رواية من أعماق أحضان مجنونة -21
ام وليد قلت لي عن هالة ويوم راح ابوك طلعت السالفة مو كذا وتفشلت قدام ابوك وطلعت بس ادور الزلة عليهم ومابقى ولا كلمة علي!!قال ان احمد عازم دكتورات معه بالمستشفى هي تعرفهم وجت علشان يتعرفون على ريم زوجة احمد وهي تكون موجودة..
وليد بانفعال كذبوا عليه يمه...والله انا شايفها..كل يوم اشوفها تروح هناك.....
تنهدت ام وليد ومشت,,,,,,
وليد زين ياحمدي انت واختك بشوف وش اسوي معكم ثنينكم!!!
مشاري يبى..
ابو مشاري رفع راسه عن الاوراق وقال خير يبى؟
تنهد مشاري وجلس قبال مكتب ابوه وقال يبى زينة شفيها؟
شال نظراته وقال بتعجب شفيها؟
مشاري انا جاي اسئلك وش فيها؟
ابو مشاري هي قايلة لك ان فيها شي؟
مشاري ياليتها قالت؟كنت بعرف وش فيها؟الا شفتها تبكي البارحة وجالسة بروحها...
ابو مشاري بتفكير وماعرفت منها أي شي؟
مشاري لا..بس جابت سيرة امي الله يرحمها وانها مشتاقة لها وتبيها تكون جنبها؟
تنهد ابو مشاري وسكت..
مشاري يبى..
ابو مشاري طبيعي....اذا البنت انخطبت ماتبي الا وجود امها جنبها؟
مشاري ليه زينة انخطبت يبى؟
ابو مشاري ليش انا ماقلت لك؟
مشاري لا..
ابو مشاري عمك ابو احمد خطبها لغسان ولده؟
مشاري بصدمة شنو؟
ابو مشاري أي....كلمني وقال لي خل الموضوع بينا..وماابيك تقول لااحد يامشاري حتى خطيبتك لان ها السالفة محد يدري فيها؟
مشاري ليش؟
ابو مشاري يعني هو مو متوقع من زينة ردة فعل ايجابية ولا سلبية..ومايبي تصير شوشرة وترتبط مصايركم انت ومريم وزينة وغسان وتتاْثر العلاقتين؟
مشاري تنهد وسكت....
ابو مشاري انت شرايك بغسان يامشاري؟
مشاري بهدوء اهم شي رايها هي مدام الرجال مابه عيب...
ابو مشاري الله يتمم بخير؟
مشاري شكلك مبسوط...
ابو مشاري انا اللي تبيه زينة بوافقها عليه لان الراي الاول والاخير لها...انا مايهمني وش عند الولد ولا اللي ماعنده انا بعيشها وبعيشه بعد...بس اهم شي هي تجي وتقولي يبى انا ابي ها الانسان اكمل حياتي معه؟انا مابغير سعادتك انت معها يامشاري ياولدي..
مشاري عسى الله يخليك لنا يالغالي....
قعد بغرفته اكثر من ساعتين من بعد ماهاوش وليد وامه علشانها...
حتى الغذى ماقدر يقعد معهم بطاولة وحدة ,,
مايبي يطلع ويلمحها لو بالغلط؟؟؟
شي بعيونها قاعد يعذبه هو؟
تثور ثايرته بس يجيبون سيرته..سيرة علي....
الانسان اللي كرهه قبل حتى مايشوفه...
يكفي انه سرق منه احلى فرحة كان بيعيشها؟؟؟
تنهد وهو يتخيلها بثوب العرس...كانت حلوة...اكيد كانت حلوة...
اللي يذكره ان ثوبها كان مو كبير وبس!!
عيونه كانت غرقانة بدموعه ذيك اللحظات وماقدر يركز بصورتها كثير؟؟؟
ليه بس راح لها ذاك اليوم وجرح نفسه وجرح كرامته ومشاعره؟؟؟
ليه ماقدر يبلع حبه بقلبه مثل ماهو مسوي طول عمره ويظل ساكت؟
ليه خلاها بيوم عرسها تدري انه يحبها وبعدها اختفى من جديد؟؟؟
اه ياجراح اه.....
بتظل انت والحزن اصحاب...
من بعد ماراحت هالة لغيرك وانت مو قادر تعيش الفرح في ها البيت ولا بغيره؟
قلبك...قلبك اللي مو راضي يفرح ويقتنع ان هالة سراب وان حياة جراح بدونها واقع ولازم يعيشه,,
تنهد بقوة ورفع راسه يوم يندق باب الغرفة..
جراح منو؟
قالها وهو يمسح باقي اثار الدموع بعيونه؟
ماجاه أي جواب غير الباب اللي انفتح ودخلت منه فاطمة وهي متخصرة
فاطمة انت هنا وانا صار لي ساعة ادورك؟قولي بالله شقاعد تسوي بروحك؟
جراح وهو يحاول يخفي ابتسامته كنتي تدورين عني!!ليه وش بغيتي!!
فاطمة تقربت منه وقالت انت قولي وش عندك جالس بروحك؟
حط يده على خده وقال برقة افكر؟
فاطمة وهي تهز يمين شمال تفكر بشنو؟
جراح بللي سكنت قلبي؟
فاطمة هذا انا موجودة قبالك بعد ليه تفكر فيني!!
ضحك من قلبه على ردها واخذها بقوة لحضنه وهو يبوس فيها..
فاطمة باعتراض فكني...فكني ماابيك..
جراح وهو يبوسها بحب احبك يافطوم والله احبك...بس لاتعلمين خواتك اني احبك اكثر منهم!!
فاطمة يالله قوم وديني الملاهي؟
جراح ومايصير احبك بدون ملاهي؟
فاطمة بوزت ولفت وجهها عنه كناية عن انها زعلانة وقال وهو يبوسها خلاص بوديك ولاتزعلين؟والله ان ابوك جابني لك سواق وانا مدري؟
كانت الساعة على الاربع ونص يوم يدق جوال بشاير مسج من مشاري(كيفك اليوم ياعمري...
صدقيني طول الليل مانمت وانا افكر فيك وفي دموعك...ماتمنيتها تنزل وانا بعيد عنك,,,,
طمنيني ان شاءاالله صرتي بخير وهديتي اللحين)
تنهدت وهي تذكر كيف ظلت طول الليل تحكي معه بلهفة ودموع رامية ورى ظهرها كل شي...
صوته بس البارح كان كفيل بانه يفجر فيها مشاعر الحبيبة المشتاقة لحبيبها...
كانوا مريم ونسايم معها على نفس الطاولة وهم سوالف العرس اللي ماتنتهي وذيك فستانها وذيك مسكتها وذيك مكياجها...
دزت له مسج(انا بخير.....شكرا)
رد عليها(احبك....والله اشتقت لصوتك)
تنهدت ودزت له(انا بعد اشتقت لصوتك)
مشاري(عادي اكلمك)
بشاير وهي تناظر بمريم اللي مندمجة بسوالف العرس(لا....خلاص يامشاري لاتخلينا نتعلق من جديد...صدني وانا بعد بصدك)
مشاري(ماهو بكيفنا قلوبنا هي اللي تقرر عنا)
بشاير(مشاري انا اتكلم من جد...اللي نسويه اكبر غلط....)
مشاري(ليه تبين تتعبيني؟؟البارحة كنتي مشتاقة لي!!)
بشاير(عارفة اني غلطت يوم اتجاوب معك البارحة واكلمك..بس ماكان بيدي كنت محتاجة اسمع صوتك)
مشاري(طيب..انا اللحين محتاج اسمع صوتك)
انتبهت ان مريم تقول بدز لمشاري مسج اللحين وبشوف وش رايه؟
نسايم دقي عليه ليه ترسلين له بعد!!
مريم مااعرف اتكلم معه....مسجات احسن؟
نسايم وهي قايمة طب انا بقوم اشوف الوالدة وراجعة لك...على مايكون رد عليك مشاري؟
ماتدري ليش اخذتها الغيرة بها اللحظة وحست ان مشاري من حقها مو من حق مريم؟؟اصلا مريم مافيها شي زود عنها؟؟؟
رسلت له هي بسرعة(اكذب عليك ان قلت غيابك شي عادي,,اضحك وانا من جور الايام مجروح,,جرح توسط في حنايا فؤادي,,وليت الجروح ضيوف يومين وتروح,,بعثر ورقنا ها الزمان الرمادي..واصعب شي على الانسان هي غيبة الروح)
رد عليها بسرعة(والله بدونك كل حياتي ولاشي,,,وش عاد بعت الناس يكفي شريتك,,دامك تسوى يالغلا ذا مع ذاك,,,لبيه..امر,,سم..ابشر ..عطيتك اللي تبي,...وانا ماابي منك غير كلمة احبك وفديتك)رفعت راسها ولقت مريم متمللة...
بشاير شفيك؟
مريم انتظره حضرته يرد علي؟
بشاير امممم يمكن انه نايم اليوم خميس؟
مريم بضيق لا عيوني هذا يداوم بشركة ابوه حتى يوم الخميس؟انا مدري وش فايدته مدامه ولد راعي الحلال؟
بشاير اممم...
كانت حاسة بنشوة داخلها انه جالس يراسلها وسافط مريم,,,,
فتحت مسج كان توه واصل منه(حبيبي بسالك ليه الهوى منك وفيك,,,ليه المشاعر ماتعيش الا بساعة شوفتك,,,ليه المحبة والوفا وابيات شعري تهتويك,,وليه انت وبس اللي اموت ببسمتك,, تدري لو مرة اقول اني كرهتك...يرجع علي صوت الصدى يقول..الله مااكبر كذبتك!!)
ردت عليه(اشتقت لك بالامس واليوم مشتاق..وبكرة اذا شفتك يزيد اشتياقي..لاجلك يزيد الحب وتزيد الاشواق..ويزيد من بين الضلوع احتراقي..الله جمع فيك الحلاوة والاخلاق,,مثلك ولو دورت ماني بملاقي)رفعت راسها بعد ولقت مريم تناظرها وابتسمت لها...
كانت ابتساماتها حق شماته بالواقع لان مشاري ماهو شايلها من ارضها بس بالظاهر هي ابتسامة عادية ..
مريم ماشاءالله..كل هذا مسجات!!وانا انتظر مسج من مشاري مو جاي لي!!
بشاير ضحكت وقالت تعرفين بنات الكورس...
دق جوالها وكان هو اللي متصل..ردت بربكة وهي مو قاصدة اصلا ترد,,,,بس انها مابغت تنتبه مريم على الرقم..صحيح ماهي مخزنته باسم بس رقم بروحه بعد يجيب الشك؟
بشاير بارتباك محاولة تخفيه هلا...
مشاري وش ذا الثقل...يوم انك بترد علي ليه مخلين اطر منك صوتك طرارة؟
بشاير ها...لامو كذا انتي ماتدرين انا جالسة مع اختي وبنت عمتي؟
مشاري مريم جنبك؟
بشاير أي..وقالت لي بعد يوم اكلمها انك مارديتي عليها وسفطيها وتركتيها تنتظر؟
مشاري قلعتها مو راد خلها تموت قهر السخيفة؟وش تبي يعني ؟العرس وماالعرس؟
بشاير أي....تمام الله يهنيها...
مشاري بهمس احبك..
بشاير بحدة ادري انك متقصدة..تقولينها علشانها كانت موجودة معنا بذيك اللحظة!!...عموما انا بسكر اللحين وبدق لك بعدين اذا فضيت؟
مشاري احب صوتك..اموت فيه والله..
بشاير يالله باي....
سكرت وهي محاولة تتجنب عيون مريم...
وحطت جوالها على الطاولة,,
جاها بها اللحظة مسج منه,,,,(ادمنت صوتك ..ياعساني ماالقى لاادماني علاااااج!!)
يد مريم كانت اقرب الى الجوال من يدها وسحبته وقالت بضحكة خل نفتح نشوف بنات الكورس وش يرسلون؟
وقع قلب بشاير بين رجلينها وماعرفت حتى تنطق بلا؟؟؟
مصيبة ياربي مصيبة...
مريم بتشوف رقم مشاري وبروح فيها؟
قرت مريم المسج ورفعت راسها لبشاير اللي كانت دموعها نزلوا بها اللحظة....
مريم بذهول بشاير..
بشاير بدموع مريم خليني احكي لك القصة..انا والله العظيم..
وليد في احد داخل؟
اروى وهي طالعة كلهم برى....وابوي واحمد وخالي بالمجلس...ومعهم مطلق وجراح..الظاهر عندهم اجتماع عائلي...الا انت ليه مو معهم!!
وليد بضيق لان محد قال له اجتماعهم يوجع الراس وانا مااحب ها القعدات اصلا!!
اروى بشماتة أي..قلت لي....اي صح ترى ريم زوجة احمد داخل لان الرجال بالفيلا الثانية وهي كانت تصلي ومابعد طلعت!!تراها بغرفة احمد القديمة؟
وليد بملل طيب انا بطلع واذا احد ساْل عني قولي ماشفته ..ماادري عنه شي مو تقولين طلع؟
اروى سيارتك ماهي بالكراج؟
وليد بطلع مع واحد من الربع لايسوون لي سالفة...
اروى طيب....
قالتها ومشت وانتظر لين تغيب وهو يتنفس بقوة...
من زمان وهو وده يشوف ريم زوجة احمد..
الكل يقول انها مو حلوة وعادية والكل هم امه وخواته!!
وهو عارف انهم مايحبون احد وخصوصا اذا كان افضل منهم واحلى؟؟؟فااكيد ان زوجة احمد مو عادية ولا وش اللي بيخليه يذبح حاله علشان يتزوجها ويصر عليها !!ومابرد خاطره الا يوم اخذها؟
تقدم بخطوات مرتجفة وهو يتلفت يشوف اذا في احد جاي صوب بوابة الفيلا وبس دخل قفل الباب وهو يتنهد بقوة وركب الدرج بسرعة....
******بمكان ثاني وتحديدا برى المغاسل بالمجلس كان احمد واقف يكلم ريم بالجوال.....
احمد أي حبيبي وش كنتي تقولين؟
ريم كانت تطوي السجادة وتاركة الجوال سبيكر وهي تكلمه..
ريم اقول ماوحشتك؟ماشوفك ساْلتني تغذيتي ولا ماتغذيتي؟
احمد بهمس بعدين ياقمر بعدين انا مو بروحي..
ريم عارفة بس حبيت اذكرك ماتربط نفسك باي مشوار علشان سهرتنا الليلة؟
احمد بعمق لاتخافين ماراح ارتبط مع احد....وحتى لو صار ترى سهرتنا اخر الليل ياقلبي...
ريم اسمع حبيبي..
وليد وهو يلهث من وراها اسمعك ياقلبي!!!من زمان وانا ابي اسمعك!!!!
جمدت ريم مكانها وماقدرت حتى تلف تشوف من وراها..ووليد اصلا ماانتبه للجوال انه سبيكر بس شافه موجود على الطاولة واحمد وقف مكانه من سمع ها الصوت اللي يعرفه زين!!!!
شرايكم بكرة ماانزل بارت علشان لاتعرفون وش بيصير بين مريم وبشاير وبين احمد وريم ووليد؟؟ههههه
ماشاءالله ههههه
شلونكم ياحلوين وكيف اجوائكم عسى بس مافي لاغيوم ولاغبار ههههه يعني الجو صافي وحلو
البارت الثامن والعشرين,,,
تقدم بخطى ثقيلة من صوت وليد اللي يسمعه يحاكي ريم ومن صمت ريم فجاْة وكانها ماتت مكانها,,,,
طلع من المجلس واتجه لفيلا ام وليد وهو بعده يتكلم بهدوء
احمد ريم...
ماجاه رد,,,,
قال بعصبية حاول مايبينها طب عطيني وليد اكلمه؟
وليد يوم سمع صوت احمد وقف مكانه.....
يعني احمد عرف انه مع مرته!!!!
وهو ماسوى شي لحد اللحين بس صار مجرم بعيونهم..وعلشان كذا خله يكمل اجرامه هو على كل حال طايح من عيونهم كلهم لو دروا فمافرقت شي,,,
احمد بروحه حس ان الدنيا تدور حوله وان رجله مو طايعته يسوي شي.خصوصا ان الفيلا كانت مقفلة......
رجع للمجلس اللي طلع منه ابو مطلق ومابقى غير ابوه اللي كان قايم بيطلع بعد...
ابو احمد احمد...شفيك؟
الدنيا تدور....والجوال بيده...هذا بس اللي كان حاسس فيه احمد...
ابو احمد تقرب منه بخوف وقال يبى احمد شفيك؟
انتبه احمد على الجوال اللي انقطع الاتصال منه ورفع راسه وهو مو قادر يتنفس...
ابو احمد بخوف حقيقي يبى....
دخل احمد المجلس بسرعة وسط ذهول ابو احمد اللي شافه شايل سكين من وسط سلة الفاكهة...
وراح مسكه من كتفه وقال وهو يحاول يشيل السكين منه يبى علامك؟
احمد بقلق متفجر وحروف مبهدلة اذا لمس منها شعرة وحدة بس....بذبحه اللحين وقدامك؟
ابو احمد منهو؟
احمد وهو يناظر بالجوال وطاح على الارض مرة وحدة..
نزل ابوه لمستواه وقال بخوف احمد تراك اقلقتني وانا ابوك؟وش فيك؟
احمد وهو يتنفس بصعوبة انا مو عارف شسوي...ولدك الحقير مع مرتي!!!هناك بالفيلا....والفيلا مقفلة...انا كنت اكلمها بالجوال وفجاْة دخل عليها....رجلي مو شايلتني يبى...مو قادر اتخيل أي شي راح يصير بينهم!!!!
ابو احمد بعد ماعرف وش يسوي يوم انه شاف احمد يتنفس بصعوبة ويتكلم بلعثمة اللي مو قادر يتحرك...بس فجاْة قام وقال باب المطبخ الخارجي مفتوح؟
رفع احمد راسه بسرعة وقام بسرعة اكبر من ابوه والسكين بعدها بيده وقام ابوه يركض وراه,,,,
بشاير الرقم يامريم..
مريم انتي بتسوين فيها بريئة يابشاير؟ترى انا ذكية وافهم ان البنت اللحين ماتخزن رقم صاحبها عندها وتتركه فاضي بدون اسم!!!
اعترفي يالله ولد صح؟
وقفت بشاير تناظر بمريم للحظات...معقولة ماانتبهت للرقم انه نفس رقم مشاري؟؟؟ولا يدق لها من تلفون ثاني؟
هذا اللي رجحته وبس مسكت تلفونها اللي تركته مريم قالت برجاء مريم انتي بتفتحين بيت اللحين واعقل مني ومن الكل(وهي بداخلها مو قادرة تنطق ها الكلمتين بس مصلحتها تستدعي)
مريم بثقة عارفة ها الشي..
بشيا مبي احد يدري عن ها السالفة,,
مريم هو له نية زواج ولا بس كذا يتسلى!!
بشاير بسرعة قبل لاتجي نسايم الا..
مريم خليه يجي اجل بلا حب وخرابيط الزواج مامن اريح منه وبعدين تصيرين اميرة وتقهرين البنات اللي معك ومابعدهم اعرسوا !!
بشاير اممم على قولتك...بس ياليت تنسين السالفة ذي وماتحطينها في بالك وحتى نسايم ماتدري عنها ..مريم انا واثقة فيك؟
مريم وهي تناظر بنسايم أي لا ..تطمني...
بشاير سحبت جوال مريم وقالت اجل خلنا نسوي الوضع طبيعي وبحوس بجوالك شوي على ان احنا كنا نوري بعض اشياء بالجوال؟
مااعترضت مريم وجت نسايم بها اللحظات وبشاير قامت تقلب بالجوال وهي اصلا ماخذته عمد علشان تعرف رقم مشاري هو نفسه ولاغير؟
لقت اسمه عند مريم باسم (زوجي) والرقم نفسه؟؟؟؟
وش ها البلوة..معقولة شافت وتغاضت؟؟؟
جاها فضول تشوف الرسايل اللي بينهم...وتفاجاْت ان ولارسالة حب بينهم!!هو كل رسايله صباح النور ومساءالورد وشلونك اليوم ..وكذا بس...وهي رسايلها مقتصرة على طلبات وتبي وتبي وبس!!
تنهدت وتركت الجوال على الطاولة وناظروا فيها ثنتينهم....
مريم مسوية عادي ها...شنو؟
بشاير مسوية انها طبيعية اكثر الا انتي ماتحفظين ارقام يامريم؟
مريم بكسل بالله !!!هذا اللي ناقصني بعد!!وش فايدة الجوال اذابتحفظي انتي الارقام؟
نسايم طيب وافرضي الشريحة احترقت؟؟الجهاز تعطل؟وش تسوي لحظتها ؟؟
مريم اسمه جوال هو يحفظ الارقام عني!!
بشايرر مسوية طبيعية مع نسايم وقالت وهي تضحك ماتذكرك بمطلق بها الشي؟
نسايم ههه أي والله نفس التفكير...
يوم سمع صوت احمد تقرب من الجوال وقفله وهي للحين جامدة بمكانها وبقعدتها وماهي عارفة تتحرك..
اول مرة احد يشوفها بدون عباية وبدون حجاب وها الشي مخليها تجمد وماتتحرك؟
كل تفكيرها بااحمد؟؟
وش راح يفكر لو شافها كذا!!
وهل وليد بيتركها بحالها ولا ...
لالالالا لاياريم لاتفكيرن كذا...الله يلعن الشيطان بس!!!
نزل لمستواها وقال برقة وهو خايف اصلا واخيرا شفناك ياالريم؟والله مابغينا يالغلا...
خلاص كل العالم حولها وقف...
التنفس انتهى...الدنيا كلها سودة,,,,احبك يااحمد صدقني...وظليت احبك لااخر نفس قبل موتي...هذا بس يدور بفكرها ها اللحظات؟
مد يده لشعرها بيلمسه وصرخت بكل قوة لا..لاتتقرب مني ياحقير انا زوجة اخوك؟
بها اللحظات كانوا احمد وابوه صاعدين الدرج واحمد من سمع صرخة ريم وقف مكانه وابوه ناظر فيه ....بس مشى عنه قبل لاتحل كل المصيبة؟
معقولة يااحمد بتشوف شي ماتبي تشوفه عينك؟شي ماممكن يتخيله قلبك ولاعقلك؟؟؟
طبعا يد وليد كانت بتلامس شعر ريم لو ما صرخ ابوه بكل قوة زلزلزت المكان وخلته يوقف عند ها الحد ويجمد ووقف احمد عند الباب بكامل طوله وشاف يد اخوه قريبة من شعر مرته...بس ماكان يدري هل لمسه ولالا؟
كل اللي طمنه ان ريم بعدها جالسة عند سجادتها على الارض ووليد وراها..يعني على الاقل الهم الاكبر ماصار؟؟
ام وليد شغالتها قالت لها ان ابو احمد واحمد جو الفيلا من باب المطبخ وشكلهم مايبشر بخير واحمد معه سكين وراحت تركض وراهم,,,
وقفت عند الباب يوم ابو احمد يسحب وليد من بلوزته ويعطيه كف بكل قوته خلته يفقد توازنه...
ام وليد بصراخ شفيك على ولدي يابو وليد؟
ابو احمد بصراخ لا تناديني باسمه هذا النجس ماهو ولدي فاهمتني!!
قام يضرب وليد بجنون ويرفسه برجله ووليد تحت رجله ماهو قاوي يقوم لان الضربة كانت ورى الثانية...
تقرب احمد منهم وهو شارد بفكره ورفع السكينة اللي من شافتها ام وليد فزعت وراحت تركض تمسك يد احمد وتترجاه جنيت انت!!بتذبح اخوك يااحمد؟هذا وانت العاقل؟
احمد بذهول مرتي!!!من بين كل العالم ماشاف الا مرتي!!!
ام وليد بترجي كاهي مرتك مافيها شي يااحمد....اترك ولدي صدقني مايعيدها..وبعدين انت شلون حكمت على اخوك يمكن مرتك الغلطانة؟؟؟
لف ابو احمد لها بغضب وقال بكل عصبية انتي طلعي بره..تسمعيني...طلعي بره...
تقرب احمد من وليد وهو شايل السكين ورافعها بوجهه وابتعد ابو احمد اللي كان بقمة ضيقه من حركة وليد لدرجة ان دموعه بانت...معقول اخو يسوي باخوه كذا!!!
ريم بدموع بعد مالبست عبايتها وتغطت وهي لسه بمكانها قالت بغصة وصوت متقطع احمد...لا تكفى طلبتك لا....لاتوصخ يدك فيه وتدخل النار بسبته وقسم مايستاهل؟
رمى السكين تحت رجل اخوه بعد ماسمع صوتها ولف بسرعة لها ومسكها من يدها وطلع معها بدون مايوجه لوليد أي كلمة؟
بشاير وهي تلهث بهمس كنت بنفضح اليوم بس ربك ستر؟
مشاري برواق ليه؟
بشاير كنت مع مريم يوم تدق؟
مشاري أي فهمت من كلامك؟
بشاير وسحبت جوالي وخفت انها تعرف الرقم..
مشاري بضحكة سخرية لاتطمني مريم ماتحط بالها بالارقام واثقة البنت ماشاءالله!!بالها كله بالعرس؟مدري شبتسوي لاعرفت ان ماكو عرس؟
تنهدت بشاير بقوة وقالت مشاري خلاص لازم مانكلم
قاطعها بسرعة خلاص بكرة نطلع رقم ثاني لك وبس!!
بشاير مشاري لا...الشي اللي بينا لازم ينتهي مو يكبر؟
مشاري بتعب بشاير انا ماصدقت اسمع صوتك وارتاح؟
بشاير بتعب انا وضعي صعب افهمني؟
مشاري وانا وضعي بالله مريح؟؟وقسم بالله كلي تعب ..مو قادر اتنفس واحس اني سعيد...اللحظات اللي اسمع صوتك واحس انك متواصلة معي هي وبس اللي تريحني؟
بس يامشاري...قالتها وتنهدت..
قال بهمس قولي احبك...
احبك.....قالتها بهمس وطواعية وكانها تناقض نفسها...
مشاري برومنسية عيديها ثاني تكفين؟
بشاير برقة وهي تمسح دموعها احبك...احبك....ليه تسوي فيني كذا يامشاري حرام عليك!!
مشاري اششششش خلينا فيها وانسي كل شي ثاني....يالله قوليها...
تنهدت بشاير وقال مشاري بسرعة,,,
الشوق فيني اصبح لك عظيم وجبار,,,والشوق بعدك ياغلا روحي كفيفي
مشكور ياحب دربه مايعرف اعذار,ومشكور ياحب تمنع فيه حيفي,,
بعد الغياب ان جيت لاتشتكي ولاتحتار,,انت حبيبي اول واللحين انت حبيبي
بنات ابو احمد هالة ودارين عرفوا السالفة من ابوهم اللي رجع الفيلا وهو متضايق وتعبان ومنرفز..ومن طلعة احمد بها الطريقة وبدون كلام ولا سلام,,,,
هالة ماكان ودها ابدا ترجع الليلة شقة احمد لانها عارفة ان الموقف صعب....بس ماعرفت شتقول,,,,حست الوضع كله ملخبط,,
دارين برجاء وهي بالحديقة هالة تكفين لاتروحين وتتركيني انا بعد اللي صار مدري وش مخبين لي!!
هالة باعتراض يخسون يقربون صوبك؟
دارين ماعليه لاتتركيني بروحي؟
هالة تنهدت وقالت طيب بكلم علي وبشوف انتي سبقيني داخل؟
دخلت دارين وقال جراح بسخرية وهو متسند وراها طبعا هاذي حركة تمويهية انك بتكلمينه تستاْذنين انك تجلسين الليلة هنا؟
لفت له وناظرت فيه بدون ماتقول شي...
جراح مسوي متاءثر ياحرام!!اللحين رضى تبيتين ولامارضى؟تبين اتوسط لك عنده؟
هالة بحدة انت ممكن ماتسمعني صوتك؟
جراح مسوية ذربة الاخت وماتطلع الا بشور الزوج؟وهي ....
قالت بحدة بعد ماتقربت منه شوف اذا لسانك بيرجع ينحط بلساني بتشوف مني شي ماعمرك شفته!!
جراح وهو عيون تاكل عيونه يمه يمه خوفتني تصدقين؟وش بتسوين..تكفين علميني؟علشان اخاف ومااحط لساني بلسانك..
هالة باحتقار سخيف صدق...وتافه...
جراح يالله بعد كل اللي بقلبك طلعيه....
هالة تبيني احط لساني بلسانك مو؟لكن حريمتك مو رادة عليك لو شتقول؟
مشت عنه بكم خطوة وقال عيال العراقية وماادراك...لسان شطوله؟هذا ودكتورة بعد!!!
لفت له وقالت دكتورة أي..مو عاجبتك بالله!!على الاقل احسن من العطالي البطالي اللي ماعنده غير التسردح بالاسواق وترقيم بنات خلق الله؟
جراح اشر بااصبعه ناحيتها وقال ترى منتي ضمنهم ياقلبي!!انا ماارقم اشكالك يابابا..انا مستواي فوق...انا ابي جمال معين مو أي شي يشدني ويعجبني؟
***************
دارين وهي راجعة بتدخل الفيلا كان مطلق يمشي وراها ويقول بهمس ياحرام بنت العراقية خايفة ماتدري وش بيسون فيها؟
شدت على عبايتها عليها اكثر وماغابت ها الحركة عنه وابتسم وقال شوي شوي لاتذبحين نفسك...يبى ترى انا اسولف بلساني بس مااسوي اكثر من ها الشي؟
لفت له بحدة وقالت انت شتبي!!
مطلق برقة ابي اتطمن عليك...تقولين خايفة؟
دارين لاماقلت؟
مطلق لابلى توك قلتي لهالة قبل ثواني؟
دارين أي وانت شكو؟شيخصك بالله!!!
مطلق بغمز بتطمن عليك...بوصلك لباب الفيلا واتطمن انك دخلتي وان الخوف راح بعيد...لااقل ولااكثر..ترى كل شي ولا انك تكونين خايفة ومرعوبة وانا جنبك؟
دارين سكتت وبعدها قالت تعرف انك..
مطلق قاطعها بسرعة اعرف اعرف...وسيم...ومملوح...والبنات يخقون علي...ولساني يقطر عسل...بس ترى انا مو كلا يجوز لي يابنت العراقية!!ويحمد ربه الف مرة اللي احط لسانه بلساني...طيب....
قالها بعد ماوصلوا لباب الفيلا وناظرت فيه بنظرات ماهي مفهومة ودخلت الفيلا بسرعة,,,,
بروحهم كانوا بالغرفة وكل واحد بعالمه...
هي بدموعها وهو بشروده وبالشيطان اللي لاعب براسه....
ببحة قطعت الصمت وسالت مصدق فيني الشينة؟
ماقال شي بس رفع راسه وتنهد,,,
قالت بغصة وهي تجي قباله وتركع تحت رجله احمد...
احمد تنهد وهو غرقان بحزنه..
ريم ودموعها مالية وجهها حتى اللي بيعدمونه يحاكمونه قبل؟وانت من طلعنا ماقلت ولا كلمة؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك