رواية عهدي مع الايام -38
ريلي وتترك اهلك عشاني
جراح راح القسم الثاني من البيت وقعد بالصاله ومعاه ملاك ينطر ليال تنزل
جراح:ملوكه منو حلوه
ملاك:ماما لولي
جراح يبتسم:ملاكي بعد حلوه
ملاك:ابي ماما لولي
جراح:ماما ليال قاعده تلبس بس تخلص تنزل تحت
ملاك:دين (انزين)
جراح يلعب بشعر ملاك ويسولف معاها سمع صوت خطوات ليال وهيا نازله من السلم رفع راسه وشافها ابتسم على شكلها ولبسها ومكياجها كانت مثل مايحب جراح واكثر ...اما ليال تغيرت ملامح ويها من شافت جراح قاعد
ليال:وين البنات
جراح:راحو
ليال بصدمه:نعم
جراح:اذا خالصه يالله خل نمشي عشان لانتأخر عليهم
ليال بقلبها(سوها فيني والله اعلمهم)
جراح :خالصه ولا بعد
ليال :اي خالصه
اطلعو من البيت وركبت السياره وحطت ملاك بحظنها
جراح:ليش حاطتها بحظنج خليها ورا احسن لها
ليال :ماتعرف تقعد بدون كارسيت
جراح:ووين كارسيتها
ليال:مايحتاج خلها عندي
جراح:اوكي ...ومشى
طول الطريج ليال كانت تلعب مع ملاك وكاشته ب جراح ...امها جراح كان كل شوي يلتفت عليها ويبتسم من يشوفها ...كان يحس بشي فقده من زمان يحس انه قاعد بين اسرته الصغيره البنت والام وهو الاب وهذا الاحساس الي كان فاقده من فتره طويله رغم انه ملاك معاه بالبيت وطول ما اهو بالبيت يحاول يتقرب منها ويعوضها عن الايام الي فاتت
جراح:الصبغه مغيرتج
ليال لاتعليق
جراح:حتى القصه محليتج وايد
ليال بنفسيه:طول عمري حلوه
جراح وهو يبتسم:اكيد حلوه لو ماكنتي حلوه وماليه عيني جان ماخذيتج
ليال بقلبها(ماتعرف اتجذب لو كنت ماليه عينك جان ماتزوجت علي )
جراح:ليش ساكته
ليال:مشكور على المجامله
جراح بستغراب:مجامله...انا ما احب المجاملات وانتي تدرين فيني
ليال ببتسامه وستهزاء:سوري بس انا ما عشت معاك غير فتره بصيطه يعني ماعرفك عدل ...وماقدر اقيم كلامك اذا كان مجامله ولا لاء
جراح :تغيرتي وايد يا ليال ...وين ليولتي الدلوعه وين ليولتي الي البتسامه ماتفارقها وين ليولتي الي تحب القعده معاي وماودها تفارقني
ليال بحزن :ماتت...اي ليال الي تتكلم عنها ماتت من سافر ريها وختفا ماتت من سمعت انه مفقود ماتت من زمان
جراح:بعد عمر طويل ليش تقولين جذي
ليال لفت ويها عنه كانت تحاول تبعد نظراتها عنه عشان لايشوف الدموع الي تيمعت بعيونهاا عشان لايشوف ضعفها وجرحها الي سببه لها
جراح حس انها تضايقت وماحب يتكلم اكثر عشان لايخرب الطلعه ...عم السكوت بينهم لين وصلو المطعم
بالمطعم
كادي تساسر اريام:امبيه اكيد صاير بينهم شي شوفي ليول ويها معفوس
اريام:الله يهديهم ان شاء الله
ليال:السلام
الكل:وعليكم السلام
خالد:الله شهالزين اش هل حلات صكيتي على بناتي
اريام:نعم نعم ...منو يصك علي والله ماتوصل
خالد:انتي حلو بس ليال احلى وكلمت الحق تنقال
ليال:مشكور عمي عيونك الحلوه
ليال اقعدت عند اريام وهنادي قبالها اما جراح قعد عند هنادي وقبال اريام
اريام بهمش:شفيج
ليال التفتت عليها وماعلقت على كلامها
اريام على نفس النبره:ليول والله ابوي اهو الي
ليال تقاطعها :ريوم مو وقتج
اريام :على راحتج
جراح :رتوج وينها
خالد:بطريج
جراح:مشاري معاها
خالد:لا مشاري مسافر اليوم الصبح
جراح:وطلال
خالد:يقول عنده شغل مهم ومايقدر ايه
بهاللحظه اوصلت رتاج
رتاج:مساء الخيير
الكل :مساء النور
رتاج سلمت على امها وابوها وقعدت عند جراح قبال كادي
رتاج:مسوين نيولوك ليش ماقلتولي
اريام:محد قالج لاتين عندنا
كادي:اي والله تصدقين نسيت انه عندي اخت
رتاج بعصبيه:لا والله
جراح:ماعليج منهم اصلا اهما مايستغنون عنج
رتاج:ادري فيهم مايحتاج تقول
طلبوا لعشا وبدو يتعشون وجراح طول الوقت عينه على ليال وهيا تسولف وتضحك
جراح بقلبه(وتقول ليال ماتت هذي ليال الي اعرفها ليال الي سحرتني بجمالها ودلالها وبرائتها ..لازم ترجع لي لازم تنسى كل شي لازم تسامحني )
هنادي:اي قبل ما انسى باجر عازمه رفيجاتي ولازم تكونون موجودين
رتاج:انشالله
هنادي:جراح مابي غرور تكون موجوده اطلع معاها اطردها اي شي بس الامهم مابيها بالبيت
جراح:ليش
هنادي:ليش تبيني اقول لهم انها زوجتك عشان يقولون ولدها استخف ماخذ وحده بعمر يدتي ...وبعدين ليال موجوده وابي اتباها فيها جدامهم مابي تصير مقارنه بينهم ...الان بصراحه مافي اي وجه مقارنه
جراح:ان شاء الله يما
هنادي:من العصر تطلع من البيت ...ولا اقولك سفرها وفكنا منها
اريام:ههههههههههه ...ماما شنو يسفرها خدامه اهيا
هنادي:كيفه خل يتصرف معاها المهم ماتكون موجوده
جراح:ماطلبتي شي يالغاليه ...وليال تكفي وتوفي
رتاج تساسره:اهيا من زمان تكفي وتوفي
جراح ماعلق اكتفى ببتسامه
كادي:دام جذي خل لينا اتي باجر بعد
اريام:شنو بتلبسون
خالد:بيييه من الحين تفكرون شتسون
كادي:اي بابا لازم نقرر من الحين لان اذا ما قررنا لازم انروح الصبح السوق
اريام:والله فكره يبيله روحه لسوق باجر الصبح
كادي:ها ليول شقلتي باجر انروح
ليال:لا وين باجر بروح الكليه مايمديني
اريام:وااي ليول سحبي عليهم يوم
ليال:مابقى شي على الفاينل ولازم احظر
رتاج:ماعندج فراغ
ليال:عندي ساعتين
رتاج:ساعتين حلوين
ليال:مع هذيل يبيلج اقل شي اربع ساعات
اريام:انا ذوقي صعب ومايعجبني اي شي
ليال:وانتي الصاجه تفترين السوق محل محل وتالي تختارين لج بدله
الكل:شنو
خالد:ملاك طول الوقت ساكته ومالها حس
اريام:اي بابا احنه معطينها دروس ماتبطل حلجها وحنه بره البيت
جراح:ياسلام لاعبين بحسبت بنتي المسكينه...يلتفت على ملاك...تكلمي بابا طلعي كل الي بقلبج يابعد قلبي
هنادي:صج انتو شمسوين فيها مخرعينها بشي
ليال:لا يما ماعليج منهم بس احنه عودناها اذا طلعت تقعد هاديه
اريام:اي يعني مالنا خلق حنت ياهال على راسنا ..نبي نستانس وانتو عارفين انه مدام ليال ماتطلع بدونها
خالد:والله منو هينين شكلكم ذابحين البنت وقاعدين
كادي:بابا لاتتبلا علينا بس احنه معلمينها انه بالاماكن العامه ماتصارخ وتسولف وايد
هنادي تشوف ملاك وتضحك:هذي منصجها ساكته ....الله يغربل ابليسكم كل هذا عشان طلعتكم لاتخترب
ليال:لا يغركم السانها بالبيت من تطلع السانها يختفي ...وتقرص خدها...واي فديتها ..وتبوسها
اريام:ملوكه تخاف تقعد بروحها لازم وحده فينا معاها وخصوصا ليال من تشوفها ترتاح
هنادي:انا لاحظت عليها من فتره بس قلت يمكن تبي تلعب معاكم
كادي:لا يما اهي من زمان جذي من وهيا صغيرها ..ماشفتيها امرضت من ليال ابتعدت عنها ...ملوكه خوافه وايد
ليال كانت تلعب بشعر ملاك وهيا سرحانه بكلامهم
اريام:عشان جذي اتفقنا كل اسبوع انطلعها عشان تتعود على الناس ولاتصير وحشيه
ليال وهيا تلعب بشعر ملاك :يمكن خايفه من الوحده يمكن خايفه الكل يتخلا عنها ...اذا اقرب انسان لها تخلى عنها شلون الغريب ....ليال شالت ملاك وحطتها بحضنها لمتها حيل وقامت اتبوسها وتقول بهمس(مستحيل اتخلى عنج)...ارفعت راسها وطاحت عينها بعين جراح الي كان مصدوم ومتضايق وايد من الكلام الي سمعه عن بنته
خالد:هذي ياهل وماتفهم انه امها تخلت عنها
هنادي:منو قالك الياهل مايحس ...الياهل يعرف امه اول ماينولد من صوت خطواتها ومن دقات قلبها
خالد:اي بس اهيا كبرت عند ليال وماتعرف ام غيرها واهيا احن عليها من مريم
كادي:بابا صح كلامك ليول ماقصرت معاها يمكن اهيا طبعها جذي موشرط كل اليهال نفس الطبع
رتاج:صح في ياهال ما يتأقلمون مع الناس الغرب بسهوله
جراح بضيق:والحل بنتي بتضل جذي طول العمر
ليال:لا ان شاء الله مع الايام بتكبر وتفهم اكثر وتتأقلم على الوضع
كادي:اي والله ويمكن تصير مثل عمتها تحب الهياته
جراح خوف:واذا ماتغيرت وضلت على طبعها
خالد يقاطعه:مافي شي يضل على حاله وانا ابوك كل شي يتغير وبعدين اهيا توها صغيره واغلب اليهال جذي
هنادي:ابوك معاه حق لاتحاتي
بشقة طلال
طلال منسدح بالفراش ويمه حنان
طلال:حنون منتي راده بيتكم
حنان :لا بنام هني اليوم
طلال:واهلج
حنان:قلت لهم بنام عند ارفيجتي
طلال:الي اعرفه انهم مايخلونج تنامين بره البيت
حنان :هذاك اول والاول تحول
طلال لاتعليق
حنان:طلولي
طلال:عيونه وقلبه
حنان بدلع:بترد البيت ولا تبات عندي
طلال:مايبيله كلام طبعا عندج
حنان:و زوجتك
طلال:بيت اهلها
حنان:زعلانه
طلال:لا بس زياره عاديه
حنان:اها دام جذي قول لها انك مسافر يومين وخلها عند اهلها
طلال:هم فكره
حنان:دام جذي سكر جهازك من الحين
طلال:لا خليها باجر يمكن ادق تبي شي
حنان :عيني ماتقدر تستغني عنها
طلال لاتعليق
فلاة خالد
جنى ماكانت ابيت اهلها مثل مايضن طلال ....اهيا فعلا راحت بيت اهلها لكن مسرع مارجعت حست بتأنيب الضمير الانها ضايقت طلال بالفتره هذي وخصوصا وهو مشغلو والسنه الماليه قربت عشان جذي قررت انها تسوي له مفاجأه بالبيت....حطت شموع بكل مكان بالجناح ونثرت الورد على الارض والطاولات ...وشرت كفر يديد حق غرفتها النوم وخذت له عطر مع قلم ...العطر لي رش منه يتذكرها والقلم لي كتب فيه هم تذكرها
جنى بعد ماخلصت دقت عليه
طلال بنفسه:هلا
جنى بدلع:حياتي وينك
طلال:مشغول شوي بغيتي شي
جنى:اي مشتاق تلك وايد متى تي
طلال بحزم:جنى انا مشغول ومو فاضي اذا عندج شي قوليه
جنى :خلاص روح خلص شغلك لاتجهد نفسك اذا حسيت بتعب ريح شوي
طلال:اوكي ....يالله باي ...وصكه قبل مايسمع ردها
جنى بعد ماسكرت التليفون ضلت اطالع المكان فتره تنهدت بضيق وقامت بدلت هدومها ونسدحت بالفراش
نهاية البارت
البارت 38
فلا خالد
بصاله
جراح كان قاعد بالصاله من اول ما وصلو البيت ..كان يفكر ب ملاك والكلام الي سمعه عنها كان متضايق ومهموم ...بنته الوحيده يصير فيها جذي ...وليش الخوف
افكار وايد كانت تطري على باله ...قرر انه ما يفارقها الا وقت الشغل بس يمكن الي قرب منها تتغير وتحس بالأمان ...قام وراح القسم الثاني من البيت
بالبيت الثاني البنات كانو توهم خالصين من التبديل ونازلين تحت
البنات استغربو من وجود جراح
كادي:جريح شفيك
جراح بضيق:وين ليال
اريام بستغراب:ليال فوق تبدل ملاك وتنزل
جراح راح عند السلم ونادا بصوت عالي :ليال ...ليال ....ليال
كادي:جريح حبيبي شفيك صاير شي
جراح بعصبيه:انتي الي شفيج ....واحد ينادي زوجته يبيها شنو الغريب بالموضوع
ليال من اسمعت جراح يناديها خافت ونزلت بسرعه وهيا شايله ملاك:نعم
جراح:عطيني ملاك
ليال :جراح شفيك
جراح:ابي بنتي حرام
ليال بدون ماتتكلم عطته ملاك ...الي بجت من خذاها جراح:ملوكتي انا بروح اسوي حليبه حق ملوكتي الحلوه انتي قعدي مع بابا
ملاك تهز راسها بنفي:ماما لولي
جراح لمها حيل وكان يبوس راسها :بس بابا بس حبيبتي لا تبجين
ليال :اصلا ملاكي حلوه وشاطره وتسمع كلام بابا صح....وباستها على خدها وراحت
اما ملاك ضلت تبجي وجراح يحاول يسكتها
جراح:ريوم هذي جنها ردت نفس قبل
اريام:لا ويين
جراح:عيل ليش ماتسكت
كادي:اهيا وقت نومتها ماتبي الا ليال
جراح يكلمها بكل حنيه:ملوكه حبيبتي بس بابا والله قطعتي قلبي لا تبجين البنات الحلوين مايبجون
ملاك:ابي ماما لولي
ليال اطلعت من المطبخ وبيدها حليبت ملاك :كاني ماما
جراح:عطيني الحليب انا اعطيها
ليال:ماراح تسكت خل تشرب بعدين اخذها ..ليال خذت ملاك من جراح وراحت اقعدت عند البنات وحطت ملاك على صدرها وايدها تحت راس ملاك ..وملاك ماسكه الحليبه وتشرب
كادي:ليال عفي هوديها فوق مالنا خلق تفلسفها علينا
ملاك طلعت الحليب من حلجها :اووش انا نامين
جراح على الضيقه الي فيه ماقدر يمسك نفسه:هههههههه
اريام:يالله خذ ...ام السان ماتعرف تسكت
ليال:بس سكتو خلوها تشرب على راحتها
كادي :ياسلاااام ...حبيبتي اخذ بنتج وصعدي فوق
ملاك ردت طلعت الحليب :اووووش
جراح اخذ الكوشيه وحذفها على كادي:سكتي خل بنتي تشرب
وعم الهدوء بالمكان
جراح راح قعد عند ليال وعينه على ملاك الي تشرب حليب والبنات ماصدقو خبر اريام وكادي بدو يطالعون بعض ويضحكون ومرات يغمزون حق ليال ...الي من تشوف حركاتهم تعفس ويها بويهم وهما يضحكون بعد فتره نامت ملاك على صدر ليال
ليال بصوت واطي:افراج
كادي:مابغت
اريام:اي والله افراج ..مره ثانيه نوميها فوق
جراح حط ايده على راس ملاك وهو يمسح عليها وهو يكلمها بصوت واطي :ملاكي بابا انا معاج وين ماكنتي ما راح اخليج لا تخافين من شي طول ما راسي يشم الهوا...لاتخافين بابا والله ماراح تضلين بروحج
ليال التفتت عليه وشافت الحزن بعيون حست بضيقه على زعله وخوفه... حست انه محتاج احد معاه وخصوصا انه جراح صارله جم يوم متضايق
ليال :جراح ملاك مافيها شي تطمن
اريام:جريح ليش مكبر الموضوع
جراح:اشلون ما تبيني اكبر الموضوع وانتو تقولون انها تخاف من الوحده وحتى وحنه بالمطعم ما كانت طبيعيه هذي بنتي اشلون ما اخاف عليها
كادي:جريح حبيبي ترى والله عادي اغلب اليهال جذي ..صدقني من تدخل الروضه كل شي يتغير
جراح:واذا ما تغيرت
ليال كانت تسمعهم وبقلبها(يابختج ياملاك عندج ابو يخاف عليج جذي ...اما انا ابوي ما عمره فكر فيني وهمه الوحيد كلام الناس )
ليال:تتغير مثل ما يتغير كل شي بالدنيا....خل اوديها فوق قبل ماتقعد
جراح :خليها انا اوديها
ليال :اوكي بس شوي شوي ...اول غرفه على ايدك اليمين
جراح خذا ملاك من ليال وصعد فوق
اريام:بستغراب:هذا من صجه ولا يتغشمره
كادي:انتي شفتي ويها عشان تقولين يتغشمر ...حرام عور قلبي
ليال:تصدقين حتى انا اول مره ادري انه عنده احساس ويحس مثلنا كسر خاطري
كادي:ليش قالولج قلبه صخر مايحس ...ليول ساعات تقطين حجي مادري شلون صاير
ليال:وهذا الصج اخوج طول عمره منفس ورافع خشمه وكله معصب على شنو مادري
كادي وهيا متنرفزه :الحين جراح كله منفس ورافع خشمه
اريام تقاطعها: بس عاد شنو ماكو سيره بهالبيت الا جراح ماعندنا شي ثاني نتناقش فيه
كادي:علمي مرت اخوج الي ما تثمن كلامها
ليال بعصبيه :ليش كلمة الحق صارت اتزعل ولا لان جراح اخوكم ما ترضون عليه ...طبيعي انا بنت الناس وين بتحسون فيني
اريام:ليال خلاص
ليال عصبت وقامت اصعدت فوق
اريام:انتي شفيج عليها
كادي:مافيني شي بس مصختها لي متى تغلط على اخونا واحنه ساكتين
اريام:لاتلومينها من الحره الي فيها
كادي:لا والله ليش جراح شنو واذا على الزواج اهو لا اول ولا اخر واحد يتزوج على مرته
اريام:الشريجه تحر لو هي بالقبر حطي نفسج بمكانها وبعدين تكلمي ...عن اذنج وقامت
بغرفة ليال
جراح كان منسدح على فراش ليال وملاك يمه ...ليال ادخلت الغرفه ولمن شافته نايم انقهرت منه
ليال:ابي انام
جراح:ابي انام عند بنتي اليوم
ليال:وانا وين انام
جراح:الفراش كبير تعالي نامي
ليال بعصبيه:ياسلام
جراح:مو عاجبج روحي عند البنات نامي
ليال:اوووف ...ولفت عشان تطلع لكن وقفت على صوته
جراح:روحي يبيلي ملابس مومعقوله بنام بدشداشتي
ليال:نعم
جراح:اعتقد سمعتي الي قلته روحي يبيلي ملابس بسرعه
ليال:قول حق الخدم وخواتك انا مالي شغل
جراح رفع نسه شوي وشرار يطلع من عينه:لمن اقولج شي لاتراديدن فاهمه ومافي غيرج بروح ايبلي ملابس يالله اشوف جدامي روحي
ليال:واذا ماراح
جراح بعصبيه:ليال انتي تدرين فيني لي عصبت ما امسك نفسي قصري الشر وروحي
ليال:دق على ماما عوده تيب لك م واهيا زوجته
جراح بنبره حاده:ليال
ليال بخوف:انزين ...وطلعت من الغرفه وهيا تتحلطم ....اوووف ادري حركاته هذي كلها عشان يقهرني انا اعلمك
اريام :ليال شفيج وين رايحه
ليال كملت طريجها بدون ماترد عليها ...انزلت تحت وخذت تليفونها وطلعت للبيت الثاني ...ودقت على جنى لكن جنى كانت نايمه وماردت عليها
ليال:اوووف شسوي الحين ...لو يموت ويقطع نفسه قطعه قطعه ما اروح عند عقرب الرمل
عند جراح
جراح بقلبه(انا شلون خليتها تروح هذا وقته الحين يتهاوشون وتعال فجج وفوق هذا ماني ناقص غرور صايره حنانه صج لي قالو يامن شراله من حلاله عله وانا ماخذلي علتين مو وحده ...خل اروح اشوفهم قبل مايسون مصيبه )قام من الفراش ونزل تحت واول مافتح الباب شاف ليال بويها
ليال بيها ملابس:تفضل
جراح اخذ الملابس وما علق...ورد صعد فوق اما ليال ردت طلعت من البيت وراحت البيت الثاني ...راحت لي غرفتها القديمه عشان تنام فيها وقبل ماتنام طرشت مسج حق اريام (انا بنام بالبيت العود وجراح عند ملاك اذا قامت باليل ورحي لها) وصكرت جهازها ...لكن ماقدرت تصكر قلبها الي مشتعل بالنار ...نار ظلم وحقد ....ماقدرت تتمالك نفسها صارت تبجي وتشكي لليل همها و وحدها
تشتكي من ظلم الايام الي عمرها ماضحكت لها كل الي تحبهم اي اليوم الي يتخلون في عنها ...ضلت تبجي وتشاهق لين نامت
عند البنات
كادي ادخلت على اريام الغرفه :ريوم ليول طلعت من هني تهقين وين راحت
اريام بعصبيه:جهنم الحمره ...يعني وايد هامتج
كادي:انتي شفيج تكلمي عدل ...وبعدين ليشم اتهمني مو معناته اني دافعت عن جراح يعني ماتهمني احنه بحسبت خوات والنجره تصير بين الخوات عادي
اريام:كدوي بنام ممكن
كادي:شلون تنامين وليال وينها
اريام:والله مادري ورحي دوريها ولا اقولج لاتعبين نفسج دقي عليها احسن
كادي:دقيت كله مغلق
اريام:دام مغلق روحي نامي
كادي:انزين ليش جهازها مغلق
اريام بستهزاء:لي شفتيها باجر فتحي معاها محضر ...تصبحين على خير ...ونسدحت وغطت نفسها
طلعت كادي من الغرفه ورن تليفون اريام
اريام:هلا جراح
جراح :وين ليال
اريام:بغيت شي
جراح:ا يشلون على ملوكه اذا قامت بليل شسوي
اريام:دق علي وانا اي لها
جراح:اوكي ..تصبحين على خير
اريام:وانت من اهله
عند جراح
بعد ماصكه من اريام حط التليفون ورفع فسه شوي عشان يطفي ليت الابجوره شاف مذكرات ليال
جراح:مذكراتي بعنوان عهدي مع الايام ..(ضحك)..صج البنات سخيفات ...ونسدح ...(لكن الفضول بده يداهمه وقرر انه يقرى مذكراتها)...خل اشوف شنو كاتبه يمكن حاشف فيني ...بطل المذكرات من النص وبدا يقرا
عنوان الصفحه كان (اول لقاء)
اليوم كانت خطبتي على جراح وهو اول لقاء بينه سمعت عنه وايد لكن من اول ماقعدت وفواز طلع حسيت الدنيا ادور فيني من ريحت عطره الي كفخت راسي
عطره كان عجييب بس مادري شنو اهو بدا جراح يكلمني وانا اسمع واجاوب على قد السوال وعيني كانت على جوتيه صراحه اول مره اشوف جوتي يلمع جذي صج ولد فلوس خخخخ
جراح ابتسم على تعليقها وقلب جم صفحه
عنوان الصفحه( حياتي غير )
اليوم جراح كان عندي وكان يحن علي عشان اروح بيتهم وانا رفضت الصراحه مابي اروح وناقصني شي انا لي الحين ما جهزت شي وهو يبيني بسبوع اخلص كل شي الله يقدرني واخلص بالوقت الي عطاني ياه جراح ما ابيه يزعل او يتضايق مني مايهون علي زعله واااي حبيبي ربي لايحرمني منه اعشقه بشكل جنوني
اعشق ابتسامته طوله سماره عيونه الناعسه الي من اشوفها احس انه مسويلي سحر هذا كوم واسلوبه معاي كوم ثاني بعد عمري طيب وحنون ومايرضى علي واستانس لمن اناديه ويرد على يعيون وقلب ونبض جراح فديت عيونك يابعد عيني صج ماجذب عبدالكريم عبدالقادر لمن قال حبك سرى بدمي ونساني كل همي وخلا حياتي غيير
احبك يا أغلى من روحي
جراح ابتسم ابتسامه عريضه وهو يقرى ويتذكر الايام الي فاتت ...وبدا يقلب الصفحات كان يدور على شي معيه ولقاه
عنوان الصفحه(ليلة عمر )
يسمونها ليلة عمر بس بنسبه لي كانت ليلة شأم بهاليله تذكرت اشياء ما احب اتذكرها وماقدرت اطردها من بالي كنت خايفه من الفشل للمره الثانيه كنت خايفه وايد مادري ليش بهاليوم بذات كنت اشوف جراح على هيأت يعقوب يوم عرسنا كان منظر مخيف وبشع انا وجنس ثالث معاي بغرفه وحده منظر مرعب ادري انه جراح يختلف وايد عن يعقوب وبكل شي وماكو اي مقارنه بينهم بس انا مادري ليش انتابني هذا الشعور يمكن هذا شعرو طبيعي او يمكن انا بالغت بالخوف الان جراح تضايق وعصب علي وهذي اول مره جراح يزعل مني وان شاء الله الاخيره
جراح تنهد بضيق:وين الكتاب هذا عني ليش ماطاح بيدي من قبل جان ماصار كل هذا ...وبدا يقلب بالصفحات لين طاحت عينه على عنوان صدمه
عنوان الصفحه(خيانتي لي جراح)
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك