رواية يا لبيه يا الدنيا العجيبة -36
نادر اندفع: من الآخير وبدون لف ولادوران من خطيب دانه؟
وليش ماقلتولي .. يعني خلاص قلت ما ابيها تغطون عني..
وش شايفيني انتم.. وش هالتصرف
ندى:هيييييييه انت وشفيك
نادر:مدري عنكم ليش ماقلتولي
ندى:حبه حبه.. نقول لك على وشو .. وش قصتها دانه
نادر: انخطبت وانا آخر من يعلم.. واذا قلت لكم ما ابيها
قاطعته:من قال لك
نادر:مو شغلك من قال لي
ندى: الا شغلي لان اللي جاب لك هالخبر كذاب
نادر: كذاب؟!
ندى:ايه دانه لا انخطبت ولا شي
نادر: وش دراك
ندى:حنا مانشك خيط بابره الا وعند الثانيه خبر.. بس ليش تسأل
تجاهل سؤالها :دقي عليها ابي اتأكد
ندى: والله اقولك ما انخطبت
نادر:وش عليك انتي دقي وبس
ندى:طيب.. بس جوالي بغرفتي
نادر:انقزي جيبيه غرفتك جنب غرفتي يعني ماله داعي التأخير .. لك دقيقه
ندى: طآآآآآآيب
وراحت تجيبه في اقل من الدقيقه
ندى: وش اقول لها
نادر:مدري استدرجيها سوي اي شي
دقت ندى عليها
دانه:هلا نداوي
ندى:هلابك وحشتيني
دانه:وحشتيني..! وداقه الظهر!! اخلصي علي وش تبين
ارتبكت:مابي شي اسلم وابي آبي شسمه
دانه:عادي وش تبين
ندى: ابي آخذ رايك بشغله
دانه: وشو
ندى: انخطبت ومتردده
دانه:مبرووووك من ولده
سكتت بتجيب لها اسم بس مالقت: ولد جيرانا
دانه: ياكثر جيرانكم اي واحد تقصدين
ندى:هآآآ مبارك
دانه: والله اهله خوووش ناس وخواته عسل لاتترددين بس اسألوا عنه
ندى: عقبالك!!!
دانه: لا الله لايقوله خليني كذا
ندى:لين متى
دانه: ما افكر حاليا.. لاحقه على الزواج
لازالت متمسكه بكذبتها: على قولك
دانه: الله يوفقك مع!! ذكريني وش اسمه
ندى:هشام
دانه: انعن هالفره والله اني داريه انك تنصبين.. من تو كان مبارك
ندى:هههههههههههههههه..
دانه:تضحكين مع وجهك
ندى: بس بشوف ردة فعلك بتفرحين لي والا لا
دانه: اكيد بفرح لك
اشر لها نادر تقفل
ندى: دندون شوي واكلمك
دانه:اوك.. وقفلت
نادر:فاااااااشله
ندى: وش اسوي ما اعرف اكذب
حاول يهدي نفسه:خلاص روحي
ندى: تأكدت
نادر:ايه
ندى:اوك اخليك
نادر: ندى
ندى:هلا
نادر:مع انها محاوله فاشله بس آسف اني حديتك ع الكذب
تبسمت له بدون تعقيب
نادر: طلب أخير..
ندى: وشو
نادر: عطيني رقمها(( لانه كان حاط في باله ان رقمها الثاني اللي تدق منه مقفل))
ندى:عاد بذي اسمحلي
نادر: والله العظيم بمسحه وعشان تتأكدين انا الحين برسل رساله وامسحه قدامك
ندى: ياااربي يانادر ماصير
نادر: وربي انا حلفت
وعطته
كتب لها رساله من جواله وارسلها
نادر:وهذا رقمها مسحته خذي تأكدي
ندى: لاخلاص مصدقه
نادر: لاخذيه تأكدي اكثر
فتشت الجوال ومالقت لرقم جوالها اثر
ندى:فاضي
نادر:تقدرين تروحين الحين
ونزلت
.
.
.
.
.
.
شافت تركي وعبدالرحمن وام تركي
ندى:بسم الله وين ساره
ام تركي: رقت عند جوري
ندى:بلحقهم وطلعت
عبدالرحمن: مبروووك ولو انها متأخره
تركي: على وشو
عبدالرحمن: قصيت شعرك طالع خقق
ام تركي: ماهقيت محمد يقصه
عبدالرحمن: انا شفته امس ماصدقت
ام تركي:ابدااا ماصدق
تركي: الا بس ماتعودت على شكلي عشان كذا حاط هالعمامه
((نفس طريقة الاماراتيين))
ام تركي: ما اصدق لين اشوف بعيوني
عبدالرحمن: وخرها وريحها
رفعها من فوق راسه: هاشرايك
ام تركي بفرحه:ايه كذا مقبول.. اخيرا قصيته غريبه
ضحك تركي في سره
عبدالرحمن:كيدهن عظيم
تركي يصرف:هههههه.. الا ابوي للحين ماجا
ام تركي: تراه زعلان حيل دق علي وسمعني كلام ماينقال عشانك
عبدالرحمن:الله يهديه ابوي مدري ليش كذا
تركي:زين اني لابس بروح له..
عبدالرحمن: وعلمني بالمستجدات
تركي:ان شاءالله.. وسلم عليه وراح
..............
سمعت اصواتهم ضحك
دخلت:وش عندكم تضحكون
جوري:شوفي الحوادث اللي في ساره
ندى: واناااا اقوووول ليش مكوفنه بالعبايه..
نفسك ياجوري يوم تجين عندنا في اليوم الثاني هههههههه
تظاهرت جوري بالابتسامه
ساره:يلا استأذن دحومي قال خمس دقايق وانزلي
ندى:لاوين نبي الاخبار
ساره:يرحم امك اسكتي لو اقولك تموتين ضحك علي
جوري:وش صار
ساره:هههههههه بعد ما أرجع اعلمكم
ندى:يانذله
ساره:امشي ننزل بس
ونزلوا
ام تركي: :يمه شفتي جناحك واي تعديل خذي راحتك
ساره:ايه شفته ماقصرتوا روعه عاجبني مايحتاج تعديلات
ندى:احم تراه ذوقي
عبدالرحمن:احم احم احم مو بلحالك
ساره تبسمت:كلكم مذوقين والله
ام تركي:ساره ما اوصيك على عبدالرحمن
ساره:بعيوني لاتشيلين هم
ندى:الحين بتقعدون شهر؟
عبدالرحمن:وش معنى؟؟
ندى:مدري مو اسمه شهر عسل
عبدالرحمن:لا مو شرط.. وعلى حسب.. يمكن اقل يمكن اكثر كل واحد وقدرته..
عن نفسي انا وساره بنقعد اسبوع ونص
ندى:انت مقتدر فلوسك على قلبك ليش ماراح تطولون
ام تركي:اللهم لاحسد يمممه من عينها اذكري الله
ندى:ماااااااااااااشاااااااااااااءالله
عبدالرحمن:دبا مو حكاية مقتدر بس والله تنتظرني اشغال قد شعر راسي
لو بيدي خليته شهر وازيد عليه .. بس من بيفكني من ابوي
ندى:بغض النظر حتى لو ماكان عندكم التزامات
ساره ما اتووقع تحب تطول لانها متعلقه بخالتي حصه وااااجد
ساره:اي والله حتى الحين شايله هم فراقها
ام تركي: لاتحاتين استانسي وباذن الله ترجعين وتكحلين عيونك بشوفة امك وابوك واهلك كلهم
والله يجعل ايامكم كلها عسل مو شهر بس
عبدالرحمن :اميييييييين ويطالع الساعه:مابقى شي حنا لازم نمشي
ام تركي:دحيم حبيبي انت بعد حط البنت بعيونك وخلوا قلوبكم على بعض
عبدالرحمن :لاتوصين حريص
وطلعوا المطار
...........
بالطياره
ساره:تصدق على كثر ما اسافر بس لازم احس بغثيان ودوخه
عبدالرحمن:طيب ياقلبي حطي راسك على كتفي ونامي لين مانوصل
والمسافه ماهي طويله
ساره: مستانسه اننا ماسافرنا برا
عبدالرحمن:ليش
ساره:عشان ماتشوف الحمران العطران
عبدالرحمن:ههههههههههه باللهي وليش
ساره:اي والله اغاآآآاااار عليك
عبدالرحمن: ايه يوم حنا بالجو طلع الريق الحلو هاآ
ساره:هههههههه
عبدالرحمن: والله اني اشك اذا وصلنا ما اسمع هالضحكه
ساره: طيب قفل الموضوع.. وحطت راسها على كتفه
عبدالرحمن: الوعد مو هنا
ماحس الا وهي تهز وهي تضحك
عبدالرحمن يهمس لها: والله العظيم احبك يادنيتي كلها
...............
وصل الشركه
وشاف الموظفين مو على طبعهم
وسمع جلبه بالداخل
المصدر مكتب ابوه
دخل عليه
شافه واقف والشرر يتطاير من عيونه
وعنده كم موظف
ابوتركي:تفضلوا انتم واياني واياكم اعيد اللي قلته
طلعوا مطأطئين رؤوسهم
تركي: يبه
ابو تركي:لاتقول يبه ولا اسمع صوتك
وتهالك على كرسيه الوثير
تركي:يبه هدي نفسك قلبك ضعيف
الفلوس تجي غيرها طز فيها.. الزم ماعلينا صحتك
ابو تركي: انت السبب انا مو موصيك ع الورقه شوف وش صار لي كساد في التجاره
وحسابات الشركه ملعوبن فيها هذا غير الديانه
تركي: والله يبه ماخليت شبر في الشركه الا وسويت له تدقيق وتمحيص..
وكل شي سليم وين ادورها
ابوتركي: خلاص ضعت.. عندي مهله كم يوم وكل الشركات اللي هنا بتصير مرهونه
واللي في الخارج بتنباع شلون اعطي الناس رواتبهم؟
والبنك بعد يطالبوني بسداد سندات .. صرت مديون على آخر عمري
تركي: طيب يبه انا وعبدالرحمن بنحط كل اللي عندنا على الاراضي اللي عطيت كل واحد منا
وتبي تجيب مبلغ شوف كم ارض بنبيعها لك خمس على عددنا
ابوتركي: اصبر كني ذكرت شي الملف اللي جابه نادر انا عاطيه وكان فيه 11 ورقه
رجعه عشر باقي ورقه!!
تركي: ورقة التأمين؟
ابوتركي:يمكن والله ناسي..
طول اليوم اوراق رايحه واوراق داخله انا من قال لي اعطي الدلخ نادر
تركي: طيب انا بدق عليه
ودق على نادر
نادر:هلا تروك
تركي: نادر شفت يوم تروح الشرقيه الملف اللي اعطاك ابوي كم ورقه كانت فيه
نادر:اما عاد بتذكر وش دراني
تركي: اعصر مخك شوي
نادر:عساي اتذكر وش متعشي قبل يومين
سحب الجوال من ايد تركي وبعصبيه بلغت قمتها: يالدلخ تذكر ضيعتنا بسبة هالورقه
نادر:وش صار
صرخ:الملف اللي عطيتك ناقص ورقه وينها
نادر:يبه الله يهداك وشوله تصارخ انا من البدايه قلتلك لاترسلني انا..
قلت لي مجرد تاخذ توقيع صاحبك حتى ناسي اسمه وتمشي والحين تلومني
ابو تركي: انت عارف تكلم مين
نادر: ايه ابوي وتاج راسي
ابو تركي برجاء: طيب عشان شيبتي وانا ابوك تذكر
نادر:والله يبه نااااسي..
انا مالي بالشغلات هذي بس انت اصريت الا اروح وياليتني اشتغل معكم عشان ترسلني
بتخاذل: يعني تعب السنين راح
نادر: طيب ليش ماتدق على صاحبك وتسأله وهو امين ماشاءالله
وعارف ربه ومستقيم ماراح يخش عنك شي
ابوتركي:جبتها.. طيب مع السلامه .. وقفل
.............
مغرورقه عيونها بالدموع
اكثر من مره قرت الرساله
رجعت تقراها عشان تتأكد
خلنا ../نفترق.. !!
ولآ تنسج لي ،،(أعذآر)،،
ولآ آرسم ''لك'' أسبآب !!
نقول../ نصيب؟!
ونكتفي !!!
و يآآآمآ |..فرق..| هالنصيب
..[أحباب واغراب]..
تأكدت من الرقم عشرات المرات
هذا رقم نادر "آه يانادر ياقو قلبك"
وبكبرياء رفضت ان تدع دموعها تأخذ مجراها
ولسان حالها يقول "من تغلى تخلى"
.............
سافرت اماني لامها وسط دموع ام طارق وابوها ..
خالد: قالت لكم كل بعد اسبوع بتجي يعني هالاسبوع ماراح تجي
والاسبوع اللي بعده بتجي وهكذا دواليك
طارق:خلهم يفضفضون ياخي
خالد:ملينا من الدموع
طارق: وملينا من الغرايب بعد
ام طارق: غرايب وشو
طارق: شفتي المسجد تخيلي وش بيحطون جنبه
ام طارق:وشو
طارق: دار خيري لتحفيظ القرآن
خالد:وش الغريب فيه
طارق: الا غريب ونص ماتشوف ابوي طلع اول ماودع اماني راح ينقب ورا الموضوع..
ام طارق: وش الحكايه
طارق: الدار نسائي تبين لنا انه من نفس فاعل الخير وبرضه على نية ريم
خالد:امااا
طارق:ايه انا ماصدقت وكان بيخليه باسم ريم بس يلزمه اوراق لكن خلاه باسم المؤسسه المشرفه
على البناء.. لكنه ذكر في الاوراق يهدى لروح الاخت الفقيده ريم بنت عبدالله ال....
ام طارق: من هذا ؟؟ والله اني اشك انه عمك محمد
طارق: بروح له اليوم واشكره
.........
لاحول ولاقوة الا بالله
لاحول ولاقوة الا بالله
تركي:استهدى بالله يبه توك مكلم الرجال
وحالف يمين ان ورقة الإئتمان ماهيب عنده
وان الورقه اللي نساها نادر ورقه مرفقه مالها اهميه
ابو تركي: داري انه صادق.. اجل وين راحت.. وييييين
تركي:قم معي يبه وجودك ماله داعي هنا
قام ابو تركي معه مكسور العين والقلب
قبل مايروحون البيت
توجهوا للمسجد صلوا صلاة العصر
وبعدها رجعوا البيت
راح تركي لغرفته
تركي:السلام عليكم
جوري: وعليكم السلام
تركي: اخلفت الوعد صح!
جوري:لاعادي خالتي علمتني السالفه
تركي: كنتي على بالي؟
جوري: انا! ليش
تركي: يعني عشان ماعطيتك خبر
جوري:اهااا طيب نام شوي وبنطلع عقب المغرب ابي اتمشى
تركي: مافيني نوم..
مسكت راسه وحطته على فخوذها:لابيجيك باين انك مرهق
تركي: طيب صبر ابدل.. وقام
جوري" الحمدلله شكله نسى سالفة الفندق": طيب
دخل غرفة الملابس لبس شورت وفانيله
وارتمى عليها وهو مغمض عيونه
داعبت شعره:تركي
تركي:هممم
جوري: تروووك
بلاشعور:عيونه
جوري"فديتك": شرايك بسألك اسئله وتجاوب ايه ولا
تركي:مو تقولين نام
جوري:اعتبر اني اقرالك قصه
تركي:هههههه طيب بس مو محرجه
جوري:مدري بس ما ابي غير هالاجابتين
تركي: طيب قولي
جوري: اول سؤال انت راضي عني؟
تركي:ايه
جوري: مرتاح معي؟
تركي:ايه
جوري: بيجي يوم وتتخلى عني؟
تركي:لا
جوري: فيه شي مضايقك فيني
تركي:اممممم ايه
جوري: بإيش
تركي: شلون اجاوب بايه ولا
جوري: مو مهم ابي اعرف وش مضايقك فيني
تركي: لالالا ما اتفقنا انتي قلتي ماتبين غير هالاجابتين
جوري:هالسؤال مستثنى
تركي: لااااااه
جوري:بليز جاوب
تركي:ماراح تعجبك الاجابه
جوري:عادي بتقبلها وشي طيب تذكر عيوبي عشان اعدلها
تركي: اقرب شي اليوم اقولك نروح الفندق وانتي رافضه
جوري:هذا اللي مضايقك؟
جلس على حيله واخذها بحضنه وامطرها بقبلات من رأسها لحدود عنقها
تهاوت بين احضانه وقبلاته الحاره
ولكن لم تخضع له افاقت من ماكان يحدث
وسحبت نفسها منه
تركي: ترا ماني جماد.. انا احس
سكتت
تركي:ماتدرين كيف صدك يعذبني والله العظيم الشوق نخر عضامي مو بس قلبي
كم لنا متزوجين وكل يوم اقول بكرا بتلين بكرا بترضخ بس عنيده ياجوري
جوري: يمكن الفراغ العاطفي عقب رشا خلاك تحس بهالاحساس تجاهي
تركي: كذا تفكرين؟؟
جوري: مدري ابي منك تبرير لشوقك
تركي: يااالله ياجوري .. تبرير للشوق!
جوري: تركي أأأ...
حط ايدها على فمها: قلبي لاتقولين شي..
انسي سالفة الفندق.. ولاتفسرين كلامي اني بجبرك على شي ماتبينه
والله ماراح اجبرك بأي حاله من الاحوال لو اعيش عشرين سنه قدام
ماراح يكون شي بغير رضاك.. بصون كرامتك واحافظ على وجودك بحياتي
جوري: وانا نفس الشي وماتدري الدنيا وش مخبيه لنا
...........
بعد خمسة ايام
منى:اسمع بروح السوق
فيصل:ماشاءالله عليك ماتشبعين من السوق
منى:قصدي بنده ناقصتنا اغراض المطبخ
فيصل: اللي تشوفينه كم تحتاجين
منى: لا عندي والاغراض قليله
فيصل:لاقولي.. مو معناته ماعاد اشتغل عند ابوك يعني ما أقدر أأمن لك اللي تبين
من: وش هالافكار والله ماجا في بالي ابد خلاص هات اللي عندك
فيصل:من عيوني.. بس منضغط اليوم مقدر اوديك
منى:لا بروح مع البنات
فيصل: اللي يريحك.. الا تعالي بلوط وعلقم ما اسمع لهم حس
منى:بسم الله عليهم.. نايمين
فيصل: ماغيرتي رايك
منى:عشان!
فيصل: نشوتهم عند امي والا امك
منى:هههههه شفيك حاقد عليهم كذا
فيصل: اما حقد لاتنسين هذول قطعه مني بس والله مناوي خذوك مني
منى: طيب خلاص قبل ما اروح بشوف من فاضي امك والا امي واقولك توديهم ..
فيصل: صدق!!
منى:ايه.. بس وش بتقول لهم فشله والله
فيصل:يااااحبيلك ماعليك انا بتصرف
............
ام تركي: محمد عند الباب ضيف
ابو تركي:مين
ام تركي:قوم شوفه بنفسك
وقام
استوقفته:محمد تراه ضيف وبوسط بيتك
ابو تركي: طيب!!
ام تركي: ولا شي روح له
راح للمجلس
وتفاجأ بوجود طارق
قام طارق وسلم عليه وحب راسه وايده
وجلسوا
ابو تركي كان بحاله غير استيعابيه للوضع ويمكن خسارته خلته بهالوضع
طارق كان متوقع ردة فعل جامده من عمه بس خاب ظنه: عمي آسف يمكن جيت بوقت غير مناسب
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك