رواية يا لبيه يا الدنيا العجيبة -39
فتحت الاغراض اللي امها جايبتها وبتطلع البن والذي منو
حطت الدله ع النار وطلعت الفناجيل وحطتها بطوفريه تذكرت انها جايبه معها كيس فيه جلاكسيات وبسكويت وطبعا الكتكات اللي مستحيل تعوفه راحت تجيبه وحطته بسله كبيره
خلصت القهوه شالتها و ودتها
نوف:الحين هذي الضيافه مع وجهك قهوه حاف
دانه: مطيوره هالبنت ماعندها صبر
...........
حس بعطش مابعد حطوا في الثلاجه اللي بقسمهم مويه .. كلم امه تقول لخدامتهم تجيب كميه بس شكلها انشغلت
راح قسم الحريم نادى على شغالتهم اكثر من مره ماجت الظاهر بعيده
دخل المطبخ فتح الثلاجه لقى فيها قوارير موية صحه اخذ له وحده وشرب مستانس
خلص وجا يطلع شاف اسله مليانه فوق طاولة الطعام قرب منها شاف الجلاكسيات ابتسم :اكيد ذي للبنات وقام يعبي بجيوبه وشاف الكتكات ابتسم اكثر طلع اللي اخذه واخذ الكتكات كله
ضحك من قلب: حلوه المقالب من البدايه
سمع صوت قام توزى تحت الطاوله
دخلت دانه وشافت السله مو على حطة ايدها لا ولا الكتكات مافي ولا واحد" بسم الله من اخذه"
دقت على حمد
حمد:هلا
دانه: شوف البنات كانوا معي وامي وخالاتي مالهم بهالسوالف.. يعني مافيه الا انتم تعودنا على هالحركات
حمد: دندون ترا اصله معي
دانه:ايه سوي نفسك ماتدري
حمد:صبر جميل والله المستعان وش تبين بالضبط
دانه:الكتكات كله ترجعونه لا والله اعلم خالي سطام
حمد: والله مدري عنه يمكن واحد من الشباب
دانه: مين اللي موب عندكم منهم
حمد: تركي وخالد
دانه: تركي نايم فوق .. اجل مافيه الا خالد هين ياخالد
حمد: ايه نسيت نادر بعد مو فيه
ارتبكت تذكرت ان عشقه الوحيد الكتكات:اهااا
حمد: ولاتزعجيني .. سلام.. وقفل
دانه بصوت عالي: ان كانه خالد برجع له المقلب واذا نادر ماراح ارجعه ولاحتى بتنازل له
طلع من تحت الطاوله وهو معطيها ظهره
خافت:يمه
نادر صار يطلع الكتكات من جيبه: اصلا انا اللي ما اتنازل ولو اني ادري انه لك مافكرت مجرد تفكير اخذه
سكتت
وهو لف وطلع من المطبخ
...........
حس ان الصداع خف شوي
شافها قاعده عنده تبسم
ردت له الابتسامه: صح النوم
تركي:صح بدنك.. وش مجلسك هنا
جوري: خفت تحتاج شي وانا بعيده
تركي:عساني ما انحرم
جوري: كنت تحلم صح
تركي:لا
جوري: الا كنت تتكلم
تركي:ماحسيت بنفسي
جوري: كنت تقول جوري لاتقتليني
سكت
جوري:يعني كنت تتحلم
تركي: كوابيس مالها تفسير اضغاث احلام ..
جوري: حالتك مو عاجبتني
تركي: ولا انا يمكن بمرض
جوري: اعمل حسابك نروح الدكتور
تركي:لا مايحتاج
جوري: اذا لي قدر بتوافق
تركي: لك قدر ونص قومي جهزيلي ملابس وحطي لي اكل جوعان وبعدها نروح
فرحت:صدق
تركي:ايه..
جوري: طيب الحين اجهز لك ملابس وبحط لك اكل لاني انا بعد جوعانه
تركي:ماتغديتي
جوري:لا ابي معك
تركي:يالبا روحك
تبسمت
نادر:هذي كل السالفه
ابو جمانه: والله السالفه معقده يا ابوك وماتجي كذا
نادر: مدري انا ابيها كذا
ابو جمانه: انا بسوي اللي علي
نادر: خال تكفى اول مره ابي فزعتك
ابو جمانه: على هالخشم والله.. بس
نادر: واللي يعافيك لاتبسبس ادري كلمتك مسموعه
ابو جمانه ضحك: طيب ابشر
.............
ساره:وعشان كذا قال البس عباة راس
ندى:هههههههه ياحليله
نوف: انا عن نفسي الحمدلله البس عباة راس يعني مانيب بجاجه لاتزوجت يقول لي هو
منى:لا ياحبيبتي مو شرط انا عندك ليومك هذا فيصل ماقد قال لي
ندى: بس لو قال لك عادي تطيعينه
منى:اكيد مايبي لها كلام
ندى: سمعتي دندون بتطيعه
نوف:ههههههههه عاد هي تقول مستحيل احد يفرض عليها
ندى:صحيح دانه
ودانه مومعهم
جمانه: هالبنت من جد غريبه قبل خمس دقايق وكانت تمام وش اللي قلبها
ساره: والله ماكانت كذا
انتظروا منها تتكلم بس ماردت
ندى:هيييييه انت نكلمك
عصبت دانه:انا طالعه لحد يكلمني
استغربوا من ردة فعلها
نوف:اعوذ بالله نفسيه
نزلت جوري: بنات تركي بينزل وشافت اماني بينهم راحت لها وضمتها:متى جيتي
اماني:مالي كثير
جوري:يابعد عمري والله كنت ناويه اكلمك تجين
اماني:ما احتاج عزومه انا جيت
جوري:من قال لك اننا هنا
اماني: امممم حزروا
البنات:مين
اماني:عمي محمد اول واحد دق علي وبعدها ابوي
ندى:ابوي؟
اماني: ايه ابوك شفيكم مستغربين
منى:مانقول الا سبحان الله
سمعوا صوت تركي:جووووري
جوري:ول نسيت رجلي .. بسرعه تغطوا
ندى: وين رايحين ماسكه عباتك
جوري:بنروح المستشفى ذابحه الصداع
نزل تركي وجوري لبست عبايتها وتوهم بيركبون السياره جات ام تركي تهرول وتبكي:يمه تركي شفيك
تركي انفجع:شفيك
ام تركي: انت اللي وشفيك
ضمها :يابعد قلبي يمه هذاني قدامك مافيني الا العافيه
ام تركي: ليش رايح المستشفى
تركي: عشان الصداع يروح ويجي وماودي اذبح عمري بالبنادول..واالا عادي اذبحها
ام تركي:سلامتك جعل يومي قبل يومك
تركي: لا ان شاءالله ..الله يطول في عمرك
جوري كانت تتأمل في ام تركي شافت الحنان متجسد في هالانسانه حبها لعيالها اكبر من اي شي
ام تركي: اصبر بجيب عبايتي
تركي:لاياقلبي ماراح نتأخر..ولاتشغلين بالك
جوري:لاتخافين عليه انا معه
ام تركي: اجل طمنوني اول ماتطلعون مو اذا وصلتوا هنا
تركي: ابشري يالغاليه
وراحوا المستشفى
تو ام تركي بتدخل
نادر:يمه يمه
ام تركي: هلا
نادر: وين يبي تركي
ام تركي:عشان هالصداع بيروح المستشفى ورفعت ايدها يالله ان تشفيه
نادر:وانا بعد ادعيلي
ام تركي: يشفيك من وشو
نادر:ههههههه لا ادعيلي دعاوي حلوه
ام تركي:بدعيلك تتخرج وتتزوج
نادر: الثانيه انقبلت الحين شكلها صادفت ان باب السماء مفتوح
ام تركي: لاتقول تبي تتزوج
نادر: وليش وش ناقصني
ام تركي:كامل والكامل الله الحين اروح اقول لها
نادر:مين
ام تركي:دانه
نادر:لالالالالالالا ..
ام تركي تضايقت: شفيك
نادر:لابس نادلي ندى
ام تركي:الله يصلحك.. طيب
وراحت تناديها
خمس دقايق وجت ندى:هلا نادر بغيتني
نادر:بخطب
بفرح:امااااانه
نادر:اي والله
ندى:بروح ابشرها ونااااااااااااسه
نادر:تعالي مو دانه هي انا ابي وحده ثانيه
ندى:هآآآ
نادر:بلا هآ ابي وحده ثانيه كيفي
ندى:اللي تشوفه منهي
نادر: اخت واحد من اخوياي
ندى: من وين تعرفها .. لايكون ...
نادر:لاتفكرين غلط.. بس انا اعرف ان عنده خوات بسن مناسب للزواج
ندى: ودانه؟
نادر: تبون راحتي ......
قاطعته:خلاص اللي تشوفه بس اول بقول لامي نسأل عنهم وبعدين
نادر: تعرفينهم انتي اخت هيثم
ندى:هيثم ولد جيراننا اللي بحينا القديم
نادر:وصلتي خير
ندى: ماعليهم بس ناسيه البنات كنا صغار يوم نقلنا من الحي وقتها
نادر:اسألي منى
ندى: ان شاءالله
............
منى: فقدتك
فيصل:وانتي بعد
منى:يارب دوم تفقدني
فيصل:ان شاءالله وش اخبار البيبي
منى: واحشهم
فيصل:اجل جيبيهم انا عند المسبح
لحظات وجابتهم في العربه
شافهم وجلس يلاعبهم وتناساها او يحاول يتناساها
منى تتغصب الابتسامه: ماشاءالله اجل فقدتني
فيصل: اشوفك قمتي تغارين من عيالك
منى:اي اهتمام منك لهم يوصلني.. يكفيني هالشي
فيصل:يكفيك؟؟
منى: يافيصل لاتفسر الشي على مبتغاك الله يصلحك حتى الكلمه الوحده مني تفسرها غلط
فيصل:انا رايح
وراح وخلاها واقفه وراه
..........
طلعوا من عند الدكتور
جوري:الحمدلله يعني اللي فيك دلع
تركي: اه ياجوري لو تحسين باللي احس به تصدقين اني توقعت عندي ورم
جوري:بسم الله عليك.. هذا انت سمعت الدكتور يقول التحاليل سليمه ومافيك الا العافيه
تركي:اللهم لك الحمد.. خليني اكلم امي اقول لها
............
بالمطبخ
زينوا القهوه والشاهي والحلى وكل شي
منى: نصااابه
ندى: والله العظيم
منى: ماله داعي من جد ودانه
ساره: بنات عادي لاتحطون دانه بطريقه
منى: والله طايحه وجيهنا منكم
ساره: والله عادي الله يرزقه ويرزقها
نوف كانت توها بتدخل وسمعت الكلام
بس تراجعت مادخلت وطيران عند دانه تعلمها
دانه: يمه شفيك روعتيني
نوف:خبريه بتعكر مزاجك
دانه:يارب استر ناقصه انا .. وشو
نوف: نادر بيخطب بنت جيرانهم اللي بحيهم القديم
دانه:طيب؟
نوف: وش طيب.. اقول لك بيخطب
دانه: الله يسعدهم ويوفقهم
نوف: توقعت تزعلين
دانه: نادر ماهوب لي وانا موب له فليش اتعلق في سراب او بمعنى اصح ليش اتضايق
نوف:يعني مازعلتي ابد
دانه: شوي بس ههههههه
تركتها نوف وهي الخبر مأثر عليها وتفاجأت بردة فعل دانه
راحت دانه قفلت الباب ودفنت نفسها بالفراش وبكت بحرقه" ليش يانادر ليش"
..........
عند الشباب
عبدالرحمن:انا باخذ ساره ولو تنطون السماء ماخذيت احد معنا
نادر: قلعتكم
طارق:ههههههههه مافي وقت الرد والم
عبدالرحمن: ماراح ارد عليكم
ورفع جواله يدق على ساره
وطلع برا يكلمها
ساره:هلا دحومي
عبدالرحمن:هلا بهالصووووووووت
ساره:هلابك زود ياروحي
عبدالرحمن:هاحبيبي جاهزه
ساره:اننتظر البنات يخلصون واشوف من بتجي معنا
عبدالرحمن:احقريهم مانيب ماخذ وحده
ساره:هههههههههه لا وش بيقولون ع الاقل ثنتين بس ناخذهم معنا
عبدالرحمن:اسف ابيك انتي بلحالك
سمع صوت ندى: مالي دخل بجي معكم
عبدالرحمن: والله ألحطها بالعقال لو اشوف ظلها عند السياره
ساره فطست ضحك: يقول بيلحطك بالعقال لو يشوف ظلك
ندى:ههههههههه لا اجل هونت مانيب بايعه عمري
عبدالرحمن:سوسو انتظرك اوكي
ساره:اوك انا طالعه
وراحوا البحر كان زحمه فما امداهم ياخذون راحتهم
قعدوا مع بعض وكلهم طبعا متغطين
عيون فيصل على منى اذاها كل مره ونزلي الغطى على عيونك
ونفس الشي مع عبدالرحمن وساره
بس شتان مابين الاسلوبين والمغزى
وراح الوقت كله مع البعض بوناسه وتريقه وذبات
خالد: نادر ماتحس انك مخنوق
نادر فهمها: مخنوق وبقوه اللي يعيني
تركي:هههههههه بنات ترا يقصدونكم
ندى: والله اني داريه بس معهم حق
ماتوقعت بيكون زحمه ليتنا جايين الصباح احسن
نادر:بارد على قلبي ليته دايم زحمه
منى:حررااام عليك
فيصل: يبي يستانس لوحده مع خشته
تركي:انا بتمشى شوي مع جوري وبنرجع المزرعه
فيصل:حتى انا مو راضي عن الوضع بمشي الحين
منى:ع الاقل نتمشى شوي
فيصل:لامايمدي
منى تضايقت حيل من اسلوبه
نادر: من جدكم انتم وش هالتعقيد عادي
تركي: لا انتم خلوكم بس انا باخذ جوريتي وحاس اني بردان
نادر:الجو رطوبه اي برد
جوري: هو من اليوم يشكي.. خلاص تركي يلا رجعنا
طارق:اجل روح ارتاح وبكرا الصباح من بدري ماراح يكون فيه ناس واجد بنجي
تركي: حتى انا هذا تفكيري
قام فيصل:يلا منى
نادر: خلاص فيصل انا ارجعها معي
فيصل: لا لا ترجع معي
كلهم مستغربين من اسلوبه وتعامله
وراحوا الاربعه
عبدالرحمن: نفسيه قسم بالله
خالد:ههههههههه حمد شوف وش يقول عن اخوك
حمد: ينقص من ذنوبه
نادر:عزالله هواء البحر خطف عقولكم وشفيكم كذا
ندى:يمكن عشان ما اخذنا راحتنا
نادر:اجل يلا المزرعه ونفل ابوها
طارق: ونشوي
عبدالرحمن: ونطقها لعب ودي ارجع لايام الطفوله
جمانه بهمس: الحين توها تجيهم الافكار
اماني: خل نشوف النهايه
جمانه: والله ودي لو مترنا البحر طول وعرض بالتمشيه
اماني:انا مليت منه وربي
جمانه: طيب قولي لهم لايرجعون علشانا ع الاقل
طارق: وش عندك اماني
اماني: لا بس جمانه تقول طفشت وجو المزرعه احسن بكثير من هنا
جمانه شاهقت
دانه: بسم الله بنت خالي شفيك
اماني تضحك
طارق:شباب خلاص انا قدامكم مع البنات بنرجع المزرعه ونقلبها هيصه وش تبون بعد وعيونه على جمانه
وجمانه حاقده على اماني
ساره بهمس: دحومي والله خاطري اقعد
عبدالرحمن:يابعد قلبي انتي شوفي المكان زحمه يخنق لكن بكرا الصباح اجي انا وانتي وناخذ شاليه لي ولك
ساره: وناااااسه طيب خلاص بسوي حفله لي ولك
عبدالرحمن: وش المناسبه
ساره: بدون مناسبه كذا
عبدالرحمن:اهااا.. ياشيخه لو تقولين حفله تنكريه مارفضت
ساره:هههههههههههههه
عبدالرحمن مبتسم: ياجعلي ما افقد هالضحكه
نادر كان يطالع في البنات كلهم يسولفون الا دانه
نادر:نداوي تعالي شوي
جلست جنبه
نادر: علمتي البنات
ندى:هاااا والله
نادر:ايه والا لا
ندى: ايه
نادر: ودانه درت
ندى: والله مادريت الا يوم حنا بالسياره اثاري نوف سمعتني وانا احكي لمنى وساره وراحت قالت لها
نادر: اهااا
ندى: والله حرام عليك
نادر: هههههههه احسن.. وقام
ندى:وين
نادر: بكلم امي اشتقت لها
دق جوال عبدالرحمن:هلا يبه.... ايه...... طيب...... لا خلاص بنجي....... انت ماقلتلي
وقفل
طارق:خير
عبدالرحمن: ابوي يقول اروح المطابخ اشيك ع الذبايح اثاري الليله عشاهم
طارق: وش عشاه
عبدالرحمن: عشاء عمي سلطان لخالتي لطيفه وعشاء ابوي للجميع
طارق: وناسه اجل مفاطيح
خالد: مفاطيح عاد
عبدالرحمن: ابوي عليه طلعات متى امداه
خالد:ومتى امداه يوديها المطابخ اصلا
عبدالرحمن:ما اقول الا عساه القوه..
طارق: اجل يلا شدينا الرحال ع المزرعه
................
تركي: تعالي نتمشى من هنا
جوري: والله ودي بس حالتك ماتسمح
تركي: لا بطيب عشانك
جوري:لا امش البيت مو بنجي الصباح ان شاءالله خلاص
تركي:بعد قووووويه ههههههههههههه
هامت في ضحكته رنتها تسللت لاذنيها وذابت مع اوتارها "اه ياتركي احب كل شي فيك"
مرت وحده متبرجه: دووووم الضحكه..
طالعت فيها جوري بنظرات قاسيه
تركي انتبه لنظرات جوري
التفت للبنت: تسلمين يدوم نبضك
وجوري طيرت عيونها
تمادت البنت: الله يسلمك
تركي: رايحين نعشى تتجين تتعشين معنا
البنت صدقت: اكلم اختي ونجي
جوري: تعالي تعالي مصدقه انتي
تركي: عادي خلي...
جوري:اسسسكت انت.. شوفي انتي ضفي وجهك لاقسم بالله تشوفين شي عمرك ماشفتيه
البنت: اختك شريره .. سلام
تركي كان ميت على شكل جوري
جوري : وبعد تبي تعشيها
طبعا ما جاوب لانه كان غرقان ضحك
جوري: مافيه شي يضحك
تركي: ياحبيلها العربجيه
جوري: عربجيه في عينك.. يلا امش المزرعه
ركبوا السياره وتركي لازال الضحك مستمر معه.. شافها مفوره
كتم ضحكته وطالعها: جوريه ترا والله مزوح
يكون بعلمك اول مره بحياتي اسوي كذا
جوري: براحتك عادي
تركي: راحتي معاك.. بس بشوف ردة فعلك
جوري كأن رد لها عقلها" فشله الحين وش بيقول بس اغار عليه يانااااس"
تركي: فديتها انا اللي ماتبي احد يقرب مني
تبسمت ابتسامة دلع
تركي: وربي هالابتسامه ترضيني.. اشوف فيها حبك لي وراحتك معي وهذا اللي ابيه
جوري: وانا وش لي
تركي فهم قصدها: يمه منك تبين مقابل
جوري: الدنيا اخذ وعطا
تركي: امممم شوفي انا اغلى حاجه فيني هذا .. وأشر على قلبه
جوري:طيب!!
تركي: بس ما اقدر اعطيك اياه
بصدمه: ما اجبرك
تركي: اكيد ماتقدرين تجبريني
جوري: طيب مشينا
تركي: طيب اسأليني ليش ما اقدر اعطيك
جوري: تركي خلاص ماله داعي
تركي:له داعي ونص..تدرين ليش ما اقدر اعطيك اياه
وسكت
اردف: لانك ياجوري سكنتي فيه
جوري: هاا
تركي: وش تفسرين شوقي لك وش تفسرين تغير معاملتي معك وش تفسرين اشياء كثيره.. ابسطها اني لاضقت بمجرد شوفتك تتبخر الضيقه واحس اني مالك الدنيا بكفه
جوري الكلام اللي تسمعه اكبر من طاقة تحملها ماتدري تضحك والا تبكي من كبر سعادتها
تركي: لاتعبترينه تكفير اخطاء عن اللي سويته صدقيني هو اللي يتكلم معك الحين مو انا
ماتحملت بكت
لو تبيع أيامي يالغالي شريتك
لوتزيد أحزاني من فرح قلبي عطيتك
انت أقرب الناس وانت محبوبي
انت القريب البعيد ومني وفيني
انت الأمل انت عمري انت مطلوبي
انت القصايد وشعري وفرحة سنيني
وش فيه لاصرت " أحبك " وانت محبوبي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك