رواية يا لبيه يا الدنيا العجيبة -9

رواية يا لبيه يا الدنيا العجيبة -9

سبب الخلاف وش قال لهم بالضبط

طارق: قال لهم بعد ماطبخناها انا وياه ان

السبب انكم تكلمون وصادف ان اللي

تكلمونها هي وحده

نادر: وشششو وشششو وشششو

طارق: ايييييييه هذا اللي نبيه سبب كبير مو

سبب صغير يخلي شكوكهم تزيد ضدنا .. انا

يوم سمعت الاحتمالات اللي قالها ابوك قلت

ليش ما اخذ وحده منها بس بجيبها بطريقه ثانيه

نادر: اصلا انا مو حق بنات مالقيت الا

هالسبب

طارق:وش اسوي ضاقت بي السبل

نادر:طيب كمل وش قلت

طارق: قلت ان خالد كان واعدها بالزواج

ويعرفها من فتره ونادر كان يكلمها يلعب عليها ..

سألوني شلون عرفوها قلت صديقة ريم هي اللي عطتهم

نادر:ياااااااااااكبر شرهتك ... ياكبرها عندالله

وش سويت وليش ماقلت لي

طارق: اعرفك حمار ماراح توافق عشان كذا غطيت هالنقطه عنك

نادر: سخيييييييييييييف .. ما اتوقع يصدقون

احس واضحه انها كذبه

طارق: هذا لانك حاط فبالك انها كذبه..

وابشرك عمي استانس ان لريم يد في الموضوع هو يبي لها طرف بأي طريقه..

عشان كذا عجل باجتماعكم عندنا

نادر: ياااخي ذي اختك وش سويت.. لو انا سويت كذا عادي ما أنلام

بس اختك ذي عارف وش معنى اخخخختك

طارق: ما اتشرف بوحده مثل ذي والله اني انتظر متى اشوف وجهها

بعد مايقولون لها االمفاجأه

نادر: قصدك مفاجعه

طارق :اللي هو ..وعلى فكره بقول لك شي يمكن يمكن تكرهني

نادر: اكيد مصيبه

طارق:شبه

نادر:زين اخلص وشو

طارق: زدت بهارات وطلعت فيك اشياء قلت ان نادر نذل عيا لايترك البنت المزعومه

وكان يلعب عليها بالرغم من ان خالد كان متعلق فيها ويبيها بالحلال..

واخر مره قام نادر يستهين فيه ويتكلم عن

مكالماته مع البنت وخالد ماتحمل وتطاقوا

وصار اللي صار

نادر: سود الله وجهك الله ياخذك قل امين....والله ياعقابي عند ابوي شين

طارق: عندك عقاب والا دم عار وسجن

وحاجات حنا في غنى عنها

نادر: والله اني حاس بتصير علوووووم..

........................

اليوم الثاني

الساعه 11 الظهر

خربت خطة ابو تركي لان الوضع ماجا على

ما اشتهاه كان وده يضرب عصفورين بحجر

بحل خلاف الشباب وبمعرفة اسبابهم

وبكشف ريم وكان كشف ريم هو الشي

الوحيد اللي زاد حماسه لانه ينتظر هالفرصه من زمان..

بس جت سفره طارئه لام تركي خالتها

بالقصيم توفت فاضطر عبدالرحمن يوديها

هي وندى ومنى...

وطارق انشغل بصفقه مع واحد جاي

خصيصا لهالمهمه من البحرين بخصوص

منتجعات ولأن ابو تركي حريص على

الشغل سمح لطارق يتخلف عن الروحه..

وبكذا شاف انه يأجل الكشف عن سر ريم

ويخليه على مشكلة الشباب المزعومه

وكان طول الليل يفكر كيف يحلها وكيف

ينتشل نادر وخالد من براثن هالبنات

الضايعات وكان حريص كل الحرص انه يبعد

الشباب عن هالطريق عشان مايتهور اي

واحد فيهم بعلاقه شريفه او آثمه ويضطر

يقبل دخول دخيله ع العائله والسبب انه

مايبي حلال العائله يطلع برا..

يعني كان الموضوع بالنسبه له فلوووووس..

بعد العشاء اجتمعت العايله التوتر سائد

الكل كان يترقب مصير نادر وخالد وكانوا

ضايعين بالطوشه لأنهم مو قادرين يتنبأون

باللي في راس ابو تركي

دخلوا البنات عند ريم

والحريم بالصاله

والشباب مع الاباء في المجلس

نجي عند البنات.. كل وحده تفكر وتحلل وتستخلص وش اللي بيصير ..

مية تحليل وتفسير وكلها غلط

ساره:الاكيد انه بيصالح العيال مع بعض

دانه:والله يسوي خير

ريم:لا ما اتوقع.. عمي محمد يحب يكبر

المواضيع احساسي يقول انه ناوي على شي

دانه: يعني جت على ابوي.. ليش ماتلومين

خالد السفاح سبب المشكله

ريم:احترمي نفسك تلقين نادر غلطان عليه واخوي بياخذ حقه

دانه:احلفي بس.. يعني كل ماصارت مشكله

حتى لو انها كبيره يسوي فيها رجال ويذبح

اي احد

ريم: يدافع عن نفسه اكيد المغفل نادر هو اللي بدا

دانه: يعني حكمتي خلاص.. اقول انثبري

ياتتكلمين زي الناس والا اقفلي بلعومك

نوف: والله انكم ماتستحون.. وش رايكم

انتم بعد تسوون اللي سووه

دانه: ماتشوفينها شلون.. نجي يمين تجي يسار نجي يسار تجي يمين

نوف: ان شاءالله انه بيصالحهم ونفتك..

مافي الا ذا العذر لسبب وجودنا هنا

ريم:مدري يمكن.. ولو فكرتي بتلقين الاعذار واجد

ساره: المشكله مافي سبب شين وزين الا قلناه

ريم: لا اكيد فيه اسباب بس حنا مانشوفها

نوف: والله انا اللي متلهفه اعرفه الا

اموووووت سبعين موته واعرفه هو سبب

هواش نادر وخالد وطارق والله احس شي كايد

ساره: الله ياخذ ابليسكم قولوا امين

البنات:ليش

ندى: تضيقون الخلق وش فيكم مكتئبين

تفائلوا بالخير..

دانه: ان شاءالله انه خير.. بس يختي والله

شي يحير هواشة الشباب ماهيب شي

وتوصل المواصيل للذبح والمذابح

نوف: والله صرنا في امريكا قتال الشوارع وسلاح ابيض ودم

ريم: انا اللي اعرف ان خالد عصبي بس عمره ماتهور

ساره: على ماسمعت ان طارق هو السبب

ريم بحده: الا نادر هو راس الفتنه

دانه: حسني الفاظك تراه ولد عمنا

ريم: انتي ليش ندافعين عنه ترا حتى طارق وخالد عيال عمك

دانه انحرجت وسكتت

ساره تهدي الوضع: خلاص اقصروا الشر الا

ياريم انتي ماشميتي خبر منا والا منا

ريم: لا والله بس نادر كان معصب علي مره مدري وش فيه

ساره:والله عايلتنا صار فيها اسرار..

...................

نهاية البارت التاسع

وهذا البارت الاخر

البارت العاشر

عند الرجال

ابو تركي: طارق لاهنت خل البنات وامهاتهن يجون خمس دقايق وهم هنا

الكل كان متفاجئ ومستغرب

راح لهم طارق وقبل لاتخلص الخمس دقايق دخلوا الحريم اول

ووراهم يتدافعون البنات وكلهم لابسين جلالات قعدوا وهم متسائلين

اكيد فيه شيئ مو اشياء

وصاروا يتهامسون

ابو تركي:بنات لا اسمع صوت وحده سامعه انتي وياها

عرفوا ان السالفه فيها إن

ابو تركي شاف الكل اكتمل

ابو تركي: اظن كل واحد منكم فكر وخمن ليش حنا مجتمعين..

كل الحكايه وضع النقاط ع الحروف فيما يخص نادر وخالد داري انه موو وقته

وان خالد باقي ماتشافى كليا بس كل ما اسرعنا

كان احسن.. وهذانا الليله جينا كبيرنا على صغيرنا

وكان خالد منسدح على فراش بالارض

ابو طارق: حياكم الله البيت بيتكم

ابو تركي: اليوم االسبب ورا اجتماعنا

حل للخلافات بطريقه مدروسه ومنهجيه ووضع خطط فعاله ومجديه للمستقبل

على طول نادر تذكر كلمة طارق'' ياليته موجود''

كان بيضحك بس الموقف مايساعد..

ابو تركي: ماجازلك كلامي يانادر

نادر: والله على راسي يبه

ابو تركي: اجل ليش هالنظره!

نادر: والله صراحه من زمان نسمع هالجمله وماشفنا شي

ابو فيصل: نادر احشم ابوك شلون تتكلم معه كذا لا وقدامنا

فيصل: يبه الله يطول لي في عمرك خلوا هالمجلس مجلس خير شوفوا وش عند الشباب..

مشاكلهم طلباتهم يبون مساعده.. خلوهم يقولون اللي عندهم ثم احكموا

عشان مايتكرر اللي صار

ابو تركي: وهذا اللي بيصير اليوم.. واول واحد بنسمعه نادر

نادر مايدري وش يقول لانه مستحي من البنات

وخايف تجيه اي كلمه منا والا منا من عمه او ابوه ويطيحون وجهه:هااه

ابو فيصل: توك كانت تتفلسف وشفيك بلعت لسانك والا ماعندك شي

نادر بيسوي فيها قوي: كنت ابي اقول ان هالجمله تعودنا عليها

بس للاسف مانشوف شي لاحلول ولاشي .. فأكيد هالمره زي كل مره

ابو تركي يمسك شنبه: قص هذا اذا ما أثبت هالجمله الليله

ابو طارق: قدها وقدود يا ابو تركي

وابو فيصل يناظر في نادر نظرات توبيخ

ابو تركي يوجه كلامه لنادر: اولا السبب الغبي اللي كنت انت وخالد بتذابحون عشانه

هذا لزوم نحط له حد نعنبو داركم هاللي تسوونه عشان بنت شوارع

اكيد تكلم غيركم وهالاستاذ خالد يبي يتزوجها ليش هو على كيفك تاخذ اي وحده

بنات مانعرف ساسهن ولاحسبهن ولانسبهن لا وزود عن هذا ماتخاف الله

وماتعرف كم واحد تكلمه هذي ماراعت الله ولا راعت اهلها

وسوت سواتها من وراهم بالله تضمنها في بيتك ومع عيالك..

ابو طارق: عين العقل ياخوي..

ويلتفت لخالد اللي كان منسدح : مالقيت تتزوج الا من هالبنات لا ويصير اللي يصير عشانها

ابو فيصل: عبدالله ترفق ع الولد ترا الذنب مايشيله بروحه

لاتنسى نويدر له يد هو اللي حاول يثير عصبيته ويتكلم عن البنت

نادر: عمي انت وشفيك علي انا بالذات من قعدنا وانت حاط دوبك ودوبي

ابو تركي: والله انك ماتستحي وش قلة الحياء هذي

نادر: والله اني احترم عمي سلطان بس ماسويت شي

ابو فيصل: ماسويت شي والله قاهرني انت الساكت تطلع راعي مكالمات

ماهقيتها منك توقعت اي احد الا انت

نادر كره طارق وقعد يسبه في نفسه اكيد نزل في عيون ابوه وعمانه وسكت مارد

ابو تركي: اذا هذي شفاحه ع البنات ورا ماتتزوج بالحلال..

بنات العايله ماشاءالله موجودين كان قلت لي يبه ابي فلانه

والله لااوافق ولاتروح لها الطريق القذر

نادر تضايق من ابوه مره بس مايقدر يرد

ابو تركي: انا واخواني اتفقنا على اشياء ان شاءالله تجر بمنفعه ع الجميع

ومن الحين اقول لكم اللي بيعارض سواء من عيالي او انتم ياعيال سلطان وانتم ياعيال عبدالله

والله ينحرم من الميراث وماله قعده بالشركه ولا البيت.. سامعين

((والاساس انه ماأخذ رأي اخوانه هذا هو يقرر من نفسه وكان الكل يراعي مرضه وان تعبان ومايبون يزعلونه))

والشباب كانوا خايفين لانهم عارفين قرارات ابو تركي جامده

ويقدر يأثر على ابائهم بدون مايلقى منهم معارضه

والبنات مايدرون عن شي ولا يدرون وين الله حاطهم فيه كانوا مستمعات

فيصل كان الواعي والوحيد اللي تكلم: تكلم ياعم

ابو تركي: بغض النظر عن الاسباب اللي خلت نادر يتجه لهاالطريق ماتهمني..

قد مايهمني اني احل هالمشكله

ابو فيصل: عطنا حلولك يابو تركي

اول الحلول نادر يتزوج دانه!!!!

الكل مستغررررب

نادر زي الصاعقه نزلت على راسه

ودانه حطوا نفسكم مكانها وبتعرفون وش

حست فيه في هاللحظه

ابو فيصل: وانا موافق

فيصل: لحظه لحظه كذا على طول طيب اسألوا البنت خذوا رايها

ابو فيصل: دانه

دانه تكلمت بصوت غير مسموع:سم

ابو فيصل: وينك اي وحده فيهم انتي ((لانهم متغطين))

رفعت ايدها دانه:انا هنا

ابو فيصل: بنزوجك نادر .. موافقه

دانه مافهمت الحين هو يؤمرها والا يسألها

ماقال وش رايك تتزوجين نادر لأ

قالها بطريقة الامر بنزوجك نادر..

ففضلت السكوت

نادر كان محتر من الحركه يعاملونه كنه بزر

وكان بيعاند بس ماكان يبي يحرجها ويقول

لا اصلا كان يميل لها من هم صغار بس

الزمن فرقهم عقب ماتغطت عنه

ابو فيصل بعصبيه: هاا وش قلتي؟!

بكت دانه يعني فوق ماهو احرجها بالطريقه ذي

قاعد يرفع صوته ويعصب عليها قدام الكل وهي دمعتها على طريف

قام فيصل عند دانه وضمها: شوفي دانه كانك تبينه قولي موافقه

واذا ماتبينه قولي مانيب موافقه

ابو تركي: لاغصبا عليها تاخذه.. قررنا

نادر: يبه لا مو غصي على طول كذا تبونا نتزوج بعض وشو هو لعبه

وحتى لو لعبه مالنا راي حنا..

طيب وافقت انا وهي رافضه مالكم حق تغصبونها

ابو تركي: بتاخذها يعني بتاخذها.. ولاتكثر حكي

فيصل: استهدوا بالله حل الامور مو بالطريقه هذي

ابو فيصل: اللي يطلع من شورنا ماهو منا..

فيصل: يبه الله يسلمك وليش تاخذ رايها

دامك مقرر

ابو فيصل سكت لان فيصل خلوق وقدير

ويفرض ع الكل احترامه

ابو تركي: فيصل وانا عمك ا...

فيصل حس انه خسران بالمناقشه قدام عمه ابو تركي

لان ابو تركي لازم ينتصر في نقاشاته حتى لو كان على غير حق

فقاطعه: خلاص عمي اللي تشوفونه

حمد : انا اشوف الامر يتأجل هذا زواج

ابو تركي: كم مره اقول لكم خلاص قررنا..

وترا خوفنا عليهم من الفتنه هو اللي خلانا نتسرع..

ابو طارق: اي والله صادق وخالد بعد لازم يتزوج

خالد تفاجأ وطالع في ابوه

ابو تركي: لاتطالع في ابوك كذا.. الحين الحين تقرر من تبي من البنات

خالد منصدم: حتى لو ابي بس بالطريقه هذي اسف ماراح اتزوج

ابو طارق: خالد مافي مجال انت لازم تختار

خالد ببرود: وانتم مافي مجالين وماني متزوج بالطريقه ذي خلاص الناس تطوروا

وانتم رجعتوا فينا لزمن جدي

ابو تركي: مثلك مثل نادر ويلا اخلص علينا

خالد: اسف

ابو طارق: خالد يا انك تختار الحين او نختار لك

خالد:لاتحاولون

ابو طارق: واذا قلت لك قلبي غضبان عليك ليوم الدين

سكت خالد وام طارق تبكي

ابو طارق: هيا اذا ماتبين تخسرين ولدك للأبد اقنعيه

ام طارق: وافق وانا امك وافق والله البنات مافي احسن منهن

خالد: يمه قسم بالله ادري ويشرفني بس مين اللي بقى في هالزمن يتزوج بهالطريقه

انتم تبونها بالعناد ترا ماحنا بصغار..

عطوني اجابه مقنعه من اللي بهالزمن باقي يتزوج بهالطريقه

ابو تركي عارف الاجابه وتذكر تركي فسكت

ام طارق: ياخالد خلاص قرر الحين ما ابي اخسرك .. ترضى ماعاد تشوفني ولا اشوفك

خالد: لا والله ما أرضى

ابو فيصل: اجل اخلص علينا

خالد حاس انه بفيلم مو مصدق الاشياء

اللي تحصل وجلس يفكر بيختار اصغر وحده

واذا قالوا لا بيعاندهم وبعدها بيقول خلاص

مابي: نوف

ابو فيصل:نوف!!

خالد بتحدي: ايه ما أبي الاهي

ارتمت نوف في حضن امها وبكت بأعلى صوتها:لا لا لا ما ابي ما ابي اتزوج

خالد استانس يعني خطته نجحت ماراح توافق وهم شايفين ردة فعلها

ابو تركي: ابكي من الحين لبكرا خلاص اجل البنتين عندنا يا ابو فيصل

ام فيصل اخيرا كسرت صمتها وبصوتها الجامد والثابت

اللي يعكس شخصيتها اللي ينم عن ثقه

قالت: انا ساكته من اليوم بشوف النهايه .. انتم وش قصتكم

ليش هم بضاعه من بضاعتكم اللي في السوق... خذينا وما خذينا عسى ماشر

ابو تركي: ياام فيصل ماعندنا حريم يتكلمن

ام فيصل:بأمر مين ان شاءالله اناسكت لعل وعسى واحد من هالسمرمد اللي مسوين فيها رجاجيل يعارض

والا كلهم طلعوا مثل بعض حريم مالهم راي ولاكلمه ياحيف باس((كان قصدها ع الشباب))

يعني بعتوا حياتكم بحفنة فلوس كله خوف تنحرمون من الميراث..

والا اذا انطردتوا ماتقدرون تعتمدون على انفسكم

ابو تركي: ماشاءالله تحرضينهم ع العصيان

ام فيصل: انا ما أحرض أحد بس اسلوبك اسمحلي اقول لك غلط

ابو تركي عصب: سلطاااااان سكت مرتك

ام فيصل: مانيب اصغر عياله يسكتني هو عارف اني ما أتكلم الا بحق

وعمري ماعصيت اوامره لكن تجي السالفه عند بناتي وينجبرن بهالطريقه لا والف لا

ابو تركي: اقول خلك بعيده بس.. بناتك ماهم صغار هم في سن زواج خلاص جا الوقت

ام فيصل: وليش انت تقرر.. ليش مو هم اللي يقررون.. انا وانا امهم مستحيل اتدخل بهالشي

ابو تركي: نوف موافقه تاخذينه؟!

نوف تطالع مره في ابوها ومره في امها ومره في اخوانها

خايفه وجواتها صراعات

شلون توافق على خالد وهي تميل لطارق وكانت تتمناه من كل قلبها

يعني خلاص ضاعت احلامها وتخطيطاتها..

ومع ذلك ودها توافق وتنهي هالخلاف : اذا قلت رأيي بتاخذون فيه والا مصيري من مصير دانه

ام فيصل: ماراح تاخذينه دام راسي يشم الهواء

خالد: وانا ما أبي الا نوف غير هالكلام ماعندي

ابو فيصل: خلاص انا ابوها موافق

ام فيصل قامت: يعني كذا هاا ..وانا امها في قريح!!

ابو فيصل: محشومه بس خلاص قررنا انا واخواني

ام فيصل:سلطان ترا ماهيب صفقه من صفقاتكم هذول بشر قبل كل شي شفيكم انتم

ابو طارق شاف ان معها : والله يا ام فيصل مالي كلام كان ماتبون خالد فوالله على راسي

ابو تركي: عبدالله شفيك انت

ابو طارق: حنا نبي نحل الامور مانبي نعقدها اكثر اذا هالشي بيجر مشكله خلاص

خالد عاجبه الوضع لانه في الاخير راح يتغاضون

ويكنسلون لأن ام فيصل اذا قالت الشي قالته: وانا والله بسماه ان ماخذيت نوف انسوا اخذ غيرها..

ام فيصل: نوف ماهيب لك ..

انت ونعم فيك والله لو انك طلبت نوف بظرف غير هذا انا اول وحده بوافق

بس قبلها باخذ رايها ماهو مثل اللي سواه ابو طارق وعمانك

ابو تركي: عاجبك ياسلطان اللي يصير

ابو فيصل بعد سكوت جلس يدور بالسبحه والكل عينه عليه

تم فتره من السكوت تكلم

ابو فيصل: حصه.. لو نوف ماتاخذ خالد فوالله ان تحرمين علي !!!!!!!!!!!!!!!!!!!

مصدووومين

متفاااااااجئين

مذهوووولين

مو صدق اللي قاعد يصير

فيصل:يبه

ابو فيصل: انا قلت اللي عندي

ابو تركي:كفوو

ابو طارق: وش اللي كفو مايصير يا سلطان

ام فيصل: كثر الله خيرك يا ابو عيالي

كثر الله خيرك.. اجل اعتبرني من اليوم

ماضي لان نوف ماراح تاخذ خالد

نوف:لالالالالا يمه انا موافقه وربي موافقه بس لاتتركينا

ام فيصل: ماعليك مني انا.. كبرت وعندي فيصل وحمد عسى الله يخليهم ذخر لي ..

ماراح يأثر علي الطلاق

نوف: لا يمه خلاص انا موافقه والله.. تكفين

يمه لاتروحين ابوس يدك يمه وبكت بحضنها

ابو تركي بابتسامه صفراء: على بركة الله

خالد لنوف

ام فيصل: لاتوافقين عشاني ماعليك مني تسمعين

ابو تركي: مالك حجه البنت وافقت

فيصل بعتاب: والله يبه امي ماتستاهل هذا منك

ابو فيصل كان مبين عليه الندم: خلاص يافيصل انا لايمكن اتراجع

نوف: والله يبه موافقه خلاص

ام فيصل تطالعها بعتب: ليش يانوف ليش كل ذا عشاني

نوف: يمه واللي يخليك لاتتركيني تكفين

ام فيصل: اجل الله يوفقك.. والتفتت لابو تركي:ارتحت يا ابو تركي

ابو تركي: ع الاقل ضمنتي عدم طلاقك من

زوجك

ام فيصل: حمد قوم

حمد: وين يمه

ام فيصل: ابطلع منا .. وانت يا سلطان بكرا اورقة طلاقي عندي

وحط فبالك ماهيب حصه اللي تتهدد

ابو فيصل ضاعت علومه حس انه حاس السالفه والسبب ابو تركي: وين بتروحين ياحرمه

ام فيصل حاقرته: قوم ياحمد

وفز حمد

ابو فيصل: اقعد ياولد لاتوديها ولامكان

ابو تركي: خلك منها يومين وترجع لك هم كذا الحريم..

حمد: كلكم على امي ترا وراها رجال انا بخسر الدنيا كلها ولا أعصي امي

ابو تركي: يعني ابوك عادي تعصيه؟؟

طالع فيه حمد بنظرة تشاؤم وخذا امه وطلع

نادر: يبه انت وش سويت هذي هي خططك قلبت الدنيا فوق روسنا

ابو تركي: لاتشوف الجانب المظلم

ترا في ايجايبات كثيره ماتشوفونها

دانه: قصدك انت اللي تشوفها بروحك

ابو فيصل: اننننننطمي يابنت

نادر: الله يسامحك يبه....

وكلن رجع بيته بعد ماقال لهم ابو تركي ان ملكتهم في يوم واحد بعد اسبوعين على رجعة تركي وجوري

.......................

في مكان اخر

- الله يبارك فيك ان شاءالله

- حركااات والله ودخلت عش الزوجيه

- لا توني وطالع ساعته بعد ساعتين بالضبط

بدخله

- بالتوفيق يالغالي.. ولو اني عتبان عليك

- بايش

- ماشريت من البضاعه الجديده

- افا عليك بس وانا ليش داق.. ابيك الحين ترسل لي

- كفووو.. عاد الليله ليلة العمر لازم تكون مكيف

- ايه لااااازم.. اهم شي الكيف..

-طيب والدفع

- ابشر بالضعف ماطلبت شي

- اجل ربع ساعه وهي عندك

-وهو كذلك..

يتبع ,,,,

👇👇👇

تعديل المقال