رواية اموت واحيا بك -22
نورة: هلا امااايه....ييتي..!
ام خالد: هي بنتي...ييت...حد ياكم في البيت..؟
نورة: لامحد يانا...انتي وين سرتي شليتي الدريول وخليتي فطوم حليلها في الجامعه اروحها..
ام خالد: واابووويه نسيييتها نساها الموت حليلها بنت هلال...سيري قولي للدريول يروحلها...
نورة: لا خلاص اكيه يت..
ام خالد: منو يابها.؟
نورة: آآآ... انا سرت ويا حمدان ويبناها...
ام خالد: وابوي عليج انا...وشحقه ماتسيرين ويا واحد من خوانج....؟
نورة: خواني ماعندهم تصاريح امااايه...مابيدخلونهم... المهم انتي وين كنتي.؟
ام خالد: والله يابنتي كنت عند هالمسكينه اللي تصيح ولدها ليل نهار...
يلست نورة عدال امها....
نورة: ام سيف..؟؟..متى خبروووها..؟؟
ام خالد: خبروها امس.... مسكينه حالتها ماتسر بس متصبره شو بتسوي يعني...!!
نورة: حليلها...الله يعينها.... على الاقل الام تصيح...الا حصه لين الحين مب عارفين شو نسويبها...!!
ام خالد: آآآخ واعلييي على بنتي...والله انها حالها ماتسر لاعدو ولا صديق....بس الله بيسهل امرها وبيريح بالها ان شاء الله...
نورة: آمين...امايه قوم عبدالله متى بيردون امريكا..؟؟
ام خالد: والله اظني هاليومين...جان مب باجر مايندرا...مايرومون يتاخرون..
نورة: هي صح...حليلهم.....
ام خالد: برايج انا بسير ابدل ثيابي...
دخلت ام خالد وخلت نوره بروحها في الصاله... وهي تفكر فحالة اختها...وكيف تقدر تساعدها....فجاه خطرت فبالها فكره...ليش ماتروح حصه لعمتها ام سيف...وتسلم عليها وتعزيها...يمكن تتاثر بحالتها شوي وتتخطى الازمه....!!!...وقعدت تفكر فيها اكثر وبالاحتمالات اللي ممكن تصير...لين مايتها فطوم...وخبرتها بالسالفه..وشجعتها فطوم وقالت لها مابتخسر شي بالمحاوله...وركبن فوق عند حصه...اللي كانت منسدحه على شبريتها وتجلب في تيلفونها...كانها كانت تشوف المسجات او شي جي... عورتهن قلوبهن عليها...حصه يوم شافتهن نزلت التيلفون واعتدلت في يلستها...نورة وفطوم ين ويلسن عدالها عالشبريه..
نورة: شو تسوين؟؟؟
حصه:..........ماشي...
فطوم: اقول حصيص...حمدان يسلم عليج وايد...يقول وده يشوفج بس اون مايصير...
ابتسمت حصه ابتسامه خفيفه...
حصه: الله يسلمج وياه من الشر....
نورة: اقول حصه... امايه توها يايه من عند عمتج...
رفعت حصه عيونها باهتمام....
حصه: والله...شحالها.؟
نورة: خبرووها بالخبر امس....ومسكينه تصيح وتعبانه بس متصبره..
نزلت حصه عيونها
حصه:....مسكينه...الله يعينها...
فطوم: ليش ماتسيرين لها تواسينها وتسلمين عليها...؟؟؟
حصه: ياريت....بس مايستوي اظهر من البيت... ولا اظهر جدام أي ريال غريب..
نورة + فطوم: ليـــــــــش...!!!
حصه: ........... لازم اقضي العدّه ...
تلفتن فطوم ونوره لبعض..وتذكرن هالشي...انها لازم تقضي العده اربع شهور في البيت....يعني مافي امل تروح حصه لعمتها في المستشفى... الا جان عمتها تفتكر وتي تسلم على حصه وتعزيها وتعرف انها في العده ومايستوي تظهر...اكيد بتي تسلم عليها....ولين ماتزورهم العمّــه... بيتريون وبيشوفون شو بيصير بحالة حصه....
الجزء الثاني والثلاثين
الاربعاء وبعد الغدا كانوا خليفه وعبدالله مع حمدان في سيارته..سايرين مطار دبي...بعد ماحجزوا التذاكر وخلصوا .. وكل حد منهم شايل هم وافكار مالها لا اول ولا اخر... خليفه موت سيف كان مسيطر عليه كليا...نسى كيف يستانس بشوفة اهله...نسى يتامل ببلاده كل مايرد لها...نسى حصه وطوايف حصه.... كان شعور غريب بالذنب مسيطر عليه...ومخلنه دايما معصب....مب قادر ينسى انه كان يتمنى ان سيف ماياخذ حصه...رغبة داخليه كانت تتمنى حصه لنفسه...لكنه يحاول يبعد هالفكره عن باله...اللي صار قضاء وقدر...وهو ماسوا أي شي عشان يمنع خطبة سيف لحصه..واستسلم للامر الواقع...واقتنع انه النصيب...ومكتوب...ونفس الشي الحين...هذا نصيب سيف وعمره...وهذا نصيبي انا...والله يعين من اللي ياي..الدراسه كانت صعبه وايد عسب سالفة حصه...والظاهر الحين بتكون مستحيله....الله كريم...
وصلوا مطار دبي..وبعد ماخلصوا الاجراءات القانونيه...التفت عبدالله على حمدان...
عبدالله: ماوصيك حمدان..عالاهل...وخصوصا خواتي...تدري انته ان خالد وناصر مايقعدون وياهن وايد ونادر مايشوفونهن مع انهم فبيت واحد...
حمدان: ولا يهمك ...مووول لا تشيل هم...
عبدالله: وعنوود بعد...حطها فعيوووونك..
حمدان: اوامر ثانيه..؟؟
عبدالله: لا سلامتك...
حمدان: الله يسلمك...(وتقرب من عبدالله يصاصره وخليفه عيونه عليهم ومعصب).. هالنكدي هذا اباك تغيرله مزاجه قبل ماتتخرجون وتون..والا اممممره لا تيبه وياك اذا تم جي..
ظحك عبدالله ظحكه خفيفه..
خليفه: شعنه تصاصره...!!..صدق انك ماتستحي...
حمدان: افااا ياخلووف...كنت اوصيه عليك بس...
خليفه: مب لازم توصي....مستغني عن وصاتك انا...
ابتسم حمدان...ومسك خليفه ولوا عليه..
حمدان: فديت اخووويه انا.... (وابتعد عنه)... خلوف...اسمعني.. تصرفاتك هذي كانك واقف فويه الدنيا وتحاربنا كلنا...!!..مابتنفعك... بالعكس بتظرك ...ادري انك مظايق ومعصب عسب وفاة سيف الله يرحمه...كلنا زعلانين عليه...بس اللي صار مب ذنب حد...ومب ذنبك انك ماكنت موجود...اللي صار قسمة ونصيب..عمر هذا.. محد يدريبه متى يخلص غير رب العالمين.....بس يمكن يواسيك بانك تعرف ان سيف كان وايد مستانس بالفتره الاخيره...وايد مرتاح..انا ماقولك انساه...بتكون قليل اصل اذا نسيت ربيعك...بس حاول تتقبل الموضوع..وتتاقلم وتخفف عن نفسك شوي...وراك دراسه تخلصها ومستقبل تبنيه...ويوم بترد ان شاء الله ماريد اشوفك بهالمزاج...
انترست عيون خليفه دموع..ورد يلوي على حمدان ويربّت على ظهره... وابتعد عنه بعد شوي وهو يقول..
خليفه: ماوصيك عالاهل... تامرنا بشي.؟
حمدان: سلامتك ورضاك ياخوي... دير بالك على نفسك ...الله يوفقك..
خليفه: الله يسلمك...فمان الله..
روح خليفه وابتعد عنهم شوي لانه مب قادر يتمالك نفسه ...
عبدالله: والله وتعرف تعطي محاظرات ياحمدان...!!..
عبدالله اللي هو بروحه مظايق ..حاول يخفف الجو شوي...وحمدان ماشاء الله عالخط..
حمدان: عيل منو تتحسب يكتب المحاظرات لكبار الشخصيات..؟!!!
عبدالله: هي ماشاء الله.... المهم..توكل انته..ولا تسرع...ونحن بنتوكل بعد..ماشي وقت...شي فخاطرك.؟
حمدان: سلامتك والله..تووصلون بالسلامه ان شاء الله..فمان الله
عبدالله: مع السلامه
ترياهم شوي حمدان لين ما اختفوا عن نظره..وبعدها ابتعد وطلع من المطار وركب سيارته ورجع العين...
مر اسبوع ونص على سفر خليفه وعبدالله...والاوضاع في العين مثل ماهي... حصه تحسنت حالتها شوي (ظاهريا) وقامت اجامل اهلها وتقعد معاهم احيانا...نورة وفاطمه لاهيات بالجامعه والدراسه..ويحاولن يرجعن جو البيت مثل ماكان قبل..بس بدون مبالغه...حمدان قام يخفف زياراته..واذا زارهم يتصل اول عشان حصه..يدري انها في العده وماتقدر تطلع جدامه عشان جي وحفاظا على مشاعرها ووضعها قام يستحي على ويهه ويخفف زيارااته لهم..ولو انه هالشي كان يظايقه لانه قام يشتاق لفطوم وللمغايظ وياها..وكان يتحرق ويتريا اتصال منهم ويدعي انه حرمه عمه تشل الدريول عشان يحصل عذر اييبها من الجامعه ويشوفها..لكن هالصدفه ماصارت ... وماكان جدامه غير انه يصبر...والحيره تاكله بسبب هالشوق الكبير لفطيم....!!..
زارتهم عمة حصه فيوم من الايام...بعد مامر تقريبا اسبوعين على وفاة سيف...وكانت متمالكه نفسها شوي رغب التعب الواضح عليها...وطلبت انها تشوف حصه بروحها وفغرفتها...الكل توتر وشد اعصااابه بسبب نتيجه هالزيااره..وكيف بتكون ردة فعل حصه بعدها...!!..دخلت العيوز على حصه وكملت معاها ساعه ونص داخل..بعدها طلعت العيوز تصيح... وقعدت شوي مع ام خالد وروحت عقب بيتها...ويوم دخلت نورة وفطيم على حصه حصلنها خاشه ويهها في المخده وتصيح صياح يقطع القلب...فرحن وزعلن فنفس الوقت..لانه حصه استجابت للامر الواقع وبدت تفرغ الحزن اللي فيها واللي كاتم نفسها...بس في نفس الوقت منظر حصه يعور القلب...فقررن يخلنها بروحها لين ماتهدا شوي...
وفعلا بعد فتره هدت حصه..لكنها ردت مثل قبل ترفض تطلع من غرفتها...وهالمره بدال السكوت..تصيح وايد...
على نهاية الاسبوع شرف سعيد يوم الاربعاء العصر للعين....فطوم كانت راقده ساعتها لانها كانت مداومه الاربعاء وتعبانه اما نوره فما عليها دوام الاربعاء..كانت يالسه على الحشيش في الحوش..في مكان مندس شوي عن واجهه البيت...يوم شافت سياره سعيد فز قلبها ونقزت...تحجبت عدل ونفضت ثيابها وسارت صوبه..وهو كان توه نازل من السياره ولابس نظارات شمسه..اول ماشافها ابتسم..
سعيد: هلاا..هلاااا....هلااااااا والله وغلااااااااااا.... بس لااا لحظه ..وقفي بعيد...انتي شبهااات..
بطلت نورة عيونها مستغربه..
نورة: طاااالع لحمار...!!..انا شبهات..؟؟ شحقه.؟
سعيد: قبل عادي نسلم وناخذ ونعطي بس خلاص من خطبناج وانا متحمل تهديدات وتنغيزات كلها تفيد معنى واحد... "لا تتقرب من نوره"....
نورة: ههههههههههه ماعليك منهم لاااه...شخبارك..؟ عاااش من شااااااااافك..
سعيد: عاشت اياااامج طويلة العمر...شخباركم انتوا...؟
نورة: نحن منيحييين.... بتبات عندنا..؟؟
سعيد: لا والله عيوني ماقدر...
نورة: افاااااا...انزين عشااااا....!!
سعيد: ولا عشا بعد...متواعد ويا ريال عالعشا وماقدر اكنسل...
نورة: احين ماحصلت تتواعد وياه الا يوم تحيد عمرك بتينا..؟؟ روح لاه ماصخ انته...
سعيد: نوااااري...هو قالي الاربعاء واستحيت اقوله لا....مايفظى وايد هذا ودومه مشغول.. بس ماعليه يوم بنرد الجمعه بتعشى عندكم وعد...
نورة: همممم..بنشوف....عيل على هالحال بتروح سيده...!!
سعيد: برتاح لي ساعه في الميلس لين ماتخلص فطوم...وبنروح....منو في الميلس.؟؟
نورة: ماظني حد هناك....ناصر فدبي وخالد زام....
سعيد: ابوج وين...؟؟
نورة: ابويه سار العزبه من الساعه 3....اتصل بحمدان انزين..
سعيد: اذييييته مسكين كل ما يييت اتصلت به...بس ماعليه بتصله بشوفه وين... وانتي دشي البيت عن تظهر عموه وتشوفنا تسويلنا سالفه وتحقيق احين...وخبري فطيم...
نورة: من عنوووني...
سعيد: فديييييييييت هالعيون انا....نواري ..وابا جاهي حليب بعد...ماعليج امر..
نورة: فاااااااااالك طيب ماطلبت...دقايق ويكون عندك...
سعيد: مشكوووره الغاليه...
دخل سعيد الميلس وسارت نوره توعي فطيم...
نورة: قووووووووووومي قوووووومي طفرتيني نص ساعه وانا اوعيج...
فطوم: اوهووووووووووووو ياهي حاله...ماتخلين الواحد يرقد انتي...
نورة: اقولج اخووووج في الميلس ويترياج وانتي مرقده....!! قومي انتي حتى ماجهزتي لا شنطه ولا شي..
فطوم: بصفعج نوروه شو ابا بالشنط...!!!.نص ثيابي هناك مابشل شي وياي...
نورة: المهم قووومي....بسير المطبخ وبرد ان ماحصلتج ناشه يااااااااااويلج...
نشت نورة عن شبريه فطوم وطلعت من الحجره ..واستغربت يوم شافت حصه نازله تحت... بملامح هادية وحزينه...
نورة: هلا حصه...
حصه: شو تسوين.؟؟
نورة: سعيد في الميلس ..بسير احط له فواله...
حصه: اها...
وسكتت حصه..وبان الزعل على ويهها اكثر...وخمن نوره بان سعيد خطيب نوره...وبالتالي شريك حياتها...وهالشي يخليها تتذكر وبسهووله شريك حياتها هي....سيف...المرحوم...!!...
نورة: تعالي ساعديني...
حصه: ماريد اطلع من البيت..بقعد هني في الصاله..يوم بتخلصين تعالي..
نورة: اووووكيك...
خلتها نوره في الصاله وهي متظايقه لاختها..سارت المطبخ وحطت الدلال والفواله حق سعيد وطرشتهن للميلس...ويوم ردت حصلت امها يالسه مع حصه..
ام خالد: بنتي منو سيارته هذي اللي واقفه...؟؟
نورة: سياره سعيد امايه...ياي يشل فطيم...
ام خالد: بتسير فطيم صوب اهلها هالاسبوع....!!
نورة: هي...مانشت هي..؟؟
حصه: ما يتنا هني...يمكن تجهز...
ام خالد: بسير احط الجامي والسح اللي مسوتنه لهم..
نشت ام خالد عنهن ويلست نوره مكانها عدال حصه..وهي تبتسم..
نورة: ماشاء الله عليها امي...انتاج محلي عندها..
حصه: لا تحسدينها...
نورة: الله واكبر..ماشاء الله عليها...كل شي تسويه في البيت..السح والجامي والسمن واللبن والرووب وماتخلي شي...
حصه: احلى شي والله..
نورة: هي صدق...رمضان قرب...يبالنا ناخذ لنا قطع للعيد...
حصه: تو الناس..متفيجه انتي..
نورة: شو تو الناس..والله من يدخل رمضان ولا خياط بيطيع يفصل لنا...احسن من الحين..
حصه: والله انا مالي مزاج... اللي بتسوينه سويلي وياج..
نورة: الله واكبر...من متى انتي تعتمدين في لبسج على ذوق الغير..!!!!..ماحيدج تثقين بحد...
حصه: فقدت الاهتمام بالشكل عشان جي اقولج عااادي...
فجاه طبت عليهن عنود وهي تقول..
عنود: لا حبيبتي متعودين نجاااكر باحلى لبس في العيد...ماشي عادي عندنا...
يت وسلمت عليهن ويلست..
نورة: بسم الله انتي هااااي...متى يييتي..؟؟
جاوبت عنود وهي تظحك...
عنود: ههههههههاي توه يابني حمدان...
حصه: حليله حمدان...شخباره..؟؟ تولهت على سوالفه والله
عنود: بخييييييييير يسرج حاله..الا انتي شحالج وشخبارج..؟؟
حصه: ماشي الحال...
نورة: دخل حمدان الميلس..؟؟؟
عنود: هي..منو عندكم...؟؟
نورة: سعيد ياي يشل فطيم وبيروحون...
دخلت فطيم عليهن...
فطيم: جني الا سمعت حد يحش فييني...
نورة: هااا الرقااده نشيتي...!!!..
فطيم: ثرج تخلين حد يرقد انتي...!!!
سلمت عنود على فطوم..
فطوم: شخبارج عنوووووده...
عنود: بخيييييييير يسرج الحال...نشقح..الا انتي شعلومج ويا الجامعه والاساسي والغيااب اللي على قفى من يشييييل...!!!
فطوم: هههههههاي لا تخبرين والله....صامدون صامدون...
عنود: هههههههاي الله يعينج...
وقعدن البنات يسولفن ويظحكن لين ما اتصل سعيد بفطيم وقالها انهم بيروحون الحين...سلمت فطوم عليهن ولبست عباتها وشلت اغراضها وركبت مع سعيد وروحوا...طلع حمدان بعدها ساير لربعه..وتمت عنود مع البنات تسليهن شوي وتستغل وجود حصه بينهن عشان يرفعن معنوياتها ..ويحاولن يسترجعن حصه الجديمه....
الجزء الثالث والثلاثون
مرن شهرين ونص على وفاة سيف...وكانت الايام تمر بشكل رتيب...وممل...وتقريباعلى نفس الوتيره... حصه بدت تتاقلم...مع انه مبين عليها انها بعدها حزيينه وايد على خسارتها...لكنها غصبن عليها تحاول تنسى عشان اهلها واخوانها..وعشان نفسها بعد...سيف عمره انتهى..لكن هي بعده عمرها ماانتهى....ولازم تعيش حياتها... وتطلب له الرحمه دايما...اتصالها مع عمتها ما انقطع ابدا...بالعكس ...زادت المحبه بينها وبين ام سيف اكثر عن قبل...كانه كل وحده تواسي الثانيه... حصه فظت تيلفونها ومسحت كل شي فيه ورجعته لاخوها ناصر عشان يعطيه لسالم....لانه التيلفون كان باسم سيف...وهو يدفع عنه...ومن بعد سيف..ماتبا التيلفوون موليه...فخذه عنها ورجعه لسالم اللي عارض في البدايه لكنه استسلم في النهاية...
نورة وسعيد تعلقهم ببعض وصل لدرجه الجنون...من عقب ماخطبها خلاص مايشوف انه يقدر يردع نفسه ويكتم مشاعره....ومسمينهم في العايله قيس وليلى ...يوم يشوفون بعض مايقدرون يشلون عيونهم او يلتفتون لاي حد ثاني....واللي حواليهم يظحكون عليهم.... سعيد من بعد ماخطب قرر انه يبدا ويبني الارض اللي ماخذنها له ابووه من سنين...وقابل مهندس زين وقام يحط وياه التصاميم الاساسيه للبيت... هو صح اول مايعرس بيسكن عند اهله فتره... لكنه مصيره بيعتزل....والارض مب بعيده عنهم ..بينهم وبينه شارع... وكان دايما على اتصال مع نوره بالنت يتشاورون كيف يبغون بيتهم ...وشكله...
فطوم كانت باذله جهدها في الدراسه...واثبتت انها متفوقه بدرجاتها في امتحانات المنتصف... صح انها احيانا تتعرض للتشويش في مخها بسبب حركات حمدان وسوالفه الي ما تخلص...!!..بس قررت انها صغيره على هالسوالف والافضل لها انها تهتم بالدراسه....لانها يايه تدرس..مب تبني علاقات....ماتعرف شو نهايتها بالضبط...!!..
حمدان يحب...خلاص اقتنع بهالشي....دقات قلبه ورجفة يديه كل مايشوفها اثبتت له هالشي...لانه هو دايما بارد وطبيعي يوم يشوف اي بنت...مايهتم فيهن اهتمام شخصي...وفي البدايه فطوم كانت من هالطايفه...لكن الحين...!! .. شي ثاني...شي قدره ومقامه عاااالي ماينلحق.... صح سوالفه وغلاسته ماودرها وياها...لكن بس يوم تكون نوره موجوده وياهم....بما ان حصه ماتطلع جدامه... لكن اذا صار وتلاقى ويا فطوم بروحهم...يقفط ويستحي...ويتم ساكت ولا يرمس...مايباها تفكر بانه يستغل وجوده بروحه وياها عشان يطفربها ويغلسبها...هو يدري انها بعدها ماحست عليه وعلى مشاعره الي تبدلت....لكنه مستانس بانها ماتدري...لانه بعده مب مستعد يواجه هالمشاعر وياها....يخاف انها تخاف وماتطلع له مره ثانيه ..وهو مب مستعد يخسرها... خلهم جذي احسن...وهو مستمتع بهالشعور اليديد اللي اول مره يحس به...وبعدين تو الناس على الجدية بهالمواضيع...بعده صغير...21 سنه مب سن مناسب للخطوبه والزواج....صح سووها وايدين غيره لكن بالنسبه لحمدان...تو الناس...!
عنود كانت اغلب الوقت مشغولها ويا عمتها ام خالد... وتقريبا جهز ثلاث ارباع القسم... صبغوا الغرف بشكل حلوو وحطوا اثاث غرفة النوم وركبوا السيراميك والستاير ...باقي عليهم الغرفة اللي مقررين يخلونها مكتب لعبدالله والصاله...وكانت في نفس الوقت تحاول تقضي الوقت بانها تشتري زهابها واغراضها وتخلص... كانت يوميا تتصل بعبدالله وتسلم عليه وتتخبر عن خليفه...علاقتهم صارت مستقره .. لكنها ما تخلى من الحلاوة.... عنود كانت تتجنب تذكر اي شي من تجهيزات العرس لحصه مراعاة لمشاعرها... بس كانت تروحلها في الاسبوع مرتين او ثلاث...هذا غير التيلفونات اللي بينهم...وبمساعده نوره وفطيم قدرن يطلعنها شوي من الجو اللي هي فيه...وبدت ترجع لحياتها الاوليه..لكن ببطء شديد...يالله احسن من مافيش...
خليفه الوحيد اللي ما تغير مزاجه....كان دايما بروحه...يركز على دراسته اشد التركيز...ويوم اييب درجات كامله ماكان يفرح بها....شعور باللامبالاه كان مسيطر عليه....كان كل همه انه يخلص دراسته ويرجع... باقي اربع شهور ويخلصون ويرجعون...كان يلاحظ انه عبدالله يحاول انه يطلعه من هالجو....لكن هو مب قادر ينسى ربيعه...وينسى الطريقه اللي توفى فيها.... واخر مره شافه فيها وكيف كان مظايق منه ...لو كان يدري انه بيروح عنه ومابيشوفه مره ثانيه ماكان بيتصرف او بيحس بهالشعور تجاهه...شو عرفه..!! انه بيوصله خبر وفاة سيف بهالطريقه...حادث..!!!.. ياكرهه للحوادث... يسرق منك الانسان اللي تغليه فلحظه...بدون تحذير..وبدون انذار مسبق عشان الواحد يتوقع الموت....بس جي فجاه....تسمع خبر فلان اللي كان معاك من ساعه انه مات الحين....!!!..الله ياخذ اللي اخترع السيايير.... ياكرهي للحوادث... اللهم لا اعتراض....والله يصبرني على خسارتك ياسيف...
اليوم اول يوم من ايام رمضان.... بيت بو خالد كانوا كلهم معزومين عشان يفطرون رباعه فبيت بو سلطان... وطبعا قبلوا هالعزومه...وحصه طبعا ماتقدر تروح عشان العده... وفطوم قررت انها تقعد وياها وتفطرمعاها وماتروح...لكن حصه اصرت عليها انها تروح وياهم وتستانس وماخلتها تيلس... على هالحال سووا بيت بو خالد فطورهم من كل شي وكثروا منه..وشلوه وياهم لبيت بو سلطان.. نزلن الحريم وسارت داخل البيت اما بو خالد وعياله دخلوا الميلس... كانت فطوم مرتبكه...صح انها دخلت هالبيت من قبل في ملجه عنود...بس ما ركزت فيه عدل..وماكانت تعرف حمدان عدل ساعتها...لكن شعور غريب بالحنين مسكها وهي تدرك ان هذا هو البيت اللي ساكن فيه حمدان....دخلت مع الحريم للبيت...وكانت لمة حريم وااايد ماشاء الله... ام خالد وام سلطان..وحريم العيال مريم ومنى حريم سلطان وحميد..وعيالهن...وميره وعيالها ..وحمده وعيالها...ونوره وفطوم وطبعا عنود...يوم قرب الاذان يأذن..حطوا لهم الشوربه والتمر والماي والعصير...عشان يفطرون ... عنود ونوره خلصن بسرعه ونشن عشان يركبن لغرفة عنود ويصلن... يوم يت فطوم بتنش وياهن زقرتها عمتها ام خالد..
ام خالد: فاطمه بنتي...تعالي هني...
استغربن ثلاثتهن من هالاستدعاء... قالت لها عنود
عنود: يوم تخلصين تعالي فوق..بس ركبي الدري ثاني غرفة على ايدج اليمين...اوكي...بنسبقج نحن..
كانت فطوم مرتبكه فما سمعتها عدل...لكنها قالت..
فطوم: اوكي..
وسارت عند عمتها ويلست عدالها...اللي كانت يالسه ام سلطان...وفطوم كانت ملاحظه ان عين هالاخيره عليها من دخلت...
فطوم: هلا عمووه... آمري..
رزت ام سلطان بفيسها...
ام سلطان: شحالج بنتي..؟؟ شحال اهلج.؟
فطوم: بخير الله يعافيج خالوه..
ام سلطان: وشحال امج... وابوج..؟
فطوم: الله يسلمج ياربي كلهم بخير وعافيه...
ام سلطان: عسى مرتاحه فبيت عمتج..
استغربت فطوم من هالتحقيق...!!!
فطوم: الحمد لله هم مب مقصرين وانا مرتاحه وايد عندهم...
ام سلطان: انتي تدرسين في الجامعه والا في التقنية مثل ولدي حمدان..؟؟
فطوم: لا انا في الجامعه...
ام سلطان: هييي.ماشاء الله...كم باقلج عن تخلصين...؟
فطوم: هههههه خالوه انا توني اول سنه...يعني بعدني اربع سنين...على الاقل...
ام سلطان: وناويه تكملين دراسه لين التخرج..؟؟
فطوم: اكييد ان شاء الله...
ام سلطان: هييي..ماشاء الله..الله يوفقج يابنتي...واختج متى بتعرس.؟؟ قالولي مالجه..
فطوم: والله يقولون بعد كم شهر...يمكن نفس الوقت اللي بتعرس فيه عنود وعبدالله..
ام سلطان: هيي ياحيهم والله...الله يوفق البنات...بنقوم نصلي...
فطوم: انا بسير عند البنات بصلي فوق وبننزل...
ام سلطان: برايج بنتي...
تنفست فطوم الصعداء على قولتهم عشان خلص هالتحقيق الغريب.... احين شو تبابها هالعيوز تحقق وياها...!! ... لا يكون تبا تخطب..؟ متفيجه تو الناس ..!! بس ادركت فطوم في خاطرها انها حبت هالفكره...وانها مش معارضه..لكن اعتراضها الوحيد هو الوقت....مب وقته الحين....هزت راسها وهي تحاول تطرد صورة حمدان عن راسها وركبت الدري...ووقفت في الممر متردده... شو قالت عنود...؟؟؟..ثاني غرفة على شو..؟؟ اليمين والا اليسار..؟؟؟....همممممممم... تجدمت فطوم وحطت اذنها على الباب اللي عاليمين...هدوء....طبعا هدوء..اكيد يصلن...بس اخافها مب هي الغرفه...!!!..المشكله انها حتى ماتذكر اي حجره دخلت في الملجه... راحت للغرفه اللي مجابله عاليسار وحطت اذنها...بعد هدوء.....ياهي حاله...ياويلي وين ادخل وين اروح..!!!...بعدين فكرت...محد في البيت بنات غير عنود... والرياييل اكيد في الميلس او المسيد الحين...عشان جي عادي اذا غلطت...سمت بسم الله ودخلت الغرفه اللي عاليسار...
الغرفه مب هي نفسها...هذي لونها سماوي...وولاديه...ياويلي...مب غرفة عنود... بس الحجره فاظيه...خذت حريتها وتاملت بالغرفه... عملية.. وحلوه...وستايلها يديد...ومرتبه بعد... بس الشبريه هي الوحيده اللي فراشها متلعوز شوي...يوم طاحت عينها على التواليت صدمتها صورة حمدان في برواز شوي كبير...وظحكت..خقاق وحلو اكيد بيحط صورته....مب سادتنه المنظره يتامل بعمره بعد حاط صورته... تجدمت ريولها بدون ماتحس للتواليت... حاولت تمنع نفسها عن التامل في هالصوره الكاشخه.... مدت ايدها لواحد من العطور..ويوم شمته عرفت انه هذا اللي يستخدمه حمدان دايما لانها دوم تشمه فيه...قعدت تلعب شوي بالاغراض المتناثره...مشط..كريم...مفاتيح...وتخطت بنظرها الصوره وصدت للمكتب.... مكتب كبير فيه كمبيوتر والطرف الثاني منه متكدسه الكتب والاوراق ..كديد ياحليله.... وبدون ماتقدر تقاوم اكثر..مدت ايدها ومسكت البرواز... ورفعتها عشان تشوفها عدل... وخذت وقتها وهي تتامل في الملامح الحلوه...والعيون البنية الحلوه...والحواجب الغليظه شوي والمقوسه بشكل خطير وحلو...والخشم الرفيع والطويل...والشفايف المتوسطه والمبتسمه....ماشاء الله عليك ياحمدان.... سمعت باب ينفتح قريب وايد منها ..وفي جزء من الثانيه ادركت انه باب الحمام الي كان مسكر من الصبح...وعلى طول وبشكل غريزي دست الصوره ورا ظهرها وهي تشوف وبرعب فظيع حمدان اللي طالع من الحمام ومحسّر يديه ومبين انه كان يتوضى وتوه قايم من النوم...مب متسفر..بس لابس كندورته... وصل قلب فطوم لحلجها...يالفظيحه..يالفظيحه....ياربي موتني احين... ولا اواجه هالموقف....الله ييخسني انا من بقره...شو مدخلني حجرة الريال...يوم دريتي انها مب الغرفه المطلوبه طلعي انزين.....!!..لااا قاعده تفتش وتتامل بقوة عين....ذوووقي الحين الاحراج والفظيحه... وعند منوو..؟؟ عند حمدان ولسانه اللي مايرحم حد.....يارب ساعدني...
حمدان كان منصدم صدق... بس بسرعه استوعب الموضوع وذكر انهم عازمين بيت عمهم..بس الصراحه ماتوقع انها تحظر....والاخس ماتوقع ابدا انه يشوفها فحجرته....كان قلبه يدق بشكل جنووني... وهو يتامل فويهها المنحرج والمحمر...وعيونها اللي ماخازت عن ويهه ..وهي شكلها مب حاسه انها قاعده اطالعه من الاحراج اللي تحس فيه...ابتسم...فديت هالويه الزايغ... تجدم شوي صوبها وهي تتراجع على ورا...وظحك
حمدان: هههههههه...اوكي ..اوكي....غبت عنكم اسبووع...بس لو دريت اني بشوفج عقبها فحجرتي جان من زمااان غبت هالاسبووع....
نزلت عيونها وتمت ساكته مب عارفه شو تسوي وشو تقول ...وكيف تتصرف....آآخ يالفظيحه..
حمدان: ياحيالله فطييييم....حيالله الطويييله....مبروك عليج الشهر...
فطوم:... آآ...الــ ....اللـــه يبــار،،،ك... فيــــ ....ك....
وزادت ابتسامه حمدان... لاحظ انها داسه شوي وراها....ولو مب داسه هالشي وتخاف اطلعه جان شردت من الصبح...لكنها تخافه يشوفها....التفت صوب التواليت وين ماكانت واقفه ولاحظ غياب صورته... ذاب قلبه بين ظلوعه.... وحسد الصوره من خاطره لانه فطوم ماسكتنها.... وبما انه متفيج وتوه قايم من النوم...وباله رايق ومستانس بشوفة فطيم...ليش مايغايظها شوي...
حمدان: شليها اذا تبغين...!!
رفعت فطوم عيونها بخوف وارتباك...
فطوم: اشل...شوووو...؟؟؟؟؟؟
رفع حواجبه ونعس عيوونه وهو يطالعها بمكر ويبتسم...
حمدان: اللي داستنه ورا ظهرج....
غمضت فطوم عيونها بقو ووصل بها الاحراج لابعد حد....
فطوم:..انا.....انا....هممم...كنت...كنت ادور غرفة ...عنود.... وو....بالغلط دخلت حجرتك....وو ...بس كنت اشوفها... ماقصدت...سوري...
كسرت خاطره ...وظحك وهو يشوفها بعدها داسه الصوره.....!!!
حمدان: عندج النسخه الاصليه وتشوفين الكوبي...؟؟؟ ...
ابتسمت فطيم ابتسامه خفيفه...وهي تشوفه يمد ايده ويحرك صبوعها كانه يقولها " هاتيها" ... طلعت الصوره وعطته اياها .... شلها وردها على التواليت مثل ماكانت...
حمدان: ادري انج ماكنتي تتوقعيني هني...وادري انج انحرجتي... بس لا تخافين هالشي بيني وبينج... انا زايغ احينه عن يهزبني ابويه... يييت تعبان من الكلية ورقدت وتوني ناش..وبصلي في الغرفه وبسير افطر...
استغربت فطوم من هالشرح والسوالف اللي طلعها حمدان...وعرفت انه واحد من الاثنين.. يا انه يحاول انه يرفع عنها الاحراج...يا انه مرتبك مثلها ومب عارف شو يقول...وفي الحالتين حبت منه هالتصرف...
فطوم: حجرة عنود اللي مجابله صح..؟؟
هز حمدان راسه بالايجاب... وراقبها وهي تطلع من غرفته ..كان يبا يوقفها...يقولها شي...اي شي.. بس عشان تقعد اكثر... بس فات الوقت وطلعت وسكرت الباب وراها.....ابتسم وهو يتفداها فخاطره.... مسكينه انحرجت...بس ياحظ حجرتي يوم دخلتها والله...فرش السياده وحاول يركز فصلاته قد مايقدر... اما فطوم دخلت حجرة عنود ووويهها احمر...وحصلتهن مخلصات صلاة...
عنود: عنبوو وين سرتي انتي هالكثر سوالف ويا عمتج..!!
فطوم: هههههه هي... سون لي تحقيق هي وامج..مادري شو عندهن...المهم لا تظهرن..تريني شوي بصلي وبننزل رباعه...
دخلت الحمام وتوظت وصلت المغرب... وعقبها نزلن رباعه لغرفة الطعام وين تيمعن كل الحريم للفطور...
وبعد الفطور قعدن كلهن يسولفن ويظحكن وبعد ما صلوا الرياييل التراويح روحوا بيت بو خالد لبيتهم ... وفطوم بالها مب عندها...ولاحظت نورة عليها هالشي....وقررت تسالها عقب شوفيها... اول مادخلن البيت حصلن حصه يالسه بروحها في الصالة واطالع التلفزيوون وجدامها كوب عصير مشروب نصه... وصحن هريس ماكول شويه منه....
نورة: السلام عليكم...ها حصيص..لا تقوليلي هذا فطورج..
حصه: وعليكم السلام... شربت شوربه المغرب... وهذا فطوري..شوفيها..مب نعمه...
فطوم: نعمه الحمد لله بس عاد هذا فطور..؟؟؟ مايشبع ياهل...
حصه: ما هنالي الصراحه اكل بدونكم...ماعليه بنتفاول بعدين...شو اخبارهم قوم عمي..؟
نورة: والله يسرج حالهم ربشه...
حصه: ياحيكم يوم استانستوا...بس عاد مب كل يوم هالسالفه....وتخلوني بروحي...
فطوم: ههههههه لالا خلاص مب سايرين..
نورة: هي صدق..الا عشانه اول يوم رمضان حبوا انهم يتوالفون ويفطرون رباعه بس باقي الايم فبيتنا...مب سايرين مكان...
فطوم: بسير انا ابدل ثيابي وبصلي العشا...
نورة: انا بعد...
حصه: عيل انا شو ايلسني..بسير بعد اصلي...
نورة: بس مب تنخشن فحجركن...نزلن تحت عقب...
في نفس الوقت بعدها بفتره كانت حصه اول وحده خلصت صلاتها ونزلت تحت .وكانت امها يالسه وياها وابوها .... رن التيلفون وشلته...كان عبدالله...
حصه: آآلوو...
عبدالله: مررررررحباااا فديييييييييت هالصوت يعلني ماخلى منه..
رفع خليفه نظره واطالع عبدالله باستغراب....منو يتفدا هذا....؟
حصه: هلاااا والله وغلاااا....مبرووك عليك الشهر...سبقتك..
عبدالله: الله يبارك فييييييج ويخليج...شحالج حصيص.. ؟
تغيرت ملامح خليفه وعيونه متعلقه بويه عبدالله المبتسم....يحاول يخمن شو قاعده تقوله حصه...في هاللحظه رد له الحنين..والشوق....والحب لها اللي عمره ما اختفى ...بس كان مندفن لفتره فقلبه...ياحظك ياعبدالله... وعبد الله منتبه لنظرة خليفه... وهو حاس باللي فقلبه... بس مايقدر يدخل بهالامور...
حصه: بخييير الغالي شحالك انته..وشو الدراسه وياك...؟
عبدالله: الحمد لله ماشي الحال...هانت ماباقي شي وبنرد ان شاء الله....انتي شحالج وشحال الاهل..؟؟
عبدالله كان مستانس من صوت حصه اللي مبين عليه مرتاح...ويحس ان حالتها تحسنت اكثر...
حصه: كلهم بخير وسهااااله...عندي امايه وابويه...وبعد شوي بتي نوره وفطيم...منو تبا ترمس....؟
عبدالله: عطيني امايه بباركلها بالشهر..
عطت حصه امها السماعه وهذي قعدت ترمس ولدها وتتفداه وتوصيه على نفسه.. وبعد ماخلصت كلمه ابوه شوي وبعدين سكروا عنه....
وفي نفس الوقت اللي نزلت فيه نوره دخل خالد البيت ويلس وياهم وشكله مستانس...
خالد: هااااا... شو تسووون..؟؟ نوروه سيري هاتيلي هذا الاصفر..كاراميل...
نورة: حشى توني يايه امرت عليه...ههههههههه اصفر اون...صدق انك طالع على الشايب...
راحت نوره ويابت كذا صحن حقهم... وحطته ...ويلست عدال حصه..
خالد: مشكووووووووره... اماااايه..عندي لكم خبر...
ام خالد: خيير ياولدي...
خالد: خيير يا ام خالد.... ميره حامل...
الكل ابتسم واستانس...
ام خالد: لا والله..؟؟ مبرووووووووووك ياولدي تستاهل...
نورة: مبروووووووووك..عيل ما رمست هي ويا ويهها....
خالد: بعد تبينها تخبركم قبل ماتخبرني...؟؟؟....
بو خالد: يتربا فعزك ان شاء الله...
خالد: وفعزك يابووويه الله يخليك لنا....
حصه: عاد ان شاء الله تطلع بنت... مسكينه شميم مخلينها بين اولاد متلعوزه وياهم...
خالد: هههههه فديت شماااني انا...ثرني بتشرط عيل...؟؟ الحمد لله على هالنعمه..واللي ايي حياه الله..
ام خالد: صدقت ياولدي...
خالد: انزين اقولكن..قومن سون فواله حق الميلس...ربعي قايلين بيتسحرون عندنا...نبا شي زين...
نورة: فاااااااالك طيب...بنسويلكم فواله...
خالد: فاااالج مايخيب بنت حمد...يالله فمان الله..
طلع عنهم خالد وسار صوب الميلس.. وبو خالد قام يرقد عشان ينش في الليل قبل السحور...
وتمن هن الثلاث...
نوره: وين فطيم..؟؟
حصه: ماطلعت من دخلت تصلي...
نورة: بسير اشوفها...
خلت حصه مع امها وسارت لفطوم..حصلتها يالسه بشكل غريب فحظن الدبدوب .. سرحانه وهي حاطه صبعها الابهام فحلجها... ..
نورة: بسم الله مثل المدمنين.... هاااي فطوم....بلاج..؟
انتبهت لها فطوم ..
فطوم: هااا....هلا نوروه..!
نورة: هلا نوروه اون...شو بلاج..؟؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك