رواية الغزال الشمالي -3

رواية الغزال الشمالي -3

بيت جوم ريم

فطامي: شو سويتي اليوم؟

ريم: عادي نفس كل يوم..

فطامي: كلمته اليوم..

ريم: منوه راشد..

فطامي: هيه وفهمته بأني ماباه..

ريم: لا حول ولا قوة إلا بالله..

فطامي: تصدقين ماقال ولا كلمة كل إاللي قاله..

(فطامي: والله بأني مب حاسة بسيء تجاهك..

راشد: مع الأيام بتحبيني الغالية..

فطامي: إمممممم إبويه غصبني عليك سو كل شيء غصب عني..

راشد: يمكن هذي هي مصلحتج؟

فطامي: لكني هب مرتاحة..

راشد: في هالزمن دوري على اللي يحبج مب اللي انتي تحبينه..

وسكرت عنه من دون لا آخذ حق ولا باطل..

)

ريم: تصدقين أحسه زين....

فطامي: لازق لزقة عنزروت..

ريم: يالبقرة يحبج..

وشوي إلا تلفون ريم يرن..

ريم: ألوه..

المتكلم: مرحبا..

ريم: خير من بغيت؟

المتكلم: أنا مروان..

ريم: مروان منوه؟

مروان: ربيع سالم الله يرحمه..

ريم تذكرته: مرحبابك ..

مروان: أنا بغيت أقولج شيء بس أخاف تفهميني غلط...

ريم: لا عادي قول شو بغيت؟

مروان: إنتو محتايين شيء؟

ريم سكتت شوي وقالت بصوت فيه شوية عصبية: لا ونحن مب حسنة يا أخ مروان..

مروان: العفو محد قال جذيه بس أنا ..

ريم: شيء في خاطرك؟ أنا مب فاضية..

مروان: على راحتج... الله يحفظج..

ريم بعد شوي ياها مسج..

(إخت ريم أخوي سالم موصني بكم وأنا ماقصدت شيء والسموحة)

ريم تلومت من الحركة إلي سوتها واتصلت له .... بس للأسف محد يرد عليها..

قالت بكتب له مسج.. وإلا شوي ويصيح التيلفون..

ريم: مرحبا أخوي مروان..

مروان: مرحبتين... اتصلتيلي بغيتي شيء؟

ريم شوي سكتت: حبيت أعتذر بس ..

مروان: أفااااا لا تعتذرين أبد أنا مقدر موقفج ولا تتحسبين مطرش المسج عشان ألومج لا والله بس أوضح موقفي..

ريم: العفو منك .... بس صدق نحن مب محتايين شيء

مروان تم ساكت وسرحان..

ريم حست بأنه مافي داعي تطول المكالمة أكثر وقالت: أوكي عيل شيء في خاطرك..

مروان: أه لا ليش بتسكرين؟

ريم سكتت وماعرفت بشوه ترد..

مروان: ياربي اسمحيلي على راحتج مع السلامة..

ريم: مع السلامــــــــــــة..

***

في الجامعة..

في المحاضرة الدكتور يشرح..

منى تكتب حق ريم على الطاولة (( سعيد بيينا اليوم بتروحين ويانا؟))

ريم ترد عليها(( لا والله وبجوات عين بعد؟))

منى(( بتروحين مب عكيفج))

ريم وهي تطالعها مبتسمة((أوكي))

في الكفتيريا..

منى وهي مبتسمة: سعيد مشتاق حق الجامعة وااايد..

ريم مسوية عمرها مشغولة وساكتة..

منى: وين يالغزال....

(وسكتت وكملت) يالغزال الشرجاوي..

ريم: شو بلاج إنتي سعيد سعيد قضية الشرق الأوسط هو؟

منى: لو سمحتي حبيبتي لا تغلطين على سعود..

ريم: محد كان يشكي من سعيد كثرج شو هالحب ؟

منى : هاه.... برايني أخويه..

ريم وهي تسكر الكتاب بقوة: عاد أنا ماشتقت حق حد ولا داني حد..

يتهن اليازية..

اليازية: السلام على من اتبع الهدى..

ريم + منى: وعليكم..

اليازية تستوي بنت عم منى بس أكبر عنهن بسنة وهي تتمنى سعيد، بس منى ما تبى غير ريم لأخوها..

اليازية: منوه اليوم بروح وياكم..

منى وهي مستاءة: لا؟ مرحبابج..

اليازية تطالعها بنظرة: بالمرحب..

ريم: أنا بيلس في الجامعة أكمل بحوثي..

منى: لا لا بتروحين ويانا..

اليازية : مب لازم..

وهنيه اليازية تمت تطالع ريم وقالت لها: انسير ورفجة أغلى الناس عندج؟

ريم: لا حول ولا قوة إلا بالله... إنشاءالله.

**

في السيارة

سعيد: مرحبا الساع..

منى + اليازية: هلا فيك..

سعيد: هذي مب الريم؟

ريم: هيه..

سعيد: أفاااااا ما تسلمين؟

ريم ساكتة..

اليازية: لا والله حتى نحن ماسلمنا ولا ناس وناس.. وكان باين من صوتها متضايقة..

سعيد شغل المسجل من دون مايرد على اليازية..

وشغل على أغنية عيضة وقال حق منى : منى تراها إهداء..

منى: إهداء؟!

ريم فهمت قصد سعيد..

بس للأسف هذي الأغنية..يا طارشي شل السلام ووده للي عيونه والهدب مسودة غالي ويتزايد بقلبي وده...

ريم: بندها

سعيد متفاجئ وبندها بسرعة : إنزين ..

في نفس اللحظة كانو واصلين بيت جوم ريم.. كانت ريم تصيح لأنها تذكرت أخوها سالم..

ونزلت بسرعة بس سعيد بعد نزل من السيارة وزجرها...

سعيد: ريم... ريم..

ريم وقفت: شوه بغيت؟

سعيد: والله آسف بس...... بس.......... ترى أنا أحبج..

ريم استحت وبسرعة دشت بيتهم..

سعيد ركب السيارة..

منى: لا إله إلا الله..

اليازية: ما يسوى علينا كل شيء يذكرها بخوها صاحت لنا..

سعيد: هذيلا الناس اللي يحسون..

منى: بس انته وهيه..

*****

في البيت

ريم: السلام عليكم .. وسارت صوب أمها وباست إيديها..

أميه شحالج؟ فديتج تبين شيء؟

الأم : تحرك إيديها بالنفي..

ريم: عيل بسير حجرتيه ..

في حجرتها..

تذكرت سعيد والكلمة إلي قالها: بس أنا أحبج..

ريم: لا يالريم ......بس سعيد؟ يالله شو هالبلاء ؟ شو هالشعور؟ كله منج يالمنى...

فطامي دشت البيت : السلام..

سلمت على أمها وراحت حجرتها..

ريم: هلا ..

فطامي : هلا بج الغالية...

وسارت صوب كبتها وطلعت تيلفونها وفتحته..

ريم: ما يسوى على راشد مب جد تدليع تدلعين عليه..

فطامي: والله مادري على شوه ماخذني..

وشوي إلا التلفون يصيح..

فطامي: مرحبا..

راشد: هاه وين؟

فطامي : لحظة بطلع برى عن الريم..

الريم تأشرلها : ماعليه برى عن الريم..

فطامي : مرحبا رشود..

راشد: إنتي ليش تعامليني بكل هذا الجفاف..

فطامي: ياويلي قلتلي تباني أقولك حبيبي قتلك حبيبي وشو غير..

راشد: ماقلتلج بس اجولج كيف يكلمون الناس... حشى ذليتينا بكلمة حبيبي لا تقولينها..

فطامي: رشود تعبانة توني رادة من المدرسة سوري تعبانة وااايد..

راشد: خلاص.. وصك التيلفون بويهها..

وراشد وهو يكلم نفسه: ليش جذيه أحبها يمكن من كثر ماهي حاجرتني بس حلوة أحبها باجر بتغدي حرمتيه براويها بجابل ذاك الويه أربع وعشرين ساعة.. يالله متى عاد..

***

العصر

ب.. في الصالة كانت الريم يالسة وشوي إلا خدامة جوم أبوها داشة وبإيدها باقة ورد وكيس وقالت للريم بأنه من عند بابا راشد حق ماما فاطمة..

الريم: فطامي تعالي شوفي..

فطامي بالقوة تنش: شو مستوي؟

الريم داشة وبيدها باقة ورد كبيرة وكيس صغير: من عند عنترة العاشق المحروم..

جامت فطامي وفتحت الكيس..

وفتحت العلبة ومانتبهت للهدية شدتها ورقة فيها ورقة مسكت الورقة..

حبيبتي القاسية..

كل عام وإنتي بخير..

ومسكت الورقة الثانية صورة من الجواز محوط على تاريخ الميلاد بقلم بسفوري..

ريم: حليلــــــــــــــه..

فطامي: ريموه تصدقين بأني عديمة إحساس..

ريم: اتصليله وغازليه حبيبتي تراه ريلج مب غريب..

فطامي : بشوف..

فطامي:ألوووووه..

راشد وهوفرحان بس ما بين هالشيء لفطامي: أهلا من دون نفس أونه..

فطامي: حبيبي رشود مشكور فديتك على الهدية..

راشد يقول في نفسه: من وين طالعه الشمس فديتك مرة وحدة.. ييه من الحريم مادري نحن الرياييل متعلقين بهن.... هن

فطامي: أنا آسفة كنت مب حاسة فيك..

راشد: حتى أنا آسف مشغول بسكر عنج..

فطامي: شوووووه؟

راشد: مع السلامة..

فطامي لأول مرة تحس نفسها ماتبى تسكر عنه..

بس سكر عنها..

ردت فطامي للريم..

ريم: شو فيج زعلانة؟

فطامي: ما يبى يكلمني مشغول أوين..

ريم: عاشوا بدو يحبون..

شوي إلا تلفون ريم يرن..

بس ريم ما ردت عليه، فطامي: ردي..

ريم: رقم غريب..

ريم روحت برى تذاكر وبعدين جامت تسوي عشاء ..

وهي في المطبخ يتها فطامي يايبتلها التلفون وقالتلها : منى عالخط؟

ريم: مرحبا..

منى: هاه وين عن التيلفون؟

ريم:أسوي عشى حبيبتي..

منى تصك على التيلفون وتقول حق سعيد: تسوي عشى يعني مب زعلانة..

هيه ريم ماشاء الله عليج ياحظ إللي بياخذج..

ريم: شو تبين؟

منى: مالت عليج ماتستحين تقوليلي جذيه؟

ريم: تبين الصدق لا ما أستحي ، لأني بتصلج فالليل..

منى: يالله يالله ..

***

سعيد: ليش بندتي؟

منى: فكني من صدعتك إنته وريماني..

سعيد: إنزين

منى : بتتصل فليل..

سعيد: لا تخسرينها اتصليلها إنتي..

منى: حطلي رصيد..

سعيد: لا حول... إنزين..

***

في الليل..

ريم جامت تتصل حق منى بس منى سكرت بويهها وردت تتصل..

ريم: ليش تسكرين في ويهي..

منى: أوامر الشيخ سعيد يقول محد يخسر ريم خانو..

ريم: هاهاها لاااااااااا....

منى: تراه محتشر عليه بسببج..

ريم: ليش؟

منى: يقول يخايف تكونين زعلانة عسبة اليوم..

ريم: لا والله مب زعلانة..

منى: إنزين قوليلي شو قالج يوم نزل وراج؟

ريم: يالقافة !

منى: قولي؟؟

ريم مستحية : قال يحبني..

منى: كلللللللش مبروك..

ريم: بس علج الفضايح ..

منى : كملي الفلم..

ريم: بس..

***

الصبح ..

فطامي: ماتصل بالمرة..

ريم: تستاهلين ياما حجرتيه..

فطامي: ياربي مادري ليش متوله عليه..

ريم: دق القلب ياحلوة..

فطامي: بسير المدرسة وبخلي تلفوني مفتوح بشوف بيتصل..

ريم: يالله بروح الباص برى..

***

ركبت ريم باص الجامعة..

ريم: منوه شو فيج ساكتة؟

منى: هاه ماشيء بس ساكتة نودانة..

ريم: يالله ماقتلج عن راشد ريل فطامي أمس كان عيد ميلادها وطرشلها هدية يالله ..

منى: واللـــــــــــــه! شو يابلها؟

ريم: باقة ورد تينن وإسوارة بعد حلوة ولا بعد رسالة..

منى: بس إختج ماتباه..

ريم: ترى هنيه الإثارة فطامي بتموت من القهر ليش إنها يوم اتصلتله حجرها وطنشها ولا عبرها حتى بمسج..

منى: مالت على الرياييل يوم يبون يردونها تراهم يردونها عدل..

ريم: خليه يأدبها.. والله إن الريال واااايد زين بس هيه شايفه عمرها عليه ودومها تقوله بأنه مغصوبه عليه.. بس يالله الله يهني سعيد بسعيدة..

منى: شوه قلتي حبيبتي صححي المقولة الله يهني سعيد بريماني..

ريم: يالطفسة.... حد بيسمعج وبيسوي إشاعات..

منى: يالله يارب تكونين له ويكون لج..

ريم تطالعها : بسج من الرمسة..

منى: ياربي علينا امتحان ..

ريم: نزلي وصلنا ولا مابدامين؟

منى: يالله..

***

في الحرم الجامعي..

ريم تلفونها يرن.. مشت بعيد عن البنات..

ريم: ألوه..

مروان: مرحبا ريم..

ريم شكلها متضايقة: خير حرجت التيلفون شو تبى؟

مروان برزة ويه يسوي عمره مافهم: اسمحيلي ياغالية بس قلت يمكن ماعندج رصيد تردين تتصلين لي ..

ريم: لحظة لحظة أولا أنا مب غالية ولا أحب أسمع هالألفاظ يا أخ، وأنا ما أبغي أكلمك إنزين ولا تتصل على تيلفوني فضحتني التلفون ما يسكت منك..

مروان بصوت مسكين: الله يسامحج..

ريم: أجمعين مع السلامة..

صك مروان التيلفون بس كان متضايق..

واطالع ربيعه ناصر.. وقال: بتشوف هالمتكبرة ...

ناصر: شو تباها؟

مروان: ما شفتها ولا بتتخبل عليها، يا أخي جمال غير طبيعي، يالله ماتسوي سالفة حق حد..

ناصر: خاطري أشوفها..

مروان: عمت عينك شو تشوفها؟

ناصر: حلال عليك وحرام علينا..

مروان: هذي بس لي أنا..

ناصر: هيه بتخطبها؟

مروان: تخسي هالفقيرة أنا ماباخذ غير وحدة من ثوبي..

ناصر: إمممم.... تم يطالعه بكره ... عيل شو بتسوي..

مروان: شيء طبيعي بطلعها يالغبي.

ناصر: مثل هذيلا المتربيات عدل مب لعبة في إيدك..

مروان: بنشوف يانصور..

***

في البيت..

تلفون ريم ما بند من ردت من الجامعة وحطته على السايلنت..

فطامي: يالله ماتصل..

ريم: تبين أكلمه؟

فطامي: بيبطي ما بسويله سالفة..

ريم: مالت عليكم ثنينكم..

طلعت ريم برى الحجرة وردت على التيلفون ريم وبكل عصبية: خير؟

مروان: شوي شوي على عمرج حبيبي؟

ريم: احترم ألفاظك ..

مروان: كلميني عدل..

ريم: عدلوك بيدعه انشالله..

مروان: أبى أعرف..

وقبل لا يكمل رمسته سكرت فويهه..

ويتصل بس ريموه ماسوتله سالفة...وشوي إلا هو رقم غريب..

ريم: الله يغربلك من نذل وزعت الرقم بعد... لو بتموت مارد عليك..

وفي الزاوية الثانية ..

فطامي وصوتها زعلان: حي من تذكر..

راشد محد _فرحان جده: الله يحيج ويبجيج..

فطامي: مالت تصدق مادانييييك؟

راشد: عادي سامعنها ألف مرة بس هالمرة غير فديتج..

فطامي حست بشعور غريب وسكتت ... وهي تكلم نفسها قالت: يالله فديتج ليش هالمرة تأثرت بها..

راشد: بلاج مويمة؟

فطامي: لا لا ماشي؟

راشد: تولهت عليج وااايد تولهتي إنتي؟

فطامي: تبى الصدق؟

راشد: إذا لا لا تقولينه والله أبى أتعشى ولا أباج تلوعين بجبدي، سكتي وأنا بفهم

فطامي سكتت بس بعد شوي: ماتولهت بس كنت بموت من شوقي لك..

راشد: فديتج أنا، مابغيتي تتولهين..

فطامي: خلاص عاد..

منى: هاه سعود بلاك ساكت؟ وإنتي إمايه بلاج ساكته؟

الأم: ماشي بلانا..

منى : عيل شحقه ساكتين؟

سعيد: يعني لازم نهذرب عشان ترتاحين..

منى: هاها لااااااااا بس رمسوا..

إنزين أقول سعيد الأسبوع الياي بنسير رحلة لمهرجان دبي من الجامعة..

سعيد: ريم بتسير وياج؟

منى: هيه...

سعيد : ماتبني أنا أسيربكن؟

منى: لا والله استريح يالدريول..

سعيد ولي أمر منى بعد وفاة أبوها وهم أربعة إختها مابخذنها ولد عمها أخو اليازية..

***

مروان تم يراقب الريم وين ماتروح ووين ما تي

مرة نازلة من الباص كان موقف عدال الموقف، نزل دريشة السيارة وناداها..

مروان: أقولج إنتي يالغزال..

ريم اطالعته: صدق إن لم تستحي فافعل ما تشاء..

ناصر: يالله هذي هي

.. الله أكبر شو حلوة..

مروان: وتلومني؟

مشت ريم صوبه: انته وبعدين وياك والله العظيم بخليك تندم..

مروان: لا حبيبي أنا أخلي البنات تندم مب العكس..

ريم: ترضاها في اختك؟

مروان سكت ولا سوى اهتمام لكلامها.. ريم مشت لبيتهم والصبر فاض عندها لمنوه تقول سالم وينك ياسالم محتايتنك ياخوي شو تبى ترابع مثل هالنذل وتوصيه علينا..

ولا أبوها إلي بس من عيد لعيد يشوفونه ولا أمها اللي ماتقدر تتكلم..

لمنى حبيبتها وربيعة عمرها ، لا مب زين..

ريم: يالله يارب ترحمني من هالعذاب..

***

الساعة 2:30 الظهر ريم خلصت محاضراتها ومنى بعد قررن يردن في الباص ..

ريم: يالله منوه نزلي عندنا واتصلي حق سعيد إيي ياخذج مب زين اتمين بروحج في الباص..

منى: هيه والله أخاف من هالباكستاني..

نزلن عند الموقف..

في سيارة مخفية ..

منى: يالله محد في الفريج..

ريم تطالع السيارة : يالله بسرعة انسير..

وشوي وإلا في مجموعة شباب ناطة عليهن ..

منى: ريموه شوه هذا؟

ريم: شو تبون؟

........: يالله جدامي بدون صوت تفهمن..

ريم: تخسي إلا إنته... جدامك وين؟

،،،،،،،: بلا كترة حكي ويالله اسمعوا الكلام..

منى وهي تصيح : ريموه ..

ريم عيونها مدمعه وهي تحضن ربيعتها يمشن جدامهم..

وغطوا على عيونهن.. وفجأة وقفت السيارة

ريم: اللهم سألتك باسمك الأعظم الذي إذا سئلت به أجبت..

يتبع ,,,,

👇👇👇

تعديل المقال