده:وين مقعد وسلطان وباقي العيال خلهم يشترون التذاكر علشان ندخل
أم سلطان:راحو يجيبونها
أمجاد بهمس لبانه:ترى تذاكر دخولنا علي
بانه:ما سمعتي وش يقولون راح يجيبونها
أمجاد:أنتي الظاهر اللي ما سمعتي أنا وش أقول
بانه:أمجاد تكفين بلا مشاكل خليها تعدي
أمجاد بعصبيه:انا الحين راعية المشاكل أصلا المفروض أخليكم منطقين في البيت
بانه وهي تطالعها وتأشر على دانه:ما أبغى أخرب فرحتها فيني
أمجاد زفرت:طيب..ولفت وجهها
أما سجيه صارت تضحك بس اختفت ضحكتها لما شافت سلطان جاي مع مقعد ويزن ومازن ونزلت الغطاء على عيونها ولفت وجهها
سلطان لجدته:جده هذول التذاكر وزعيها على البنات
الجده:زين..........وزعوا التذاكر ومشوا يدخلون
مدى لسجيه:غريبه سكتي وش فيك
سجيه:لا بس البطاريه فضت
مدى:هههههه ولا يهمك نشحنها لك
مشوا ودخلوا وسجيه بدت تحوس في شنطتها
أمجاد:وش تحوسين يا عله لا تقولين جايبه أكل
سجيه وهي تعدل نظارتها:لا وش أكله جايبه كاميرا
أمجاد:وليه
سجيه وهي شاقه الحلق:أصور مع الحيوانات
أمجاد وهي تهز راسها:الحمد لله والشكر
مشت وخلت سجيه اللي تحوس والكل مشى وبعد دقايق:لقيتها ..رفعت رأسها شافتهم كلهم اختفوا
سجيه وهي تحك رأسها:وين راحو هذول
صارت تمشى وتدورهم وبعدها صقعت في كتف وحده والتفتت لها:وجع
البنت:يوجعك
سجيه شهقت:يوجعني انا ما تدرين من تكلمين يا زباله يا رمامه
البنت:استغفر الله متوحشه
سجيه بصراخ وهي ترفع كم العبايه يديها :الحين أعلمك التوحش على أصوله
أما عند البنات تمشي وهي ملاحظه نظراته بس تتجاهل وهي تحس إن أعصابها تفور ولفت وما شافتها وبهمس:وينها ذي
وصارت تتلفت:وين راحت
بانه اللي تسولف مع دانه:من
أمجاد بعصبيه وبصراخ:الكلبه قلت لها لا تبعدين بس ما تسمع لازم الواحد يعطيها كم كف علشان تفهم هالغبيه
بانه اللي استغربت من عصبيه أمجاد المبالغ فيها:أمجاد هدي شوفيهم صاروا يطالعون
رواء بهمس لروابي:يا ويلي متوحشه وتخوف
روابي ترد بهمس:إلا قولي ما تربت
رؤيه:يمه تخوف وش فيها كذا كأنها رجال
دانه:حرام عليك والله البنت شكلها حبوبه بس عصبيه
أسير:وش صاير
مدى اللي صارت تتلفت:وين سجيه
أسير:ما ادري
الجده :وش فيكم
بانه بهدوء:لا ابد بس في وحده ضاعت منا
الكل صار يتلفت
أم يوسف:من ضاع
بانه:الثالثه اللي معانا
الجده وهي تطالع العيال:دوروها يا عيال
مقعد وهو يطالع أمجاد بنظره هي ما فكرت تفسرها لأنها اللي فيها مكفيها:ابشري يا جده بس انتم اقعدوا على الكراسي وأنا والعيال بندورها
بانه:بجي معاك انتم بروحكم ما تعرفونها
أمجاد بحزم:انا رايحه أدور هالغبيه
مشت بدون ما تسمع رد
أم يوسف:هوووو راحت بروحها اتبعوها لا تضيع هي الثانيه
بانه بهمس:مقعد الله يخليك اتبعها هذي لو شافت سجيه وهي معصبه كذا بتنتفها
مقعد وهو يزفر بضيق:طيب بس إذا لقيتوها علمونا
بانه:طيب
راح وراء أمجاد وبانه راحت مع سلطان علشان يدورون سجيه
ويزن ومازن ظلوا مع البنات والحريم
سلطان وهو يدور بعيونه:وشلون شكل صديقتك هذي
بانه:كيف يعني
سلطان:وشلون شنطتها مثلا فيها شي يميزها لون في عبايتها
بانه:لا بس لابسه نظارات دواوير
سلطان اللي طرت عليه سجيه حس انه بيضحك
قعدوا يدورون ولما قربوا من مدخل الحديقة شافوا بنت تتهاوش مع بنت ثانيه
بانه وهي تسمع الصوت شهقت:سجيه
سلطان باستغراب:صديقتكم
بانه وهي تروح للمكان:إيه
راحوا لقوا سجيه تنقض على البنت بجزمتها والبنت تدافع عن نفسها
بانه وهي تمسك سجيه:سجوي وش تسوي
سجيه وهي معصبه:اعلمها من انا
تفاجأ هي إيه هي صوتها كلامها لسانها الطويل لها الدرجه ممكن الصدف يكون لها دور
البنت:حشى مو بنت كلب
سجيه:انا كلب يالقرده يالسبال يالنعجه الجربانه
بانه وهي تجر سجيه:بس الناس تجمعوا
سجيه وهي تنزل جزمته في الأرض:احمدي ربك انك نجيتي من مخالبي ولا كان قطعتك ونتفتك
بانه وهي تشوف الناس يطالعونهم:سجيه بس عاد
وصل صوته وهو معصب بعد ما شاف الناس تطالعهم:قطع في لسانك الطويل
لفت عليه بترد:خير وش...وسكتت لما شافته
سلطان وهي كاتم غضبه:امشوا قدامي وكافي فضايح
سجيه مشت وبعدها بانه ورفع سلطان الجوال يتصل على مقعد بعد ما قالت له بانه يطمنهم
في مكان ثاني في الحديقة تمشى وتدور بالمكان:وينها هذي فيه غبيه غبيه قلت لها تعقل وتترك الهبل بس ما سمعت انا أوريها بس خلني ألقاها
وصلها صوته:وقفي شوي
لفت عليه وهي معصبه:خير
تلفت شاف الناس يطالعونهم:قصري صوتك الناس تطالع
أمجاد:قلت لك خير
مقعد :ما اعتقد إن هذا أسلوب
أمجاد باستغراب: نعم
مقعد:هدي راح نلقاها وما له داعي هالعصبيه الزايده
أمجاد:أنت مالك دخل تفهم
مقعد صار يضحك
أمجاد اللي عصبت زود:وش عليه تضحك وش اللي يضحك
مقعد وهو يكتف يديه:أنتي
أمجاد:ليه شايف مهرج
مقعد:لا بس أنتي تضحكين تحبينها وتبغين تذبحينها
أمجاد:نعم قاعد تحللني ولا وشو
مقعد:ما يحتاج عيونك مثل كتاب مفتوح تفضحك
أمجاد:أنت مخرف ومتخلف وفاكر نفسك تعرف كل شي وأنت جاهل
مقعد:هههه كل اللي فسروا وحللوا كانوا جهله قبل وتدرين هالجهله وش قالوا في العيون
قالوا:
إن العيون التي في طرفها حور قتلننا ثم لم يحيين قتلانا
يصرعن ذا اللب حتى لاحراك به وهن اضعـف خلـق الله اركانـا
وتعرفين هالجهله بعد ايش قالوا:
العين تبدي الذي في قلب صاحبها ....من الشناءة أو حب إذا كانا
إن البغيض له عين يصـــدقها ......لا يستطيع لما في القلب كتمانا
فالعين تنطق والأفواه صـــامتة ..... حتى ترى من صميم القلب تبيانا
رن جوال مقعد ورد وهو يطالع أمجاد:إيه – لقيتوها – زين – خلاص – باي
صكر:لقوها ولما تشوفينها عبري لها عن حبك مو ترعبينها
أمجاد اللي فورت منه ومن بروده وتفلسفه:الله يأخذك يا شيخ
راحت وهو مات ضحك وراح وراها علشان ينضمون للبقيه
&
وصل البيت وفتحت له الشغاله ودلته على المجلس الخارجي
دخل :السلام عليكم
وقف له الجد:وعليكم السلام
سلم عليه وجلس
الجد:حيا الله نسيبنا
يامن:الله يحيك
الجد وهو توه بيقوم يصب القهوه إلا يامن قام بداله:خل عنك يا عم انا أصبها
الجد:الله يبارك فيك
صب القهوه للجد وله وجلس في مكانه
الجد بعد ما شرب من قهوته:سم يا وليدي قل وش عندك
يامن:سم الله عدوك انا جايك وعندي طلب وأتمنى ما تردوني
الجد وهو يسند ذقنه للعصا:إن شاء الله ما تطلع منا خايب الرجاء
يامن:أبغى العرس والملكه بيوم واحد
الجد باستغراب:وشو
يامن:ادري إن طلبي غريب بس الظروف تحكمني مثل ما أنت عارف انا أدير شركه لحالي وظروفي ما تسمح أسوي ملكه وعرس
الجد:بس...وسكت
يامن:يا عمي انا عندي بعد 5 أيام سفره بس أجلتها علشان اطلب منك هالطلب انك تخلي عرسي انا وبنتكم مع عرس ولدكم نادر
الجد:إيه بس ....وسكت وهو محتار وبعد لحظات سكوت:انا بالنسبة لي ما عندي مانع بس إخوانها لازم لهم رأي وإخوانها الصراحه شرطوا أنهم يشوفونك بس ما صارت مناسبه تجتمع وياهم
يامن زفر بضيق وفي نفسه:انا ناقص إخوانها هالبزارين بعد
الجد:وش رأيك غداك بكره عندي ومنها تشوف إخوانها وتقول طلبك لهم
يامن:ولو ما رضوا
الجد:ما هو على كيفهم الكلمه كلمتي والشور شوري بس لو ما شافوك بيسوون مشاكل وأنا ما أبغى عوار رأس ومشاكل
يامن هز رأسه بتفهم:فهمت
وقف:هجل بكره إن شاء الله انا عندكم وننهي كل الأمور
الجد:بإذن الله حياك الله
يامن:الله يحيك ويبقيك
طلع ولما وصل لبوابة بيتهم طالع البيت وهو يبتسم وبعدها ركب سيارته وحرك من المكان
&&
في مكتب
وحده من شركاتهم ويكلم:نعم وش قلت طياره خاصه
علي:إيه طال عمرك هذا اللي ما حسبنا حسابه إنها تكون جايه للسعوديه بطياره خاصه
حصين:وتعرف لمن هالطياره
علي:لعائلة الماجد
حصين وهو متفاجأ:أنت متأكد لعائلة الماجد
علي:إيه طال عمرك لماجد الماجد
حصين بعصبيه:فهمت زين خلاص مع السلامه
علي:مع السلامه يا طويل العمر
صك من علي وهو يفكر:هجل طلعتي تعرفين عائلة الماجد
ابتسم بخفه:الحين عرفت هالقوه جايبتها من وين لان وراك عائلة الماجد
قام من مكانه وهو يطالع النافذه وبهمس:شكلنا راح نلتقي بس من يتوقع إن الصدف تجمعنا من جديد يا الماجد من يتوقع
سكت وفكره شرد ورجع لأيام مضت ولمقابلات تمت هو حضرها
رجعت للبقيه وهي مقهوره وودها لو ترد بس خافت إن الباقين يدرون إنها تعرف سواق الطياره ففضلت السكوت وإنها تعدي الأمور على خير
مدى وهي تجيها:وين رحتي هههههه ضعتي
سجيه:لا كنت العب باليه وش رأيك يعني
مدى:أوه أوه على الأخلاق
سجيه:أقول اسكتي لا يجيك راشدي يطير وجهك
مدى وهي فيها الضحكه:سكتنا
وصلها صوتها:أنتي اللي بيجيك الراشدي مو هي
سجيه وهي تلف لأمجاد:اوووف ترى مو رايقه لك
أمجاد وهي تمسك يد سجيه:يا غبيه خوفتيني
سجيه وهي تسوي روحه تنظف إذنها:ها ما سمعت من انا خوفتك أنتي
أمجاد:إيه يا بقره خفت يكون صار لك شي
سجيه ترفع يدها لجبهة أمجاد:أنتي مسخنه
أمجاد وهي تنزل يدها:أقول انقلعي يا شيخه
سجيه وهي تمسك يد أمجاد:لا من جد خفتي علي
أمجاد وهي تلف عنها:وش يفكنا منها الحين يا ربي
سجيه وهي تحضن أمجاد:يا بعد عمري يا أبو المجد خفت علي
أمجاد وهي فيها الضحك:وخري يا هبلا
سجيه:هههههههه يا حبي لك يا أبو عيون وساع
أمجاد وهي توخر سجيه:سخيفه
بانه:هههههه مجانين
يزن بصوت عالي:بما إن الجميع هنا وين تبغون نروح أول
أم يوسف:الأسود
أم سلطان:لا يا وخيتي التماسيح
الجده:لا ذي ولا ذي انا أقول الفراشات
الكل:هههههههههههه
مدى:كثري منها يا أم الجدد أموت على الفراشات المنقرضه اللي تعرفينها
الجده:اسكتي يالمطروده
الكل:هههههههه
مقعد:خلاص مثل ما قالت جدتي قسم الحشرات
الكل:زين – ماشي
راحوا كلهم
هبه وهي جنب روابي:يا لبيه يهبلون صغار
روابي وهي تأشر:وش اسمها ذي لونها حلو سبحان اللي خلقها
رواء وهي تعدل نظاراتها وتشوف اللوحه:اعتقد إن اسمها دعسوقه وهي نوع من الخنافس
سجيه:أموت على الاحمراني المنقط بالأسود ودك تجيه النعال هههه
مدى:دعسوقه ههههه وش هالاسم المسخره
دانه وهي شايله بسام:الله شوف بسومي
بانه وهي تطالع :ههههههه صغيره وتهبل
بسام:يع حشره جراده
دانه:هههههه هذي اسمها أبو النطيط
بانه:أبو النطيط يعني كله تقفز مثلا
دانه بضحك:يمكن
الجده:هووو وش ذا صراصير مجمعه
الكل:هههههههههههه
يزن:وش صراصيره يا جده ما هيب صراصير
الجده:هجل وشو ذا وبعدين إحنا في البيت نلحقهم ببف باف وهذول يجمعونهم
سجيه:هههههههههه جدتكم رايحه فيها مره
التقت عيونها بعيونه فلفت وجهها بسرعه وهي ساكته
مقعد:هذا اسمه أبو مقص
الجده وهي تلوي فمها:وش عرفني في مقص ولا ورقه أقول خلنا نطلع بس
طلعوا من قسم الحشرات
مازن وهو يطالع لولوه:وش رأيكم نروح قسم الطيور
رؤيه بهمس:ردي الحبيب يسألك ما ظنتي يسألنا
لولوه:انطمي بلا سخافه واحراجات مالها داعي
دانه اللي تسمعهم:هههههه
الجده:يله خلنا نروح نشوف العصافير والدجاج
مدى:دقه قديمه أم الجدد دجاج مره وحده
أسير:ههه شكلها تذكرت العشه يوم تقابل جدي عندها ورسايل العشق و الغرام
دانه:ههههههههه حرام عليكم كله إلا الغاليه لا احد يغلط عليها
أم سلطان:عيب يا بنات
وصلوا لجهة الطيور
هبه:الله شوفوا ألوانه روعه
روابي:إيه والله يجننون
رواء وهي تأشر: شوفو الهدهد
دانه:سبحان الله ولا الطاووس شوفو ألوانه خيال
بانه:إيه والله خيال سبحان الخالق
بسام:صقر
بانه:ههههههههه إيه صقر
سجيه وهي تدقق النظر:وع يحوم الكبد وش ذا
مدى وهي تطالع:ههههههههه وش في ذا شكله كذا
دانه:استغفروا ربكم لا تعيبون
سجيه:شوفي شكله بس هذا طير على بالي منظفه غبره ولا ليفة مواعين
مدى وأسير:هههههههههههههههه
الجده وهي تضحك:الله يقطع إبليسكم
طالعها وبهمس:تركتي خلق الله البشر ورحتى في الحيوانات ما في احد يسلم من هالمنشار
سجيه طالعته وهي معصبه وهو تجاهلها ومشى وخلها تغلي وتفور
انتبهت إن الكل علق إلا هي طول الوقت ساكته وتفكر
بانه وهي تحط يدها على كتف أمجاد:أمجاد
لفت لها وصحت من شرودها:ها بغيتي شي
بانه:وش فيك
أمجاد وهي تبتسم:ولا شي
بانه:أكيد أشوفك ساكته
أمجاد:أكيد وكافي سجيه شايله السوالف كلها ما قصرت مافي ازعاجها
بانه وهي تضحك: طيب
رجعت تطالع الحديقة وشردت من جديد وتتنهد من ضيق الذكريات اللي ما تركتها من يوم جات السعوديه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك