رواية ويبقى خالد -7
نور انصدمت من كلام امها : سافلت !
اسماء : اي يمه سافرت
نور بدت تبجي ، ليش تسافل انا ابيها احبها
اسيل : وليييييه الحين يوم سكتنا امي بدت بنتج تبجي ، شهالحب
نور بصراخ : ابي خالتي اسلاء احبها بلوح عندها
اسماء : ان شاء الله لما تيي بتشوفينها و تقعدين معاها بعد بس سكتي صدعتي راسي بصراخج ،
في الطياره :
عقب مده صحت اسراء من نومها ،
خالد ابتسم لها : شبعتي نوم حبي ؟
رفعت راسها و عدلت نفسها وبصوت ناعم و متقطع : الحمدلله
خالد مد ايده و دخل خصله كانت طالعه من شيلتها ،
خالد : تهبلين بالحجاب
اسراء بحيا : هذا بس عشانك
خالد اكتفى بـ ابتسامه ،
وفجاه حط ايده على راسه و غمض عيونه ، خافت عليه اسراء ،
اسراء بخوف : خالد حبيبي فيك شي ؟
خالد : لا لا ماكو شي ،
اسراء بـ اهتمام كبير: اكيد خالد ؟ ماكو شي ؟
خالد : اي حبيبتي لاتحاتين ، بس صداع خفيف من حركه الطياره
ارتاحت اسراء شوي : سلامتك
خالد : الله يسلمج
بيت بو عبدالله :
الكل كان متيمع بالصاله ،
فاطمه : والله البيت من غير خالد ما يسوى ، مشتاقتله والله ،
عبدالله يتنهد : الله يسعده ان شاء الله
ام عبدالله : بعد عمري وليدي ، يالله الله يوفقه مع زوجته ،،
ريم بتعب : عبدالله ، احس بتعب شوي
عبدالله خاف عليها : شفيج ؟ تبين تروحين المستشفى ؟
ريم : لا لا ماله داعي المستشفى ،
عبدالله : قومي قومي ، ايي صح تذكرت اليوم مراجعتج ، قومي يلا لبسي علشان اوديج
ريم تتنهد : ان شاء الله ،
فاطمه : سلامتج ماتشوفين شر
ريم : الشر ماييج
فاطمه : يالله روحي علشان ما يصير بالبيبي اليديد شي
ضحكت ريم ضحكه خفيفه و راحت تغير ملابسها ،،
وعقب ما غيرت ملابسها طلعت مع عبدالله و راحت المستشفى ،،
الدكتور : الحمدلله مافيها الا العافيه ، بس حاولي ماتتحركين وايد بالبيت
عبدالله : مشكور دكتور
الدكتور : الف سلامه ،،
و عقب ما طلعوا من الدكتور ،
عبدالله : سمعتي الدكتور ؟
ريم : اي سمعته
عبدالله : لاتتحركين وايد ، ولاتحوسين ولاتدخلين المطبخ
ريم : ان شاء الله ،
في الطياره :
الرجاء الاستعداد للهبوط ، اربطوا احزمه الامان ،
خالد : حبيبتي يلا وصلنا ، شوي و ننزل
اسراء : خالد انا خايفه
خالد ضحك : تخافين بعد من النزله ؟
اسراء بحيا : اي اخاف
خالد حاول ان ما يضحك عليها : اوكي حبيبتي ، ( و مسك بـ ايدينها و قربها منه و حست بالامان و حس بالراحه )
وبعد فتره قصيره ،
خالد : يلا حبيبتي مشينا ، تحرري من الطياره ،
اسراء تتنهد : يلا
نزل خالد و مسك اسراء حييل ، كان حيل مستانس لانها معاه ، و الفرحه باينه عليه
ظلوا بالمطار لما طلعت الجناط و طلعوا من المطار ، و كان الجو باارد في باريس ،،
خالد : بارد الجو صح ؟
اسراء : اي بارد شويه
خالد : يلا الحين نروح الفندق تدفي و ارتاحي
اسراء ابتسمت لـ خالد ،،
ركب خالد تاكسي مع اسراء و راحوا الفندق ،،
و اول ما وصلوا الفندق ،
خالد كان تعبان شوي من الطياره و راسه مصدع وكان محتاج للراحه و النوم ، اما اسراء الي كانت مرتاحه و شبعانه نوم ،
خالد و التعب باين عليه : حبيبتي انا بنام شوي
اسراء و اهيا تشوف خالد مبين على ويهه التعب : نام حبيبي ، شكلك تعبان
خالد : و انتي ماراح تنامين ؟
ابستمت اسراء : لا ماراح انام ، برتب الملابس
خالد : اوكي ، يلا حبي بنام
اسراء : نوم العوافي ان شاء الله
فتحت اسراء الجناط و رتبت كل الاغراض بشكل حلوو ، و عقب الترتيب حست بالتعب ، غيرت ملابسها و نامت ،،
للعلم !
انا الكاتبه sweet memy في منتدى كويتيات ، و نزلت البارت الخامس هني قبل ;)
sweet memy
البارت السادس :
كان الجو حييل حلو في باريس ، بارد شوي و الهوا عجيب بالليل ، حلو حق اثنين توهم متزوجين ،
وعقب 3 ساعات ، صحى خالد من النوم و كان مرتاح و شبعان نوم ،
خالد : آآآه ، احس جسمي تكسر من النوم ، نمت وايد ،
حرك راسه يمين و يسار فوق وتحت ، حرك ايده غمض عيونه و خذا نفس عميق و فتح عيونه و طلع زفير قوي ، لف ويهه يسار لقى ملاك صغير نايم ،
خالد : بعد عمري نامت ، خليتها ترتب الاغراض و نامت
وبحركه خفيفه حط ايده على جتفها ،
خالد بصوت واطي : حبيبتي ؟
اسراء كانت نايمه و ماحست فـ ماردت عليه
خالد : حياتي نايمه ، ( قرب منها و طبع بوسه على خدها )
قام خالد و راح الحمام و خذاله شور دافي ينعش جسمه ، طلع من الحمام و لبس بنطرون جينز و قميص بولو روعه ، ونشف شعره و وداه لي ورى و خلاه معفس شوي ، طلع شكله روووعه حيل ، و رش عطر رجالي ارماني قوي حيل و لبس ساعته و طلع البلكونه و حط كرسي و قعد يشم هوا ،
خالد : الللله ، الجو واايد حلو ، يبيله تمشي الحين ..
حاول خالد يلهي عمره على ما تقعد اسراء و بدا يغني حق مطربه المفضل ، عبدالمجيد ، يا اغلى من روحي علي يا احلى شي و اغلى شي ان قلت احبك شفتها هالكلمه في حقك شوي ، قلبي الي من شوقه يجيك يغار من حبك عليك ، ما يحبك الا يموت فيك ، و يحسك اقرب مني لي ، يا اغلى يا اغلى يا اغلى من روحي علي ..
خالد كان صووته روعه حيل ، و عنده مقدره يقلد كل اصوات الناس ، و كان دوم يقلد صوت عبدالمجيد لما يغني ، بس ساعات يصك على عبدالمجيد ،،
وعقب فتره قصيره صحت اسراء من النوم ، لفت ويهها مالقت خالد ، اخترعت شوي ، لقت البلكونه مفتوحه و في صوت ياي منها ، نزلت راسها علشان تشوف ، لقت خالد قاعد على الكرسي ، و تطمنت ،،
قامت من الفراش و خذت لها شور دافي ، ولما طلعت لبست بنطرون جينز غامج شوي مع نفنوف لي الركبه ضيج شوي يبين جسمها ، لبست سكارف فوق النفنوف وحطت لها مكياج حلو عباره عن ايلاينر اسود و شدو خفيف اسود دخاني و حمره ورديه فاتحه و بلاشر وردي فاتح و اخر شي لمسه الماسكرا السوده الغامجه ، و لبست ساعتها الكرستان ديور السوده و رشت عطر نسائي بارد حلوو و لفت شيلتها بطريقه حلوه مرتبه و طلعت عند خالد البلكونه ،
خالد ماحس فيها ، كانت حركتها خفيفه حييل و ماتنسمع ، فجاه سمع خالد صوت ناعم حلو يناديه ،،
اسراء بصوت ناعم حلو : خالد
خالد ذاب من صوتها و لف ويهه : عيون خالد
اسراء استحت شوي و نزلت راسها ، و رفعته بعدين : تسلملي عيونك حبيبي
خالد شافها و انصدم ، و قال في قلبه ، حلوه و ربي حلوه ، يا بختي فيج ،
خالد : حياتي شرايج نقوم نتمشى ؟ الجو وايد حلو
اسراء : اي حلو ،
خالد : ها نمشي ؟
اسراء ابتسمت : نمشي
لبس خالد جوتي رياضه و لبست اسراء فلات و مسكوا بعض و طلعوا ،
راحوا يتمشون تحت بالفندق ، اسراء كانت تمشي و ودها تتكلم بس ماتدري شتقول ، خالد نفس الحاله ، لكن حاول يتكلم ،
خالد خذا نفس عمييق و زفير قوي و قال : الجو روعه وايد حلو
اسراء: اي وايد حلوو
خالد أشر على حمام السباحه الي يمه : شفتي حمام السباحه هذا ؟
اسراء: ايي شفته ؟
خالد : ودي اسبح فيه
اسراءابتسمت : خلاص ، باجر اسبح فيه ، و انا بقعد اشوفك و اخذلك صور
خالد : ما اقدر
اسراء استغربت و عقدت حواجبها : ليش ما تقدر ؟
خالد : ما اقدر اسبح و اخلي قلبي بروحه
استحت اسراء حييل و انصبغ ويهها باللون الاحمر و نزلت راسها
خالد : يا حلاة الي يستحون والله
اسراء زاد حياها و حبت تغير الموضوع ، شافت جدامها طفله فرنسيه وايد حلوه ، شعرها اشقر ناعم منسدل على عيونها و عيونها كانت زرقه على رماديه ، كانت لابسه نفنوف قصير حفر و تمشي مع امها ،
اسراء : يحليلها هذي البنت ، ماشاء الله حلوه
خالد من غير اهتمام : حلوه ، (و باهتمام ) بس مو احلى منج يا قلبي
اسراء ابتسمت ابتسامه صغيره ،
خالد : فديت هالابتسامه والله
اسراء بقلبها ( بس يا خالد خلاص ، ذبحتني من الكلام الحلو ما اقدر استحمل )
خالد : شرايج نروح نتعشى ؟
اسراء : حبيبي يوعان ؟
خالد : اي والله يوعان
اسراء: يلا عيل ، نتعشى
خالد : انتي يوعانه حبيبتي ؟
اسراء:اممم ، شوي
خالد : يلا عيل امشي نتعشى ،،
و مسك خالد اسراء و راح مطعم الفندق ، كان العشا عباره عن بوفيه مفتوح ،
خذا خالد صحنين حق و حق اسراء
خالد : بس اشري ع الشي الي تبينه و بحطلج اياه
اسراء بحيا : ان شاء الله
خالد كان يمشي واسراء وراه ماكانت تفارقه ابد ، و عقب ما حطلولهم اكل لقوا طاوله و كرسيين بوسط الطاوله مزهريه شفافه فيها ورده حمره حلوه مزينينها بـ بودره لمعه فضيه ، شكها كان وايد حلوو ،
و بدا خالد بالاكل ، كان وايد تكانه وذرب ، و اسراء كانت اكثر منه تكانه و ذرابه ، كانت مرتبه بكل شي ، حتى باكلها مرتبه ، كانت تاكل بهدوء و خالد يشوفها و سرحان فيها ، و متعجب من ترتيبها الزايد و ذرابتها الي مالها حد ، و فجاه قطع سرحانه صوت ناعم
اسراء: خالد حبيبي ؟
خالد صحى من السرحان : هلا حبيبتي
اسراء: ليش ماتاكل ؟ مو تقول يوعان ؟
خالد : ها ؟ اي ، اي ان شاء الله باكل
اسراء ضحكت عليه ضحكه حلوه و هاديه ماتنسمع
وبدا خالد ياكل ، كلى بهدوء تام ، رفع راسه لقى اسراء قاعده تتأمل ملامحه و تشوفه
خالد : شفيج حبيبتي
اسراء رفعت راسها و شافته و ابتسمت : ولا شي
خالد : خلصتي ؟
اسراء هزت راسها يعني اي
خالد : حياتي انتي ماحطيتيلج الا شويه اكل و ماكليتيه كله ،
اسراء : الحمدلله ، خليت مكان للحلو ، شوقني شكله
خالد : من قالج انج بتاكلين حلو ؟ الحلو ما ياكل حلو ، اخاف تاكلين يرتفع عند السكر
اسراء استحت و انحرجت حيل و نزلت راسها و حطت ايدها على حلجها
خالد : فديت الي تستحي والله ، يلا دامج تبين حلو قومي ، بس هاا ماتاكلين وايد ، اخاف عليج
اسراء اكتفت بـ ابتسامه صغيره و قامت
خذت صحن صغير و حطت لها قطعه صغيره من كيكه الفراوله و حبتين من الفراوله ، وخالد خذا قطعه صغيره من بلاك فورست و حبتين كرز ، و مسك ايدها و راح الطاوله ،،
خالد : close ur eyes and open ur mouth
اسراء: ok 7bebe
خالد خذا شوكه و حط فيها حبه كرز و حطاها بحلجها ،
خالد : فتحي عيونج الحين و اكلي الي بحلجج
اسراء كلت ، : يميي حلو طعمها الكرز
خالد بزعل : شدعوه و انا ما استاهل ؟
اسراء : لا طبعا تستاهل حبيبي
و خذت حبه فراوله و حطتها في حلج خالد
خالد : احلى فراوله كليتها بحياتي ، لانها منج طبعا
اسراء: اي بس مو انا الي مسويتها ؟
خالد : ادري ، بس انتي الي وكلتيني اياها ، من جذي حلوه
و عقب العشا راحوا مع بعض الغرفه ،
خالد : انا شبعااان نوم
اسراء: و انا بعد
خالد : الحمدلله ،
اسراء: خالد بتصل على امي ،
خالد : اتصلي حبيبتي ، اخذي تلفوني و اتصلي
اسراء: لا خله ، بتصل من تلفوني ،
خالد : لا ، اخذي تلفوني
اسراء ما حبت تعانده و خذت تلفونه و اتصلت على امها
في الكويت في بيت بو عبدالعزيز :
صوت التلفون ، ترن ترن ترن ترن
بو عبدالعزيز : الو ؟
اسراء بفرح : يبه ! شلونك يبه !
بوعبدالعزيز كان حييل مستانس يوم سمع صوتها : هلا يبه هلا ببنيتي الغاليه
اسراء بدلع شوي : هلا فيك يبه ، شلونك شخبارك ؟
بوعبدالعزيز : الحمدلله بخير ، انتي شلونج ؟ وشلون خالد ؟
اسراء : الحمدلله انا بخير (ولفت ويهه عند خالد و ابتسمت ) و خالد بخير بعد
بوعبدالعزيز : الحمدلله ، ها شلون فرنسا ؟ ان شاء الله مستانسين ؟
اسراء: اي الحمدلله ، مستانسين ، انتوا شلونكم و شلون امي ؟
بوعبدالعزيز : الحمدلله امج زينه و كلهم زينين
اسراء: عيل وينها امي ؟ مشتاقتلها
بوعبدالعزيز : امج طالعه الحين
اسراء: امم خلاص ، ادق باجر اكلمها
بوعبدالعزيز : اوكي
اسراء: يلا يبه مع السلامه ، وسلم عليهم كلهم
بوعبدالعزيز : الله يسلمج يبه ،
خالد : ها شلونهم ؟
اسراء كانت حيل مستانسه : الحمدلله كلهم بخير
خالد : الحمدلله ، يلا الحين دوري ، بشوف امي شخبارها
اسراء: اوكي انا بروح اغير ملابسي
خالد : اوكي
بيت بوعبدالله :
رن التلفون وام عبدالله كانت بالصاله و سمعت صوت التلفون ترن ترن ترن ترن وردت ،
ام عبدالله : الو ؟
خالد : قوه يمه
ام عبدالله بفرح : هلا يمه هلا بوليدي هلا بالغالي
خالد : شلونج يمه شخبارج ؟
ام عبدالله و الدمعه نزلت من عينها و تغير صوتها : الحمدلله يمه بخير ، انت شلونك وشلون اسراء ؟
خالد : الحمدلله بخير ،
ام عبدالله وتغير صوتها اكثر من الدموع : الحمدلله
خالد منصدم : يمه تبجين ؟؟
ام عبدالله : من الفرحه حبيبي من الفرحه
خالد : عسى ايامج كلها افراح ان شاء الله
ام عبدالله : بعد شلونكم ؟ شلون الجو عندكم
خالد : والله حلو برد شوي
ام عبدالله : اي خالد ما اوصيك عاد البس عدل
خالد : ان شاااااء الله يمه
ام عبدالله : عيل وين اسراء يمك ؟
خالد : لا يمه راحت تغير ملابسها
ام عبدالله : اها ، سلم عليها
خالد : ان شاء الله ، الله يسلمج
ام عبدالله : خالد نمت ؟ ولا ليلحينك تعبان من الطياره ؟
خالد : لا الحمدلله نمت و شبعت نوم و طلعنا تعشينا و تمشينا و تونا رادين
ام عبدالله : الحمدلله استانستوا عيل
خالد : اي الحمدلله استانسنا ،
ام عبدالله : خالد ما اوصيك ، دير بالك على اسراء ،
خالد : يمه لا تحاتين ، اسراء بعيوني
ام عبدالله : كفو والله وليدي
خالد بغشمره : يمه انا بديت اغار ،خايفه عليها اكثر مني ؟
ام عبدالله : هههه ، لا يمه والله مو قصدي جذي
خالد : عبالي بعد ، اوكي يلا يمه اخليج الحين ، اكلمج وقت ثاني
ام عبدالله : ان شاء الله حبيبي ، يلا مع السلامه
خالد : الله يسلمج
و غيرت اسراء ملابسها و راحت عند التسريحه و بدت تحط لها مكياج حلو قبل النوم ، كانت لابسه قميص نوم ناعم حيل لونه وردي فاتح ، حطت لها شدو وردي فاتح حيل و ايلاينر اسود يبرز عيونها ، و حمره ورديه فاتحه و بلاشر فاتح يعطي بشرتها لون حلو ، و اخر شي حطت الماسكرا ، فلت شعرها الناعم و صار شكلها روعه ،و رشت لها عطر حلو بارد و لفت ويهها و شافها خالد، و اول ما شافها تصنم بمكانه ، وقال في قلبه ، ملاك وربي ملاك مو بشر ، لا شعوريا قام من مكانه و راح لها ،،
خالد و عيونه ما نزلت منها : حبيبتي
اسراء بصوت ناعم : عيونها
خالد مايدري شقول : تسلملي عيونها، حياتي بتنامين الحين ؟
اسراء لفت ويهها يمين و يسار يعني لا ،
فهم خالد لغتها و ابتسم ابتسامه عريضه حلوه ، قابلت ابتسامته بـ ابتسامه صغيره و نزلت راسها ، و يوم نزلت راسها طاح شعرها على عيونها ، و بحركه خفيفه مد خالد ايده و رفع شعرها الناعم عن عيونها ، و رفعت راسها و شافت خالد ،
خالد : شعرج وايد حلو
اسراء بحيا : انت احلى
حبت اسراء تفتح موضوع يديد ،
اسراء: خالد شلون خالتي ؟
خالد : الحمدلله بخير ، تسلم عليج
اسراء: الله يسلمها
في الكويت و تحديدا في بيت شهد
ساره كانت تترجى شهد انها تطلع معاها و تنسى خالد ،
ساره : خلاص شهد قومي طلعي معاي و لاتضيقين خلقج
شهد و الدموع تنزل من عينها : ما اقدر يا ساره ما اقدر ، خليني هني احسن
ساره : مايصير يا حبيبتي ، انتي من خطب خالد ماطلعتي ، قومي نطلع نتمشى نستانس
شهد : ساره ولي يرحم والديج خلاص ، ماراح اطلع
ودخلت عليهم ام احمد ،
ساره : خالتي شوفي شهد ، مو راضيه تطلع معاي تغير جو
ام احمد : شهوده حبيبتي قومي طلعي و استانسي ، صارلج فتره مو طالعه كله حابسه روحج بالغرفه
شهد بضيق : يمه تعبانه مالي خلق اطلع ، مابي اشوف ناس
ساره : شفتيها خالتي ؟
ام احمد تنهدت : على راحتج يمه ، خليها ساره خليها ،
ساره : ان شاء الله خالتي
بيت بو عبدالعزيز :
بو عبدالعزيز : الا ما قلتلج ، مساع اسراء دقت
ام عبدالعزيز : اسراء دقت ! بعد عمري و ويني انا ؟
بوعبدالعزيز : كنتي طالعه
ام عبدالعزيز بلهفه: شلونها شخبارها ؟ والله اني فاقدتها حيل
بوعبدالعزيز : الحمدلله تقول مستانسه
ام عبدالعزيز : الحمدلله لك يارب ، عسى الله يوفقج يا بنيتي و يسعدج
في باريس عند احلى عروسين :
كان الوقت عندهم ليل ،
خالد : حبيبتي شكلج دايخه ؟
اسراء: شوي
خالد ابتسم : نامي حبيبتي
اسراء: و انتا ماراح تنام ؟
خالد : اذا بتنامين بنام
اسراء: خلاص عيل ، ننام مع بعض
خالد ابتسم و عجبته الفكره : يلا عيل ننام
و ناموا العروسين مع بعض و كانوا مستانسين ،،
الصبح الساعه 10 بتوقيت باريس
صحت اسراء من النوم ،
اسراء بصوت واطي ما ينسمع : آآه ، و نزلت راسها لي تحت و بعدين رفعت شعرها الناعم وحركت راسها يمين و يسار ، و قامت خذت لها شور دافي يصحصحها ، و عقب ما خلصت لبست نفنوف قصير لونه احمر و صبغت اضافرها بـ اللون الاحمر نفس لون النفنوف ، رفعت جزء من شعرها بربطه لونها احمر ، و اخر شي مكياج سريع عباره عن حمره لونها احمر و ايلاينر اسود حوالين عينها ، و بلاشر خفيف احمر فاتح ، وطلعت روووعه ،،
و صحى خالد من النوم ، اسراء حست بحركته ، و لفت ويهها ،
اسراء ابتسمت ابتسامه طفل صغير وقالت : صباح الخير
خالد شاف جدامه ملاك بملامح طفل بريء و ذاب يوم شافها : صباح النور حياتي
ظل خالد بمكانه و عينه على اسراء و ماتحرك ولا حركه ، ولا حرك ولا شي من جسمه ، ظل يتامل الملاك الي جدامه ، و قال بداخله ، سبحان ما خلق ربي ،
اسراء بصوت ناعم و بحيا : خالد
خالد ماحس ولا سمع شي و ظل ساكت
اسراء سكتت شوي و ردت و قالت : خالد
نفس الحاله مارد ولا سمعها ،
اسراء : خالد !
خالد صحى من السرحان و انتبه : هلا حبيبتي !
اسراء : وين رحت حبيبي ؟
خالد : ها ؟ لا لا ، اي ، مارحت مكان ، معاج معاج
ضحكت اسراء ضحكه حلوه و ابتسم لها خالد ،
خالد : ضحكتج حلوة
اسراء استحت و نزلت راسها و ماتكلمت ،
خالد : اليوم ماراح نروح نتريق بالمطعم ، بخليهم اييبون الاكل لي الغرفه
اسراء أيدت فكره خالد و ماعارضت ابد : اوكي حبيبي ، الي تشوفه
و ظلت عيون خالد تشوف اسراء مده ، و اهيا كانت حييل مستحيه و تغير لون ويهها للأحمر ، اما خالد الي كان حييل مستانس و فرحان لان اسراء جدامه ،،
و عقب دقايق اتصل على المطعم و طلب منهم اييبون الريوق لي الغرفه ،، و عقب دقايق وصل الريوق ،،
خالد : يلا حبي ، الريوق جاهز
اسراء :ان شاء الله خالد
و بدوا احلى عروسين ياكلون الريوق ، خالد كان ياكل و يشوفها و اهيا ميته من الحيا و منزله راسها ،،
اسراء: الحمدلله ، خلصت
خالد منصدم : خلصتي ! انتي ماكليتي شي !
اسراء: بس شفت الاكل و شبعت
خالد : لا لا جذي ازعل انا ، مايصير حبيبتي ،
اسراء ما حبت ترفض له طلب او تعانده بشي و كلت شوي بس عشان خاطره ،
في الكويت و تحديدا في بيت بو عبدالعزيز :
عبدالعزيز كان توة داش البيت و تعبان من الجو الحار الي بره ، و تفاجأ يوم شاف المنظر الي جدامه !! كان بو عبدالعزيز طايح على الارض ومايتحرك ولا حركه ،،
عبدالعزيز بخووف حييل : يبه !! يبه شفيييك !! ، حرك عبدالعزيز ايدين ابوه يمين و يسار و حاول يكلمه لكن ماكو فايده ،
عبدالعزيز بأعلى صوت : يمااااااااااااااا تعالي بسرعه
ام عبدالعزيز اخترعت و بسرعه طلعت من المطبخ و ركضت لي الصاله ، و انصدمت يوم شافت بو عبدالعزيز طايح على الارض ،،
ام عبدالعزيز :عزيز!! شفيييه ابوك شصايرله ؟؟
عبدالعزيز مايدري شقول : مادري يمه مادري !! ييت لقيته طايح على الارض
ام عبدالعزيز و الدموع تنزل من عينها : الله يخليك بسرعه قوم شيله ووده المستشفى !!
عبدالعزيز بخوف : ان شاء الله يمه ان شاء الله
ام عبدالعزيز : انطرني اييب عباتي و ايي معاك
عبدالعزيز : يالله يمه بسرعه لاتتأخرين ،،
و بسرعه خذا عبدالعزيز ابوه و طاار في المستشفى ، و طول الطريج كانت ام عبدالعزيز تدعي لـ زوجها ان الله يشفيه و يكون بخير ،،
ام عبدالعزيز و الدموع تنزل من عينها : يالله يمه بسرعه لانتأخر
عبدالعزيز بخوف و ربكه و كان اعصابه مشدوده : ان شاء الله يمه
و في المستشفى ،،
دخلوا بوعبدالعزيز الغرفه و كان الدكتور عنده و عبدالعزيز و امه ينطرون بره ، و يدعون له بالشفا و الخير ،،
في باريس عند العروسين :
خالد كان قاعد مع اسراء و يسولف معاها و فجأه سكتت اسراء و حطت ايدها على قلبها ،،
خالد خاف عليها و حس ان فيها شي ،
خالد عقد حواجبه : شفيج حبيبتي ؟
اسراء بخوف : مما فيني شي
خالد : لا فيج شي ، شكلج تغير مره وحده !
اسراء تنهدت حيل : خالد، نغزني قلبي ، احس ان اهلي فيهم شي
خالد : اسم الله على قلبج حبيبتي ، لا ان شاء الله مافيهم الا العافيه ، لاتخافين
اسراء بخوف و الدمعه شوي و تنزل من عينها : قلبي ما يجذب ، انا متأكده انا فيهم شي ، الله يخليك خلني اروح اتصل عليهم
خالد حاول يهديها : تفضلي حبيبتي التلفون و اتصلي عليهم
خذت اسراء التلفون بسرعه و اتصلت على البيت ،،
ترن ترن ترن ترن ترن ترن ( صوت التلفون )
كانت اسراء اعصابها مشدوده و خايفه ، عظت على شفايفها حييل و كانت تنطر احد يرد على التلفون ، لكن ما لقت اي اجابه ،،
خالد : ها حبيبتي ؟؟
اسراء بخوف وتوتر : محد يرد
خالد بدا يخاف لكن حاول يطمنها : لا تخافين حبيبتي ، يمكن طالعين
اسراء: امي مو عادتها تطلع هالوقت ،
خالد : يمكن عندها شغل ولا شي ، لاتخافين
اسراء : بتصل على عبدالعزيز
خالد : يلا اتصلي و طمنيني
في المستشفى :
عبدالعزيز و ام عبدالعزيز ينطرون الدكتور يطلع و يبشرهم بخبر يفرحهم ، كانت حالتهم حاله ، الخوف و التوتر باين عليهم ، و الاعصاب مشدوده حيييل ،،
ورن تلفون عبدالعزيز ،
عبدالعزيز : يمه ، هذي اسور
ام عبدالعزيز : رد عليها ، بس دير بالك ! لاتقولها ان ابوك بالمستشفى ، والله ان قلتلها مو بعيده ترجع الكويت
عبدالعزيز تنهد : ان شاء الله يمه ، و حاول ان تكون نبره صوته طبيعيه و رد عليها ،
عبدالعزيز : الو
اسراء: قوه عزيز
عبدالعزيز : يقويج هلا
اسراء : شلونكم شخباركم ؟؟
عبدالعزيز : الحمدلله بخير ، انتي شلونج و شلون خالد ؟
اسراء: الحمدلله ،، وينكم دقيت على البيت محد يرد
عبدالعزيز سكت شوي و عقب ثواني : انا طالع و ابوي طالع و امي تلقينها مشغوله بالمطبخ و ماسمعت التلفون
اسراء تطمنت شوي : اممم ، شلون ابوي ؟؟ ولهانه عليه
عبدالعزيز تنهد و تغيرت نبره صوته : الحمدلله ابوي بخير ، كلنا بخير
اسراء : عزيز فيك شي ؟ صوتك متغير ؟ خير شصاير ؟ ابوي في شي ؟؟
عبدالعزيز حاول يصير طبيعي : لا لا ماكو شي ، لاتخافين ابوي مافي شي
اسراء: اكيد ؟؟ ماكو شي ؟؟
عبدالعزيز : اي اي اكيد ، لاتحاتين
اسراء تنهدت حيل : اوكي ، يالله اخليك الحين ، سلم عليهم كلهم
عبدالعزيز : الله يسلمج
باريس :
خالد : ها حبيبتي طمنيني ؟
اسراء تنهدت حيل : مافيهم شي
خالد : الحمدلله ، قلتلج مافيهم الا العافيه ، بس انتي لاتحاتين
اسراء بضيق : ان شاء الله
خالد : شفيج حبيبتي ؟ يالله عاد وريني الابتسامه الحلوه ،
اسراء : خالد ، احس انهم خاشين عني شي ، و مايبون يقولولي
خالد : يا حبيبتي يا حياتي انتي ، انتي توج كلمتي اخوج و قالج مافيهم شي ، لا تحاتين ولا تخافين ،
اسراء خذت شهيق و عقب زفير قوي : ان شاء الله ،
خالد : يلا وين الابتسامه الحلوه ؟
اسراء بحيا ابتسمت ابتسامه روووعه حبها خالد و ابتسم لها
في المستشفى :
عبدالعزيز : يمه اسور تسلم عليج
ام عبدالعزيز بضيق : الله يسلمها
عبدالعزيز تنهد : مسكينه تحاتي ابوي
ام عبدالعزيز انصدمت : قلتلها !!
عبدالعزيز : لا يمه ما قلتلها ، بس قالتلي شلون ابوي ، قلتلها بخير
ام عبدالعزيز : بعد عمري بنيتي ، تحب ابوها وايد ، والله ان درت بصير فيها شي
وطلع الدكتور ،
و بحركه سريعه راح عبدالعزيز للدكتور و سأله عن حاله ابوه
عبدالعزيز بخووف : ها دكتور ! طمني شلونه ؟؟
الدكتور : الواضح ان السكر مرتفع عنده ، و دقات قلبه بطيئه ، بس الحمدلله سوينا الي علينا و الحين احسن ،
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك