رواية من أعماق أحضان مجنونة -59
كانت تمسح دموعها بيدها وهي تبكي بنار......
ابوها راح....ابوها مابيرد...الشخص الوحيد اللي يحبها بصدق تركها بروحها؟
شبيصير فيك يازينة.....
الايام الجاية شلون بتعيشينها؟
احمد؟؟؟
بتقدرين تنسيه وتشيلينه من بالك؟
خسرتي قربه اللي تمنيتيه طول وقتك وخسرتي ابوك بعد!!
وش بتفقدين بعد يازينة بها الدنيا؟؟؟
غمضت عيونها وكملت بكيها بحرارة ونار...
بعد مانزلت من فوق لقت الباب مفتوح وكان غسان جالس على عتبة الباب همست باسمه ولف لها.....
هالة ـ شفيك؟
غسان بهدوء ـ ولاشي
هالة ـ وراك قاعد لها الحزة..
غسان ـ ماجاني نوم...
هالة ـ شتفكر فيه؟
غسان ـ بما انك انتي اللي سائلة اكيد بقول بالدراسة؟
ابتسمت له وبادلها ابتسامتها...
غسان باهتمام ـ فيني انا اسئلك ليه انتي لسه مانمتي!!!
هالة بلف ودوران ـ كذا..
غسان ـ وش اللي شاغل بالك...روحة ابها..
ماردت عليه....
غسان ـ انتي كبيرة وعاقلة واكيد اذا بكرة روقتي وكلمتي ابوي من جديد بيوافق...الا انتي كم يوم بتروحين؟
هالة بلامبالاة ـ تصدق ماادري حتى ماسئلت؟
غسان ـ مارحتي اليوم؟
هالة ـ لا....ماكان لي نفس...
غسان ـ .....اليوم كلمت احمد عن زينة بنت بوم شاري...فيني اخذ رايك انتي بعد؟
قالت له باهتمام ـ شفيها زينة؟
غسان ـ كنت مفكر ارتبط فيها...
هالة ـ احمد اكيد مارد عليك...
غسان ـ فعلا لف ودار وماقال شي بس انتي وش اللي خلاك واثقة انه مابيرد..
هالة ـ لانه اخوي ولاني عارفة اسلوبه وعارفة اذا استحى وماقدر يقول اللي في باله..
غسان باهتمام ـ ليه وش اللي صاير؟
هالة ـ زينة تحب احمد......ويمكن هو ماعرف يقولك ها الشي علشان لاتظن ان الشي متبادل بينهم....
الا ناريمان وين موقعها من قلب غسان؟
بها اللحظات كانت نسايم طالعة من قسم ام وليد وسمعت هالحكي من هالة وارهفت سمعها للي بيقوله غسان,,,
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــ
شتسوي ياوليد شتسوي...
لازم توصل لبشاير باقرب وقت!!!ّّّ
والله اني مو قادر اصبر...
بالاول كان هدفي اخوك يابشاير بس اللحين انتي معه...
مدري على وشهو شايفة لي حالك ورافعة خشمك؟
ماغيرك حلو ولاماغيرك حلو؟
اصلا الله ماكثر الا من ها المزايين؟
الوعد بكرة يابشاير اذا ماارد احتقارك هذا لدموع وبكي العمر كله مااكون انا وليد؟؟؟
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ
صباح اليوم الثاني....
دق الباب بهدوء وماجاه أي صوت رغم انه متاْكد انه يسمع صوت بكي....
رجع طللع جواله وشاف رسالة مشاري الجناح الرابع وهو عيونه تقراْ الرقم على الباب...
رجع الاستقبال وسئلهم من جديد واكدوا له انها غرفة زينة عبدالله....
استحى يرجع يدق الباب ومايلقى أي جواب ويدخل فطلب من الممرضة تروح معه وتعطي زينة خبر...
وهم يمشون قالت له الممرضة ـ قريبتك؟
احمد بتحفظ ـ نوعا ما عندنا شوية قرابة,,,
الممرضة باسف ـ نفسيتها تعبانة طول وقتها تبكي...ودايم تطري ابوها؟
تنهد وتمم بكلمة الله يرحمه لين وصلوا الباب دخلت وعطت زينة خبر ان في احد جاي يشوفها بس صوت بكي زينة كان لبرى واصل لااحمد كانت تبكي بحرقة ..آلمه موقفها وضعفها مايدري وش اللي جاه..
طلعت له الممرضة تقول له انها اصلا مارفعت راسها......
تنهد ودخل ماقوى يرفع راسه ويشوفها وصوتها كذا رايح من البكي....
تنهد بحسرة,,,,مالومك يازينة يظل الابو غالي عند عياله ومحد يحس فيهم اذا فقدوه بس ارحمي نفسك انتي تعبانة,,,,
رفع راسه ونادى باسمها...
مرة ومرتين وثلاث وماوقف بكيها وشكلها ماسمعته..اولا هو كان جنب الباب يعني بعيد حييل عنها وثانيا صوته كان واطي وهو شبه يهمس باسمها.....
تقرب منها بخطى بطيئة وهو مفكر يرجع مدامها ماشافتها لانه مو متحمل بكيها.....
بس ماقدر هي محتاجة سلوى..محتاجة عزا,,محتاجة مواساة ومايقدر يتخلى عنها على الاقل لين يجي مشاري لها يخفف عنها؟؟؟
الله يكون بعونك يامشاري من وين تاخذها ولاشلون تسليها؟؟؟
احمد بصوت شوي عالي بعد ماتقرب منها بس كانت بينه وبينها مسافة ـ زينة...
وقفت لحظات وكانها تترجم صوته بس بعدها رجعت واصلت بكيها...
رجع يتنهد ويكلمها بحنان اكبر من قبل ـ زينة حرام عليك...
رفعت راسها اللي كان كله دموع وقالت بهستيريا ـ احمد وين ابوي؟
استغفر الله العظيم!!زينة شها الحكي؟رد عليها بعتب ولوم....
زينة بانهيار ـ راح..؟مات؟لا مو صحيح ابوي مامات...ماتركني....
احمد بمواساة ـ هذا كاس كلنا شاربين منه محدب يعمر بها الدنيا يازينة...وينهم السلاطين والجبابرة؟ليش ماظلوا فيها؟
زينة ـ ابي ابوي يااحمد ابيه...
احمد ـ زينة انتي تعذبينا كذا.....اطلبي له الرحمة وهو بيرتاح...دموعك وصياحك كذا يتعبونه؟
زينة بانهيار ـ احمد روح اطلع ماابي اسمع صوتك...
ظل يناظرها بدون مايقول شي...
زينة بتعب ـ حبيتك بكل مافيني حبيتك وماني قادرة انساك!!روح ابعد خلني اتناسى وجودك بحياتي..
احمد ـ زينة....
زينة ـ اطلع قلت اطلع يااحمد....
بدون مقمدات قال لها وهو مو داري ليش سئلها ـ ماكرهتيني ونسيتيني؟
صارت تمسح دموعها بكفوفها وقالت له وهي صادة عنه بكل تعب ـ بحبك اليوم وبكرة والعمر كله يااحمد ولابنساك بحياتي؟
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ
اشوفكم بخير بكرة ياحلوين...
البارت قصير هذا اللي بتقولونه خخخخخخ
البارت السادس والسبعين,,,,
ــــــــــــــــــــــــــــــــــــــــــــــــــ ــــــــــــــــــ
كانت جالسة برى ونسايم واروى ومريم طالعين جلسوا قبالها,,,,
ونسايم قامت وهمست لها بلهفةــ شصار؟
رفعت دارين عيونها لها بدون ماتقول أي شي....
مريم بغضب ـ ـ شعندك يانسايم؟
نسايم ناظرت دارين بحقد ورجعت لهم وهي تتحلطم..
اروى بغضب اكبر ـ فيه شي؟
نسايم ـ لاابدا بس قلت بفهمها للمرة الاخيرة ان اخوي مايناسبها وخل تنسحب بكرامتها؟
ناظرتها اروى بلاتصديق بس مريم مشت عليها...
اروى تكلم دارين ـ مارحتي الجامعة اليوم؟
دارين بعد بدون نفس ـ لا...
نسايم بصوت عالي ـ اللحين فنكشتوا الخطوبة خلاص؟
دارين ماردت عليها بس رفعت جوالها ودقت على رقم مطلق قدام نسايم اللي سكتت يوم شافت دارين تحطه سبيكر وتقوله بسرعة وكانها تسبقه لايقول أي شي ـ هاذي اختك نسايم تساْلك اذا تفركشت الخطوبة ولا لسه؟؟؟؟؟؟
ــــــــــــــــــــــــــــــــــــــــــــــــــ ـــــــــــــــــــــــــــ....
احمد تنهد وقال ــ زينة ..
زينة ـ لاتنطق اسمي ....,روح يااحمد روح ماابي اشوفك تكفى روح....
ظل يناظرها وبعدها قالت بحسرة وهي تبكي ـ خادمة تحت رجلك ..هذا بس اللي بغيته منك...
تنهد وقال بحزم ـ زينة...انا احب ريم,,,
زادت دموعها بها اللحظات...وغمضت عيونها..
كمل وهو متاْلم ـ هي تبيك ...تبيني اخذك يازينة ..ماتبيك تضيعين....وانتي تبين تاخذيني منها ومن حضنها؟
كيف تبيني اقابلها بعدين يازينة كيف؟
الانسانة اللي حبيتها وحبتني وتحملت كل شي مني وعلشاني...
كيف اقولها اني اخذت ولاحتى بادلت غيرها مشاعر عاهدتها تكون لها لوحدها؟؟؟؟
زينة كلامي قاسي وانا عارف ها الشي...
بس انتي بتعيشين حياتك مع انسان غيري بيوم من الايام وبتنسيني صدقيني....
انا يمكن كنت بحياتك مجرد صورة ولا حتى شخصية شفتيها ورسمتيها لفارس احلامك بس الحقيقة شي ثاني...
انتي الحياة قدامك وبترتبطين بانسان غيري يصونك اكثر مني.....
زينة...انا بظل جنبك وبعدك مثل دارين...بكون دايم الاخ الكبير اللي اتمنى لو احتجتي أي شي ماتنسين انه بيكون موجود جنبك....
انهارت بدموعها وبصياحها بقوة اكبر وقالت ببحة ـ جاي تجرحني بها الكلمتين يااحمد؟؟؟؟
ليه ؟؟شسويت لك انا؟؟
؟قِلهاَ وَ إخلص ! .. لا تراعي ليْ } شعُور{ ...!
أدري انّك عنْ غراَمي , ماَدريت ..
صارلك ساَعه : تلّف . بهاَ وَ تدُور ! ‘
ماَفهمت إلا عسى وَ ودّك .. وَ ليت .
قِل " ماأحبك " ! .. وَ إنتهت كل الأمور
خذ كِل إللّي تبي ] منّي .. [وَ قضيت .
ماَعليييكْ , أناَ على الفرقا‘ .. صبُور !!
باَني لي في صحاَري :- الصبر -: بيتْ .
قد فركّت من القهررْ , عشر ي نزور ! ‘ ..
وَبعت في )‘ سوق الهوىَ .. هَـم وَ شريت. ’(
لاتكدّر خاَطرك | رَح | وَ معذور ! .
" غلطتيْ وَ أتحمّل .. "انا الليْ بدييتْ.
وَ أنت لو قصّرت مامنّك قصُور
الخطاَ منّي!.وَلوّ إني ما [أ.خ.ط.ي.ت]
مِر فيْ سيرة هواناَ لو : مرور .
و إذكرْ إنك قد " شكيت " وَ قد " بكيتْ"
وَ إنكتبتْ بدفترك عنّي , سطُورْ
إكتب إني عقب [ زولكْ ... ماَهويت !!
وَ إن خذاك ملحكْ , إلىحد " الغرورْ "
جاني} أملّح{ منّك .‘ لكن مابغيت ..
هيّ ْ مقاَدير ْ .. وَخذتنا للدبّور
ماسعيت لها " أنت " وَ " أنا " ماسعيت. !
وَ إنْ بغيت | الشُور , عندي صِدقْ شُور |
جرّب دروب ] الهوى .‘ ورّدْ إن غديت
وَ انا ببقىَ فيْ ~ . مكاَني , ضُوح , نُور .
وَ | أحتريكْ | بـ:هالمكاَن , إلا إنتهيت !’
ــــــــــــ ــــــــــــــــــــــــــــــــــــــــــــــــــ ــــــــــ
هالة ــ شبغيت مني يبى؟
قالتها بعد مادخلت مكتب ابوها وكان يكلم فظلت واقفة شوي تنتظره لين خلص اتصاله ورفع راسه لها...
هالة ـ يعطيك العافية...
ابو احمد ـ الله يعافيك...
هالة ـ شكلك مشغول وبعطلك لو سولفت شوي...بس بقولك انتي مناديني؟
ابو احمد ـ أي..
هالة ـ ـ خير
ابو احمد عطاها ظرف فيه اوراق ومفتاح بيت....
هالة باستفسار ـ شنو هذا يبى..
قال بدون نفس ـ مفتاح البيت اللي بتجلسين فيه باابها؟
ناظرته بلا تعليق وهي مو فاهمة شي بس قالت بسرعة ـ انت وافقت أني اروح؟
ابو احمد ـ هو انا لو هي علي ماودي بس جزاه الله خير جراح اللي كلم مديرك وقصر مدة روحتك ورتب لك الرحلة بالكامل وعلشان يطمني اكثر عطاني مفاتيح فيلته اللي هناك علشان تاخذين راحتك.....وقال ان السايق والخدامة موجودين ماله داعي تشيلين معك احد وكل ليلة خميس بتنزلين عادي الشرقية....
يوم مدت له بالظرف والمفتاح وقالت ماابي اروح كان شال جواله وانشغل بمكالمة جديدة وماسمعها؟؟؟؟؟
ــــــــــــــــــــــــــــــــــــــــــــــــــ ـــــــــــــــــ
وهو طالع الا بشاير طالعة للسايق برى وكانت تكلم بجوالها...
اخذ بعضه وراح قبلها يركض ونزل السايق وقعد مكانه وهو انفاسه تتلاحق.....
دخلت السيارة وهي بعدها تكلم وهو مشى بسرعة وكانه خايف لايجي احد وتضيع الفرصة من جديد؟
تنهد بقوة وصار مشوش ومو عارف شيسوي.....
كان يسوق بسرعة كبيرة وصارخت عليه بشاير وهي بعدها تكلم ومندمجة ـ ووجع ان شاءالله وش عندك تسوق كذا تبي تودينا بداهية؟؟خفف لانروح فيها؟
وليد بشماتة ـ ليش يعني اذا ماخففت مابتروحين فيها من شي ثاني؟
على مااستوعبت بشاير الصوت وانه مو صوت السايق ورفعت راسها كانوا ابتعدوا مسافة كبيرة عن البيت مع سواقته المجنونة,,,
وقف قلبها...هذا وليد الداهية وش يبي ؟
لف لها وقال ببتسامة خبث ـ خايفة مني يابشاير؟
نزلت الجوال عن اذنها وظلت ساكنة مكانها بدون أي كلمة والصدمة مجمدتها بمكانها,,,,
وليد بشماتة اكبر ـ لسانك الطويل وين؟وين راح؟
بشاير برجفة ـ انت شتبي؟
وليد بتنهيدة رغبة ـ ابي بشاير....
وقف قلبها عن الخفقات رسمي من كلمتها ولهجته...هذا صدق ناوي على الشر وماشكل براسه مويه ابدا!!!!
وليد لف لها وقال وهو ياكلها بنظراته بجوع كبير ـ انتي حلوة يابشاير حلوة كثير....ومن حظي انك بتكونين لي ياقمر؟؟؟؟
ـــــــــــــــــــــــــــــــــــــــــــ
مريم ـ شفيك انتي!!!
اروى ـ .............
مريم ـ اكلمك انا؟
اروى بتفكير ـ نسايم؟
مريم ـ شفيها؟
اروى بحقد ـ خبيثة..
مريم ـ شنو؟
اروى بتنهيدة ـ هاذي تلعب على الكل ووين ماتكون مصلحتها هي تكون.....
مريم ـ مافهمت عليك؟
اروى ـ شفتيها مع دارين اليوم؟
مريم ـ شفيها؟
اروى ـ كانت تبي شي...تبي تعرف شي بس دارين ماعبرتها علشان كذا قلبت الموجة عليها......واكبر دليل كلام مطلق..
مريم بغضب وحقدـ انا اموت واعرف شلون بنت العراقية لقت لها واحد مثل مطلق يموت ويمشي وراها؟
اروى ـ اللحين انا في شنو وانتي في شنو؟
مريم ـ شفيك انتي؟
اروى ـ قلت لك وراها شي ها البنت وقاعدة تلعب على الكل....
مريم ـ لامااحس...
ام وليد من وراهم ـ لا بلى اختك معها حق...نسايموه مو هينة ابدا ....
لفوا لها ثنتينهم,,,,
ــــــــــــــــــــــــــــــــــــــــــــــــــ ــــــــــ
صاروا قبال بعض يوم تطلع من باب بيتهم تشوفه وهي عارفة انه جاي.....
انا آسف على ازعاجك رجيتك تقبل الاعذار
تجمّل بالذي يكتب حروف الشعر من دمّه
هداك الله لو تعرف غلاك وكم لك مقدار
تضيع بحب من حبّك وترمي حالتك يمّه
أنا مالي أحد غيرك أحبّه واكتب الأشعار
ولا غيرك سكن قلبي وخلآ الحال منسمّه
أنا من بعدك بغربه ولو الناس حولي كثار
لك الله ضقت من نفسي ولا ابغى الناس واللمه
ألا يافرحة الدنيا على دربك خفوقي سار
رجيتك يابعد عمري تكوني فيه مهتم
أعيش بقربك بجنّه وفي بعدك أعيش بنار
أنا المهموم من همك وجاك يشتكي همّه
حياتي شاقني وصلك رجيتك داخلي منهار
على قلبي من غيابك هموم الكون ملتمّه
قالت بحدة ـ انت ليه سويت كذا؟
جراح ـ ماسويت الا الواجب الله يعافيك....
ناظرته بغضب وبعدها قالت بعصبية ـ لاو مكلم مديري بعد يقصر الروحة؟
حس انها متضايقة من حركته مرة وماحب يزيد عليها ويوم التقوا نظراتهم قالت عيونه باعتذار لعيونها,,,,
جراح تنهد وقالت بثوران ـ جراح انت تفهم ولا ماتفهم؟
مسك معصمها بالقوة وقربها منه بالقوة وقال ونظراته غاضبة وصوته يخوف من كثر عصبيته ـ انتي اذا ماتحترمين نفسك قسم بالله لاااْدبك زين واعلمك ان الله حق!!!
سكت عنك مرة ومرتين وثلاث مو معناته اني بسكت اكثر ياهالة.
سحبت يدها منه وهي اول مرة تشوفه بها الوضع اللي فعلا خوفها....
بس سوت انه مو ماْثر فيها قالت ـ شتبي؟طلباتك شنو علشان تحل عني!!!
جراح بثقة ـ الطلب الاول ولاالثاني؟
ناظرته وتنهدت بقوة وقالت ـ وايهو فيهم الاهم؟
جراح ـ اثنينهم مهمين واثنينهم ابيهم بس واحد اكيد بيكون قبل الثاني؟
هالة ـ أي وشنو ها الطلبين المهمين واللي عازم النية عليهم بعد!!!
جراح تقرب منها وقال بهمس ـ اختاري ياتقولين لي احبك بالبداية وتحبيني ولا نتزوج بالاول وبعدها تقولينها؟
رفعت راسها له وناظرته بفزع وصدمة؟؟؟؟؟
ــــــــــــــــــــــــــــــــــــــــــــــــــ ـــــــــــــــــــــــــــــــــــ
اشوفكم يوم السبت ان شاءالله في بارتين مدموجين
البارت السابع والسبعين والثامن والسبعين,,,
ــــــــــــــــــــــــــــــــــــــــــــــــــ ـــــــــــــــــــــــ
مريم بضيق ـ اللحين وش مسوية لكم نسايم ها المسكينة؟
ام وليد بضيق ـ والله محد مسكين غيرك ياحظي؟
مريم بنرفزة ـ اوووف
اروى ـ مريم اصحي...تراها كانت تتلاعب فينا طول الوقت واحنا مسلمين لها الخيط والمخيط؟
مريم ـ انا ماسلمت لها شي؟
ام وليد ـ ابدا...بس مو بعيدة تكون هي اللي مفرقتك عن مشاري ترى؟
مريم ـ يمه ترى بعض الظن اثم!!!
اروى بشماتة ـ لاوالله من متى؟
مريم بنرفزة ـ معناته انتي شلتي جراح من بالك مدامك مو مصدقة كلام نسايم؟
اروى بثورة ـ لاطبعا ماشلته جراح ولد خالي وانا اولى فيه من الغريبة؟ولا يمه...
سكتت ام وليد وماعلقت...
اروى بثقة ـ باخذه يعني باخذه ولامفكرة بتركه مثل مطلق اللي جته بنت العراقية ولهفته لها؟عساها ماتتهنى معه؟
ــــــــــــــــــــــــــــــــــــــــــــــــــ ــــــــــــــــــــــــــــــــ
ضحكت ضحكة قوية وبقوة بعد وقالت بشماتة من ورى قلبها ـ اجل تبي بشاير ياوليد؟
قال بضحكة واثقة ـ ومابيردني شي بعد ياحلوتي!!!
بشاير بقوة مصطنعة ـ امممم وشنو بعد!!!
كانت تحوس بجوالها اللي بيدها الثانية بدون ماتلفت انتباهه ولا تناظر بجوالها لايحس لها....
وليد ـ اقول بشورتي ورى ماتشيلين قناع الكبرياء هذا وتلبسين قناع الخوف ترى بيناسبك اكثر!!
بشاير بقوة اخوانها وشماتتهم ـ خوف؟؟؟من منو بالضبط؟
وليد بثقة ـ مني...
ضحكت بقوة وظل يناظرها من المرايا وقال بانزعاج واضح ـ خير وش ضحكك يابشورتي؟
بشاير بشماتة ـ وليش اخاف منك ياوليد؟
وليد ـ منتي خايفة لاني بغتصبك؟
بشاير بثقة زايفة بس انها اثرت فيه وقهرته ـ لو كنت رجال اكيد كنت بخاف بس انك ....منت رجال ياوليد؟
دعس بريك قوي ووقع قلبها لايتهور بس بنص الطريق ترى مو وقته ابدا لازم تتحرك قبل لاتنتهي بمكانها.....
وليد ظل يناظرها بنظرات حيرتها وقال ـ اخت جراح مابتفرقين عنه...نفس الاسلوب الفاشل الغبي؟
ضحكت بقوة علشان تقهره اكثر وتعصبه علشان تضيع وقت اكثر ولف لها بعصبية ومسك يدها بقوة وصارخ عليها ـ ممكن افهم وش اللي يضحك حضرة البرنسيسة؟
بشاير بصراخ ـ شيل يدك الحقيرة عني يانذل ولاتحاول تلمسني ثاني لاقسم بالله مابيجيك خير؟
ــــــــــــــــــــــــــــــــــــــــــــــــــ ــــــــــــــــــــــ
تنهدت بقوة قباله وهي مصدومة من كلامه ,,,,
جراح استخف رسمي!!!!
مو حكي هذا اللي قاله ...
وش ترد عليه ماهي عارفة,,,,
قال وهو بعده يهمس باذنها ـ مطولة بالاختيار...
رفعت راسها له تناظر بعيونه اللي تاكلها وقالت بالم حقيقي ـ هالة ممنوعة من الحب ياجراح؟؟؟
تنهد بقوة وحرارة خلوها تنزل راسها عنه لانها حست بالموت بقربه منها بالطريقة ذي وهو ساد بجسمه المكان علشان لاتمشي,,,,
جراح بهمس متقطع ـ هالتي...ليه تقولين ها الحكي؟
انا احبك وابيك....وراضي بكل شي ياعمري...انتي ليه مصعبتها...
قالت بحدة هامسة وهي منزلة راسها لاتشوف عيونه اللي لخبطتها ـ جرحي بيظل يكبر معي لو صار اللي تقول عنه...
جراح باعتراض ـ سمعي..
قاطعته ـ اسمعني انت ياجراح....اعتبرني ماتطلقت من علي وكمل حياتك طبيعي بدوني...لاتتوقف علشان طلاقي!!!
قالتها ومشت من قدامه,,,,,بس يده مسكتها بقوة ولفتها له,,,
ــــــــــــــــــــــــــــــــــــــــــــــــــ ــــــــــــــــــــــــــــــ
مشاري بتشكيك ـ وهو يناظر زينة اللي تمسح دموعها بسرحان ـ انتي بخير؟
قالت ببحة تحاوول تخفيها ـ أي...
مشاري ـ احد زارك؟
زينة ـ لا
مشاري ـ اكيد...
زينة ـ قلت للمرضة اني ماابي اشوف احد....
مشاري ـ احمد ما مرك هو كلمني يسال عنك وماكان يدري انك بالمستشفى..
زينة بدون نفس ـ لامامرني...
مشاري ـ يمكن يجي بعدين اجل احمد انا اعرفه ماسئل الا وهو بنيته يجي؟
قالت بانفعال زايد ـ واحنا مالنا وماله؟
سكت وناظرها وسكتت هي...
مشاري ـ زينة فيك شي؟
زينة بقهر ـ فيني....!!تعبانة موت من ها المكان يامشاري وابي اطلع منه؟
مشاري باسى ـ بس انتي تعبانة يازينة...وهنا اريح لك ياقلبي....
زينة ـ انا هنا قاعدة اموت يامشاري ومحد حاس فيني.....
مشاري ـ حاس فيك يااختي والله حاس فيك بس صدقيني هنا يتطمنون عليك وبس يستقر وضعك بطلعك منتي ظالة هنا...
تنهدت بقوة وماردت عليه....
زيارة احمد والكلام اللي دار بينهم قضى عليها خلاص....
ماعادت تحس باي شي....
يلعن ابو ها الحب اللي مايرحم احد؟
وش له ياحظي رميتني عليه؟هو مايحبني ولابيحبني بحياته؟؟؟ليه صار فيني كذا بس ليه؟
ليه ماحبيت الا احمد وماعشقت الا ها الانسان ؟
ياربي شيل حبه من قلبي مثل مازرعته فيني...ماابي احبه خلاص...احمد ذلني واهاني وماعاد لنا امل مع بعض خلاص.....؟؟
ــــــــــــــــــــــــــــــــــــــــــــــــــ ـــــــــــــــــــ
حبيبي....
رفع راسه يناظر الريم اللي يحبها ويناظر ها الوجه اللي مايرتاح الا اذا شافه وها الصوت اللي يطيب له كل جروحه,,,
قالت باهتمام ـ حبيبي شفيك؟عسى ماشر ماعوايدك ترد بدري كذا؟وش اللي صاير؟تعبان؟فيك شي ياقلبي؟
ابتسم وقال بعيارة ـ أي والله بموت من التعب؟
ابتسمت للهجته وقالت وهي تجر خده ـ وشنو اللي متعبك؟
احمد ـ تفكيري فيك ياقلبي.....
ريم وهي تجلس بحضنه ـ وليه تفكر فيني بعد وانا حلالك؟
احمد بضحكة ـ اقول لاتصدقين حالك كثير بس!! ههههه
ريم وهي تضحك ـ زين لكن بتشوف.....
احمد ـ يالله قومي صايرة فيل كسرتي ظهري؟
شهقت ريم ومات ضحك عليها وقامت هي بسرعة من حضنه بس مسكها بسرعة وقال وهو يضحك ـ وين رايحة؟
ريم مسوية زعلانة ـ انا مو فيل؟ وش تبي فيني بعد!!!!
احمد وهو متشقق من الضحك ـ اجرب وش مخاطر ان فيل يجلس علي!!وش يصير فيني!!!
قالها وحضنها بقوة وسط اعتراضها ووسط ضحكه...
قالت بزعل وهي راسها بحضنه ـ ـ مو ماكلة شي خلاص لين اولد؟
احمد ـ احسن بعد توفرين شوي بميزانية البيت؟
ريم باعتراض زعلان ـ احمد وش فيك اليوم علي!!!
قال بضحكة ـ كل يوم بيجيك ها الكلام لين تقولين لي بنت ولا ولد؟
ريم ـ احمد احنا اتفقنا مانعرف واللي بيجينا حياه الله..
احمد ـ غيرت رايي...
ريم ـ وانا ضحية انك تغير رايك كذا فجاْة وبدون ماتعلمني!!!
ضحك احمد ومارد عليها....
ودق التلفون وراحت تشيله...
تنهد بارتياح يوم قامت....وفي باله يقول...الحمدلله اني رحت لزينة اليوم واخليت كل شي بخاطري...انا ما ممكن اتصور حياتي بدون ريم وبدون ضحكتها وزعلها...هاذي قلبي....الحياة بدونها اكيد ماتنعاش...عسى ربي يقومها لي بالسلامة ويحفظها ويخليها لي العمر كله ان شاءالله...
يتبع ,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك