رواية اموت واحيا بك -30
عبدالله: ماقلت انته بتردها عليها..؟؟؟
خليفه: تراني شليتها على اساس بردها..احتشرت عليه وقالت انا اباها لك هدية تذكرني بها بحسن نيه ومادري اشوو..ولانه مافي فقلبها شي صووبي لانها خلاص انخطبت...وبتعرس بعد ما تتخرج...ولاااا..بترد الامارات ويانا الظاهر...!!
عبدالله: اهاااااااااا والا جي السالفه..!!!..وانته لبستها ماشاء الله..!!!
خليفه: لا تفسر على كيفك...والله اني لابسنها لانه ساعتي وقفت اليوم الصبح..وماعندي ساعه غيرها..ولبستها لانه عليه امتحان اليوم وكل شوي اطالع في الساعه......بس باجر ماعليه امتحان بسير باخذ لها هدية وباخذلي ساعه غير انا بعد..
عبدالله: شو شو شوو..؟؟؟ شو قلت..؟؟؟ بتاخذ لها هدية؟
خليفه: هي... اللي مايرد الهدية مب ولد اصل وعرب ياعبوود...والا مب لسواد عيونها وانته تعرفني..
عبدالله: شو لك انته فهالسوااااااالف ياخلووووف....!!!..شتبابها البنت مخطوبه وباجر بتعرس بتسير تسويلها مشاكل بعدك بهديتك...!!
خليفه: والله انا مابكتبلها رساله غراميه...باخذ لها حيالله شي يخطر على بالي تتسلى فيه فتره لين ما تنسى منو عاطنها هالهدية...
هز عبدالله راسه مب راضي عن الفكره...بس خليفه عاقل وموثووق فيه ويعرف انه مب راعي سوالف وانه بياخذ هدية لفكره هو مقتنع فيها...بانه دامه قبل هدية؟ لازم يردها... والا مايقدر يتنفس براحه...
يوم الاثنين في الامارات كان بو فيصل وحرمته يايين زياره للعين...يقصرون الدوب عليهم وبالمره يشلون بنتهم فطيم وياهم عشان تقضي اجازتها هناك في الشارجه....وصلوا الضحى...ويلسوا وسولفوا لين الغدا ويوم تغدوا دخلوا يرقدون لين العصر...فطوم كانت تجهز اغراضها وهي مظايقه بانها ماشافت حمدان ولابتشوفه قبل ماتروح...لانه عليه دوام العصر ولا بيي صوبهم.... استغربت من نفسها وهي تكود ثيابها في الشنطه ..من متى انا احاتي شوفة حمدان والا ازعل لاني ماشفته..؟؟؟؟... مب جني من فتره كنت اتمنى اذبحه واني ماشوفه نهائيا؟...ياربي شو هالحاله ...انا شو الله بلاني وحبيت...!!..حمدان الربعه والسوالف وياه حلوه لكن الحب..!!! الله اعلم لكني مب متفائله بخير...هذا ماينعرف شو يطلع منه...يالله بغيب ثلاث اسابيع عن العين....ثلاث اسابيع..؟؟ والله بديت اشتاق للعين وانا بعدني ماطلعت منها...
ويوم يا العصر وصلوا العصر وخلصوا...ركبوا هل الشارجه سيارتهم وتوكلوا صوب بيتهم ...وفطوم مبرطمه...
في الليل ياهم حمدان ويلس في الميلس شوي...عقب دخل عند اخته وسلم عليها...ويوم خلص سلامه لها روح للبيت ...يوم دخل للصاله ماحصل غير نوره اتابع مسلسل...
حمدان: السسسسسلام عليج...
نورة: وعليكم السلام والرحمه ...اهلين..
حمدان: شحالج..؟؟
نورة: الحمد لله شحالك انته.؟؟
حمدان: بخير..وينهم عنج عيل.؟
نورة: هممم حصه تصلي...امي سارت عند حرمه مربي في المستشفى...ابويه بعده مارجع...
ترياها حمدان تكمل رمستها بس ماكملت....وعقد حياته..
حمدان: وين فطــــيــــــــم..؟؟؟!!!!
نورة: اوه..!!..هي فطيم سارت الله يسلمك...
اظايق حمدان في خاطره وعرف اجوبه اسالته من قبل مايسال...فطيم راحت الشارجه وهو ماشافها قبل ماتسير وبتم هناك لين ماتخلص اجازتها..يعني كم..؟؟؟ ثلاث اسابيع تقريبا... آآآآآآآخ يالقهر..
حمدان: سارت الشارجه ها..؟؟
نورة: هي يا خالي اليوم وحرمته وشلووووها...
وانقهر حمدان...ودام انه منقهر لازم يقهر حد وياه ..شحقه هو بروحه يعااااني ويتم ساكت..؟؟ صد صوب نوره..
حمدان: وانتي ريلج مرتغد ماادلينه وين...
فزت نوره وعدلت قعدتها ....
نورة: لو سمحت... ريلي مب مرتغد... ريلي ساير ويا ربعه يغير جووو ويتحوط...
حمدان: هههههههه يغير جو وويووووه بعد... ويا زين اللي بيشووووفه من ويوه في حواطته...
عقدت نوره حياتها منقهره...
نورة: بسم الله على سعيد من هالحركات....الا جان انته تشوفهن مزيونات فاعتقد لانهن من مستواك ....
حمدان: ههههههههههههههههههههههههههه خيييييييييبه يالدخاااان....!!.. شحقه منقهره انزين كل الرياييل يحبون يشوفون الحلوات... خص سعيد عاد يموت عالحلوو... بس آخر شي بيرد لج لاتخافين...
نورة: حمدان لو مب الحشمه والادب جان نشيت وخليتك يالس ارووحك هني تقحطن...
نقع حمدان من الظحك على نوره...وحليلها...سارت فطيم وطاحت هي فلسانه..
حمدان: هههههههههه اسولف وياج..سعيد ريال ومايسوي هالسوالف..ويكون فعلمج ولا انا اسوي هالسوالف.. بس حبيت اغايظج شوي لاني منقهر...
نورة: ويا ويهك... وشحقه منقهر؟
حمدان: ......بس
نورة: عشان الشيخه فاطمه بنت هلال سارت اليوم الشارجه بدون ماتودعك.؟؟
اطالعها حمدان بنص عين...
حمدان: انتي ساحره من يوم يومج..قايلج...
نورة: ههههههه...فديتني...
حمدان: شحقه ماقلتيلي انها بتروح اليوم..؟؟؟
نورة: مادرينا الا اليوم الضحى يوم يونا قوم خالي ...شو تباني اتصلك عشان تي تشوفها بين اهلها؟؟؟ مابتروم تشوفها..
سكت حمدان وقعد من الحين يحسب الايام والاسابيع لين ماترد الطويله البيت... عقب ذاك اليوم الحلو اللي قضووا في البر زاد حبه وقربه منها..ويالله يالله صبر من يوم الخميس لين الاثنين بدون ماييهم البيت... ويوم يا ماحصلها..!!.. آخ يالنحاسه اللي فيني...
قطعت عليه نوره افكاره..
نورة: اقول حمدان...
حمدان: هلا..
نورة: انته قايل بتودينا السينما اذا صبنا الزقاره وماوديتنا...
حمداان: انا واعدنكن اربعتكن....وما بشل ثلاث بس...
سكتت نوره وفهمت ان حمدان يقصد فطيم...يعني مابيوديهن السينما الا يوم تي الشيخه فطيم...انزين ماعليه...
سعيد كان في هذي الايام في مصر..كان ساير مع شله ربع حوالي 8 او 10 ... وكلهم ميانين وعايش وياهم احلى ايااام.... من زمان خاطره يروح فرحله ويا ربعه جذي.. بس رغم وناسته كان يذكر اهل وخصوصا نوره في اغلب المواقف...من يشوف محل يبيغ اشياء غريبه خذ لهم من هالسوالف كتذكارات .. خصوصا خان الخليل كان فيه اشياء عجيبه.. بعد يومين بيروحون جدة في السعودية..وكان سعيد متحمس لها...وبعد مايخلصون من جده بيسيرون سوريا ولبنان..وعقبها بيرجعون البلاد.. في الاسكندريه كان سعيد يتحوط مع ربعه في الشوارع.. لين ماصادف مقهى انترنيت ..واصرر هو وواحد من ربعه انهم يدخلونه..اما الباقين عارضوا..اخر شي اتفقوا انهم يتلاقون فمطعم قريب بعد ساعه...دخل سعيد هو وربيعه المقهى ويلس له على كمبيوتر وعلى طول فتح الايميل...وحصل رساله وحده من نووره...مطرشتنها بعد يومين من سفر سعيد...استانس من الخاطر انها مالبسته وتريته هو لين مايطرش...بما انه هو اللي مسافر.!!..وهو المفروض يتواصل...نوره ماعندها هالسوالف...فديتها ياربي...
فتح رسالتها وكانت تقول...
" السلام عليكم......
سعيد...شحالك الغالي..؟؟
انا بخيييير وعااافيه ونشقح...
مادري وين الله عاقنك وفي اي بقعه من ارض الله الواسعه... لكن كل اللي اتمناه انك تكون مستانس... وادير بالك على نفسك....
بس والله ياويلك ان سمعت انك سولفت ويا بنات...بزواااالك ترا.... انا واثقه فيك بس اخاف ربعك يخبلوبك وياهم...وترا شباب يوم يسيرون رباعه ويسافرون يسوووون العجب عشان جي انا متخوفه...
لا تعقد حياتك...
ادري انك تحبني ..وما تشوف غيرري... ترا حتى انا احبك وماشووف غيرك اووكي؟
هممممممم بغيت اقولك ان نفسيه حصه تحسنت وايد اكثر عن قبل...قامت على الاقل تظحك وتسووولف
وسالفه الشغل عاطتنها حماس شوي...عل وعسى اللي فبالي يتحقق..صح انته توأم روحي على قولتهم بس لا تسالني عن هالشي لاني ماقدر اقولك..اخاف اقوله ومايتحقق..بس اذا صار بقولك تراه صار..بس ادعى انته...
ولا تنساني بالهدايا لوووووول...لالا صدق لاتخسر عمرك ولا شي..
بخليك الحين..متى ماشفت ايميلي رد عليه خبر...
دير بالك على نفسك وهالله هالله بالرزااااااانه..
خطيبتك..
نووووووره..."
ابتسم سعيد وعلى طول رد عليها برسااااااله طويييله يخبرها بمكانه وشوو يسوون وشكثر متوله عليها..وبانه فعلا مانساها بالهدايا ...ولو كانت بسيطه...بس قيمتها كبيره في النفس...ونازعها شوي على سالفه البنات اللي تحسب عمره خلص منها.. بس تساهل وياها شوي لانه يدري بانها تغاااااار مثل ماهو يغاار عليها.... وخبرها بعد وين بيسيرون في الايام اليايه...ووصاها ماتقطع بالرسايل وبانه متى ماشاف مقهى انترنيت بيدخل وبيشيك وبيطرشلها رساله..
بعد يومين عنود كانت فبيت عمها وبالتحديد يالسه بين عمتها ام خالد وحصه....
عنود: عموووووه دخييييلج..والله اني ماعرف اشتري بلاها..
ام خالد: يابنتي انا والله ماعندي مانع..لكن عمج مابيرخصها تروح لين دبي وياج تحوط في الاسواق...
عنود: عموووه مابترمسينه عشاني يعني..؟؟؟
ام خالد: بعد شوي بييي وبنرمسه لكن بس انتي بعد رمسيه خليه يسمعها منج...
عنود: عموه اتروع اخافه يعصب ...
ام خالد: ههههههه انتي شاوريه وشوفي رايه...
التفتت عنود لحصه وهي مب متفائله بخير...اكيد عمها مابيطيع...
ويوم يا بو خالد وكانت ساعتها نوره يالسه معاهن..شاورووه في السالفه...
بو خالد: لالالالالالالالالالالالا....
ام خالد: ليش ياحمد...؟... ماعليها جان ويا حرمه عمها وبنت عمها ...
بو خالد: لا قتلج...البنت بدون امها والا حد من اخوانها والا نا ماتطلع من البيت...يالله يالله نحن خليناها تشتغل...
برطمن حصه وعنود...
نورة: انزين امايه انتي شلي حصه وعنود وسيروووا...ترا عنود حرمه ولدج بعد...وقوم عمي عادي عندهم بيخلوونها تسير وياج...
بو خالد كان مشغول ويتابع الاخبار فما سمع نوره وهي ترمس... ام خالد فكرت في السالفه شوي..
ام خالد: وين اسير انا بنتي واخلي البيت ..!!!..
نورة: وابوي انا وحريم اخواني هني ما نسد..؟؟؟...الا يوم واحد بتسيرن وبتردن..
عنود: هي عموووه دخيلج دخيييييييييلج ....
ام خالد: انزين مايخالف...
صدت ام خالد على بو خالد بتشاوره....
ام خالد: حمد...انا بسير ويا البنات دبي...
عقد بو خالد حياته معصب..
بو خالد: انتي شو يسيرج بعد ومالج حااايه..؟؟؟
ام خالد: ترا بنت اخووك ما تعرف تشتري الا ويا حصه..من طاحن وهن رباعه مايتفارقن.. وانته مب طايع ترخص بنتك...انا وام سلطان واحد..انا بشل البنات وبوديهن دبي...
بو خالد: تراج الا رابطه راسج بلا ويع...وشكلج الا انتي ارووحج تبين تحوطين...
ظحكن البنات والعيوز وياهن..وكان بو خالد رافض الفكره..وكان بيستمر برفضه هذا لولا انه شاف عنود شكلها زعلان وحاطه فخاطرها وهي ماتهون عليه...اخر شي وافق....عشان عنود بس..
الاربعاء وبعد مارجعت حصه من الدوام تغدوا كلهم وعلى طول ركبت حصه وام خالد السياره ومودنهم الدريول.. طبعا بعد ماصدعت راس نوره بالتوصيات على البيت...كانوا بيباتون ليله لانه مايعتقدون ان عنود بتخلص كل اغراضها في يوم واحد...ركبت ام خالد وحصه السياره وساروا بيت محمد... وشلوا عنود وياهم وهذيج نفس الحاله امها توصي بنتها على الركاده والعقل...وبعد ماخلصوا روحوا دبي وكانت الساعه تقريبا 3 ونص....
يوم وصلوا الشارجه كانت ام خالد تعبانه ومافيها على السوق...طبعا ساروا بيت اخوها هلال وهناك عرضت عليها بنتها عليا انها هي تروح معاهن السوق وام خالد ترتاح في البيت...ووافقت ام خالد لان عليا لها بارض اكثر وادل اكثر بعد عن ام خالد...
فبالتالي بعد المغرب راحن البنات مع عليا دبي ووداهن الدريول... واسميهن هناك طيحن في كل شي...ماخلن شي ماخذنه.. ورجعن المسا هلكانات...تعشوا ورقدوا وبالباجر الصبح بعد نشن وسارن السوووق ..وهلال مسكين مفرور ياعند فطيم او شيخه... رجعن الظهر وهن محملات باكياس باكثر مما كانن يتوقعن...عنود خسرت واااايد بس الاشياء اللي ماخذتنها كلها تستاهل...وتقريبا خذت كل شي ناقصنها.. ومب لازم تكثر وايد لانها اكيد بتاخذ لها سوالف وايده بعد العرس...
تغدوا فبيت هلال وفطيم تتحرقص خاطرها ترجع معاهم العين بس طبعا ماتروم تنطق...بيحتشرون عليها اهلها... على هالحال رجعوا هل العين للبيت بعد الغدا..ووصلوا العصر.. عنود نزلت معاهم البيت..ونزلوا الاكياس كلهن وحطوهن فحجرة فطيم .. وقعدن يبطلن الاكياس ويراون نووره شو خذت عنود... الصراحه كل الاغراض كانت فنانه وكاشخه...واهم شي الراحه اللي حست بها عنود لانها خلصت اغراضها اخيرا...
بعد ماتعشت عنود في بيت عمها ياها حمدان وشلها هي واكياسها اللي ترسبهن السياره...وروح بها البيت...
الجزء الثالث والاربعون.
على مدى الايام اللي كانت حصة اداوم فيها لاحظت تردد راشد من الحسابات على قسمهم ونظراته اللي ماتخلص... وحصه كل ما تشوفه تتافف لانها تعرف انه بيسوي حركه من حركاته البايخه...حتى انه احرجها في القسم كله البنات كلهن انتبهن لنظراته صوب حصه وقامن يعلقن ويمزحن في السالفه...طبعا ولا وحده منهن تدري ان حصه "ارمله" كلهن يتحسبنها بنت توها متخرجه وعزبا...وحصه ماخبرت حد لانها ماشافت انه له داعي...
كانت شاله كم ملف بتوديهن لاقسامهن المخصصة.. وتلاقت ويا صاحبنا في الممر..يوم شافها وقف وعيونه تلمع...
راشد: السلام عليج..
كانت حصه بتتخطاه وبتروح فطريجها بس يوم سلم مشت شوي بهداوه عشان ماتكون فظة..
حصه: وعليكم السلام والرحمه...
بغت تمشي لكنه قال مره ثانيه..
راشد: شحالج حصه...؟؟
حصه فخاطرها تقول اللهم طولك ياروح...وقفت ..
حصه: بخير الله يسلمك...
ويوم شافته سكت تحركت عشان تكمل طريجها... بس عقبها بغت تذبحه يوم رد رمس..
راشد: آآآ,,حصه...!! صبري...
تراجعت حصه ووقفت جدامه..وهي ماسكه الملفات بعصبيه..
حصه: آمر..؟
كان راشد شكله متوتر...ويبغي يقول سالفه...
راشد: مايامر عليج ظالم...حصه انا ابغي اسالج سؤال بس منحرج منج الصراحه...
حصه: ليش الاحراج ..تفضل...
راشد: آآآ.... بس توعديني ماتعصبين عليه ولا تفهميني غلط لانه نيتي سليمه صدقيني...
تمت حصه ساكته ومستغربه...احين انا ناقصتنك انته؟..شو سالفتك؟؟..
راشد: اوعيديني...
حصه: اوكي اوعدك...
ابتسم راشد ابتسامه خفيفه وبسرعه طارت...
راشد: همممم...ابا اعرف وضعج..يعني..همممممممم... مخطوبه..معرسه..!!...
بطلت حصه عيونها مستغربه.....
حصه: وشو تبابه وضعي انته..!!!!..
راشد: آآآآآآآآ,,,, بصراحه انا طالب القرب منج ...اذا ماعندج مانع....
انصدمت حصه ...ودار راسها لكنها تماسكت...وعلى طول حزت فخاطرها ذكرى سيف... نزلت عيونها وقالت بعصبيه...
حصه: اخوي انا لا متزوجه ولا مخطوبه ...وضعي في المجتمع يسمونها "ارمله"...رجاءا طلعني من بالك لاني ما افكر بالزواج...اسمحلي..
وراحت عنه صوب الاقسام تودي الملفات اللي تبا توديهن وهي بالها مب عندها... مب قادره تصدق بان الشباب بعدهم يفكرون فيها...بوضعها هذا...بس هذا شي طبيعي لانه محد يعرف وضعها...اوففف ياربي ...خلني انسى هالسالفه ابركلي...
راشد تم واقف مكانه ..منصدم...مب قادر يصدق ان هالبنت كانت معرسه ومات عنها ريلها... كان متخيل ان الامور بتتسهل ..مجرد تعطيه جواب لسؤاله اذا كانت مش مرتبطه يقدر يطلع معلومات عنها وعن اهلها ووين ساكنه بدون مايحرجها بالاسئله...وعقب بيخبر هله بالموضوع وبيسيرون بيخطبوونها..لانها عايبتنه من الخاطر..صح ما شاف من شكلها غير عيونها..بس مب مهم وايد...المهم حشمتها واحترامها لنفسها....آآخ ياخساااره...كمل طريجه وهو متحسف من كل خاطره...
يوم ردت حصه البيت شافت امها ونوره مرتبشات...شافت نوره شاله المدخن وتحط فيه لبان وهي سايره فوق.. وامها يالسه متوتره في الصاله...ابتسمت حصه وتذكرت ان اليوم موعد وصول اخوها عبدالله...واختفت ابتسامتها يوم ذكرت ان خليفه بعد ياي... يالله ياخليفه..!!!..كم حطيت عليك آمال..!!...صرفت هالموضوع من بالها..سلمت على امها وسولفت وياها شوي ..عقب سارت فوق تتسبح وترتاح ...يوم وصلت الطابق الفوقاني شافت نوره طالعه من غرفه عبدالله...
حصه: متى بيوصلون..؟!
نورة: في أي لحظه...
حصه: منو ساير اييبهم.؟؟
نورة: حمدااان...واكيد بيخطفون هني اول عشان ينزلون عبدالله...
حصه: انا بنسدح شوي..دخيلج يوم بيوون خبريني...
نورة: اوكي..
تحركت نوره وتحركت حصه...عقب ردت حصه تصد صوب نوره وتقول..
حصه: ..آآآ نوره...اقصد زقرييني يوم بيسيرون قوم حمدان بيتهم وبيتم عبدالله اوكي.؟؟
نورة: ليش ؟..ماتبين تسلمين على خليفه..؟؟؟؟
حصه: آآآ...لا مب جي السالفه...بس عقب بسلم عليه ..ماريد اسلم على اخويه جدام خليفه ...المهم انتي يوم بيسيرون زقريني...
نورة: على راحتج..
وسارت كل وحده فطريجها..
الشباب في سياره حمدان كانوا ميتين من الوناسه..يسولفون ويظحكون..وكل حد منهم يفكر بنتايجه الحلوه في هالسنه...خليفه بما انه كان همه في هالسنه الدراسه وبس حصل امتياز في علاماته ماعدى في ماده وحده خذ جيد جدا...اماعبدالله فكان معدله جيد جدا في كل المواد تقريبا...وحصل شهادته وماباقي غير رخصه الممارسه ياخذها من الامارات ويشتغل في مستشفى توام...قسم الاشعة...
كان المفروض وصولهم يكون قبل اسبوع لكنهم تاخروا شوي عشان يحضرون حفل التخرج... تذكر خليفه وهو يبتسم..هند يوم عطاها هديتها وودعها وداع نهائي هالمره.. كان يوم سار السوق عشان ياخذلها هدية احتار وماعرف شو المناسب..لين ما لفت نظره محل انتيكات..دخل يشوف وعيبته تحفه صغيره منحوت فيها اثنينه يهال وشكلهم وايد طفولي ومثل اللافته مكتوب عليها كلام عن الفرندشب "الصداقة" وتحت مكتوب Good Luck وشافها مناسبه وخذها وغلفها ..عقب قعد يدور لعمره ساعة...مسكينه هند..كان شكلها متاثر يوم ادركت انها مابتشوفه بعد اليوم...لانها سفرها بيتاخر شوي اكثر عنهم...المهم انه افتك من هالسالفه نهائيا ..اسميه مابيرد امريكا بعد اليوم لو شوووو ماصار...لاعت جبده منها من الخاطر...
اما عبدالله فكانت سالفه العرس داقة فباله..خلاص ماصدق يتخرج ويفتك..وبيبدا من هالاسبوع يرتب لزواجه...آآآيه فديتج يالعنوود..صبرتي وايد..واناصبرت وايد...بس خلاص ماتم شي...
حمدان كان مستانس باخوه وولد عمه..على الاقل بينشغل وياهم وبينسى غياب فطيم اللي استمر اسبوعين ونص الحين..زين انه بعده متحمل وصابر...اووف متى بيبدا الدوام وبترد الطويله...!!!..
وصلوا الشباب بيت حمد الكتبي...دخل حمدان بسيارته ووقفها في الغراج.. وعبد الله شاق الحلج..وخليفه قلبه مثل الطبل من دخلوا اللفه براا البيت...مايصدق انه بيشوف حصه اخيرا....وهو مب عارف لين الحين كيف يتصرف تجاه مشاعره...حصه الحين مب بنت عمه الاوليه...حصه صارت حرمه المرحوم سيف...سيف اعز ربعه...الله يرحمك ياسيف...
نزلوا كلهم من السياره وكان الوقت 3 ونص الظهر..الشايب لاول مره في التاريخ مارقد..يتريا ولده ايي...متوله عليه من الخاطر...اما خالد فكان فبوظبي وناصر واقف براا هو وامه يوم شافوا السياره دشت...
ياهم عبدالله ولوا على امه على طول..
عبدالله: فديـــــــــــــــتج يا امااااايااا....
والعيوز لاويه على ولدها وتصيح...وكل شوي تحب جتفه وتحبه على غزه ...وتتفدا وحالتها حاله..خليفه سلم على ناصر لين ماتخلص العيوز سلامها ...
ناصر: الحمد لله عالسلاااااااااااااااامه...ياحيالله خليفه والله..
خليفه: الله يحيييك ويسلمك يارب...شحالك ياناصر..؟
ناصر: بخير الله يعافيك...افتكييتووووا مبروك التخرج..
خليفه: الله يبارك فيك يارب...
عبدالله: شووو وانا مالي سلااام..؟؟
عبدالله: شووو وانا مالي سلااام..؟؟
صد ناصر صوبه وهو يظحك...
ناصر: قلنا لين تفرج عنك العيوز ...هلا والله
وتلاوا هو واخوووه وسلموا على بعض....والعيوز من وناستها مسكت خليفه ولوت عليه بعد...تراه مثل ولدها ومربتنه ... وخليفه استانس وايد من هالحركه وحس بغلاته في هالبيت...حبها على راسها ورد على ورا شوي وهو قافط.. وبعد ماخلصوا سلامات قال ناصر..
ناصر: هااا بتدخلون البيت والا الميلس..؟؟
عبدالله: لالا بنسير البيت بسلم على خواتي....
ساروا كلهم البيت وكانت نوره في الصاله متحمسه وتترياهم يدشووون..اول مادخل عبدالله من بعد امه وهو يظحك طارت صوبه وطاحت فظنه...
نورة: فديييييييييييييييتك ياربي والله اني افتقدتك هالسنه اكثر عن قبل...
ظحك عبدالله وهو ماسكنها...
عبدالله: قسم بالله حتى انا..شحالج ويا هالراس...؟
نورة: بخيييييييير..الحمد لله عالسلامه...
عبدالله: الله يسلمج...
دخل عبدالله الصاله اكثر عشان يخلي قوم خليفه يدشون وراه... تحنحن خليفه عشان ينبه نوره انه بيدش...بس نوره مسويه حسابها ومتحجبه من قبل...
عرف خليفه من الاصوات انه حصه محد...وحمد ربه على هالشي لانه مب مستعد يشوفها الحين جدام الكل..
خليفه: السلام عليكم...
نورة: هلا خليفه وعليكم السلاااااااااام..الحمد لله عالسلامه..
خليفه: الله يسلمج يارب..شحالج نوره..؟؟
نورة: بخير الله يسلمك شحالك انته خليفه...
خليفه: الحمد لله ..
دخل خليفه ورا عبدالله وقعد على كرسي بعيد شوي لانه يعرف انه اهله يبون يقعدون عداله اكيد... دش حمدان وويهه معتفس..
حمدان: اشوف الكل مطقعني اليوم مسويلي طاف...
عبدالله: عن البخل ياحمدان.. طول غيابنا وانته عاطينك ويه ..
نورة: هههههههه شحالك حمدان..؟
حمدان: بخير بخير..روحي لصقي في خوج...
نورة: هههههه عيل تتحسب مابلصق...اسميني الا بلصق..
ظحك عبدالله ويت نوره وقعدت عداله.. والعيوز من الطرف الثاني.. وعدالها ناصر.. وخليفه وحمدان يالسين عدال بعض مجابلين.. يسولفون وياخذون علوم بعض...بعد شوي نش خليفه وحمدان ومروا على ميره فبيتها يسلمون عليها عقب روحوا بيتهم... واول ما طلعوا صد عبدالله صوب نوره وقال..
عبدالله: وين حصيص مايت تسلم..؟؟؟؟
نورة: الحين بزقرها..
نقزت عنود وركضت فوق...ودقت على حصه اللي كانت منسدحه عالشبريه ودخلت عليها..
نورة: انزلي يالله...عبود تحت...
اعتدلت حصه في قعدتها ..
حصه: راح خليفه..!!!..
نورة: هي روح...يالله انزلي عبدالله يتخبر عنج...؟
خلتها نوره وردت تحجز مكانها عدال اخوووها... نشت حصه وبدلت ثيابها ولمت شعرها... ولبست شيله بيظا..ونزلت.. دخلت الصاله..
حصه: السسسلام عليكم...هلا والله بالغالي...
نش عبدالله ...
عبدالله: مرحباااا ملايييين بحصيص...تتغلين علينا تترييين زقره عشان تين تسلمين..؟؟
ابتسمت حصه ووايهت اخووها ..
حصه: حرام عليك كنت تعبانه يايه من الدوام...حمدلله عالسلامه عبادي...
عبدالله: الله يسلمج..شحالج حصيص...
حصه: بخير الله يعافيك والله تولهنا عليك...
عبدالله: قسم بالله انا اكثر...بس خلاص ماشي سفر توووووبه اسافر مره ثانيه...
ام خالد: شحقه مانزلتي تسلمين على ولد عمج.؟؟؟ تلقينه حط فخاطره...
تشتت تفكير حصه يوم ذكرت امها خليفه... وخصوصا بانه يمكن انه حط فخاطره...مهما كان شعورها تجاه خليفه والعصبيه اللي تحسبها صوبه..ماتباه يحط فخاطره عليها...
حصه: ماعليه امايه بسلم عليه غير المره...عبدالله راوني شهادتك...
نوره: هي والله...وينها...
عبدالله: في الملف والله والملف في الشنطه..عقب براويكن اياها...
صد صوب امه وقال..
عبدالله: اماااايه خلص قسمي.؟
ام خالد: هي نعم خلص بس باقي المكتب قلنا ما بناثثه لين ما تي انته وتشوف اللي تبغيه...
عبدالله: زين زين قومي راويني...
نشوا كلهم وركبوا ويا عبدالله فوق لقسمه.. ودخلوا الصاله وغرفة النوم والحمام وشاف كل شي وعيبه واااااااايد.. والمكتب قال ارووحه بياثثه مع عنود...وبيشوف شو مناسب..
في بيت محمد الكتبي... كانت ام سلطان وعنود يترين خليفه يوصل...واول ماوصل سون انقضاض عليه... خصوصا عنود وهي تدري باخوها الفتره الاخيره انظرب ظربتين قواااي...اولهم خطوبه حصه..وثاني شي وفاة سيف فغيابه...وان شاء الله انه بينسى كل شي الحين وبيرجع خليفه الاولي... وصلوا اخوانه وابوه بعد شوي وسلموا عليه ويلسوا معاه ساعه ساعتين ..عقب راح يتسبح ويرتاح في غرفته... وهو يفكر من الحين بالوقت اللي بيسير فيه بيت عمه وبيشوف حصه... شو بيقولها؟؟ كيف بيتصرف..؟؟ كان مرتبك وهو يدرك انه بعده يحبها ويمووت فيها بعد.. بس كان متردد من كل شي...لين الحين هو مب عارف كيف كانت طبيعه علاقة حصه بسيف..وكيف حالها الحين...تغيرت او لا.... الله يستر بس...
حمدان بعد صلاة العصر اتصل بربيعه اللي يسموونه الشبيه..راشد..
راشد: آلووو مرحبا...
حمدان: هلاااا والله رشووود...شحالك.؟
راشد: بخير الحمد لله....علوومك ؟
حمدان: تمام...وين انته..؟؟
راشد: في البيت توني ناش من الرقاد...
حمدان: فاظي.؟؟؟
راشد: هي ماعندي شي...بتي.؟؟
حمدان: انا عدال بيتكم احين...
راشد: حياك الله...
سكر عنه حمدان وبعد خمس دقايق وصل بيت راشد...دخل الميلس اللي كان له باب من برااا...وسلم على راشد اللي كان يالس اروحه...
وبعد ماقعدوا..اطالع حمدان راشد باستغراب..
حمدان: بلاك مويم..؟؟؟
راشد: مااااشي..وانته بلاك مستانس.؟؟
حمدان: قبل شوي يايب خلوف وعبدالله ولد عمي من المطااااار..واحين هو في البيت..
راشد: لا والله..؟؟؟ تستاهل سلامتهم..بنسير نسلم عليه عيل عقب في الليل..
حمدان: تمام... بس قولي انته شفيك مب عوايدك تكون هادي جذي.؟
راشد: مايحق للواحد يظايق شوي يعني..؟؟؟
حمدان: شو مستوي عليك تظايق..؟ ارمس..!!!
راشد: ماااااااااشي...قم خلنا نطلع...
حمدان: مابطلع اول ارمس..
تم راشد ساكت...مب عارف يخبره بسالفه الموظفه اللي عايبتنه واللي حطمت آماله اليوم او لا...؟!..
حمدان: حلفت عليك ياترمس....
راشد: ماحلفت...
حمدان: والله ترمس...الحين حلفت...
راشد: اووففف.. انزين انزين...همممم..كانت بنت عايبتني في الدوام من فتره كم اسبوع..هي تتنقب..وانا فكرت جديا اني اخطبها.. ويوم تعصصصرت وبالعافيه سالتها عن وضعها كيف مخطوبه والا لا..تخيل شو قالت لي..؟؟
حمدان: شو قالت..؟؟
راشد: قالت انا ارمله .وطلعني من بالك لاني مافكر بالزواج...
تم حمدان ساكت يتفكر بهالحظ النحس....
راشد: الواحد مايتخيل ولو للحظه بانها كانت متزوجه لانها صغيره..يمكن كبري او اصغر بسنه جي..
كان راشد اكبر من حمدان بسنتين... بس وايد متعلقين ببعض..
حمدان: هذا حظك بعد شو تسوي..انته ماحبيتها..
راشد: ماحبيتها لكن كانت فخاطري صدق... يعني يكفي اني فكرت فيها بشكل جدي وبغيت اخطبها...
حمدان: ربك كريم...البنات وايد والله....انزين انته عندك بنات وايد من هلك ليش ماتاخذ وحده منهن..؟؟
راشد: ماااريد اخذ من هلي...كل حد بيزعل بيقول شحقه ماخطب من عندنا...بطقع فيهم كلهم وبخذ من برااا خلهم يتظاربون رواحهم...
عايله راشد مافيها شباب وايد..اكثر شي فيها بنات.. حتى هو نفسه عنده خوات وايد... واخو واحد متزوج.. وفي هاللحظه كانت مريم اخت راشد اللي اصغر منه بسنتين لاصقه في الدريشه... مريم هذي تدرس في الجامعه... وتعرف حمدان بحكم انه ربيع اخوها العزيز...ودايما ايي بيتهم...واليوم بالصدفه سمعت اخوها يرمس وياه وفهمت من كلامه انه حمداان بييهم...ومريم يعيبها تراقب حمدان...ما تنكر انه يجنن طويل وعريض ورحيييم...وكان لافت انتباهها من سنين...بس هو مايدري حتى بوجوودها...وتموت من الظحك يوم يدخل حمدان يسلم على ام راشد ويقعد ينكت ويسولف وياها وكانت دخلاته ناادره......وايد كانت تستانس عليه...والحين واقفه عند الدريشه تترياه يطلع عشان تشوفه.... ويوم شافته قعدت تناقز وعيونها بتطلع من الدريشه...ويوم ركب سيارته الرنج وروح سكرت الستاره وصدت على وراها وتساندت على الدريشه وعلى ويهها نظرات حالمه..يتها اختها حنان اللي اصغر منها في ثاني ثانوي تقولها..
حنان: والله لو تشوفج امايه بتكفخج..انتي ماتيوزين.؟
مريم: آآآآآخ يخبلبي شكله وحركاته ياحنون... لو شفتيه توه وهو يظحك ويعطي رشود طراق..
وعظت على شفايفها مستانسه من الذكرى...
حنان: والله هو مب داري حتى انج موجوده في هالدنيا...
مريم: ادري..بس مصيره بيدري صدقيني...
حنان: والله انج خبله...
في بيت حمد الكتبي...الساعه 8 في الليل..اتصل عبدالله بخليفه بعد ما بدلوا بطاقاتهم مال التيلفون ببطاقاتهم الاولية مالت الامارات...وتخبره وين هوو...طلع خليفه في البيت وتوه قايم من الرقاد... قاله عبدالله انه بيييه البيت وبيسلم على الاهل وعنود....وسكر عنه... دخل تسبح وتلبس وتكشخ وشل اغراضه وطلع من الغرفه..يوم نزل تحت شاف ابوه يالس وماد ريله وتهمزه نوره وحصه يالسه عداله وحرمه ناصر حمده وعيالها...
سلم عليهم بشكل خطاااافي وقالهم انه بيسير بيت عمه...وطلع...يوم وصل بيت عمه حصل حمدان وربيعه راشد وخليفه وحميد يالسين في الميلس..
عبدالله: السسسسلام عليكم ...
الكل: وعليكم السلااااام والرحمه..
سلم عبدالله على حميد وعلى الباقين..ويلس...
حميد: هاااااااا ولد العم...شو الهبّااااات...
عبدالله: رقيييييييص الحمد لله...علومكم انتوا.؟
حميد: بخييييييير وسهاله...
راشد: شحالك عبدالله...؟؟؟
عبدالله: بخير الله يعافيك راشد شخبارك...؟؟
راشد: بنعمه...مبرووك التخرج..افتكيييتووا والله..
عبدالله: الله يبارك فيك..والله ياريال لاعت جبوودنا من بلاد الغربه...ماصدقنا نرد...
راشد: ومتى ناوي تعرس...؟؟
عبدالله: الود ودي باجر انا ههههههههه بس بعدنا بنتشاور ..مب مطول قريب...ان شاء الله..
خليفه: تبا تدخل تسلم عليهم انته..؟
عبدالله: هي والله..خبرتهم؟...
خليفه: هي قايللهم..يتريوونك..قم بوديك داخل لانه بنظهر عقب...تولهت عالحواطه...
نش خليفه مع عبدالله عشان يوديه يسلم عليهم داخل ..وقف عبدالله برا لين مايسويله خليفه درب ..لانه يخاف وحده من حريم العيال داخل...وعقب ردله ودخله على عمه وحرمته وسلم عليهم..ويلس وياهم ياخذ علومهم..عقب دخلوووه الميلس الصغير مال الحريم وخلوه ارووحه يتريا عنووود...وماطولت ..وبسبب غيابه الطويل كانت مستحيه مووووت منه...ويالله يالله تجدمت صوووبه ومدت ايدها تسلم عليه...
عبدالله: هلا والله بعنوووووودي انا....
عنود: هلا عبدالله...الحمد لله عالسلامه...
عبدالله: الله يسلمج غناتي..استريحي...
كان بعده ماسك ايدها ومب طايع يفجها..وهي منزله راسها ومبتسمه..يلست عالكرسي ويلس عدالها يتامل فويهها..
عبدالله: احلويتي والا هذا المستحى والا يتراوالي..؟!
عنود: يتراوالك....
عبدالله: الا حلويتي...شخبارج عنودي..؟
عنود: الحمد لله عبدالله شحالك انته.؟؟
عبدالله: متوله عشووفتج والله...
عنود: ههههههه والله حتى انا...
عبدالله: مبين تراه...اشوفج اطالعين ريووولج وايد معجبه فيها....
عنود: هههههههه حرام عليك..(رفعت عينها له)..بيظييت ويا راسك..
عبدالله: بس بعدني اسمر عنج..
عنود: رد اسمر مثل قبل...احلى..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك