رواية من أعماق أحضان مجنونة -39
بغرفتها بعد الساعة عشر ونص جاها منه مسج(اشتقت لصوتك)
ردت عليه(اشتاقت لك العافية)
مطلق(بتظل معاقبني وتاركني محروم من صوتك)
دارين(؟؟؟؟؟؟؟؟؟)
مطلق(حبي خلنا نكلم بعض ترى انا اتعب اذا ماسمعت صوتك ياقمر)
دارين(مطلق احنا من سالفة مو قادرين نتفق)
مطلق(بكلمك وبقولك على شنو بنتفق)
ماعطاها مجال ترفض ولاتوافق دق عليها بسرعة وهي ابتسمت...
صدق اشتاقت لصوته من البارح ماسمعته ودوخها ودغدغ مشاعرها...
ردت عليه بس بثقل هلا....
مطلق بتعب ضعت انا اليوم لاني ماسمعت ها الهلا الحلوة الذايبة؟
دارين .............
مطلق بهمس كذا تخليني من البارح مااسمع صوتك؟ترضينها عاد؟
دارين احنا قلنا بنتفق بس لو مااتفقنا....
مطلق تنهد بقوة سكتتها بعدها قال بتنازل يبى بتدرسين ادرسي...بتشتغلين اشتغلي بس لاعاد تقطعين صوتك علي وتحرميني نعمة سماعه؟
دارين لامطلق انا ماابي كذا؟اذا تزاعلنا رضيت ورضخت للي ابيه...ابيك تكون مقتنع بالشي؟
مطلق انتي ماتتركين لي مجال اقتنع بالشي علطول تذبحيني وتقطعين صوتك عني وانا مافيني جاني ادمان على صوتك اذا ماسمعته يجن جنوني مستعد اقدم حياتي ولا اني اخسر صوتك اللي يريحني!!
دارين بهمس تعلقت بصوتي؟
مطلق بنفس الهمس وكان فعلا تعبان احبك....
دارين تنهدت....
مطلق كنت اليوم بطوله معصب...تركت نفسي اتنرفز على كل اللي حواليني والسبب انتي وصوتك اللي قطعتيه عني!!
دارين بهمس لهدرجة....
مطلق باقي كم للاختبارات؟
دارين شهر واسبوعين...
مطلق تنهد وقال وبعدها مباشرة بكلم ابوك ولاتقولين لا ماراح اسمع لك...مافيني اعيش بعيد عنك....
دارين تحبني؟
مطلق تنهد روحي تعلقت فيك....
دارين بهمس .تصدق اني اشتقت لك...اليوم بطوله لاشفتك ولاسمعت صوتك؟
مطلق برجاء خليني اشوفك..
دارين شنو؟
مطلق اطلعي شوي ابي اشوفك واملي عيوني منك؟
دارين مستحيل طبعا....
مطلق بتعب ورجاء طيب طلي من النافذة على الاقل ابي اشوف وجهك قبل لاانام.....
صباح اليوم الثاني....
طلع ابو احمد مع ولده غسان رايحين للشركة ومر اول على قسم ام وليد وماكان فيه احد....
طلعوا للحديقة وكانوا كلهم قاعدين....
اروى حياك يبى تعال افطر معنا؟
ابو احمد ماشاءالله قاعدين بدري اليوم.....
مريم قصدك لسه مانمنا.؟
ابو احمد ماشاءالله على السنع؟
اروى بنفطر وبنام يبى.....
ابو احمد وين وليد؟
ام وليد سكتت وناظرت بغسان اللي لابس وبيطلع مع ابوه...
وليد كان جاي من وراهم وهو لابس شورت بني وبلوزة صفرة بدون اكمام....
ناظر فيه وقال بحدة تفضل شرفنا بنروح الشركة ...
مشى وليد وراهم بتملل ولف له ابو احمد وقال خير وليد باشا؟
وليد تقول تعال معنا الشركة؟
ابو احمد وانت متاْكد بتروح معنا بالشكل ذا؟
وليد شفيها يبى؟
ابو احمد بصراخ سكتهم كلهم وخلى نسايم اللي جاية لهم توقف مكانها اذا ماتسنعت وصرت رجال لاتلوم الا نفسك؟
ام وليد ابو احمد شفيك الله يهداك...
ابو احمد بصراخ شوفي ولدك شلون بيروح معي الشركة؟
بالذمة هذا شكل واحد بيشتغل؟
شوف اخوك شلون لابس ومهندم وشوف حالتك؟
شوفه شلون يفرض على الناس تحترمه وتحترم كلامه مو انت بلبسك هذا اللي بتخلي الناس تاخذ عنك فكرة مش كويسة؟
وليد بضيق يبى...كل الشباب يلبسون كذا..
غسان صح كلامك وانا البس مثلك بس الوالد قصده ان بالشركة لازم تلبس ثوب وتشمغ وتعطي نفسك هيبة اكثر....
ابو احمد اسمعني غسان انتظر ها الدعلة يتحمم ويبدل وجيبه معك لاتجيني الشركة الا فيه سامعني!!
قالها ومشى وترك عيون الشر كلها تناظر بغسان اللي واقف مكانه,,,,
البارت التاسع والاربعين,,,,,
كل الانظار الشرانية اتجهت لغسان واللي ماقدر يمسك نفسه ويناظر بس تقدم منه ومسكه من ياقة ثوبه...
وليد بحقد انت على بالك لمى تجي بااوقات فراغك وتسوي روحك الرجال واللي يهتم بحلال ابوه بتكبر بعيونه؟
غسان بهدوء خلك عاقل وبلا ها التصرفات الصبيانية ياوليد؟
مريم بحقد اخوي عاقل وغصبا عنك وعن اللي جابتك ولامفكرين انتوا بس اللي عاقلين ياعيال العراقية؟
تنهد غسان وحاول يبعد يد وليد عنه..
ام وليد بكراهية هم بس اللي عاقلين واللي فاهمين وانتوا الله لكم!!
غسان تنهد وبس...
ام وليد بكراهية اكبر مدري شعليه شايف حالك يا ......
وليد انا اذا مااعرفك قدرك زين......مااكون وليد...
ابو احمد من وراهم يالله عرفه قدره.....
لفوا كلهم له ووليد ترك غسان بس شاف ابوه...
ابو احمد وهو يناظر بوليد يالله عرفه قدره وخله يفهم ليش واقف؟
يالله انتظرك انا تعرفه قدره شنو يالفالح؟
سكتت كل العيون والالسن بعد كلامه والكل وقف بمكانه...
ابو احمد صار واقف قبال وليد ومايفصلهم شي ورفع يده بيضربه بس غسان مسك يد ابوه بسرعة ونزلها...
ابو احمد بحدة وهو ماسك وليد من بلوزته انا ماابي كل يوم والثاني ورافع يدي عليك وكنك ولد عشر سنين توك تتعلم!!شوف واللي عطاني اياكم انا فيني قهر اذا ماتتعدل وتصير ادمي مابطلعه الا فيك سامعني!!!
غسان يبى هدي نفسك وليد عارف..
ابو احمد بانفعال هذا اخر تحذير اعطيك اياه يالزفت فاهمني...ويالله روح انقلع وتحمم وتعال الشركة ..
لك ساعة وحدة بس لو ماجيت صدقني مابيصير لك خير؟
قالها ومشى مع غسان.......
ووقف وليد يناظر بامه اللي كانت تغلي.....
كانت جالسة بغرفتها....
حطت الكتاب اللي كانت فاتحته بدون ماتقراْ منه أي شي جنبها وقامت...
راحت للدولاب وفتحت الدرج اللي داخله....
فتحت الصندوق الصغير اللي كان فيه...
ها الصندوق اللي مانفتح من مدة طويلة...
يمكن مافتحته غير مرة وحدة بس ولامرتين من حطت فيه السلسال....
تنهدت يوم شالته بين يدينها وهي تناظر فيه....
ها القلب الفضي اللي عطاها اياه جراح بليلة زواجها...
تنهدت...
مو من شكل القلب....
من الكلمة اللي انقالت يوم عطاها اياه...
من كلمة احبك اللي قالها بحرقة بذيك اللحظة؟
من كل دمعة نزلت بيدها وهو يسلمها السلسال؟؟
تنهدت....
وش اللي قاعد يصير لك ياهالة؟
ليه تفكرين بجراح؟؟؟
لاانا ماافكر فيه انا بس قاعدة استعرض مواقفه معي...
جراح يحبني...
كل شي فيه يقول كذا...
لا....لاجراح ولاغيره بيدخلون حياتك.,...
انتي مالازم تربطين مستقبلك باي شخص ولايهزك شخص مثل جراح بكلمة احبك؟؟؟
انتي حياتك انتهت...
وقلبك ماراح ينفتح لانه بوقت اللي كان لازم ينفتح تسكر!!
الدنيا انتهت عندك ياهالة...
خلك بشغلك وبس!!
الحب مايجوز لك...
انتي اذا بتحبين بتكون نهاية حبك ارتباط وانتي بتنحرمين من الارتباط خلاص؟؟؟؟
تنهدت بقوة اكبر وهي تسند جسمها على الدولاب....
ياهي سودة ايامك ياهالة....
كم صار عمرك علشان تنتهي حياتك وتنهي معه شبابك؟
حتى الثلاثين مادخلتي!!!!
بس العمر راح مع وضعك اللي قاعدة تعانينه؟؟؟
خلاص لازم ترجعين هالة القوية وتنسين كل شي ورى ظهرك؟
انسي الحب..انسي الزواج..انسي الارتباط....انسي كل شي؟
أبكتم غصتي يمكن!!.أعيش بدنيتي مرتاح
وبحاول قد ماأقدر عيوني ماأبكيها ..
أخبي كثرة الامي ولكن ناظري فضاح
سعيت بكل مافيني حكي النظرات أخفيها ..
لكن مابيدي حيله لو اسكت همي نادى وصاح
يعاتبني بقوله ليه؟ كذا نفسك تعنيها ؟
ياهمي ليه تسكني أنا اللي أطلبك تنزاح
وإذا ماودك تسافر ترى روحي بعزيها ..
كتمت الاه في جوفي وهمومي بخافقي سياح
تعبر حزني دموعي أدور من يواسيها ..
يادنيا من يواسيني؟ وأنا ماشفت غير جراح
جروحي أكبر همومي ولا في من يداويها ..
سعيت أحقق احلامي وبلحظه مابنيته طاح
ظروفي إستغلتي من أولها لتاليها ..
فقدنا الحب بالدنيا خساره كل شي" راح
حتى ايامنا الحلوه من التفكير نمحيها ..
ياقلبي إترك الذكرى ولاتسأل متى ترتاح؟
أخاف أجاوبك وابدا حكايه كنت منهيها ,,
في المستشفى...
كان بو مشاري بحالة شرود وسرحان والهم كاسر وجهه وظهره...
ومشاري كان واقف جنب اخته اللي راقدة على الفراش بعد ماطاحت عليهم....
الحمدلله رب العالمين..
ازمة وتجاوزتها؟
تنهد بقوة وهو يناظرها...
ليه كذا حظك يازينة؟
ليه تعيشين ها الظروف الصعبة؟
ليه تحبين انسان مرتبط ويحب مرته؟
ليه قلبك ماحبه الاهو وانتي عارفته؟؟
ليه تنحرمين من الحياة الحلوة وتعيشك الكاءبة وكل شي حولك وتحت رجلك؟
اه بس يامشاري اه لو يقدر الواحد يشتري سعادته بفلوسه كان ماعاش انسان بها الدنيا مهموم؟
كان يبيع كل شي ويشتري سعادته وراحة باله؟
لف لاابوه اللي كان ينادي عليه...
مشاري شفيك يبى؟
ابو مشاري بغصة ماصحت اختك؟
مشاري لايبى ....انت قوم ارتاح وانا بظل جنبها لو احتاجت شي؟
تنهد ابو مشاري ومسح دمعة وقال وين الراحة واختك قاعدة هنا يامشاري وين؟
مشاري حط يده على كتف ابوه وباس راسه وقال يبى قول الحمدلله عدت من الازمة وكلها كم ساعة وتفتح عيونها وتكلمك....
تنهد ابو مشاري وقال بحزن وهو يداري دموعه بس هم عاندوه وطاحوا شتسوي لو كنت مكاني يامشاري؟وانت عارف اللي تاعبها؟وصعبان عليك تسوي شي لسعادتها؟
تنهد مشاري وماعلق بشي....
كانت دارين تمشي طالعة للسيارة ومعها فاطمة تمشي....
ومطلق كان طالع لسيارته ووقف يشوفهم....
دارين والله يابنت الناس ماهو هنا؟
فاطمة تكذبين علي ماتبيني اقعد معه؟
دارين راح مع ابوي للشركة من بدري علشانه الليلة بيرجع الكويت....
فاطمة بتهديد واذا دخلت وشفته؟
دارين وهي تضحك وتجر خد فاطمة يبى عليك بالعافية تهني فيه طيب...
فاطمة بدلع تيب...
ضحكت عليها دارين وهي تهز راسها...
فاطمة وين بتروحين؟
دارين الجامعة..
فاطمة وش تسوين؟
دارين ادرس...
فاطمة ليه؟
دارين علشان اكون شي بالمجتمع وافرح البابا.....
فاطمة امممممم
دارين يالله سلام..
فاطمة تعالي وين؟
دارين خلاص بروح لااْتاخر؟
فاطمة طب خذيني معك؟
دارين وين اخذك؟
فاطمة الجامعة اللي تدرسين فيها؟
دارين مايرضون تدخلين هناك انتي بعدك صغيرة؟
فاطمة خلاص مااحبك؟
دارين خلاص اليوم بطلع معك لاني بطلع مع صاحباتي نتسوق ماشي...
فاطمة متى؟
دارين العصر...طيب...
فاطمة موافقة.....بس مو تنسين؟
مطلق بصوت يسمعهم ومافي اذن علشان تروحين كل شي بكيفك؟
لفوا له ثنتينهم وفاطمة قالت باصرار انا وافقت خلاص...
دارين سكتت وهي تشوف نظرات مطلق لها...
مطلق طيب روحي داخل خلاص وبعدين نتكلم؟
فاطمة مو بكيفك بروح يعني بروح...وبروح البس واتجهز من اللحين؟
قالتها بعناد ودخلت..
مطلق بهمس وانا معزوم معكم؟
دارين وهي تمشي للسيارة قالت بهمس وهي كاتمة ضحكتها لا..
مطلق بخيبة امل افا بس....
دارين ابتسمت وفتحت الباب..
مطلق ليه..
دارين بدلع كذا مزااج بطلع مع صاحباتي انت شكو؟
مطلق وعيونه بعيونها وهو يغمز لها بعينه بجي معكم يعني بجي انا مااترك حبيبتي تتمشى بالاسواق بروحها؟
دخلت السيارة عنه وهي تبتسم له وهو مبسوط....
اللحين فهمنا انك تفكر ياجراح...
بس ليه ماعندك اسلوب مثل العالم والناس عاد؟
ليه دايم تطفشني اذا شفتني!!
ليه دايم تحتقر اخواني وامي؟
انا اعرف اللي يحب يكسب اللي يحبه باهله قبل كل شي بس انت غريب؟
قالت لي نسايم ان جراح فيه اطباع غريبة يعني تصرفاته معهم شي عادي...
طيب اللحين وش الخطوة الجاية؟
وش اقوله؟
كيف اروح ابتدي معه انا السوالف ؟
اممم مالي الا نسايم تدبرني هي تعرف اطباع اخوها وتدري انه يحبني ؟
زينة بضعف عمي بو احمد
ابو احمد بخوف هلا يبى.....
زينة عمي مارجعت ريم؟
تنهد ابو احمد وماعلق بشي......
كان احمد جاي مع ابوه وغسان بعد ....
وبس انقالت ها الكلمة طلع غسان ومشاري من الغرفة وظل احمد مو قادر يرفع راسه يواجهها ؟
ليش دايم تتمنى انه يكون مع ريم؟
غريبة ها الزينة..كيف تقول انها تحبه وتبيه يكون مع مرته؟؟؟
تنهد ويوم رفع راسه لقاها تترجى ابوه بضعف عمي حلفتك اذا لي خاطر رد ريم الليلة البيت....لاتتعب احمد اكثر من تعبه؟شوف كيف تعبان ومتضايق؟
ابو احمد اخذ بعضه وترك الغرفة وطلع...
ظلوا بروحهم بالغرفة هي وهو....
تنهدت بقوة ودموعها بعينها والضعف باين فيها وقالت انا اسفة يااحمد ماكنت ابيك تتعب وتتضايق كذا...بس ولايهمك يالغالي عمي مابيرفض طلبي والليلة ريم بتكون عندك انت بس لاتضيق خلقك...
تقرب منها وقال بانفعال زينة...ليه....
زينة بضعف وهي تناظره شنو اللي ليه؟
ضاعت منه الكلمات وماعرف شيقول حس انه مخنوق...تصرفاتها معه قاعدة تخنقه اكثر واكثر....
تنهد بقوة وقالت بغصة سلاماتك.....الليلة بتقر عينك بشوفتها ان شاءالله...
قال بانفعال زايد وهو مخنوق زينة بس...لاتصغريني بعيون نفسي اكثر...
خنقتها عبرتها وبكت...بكت بكل مافيها وقالت بحسرة وصوتها متقطع احمد انا احبك........ولاني احبك اقولك اني اسفة على اللي صار...ماراح يتم العرس تطمن.....احبك....وانا عارفة انك مو نصيبي!!!
كان يناظر بعيونها وهي تبكي وتقوله ها الكلمات...
تقرب منها وقال وهو يحاول يهديها زينة...هدي لاتبكي....
كملت باقي كلامها بعيونها....لان لسانها ماطاعها وقال اللي تبي تقوله...
أدرٍيٌ أنكـ ٌمنتْ ليٌ
بس أحبــــــــك ..
ما أبي منك أي شيء
أنا حبيتــــــك بعــد ما شفتـــك
واناعشقـــــــتــك بعـد ما عرفتك
ومجنون يوم أني أفقدك
أدري أنك منت لي
بس ( أحبـــــــــــــــــــــــــــكـ )
أنا من قبلك كنت أعاني
يوم حبيتــــك صرت شخص ثاني
والآن فقدتك يعني برجع أعاني وأعاني
أكثر من أول ومن اللي جاني
ما يهــم وش نهايتـــي
مايهــم كل اللي راح من دنيتي
المهــــم أني ( أحبــــــك )
حتى وأنا أعاني
المهـم أني أحبــــــــك لحالي
أدري أنك منت لي
بس ( أحبـــــــــــــــــــــــــــكـ)
ام وليد انتي لسه مابدلتي؟
مريم ليه وين بنروح؟
ام وليد ياحظي اقولك زينة مرمية بالمستشفى تقولين لي وين بنروح؟
مريم بنرفزة واذا هي بالمستشفى انا شكو؟
ام وليد بانفعال انتي لاتقهريني وتبطين كبدي؟شنو يعني انتي شكو؟
انتي ناسية انك زوجة اخوها اللي من طلع ذاك اليوم مارجع من سواد وجهك؟
مريم بتاءفف ردينا على ها السيرة...
ام وليد امشي خلصيني انا بروح وانتي بعدين تعالي وراي يالله لاتتاءخرين بعد مايصير بو مشاري مايشوفك جاية تساْلين عن زوانته... وظلي هناك ولزمي انك تبقين معها علشان تكبرين بعينه ياحظي؟
ترى ذولا اللي يجاملهم ويبين لهم حبه مايخسر بالعكس يربح الخير ...
طلعت ام وليد ومريم مقهورة ودقت على نسايم...
نسايم هلا وغلا..
مريم امي راحت لزينة بالمستشفى وتبيني اروح؟
نسايم ليه شفيها؟
مريم بلامبالاة يقولون تعبانة طايحة عليهم امس..
نسايم أي..
مريم بضيق لازم اروح...ماابي اضيق خلقي انا المستشفيات مااحبها ولااواطنها بعيشة الله وهي زينوه ماتنبلع عندي من ثقل دمها مابالك اللحين تعبانة يالله وش يشيلنا من الارض؟
نسايم .......
مريم انتي وش رايك اروح لها ولامايلزم؟
نسايم بخبث مو لازم تروحين مدام اخوها لسه ماكلمك ولاقال لك شي...كذا بيفهم السالفة انك عادي ومابيحط لك قدر وقيمة..بالعكس انا افضل انك ماتروحين علشان يدري انك انتي الزعلانة عليه ويجي يراضيك؟
مريم كذا رايك..
نسايم أي طبعا..
مريم خلاص اجل مو رايحة....
سكرت من مريم وراحت لامها علطول..
نسايم يمه..
ام مطلق هلا..
نسايم قومي لبسي بنطلع...
ام مطلق وين؟
نسايم زينة بنت بو مشاري بالمستشفى خل نروح نزورها ونقوم معها بالواجب....
جراح خير ليه تبكون؟
ماردوا عليه وظلوا يبكون.....
مطلق بخوف اكبر احد قايل لكم شي؟احد ضاربكم؟
شيخة راح..
جراح منهو اللي راح؟
عايشة غسان....
مطلق متى راح؟
شيخة مدري....
جراح طيب واذا راح وش بيصير بالعالم يعني؟
شيخة عمي انت ماتحس ولابتفهم بعد؟
جراح بعد!!!
مطلق كتم ضحكته وقال وهو يجاري بناته أي والله ياجراح انت لاتفهم ولابتفهم ولابتحس بعد...
عايشة جت لحضن ابوها...
مطلق تعالي يابابا تعالي...كسر خاطرك ولد العراقية راح وماودعك..
عايشة وهي ذابحة نفسها من البكي ليه تقوله ولد العراقية يبى؟
مطلق وهو يتبوسم لان امه عراقية....اصلها عراقي...
عايشة يبى قوله يرجع..
مطلق يابابا هو رايح يدرس هناك هذاك مستقبله بس يخلص بيقعد هنا علطول وبتشوفينه؟
جراح عشتوا ...عيلة مامنكم ابو فاشل وعيال افشل منه؟
شيخة وهي تمسح دموعها وعمنا بعد فاشل؟؟
جراح اسمع بعد هاذي؟لاتقولين تبين فلوس بالعيد مابعطيك؟
شيخة انت ليه تقول ان البابا فاشل؟البابا احسن واحد بالعالم..
مطلق باعجاب كفو والله بنتي الحلوة تعالي ببوسك..
جراح والله مايجمعكم غير التبوس والتحضن وبس!!!
دخل غسان البيت وسلم وفزوا يوم شافوه وراحوا له علطول...
شيخة وهي ماسكة يده يعني مارحت؟
غسان وين؟
عايشة الكويت؟
غسان لا لسه...
شيخة بتوعد يعني فطوم تكذب البقرة؟زين شغلها بعدين...
جراح بتهديد محد يلمس من فطوم شعرة....
عايشة بس هي كذبت عمي ..
جراح بترقيع ماتقصد كانت تمزح معكم؟
شيخة اجلس..
غسان مقدر..
عايشة بوزت ليه؟
غسان بتعب بروح اتحمم واجهز حالي بمشي بعد الصلاة....
شيخة لامافي اجلس معنا...
غسان طيب بشوف اختي هي داقة علي تبي اخذ لها اغراض وبعدين بجيكم...
شيخة وعايشة بصوت واحد لا....
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك