رواية اموت واحيا بك -48
فطيم: احين بنسير..قومي تعالي وياي فوق ساعديني...
نشن ونوره حاطه ايدها على كتوف فطيم تواسيها وهي بروحها زعلانه لانها بتروح عن بيتهم...ركبن فوق وزقرن الخدامه تنزل الشنط.. تمت شنطه صغيره شلتها فاطمه..بينما نوره حظنت الدبدوب الكبير عشان تنزله.. مرت فاطمه على صالة عنود وين كانن قاعدات عنود وحصه..وسلمت عليهن وحظنتهن كانها مابتشوفهن ابدا بعد اليوم....نزلن معاها تحت... فجت فطيم باب الصاله ووايقت..شافها سعيد...
سعيد: تعالي سلمي على عمتج...
دخلت فطيم مستحيه من عبدالله..لكن عبدالله نش..
عبدالله: بسير اسويلك درب...
طلع عبدالله من الصاله وفطوم دخلت ولوت على عمتها...
ام خالد: فديتج يابنتي والله مب هاين عليه تروحين عنا..
فطيم: ولا انا ياعموه..بس السموحه منج..لازم اسير..لكني ان شاء الله مابقطعكم..
عبدالله برا كان واقف مع عنود وحصه..كلمهن شوي وقالهن يدخلن الصاله الصغيره..عشان سعيد بيطلع.. وعقب هو بروحه طلع ووقف عدال سياره سعيد..
ونورة غافلت عبدالله ودخلت الصاله تسلم على سعيد وهي بعدها حاظنه الدبدوب العود..شافها سعيد وابتسم..مب لها..على شكلها الطفولي..بينما نورة ابتسمت بدلع.. وهي لاويه عالدبدوب من راسه والباقي منه يطلوح تحت لانه كبير وايد...
نورة: شحالك سعيييييييد..؟!!
سعيد: بخير نورة شحالج انتي...
نورة: الحمد لله...
سعيد: فطوم وهذا لازم يسير وياج وين ماتروحين..؟؟
كان ياشر على دبدوب حمدان....
فطيم: هييييييييييييه ما ستغني عنه....
سعيد: انزين..يالله خلصي سلامات ولحقيني السياره... فمان الله عموه..شي فخاطرج؟
ام خالد: سلامتك ياولدي..عن السرعه..وسلم على اهلك...
سعيد: ان شاء الله..فمان الله...
مشى سعيد صوب نوره وين ماكانت واقفه عدال الباب وهو يبتسم لها..وقف عدالها شوي اونه يفتح الباب..
سعيد: ياحظه هالدبدوب...
ابتسمت نورة لتلميحه ونزلت عيونها..
سعيد: ابا املج...يالله عزمي عاد...
هزت نوره راسها "لا" ..عنادا فيه....
سعيد: ماعليه دواج عقب...
ظحكت نورة وهي بعدها منزله راسها..بينما سعيد طلع من الصاله وسار الحوش عند عبدالله جدام السياره...
سولفت شوي فطوم مع عمتها وسمعت توصياتها بخصوص السكن...وسلمت عليها وطلعت مع نورة للحوش... وصلتها نوره لين السياره وهي لابسه سعيد..منقهره منه لانه معزم يشل فطوم عنهم...ماصارت غلطه غلطتها يعاقبهم كلهم بهالطريقه القاسيه...
في نفس الوقت حمدان كان في البيت يالس في حجرته يدرس لامتحان باجر..يحاول يشرد من التفكير...من استوت سالفه فطوم وهو يدرس بلا قياس..بس عشان يشرد من التفكير..يدري ان سعيد حاليا متواجد في العين..وانه بيشل فطوم للشارجه ومن بعدها خلاص..مابتسكن هني...وكان يتالم لهالفكره..مايتخيل بيت عمه من دونها... صدق انه الواحد مايعرف قيمه الغالي عنده الا يوم يفارقه... من يوم حرموه من شوفه فطيم وهو يصبح ويمسي وهو يفكر فيها...وشو تسوي الحين...وشو حالتها..؟؟ ومتالمه لفكره فراقه او لا..؟؟ . قاطع تفكيره صياح التيلفون...مسكه وشاف الرقم رقم العين..رقم بيت..بس ماعرف الرقم...رد عليه..
حمدان: آآلووو..
مريم: ..اس...السلام ..عليكم....
حمدان: وعليكم السلام والرحمه...
عقد حمدان حياته ماتعرف على الصوت في حالته ذيج..لانه باله كان فمكان ثاني...
مريم: شحالك ؟
حمدان: بخير منو معاي..؟؟
مريم: انا مريم...
حمدان: منو مريم..؟؟
مريم: ....اخت راشد...
غمض حمدان عيونه منقهر....هذي وبعدين وياها..؟؟ مب كافي اللي صار بسبتها..؟؟؟ لو مب هي واتصالها ذاك جان ما اختلى بفطيم بذيج الطريقه عشان يشرحلها الي صار ..بالتالي مابيصير كل هذا...وبتكون الامور طبيعيه....لكن هي مصره تخرب حياته اكثر...
سكت عنها...
مريم: آآللوووو...!!
حمدان: يابنت الناس شو تبين فيني..؟؟ مب كافي اللي صار بسبتج..؟؟
مريم: ليش شووو صار..؟؟
حمدان: مايهم...ليش متصله انتي الحين.؟ شو تبين ..؟؟ وبعدين يالغبيه ليش متصله من تيلفون بيتكم..؟
مريم: انا فبيت ربيعتي مب في بيتنا...
حمدان: اهلا..تورطين ربيعتج بعد في الموضوع...
مريم: حمدان..انا فاهمه انك ماتباني...انا بس اتصلت لاني كنت اباك لنفسي..اسفه اذا سببت لك مشاكل..اتصلت اليوم عشان اتاكد اذا خبرت راشد باي شي..؟؟؟ عن اتصالي..؟؟
حمدان: ليش شو شايفتني..؟؟؟ ولد شوارع مايعرف السنع..؟؟
مريم: ماقلت انا جي...بس...بس راشد...راشد متغير علينا من كم يوم..وانا من زود خوفي تحسبتك خبرته بشي..
فكر حمدان....هو كان لاهي عن ربعه في الفتره الاخيره بسبب حادث اخوه وولد عمه وكل المشاكل..مافتكر ينتبه لراشد وحالته....او يسال عنه....
حمدان: لا ماقلت له شي ولا بقوله بعد..اطمني...وراشد اكيد في باله موضوع ثاني مب بسببكم..
مريم: الحمد لله...
حمدان:..... اوكي مع السلامه وياريت ماتتصليبي مره ثانيه بليز..
ماتريا حمدان ردها وسكر فويهها... هالبنت شو معدنها..؟؟؟... قسم بالله لو يدري راشد....بيجتلها بدون تفكير... هذا بعد شوفيه مظايق..؟؟؟ اوهووووووو ناقصين نحن مشاكل...
مسك تيلفونه مره ثانيه واتصل براشد...ولاحظ بروده في الكلام بس المهم عرف انه يالس في البيت...سكر عنه واتصل بواحد من ربعه اسمه خالد...
خالد: هلااااااااااااااااا بالمزاييين....
خالد هذا دوم يقول عن حمدان مزيون...يرفع معنوياته دوم..
حمدان: هلا والله خلود..شحالك؟؟
خالد: انا محظوظ لانك تلطفت عليه باتصال ...تعرف اني مغرم فيك من سنين..
حمدان: ههههههههه عنبو هالويه لك طب هالسوالف مالي مزاج...
خالد: ههههههه..شخباره سلطان؟؟ وولد عمك علومهم ربهم الا بخير..؟؟
حمدان: الحمد لله سلطان بعد يومين بيطلع من المستشفى...وناصر مستقره حالته في المانيا..يعالجونه علاج طبيعي..
خالد: الله يشفيهم..درست لامتحان باجر..؟؟
حمدان: درست نص الكميه...وانته..؟؟
خالد: انا مادرست والدليل اني شارد الحين وساير العين مول..ههههههههه..
حمدان: عنلااااااااتك ...هههههههه ويا منو ساير.؟؟
خالد: ويا قوم عزووز...
حمدان: اهااااا..وينك عن بيتنا؟؟ قريب والا بعيد؟؟
خالد: تباني اييك..؟؟
حمدان: ابا اسير عند راشد...خليفه محد في البيت مادريبه وين يحوط...
خالد: فالك طيب..احين بييك..
خطف خالد على حمدان وشله معاه وخطفه على بيت راشد وخلاه هناك وراح العين مول...
دخل حمدان الميلس وشاف راشد يالس اروحه يطالع التلفزيون...
حمدان: السسسسسسسسسسسسلام عليكم...
فز راشد من مكانه وسلم على حمدان..
راشد: وعليكم السلاااااااااااااااااااااااام والرحمه...هلا والله...
حمدان: وشحاااااااااااالك...
راشد: بخير وسهاله..علومك انته؟ ماقتلي انك بتي..
حمدان: سبرااااااااااااااااايز...
راشد: هههههههههههه سكر سكر حلجك..اخاف تدخل ذبابه فيه...
يلسوا عالكراسي..
حمدان: ههههههههه تتمناااه انته هالحلج...
راشد: شو اتمنى فيه بالله عليك... المهم منو يابك.؟؟
حمدان: يابني خلود..وسار العين مول..متواعد ويا قوم عزوز..الهرم شارد عن الدراسه..
راشد: قول لعمرك انته بعد شارد..
حمدان: عالاقل انا درست نص الكميه...المهم انته بلاك؟؟
راشد: بلايه..؟؟ مابلايه شي..!!!
حمدان: بلى فيك شي...مويم...مب مثل قبل...
تنهد راشد..
راشد: مظارب ويا امي...
حمدان: افااا...شو السبب...
راشد: اتفقت هي وابويه..وربعت ترمس قوم خالي..عشان تخطبلي بنتهم...
حمدان: مبرووووووووووووووووووووك...
اطالعه راشد بعصبيه...
راشد: عنبو هالويه لك....اقولك من دون شوري تقولي مبروك.؟؟ تشوفني انطنط من الفرحه يعني.؟؟؟
حمدان: هههههههههه ياريال هد اعصابك...الا رمسه حريم هي ماشي رسمي...
راشد: اللي قاهرني انه مب رمسه حريم....ابويه رمس خالي على طول والبنت موافقه ...
حمدان: هممممممممممم... وانته حاط وحده ثانيه فبالك..؟؟
راشد: لا..بس قايلك من قبل ماريد من العايله..
حمدان: شو بلاها البنت..؟؟؟
راشد: مافيها شي بالعكس الكل يمدح فيها من كل النواحي...
حمدان: والله انك بطراااااااان...حد محصل بنت زينه ومن اهله ويرفض..؟؟؟
راشد: انا ماريد من اهلي..مااااااااااااااااااريد من اهلي ياناس..
حمدان: راشد عن الدلع...اهلك يبون مصلحتك ويمكن هالبنت اللي الله كاتبنها لك ..وان شاء الله بترتاح معاها...
راشد: بالله عليك فيه عرس..طرف من اطرافه مغصوووب على هالعرس..ويستانسون بحياتهم..؟؟؟
حمدان: فيه وايد..احيانا الطرفين مغصووبين عالعرس وبعد يستانسون...انته بس وكل ربك..
راشد: لا اله الا الله.... بس انا مب مرتاح ياحمدان...احس انهم غشووووني...
حمدان: تشوفها انته البنت.؟؟
راشد: لا ماشفتها الا يوم هي صغيره من عدها مادري كيف شكلها...ولااعرف شي عنها غير عنها تدرس بالجامعه ويا اختي...
توتر حمدان من طاري هالاخت اللي وين مايسير يحصلها بدربه...
حمدان: انزين عيل كيف تحكم عليها وانته ماتعرف شي عنها...خلاص دامهم خطبوها لك حاول تتعرف على هالخطيبه يمكن تعيبك...واذا ما اتفقت معاها فجوا الخطبه بكل سهوله...
راشد: جي وين عايشين نحن؟؟ فمصر.؟؟؟ تعرف عليها اون... احين اكثر بيدسووونها عني وبيرفضون اي احتكاك لي معاها.. تعرفهم انته كيف..
حمدان: هههههههههه املج انزين وبتتعرف عليها...
راشد: هي ويطيح الفاس بالراس... عقب مايستوي فج خطبه يستوي طلاق...
حمدان: الله لا قاله ياريال شحقه تفاول على عمرك..
راشد: ماباها...ابا اخذ على مزاجي....
حمدان: قسم بالله انتوا عيال هالجيل خراطين...
راشد: لا تخليني ادعي عليك ان امك تخطبلك وحده عمرك ماشفتها وتبتلش فيها عشان تحس...
حمدان: لالالالالالالالالالالالالا دخيلك ..دخيل والديك لا تدعي علي بروحي مب ناقص مشاكل..
مر شهر على الحادث... والكل استقرت امووووره...
فطيم.. استقرت في السكن والحمد لله طلعت البنت اللي معاها بنت عرب وحشيم..تعرفت عليها فطيم وحبتها.. لكنها واجهت صعوبه في البدايه خصوصا بالنوم...مب قادره تستوعب المكان اللي هي فيه..لكنها شوي شوي تاقلمت..وكانت نورة تزورها يوميا وتيبلها كل الاخبار والعلوم مهما كانت تافهه...واذا صار وكان حمدان يالس في الصاله عندهم يسولف.تربع تتصل بفطيم وتسوي عمرها تكلم ربيعتها وتسمعها صوت حمدان وهو يتكلم مع حصه او مع الشايب او اين كان...المهم صوته وسوالفه..وكانت فطيم وايد تستانس من هالحركه... وتتصبر شوي..على فراق حمدان...
نورة كانت الايميلات بينها وبين سعيد شغاله خصوصا انه قلل زياراته بسبب فطوم الي في السكن..وماعنده اعذار وايد يسير العين..فكان مشغول بالتشييك على بيته المستقبلي.. وحياته روتينيه..
اما نوره كانت مخلصه امتحاناتها المنتصف...ونجحت فيهن كلهن ويابت علامات حلوه...
حصه... كانت دايما مع عنود..مستانسه بانها انتقلت عندهم في البيت...وجود عنود في البيت ساعد حصه على فهم شخصيه خليفه بشكل اكبر...لانه عنود دايما تتكلم عنه...وحصه بعد يوم يصيرلها موقف مع خليفه او تشوفه تخبر عنود بهالشي وتبدا عاد سوالفهن عنه...
اما بخصوص خليفه.. فكان ماشاء الله عليه يدخر جزء من معاشه عشان يكون له راس مال بنفسه..ويساعده وقت ما ينوي العرس..وكان دايما يسير بيت عمه وكل مايسير يصادف حصه...زاد حبه لهالبنت بشكل غير طبيعي...هداوتها ونعومتها تخبلبه...صدق هذي اللي يسمونها بنوته ... كان منقهر من قرارها بتاخير الملجه من الخاطر لانه يبا يتقرب منها...مازال يحس بانه حصه مب متقبلتنه كزوج..مايحس انها تحبه كفايه...
عبدالله وعنود....سمنه على عسل....
ناصر وخالد في الغربه.... خالد ماكان مقصر مع اخوه ابدا...ناصر كان متابع للعلاج الطبيعي... طبعا يتريون فقرات الظهر يرجعن مثل كانن ويقون شوي قبل مايشيلون المسامير بعمليه ثانيه له...
اتصالات الاهل وزوجته له وعيال عمه وربعه محد كان مقصر فيه... وخصوصا سلطان اللي من طلع من المستشفى وتشافى كليا..حجز تذكره لالمانيا وقعد مع ولد عمه اسبوعين...وبعدها رجع عسب الشركه... لكنه ما اطمن الا يوم سارله بنفسه وشافه واطمن على حالته المستقره ....
حمدان...راح المستشفى وفجوا الجبس عن ايده..وحطوا بدالها ربطه بسيطه عشان تشد العظم لا غير...وصار يقدر واخيييييييرا انه يسوق بنفسه ... وصار يقدر يروح ويرد بروحه متى مايبغي... حمدان مثل الطير...حرر..ويحب يتحرك بحريه وبمزاجه... مايحب ينحبس او يعتمد على احد بتنقلاته اللي ماتخلص...
واول ماسار سار لبيت عمه...وكان الوقت المغرب...دخل الميلس ماحصل حد فيه....سياره عبدالله محد..وشكله محد في البيت من الرياييل..لانه حتى سياره عمه البيك اب اللي يسيربها العزبه محد...دخل البيت ومن بعده الصاله وشاف نوره يالسه بروحها ترمس في التيلفون..دخل وسلم بصوت واطي يالله ينسمع ..عشان مايزعجها..ردت عليه هي بعد السلام بصوت واطي وايد...
حمدان: وينهم عيل..؟؟
اشرت نوره بصبعها لفوق...كانها تقوله انهم فوق...
عقد حمدان حياته واشر لها بايده .. " منو تكلمين"...
حركت نوره شفايفها وهي تبتسم وتقوله "فطوم"...
انتفض قلب حمدان من مكانه...صح انها مارمست بصوت عالي بس فهم حمدان انها تكلم فطوم...الشيخه فاطمه..حبيبة القلب والروح...
بدون حاسيه مد ايده وسحب السماعه من اذن نوره وحطها على اذنه...واول ماسمع صوت فطوم غمض عينه وتساند عالايدار اللي وراه..وايده وحده فمخباه...كان وايد متاثر بصوتها....متوله عليه شكثر... ونوره اطالعه وتبتسم ..وخلته ياخذ السماعه لانه كسر خاطرها..من متى ماسمع او شاف او عرف اي شي عن فطوم.. اكيد متوله عليها وايد وهالشي واضح من ويهه وتاثره بصوتها...
كانت فطيم ترمس وتقول سالفه لنوره عن استاذها الكمبيوتر اللي يسوي حركات..وهي كل شوي تظحك وهي تكمل سالفتها..وحمدان عاظ على شفايفه ويظحك معاها بصوت مكتوم...مستمتع بصوتها حاليا..واجل الغيره اللي بيحس فيها بسبب استاذ الكمبيوتر مال فطيم اللي يسوي حركات لبعدين..مب وقته يغار الحين.. احين هو متوله على فطيم...ويوم حس ان فطيم بتخلص سالفتها...رجع السماعه لنوره وراح الطرف الثاني من الصاله عند التلفزيون وهو يبتسم مستانس.. ونوره على طول حطت السماعه على اذنها..وسمعت فطيم..
فطيم: هههههههههههههههه..مينون والله انه هالاستاذ...
كملت نوره معاها على اساس اونها سمعت السالفه كامله...
نورة: ههههههههههههههههههههههاي هي والله انه خبل...
وكملت سوالف معاها شوي وسكرت... والتفتت لحمدان الي قاعد يشرب شاهي ويطالع التلفزيون..
نورة: هاااااااه.؟؟ بردت الدوده..؟؟؟
حمدان: ههههههههههه... شخبارها؟؟ مرتاحه في السكن..؟؟
نورة: مب مثل راحتها هني... لكن امشيييه حالها.. اللي معاها بنت حشيييم وبنت عرب يعني ان شاء الله ماعليها خوف...
حمدان: الحمد لله...هي متصله والاانتي؟
كان فعلا حمدان يحاتيها ويحاتي قعدتها مع بنات غرب.... لكن ان شاء الله انه ماعليها شر...وهي بنت لسانها اطول عنها يعني تقدر ادبر امورها...وهالشي اللي جذبه صوبها من الاساس...انها مب هينه...
نورة: لالا هي متصله....مبرووووووووك فجوا الجبس عنك...
حمدان: هييي..افتكيت منه..مانعني من كل شي... عيل وينهم؟؟ وين عبدالله؟
نورة: طلع العصر مع عنود.. وحصه فوق احيدها تتسبح..
حمدان: عمي مارد من عزبته... وامج.؟؟
نورة: امي سارت مع حرمه ناصر المستشفى..
حمدان: خير ان شاء الله..؟؟
نورة: هههههههههه ماشي...حامل ...
حمدان: هييييييي حليلها تستاهل...
نورة: هي..ناصر استانس وايد عالخبر...بسير ازقر حصه...
طلعت نورة من الصاله وخلت حمدان بروحه..اللي كان يراقبها وهي تطلع ..نش من مكانه وطلع راسه من الباب وتاكد من انها ركبت فوق..طار صوب التيلفون وشاف الكاشف..اخر رقم كان رقم فطيم...مسك تيلفونه ونقل الرقم بسرعه وخزنه ورجع لمكانه في الصاله...يكمل شرب شاهي بكل برود..ولاجنه سارق شي مهم من شوي....
نزلن بعدها حصه ونوره ...سولف معاهن شوي..وروح عند راشد.. اللي قرر من عقب محايل واقناع..انه يتقبل بنت خالته كزوجه له...شرط انه يملج قبل بوقت عشان يتعرف عليها ويتقبلها...واستانس حمدان لهالخبر وهذا يعني انه راشد بيطلع حصه من باله نهائيا..صح هي طلعت من باله من زمان..بس ماكان حاب حتى انه يفكر فيها مجرد تفكير...وكونه خاطب بنت ثانيه بينشغل فيها عن التفكير بحصه...
حصه من جهه ثانيه ملعوزه خليفه...طلعت لها بمنكر يديد...اون ماتبا تعرس الا يوم يرجع ناصر من المانيا...والكل يعرف انه شغله ناصر بطول وايد يمكن سنه وشي وهو مايقدر يصبر اكثر من جذي...كفايه اللي صبره من زمان... لكنه مايكون خليفه اذا سكت عنها ووافقها...
كان عند عمه في الصاله يرمسه في الموضوع...والعم بو خالد اقتنع بوجهة نظر خليفه وشافها عين الصواب...ناصر يمكن شغلته اطول وحرام يعطلون الريال اكثر من جذي..كفايه ان اختها الثانيه تترياها لين ماتعرس عشان هي تعرس من بعدها.. وفوق هذا مب زين يطولون الخطبه اكثر من جذي...
قام الشويبه وقال لعبدالله الي قاعد معاهم يزقر حصه..عشان يتفاهمون كلهم عالسالفه..لانه مافيه على عوار الراس ويتم مرسال بينهم يقول خليفه وتقول حصه..
دخلت حصه متردده ونظرتها خايفه..
حصه: السلام عليكم....
بو خالد+ خليفه: وعليكم السلام والرحمه...
بو خالد: تعالي بنتي يلسي...
عدلت حصه حجابها ويت صوب ابوها..وعبدالله من وراها سار ويلس في كرسي منفصل كانه عضو محايد..
حصه: شحالك خليفه..؟؟
خليفه: بخير حصه شحالج انتي..؟
حصه: الحمد لله...
يلست حصه عدال ابوها...
بو خالد: بنتي.... خليفه مستعيل عالعرس..شو قلتي.؟؟
تلفتت حصه ..تنقل نظراتها بين ويه ابوها الجامد وويه خليفه المتآمر... وعقدت حياتها..
حصه: اعرس وناصر محد ابويه..؟؟؟
بو خالد: ناصر يابنتي بيبطي في علاجه...
حصه: بترياه...
التفت بو خالد لخليفه..عشان يرمس...بينماخليفه عصب....بتترياه..؟؟؟ شو بعد هذي بترياه؟؟ كم يعني بتترياه لين متى..؟؟؟
خليفه: حصه تراج دلوعه الصراحه....كل مابغينا نسوي شي طلعتي بسبب واهي...ماله اي معنى...
حصه: احين يوم اني ابغي اخويه يفرح بعرسي صار بلامعنى..؟؟
خليفه: اخوج بيفرح لج سواء هني موجود والا اخر الدنيا....وانتي تعرفين انه بيتاخر في المانيا...
حصه: اوكي..ناصر محد .وخالد بعد محد..؟؟؟ منو بيحظر عيل من اخواني غير عبدالله..؟؟؟ منو بيزفك ياخليفه..؟؟
حصه كانت متوتره ومعصبه.... من حقها تطلب ان اخوانها يحظرون عرسها...اي بنت تبا اهلها حواليها في هاليوم...شو تسوي يعني اذا الظروف حكمت عليهم بالعكس..؟؟
خليفه: اذاعلى سالفة خالد...اقدر ادبرها لج..اي واحد من رباعه ناصر اللي حاشرينه يبون ايوونه بيسير اسبوع بيقعد معاه فيها..وخالد بيرجع يحظر العرس وبيرد لاخوه عقب...هذي بسيطه..
بو خالد: سمعيني ياحصه...ولد عمج عنده حق الصراحه... ونحن مانبا ناخر بالعرس...وانتي ماوراج شي لادراسه ولا شي...خلي عنج سوالف البنات هذي...وخلونا نحدد موعد العرس اول الصيف...بعد ماتسكر المدارس عشان اختج...
حصه كانت فعلا تبا ناصر يحظر عرسها...ما تتخيل عرسها واخوانها محد خصوصا ناصر...وكانت شوي وبتصيح على هالاستبداد...عندهاوجهة نظر...
حصه: بس انا جي مابستانس ابووويه....
سكت بو خالد ..وخليفه يطالع ويه حصه وهو مفوووول من العصبيه....وانجرح من الخاطر من كلامها...
خليفه: مابتستانسين..؟؟؟ احين وناستج استوت بوجود اخوج عندج بس..مب بسبب زواجج مني يعني.؟؟...الصراحه ياحصه انتي اصلا ماتبيني.. شكلج الا انغصبتي علي..وعمرج مابتستانسين لانج بتستوين حرمتي...اذا ماتبيني ماعليج الا تقولين هالشي ومايصير خاطرج الا طيب...
نش خليفه وهو معصب حده وطلع من الصاله ..وطلع معاه عبدالله من بعد ما اطالع حصه بنظرة تأنيب حاااره...
يتبع
_________________
وحصه نزلت راسها وعيونها مليانه دموع....
جرحت خليفه من دون قصد....والله من دون قصد..مب هذا قصدي...بس انا ابا اخواني معاي في العرس ...طلبي وايد يعني..؟؟؟
بو خالد: زين جي زعلتي ولد عمج..؟؟ مب زين عليج ياحصه....انتي عقلج اكبر من هالسوالف...والزواج مب لعبه تمشينها على كيفج..انتي وافقتي على خليفه من دون ما حد يضغط عليج...وبما انج قبلتيه زوج لج يعني خلاص ترضين فيه بكل الحالات....ان شاء الله اهلج كلهم مايوون عرسج المهم كلمه ريلج في الاخير...
قالت حصه باصرار..
حصه: اول بكلم ناصر ..وبشوفه متى بيررجع ..وبنشوف شو يصير...اسمحلي ابوويه...
طلعت هي بعد من الصاله وركبت حجرتها وهي حاز فخاطرها كلام خليفه صوبها...احين انا ما اباك..؟؟؟ حرام عليك والله.... ماشفت اللي فخاطري صوبك والا ماقلت جي...
خليفه جدام سيارته يسمع كلام عبدالله اللي قاعد يهديه...
عبدالله: ياريال هد اعصابك..
خليفه: بوي اختك ماتباني...واضح من البدايه انها ماتباني...
عبدالله: لا ماعليك الا دلع بنات...
خليفه: شودلع بنات ياعبدالله.... اولا حصه مب من النوع اللي بيدلع في موضوع مثل هذا.... اول بادي تاخرت اربع ايام في التفكير اذا توافق علي او لا...وعقب يوم قلنا بنملج قالت لا مابملج الا قبل العرس بكم يوم..مشيناها لها وراعينا ظروفها...وفهمنا موقفها...احين تقولي تريا سنه والا سنتين لين ما ايي اخوي من العلاج..؟؟؟؟ مب حاله هذي...
عبدالله: حصه وايد تحب ناصر انته بروحك تذكرها كيف كانت في المستشفى...وان شاء الله بتعرس في الصيف ماعليك من رمستها... خلها عليه..
خليفه: لا... انا كرامتي ماتسمحلي اخذ بنت مغصوبه علي ...
عبدالله: شووووو بلاك انته ؟؟ ليش منو نحن عشان نغصب اختنا على اي شخص..حتى لو ولد عمنا...
خليفه: انته ماكنت موجود اوكي..وماتعرف منو اللي غصبها علي..اكيد حد رص عليها من البدايه..
عبدالله: انا سالت...وهي بروحها خبرتني اصلا انها محد غصبها عليك وخذت راحتها بالتفكير..
خليفه: عيل تراجعت الحين... والا مابتحط بينا هالعراقيل كلها... رمس اختك بوي اذا ماتباني ترمس بنفج الخطبه بكل سهوله ...
عبدالله مظايق من موقف خليفه ومن موقف حصه اكثر....وهو اكثر واحد يعرف شكثر خليفه يحب حصه ويتمناها ..ويعرف ان جرحه الحين كبير.... وفعلا حصه مبينه للكل وخصوصا لخليفه انها ماتباه ومب متشجعه على اي ارتباط معاه...ليش تسوي جي؟ مع انه يدري من سوالف عنود عن حصه وخليفه انه حصه تباه من خاطرها ومستانسه بارتباطهم...
عبدالله: خلوف...حصه تباك..والله انها تباك ... السالفه مب متعقله فيك متعلقه بناصر بس..
خليفه: عيل نملج...
عبدالله: وليش هي رافضه الملجه..؟؟
خليفه: اون ماريد اكرر غلطه....شفت خريط اختك عاد..؟؟؟؟...بوي ودوووها عند طبيب نفسي مب صاحيه والله...
قال خليفه الجمله الاخيره بشكل مزح وهو يبتسم بسخريه...ظحك عبدالله..وصفع خليفه كف عالخفيف..
عبدالله: ههههههه لا تقول جي عن اختي... بنتفاهم معاها..
خليفه: قلت لك لا...ماريد حد يغصبها علي... بس قولها يقولج خليفه اذا ماتبينه رمسي....
عبدالله: افا...تهون عليك حصه تفج خطبتك عليها ياخلوف..؟؟؟
خليفه: ماتهون علي كرامتي ياعبدالله اني اخذ وحده ماتباني مهما كان حبي لها كبير...وهي تدري...والله انها تدري اني احبها بس جي تبا تلعب بي...
ابتسم عبدالله.. وتقرب من خليفه و باسه على خده بغلاااسه.. بس عشان يغير مزاجه النكدي هذا..وهو يدري بانه خليفه مايحب حد يلمسه... وفعلا دفره خلوف بعيد بنرفزه..
خليفه: اوهوووووو لصق...بوي حرمتك فوق روح بوس فيها مافيني عليك....
عبدالله: ههههههههه خلوف حبيبي انته... غير هالمزاج ماتهون علي اشوفك جي..
خليفه: خلني اسير البيت...
عبدالله: لا والله بتتعشى وياي...انا عازمنك...
خليفه: ماريد عزومتك بروح البيت تعبان...
عبدالله: عيل والله انته بتعزمني غصب...اركب...
خليفه: ويييين تباااااااا...؟؟؟
طنشه عبدالله وركب الكوبي وسكر الباب وراه...ابتسم خليفه وهز راسه..عبدالله هذا مينون...ركب السياره وطلع هو وعبدالله من البيت...
_________________
الجزء الرابع والستوووون
نص الليل دخل حمدان حجرته وهو يبتسم بخبث..فر تيلفونه عالشبريه وسار يتسبح...ويوم طلع وهو لابس وزار وفانيله انسدح عشبريته..برقده مريحه جدا...مسك تيلفونه ورد طلع رقم فطيم اللي خزنه بسرعه بارقام عشوائيه....وابتسم...وباس شاشه التيلفون مستانس انه حصل الرقم اخيرا..غير الاسم وحطه "الشيوخ" .. وفكر ..يطرش لها مسج؟؟ ..لالا...واذا عصبت بانه عنده الرقم..؟؟ شو بيسوي.؟؟..بعدين الوقت متاخر واكيد احين راقده فديتها...برايها اليوم..باجر بفكر شو اسوي....
حط التيلفون عداله عالطاوله وبند الليت ورقد...
حصه ذيج الليله مارامت ترقد..من تذكر رمسه خليفه وعدم تفهمه تحرقها عيونها...اخر شي توقعت منه انه يظلمها جي... احين انا ماباه؟؟...انا مابستانس من زواجي منه..؟؟؟ ..كيف اقدر افهمه وجهة نظري كيف..؟؟ .. كيف اتزوج واخوي مب حاظر عرسي..مايسلم علي..مايقولي مبروك ويتمنالي حياة موفقه..!!!...كيف.؟؟.. وهو اللي ماقصر معاي ووقف معاي فكل الحالات...اجازيه جذي..؟؟..شوفيها يعني اذا صبر له سنه او سنه ونص لين مايرجع ناصر لحالته ويقدر يرجع...مافيها شي...
انجلبت عالشبريه للطرف الثاني تحاول تحصل رقده مريحه..بس الشبريه صايره مزعجه اليوم على غير العاده... عقدت حصه حياتها وهي تفكر... باجر بكلم ناصر..بسويله تيلفون وبخبره باللي صار..وبساله متى بيرجع.. الكل يشوفني غلطانه ليش الله اعلم...
الساعه 12 وصل خليفه عبدالله البيت وطلع وسار بيتهم...كان عبدالله يحاول طول الليل يغير مزاج خليفه النكدي... اتاقلم معاه شوي وسولف لكن كان يحس دايما انه قلبه مجروح....شو بلاها حصه عليه كل ما بغا شي وقفت بحلجه ورفضت...عيل ليش وافقت عالزواج من الاساس يوم هي متردده فكل شي..!!..راقب سياره خليفه وهي تريوس وتطلع من البوابه...ودخل بعدها البيت وسكر الباب وراه ...دخل القسم...كانت عنود يالسه في الصاله بقميص نوم بطيخي...وفاتحه شعرها وشكلها فيها رقاد وهي اطالع التلفزيون...اطالعها عبدالله باعجاب وابتسم.. وسكر باب الصاله وراه..
عبدالله: ليش مارقدتي غناتي..؟؟
مشى صوبها...
عنود: وين كنت..؟؟؟
عبدالله: كنت مع خليفه...
عنود: وليش غالق تيلفونك..؟؟؟؟
عقد عبدالله حياته ويلس عدالها..
عبدالله: اوووووووه والله نسيت اني غالقنه....سوري عيوني..جان دقيتي على خليفه انزين...!!
عنود: مايا في بااااالي... وين سرتوا.؟؟
عبدالله: نحوط...خليفه مظايق شوي..
عق سفرته وفرها على الكرسي عداله..وانسدح عالكرسي اللي هو يالس فيه وحط راسه على ريولها...يتبزى عليها كالعاده...
عنود: شو بلاااااااه..؟؟
عبدالله: حصه مب طايعه تعرس...اون بتريا ناصر...والكل يعرف ان ناصر شغلته مطوله..سنه او سنه ونص ويمكن سنتين...لين متى بتصبر الريال؟؟ عيب عليها والله....جانه متعذب عشانها من متى وهي تدلع..
برطمت عنود وماعرفت فصف منو توقف...حصه ربيعتها واكثر من اختها...وخليفه اخوها...
عنود: وخليفه شو قال..؟؟
عبدالله: خليفه مينون..اون قولها اذا ماتبغيني ترمس بنفج الخطبه...
عنود: لااااااااا...مينون هذا..ماصدقنا على الله نحن...
عبدالله: اقولج عصب من الخاطر...رمسيها عنود...رمسي حصه اقنعيها...بتظيع الريال من ايدها بهالطريقه...منو يروم يصبر سنه او سنتين لين يعرس..؟؟ وانتي تعرفين كيف كانت حاله خليفه قبل...
عنود: بحاااول والله... تعشيت؟؟
عبدالله: هي تعشيت...لايكون انتي ماتعشيتي؟؟
عنود: انا تعشيت لكن خليت لك عشا خفتك تي مب متعشي..
عبدالله: تعشيت لكني يوعان...يوعان رقاد...قومي يالله شليني..
عنود: ههههههههههههه وين اروملك..؟؟
عبدالله: مالي خص انا دوم اشلج هالمره دورج...
تمت عنود تظحك... مب عارفه بشو اجاوبه..نش عبدالله وسحبها من ايدها ودخلوا الغرفه ينامون...
خليفه بعد ذيج الليله مارام يرقد...يفكر بموقف حصه من كل خطوه يحاول فيها يتقرب منها.... دايما تحط عراقيل بينهم...ياربي ليش انا منحوس جي...وبعدين وياها هالبنت متى ناويه تريحني..؟!...بوي برايها اذاماتبغيني وايد بنات يبني .... بخطب منهن اللي ابغيها... وماعليها غير انها تقول هالشي بس...
احين انا استويت اناني يوم اني ابغي اعرس... من متى وانا صابر.. بكمل سنه الحين من بديت احبها..وبعد تباني اصبر سنه والا سنتين زياده..؟؟؟؟ لا الصراحه وايد جذي وايد...محد يروم يتحمل...بس ماعليه السباله بتشوف...
غمض عينه بالغصب عشان يرقد...ومع كثرة الالحاح...استرخى فعلا ورقد...
بالباجر الساعه 9 ونص بعد العشا..رد حمدان على غير العاده للبيت من وقت...ودخل حجرته وسكر الباب ..عق ثيابه ويلس عالشبريه...مسك تيلفون وكتب مسج..
" عطيني رقم استاذج الكمبيوتر عشان العن خيره عن الحركات اللي يسوييهن لج.. حمدان " ..
وتردد قبل مايطرش..خايف من ردة فعلها...لكنه تشجع...اليوم الاثنين..واكيد فطيم في السكن الحين ومحد معاها..واذا عصبت..بتكون اول مره واخر مره يطرشلها...لانه مايبا المشاكل..لكن متوله عليها موت..ويبا اي طريقه يقدر يتواصل فيها معاها ولو بشكل مبسط وعلى فترات...المهم يقدر يطرشلها ويقولها اللي فخاطره... بدون وسيط..
تشجع وظرب ارسال...وراحت الرساله...وتم قلبه يدق بالقو بعدها...الانتظار صعب..
فطيم ساعتها كانت قاعده مع ربيعتها اللي ساكنه معاها في الغرفه..واسمها شمسه وهي من بوظبي...كانت فطيم تقرا مجله بعد ماخلصت دراسه..اما عن شمسه فكانت يالسه تتعشى وكل شوي تطلع تكلم وحده من البنات في نفس القسم..طبيعتها جي..ماكانت تقر مكان..مرحه وحبوبه..لكنها محترمه وحشيم..ولين الحين فطيم ماشافت منها شي غلط...ماعدى فضولها اللي يذبح...سمعت فطوم المسج ..وكان التيلفون عدالها ساعتها.. مدت ايدها ومسكت التيلفون...رسالة وارده..فتحتها وقرتها...على طول توترت انفاسها وارتجفت ايدها...حمدان..؟؟؟ شو هالمزحه الثقيله.... اكيد هاي نوروه تمزح...بس هالرقم اول مره اشوفه... مب رقم عمووه... يمكن رقم عبدالله اخوها والا شي..ماعليه انا اراويج..
" يالسباله يانوروه بلا مزح...طيحتي قلبي..تحيديني ماروم اصطلب يوم اسمع طاريه!!"
فز حمدان يوم سمع صوت المسج..صح كان يتوقعه فاي لحظه بس مع ذلك فز لانه كانت متوتر حده...مسك تيلفونه وقرا المسج... ابتسم...وبعدها ظحك...
" فديت قلبج... قسم بالله اني حمدان...ونوره ماتعرف عن هذا كله...خليه بينا...شحالج يالطويله؟".
قرت فطيم المسج وانصدمت...حمدان..!!..حمدااااااااااااان.... عرف رقمي وقاعد يطرشلي مسجات...لا ويقولي فديت قلبج بعد.؟؟؟ ياويلي بموت..كيف عرف كيييييييييف..؟؟؟....فرت فطيم التيلفون عدالها وعقدت ايديها حواليها كانها بردت فجأه...مع ان الجو دافي... وفكرت شوي بتعقل..
هو ذكر استاذ الكمبيوتر...وانا امس رمست نوره عن هالسالفه... هي خبرته.؟؟؟ والا ..والا هو سمعني بنفسه.؟؟ وااااااااااي يالفشله اكيد شل رقمي من الكاشف...حسبي الله عليج يانوره شحقه مامسحتيه..؟؟؟ ...لو مسحته مابيحصل رقمي...ولا بيطرشلي مسج..بس فعلا انا ابا هالشي والا لا.؟؟...مب كانه بروحي طالبه رقمه.؟؟..
ابتسمت...ورجعت مسكت التيلفون وقلبها يدق مثل الطبل...
" بخير..فاجأتني يالطويل...شحالك انته.؟؟.. وشحالها ايدك المكسوره.؟؟"
مسكت فطيم التيلفون بالقو بايديها الثنتين وهي متربعه على شبريتها الصغيره وعينها على دبدوب حمدان الكبير على زاويه الغرفه....ماتعرف اللي تسويه صح او غلط....ماتعرف.؟؟؟ اكيد تعرف...وهو غلط × غلط... بس هذا حمدان...وانا اشتقت لسوالفه....شو اسوي...الله بلاني فيه شو اسوي..!!!..
اما بخصوص حمدان...فارتاح شوي بما انها ماهزبته من اولها...وتسال عن حاله ومهتمه...بشاره زينه..
" انا بخير يوم اني قادر اكلمج....وايدي بخير الحين والجبس عقيته...فطيم...آسف بخصوص اللي صار بينا وسعيد..ماتتصورين شكثر متلوم.."
حن قلب فطيم عليه....لاول مره تتسائل برده فعل حمدان من السالفه..كانت مشغوله وايد بنفسها وبسعيد .. مافكرت بانه هالشي بياثر على حمدان بعد... قالت له بغلاسه..
" ندمت انك عرفتني فيوم صح.؟"
عصب حمدان..كيف تقول جي هذي...؟؟
" لا والله وعمري مابندم...انا ماكنت العب فطيم...وتوصلت لتفاهم مع سعيد بخصوص موضوعنا"
" شو هو التفاهم ممكن تقولي.؟"
" اكيد ..اقنعته اني احبج من خاطري...لكن بعد ما اتخرج واشتغل بيي وبخطبج ان شاء الله.."
قفطت فطيم وظحكت... واطالعتها شمسه باستغراب وهي تراقبها من الصبح لكن فطيم كانت فعالم ثاني..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك