رواية ويبقى خالد -30
البارت الثالث و الثلاثون :
بـ المخيم :
وليد : بابااا شوف بقي ابي الكب ( اركب )
خالد : يلا الحين نركب انا معاك
وليد : لا لا ابي بلوحي
خالد : شلون تركب بروحك هذا كبير ما تعرف تسوقه
وليد : انا كبيل اعلف ( كبير \ اعرف )
خالد : لا بابا ماتسوقه بروحك ، تعال يلا نركب
و ركبوا البقي و وليد كان حيييل مستانس ، خصوصا ان خالد يسوق بسرعه فـ الوناسه تزيد ،
و عند الحريم بـ الخيمه :
وليد : مامااا لكبت ( ركبت ) البقي مع باباااا
اسراء : اي شاطر اركب مع بابا مو بروحك
وليد : انزين
وليد : حللللة ( حررررة ) لونق ما لكبت البقي
فاطمه : امبيه هذا من صجه يغار ؟
اسراء : شفتي ؟
فاطمه : اصلا رونق صغيره ما تركب البقي
وليد : لانها بيبياا انا كبييل ( كبير ) صح ماما ؟
تنهدت اسراء : صح
وليد : ماما منو احلى انا ولا لونق ؟
فاطمه : رونق احلى
وليد : اصلا انا قلت حق ماما صح ؟
اسراء : ولييد عيييب
فاطمه : صاير شيطان مع الويه
وليد : شوفيها ماما تقولي مع الويه
اسراء : واي واي وليد بس
و بجت رونق
اسراء : واي حبيبتي شفيج ليش تبجي ؟ ( شالتها و حطتها بحضنها )
وليد : ماما ابي اقعد بحضنج ؟
اسراء : لا حبيبي بس انتا صرت كبير ما تقعد بحضني صح ؟
وليد : ---
اسراء : عفيه على ولدي الشاطر ، الي يحب اخته
فاطمه : وليد تحب رونق ؟
اسراء : ايي يحبها وايد ، لانها اخته صح ؟
وليد : --
فاطمه : تحبها ولا لا ؟
اسراء : فطووم تكفين بس ، ترا يبجي الحين
فاطمه : وااي احسه متحسف يقول اي احبها
اسراء : عيزت وانا احببه بـ اخته ، ماكو فايده فيه ..
خالد : شلوونكم
الكل : الحمدلله
خالد : اوه اوه رونق قاعده ، عطيني اياها
قام وليد من مكانه شوي شوي من غير محد يحس فيه و طلع بره و قعد يلعب مع ناصر و يوسف ..
طلع وليد و قعد يلعب مع ناصر و يوسف و بعدين دشوا يتغدون ماعدا وليد الي ظل بروحه برة
اسراء: خالد ؟ وليد ويين؟
خالد : يمكن بره يلعب مع اليهال
اسراء: اي يهال ماكو احد بره كلهم هني
يوسف: وليد بره قاعد بروحه
خالد: بروحه؟ شسوي بروحه ؟
يوسف: قال مابي ادش داخل
اسراء: خالد روح شوفه خـ ايي يتغدى
خالد: يلا يلا الحين اقوم اشوفها
و عقب ماقام و غسل طلع بره يدور وليد
خالد: وين راح هذا .. ماكو احد هني
ظل خالد يمشي و يدوره و مالقاه .!
خالد: وين راح يعني !
وعقب ما مل من كثر ما يدور رد الخيمه ..
و بطريجه للخيمه شاف البقي منقلب و تحته وليد !!
خالد : وليد !!
.........
خذاه و بسرعه طاار فيه لـ اقرب مستشفى ، حس ان ولده خلاص ماات، لا صوت ولا حركه و الدم منتشر على ويهه و هدومه متشققه ، حس بالخوف و زااد سرعته لما وصل للمستشفى ...
بـ المخيم :
اسراء : مايصير جذي يعني لا وليد ولا خالد ! وين راحوا !!
فاطمه :هدي هدي شوي ، اكيد راح يدوره
اسراء : صارله اكثر من ساعه الحين ! اخاف صار فيهم شي!
فاطمه : لاتخافين ماكو الا العافيه .. شبصير يعني
اسراء: و الي قاهرني اكثر انه مايرد على فونه ، يعني اكيد صاير شي و مايبي يقولي
فاطمه : ماكو الا الخير ان شاء الله قعدي انتي بس و ذكري الله
تنهدت حييل : لا اله الا الله
بـ المستشفى :
خالد : دكتور طمني عليه !
الدكتور : لا مافي شي الحمدلله مجرد كسور بسيطه و جروح و نزيف خفيف
خالد : كل هذا و مافي شي ! شفيك الله يهداك
الدكتور : حالته الحمدلله مستقرة ، و قدرنا نسيطر على الوضع
خالد : ابي اشوفه
الدكتور : تفضل
دش خالد و لقى وليد منسدح ع الفراش و ايده اليمين مجبسه و ريله اليمين مجبسه و لافين راسه و لقى اثر كدمات منتشرة على كل جسمه ...
وليد و الدموع تنزل من ويهه الطفولي : بابااا
خالد قرب منه و باسه على خده و مسك ايده : نعم حبيبي
وليد : شنو هذا الابيض الي على ايدي ؟
شافه خالد و تنهد : هذا حاطينه عشان ايدك تصير زينه و تطيب
وليد : وين ماما ؟ ابيها
خالد : ان شاء الله بعدين بتيي ماما
وليد: بابا ابي الوح البيت مابي اقعد مني
خالد: ان شاءالله بتروح البيت و بتلعب و تستانس بس لازم تقعد هني شوي ، شفت شنو صار فيك ؟ لانك ماسمعت الكلام و رحت و سقت البقي بروحك ؟
بدا يبجي : خلاص بس مالاح اسوق البقي بلوحي
خالد : عفيه ع الشاطر
ورن فون خالد ، تنهد و رد
خالد: الو
اسراء: خالد ! انتا ويين !! و وين وليد ؟!
خالد : هدي هدي شوي و بقولج كل شي
اسراء : قول يا خالد خرعتني وقف قلبي عليك انتا و ولدك
خالد : انا بالمستشفى مع وليد ، لقيته طايح من البقي و بسرعه وديته المستشفى
اسراء انصدمت و دمعت عيونها : يمممه ولدي !! شفييه وليييد شصارله !!! عطني اياه بكلمه
وليد و صوته ممزوج بالدموع : ماماا
اسراء بجت اكثرر يوم سمعت ولدها يبجي : هلا حبيبي هلا مااماااا ، شلوونك حبيبي زيين ؟
وليد : ايدي تعولني و ليلي بعد و حاطين عليهم شي ابيض
اسراء : يابعد عمررري انتاا واللله ، ليش حبيبي جذي شسويت انتا ؟
وليد : طحت من البقي
حست قلبها يتقطع : ليش حبيبي ماتسمع الكلاام ( تنهدت ) عطني بابا
خالد : الو
اسراء : خالد ليش مادقيت علي و قلتلي ؟ يعني ماتدري اني احاتيكم ؟
خالد : ماكنت ابي اخوفج
اسراء : انزين تعال اخذني ابي اشوف ولدي
خالد : شلون اييلج و اخليه بروحه ؟
اسراء : ميخالف بس شوي المهم اشووفه
خالد : يلا انزين الحين ياي
وليد: باباا ويين ماماا ابيها
خالد: الحين بروح اييب ماما ، انتا اقعد شويه هني و الدكتور يقعد معاك انا بروح شوي اييب ماما و ايي انزين ؟
وليد : مابي اخاااف اقعد معاي
خالد : حبيبي بس شوي اييب ماما و ايي مرة ثانية
وليد : ابي الوح معاك
خالد : يا يبه مايصير ، اقعد شوية و انا بقول حق الدكتور يقعد معاك و يشغل لك التلفزيون عشان تشوف بباي على ما ايي انزين ؟
وليد : بس شويه لووح
خالد : اي حبيبي بس شويه .. مو تبجي انتا بطل قوي
و راح خالد و ظل وليد بالغرفه مع السستر الي شغلتله التلفزيون و عطته العاب و سولفت معاه ، استانس شوي بس كان ناطر امه و ابوه ايون ..
رجع خالد بسرعه المخيم و خذا اسراء و راحوا المستشفى ..
اول ما شافت ولدها دمعت عينها .. قربت منه و لمته حيييل و باسته : يا بعد عمري والله ، ليش حبيبي تسوي جذي ليش
وليد : ماما شوفي يعول ( يعور )
اسراء : اسم الله عليك حبيبي ، وين يعورك
أشر على ايده و ريله و راسه
اسراء : بعد عمري ، ميخالف شوي و يطيب و تصير مثل اول قوي
ظلت معاه بـ المستشفى يومين ، حس وليد انه قريب حيل من امه ، و انها تحبه و تهتم فيه مو بس تهتم بـ رونق ، اما رونق فـ كانت عند ام عبدالعزيز لما تحسنت حاله وليد شوي و طلع من المستشفى ،
و مع الايام شوي شوي بدا وليد يحب اخته و يلعب معاها ، ارتاحت اسراء و خالد بعد .. و افتكوا من غيره وليد الي مالها حد .. صار ما يقدر يفارقها و على طول معاها ، استانست اسراء حيل من هالشي ..
عاشوا حياة سعيده من غير مشاكل ، حسوا انهم كبروا شوي و راحت ايام اول ايام ، كبروا اليهال و كانوا حيييل قراب من خالد ، يحبونه بشكل جنوني .. و خصوصا رونق الي ماكانت تفارق ابوها ابد ، دلوعه ابوها و طلباتها اوامر ،
بـ غرفه خالد :
خالد : شرايج نسافر ؟
اسراء : حلو ، صج اليهال محتاجين سفر عقب المدرسه
خالد : وين بتروحون ؟
اسراء : اممم .. وليد يحن يبي اسبانيا
خالد : و رورو وين تبي تروح ؟
اسراء : مادري عنها
وليد + رونق : بووووووووووووو !
اسراء : بسم الله ! ماتعرفون تدخلون بهدوء ؟!
قربت رونق من ابوها و قعدت يمه و حطت ايدها ورا ظهره و باسته
خالد : هلا هلا هلا بـ رورو حبيبتي
رونق : هلا فيك باباتي
خالد : سمعوني .. قررنا نسافر ، وين تحبون تروحون ؟
وليد : انا ابي اروح اسبانيا ، بروح ملعب مدريد
رونق : لا لا لا انا ابي اروح فرنسا
وليد : لا أسبانيا
رونق : فرنسا
وليد : اسبانيا
رونق : فرنـ ...
قاطعتها اسراء : بسسس !
خالد : مايصير جذوا اتفقوا على مكان واحد
رونق : باباااتي انا ابي اروح ديزني لاند ابي العب
وليد : وانا بروح ملعب مدريد و بصور مع اللاعبين
رونق : انا ما احب الكرة و المباريات و اشياء الصبيان ، بابااتي فررنساا
خالد : خلاص نروح اول اسبانيا و فرنسا
رونق : وناااسه ، متى بنسافر ؟
خالد : بعد اسبوعين
وليد : اللله ! عشان اروح مباراة هناك
اسراء : انزين انزين ، الحين الساعه 11 شمقعدكم ؟ قوموا ناموا يلا
رونق : ماماتي تو النااس
اسراء : لا مو تو الناس ، قومي نامي مابيج تسهرين
رونق : ان شاء الله
قربت من امها و ابوها و باستهم على راسهم طلعت ،
وليد : يبااا بتخليني اروح المباراة صح ؟
خالد : يصير خير بعديين ،
وليد : تصبحون على خير
خالد + اسراء : و انتا من اهل الخير ،
بيت خالد :
كانت رونق مندمجه تشوف الفلم يالها وليد من وراها و خرعها
وليد : بوووووووو !
رونق : واااي وليد يا سخفك !
وليد : انا السخيف ؟
رونق : اي انتا في غيرك ؟
وليد : سخيف ها ؟ اوريج انزين انزين
رونق : شتوريني صورتك
سكت شوي و سكر التلفزيون
رونق : هيييي ليش تسكره ! ماتشوفني قاعده اشوف الفلم !
وليد : عشان تعرفين شلون تقولين سخيف
رونق : اييي سخييف زييين .. يماااااااااااااااااااا
وليد : كاااك امي ماراح تسمعج
رونق : يماااااااااااا شوفي وليدووووووو
قرب منها و قرصها : منو وليدوو !
رونق : آآآي يا المليييق وخر عني .. يمااااااااااا
رونق: يماااااااا شوفي السخيييييف
وليد: لاتقولين سخيف لا اطقج الحين
رونق: يماااااااااا
ودش خالد و سمع الصراخ
خالد: شفيكم انتوا شهالصراخ الي واصل لي بره !
رونق قامت من مكانها و لصقت بـ خالد و مسكت ايده حييل: باباتي شوف وليد سكر التلفزيون و قرصني و قال بطقني بعد
وليد: و انتي قلتيلي يا السخيف
رونق: انتاا الي بديت
خالد: بس ! وليد ليش سكرت التلفزيون؟
وليد: كنت بلعب معاها
خالد: تلعب معاها تسكر التلفزيون؟
رونق: شفت بابااا اهوا الي بداا (سوت روحها تبجي و لمت ابوها )
خالد: بس خلاص لاتبجين، وين امج؟
رونق: بدارها
خالد: انزين يلا مابي اسمع ولا كلمه بروح ارتاح لما يصير وقت الغدا، وان سمعت صراخ ماكو سفر
بـ غرفه خالد :
اسراء: خالد ياي متأخر اليوم
خالد: رحت حجزت تذاكر حق السفر
اسراء: ايي متى السفر؟
خالد: مالقيت حجز بعيد شوي، حجزت حق بعد اسبوع ونص
اسراء: جنه مبجر ؟
خالد: شسوي ماكو حجز
اسراء: يلا زين .. يلا غير ملابسك على ما احط الغدا
و على الغدا :
وليد: قومي ليش قاعده مكان ابوي؟
رونق: كيفي ابوي يحبني
وليد: والله ؟ يحبج؟
رونق: ايي حرره
وليد: وااي يا ملقج ، صج ياهل
خالد: انا شقلتلكم؟ ليش تتهاوشون!
وليد: هذي الياهل
رونق: اسكت يالمليق
ظل خالد واقف ينطر رونق تقوم من مكانه
رونق : باباااتي ليش واقف؟ اقعد
خالد: ناطر الملكه رونق تقوم من مكاني
رونق: حرة انا ملكه باباتي قااال
وليد: اففف صج صج ياهل
خالد: بتسكتون ولا شلون؟ ترا احلف وما اسفركم
اسراء: بسكم عن الشطانه، ابوكم حجز ترا و كلها جم يوم و نسافر
رونق: صج بابااااتي! بنروح ديزني لاند؟
خالد كان ياكل و مارد عليها
دمعت عين رونق و ظلت ساكته وما كلت،
اسراء: رنوقه ليش ماتاكلين؟
رونق بـ صوت اختلط مع الدموع: مابي اكل مو يوعانه
حس فيها خالد: تعاالي تعالي رورو اكلي
راحت و لصقت بـ ابوها : ليش مارديت علي مساع
خالد: يا يبه تشوفيني قاعد آكل شلون ارد عليج؟ يلا بس مسحي دموعج و اكلي ، و بوديج ديزني لاند
رونق : صج ! ونااااسه
اسراء: انزين يلا اكلي انتي الحين
وليد بصوت واطي ماينسمع: اففف يا المدلعه
بيت بو عبدالله :
فاطمه: ها متى السفر؟
اسراء : عقب باجر ان شاء الله
فاطمه: بالسلامه ان شاء الله
اسراء: الله يسسلمج، و انتوا متى بتروحون استراليا؟
فاطمه: وراكم الاسبوع الياي
رونق: مامي وين باباتي؟
اسراء: بره بالحديقه
رونق: بروح اقعد معاه
اسراء: ليش ؟ قعدي هني مع حصه
رونق: ابي ابوووي
تنهدت اسراء: روحي
فاطمه: رنوقه وايد تلصق بـ ابوها
اسراء: اي من كثر ما حن علي ابي بنت ابي بنت يتله بنت ٢٤ ساعه لاصقه فيه
فاطمة: اي والله من كثر ما حن
البارت الرابع و الثلاثون و الاخير :
و يوم السفر :
خالد : اووه نسيت شي ، انا بطلع شوي و ايي
اسراء: شنسيت بعد؟
خالد: شغله ضرورية بروح اشتريها و ايي
اسراء : انزين بس لا تتأخر
خالد: ان شاء الله، على ما ايي القاكم جاهزين عشان سيده نروح المطار
اسراء: ان شاء الله ، لا تتأخر
رونق: وين راح ابوي؟
اسراء: عنده شغل
رونق:ويي بعدين تطير الطيارة
اسراء: لا ماراح تطير لاتخافين
رونق: انزين انا بروح اشوف تلفزيون على ما ايي ابوي
ظلت تشوف تلفزيون حوالي الساعتين و وليد كان قاعد معاها ..
وليد: يمااا يلا ابوي متى بيي؟
اسراء: مادري والله تأخر ، المفروض نكون بالمطار الحين
وليد: دقي عليه
اسراء: كاني بدق .. طوط طوط طوط ( المشترك لا يرد) !
اسراء : مايرد مادري شفيه
وليد: انا بدق يمكن يرد علي ( دق و مارد)
مايرد
اسراء: الله يستر، قالي ماراح أتأخر..
رونق : يلاا يماا ابوي متى بيي
اسراء : مادري ! قعدوا نطروا
رونق : بدق عليه بشوفه
وليد: دقينا قبلج و مارد
رونق: انا ايدي حلوة يرد
وليد: نشوف الايد الحلوة
دقت و ظلت تنطر تنطر ( المشترك لا يرد)
رونق: ليش مو قاعد يرد !
اسراء و التوتر باين عليها: سكتوا بسسس
اسراء بـ قلبها : ياربي تأخر .. ان شاء الله مافيه الا الخير ..
وبعد ساعه ،
رونق: يماا بعد ساعه بتطير الطيارة و ابوي ليلحين ماوصل
وليد: اي يماا شنسوي الحين يعني
اسراء: ما ادري شسوي ! مادري وينه ابوكم قالي ماراح يتأخر و الحين صارله ٣ ساعات و ليلحين ماوصل..
تنهدت رونق : شرايج ندق على الشرطه؟
وليد: اي شرطه انتي بعد، وايد متأثرة بـ المسلسلات و الافلام
اسراء صرخت : خلااص بس سكتوا ! الي فيني كافيني ترا !!
سكتوا و صار الجو هدوووء ، و رن التلفون رونق : اكيد ابوي دق !!! انا بشيله
اسراء: خلييه انا بشيله .. الو؟
...:السلام عليكم ، هذا بيت خالد الـ .. ؟
اسراء بـ خوف : اي نعم ، خير ؟
...: ممكن تتكرمين و تيين المستشفى ؟
اسراء بخوف و نبضات قلبها تزيد تزيد : خير شصاير !!
...: لي ييتي ان شاء الله بتعرفين كل شي
دقت على عزيز بسرعه و خذاها و راحت المستشفى ، و طول الطريج تدعي و تفكرر و تحاول تمسك دموعها ...
بـ المستشفى :
عبدالعزيز : خير دكتور ؟ شفيه خالد؟
تنهد الدكتور : مادري شقولك ، لا حول ولا قوة الا بالله
خاف عبدالعزيز : دكتور شصاير ،
الدكتور : توفى .. عظم الله اجركم !
عبدالعزيز : !!!!!!!!!!!!!!!
سمعت اسراء كلام الدكتور و طاحت ع الارض !!
ماقدرت تتحمل الصدمه ! صارت لها صدمات وايد وتحملت لكن هالصدمه كانت غيرر ! غيررر عن كل الصدمات ... مو سهل لما تسمع خبر وفاة زوجها و تقاوم بقوة !!
مات الغرام ، و ماتت وروده ، عظم الله اجر كل الي يحبون
بيت بو عبدالعزيز :
بو عبدالعزيز : خالد مات !!! شلون !!!
عزيز تنهد بقوة : لا حول ولا قوة الا بالله .. الدكتور يقول حادث
ام عبدالعزيز منصدمه ماتدري شتقول : لا حول ولا قوة الا بالله !
عزيز : مسكينة اسور حالتها حاله
ام عبدالعزيز : وينها ختك الحين و وين عيالها !
عزيز : بالمستشفى .. و عيالها بالبيت
بوعبدالعزيز : قلتلهم ؟
عزيز : لا يبه خفت اقولهم ..
بو عبدالعزيز : روح ييبهم لاتخليهم بالبيت بروحهم يحاتون ، لا ام ولا ابو
بـ المستشفى :
الكل كان حوالينها و وماسك دموعه الا اهيا الي دموعها تنزل بغزارة ..
اسراء : يمه خالد ما مات صح ؟ قوليلي انه ما مات ! انا كنت احلم صح ؟ امبلاا اي حلم !
ام عبدالعزيز و اهيا لامه بنتها : بس يا يمه خلاص لا تعبين روحج
اسراء و الدموع ماليه ويهها : لا لا خالد ما مات .. انتوا كلكم تقصون علي خالد مافي شي ! الحين بيي و بنسافر بنروح نستانس !
ام عبدالعزيز : بس حبيبتي ترحمي عليه
اسراء بـ عصبيه و صراخ : خالد ما ماااااااات ! بروح اشوف خالد خليني اطلع !
اسماء : بس صلي ع النبي و ادعي له
اسراء : انتوا شتقولون شتخربطون علي ! كلامكم فاضي خالد اصلا مافي شي ! وخروا عني خلوني اروح اشوفه
ام عبدالعزيز : اسيل قومي نادي الدكتور !
،،
يالها الدكتور و شاف حالتها .. كانت حالتها حيل صعبه ،حاله هستيرية قويه ! ليلحين مو مستوعبه الخبر ، مصدومه و مو مصدقه الي صار .. عطاها الدكتور ابره مهدئه و نامت عليها ..
....
بـ عزا الريايل :
الكل كان متأثر و حزين ، و خصوصا جاسم الي ماكان مصدق الخبر و حيل متضايق ، لكن هذا قضاء و قدر و سنة الحياة ..
كان اللون الاسود ما يفارقها ، دموعها تنزل بسرعه خياليه و تمسحهم و ينزلون اكثر ..
الكل يمها يهديها ، امها و خواتها و خالتها و ريم و فاطمه و عايشه و صديقتها دلال .. هذا كان حال طول ايام العزا ،،
...
و بعدها ، امها ما خلتها بروحها و اصرت انها تقعد معاها في بيتها ، تجابلها و تجابل عيالها اليتامى ..
رونق و دمعتها تسيل على خدها الناعم : ابي اشوف امي
ام عبدالعزيز : شسوي بـ امج مو راضيه ، قاعده بـ الغرفه بروحها و ماتبي احد يشوفها
رونق : بس انا بنتها و ابيها ، يعني اعيش جذي من غير ام ولا ابو ؟
غورقت عيون ام عبدالعزيز و خذت رونق و لمتها : بتهدى ان شاء الله و بتشوفينها
رونق : الله يرحمك يا يبا ، ليش رحت و خليتنا بروحنا كلنا محتاجين لك
ام عبدالعزيز : بس حبيبتي لا تقولين جذي
اما اسراء ، فكانت بمعزل عن العالم كله ، من بعد العزا قعدت بـ الغرفه بروحها ، و اللون الاسود مسيطر عليها و الدموع ملازمتها 24 ساعه .. لا تاكل ولا تشرب ولا تطلع ولا حتى تشوف عيالها !
يت عينها على البرواز الي ع الدرج كانت صورتها مع خالد اول ما تزوجوا ، و البسمه مرتسمه على شفاتهم ، شافتها و خذتها و لمتها حييل ،
تنهد حيل و سالت دموعها : الله يرحمك يا خالد ، الله يرحمك
غمضت عيونها حيييل و مر عليها شريط حياتها ، تذكر ايام اول ، أيام الجامعه شلون كانت تكرهه خالد لما كان يلحقها ، يوم كان يتحرش فيها و تعصب ، فجأة طاحت بـ حبه و سلب قلبها و تفكيرها ، تذكرت يوم خطبها و تزوجت .. تذكرت كل الايام الحلوة وبجت اكثررر ...
بيت بو عبدالله :
عبدالله : يمه شخبار عيال خالد ؟
ام عبدالله تنهدت : الحمدلله
عبدالله : ما اشوفهم ايون هني
ام عبدالله دمعت عينها : مالهم خلق شي ليلحين ، ليلحين منصدمين و يبون ابوهم
عبدالله : الله يكون بعونهم ان شاء الله .. بعدين انا بمرهم و بطلعهم مع ناصر و يوسف ،
ام عبدالله : زين تسوي ..
بيت خالد :
رن التلفون و ردت ام عبدالعزيز :
ام عبدالعزيز : الو ؟
ام عبدالله : السلام عليكم
ام عبدالعزيز : هلا و عليكم السلام ، هلا ام عبدالله
ام عبدالله : شلونج ؟
ام عبدالعزيز : الحمدلله بخير ، انتي شلونج و شلون صحتج ؟
ام عبدالله : الحمدلله ، شلون اسراء و اليهال ؟
ام عبدالعزيز تنهدت : والله مادري شقولج .. اسراء حالتها حاله و ليلحين مو مستوعبه شي ، و كله قاعده بروحها ماتبي احد يشوفها ولا تبي تشوف احد ، لا تاكل و لا تشرب ولا شي .. حارمه نفسها من كل شي ، حتى عيالها ما تبي تشوفهم
ام عبدالله : لا حول ولا قوة الا بالله .. و اليهال ؟
ام عبدالعزيز : ميتين يبون يشوفون امهم .. لكن اهيا عنيده مو راضيه تشوفهم .. كاسرين خاطري وايد ، ( تنهدت )
ام عبدالله : ليش جذي يعني ، ليش ماتبي تشوفهم ؟ حرام محتاجين لها اهما الحين وايد
ام عبدالعزيز : مادري عنها مو راضيه ، راسها يابس و عنيده
ام عبدالله : اليوم عبدالله بـ يمر اليهال بياخذهم يطلعهم مع عياله ، خـ يتجهزون عشان يطلعون
ام عبدالعزيز : يزاه الله الف خير ، و يعطيه العافيه
ام عبدالله : ولو ، اهما عيال المرحوم
بـ غرفه اسراء :
سمعت اسراء صوت الباب ردت بـ صوت واطي : منو
ام عبدالعزيز : انا امج فتحي الباب
قامت بـ بطء كبير و فتحت الباب و قعدت ع السرير
تنهدت ام عبدالعزيز : لي متى يعني بتظلين جذي ؟ والله حرام الي تسوينه بعمرج
بجت اسراء : شـ اللي حرام يمه ، انتي مو قاعده تحسين فيني
ام عبدالعزيز : خلاص خالد مات ترحمي عليه و ادعيله ! مو تبجين و تحبسين روحج و تنعزلين عن العالم !
اسراء : ---
ام عبدالعزيز : خلاص انسي خالد انسي
عصبت اسراء حيييل : يمه انتي شتقولين !! تعرفين انتي شنو يعني خالد ؟! خالد يعني حياتي ! يعني دنيتي و روحي و قلبي و كل شي .. انا ما اسوى شي من غير خالد ما اسوى !! خالد كل شي كل شي يا يمه كل شي .. ( ماقدرت تكمل اكثر و بجت اكثر )
لمته امها حيييل و نزلت دموعها : بس يا يمه بسس خلاص لا تعورين قلبي اكثرر
اسراء : يمه ابي اموت و افتك من الدنيا ، ماله داعي اعيش خلاص
ام عبدالعزيز : لا يمه لا تقولين جذي ، كلنا نبيج و محتاجين لج
ظلت اسراء تبجي و امها تهديها ..
ام عبدالعزيز : عيالج يبونج لا تحرمينهم من حنانج ، مشتاقينلج وايد
اسراء : يمه ما اقدر ما اقدر اشوفهم
ام عبدالعزيز : ليش ! عيالج ترا !
اسراء : كل ما اتذكرهم اتخيل خالد جدامي .. اشم فيهم ريحه خالد ، ما اقدر يا يمه ما اقدر
ام عبدالعزيز : شـ هالكلام الفاضي ! هذول عيالج و لازم تشوفينهم و تهتمين فيهم ، مثل ما انتي محتاجه خالد حتى اهما محتاجينه اكثر منج ، ومحتاجينج و انتي ماتدرين عنهم صارلج اسبوعين
اسراء : يمه تكفين خليني بروحي .. مابي اشوف احد
ام عبدالعزيز : ماكو فايده ، عنيده .. بس حبيت ابلغج ان عبدالله بمر ياخذهم و يطلعهم مع عياله
اسراء : ---
بـ غرفه رونق :
وليد : رونق بنطلع مع سويف و ناصر
رونق : مابي اروح
وليد : ليش ؟
رونق : انتوا كلكم صبيان انا اروح معاكم شسوي ؟
وليد : انا معاج
رونق : مـ ...
و رن فونها
رونق : الو
حصه : شلونج رورو
رونق : زينة
حصه : خالي عبدالله بطلعكم و انا بيي معاكم عشان اقعد معاج
رونق : حصه مالي خلق اروح
حصه : ليش ؟ انا بيي معاج عشان نستانس
تنهدت رونق : انزين
حصه : يلا قومي لبسي الحين عشان شوي و بنمركم
رونق : انزين ..
وليد : شتقول حصه ؟
رونق : بتيي معانا
وليد : يالله زين حصلتيلج بنت ،
رونق : انزين بروح
ام عبدالعزيز : يلا حبيبتي رونق خلصتي ؟
رونق : يلا كا شوية بس
ام عبدالعزيز : ها وليدان خلصت ؟
وليد : اي
ام عبدالعزيز : يلا عمكم ياي بالطريج ..
و يا عبدالله و خذاهم و وداهم الالعاب و شرالهم الي يبونه .. استانسوا شوي و فرحوا و ارتاح عبدالله لما شاف البسمه على ويوهمـ ..
و اسيل و اسماء ما نسوهم بعد .. كانوا على طول ياخذونهم و يطلعونهم و يونسونهم و يشترولهم الي يحتاجونه .. ماخلوهم يحسون بـ النقص ،
بـ غرفه اسراء :
كانت قاعده كـ عادتها بروحها .. ماتبي تشوف احد ، سمعت صوت الباب و لا ايرادي قالت ادخل !
دخلت رونق و وراها وليد و شافوا امهم من بعييد و ظلوا واقفين ..
شافتهم اسراء و دمعت عينها ، حست انها محتاجتلهم وااايد
اسراء و الدمعه تنزل من عينها : تعالوا حبايبي
ركضوا حيييل و لمتهم
اسراء : اشتقتلكم حيييل
رونق + وليد : احنا اكثرر يمه
رونق : ليش خليتينا بروحنا ، ليش ماتبين تشوفيناا
اسراء : ماخليتكم ، انا احبكم و ابيكم و محتاجتلكم حييل
وليد : احنا اكثرر
و شوي شوي ، صارت ما تفارقهم و كله معاهم .. تعوضهم عن الايام الي طافت .. حسوا بـ الحنان و الحب ، صارت لهم الام و الابو و كل شي ، كل شي كان متوفر لهم ، تحسنت حالتها و حالتهم مع مرور الايام ، و عاشوا حياة حلوة .. لكن يبقى خالد له مكانه في قلوبهم ..
و اخيرآ ... و يبقى خالد
خالد ، هو الانسان الي حبيته ، خليته بـ قلبي خالد و خبيته
تمت ..
همسه : اتمنى محد يزعل لان القصه حزينة .. بس لو كانت سعيده ماراح يكون لها معنى ( وجهه نظر ! )
و اوعدكم بـ قصتي القادمه تكون النهايه سعييده ،
شكرآ
sweet memy
تجميع :- silence queen
اللهم لك الحمد حتى ترضى وإذا رضيت وبعد الرضى ,,, اضف تعليقك