رواية ابيك في دروب المحبة تخاويني -3
طلعت وتركتها في ضيقتها وحيرتها ..
_معقوله نواف بيتزوج ويصير لوحده ثانيه طيب وانا وين اروح اصير لمين .. بس الموضوع مو اكيد خالتى قالت كلمه ومو اكيد تسويها..ياربي وش ذا اللي انا فيه...مشاعل ما حست اني ابي اخوها ياما تكلمت عنه واسالها عنه لهدرجه مخها جامد ما تفهمها وهي طايره...اوووف يا ذا الحب من طرف واحد شئ يجيب المرض
***********************************************
نزلت لامها بالحديقه وهي متامله خير
مشاعل:هاه مماتي شو قلتي اروح مع شمس
ام نواف تصرف السالفه وتحرق اعصاب بنتها:اقول مشاعل ابي ازوج نواف .. دامه صار يسافر كثير بصراحه خايفه عليه
مشاعل:اممممم ..انا معك بهالفكره ... نزوجه ونستر عليه احسن بس مين بتاخذين له
ام نواف:اول نشوف البنات اللي بالعائله..
مشاعل:لاااااااا الا هم ..مره بنات خالتي يقولون وعععع زواج الاقارب لو يخلصون رجال الدنيا ما ناخذ من اهلنا ..
ام نواف:من جدك!! من قال كذا
مشاعل:عهود وهديل
ام نواف:ايييه..ما عليك منهم بياعات كلام..شرايك ببنات فايزه اللي شفناهم يوم الخميس
مشاعل:والله بنات حلال بس في غيرهم احسن
ام نواف:ليه وش فيهم كاملات والكامل الله
مشاعل:أي ما عليهم شئ بس ما يناسبون نواف ...هو يبيله وحده متعلمه مرره تفكيرها زي تفكيره .. وكشخه بقوه مو تكون وحده عاديه زيهم
ام نواف:أي يعني تبين وحده كشخه وراعيه طلعات ولبس وما تعرف شئ في البيت
مشاعل:لا مو لهدرجه بس في بنات راعيات بيت و نفس الشئ كشيخات ويعرفون الزين..يمه خلي ذا الموضوع على جمب وانشاءالله خير ما قلتي لي اروح؟؟
ام نواف:اه منك لحوحه..اي روحي بس انتبهي لنفسك
مشاعل:اوكيك..وانتى لا تشيلين هم بفتح عيوني زين وادور لك عن بنت زينه لنواف
ام نواف:قبل لا تروحين ترا اول اسبوع من الاجازه في عرس "سلمان"ولد رنا ..بنروحه انشاءالله
مشاعل:سلمان ولد امه بيتزوج يا حليله كبر الولد.. دام عرس لعيال خالتي رنا اكيد بروح هي كل عروسها وعزايمها زينه..
**************************************
بعد المغرب
وصلت شمس لبيت مشاعل ونزلت تسلم على ام نواف
نبذه صغيره عن عائله شمس
ابوها"فايز" تاجر كبير ومعروف بالشرقيه ..امها "زينه" اماراتيه واهلها بالامارات
سيف : موظف في احد البنوك
شمس:تدرس مع مشاعل .. وما تعرفت عليها الا عند تسجليهم بالجامعه وبالصدفه التقوا مره ثانيه بعد ما انقبلوا
دخلت شمس للصاله:السلام عليكم ..شحالتج خالتي
ام نواف:وعليكم السلام ورحمه الله ..الحمدلله بخير يا بنيتي انتى شلونك وشلون الوالده واهلك
شمس:يسرتج الحال ..والله كلنا بخير ..
مشاعل:يالله ماما ..انشاءالله محنا مطولين على العشا بنرجع
ام نواف:توكلوا على الله وانتبهوا لنفسكم
شمس:انشاءالله خالتي ..يالله مع السلامه
مشاعل:بدك اشئ مماتي
ام نواف:سلامتكم..
مشاعل:سي يو..
***************************************
في السياره..
شمس:اووف ياربي متى تخلص السنه ونفتك
مشاعل:ليه وش عندك مستعجله
شمس:ابى ارتاح ابى اشوف حالي ..اسافر واغير جو
مشاعل:وين بتسارفون
شمس:اول شئ الامارات نسلم على اهلي بعدين بنروح لباريس
مشاعل:ونااسه اجل .. فليها وغيري جو
شمس:اكيد ما يبيلها كلام...شرايتج نمر جيان ونعبي لنا عربيه بالحلويات والتشبس ترا مشتهيه اكل هالفسافيس
مشاعل:الحين مو تقولين تبين تنحفين وتسوين دايت وش اللي غيرك..
شمس:والله تعبت اشوف الاكل جدامي وما اكله ..وسيف معذبني بالبيت كل بعد كم يوم يسوي لنا شئ مره "باربكيو بارت"..ومره مدري وشو ..خرابيطه كثير
مشاعل:ليش يعرف يطبخ
شمس:يطبخ اذا كان مروق ومشتهي شئ يبدع فيه... وانا اكل واتورط .
مشاعل:ههههههههه بالعافيه عليكم.
******************************************
وصلوا المول ونزلوا ..كان اقل زحمه لانه جمعه والناس مشغوله تجهز ليوم السبت ..مروا كم محل وخذوا اللبس اللي يعجبهم وبعض المحلات ما خذوا منها شئ ..
في محل زهور الريف..
اللبناني:مرحبااا ... تفضلوا
شمس:لو سمحت وش اخر عطر نزل عندكم
اللبناني:تفضلي ..هيدا برفان بريحه التوت كتيير حلوو وهادي ,بيدل على الانوثه
شمس لمشاعل:شرايتج مو حلووو
مشاعل:اييي ريحته مميزه
اللبناني:اختى انتى ما بدك شئ <<< يقصد مشاعل
عندنا كوكلشن لعطور خاصه بالجسم "شامبو .. و لوشن"كتير حلوو بيناسبك انتى بالذات
مشاعل:اناااا؟؟ ..طيب اشوفه
عطاها عينه منه وشمتها ..بس ما عجبها
مشاعل:مممم أي حلو<<< تجامله
اللبناني:شوو ما عجبك ... طيب شو رايك بهيدا ..ريحتوو احلى وبيجذب كمان
زهقت مشاعل منه وحبت تنهي السالفه:حلووو .. اوكي اجيك مره ثانيه الحين مستعجله
اللبناني:على وين لسى بدري...في عندي مجموعه كتير بتعجبك وتناسب نعومتك
مشاعل:طيب شكرا ..سحبت شمس وطلعوا
شمس:وشفيتج على الريال... قاعد يوريتج اشياء زينه وانتى مو عايبنتج
مشاعل:ما يستحي احرجني ..ما شفتي نظراته شلون
شمس:هههههه حركات ياللي يستحي ...
****************************************
علي جالس مع الشباب في احد زوايا الشارع ...
حمد:واقولكم .. لحقناها للبيت وعرفنا من هي والله لاتندم على الحركه اللي سوتها مو انا اللي ترمي الورقه بوجهي
علي:انت الغلطان ... شفتها من الاول ما تعطيك وجهه اتركها في غيرها كثير
حمد:والله ما اخليها .. على مين رافعه راسها ..لانزله بالتراب وتشوف
طلع سامي من جيبه بكت دخان وعطى حمد:خذ بس وهدي اعصابك الدنيا ما تسوى
حمد:مشكور
وجهه لعلي سيجاره ثانيه..
علي:لا شكرا ما ابي
سامي:خذ بلا حركات بزارين..خذ ياخي وعيش الجو
خذا علي السيجاره وهو ما وده ياخذها بس ما حب يتفشل قدام الشباب ومسوي فيها رجال .. لو اهله دروا باللي قاعد يسويه كان ما خلوه .
****************************************
قاعده ام خالد مع بنتها ساره تكلمها بموضوع الخطبه
ام خالد:انا قلت لازم اقولك لان الموضوع خاص فيك ..بس لو تبين راي انا مو عاجبني هالرجال مدري شلون بيتزوج وهو ما يشتغل
ساره:طيب ان رفضته في غيره؟
ام خالد:الرجال مليين الدنيا..يروح هذا يجي غيره
ساره:يمه وانتى شايفه الرجال طابور على بيتنا يوم تقولين كذا ... في السنه نعمه لو جا واحد يخطب..
ام خالد:براحتك يا بنيتي الامر بيدك فكري وشوفي
*****************************
الجزء(4)
بغرفتها وهي داخله جو مع "Bring me to life"
Bring:اقولك يوم الاحد بدخل المستشفى بسوي عمليه "لوز"
هوا:من جدك؟؟!! سلامتك والله ما تشوف شئ
Bring:الله يسلمك..والله خايف ..ما احب المستشفيات
هوا:لا انشاءالله سهالات..طيب ومتى بتطلع
Bring:مدري والله يمكن ما اطلع واموت
هوا:لا تقول كذا ..الله يطول بعمرك
Bring:انتى ما تسمعين بقصص دكاتره البنج..احيانا ما يضبطونه زين ويدخل المريض بغيبوبه
هوا:بسم الله عليك يا سعد ..
Bring:اطلب منك طلب بس ما ترديني فيه
هوا:امر ...
Bring: بصراحه انتى غاليه على قلبي .. ومن جد حبيتك يا هديل ..ابي قبل ما ادخل المستشفى اسمع صوتك
تفاجئت هديل من طلبه ... وترددت بالرد
هوا:...........سكوت
Bring:وينكـ يا قلبي
هوا:هنا معك
Bring:هاه وش قلتي؟!
هوا:بصراحه طلبك صعب يا سعد
Bring: وش اللي صعب فيه ..خذي رقمي وياليت ما تنطشيني ترا محتاج اسمع صوتك............0503
هوا:اوكي..
كملوا المحادثه بسوالف وضحك ..وللاسف سجلت هديل الرقم بجوالها ... لعب بعقلها الشيطان وعلى بالها كل من قال "حبيتك" تكون الكلمه طالعه من قلبه
*************************************************
في الصاله كانت ام نواف قاعده مع عيالها عبدالرحمن ..وفهد يلعب بالعابه..
دق جوال عبدالرحمن ورد:هلا...الحمدلله بخير ..اخبارك انت....ايه بكره لا منب رايح بغيب..لا والله تعبان شوي مره ثانيه..انت بتروح مع مين..اهااا..يالله اجل مع
السلامه
ام نواف:سلامات وشفيك تقول تعبان
عبدالرحمن:لا مو تعبان بس اصرف الولد ما ابي اروح
ام نواف:بكره عندكم شئ بالمدرسه
عبدالرحمن:أي ..في رحله لنادي الاتفاق..
ام نواف:طيب روح وسع صدرك مع العيال وش عندك في البيت
عبدالرحمن:ما ابي اروح ..زحمه وناس كثير ..خليني في البيت احسن
ام نواف:بكيفك..
ما استغربت ام نواف من حركه ولدها لانه كان انطوائي وما يحب يقعد مع الناس .. دايما بغرفته قاعد على البلاي ستيشن او يقرا بالقصص..ماله بالناس والطلعات الكثيره.. من يوم وهو صغير كان يخاف و متعلق بامه كثير .. كان السبب المشاكل اللي مروا فيها مع ابوهم ..ما نساها ودايما تتكر في باله..
************************************************
على اطراف الرياض ..
. وهو يشوف اللمبات من بعيد اخيرا وصل احمد بالسلامه ..بعد ربع ساعه وهو واقف عند باب البيت وينزل اغراضه ... كان ابوه توه طالع
احمد:السلام عليكم
ابو نواف:وعليكم السلام ..هلاا والله .. الحمدلله على السلامه
احمد:الله يسلمك شلونك يبه
ابو نواف:بخير والحمدلله..انت شلونك وشلون اخوانك انشاءالله كلهم بخير
احمد:تمااااام يسلمون عليك
ابو نواف في بيته ملحق برا وفاضي فخلاهه لولده اللي يدرس عنده..ما كان قريب منه ولا بعيد .. يعني لاهي بشغله وزوجته وعياله اللي عايش معهم اما عياله من ام نواف مو مرره مرتبط معهم..
دخل احمد غرفته وعلطول دق على امه يطمنها
احمد:هلاا يمه شلونك
ام نواف:بخير الله يسلمك هاه وصلت
احمد:أي ..الحمدلله
ام نواف:الحمدلله على سلامتك يا الغالي...عااد الحين صلي العشا وتعشى ونام ريح نفسك
احمد:انشاءالله ..شلون اخواني كلهم بخير
ام نواف:ماشي حالهم ..مشاعل توها جايه من برا كانت مع صديقتها
احمد:وش يطلعها ذي ما كفاها الخميس طالعه..يمه قولي لها مو يوم غاب القط تلعب يا فار..لا تكثر الطلعات وانتبهي لها تكفين
ام نواف:انشاااءالله ..لاتشيل هم وانتبه لنفسك ولدراستك..
احمد:يالله فمان الله
ام نواف:مع السلامه.
*****************************************
رجع علي البيت وقابلته امه بالاسئله:وين كنت ؟ ومع مين ؟ وش سويت كل ذا الوقت ؟ ما تفكر ان وراك اهل يتنطرونك؟ولا ما تسمع كلام ابوك كم مره قالك لا تتاخر؟
رد علي :رحت مكان من الاماكن والحين رجعت لمكان الهم والضيق .
ام علي:الهم انك تقعد مع اهلك والضيق انك تشوف وش يبون وتلبي حاجاتهم ..
علي:اوووووف
طلعت ملاك على كلمه اخوها
ملاك:هيه انت وش عندك نافش ريشك ورافع راسك علينا ..امي لما تكلمت ترد عليها بادب
علي:لو سمحتي لا تتدخلين بشئ ما يخصك ولا بيجيك شئ ما ترضين فيه
ملاك:وش بيجيني يعني ..شوف حبيبي انفخ عضلاتك برا البيت مو هنا.. هذا انت برا البيت مثل القطوه تلحق وراهم والحين متفرعن علينا
قرب منها ورفع ده..
ملاك:يالله اضرب اشوف ..وريني شطارتك..لحظه وش هالريحه ..تدخن؟؟
علي بارتباك:نعم وش هالكلام انا ما ادخن
ام علي قربت منه تشمه:ريحت سجاير ..لايكون تدخن
علي:يمه وشفيك صدقتي تسمعين كلام هذه
ام علي:والله ابوك لو درى لا يلعن شكلك سمعت
علي:قلت لكم ما ادخن ..اووووف
مشى وتركهم ضغطهم مرتفع والام ضايق صدرها على حركاااته..مسكتها ملاك وقعدتها على الكنب
ملاك:يمه ما عليك منه ... هدي اعصابك تراه ما يسوى
ام علي:هالولد بيذبحني تعبت معاه تعبت وطقيت منه..ما يسمع الكلام ولا يعبرنا ابد
ملاك:الله يهديه.
***************************************
الساعه 12 بالليل الكل نايم من تعب اليوم الا وحده بغرفتها تتقلب على السرير مو جايها نوم ..وبالها مشغول بسالفه مهمه لها وتحدد مستقبلها وحياتها
ساره "ياربي تعبت وانا قاعده عند اهلي ملييت من هالحياه .. تعبت من كلام الناس ونظرتهم يعني لمتى بظل كذا عانس مثل ما يقولون
اااااهـ .. هالكلمه تقتل القلب و تجرح بقوه.. عيال خواتي كلهم بيتزوجون وانا قاعده بمحلي لا جديد ولا أي شئ..
يقولون الرجال طيب و ولد حلال بس ما يشتغل.. طيب وشفيها خلاص بوافق عليه وافتك من كلام الناس وحكيهم ..
ياخوفي اخذه ويقعد طول عمره بلا شغل ..وقتها اتورط من جد
استغفر الله العظيم ... يارب ساعدني و اكتب لي الخير في كل مكان.
انا تعبت والله تعبت افكر ومحتاره بامري .. اللهم اني سلمت امري اليك.
نامت وسلمت امرها لله.
************************************************** ****
صباح السبت سيف ينادي على اخته ويستعجلها
شمس:زين زين جيت
سيف:اخرتينا شوفي الساعه كم 7 ونص يالله نوصل
وهم في السياره..
سيف:وش ذا اللي معتج كنتج بياعه
شمس:بياعه مره وحده حرام عليك ..هذا اكلنا انا و مشاعل امس شارينه من جيان وبنفلها اليوم
سيف:ربيعتج هذا ما امداتج تتعرفين عليها حتى صرتوا تتسوقون مع بعض
شمس:البنت طيبه وتنحب علطول..مابلقى مثلها بهالوقت
سيف:عالعموم انتبهى لا يغرتج الانسان من الظاهر
شمس:ليش كل هالحرص تخاف علي
سيف:اكيد اخاف عليتج مو اختى الصغيره والوحيده
شمس:يووه ما توقعتك خواف لذي الدرجه
سيف:هذا يزاي اني اخاف عليتج مالت على هالويهه .. يالله انزلي وخلصينا
شمس:ادري اني بوحشك يا خوي بس مو بيدي وراي دراسه ومحاضرات..يالله بااي
سيف وهو يضحك على هبالها و خفه دمها
داخل الحرم الجامعي...
قابلت شمس طالبتين لها معرفه بسيطه بهم
نوال:شمس تعالي ..تعالي ابيك
شمس:هلا..بغيتي شئ
نوال:من جيتي معه اليوم ... ذاك الحلو اللي بالسياره
شمس:جيت مع اخوي ليش تسالين
نوال:واااااااااااو يهبل ..ملامحه مررره حلووه..
شمس:الله يقطع ابليسج ... غضي بصرتج عن الرياييل
نوال:ااااااهـ تكفين بس..ما قلتي لي وش اسمه
شمس:وش عليتج من اسمه تراه ما درى عنتج ولا عن هوا دارتج..يالله عن اذنتج
نوال تكلم صديقتها:اووووف مغرورهـ مالت عليها من بنت
مشاعل من بعيد:وينكـ يا بت الايه ...سنه ادور عليك
شمس:نشبت لي نوال..قال شو ..اخوتج يهبل شو اسمه
مشاعل:هههههههه حركات البنات المعروفه ..اذا دروا ان عندك اخو حليوو لصقوا فيك..امشي بس نلحق ع المحاضره قبل ما تبدأ.
*****************************************
دق جرس الباب ,
قامت ام علي مخترعه من اللي بيدق في هالوقت ..فتحت الباب وكان ولدها ثامر راجع من المدرسه
ثامر:السلام عليكم ادري انك مستغربه وش عندي راجه بس المدرسه مقفله ما فيها احد بس الحارس
ام علي:مقفله؟؟ ليه وش عندهم اجازه
ثامر:سالت الحارس يقول في صيانه داخل الكهرباء خربانه والعمال يشتغلون فيها
ام علي: وبس انت اللي ما كنت تدري بهالشئ ولا حتى غيرك من الطلاب , يعني يوم رحت في طلاب مثلك راحوا ورجعوا
ثامر:أي في كثير ..مو مصدقه اسالي اللي بتسالينه
ام علي:بدل ملابسك وارجع نام ..
بكل برود دخلت غرفتها ورجعت نامت وخله ولدها اللي كالعاده تغافل امه وطلع برا البيت راح للمطعم فطر و لف كم لفه بالشارع ثم رجع ...كله صار الصبح والام نايمه على بالها ولدها في البيت ونايم.
*****************************************
طبعا الكل عرف بالرجال اللي جا يخط ساره ..الجده وام نواف ما عجبهم الوضع خصوصا انه ما يشتغل ..اما الباقي كانوا مؤيدين ويحتجون بانها كبيره واللي في سنها المفروض انها ما ترفض وتتعجل بالزواج.
********************************************
يوم الاثنين في بيت الجده "ام خالد" ... جالسه مع ولدها خالد وبنتها ام سلطان وكانت ساره معهم يتناقشون بسالفه الرجال ..
ام سلطان:هاه وش قلتي .. ترا حنا نبي مصلحتك يا ساره و الامر بيدك
ساره:يمه وشرايك
ام خالد:تعرفون راي راضيه فيه الا سالفه الشغل
ابو عبدالله:يمه الله يهديك لا تدققين على كل شئ خلاص انشاءالله يشتغل ويمشي اموره
شافت ام خالد ان كلاهما يضايق عيالها ومو مسموع فحبت ما تكثر كلام
ام خالد:خلاص اللي تشوفونه والله يكتب اللي فيه الخير
ابو عبدالله:يعني ارد على الرجال واقوله انك موافقه علشان الاربعاء يجي وتصير خطبه رسميه
ساره: اي
********************************************
طق الباب ودخل على هديل
سلطان:سلااااام
هديل: وعليكم السلام ....هلا
سلطان:تحتاجين اللاب توب تبعك
هديل:لا ...ليش
سلطان:ابيه لان حقي عند المهندس و عندي شغل مهم
هديل:اوكي ...
خذا سلطان جهازها وطلع وهي لحقته نزلت تحت عند اختها هند لقتها قاعده على التلفزيون تتابع برنامج التفاح الاخضر..
هديل:اووووف تغذيه هنا وتغذيه بالجامعه خلاص ارحمينا
هند:لا اله الا الله .. وش عليك منى
هديل:يختي غيري شوفي أي فلم أي شئ صاحي ..طفشت
هند:انتظري دقايق لين يخلص
استسلمت هديل لامر اختها ورضت باالحاله اللي هي فيها ..مسكت جوالها وارسلت مسج يقول
"سجلت في خافي الضماير تعابير"
"وكتبت على هاتفي حلو المعاني"
"ودعيت الله خالق الناس و الطير"
"يحفظك من شرور الزماني "
"وعسى تكون ايامك كلها خير"
"ويجعل ربي السعاده والفرح لك تهاني"
دخلت ام سلطان كانت توها جايه من بيت امها "ام خالد" ..سلمت على بناتها و سالت عن اخبارهم واخبار البيت بغيابها , ثم طلعت تبدل ملابسها ..
اما هديل دخلت المطبخ تصلح القهوه والشاهي ..
طلعت هديل وهي شايله الصينيه..
هند: تدرين ان خالتي ساره انخطبت
هديل: والله؟؟ على البركه وش دراك
هند:سمعت امي وهي تكلم جدتي على التلفون وما تشوفينها اليوم راحه عندهم اكيد علشان سالفه الخطبه
هديل: الله يوفقها ما بغت تنخطب .. يا خوفي اكبر واصير مثلها عانس
هند:استغفري ربك , هذا وانتى قريبه منها تقولين كذا اجل شلون البعيد
هديل: ما قلت شئ يا بنت الحلال .. الله يوفقها ويستر عليها ويرزقنا
هند: اششش امي جت ولا تقولين لها شئ , لين ما هي تقولنا
نزلت ام سلطان وقاعده مع بناتها وعيالها يتقهوون الا سلطان كان بغرفته يشتغل على الكمبيوتر ..
بعد دقايق صوت سلطان من فوق ينادي على امه :يماااا..يماااا
قاموا كلهم يحسبون فيه شئ صاير
ام سلطان:بسم الله ... وش فيك تصارخ
سلطان:يمه تعالي بسرعه ابيك
طلعت الام ولحقوها البنات
سلطان:انا قلت امي بس انتوا مالكم دخل
في غرفه ..
سلطان:تعالي شوفي بلاوي بنتك ..اقري وشوفي
المشكله الكبيره اللي صارت وهديل ما تدري عنها , ان كل المحادثات اللي كانت تدور بينها وبين صديقاتها و سعد في الماسنجر مسجله بالكمبيوتر وطلعها سلطان ..
قراهم كلهم وما انصدم الا بعد محادثه هديل وسعد اللي كانت تحوي على كم صوره له ورقم تلفونه..
كانت ام سلطان مصدومه و مو مستعوبه اللي تقراه: سلطان وش ذا الكلام من وين جبته
سلطان:هذه بنتك هديل داقه صداقه مع رجال غريب سوالف وضحك وصور واخرتها ارقام , شوفي رقمه كاتبه لها
ام سلطان:حسبي الله عليها من بنت حسبي الله عليه , انت متاكد انها هي
سلطان:يماا الجهاز جهازها وش تبين اكثر من كذا ..
ام سلطان: وينها قليله الادب
طلعت تنادي على هديل ... وبكل براءه جت ما درت وش اللي ينتظرها فوق
هديل:نعم يمه..
ام سلطان:تعالي ..تعالي .. من هذا اللي تكلمينه
واشرت على اللاب توب
قربت هديل من الشاشه تقرا المحادثه وتستوعب اللي قاعد يصير
سلطان : سالناك منهو ذا
بعد الورطه و المفاجاءه اللي طاحب فيها هديل ما عرفت تصرف نفسها او ترقع السالفه
قالت:مدري ... والله مدري منهو ذا
سلطان:هديل تكلمي زين وقولي منهو ذا
هديل:والله مو انا هذه مشاعل ..اي مشاعل يوم جت عندي دخلت المسن وجلست تسولف انا مالي دخل
سلطان:اليوزر نيم حقك و اسمك مكتوب في المحادثه تستهبلين علينا
هديل:والله العظيم انا مالي دخل , قسم بالله , لو تبوني احلف بالقران واقولكم مو انا
طبعا اللي بحاله وموقف مثل هديل ممكن يسوي أي شئ علشان يبري نفسه .. للاسف حلفت واقسمت وهي تدري انها كذابه واللي تسويه ما يجوز بس الظروف تخلي الواحد خروف
ام سلطان:حسبي الله عليك من بنت .. مو متربيه ويبيلك تربيه من جديد , هاتي الجوال اشوف..هاتيه
مد يده سلطان لها وخذا الجوال , فتح الاسماء لقى اسم bring me to life
وفي المكالمات مالقي أي مكالمه صادره او وارده لنفس الاسم .. اما في الرسائل لقى رساله له في الرسايل المرسله ..
من القهر خذا سلطان كف وطبعه على خد هديل , وكانت الدموع اقرب شئ لها جلست وتبكي وتتمسكن عند امها
هديل:يمه شفيك علي قلت لك انا مالي دخل .. انتوا اسمعوا السالفه كامله بعدين احكموا, ليش ما تصدقيني ..والله مو انا
ام سلطان:اص يا حقيره يا كذابه تحلفين انه مب انتى وكل شئ يدل انك انتي , من بعد اليوم يا هديل لا جوال ولا كمبيوتر وان شفتك قاعده عليه لاقص يدينك ورجولك فاهمه
سلطان :انقلي عن وجهنا ..اطلعي برااااااا
على طلعتها من غرفه سلطان قابلت هند جت على صوت صراخهم وشافه حاله اختها و وجها الاحمر كله دموع
دخلت عليهم :يمه شفيكم وش صاير
ام سلطان: ما صار شئ ... فكيني انتي الثانيه
طلعت وتركت عيالها اللي بقهر واللي بحيره
هند تسأل سلطان: سلطان وش صاير هديل شفيها
سلطان:شوفي بلاوي اختك الله لا يوفقها .
جلست تقرا المحادثه و مثل البقيه انصدمت من الكلام وما توقعت اختها تكون لهدرجه ..
خذا سلطان الجوال والكمبيوتر حطه بغرفته وقفل عليها وطلع من البيت يشم نفس ويزيل الضيقه اللي فيه
********************************************
في بيت ام علي على الساعه 8 المسا , ملاك وامها قاعدات بالصاله يتابعون مسلسل خليجي على احد القنوات .. الا يدق جوال ملاك وكان المتصل صديقتها بالشغل " حنان "
ملاك:الـــــــــــو ..هلا حنان
حنان:هلاااااااا والله بهالصوت شلونك يا دبه اخبارك
ملاك: والله بخير ..انتى شلونك كيف الدوام اليوم
حنان:ماشي مثل كل يوم كرف وتعب الا ما قلتي لي ليش غايبه اليوم عسى ما شر
ملاك:الشر ما يجيك بس تعبانه شويه ومالي خلق للدوام
حنان:تعبانه ؟! من وشو وانتى امس مثل الحصان ماشاءالله
قامت ملاك من الصاله لغرفتها حتى تاخذ راحتها بالكلام ..
ملاك:والله يا حنان ضايق صدري مررره , تعبت وانا افكر فيه
حنان:لا يكون نواف
ملاك:في غيره متعبني
حنان:يا بنت الناس لا تكبرين السالفه , الامر مو جديد انك تحبينه وهو ما يدري عنك نص بنات السعوديه كذا
ملاك:انتى ما تدرين وش صار اصلا
حنان:وش صار بعد ..هاتي وش عندك
ملاك:لك خلق تسمعين
حنان:أي تكلمي
وحكت ملاك لصديقتها حنان كل شئ .. تقول كلمه وشوي تسكت العبره خانقتها وتبي تبكي بس تقاوم
ملاك:تخيلي يا حنان الانسان اللي تحبينه يكون لغيرك
حنان:طيب انتى متاكده من الموضوع يمكن بس كذا امه تتمنى وماراح يصير شئ
ملاك:حتى ولو , خايفه يروح عني ويكون لغيري انتى ما تدرين وشكثر احبه , اموووووت فيه يا حنان, و لما اسمع احد جاب طاريه يفز قلبي , ولي اكثر من سنه ما شفته مشتاقه له والله مشتاااقه
حنان: يا حياتي عورتي قلبي .. انا اشهد ان الحب عذاب , طيب ما حاولتي تلمحين لاخته انك تحبينه او تبينه
ملاك:حاولت بس اخته ثوره ما تحس
حنان:ههههه , شدعوه ما تحس تلاقينها داريه بس مطنشه ترا بنات هالايام عبيطات
ملاك:طيب وش الحل , ساعديني تكفين ... ابي اهله يدرون انى احبه وابيه , وابيه يكون لي وبس لو بأي طريق تكفين يا حنان قولي لي وش الحل
حنان:امممممممم ... اسمعي انتى هدي نفسك وريحي بالك انا بفكر وانشاءالله القى حل واقولك بكره
ملاك:لا تخيبين ظني ترا متعلقه فيه مره
حنان:ولا يهمك ...يالله ما اطول عليك ..مع السلامه
ملاك:هلا والله حياك.
************************************
في نفس البيت وبمكن ثاني ..
جا ابو علي وقعد مع زوجته
ام علي:تدري ان ثامر طول هالاسبوع كل ماراح المدرسه يلقاها مقفله والحارس يقول في صيانه داخل
ابو علي:وش صيانته بعد
ام علي:يقول كهرباء ومكيفات بس مو معقوله طول الاسبوع اجازه , روح بكره واسال وش السالفه
ابو علي:فاضي له اروح اسال , قلك الولد فيه صيانه داخل خلاص .
ام علي:الله يستر بس من هالعيال , ما وراهم الا المشاكل
ابو علي: خليها على ربك المهم اسمعي الخبر ذا , صاحب البيت يبينا نطلع من بيته
ام علي وهي مفتحه عيونها من الدهشه:نــــــــــعم !! نطلع وين نروح
ابو علي: ما ادري وين نروح لا تساليني , بس هو قالي اليوم اطلعوا من بيتي لانه بياجره بسعر اعلى
ام علي: ما يكفيه , من قبل كم شهر رافع الايجار والحين بيرفعه زياده
ابو علي: انا بصراحه ما اقدر ادفع المبلغ اللي طلبه , فمن الحين ندور على مكان ثاني وقولي لاخوانك يدورون لنا
ام علي:وش دخل اخواني بالموضوع , يا زيني وانا اقولهم دوروا لنا بيت
ابو علي:أي وشفيها مو اخوانك , ماشاءالله كل واحد بوظيفه ومكان زين اكيد يعرفون منا ولا منا
ام علي: يا شماتت امي واخواني فيني وش بيقولون عني
ابو علي: ماراح يقولون شئ , لو انهم طيبين وعيال حلال ما يخلون اختهم وزوجها وعيالها كذا , قولي لهم وبس
حل السكوت بينهم المسكينه ام علي مشاعرها متضاربه ما تدري وش تقول او وش تفكر فيه بعد كلام زوجها الغريب
ابو علي ينادي:ملاااك ..ملااك
ملاك: نعم يبه
ابو علي: سوي لي كاس شاهي راسي مصدع .
هذه بس حالته ياكل ويشرب وينام , ما يهتم بمشاعر واحاسيس غيره , يجرح او يحطم انسان كل شئ عادي عنده , مصدق انه الرجال والابو يعني الكل ينقاد له وما يرد له طلب ولا يتجادل معه باي موضوع , خبروه بسالفه ولده ما اهتم و لا فكر لو لحظه بالموضوع , يجي يرمي كم خبر وكم امر لزوجته وعياله ويقعد كانه ما سوا شئ.. رجال غريب ما يعتبر انسان.
********************************************
طالع بسيارته يدور في الشوارع من مكان لمكان , يحس انه متضايق و مخنوق
"سلطان" معقوله يا هديل يطلع منك كل ذا وانا اللي كنت اشوفك بريئه وطيبه على قد نياتك ما توقعت منك ذا الشئ تكلمين واحد من ورانا وبينك وبينه حب وغرام ...
قطع عليه حبل افكاره صوت الجوال وكانت سمر اللي داقه
اووف وش تبي ذي الحين مو وقته
رد بثقل:هلا سمر
جاه صوتها بعيد و الحروف منها يالله تطلع
سلطان:سمر شفيك
سمر:سلطان امي ...... امي ماتت
سلطان:من جدك ... لا اله الا الله سمر تتكلمين جد
سمر:أي امي ماتت وخلتنا
سلطان:الله يرحمها ... عظم الله اجرك يا سمر
سمر:الله يجزاك خير ... لها يومين وهذا الثالث
سلطان:وليش ما قلتي لي وقتها
سمر:كنت بحاله ما يعلم فيها الا ربي , حتى نفسي ما ادري عنها
سلطان:الله يعينكم انشاءالله , شلون ابوك واخوانك
سمر: البيت كله مو على بعضه مصدومين وكننا بحلم
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك