رواية همس الموت - Whisper Death ™ - 6
الشي الوحيييد اللي اتمنااه..
اني اقدر اوقف فـ ويهه..!
ما تمنيت اوقف فـ ويه ابرااهيم..كثر ما اتمنى اوقف فـ ويه يوسف..!
\\
علــــي..
،
قعدت افكر شو صار امس..
,
بعد ما ظهرت من عنده....أأأ اقصد من عندها..ع فكرة بعدني مب مستوعب..!
احس بضييييقه مب طبيعية..
انا مادري ليش بلشت عمري..
الحينة هالكلام اللي سمعته صدق ولا لا.؟
يمكن هي ما تباني افضحها وو اختلقت كل هالساالفه..؟!
.
لكن..شو سالفتها وياا الكابتن يوسف؟!
.
مممممم..يمكن اكتشفها؟؟! او يمكن يستويلها.؟!
,
تذكرت شكلها وهي منهاارة..!
معقولة تكــــذب..؟!
,
ظهرت من شارعهم..
ماييت بسيارتي..
لان تقريبن بيتنا قريب من هنيي..
,
مادري ليش احس اني مب مرتااح..
احس في حد يرااقبني..
التفت بسرعه وراا...
طالعت يمين ..يسار..
ما حسيت بشي غير طبيعي..!
تنهدت برااحه..ابتسمت بسخرية..الظااهر واايد تاثرت بسالفتها..!
,
اففف رد لي نفس الاحسااس..
احس اني المح اشخــاص يرااقبوني..!!
,
وقفت وسويت روحي منشغل ادور شي فـ بوكي..
لمحت حد يراقبني من بعييد..
التفت صوبه..بس بسرعه اختفى..
سويت روحي مب مهتم..
كملت طريقي ... لمحت اكثر من شخص يراقبني..!!
,
وصلت بيتنا اخييرن..
بعد ما بندت الباب تساندت عليه..
تنهدت برااحه..
طول ما انا امشي وانا اتييني وسااوس..
يقتلووني..
يضااربوني..
يسوون لي شي..!
اتذكرت كلامها " بيذبحـــــونك..! "
,
نفضت هالافكاااار من رااسي..
دخلت داخل ..جفت عمتي يالسة في الصاله ..سرت صوبها وسلمت عليها..
وع طوول سرت غرفتي..
,
مادري احس اني متندم..
لييش عرفتها..ولييش تدخلت فــ شي ما يخصني..!
,
فريت عمري ع السريير..
غمضت عيووني..ابي اريح رااسي من التفكيييييير...,
,
فجاة بطلتها بخوف من حسييت شي نقز فوووقي..
طاالعت..جفت قطوة اختي الدلووعه..
صرخت علييها افرغ كل الخووف ..
خخخخ حلييلها شردت بعييد عني..
سمعت صوت اختي حنان تزقرها : ميــــــمي..ميمـــــي..!؟
شوي وجفتها تطل من الباب..طالعتني : جفت ميمي..؟!
طالعتها بنظرة ...فهمت ان قطوتها كاانت عندي...
حنان : أأأ...علي..
أنا: كم مرة قلتلج ماااابيها تدخل غرفتي..؟! انتي ما تفهمييين؟؟! انااا مااحب القطاوة وانتي تعرفيين هالشي..!
حنان مدت بوزها بدلع: والله ما يخصني..انت ليش ما بندت الباب..؟! انت تعرف انها تحب ترقد ع لحاافك..
تذكرت اني ما بندت الباب..
قلت: اووكي خلاص..اخر مرة..يلا شليها وذلفي براا..
شلت قطوتها وظهرت وهي تتحرطم..
ابتسمت ...
،
احم احم..بطل يديد يظهر ع الساحه..
مممم اكييييد تبون تعرفوون عني..!
انا علي..عمري 20 سنة..
عندي اخت وحده اللي هي حنان.عمرها 15..الحينة اول ثانوي..
وهي دلوعتي واختي و صديقتي..
أمي وابوي متوفييين من 7 سنواات..
عمتي سلوى ارملة ومن بعد ما توفى امي وابوي يت تعيش ويانا..
وعوضتنا الحنان اللي فقدناه..الله يخلييها لنا..
طبعن انتووا تعرفون انا لاعب كرة قدم..في فريق الصقر..لي سنتيين فــ هالناادي..
عشــــقي كرة القدم..واتمنى مستقبلا استوي اكبر لاعب محترف..
بتقولون تبي تستوي لاعب محترف وانت بهالناادي..؟!
صح ان نادينا فااشل..لكن له مكاانه فــ قلبي..
هالناادي الفاشل..كان له ماضي عريـــق..!
كان حلمي من انا صغير استوي لاعب من هالفريق..
والحمدالله صاار..وان شاءالله يصير نادينا احسن نادي..
//
بعد مرور شهـــــر على أبطــــالنا..
//
شهرزآد..
،
الشهر اللي طااف استوت فييه وااايد اشيااء والحمدالله انها للاحسن..
في هالشهر..اكتسبت ثقة المكان اللي اشتغل فييه..
والحمدالله للحيين محد عرف هويتي..
والاهم من هذا كله ..ارتحت نفسيا..
عقبال ما افتك من سليمان..اما هذا يباله تخطيط دقييق..!!
معااشي اليوم استلمته..
ماتدرووون شكثر استاانست..طرت من الونااسة..صدق المال الحلال اللي من تعب جبيينك له طعم غييير..مع انه معااش متواضع..!
اما عن فلوسي اللي اتييني من الغناا...
من فترة لفترة..ارووح اتبرع فيها..بدوون محد يدري..
هذي وحده من مخططاتي..
اما عن المخطط الاهم..هوو ان هالمعااش بطرشه حق اهلي..كل شهر..
وو
الخبر المفرح..انه بعد يوومين بسير عندهم..طبعن بالسر.!
آآه..مادري كيف بقدر اتحمل هاليوومين..!
,
يت البشكارة عندي تقول ان سليمان يبيني..؟!
سرت اجووف شوو يباا..
,
يالسة ع مكتبه كالمعتااد..
رفع راسه يوم دخلت..
قال: تعاالي يلسي..
سرت وقعدت مجابله..
قال : بعد يومين..ربيعي يمكن يسوي حفلة وطاالبينج..تجهزي..
طالعته بصدمة وخيبة امل: ليييييش..بعد يومين عندي موعد..!
قال: موعد.؟!
بوزت منقهــــــرة..
قال مستغرب : لهدرجة مهم الموعد..؟!
قلت بقهر مكبوت : هييييه..
جفته يحك راسة يفكر..عقب تم يطاالعني..
فجاة قال: انزيين ليش اليوم ما تسيرين هالموعد...؟!
استااانست..صح لييش اترياا يومييين..؟! ماافيني صبر..
قلت واوني افكر : ممممم اليووم..؟! مممم اووك مب مشكلة..
,
ظهرت من عنده..وع طوول رحت اتجهز..
,
بعدها دقيت للدريول..اللي يتستر علي مقابل الفلووس..
ركبت وياااها..ودلييته ع قريتنا..بينا وبينها 3 سااعات..
,
فينيـــــي شووق كبيــــــر..
انتظر بس اوصل..ابي ارتمي فـ حضن امي..!
ابي اجووف خواني وخواتي..كيف شكلهم الحينة..؟!
كبروا...تغير شكلهم..؟!
هل بيعرفووني..؟!
افف مادري متى بووصل..ماافيني صبر..
,
وقفنا عند بيت متهاالك..هذا هوو..هذا اللي ولدت فيه وعشت طفوولتي فييه..
نزلت من السيارة وقلت للدريول ينزل الاغراض..
طبعن ما فاتني انظاار النااس اللي مستغربة..واليهاال اللي يطالعون السيارة بانبهاار..!
خذت نفس عميييق..ودقيت الباب..
تريييت دقايق..
عقب بطل الباب..ولد صغير..
عرفته ع طوول..هذا عبوودي..
قلت : السلام عليكم.
نزل عينه باحترام : وعليكم السلام..تفضلي خاالتي..
تالمت..ماعرفني..صح كنت متغطية ..بس ماعرف صووتي..
كيف تبينه يا شهرزاد يعرفج بعد كل هالسنواااات..؟!!!!
مشيت وراه..وانا اتامله..فدييته والله..مسوي رووحه كبيير..
دخلني غرفة..قعدت اترياا امي..شليت الغشوة..
حسيت انها تاخرت..
كنت بسير اجووفها..ألمـها ..اصيح فـ حضنها..
بس مابي..مابي حد من خواني يعرفني..ابي اكوون بنظرهم ميـته..!
مابي انزل رااسهم..
مابيهم يعرفون ان اختهم من امهم وابوهم الملتزميين..وحدة مغنية ورقااصة..!
,
وصلتلي ريــحة عبيـــرها قبل ما توصل لي صورتها..
غمضت عيني واستنشقت.. اعبي رئتي من ريحتها..
،
القلب يمي لك مشى .. بالعطف والطيب انتشى
في حضنها عمري نشى .. ومن حبها قلبي يميل
امي حياتي وجنتي .. انتي عيوني وبسمتي
حبك شعاع بمهجتي .. والشعر من حبك يسيل
القلب سعده من رضاك .. والكون عطره من شذاك
كلي على بعضي فداك .. إن غبت سموني القتيل
يانبض قلبي والوجود .. ياروح عمري يا الودود
يا أغلى من كل الحشود .. المدح في حقك قليل
عبد العزيز المقرن
،
من ظهرت لي صورتها..وكأنّ كل شي توقف..!
تاملت ويهها اللي ينبض بالنوور والحنان..
قلت بألم: يمـــه..يمـــه..لا تقولين نسيتي ضنااج..يمة لا تقولين ما عرفتيني..
يمــه ما عرفتي بنتــــج البجــر..!؟ بنتــج..بنتــج شهـــرزآد..!
شهقت بصوت عاالي..والدمووع غطت ويهي..
اما هي..جفتها تطالعني..تتاملني..منصدمة..حسيتها مترددة..
جفتها قربت مني...احتضنت ويهي بكفوفها اللي غطتها التجاعيد..
قالت بصوت مبحوح:شهــ.. شهرزاادي..؟!
طالعتها..وطالعتني..ابي اطبع صورتها في مخيلتـــي..
يلا يمه..ضميني..احتويني بحنااانج..!
سحبتني لحضنها...هييه..هذا اللي ياية عشاانه..هذا اللي بينسيني معاناة هالسنيين..
صحت فـ حضنها..افرغ كل اللي فـ قلبي..
وهي تضمني اكثر واكثر..وتصيح بصمت..وتمتم بالشكر..
حبيت ايدها وويهها وراسها..
مابي ابتعد عنها...ابي ارد نفس قبل..ابي ارد اعيش تحت ظلها..
,
بعد فترة....هديت شوي..
قلت بصوت متهدج : يمــه..سامحيــ...
قاطعتني من حطت صبعها ع شفايفي تمنعني من المتابعه...
قالت: هذا كله ابتلاء..والمااضي انسييه..انتي الحينة في االحااضر .فكري..في الحاضر والمستقبل..لا تضيعين عمرج ع ذكريات مرت..
نزلت رااسي..
قالت تغير جو : تريي بزقر خوانج..يجوفونج..
نقزت بسرعه ومسكت ايدها: لااا يمه..لا مابيهم يعرفون...الله يخليييييج..
تاملتني للحظة..وكانها فهمتني..تنهدت..
جفت وحدة دخلت وبايدها صينية فيها عصير..هذي اختي سارة..
تذكرت ايامي معها قبل..كنت كله اضارب وياها لانها كسوولة..ابتسمت
بس الحينة كبرت واستوت قد المسؤولية..
حطت الصينية جدامي..ويت تسلم عليه..
قالت امي : سارة سيري زقري خواتج يسلمون ع الضيفة..
طالعت امي بامتناان..
جفتهن يدخلن وهن مستحياات..سلمن عليه..عقب قعدوو شويه..وبعدها ظهروا..
,
قلت لامي كل شي اللي استواالي..حسييتها تتالم عشاني بس ما تبين..وتبين العكس.. يالسة تصبرني..
عطيتها هدايا خواني..والمعاش اللي استلمته..
رفضت في البداية تااخذه..لكن فهمتها واقنعتها..اخواني محتاجين حد يصرف علييهم..
وقفت بودع امي..مابي اتاخر..عسب سليمان ما يشك..
بــــس...سمعت صووت حشرة براا..
عبودي بصوت عالي: انت ما تستحي..ما تجوفني ريال جدامك..؟! كيف تدخل البيت بدون استئذاان..؟!
وسمعت خواتي يصاارخن..
ركضت بسرعه اجوف شو الساالفة..
صدمــــــــــة
صدمــــــة
صدمـــة
: سليمــــــــــــان...!!!!!!!!!!!!!
\\
بدر البدور..
،
تنتظروني ان اتحدث عن الفترة المااضية..؟!
لا اعلم كم مرة علي وانا هنا..
فلا شي جديد يحدث معي..اليوم مثل الامس..والامس مثل الغد..لا شي مختلف..
كل يوم انتظر العذاب النفسي في رعب شدييد..
اتمنى الموت حقاً..فهو فرجـــي..!
,
سمعت خطواته قادمه..
وبنفس التوقيت كل يوم..يحضر لي ذلك الطعام اللذييذ..
انتظرته حتى
سمعت خطواته تبتعد..
اسرعت نحو الطعام الذي داعبت رائحته انفي..
ما ان لمست الطعام بيدي..
حتى سمعت خطوات سريعه..وصوت ضحكات..
هاا قد بدأ عذابك يا بدور..!
ابتعدت بسرعه لاحتمي في تلك الزاوية..
وبدأوا هم بالصرآآآخ..وضعت يدي على أذني ..وصرخت بصوت عالي مرتعب..لامنع صوتهم المخيف من الوصول لمسامعي..
لكن لفت انتبااهي صوت مختلف...صوت.جعل خطواتهم تتراكض بعيدا..
صوت ارعبني بشـــــدة..
بعدها هدأ الصوت..واقتربت خطوات هادئة نحو الباب..
وقلبي يكاد يخرج من مكانه..!!!!
عرفته..هو نفسه من يحضر لي الطعام..نفس صوت الخطوات..!
قال بلغة لم افهمها..!!
: لا تخـــافين انا بحمييج منهم...!!!!!!
~ | نهــــاية الهمـــــسة الســــابعة |~
~ | الهمســـــــة الثــــامنة |~
\\
فجــــر
،
فــ هالشهر اللــي طاف تعرفت اكثر ع الشباااب..
كلهم طييبيين ويونسوون..كانوا ينسوني همــــي ..
اذا كنت زعلانة وشفتهم...اضحك..
احسهم اهـــلي اللي فقدتهم..
كلهم متعااونين ويحبون بعضهم البعض..!
,
في هالشهر تدربنا واااااايد..كان التدرييب مكثف علينا..
والشباب تحسن لعبهم..
امس ابرااهيم ياا عندنا..وقال ان عندنا بعد يومين مبااراة ودّية ....!
جفتو كيف..؟
ماا قال لنا من قبل عسب نستعد..فاجأنا كالعاادة..
الشبااب عصبوا..وتموو يتحرطمون..لكن ما باليد حيلة..
زين انه قالنا..عادي اتوقع منه في نفس يوم المباراة يقولنا..!
والصدمة الثانية للشباب..
انه فريق النسر..وهالفرييق ماعرفه..لكن ع قولتهم..انه فريق قـــوي..ولا يستهاان فيه..
هههه حسييتهم كانوا بينجلطوا من الخبر المفجع قولتهم..!
لكن قبل ما يروح ابراهيم ..وعدهم بحفلة ما شافوها فـ حياتهم اذا فازوا..!
,
الحينة عندنا بريك..مسكت غرشة الماي بطلتها وشربت منها..
مسحت جبيني بالفوطة اجففه من قطرات العرق..
سمعت فهد وعمر يتناقشون عن المباراة..
عمر بحالمية : فهوود تخيل لو نفووز..؟! ههههه احس ما يلييييق..اصلن بتصير صدمة للجميييع..!
فهد: ههههه هيه والله..بس مسود الويه المدير يالس يغرينا بالحفلة اللي بيسويها اذا فزنا..! هه عاارف ان نحن ما بنفووز .. يغاايضنا..
قربت منهم وانا مبتسمة..
عمر : ياخي ماتدري شكثر اكرهه..
فهد : هه يعني اانا اللي احبه..؟! لا هوو ولا هذاك الزفت الكابتن..
قلت وانا مبتسمة: فهد..انت تبا تفووز..تبا الحفلة..؟!
فهد يتنهد: والله يااليييت..احس ونااسة..كل الفرق اللي تفوز يسوون لهم حفلة..ويستاانسون فيها..اما نحن نطاالع فيهم شراات الاغبياا المسااكين..
ضحكت: ههههههههههه..حلييلكم والله..
فهد طالعني بنص عين : يعني انت مب ويانا..؟! ولا متبري مناا..!؟
كتمت ضحكتي : لااا افاا منوو قاال..؟ بس صدق تبوون تفووزون..؟! تبوون الحفلة..؟ تبوون كل اللي يستهين فيكم ينقهروون..؟!
جفت باقي الشباب تجمعوا حوولنا..
قال عمر : اكيييييد نبااا....بس كييييف نحن مااا نقدر..! انت ما تعرف نادي النسر..!
طالعت في الكل اتريا ردهم..
كلهم يبووون..لكن مصاابين بالاحباااااااط..!
قلت بحمااس: مافي شي اسمه مانقدر..انتوو ما تدربتوااا هالشهر..؟! انتوو ما تعبتوو.؟ تبوون الكابتن يزييد التدريباات عليكم اذا خسرتوا..؟!
: لاااا..بــــس....
قاطعتهم بتحـــدي: عيل..يااااا النسر...ياا الصقــر..وبنشوف منو يهزم الثااني..!!
شفتهم تحمســــوا..ورجعت ثقتهم فــ نفسهم..
وكلهم ركضوا للملعب يدربون ..حتى قبل ما ينتهي البريك....!!!
\\
شهـــرزآد
،
قلبـــــي وقف..اللي اشوفه صدق..؟! سليــــمان..؟! بسم الله الرحمن الرحيم..غمضت عيوني برعب..ياارب يكون حلم..يااارب..
لكن سمعت صوته الكريــه ينطق باسمي..
شفته يتجدم صوبي..مسكني من ذراعي بقووة..شفت امي..وخواني يطالعون برعب ..
همست بضعف له : هدني..مب وقته..يوم نظهر سووي اللي تبااه..
لمحت ابتسامة سخريه مرسومة ع ويهه..لكن ترك ايدي..وهذي اول مرة يسمع فيها كلامي...!!
ودعت امي بنظرة..وابتسامة الم.. جفت دمعتها تنزل ع خدها...صديت بسرعه مابي اشوفها..
ظهرنا انا وسليمان..
دزنــــي داخل السيارة بقوة....ارتجفت..
الله يستر..مااادري شو بيستوي....مادري منوو اللي قاله..؟! لايكون الدريول..؟
اخااف يكون عرف عن شغلي...؟! اسميني اليوم بنذبح انا واهلي..
قال بصوت المرعب للدريول: تحــــــــرك...!!
بعد ما ظهرنا من قريتي...
قالي بنبرة كلها استهزاء : عندج موعد مهم اليوم هااه..؟! هه..كنت شاااك فيج اصلا...وطرشت حد وراج يشوف وين انتي سايرة.."رص ع ضروسه وبنبرة تحذيرية " انتبـــــــــهي تستغفليني مرة ثانية...فااهمة...!!!!
انكمشت ع روحي..ارتحت شوي..من كلامه واضح انه بس اليوم تتبعني..
الحمدالله..
جفته يربت ع كتف الدريول...اللي من اول ما ركبنا وهو خااايف..مسكييين كآآسر خاطري...ورطته معاااي..
قاله : سووق ..سوق..حســـابك عندي عسير..!
,
وصلنا..
اول مادخلت الفيلا...مشيت بسرعه بسير جناحي..لكن حسيته مسك ايدي بقوة..وفرني صووبه..
تسارعت انفاسي بخوف..حاولت ما ابينه..
قالي: انتي ليـــش راسج يآآبس..؟! ليش ما تفهمييين..؟! تبيني اذبح امج واخوانج بعد..؟
ارتعشت من الفكرة..!
قلت بقوة مزيفة : وبعديــــن..؟! ذبحتــهم وبعدين..؟ تذبحني انا..؟! انزين اختصر الطريق...هذي انا جدامك..؟!
رفع حاجبه : يعني عادي عندج اقتلهم...؟!
طالعته بتحدي : في الاخيير كلنا خسرانين..بس انت بتكون خسارتك اكبر..!
فاجأني بضحكته : ذكـــية..! بـــس..منوو قالج اني بذبحج..؟! عادي اقدر استفييد منج باشياء وايد..!
كشرت....لكن فجاتني ملامحه اللي تحولت لوحش مخيف..
لف ذراعي ع ورا..
غمضت عيوني بألم...
اطلقت صرخه خافته : آآآه..
قال : شهــــرزاد ..لا تحطــــين راسج براســـــي...لا تحسبيني بتغاضى عن تصرفاتج...!
شد ذراعي بقوة..صرخت بالم...حسيت ذراعي بتنجلع..عقب تركني..
ركضت صوب جناحي..ارتميت ع السرير واطلقت العنـــان لدموعي..
,
بعد ما طلعت كل اللي فـ خاطري..حمدت ربي..صحيح ان اللي صار خرب كل شي..بس ع الاقل استمتعت بشوفه اهلــــي..وسليمان توقعته يسوي شي اكبر من جذي..الله يستر بعدني مب مطمنـــه..
\\
بعد مرور يومـــين
\\
فجـــــر..
\\
اليوم هو موعد المباراة المنتظر ..!
رسمنا الخطة اللي بنمشي عليها....
وكلنا دربنا عدل..مع اني احس في شوية توتر بين الشباب..
بعد نص ساعه بتبدا المباراة..
الكراسي بدت تمتلي بالجماهير........لا يغركم...مب جمهوورنا خخخخخ..
جمهوور الفريق الثاني...مشاءالله والله لهم شعبية كبييييرة...!
صديت ع الكراسي اللي المفروض تكون لجمهورنا..
هههههه غمضت عييني مابي اشووووف..والله تووحفه فريقنا..
تخيلوو انه سييد واحد الجمهوور..ههه..!!!!
فهد ومايد يسوون تمارين التسخين ويا بعض..
سمعت مايد يقول: شف شف...مالت بس....فرق بين جمهوورنا وجمهوورهم..هذيلاك مسوين عـــــرس ..يطبلون ويغنوون...انت شوف هذيلا بس..تقول يايين عزااا..! كل واحد متربع وحاط ايده ع خده وماد بوزه شبرين..
فهد : هه ويااااليت جمهووور ....الله يخلييك كل هذيلا اهلنا...وبالغصب خليناهم يقعدون هنيي..ولا خاطرهم اصلن يشجعون الفريق الثااني..
انا من سمعته..نقعت ضحـــــــك...
طالعووني بنظرة..خلتني اكتم ضحكتي..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك