رواية اموت واحيا بك -8
سعيد: سمحيلي ياخالوه هالشي غلط... هذيلا بنات مايتخلن رواحهن في المراكز... وخوله بنت خالتي ..واغار عليها... ومايرضيني اني اشوفها تطلع بهالطريقه .... خصوصا انها ماكانت متحجبه...وسمحيلي خالوه علىهالرمسه لكن انتي ادرى ببنتج وكيف تطلع من البيت..وانا مستغرب لانج ماتقوليلها شي... ومخلتنها على راحتها... بس انا ماروم اسكت.. لانه اللي يمسها يمسني ...وتهمني مصلحتها وسمعتها... بس اذا انتي تشوفيني غلطت بتصرفاتي السموحه منكم ومابدخل فيها ثاني مره... ولا جني اعرفها...
ام خوله: بارك الله فيك ياولدي... محشوم عن الغلط ولد هلال.... وماصار الا كل خير ان شاء الله... ادريبك تبا مصلحة البنت..
سعيد: يعني مب حاطه فخاطرج؟؟
ام خوله: لا فديتك..الله يرضى عليك ياربي..
سعيد: تسلمين خالوه..بترخص منج عيل انا مواعد ربيعي بسيرله...
ام خوله: مرخووص ياسعيد... خوله قومي وصلي سعيد لين الباب..
نشت خوله ونش سعيد وياها وطلعوا من البيت..في الحوش وقبل مايوصل الباب صد خوله..
سعيد: سمعي ياخوله.. انا ماخبرت خالوه عن سالفه الشباب اللي لاحقينكن لانها ماتهون عليه... بس هذا مب معناته اني متهاون بهالموضوع...
خوله: سعيد...والله العزيز ماعرفت من وين طلعت هالسياره..ولا ادري عنهم شي.. الا يوم وصلت البيت بس..
سعيد: انتي يمكن ماانتبهتي...بس هم اكيد انتبهولج دامج تطلعين الاسواق بهالشكل...
خوله: انا ماشوف فيها شي..ولا حد رمس على شكلي من قبل...احين يايين تقولولي.؟
سعيد: مارمسووج لانهم مستحين منج خوله... والا فيها واايد اصلا...مب الا شي... انتي مب بنت شوارع حسب ماذكر..
خوله: الله يسامحك على هالتسمية...
سعيد: الله يسامحنا جميع ....بس والله ياخوله لا تعتبرين مغازل الشباب لج اعجاب..تراهم الا يعتبرونج من هالبنات الخايسات....والا هم من داخل محتقرينج... صدقيني جمال البنت فحشمتها وسترها... احتفظي بجمالج وفتنج لريلج وبسس...
تمت خوله ساكته تفكر بكلام سعيد...
سعيد:المهم لا اتمين مظايقه... انا مااعتذر..لكني ابرر الموقف... اناعصبت ومحد يلومني... وانتي تستاهلين اللي ياج... وبعدين شو هذا..؟؟ انا ماقايل لج تحجبي حتى جدامي..؟؟ يالله لمي قصتج..
خوله: انزييييييييييييين...
عدلت شيلتها وتحجبت...
سعيد: توج حرمه... يالله ردي البيت لا تظهرين لين خاري... فمان الله..
خوله: الله وياك..
ركب سعيد سيارته وهو يحس بحمل انزاح عنه...اخيرا افتك من هالسالفه... ان شاء الله يطلع بنتايج عدله من عقب هالشي كله عاد..وتصطلح خوله وتتستر... شغل سياره ورجع تفكيره باتصال نوره وكلامه وياها .. وعلى طول احتلت افكاره وطردت أي شخص ثاني برا....
الجزء الحادي عشر
الاربعاء الساعه 12 ونص الظهر.. دخلت نورة على عبدالله اللي كان بعده راقد...
نورة: عبدالله... قوووووووووووم بسك من الرقاااد..
عبدالله: ....................... (يناخر)....
نورة: يالله يالرقااااد ..عبوووود قوم بسك يالله...
ومسكت جتفه وقامت تهزه عشان ينش....عبدالله يالله يالله بطل عيونه وهو مظايق..
عبدالله: هااااااااا بلاج..؟!..
نورة: قوم صل الظهر... بعدين بنتغدا وبنسير الشارجه وانته بعدك مازهبت اغراضك..
عبدالله: اففف منج..لي يقول عاد بسافر انا..الا كندورتين ووزار وفانيله وفوطه مايبالها...
نورة: المهم قوم صل...
خلته وطلعت عن حجرته ..نورة من اصبحت متنرفزه... ومتوتره... طبعا بسبب سيرة الشارجه.. عبدالله نش وتسبح وصلى الظهر في غرفته..ورد قعد عالشبرية يشوف منو متصل فيه ..وحصل 3 مكالمات وارده كلها من عند خليفه..طنشه وراح للرسائل وكتب رساله للعنود... تردد وايد قبل مايسويها بس عنود في باله من امس...وكتبلها " مرحبا عنودي انا عبدالله ..سوري لاني طرشت لج بس متوله عليج..واحب اقولج اني ساير الشارجه..شي في خاطرج؟"
عنود في هاللحظه كانت توها طالعه من كلاسها ووياها حصه.. وحست بالتلفون يهز في شنطتها... فتحت الشنطه وشافت التيلفون وعرفت ان المسج من عبدالله وارتبكت.. وردت خشت التيلفون في شنطتها..وسكتت..
حصه: مابتشوفين المسج؟!..
عنود: آآآ.. لا الا مالت الاتصالات اعلانات يسوون..حشرونا..
حصه: آآهااا...
كانن سايرات صوب الكافتيريا عشان يشربن شي بارد ويروحن البيت... اول ماوصلن الكافتيريا لفت عنود صوب حصه..
عنود: حصوووه سيري طلبي وانا بدش الحمام شوي اوكيك...؟
حصه: اوكي لاتبطين....
دخلت عنود الحمام وحمدت ربها يوم حصلته فاظي... طلعت تيلفونها وفتحت المسج...قرتها واستانست انه عبادي متوله عليها...على طول ردت عليه بالمسج..
" اشتاقتلك العافيه يارب...ومابغي غير سلامتك عبدالله..دير بالك على نفسك بس."
وطرشت المسج واغلقت التيلفون وردت لحصه...
خلصن شرب العصير وركبن الباص وراحن الرسبشن.. حصه كان الدريول يترياها..اما عنود فكل اربعاء يمر عليها حمدان لانه يكون طالع من الكلية ويمر عليها يشلها...
في الطريج صوب الشارجه...
عبدالله: حصووه حاطه فبالج مكان معين بتسيرين له ؟!..والا بتحوطينا فدبي كلها؟..
حصه: مكان واحد..مركز المنال اكيد بحصل عندهم اشياء حلوه..
عيدالله: مركز بعد؟ الله يعينا...
نورة: برايها الواحد مايتخرج كل يوم...
عبدالله: بسم الله كيف نطت فحلوجنا..ماقلنا شي...لكن بسيرتكن فوتن عليه سيرة البدع ويا الشباب ولعب بالدراجات...
ام خالد: هيييييييي والا هاي خدمتك؟..احسن يوم ظيعنا عليك..ماباك تلعب بالدراجات انا وتتكسرلي.
عبدالله: يالله يامااايا شو اتكسر بعد ياهل انا...
ام خالد: صك الدعنه...لعب بالدراجات ماشي يالله...
حصه ظحكت ونورة اللي كانت قاعده ورا اخووها لصقت في اذنه من الصوب الثاني عشان ماتسمعها امها...
نورة: روح بدون ماتقولها ..والله وناسه اللعب بالدراجات ..
عبدالله: وحياتج الاسبوع الياي بسير العب...وبصورلج بعد..
نورة: توك تعجبني ...يالله سوقبنا عدل ماريد اوصل متكسره الشارجه..
وكملوا درب الشارجه كله سوالف ...نورة كانت كل ماتتقرب من الشارجه اكثر يعورها بطنها اكثر...كيف بتجابل سعيد عقب الرمسه اللي دارت بينهم امس؟..لين الحين قافطه والله...معقوله كان بيعترف لها بحبه وهي قالت له لا يقول؟!!!...لو قالها هالكلمه وهي هناك جدامه شو بتسوي؟؟... الله يستر..سعيد طول عمره متهور...
وصلوا بيت خالهم وكان ماباقي شي عن صلاة العصر.. نزلوا كلهم واول من دخل ام خالد..ووراها حصه ونوره واخر شي عبدالله عشان مايصادف حد من بنات خاله ويقفط منهن...اول حد تلقالهم ام فيصل مع عليا...
ام فيصل: مرحبا مرحباا الساع..ياحيالله ام خالد وعيالها...
ام خالد: السلااام عليج ام فيصل..الله يحييج ياربي..
ام فيصل: وعليج السلام الغاليه ..يامرحبا والله توه نور البيت...
ام خالد: منور بوجودكم يام فيصل ..شحالكم ربكم الا بخير؟
وتوايهن وسلمن على بعض.. وعقب يت عليا وسلمت على امها...
عليا: مرحبااا والله بالغااااليه..فديت امايه انا..شحالج فديتج..؟
ام خالد: هلا حبيبتي..بخير فديتج شحالج انتي امايه؟..وشحال عيالج والصغيروني؟
عليا: بخير وعافيه والله متولهين عليكم ..
ين البنات وسلمن على ام فيصل وعقب عليا...عبدالله كان واقف ورا وقافط...
ام فيصل: مرحبا ولدي اقرب ابوويه...شحالك عبدالله..؟
عبدالله: بخير خالوه شحالج انتي...؟
ام فيصل: بخير ولدي..ياحيالله عبدالله..اقرب في الميلس...
يت عليا ووايهن اخوها...
عليا: فديتك ياربي عبود بعدني ماشبعت منك...شحالك؟
عبدالله: بخير علياا شحالج انتي.؟؟ وتشتاقلج العافيه يارب...
دخل عبدالله الميلس ويلس ..حصل الشاي والقهوه والفواله موطايه..صب لعمره شاهي وقعد يشرب ويطالع التلفزيون...البنات وامهن دخلن الصالة..ويت سلامه بنت عليا الصغيره تربع صوب يدتها..
سلامه: امايه ..امايه ....
ام خالد: هلا والله ببنتي ..فديتج انا
شلتها ام خالد وحبتها ولوت عليها... ويلسوا كلهن في الصالة..
عليا: قومي عن امج سلامه خليها ترتاح شوي....
ام خالد: براايها فديتها انا...
بعد مايلسوا شوي يت شيخه مع منى ومنال وسلموا عليهم ويلسوا وياهم بعد..
ام خالد: عليا عيل وين فيصل؟
عليا: يتسبح امايه..بعد شوي بياذن ...
ام خالد: وهلال راقد اظني مثل ماتعود...!
ام فيصل: هي والله بس بسير اوعيه بعد شوي للصلاة...
صدت نورة صوب منال اللي لاصقه فيها من يت...
نورة: وين فطوم عيل؟
منال: راقده فطوم...كله ترقد هذي..
نورة: اختج هذي ماتستحي..قومي بنسير نوعيها..
ظحكت منال ونشت ويا نورة...
عليا: نورة وين تبين..؟
نورة: بسير اوعي فطيم..قاهرتني كل ماني نحصلها راقده..خاطري مره تستقبل..
ام فيصل: ههههههههه عندج اياها... خليها تنش..
نورة: بطفربها ...
مسكت نورة ايد منال وسارت وياها برا الصالة ..ركبن الدري ووصلن فوق وهن يسولفن.. مرت نورة عدال غرفه سعيد وقلبها يدق.. اكيد انه داخل.. وقفت جدام غرفه فطوم ويوم حاولت تفتح الباب حصلته مقفول..
نورة: اختج مسودة الويه قافله..جنها الا تدريبي اني بييها..
منال: دقي عليها....
تمت نورة ادق الباب... بشكل غلس...دق متواصل وماتوقف عشان صدق فطوم تعصب...بس بعد فتره عيزت ونست انها تتعامل ويا فطوم...مدمنه رقاد...يوم ترقد جنها ميته..
نورة: فطووووووووووووم...فطووووم مسودة الويه...
منال: هههههههه مابتنش ....
نورة: حشى شو حاطه فذنيها ...قطن؟!
سعيد كان في هاللحظه في غرفته... طالع متسبح وتلبس وقعد يتسفر جدام المنظرة اللي عدال باب غرفته من داخل... وسمع صوت نورة... بطل عيونه وهو مب مصدق.. عقب هز راسه وهو على باله انه يتراواله... وكمل تسفيرته...بس بعد شوي رد سمعها..
نورة: فطوووووووووم ان مانشيتي ترا احين برد العين...
هالمره سعيد صدق اذنيه واللي قاعد يسمعه... وفي خاطره يقول : لاااا...وصلوا بهالسرعه..!!!!...
على طول شل تيلفونه وبوكه وحطهن فمخباه وبطل الباب شوي شوي.....وشاف نورة تظحك ويا منال ويعلقن على فطوم اللي بطلت الباب وكشتها طايره وعيونها مغمضه وفوق هذا تبتسم بشكل يظحك.. تم سعيد يراقبها وهو بعده ماطلع من حجرته... وهن ماانتبهن له لانهن كانن مشغولات بفطوم
نورة: عنبو هالكشه لج يالرقاده..صدق شمس الشارقه...!
فطوم: اوووووووووه انتي المزعجه ليش ييتي الحين.؟؟ عنبوا مارمتوا تاخرون لين العصر؟
نورة: مسودة الويه مب يايه عشان سواد عيونج انا..
فطوم: عيل علشان سوا عيون منوو يوم مب عشاني؟
نورة: اولا عيونهم مب سودا... لو تموتين ماتحصلين عيونهم انتي..
فطوم: هي هي انزين درينا..
نورة: ههههههههههههاي خسج الله ..
..وقعد سعيد يتفداها ويبتسم على ظحكتها...نورة وهي تظحك ماانتبهت وطاحت شيلتها على جتفها.. انصدم سعيد وبطل عيونه... من كملت نورة 15 سنه ماشاف شعره من راسها.. استحى سعيد على ويهه ورد داخل غرفته وسكر الباب... أي واحد غيرة يحب وحده وصارت له فرصه انه يشوف شعرها مابيتردد انه يشوف... بس سعيد من زود الحب اللي فقلبه صوبها..كان يحشمها ويحترمها... تم واقف عند بابه لين ماسمع الاصوات اختفت..رد طلع وحصل الممر فاظي... اكيد دخلن حجرة فطوم.. كان سعيد مب في حاله..يتنفس بسرعه وقلبه مب طبيعي... كان يمشي صوب حجرة فطوم بدون مايحس... حد يدينه واسند راسه على الباب..وغمض عيونه... كان وده يدخل داخل ويشوفها ويرمسها... ليتج يانورة خليتيني اقولها امس...هالكلمه اللي خاطره يقولها من سنين ومب متجرأ .. ويوم يته الجرأة منعته...ليش؟؟؟.. ابتعد عن الباب شوي..ماعليه..بشوفها اكيد عقب...سمع الاذان ياذن ..ذكر ربه ونزل عشان يسير المسيد... يوم نزل تحت كانت شيخه طالعه من الصالة ...
شيخه: هاا نشيت؟.. قوم عمووه هني... وعبدالله ترا في الميلس ارووحه..
سعيد: ماعليه بسيرله احين...
راح صوب باب الصالة ودقه..
سعيد: هووووووود...
ام فيصل: هدااا..اقرب ابويه محد غريب..
تحجبت حصه عن سعيد وعدلت عباتها ..دخل سعيد وسلم عليهم وسلم على عمته...
سعيد: شحالج عمووه...حيالله هل العيين...
ام خالد: بخير ابويه شحالج انته...الله يحييك ياربي...
سعيد: بخير الله يعافيج عمووه... (صد صوب حصه) .. حصه شحالج؟
حصه: بخير الله يعافيك سعيد..شحالك انته؟
سعيد: بخير الله يسلمج.... اترخص منكم انا بمر على عبدالله.. وبسير المسيد ..
ام خالد: مسموح فديتك..
طلع سعيد من الصالة وحصل فيصل ويايه معاه عليا..
فيصل: ساير المسيد سعيد؟
سعيد: هي والله ..بمر على عبدالله في الميلس...وعقب بنسير..
فيصل: انا بدش بسلم على عموه وبلحقكم في الميلس...
سعيد: ماعليه...
طلع سعيد ودش فيصل الصالة....سار سعيد صوب الميلس ودخل حصل عبدالله طالع من حمام الميلس وهو متوضي..
سعيد: مرحباا الساع..هلا والله براعي امريكا..
عبدالله: هلا والله سعووود... خشششششمك....
توايهوا وهم يظاحكون...
سعيد: شحالك يارياال... علوووووووومك؟
عبدالله: ياخي جب... ماصدقت توصلنا العين وغبت مره وحده..واونك عاد بييكم بييكم..امحق ولا ييتنا ولا سمعنا عنك...
سعيد: ههههههههه السموحه منك... قسم بالله انشغلت..خلاص خلال الاسبوع الياي بييكم ان شاء الله.والا اخر الاسبوع..
دخل فيصل في هاللحظه وسلم على عبدالله..وطلعوا رباعه سايرين المسيد اللي عدال البيت...بعد ماصلوا ردوا الميلس وقعدوا يسولفون ويتفاولون...وسعيد قلبه داخل البيت... مب قادر يندمج بالسوالف..خاطره يدش ويسلم عليها بس وين..!!...طبعا مايقدر...
نورة ومنال وفطوم صلن العصر ونزلن عند باقي الحريم... وكان خال نورة هلال يالس ويا اخته ويسولف وياها... سلمت عليه نورة ويلست عداله..ومر اليوم بشكل طبيعي وعادي جدا...الشباب في الميلس..والحريم في الصالة يسولفن ويخربطن...يوم يت الساعه 11.. نشت ام خالد واستسمحت منهن وسارت ترقد في غرفة الضيوف... ولحقتها حصه لانها تعبانه بسبب انها كانت مداومه الصبح ولا رقدت.. ام فيصل وشيبتها وعليا بعد كلهم ساروا يرقدون..تموا سعيد وعبدالله في الميلس سهرانين... ونورة ويا شيخه وفطوم ومنال ومنى...في الصالة...
شيخه: انا بسير عنكن..سوالفكن ماتخلص..نورة مابتقومين ترقدين؟
نورة: جانكم بترقدون عني بقوم برقد..مابتم اروحي سويحره في الصالة...!!
فطوم: انا مابرقد احينه..شاريه فلم هندي جان تبين اطالعينه يالله.. بنسير الصالة الفوقانية احسن..
نورة: غايته...يالله..
نشن كلهن وسارن فوق...شيخه دخلت حجرتهاعنهن عشان ترقد..اما الباقي تسدحن في الصالة اللي في الطابق الثاني ويلسن يطالعن الفلم ويشربن بيبسي وياكلن مكسرات...
على الساعه 1 في الليل خلص الفلم ..منى ومنال دخلن حجرتهن على طول رقدن... تمت فطوم ونورة..
نورة: فطوم كم باقي عن اجازتكم قبل الامتحانات؟
فطوم: ياختي ماشي الا اسبوعين وبناجز عقب عشان الامتحانات..
نورة: الله يوفقج ان شاء الله...احين انتي امره قررتي على الجامعه؟
فطوم: ان شاء الله..ياختي ابا ادش الكلية اليديده هذي مالت المعلومات...
نورة: هييي..تمام والله.... رمستي خالي هلال عشان سالفة السكن؟
فطوم: لااااااااااا تو الناااس عن هالرمسه..عقب يوم بتظهر نتيجتي للثانوية برمسه...
نورة: احس انه مابيطيع...
فطوم: ماعليج بقردنه... بقوله يجربني سنه على الاقل اذا شاف مني شي غلط والا انا مارتحت يعني بحول للسكن..مب مشكله...
نورة: ان شاء الله يوافق... قومي يابوج بنرقد..
فطوم: ويا ويهج تعالي رقدي وياي...
نورة: شنطتي تحت..
فطوم: مب مشكله بنيبها لج..
نورة: لالا..انتي سيري طلعيلي فراش وانا بنزل بييب شنطتي وبقول لامايه اني برقد عندج وبييج...
فطوم: تمام عيل..
راحت فطوم حجرتها ونزلت نورة تحت...اول ماوصلت تحت حصلت عبدالله داش البيت بروحه وشال شنطته
عبدالله: بعدج واعيه؟؟..شو تسوين؟
نورة: كنا نطالع فلم انا والبنات..احين بسير اييب شنطتي وبسير ارقد عندها... وانته وين بترقد..
عبدالله: سعيد يقول في حجرته فارشيلي.. بنات خالج واعيات؟ سيري سويلي درب..
نورة: لا محد واعي بس فطوم سارت حجرتها اطلعلي فراش.. سير برايك...
عبدالله: اووكي..
ركب عبدالله الدري وسار فوق ونورة راحت لغرفة الضيوف وين راقدات امها واختها... دخلت الحجرة وحصلتهن راقدات وماحبت تزعجهن... شلت شنطتها الصغيرة وشنطة ثيابها وطلعت .. يوم وصلت عند دري البيت دش سعيد وكان بعده ماشافها..لف صوب باب الصالة وقفله ويوم صد يبا يبند الليت شاف نورة اللي كانت واقفه جدام الدري وهي متيبسه وويهها محمر ومب رايمه تتنفس...كانت عيونها معلقه بعيونه ..وعلى ويوههم نفس التعبير...نورة ماكانت تعرف شو تقول او شو تسوي وكيف تتصرف....بس سعيد كان اقوى منها وسيطر على الموقف..
سعيد: هلا والله نورة... شحالج؟
وكانت على ويهه ابتسامه حلوه خفيفه...لكن تعبير عيونه غطى على كل شي...
نورة: احم..هلا سعييـــد... انا بخير انته شحالك؟
سعيد: الحمد لله... نورة ليش مارقدتي لين احين..؟
قال هالكلام وهويمشي صوبها لين ماوقف جدامها وهو يلعب بالسويج في يديه..
نورة: آآآ,,, احين بسير ارقد...عند فطوم ...امبونا سهرانين نطالع فلم... هممم عبدالله فوق فحجرتك..
سعيد: هيي.. انا قايله يروح فوق لين ماقفل البيبان ...
نزل عيونه وشاف الشنطه في يديها. ابتسم وهو يمد ايده..
سعيد: هاتيها عنج ...
نورة: لالا برااايها والله خفيفه..
سعيد: نوروووه....هاتيها...
تمت نورة قافطه وعطته الشنطه ..
سعيد: توج... صبري ببند الليت ..
بند سعيد الليتات ورد لنورة واشر لها عشان تركب قبله... ركبت نورة وهي قافطه..والله شكلهم شبهه..بس ماتروم تقول لسعيد لا... حتى سعيد حس بنفس الشعور..لو طلع عبدالله من حجرته احين وشاف اخته وياه.؟..شو بيفكر وشو بيسوي..؟ بس بما انه ويا نورة احين ومحد وياهم..ماهتم لشي ....
سعيد: فكرتي بهدية لبشارتج الحلوه.؟؟
نورة: هههههه صدقت انته.. لا مشكوور مابغي شي..
سعيد: خلاص عيل بييبلج على ذوقي..
نورة: سعيد... صدق لا تيب شي..
سعيد: نورة.... جــــــــــــب
نورة: هههههههههه ماعليه انزين
وصلوا الصالة الفوقانية ووقف سعيد يطالع غراش البيبسي والمكسرات والخياس في الصالة... وصد صوب نورة...
سعيد: منو شارب هالبيبسي كله؟
نورة: نحن..البنات..
سعيد: خواتي خبايل...بس نوروه اظن قايلج قبل سنتين لا تشربين بيبسي...
نورة: ماشاء الله حسبتهن بعد قبل سنتين..؟؟!. هههههههه.. والله فطوم تيب واستحي اقولها مابا.. والا انا هناك في البيت ماشرب..
سعيد: بنازعها بعدني فطوم...
نورة: ههههههه لا حليلها..
وقاطعها سعيد وهو يحط صبعه السبابه جدام شفايفه بما معناه " اسكتي"... ويوم سكتت..قال سعيد..
سعيد: اخاف عبدالله يسمعنا..
سكتت نوره وهي اطالعه.. وهو يطالعها...
تم يرمس بصوت واطي...
سعيد: نورة... اخاف باجر ماتصير لي فرصه اشوفج...
سكتت نورة وماقالت شي.. كانت تحس ان سعيد شي في خاطره..والصراحه سعيد في هاللحظه حس بظيج.. لين متى يعني بيتم يشوفها بالسر بهالطريقه وفي السنه حسنه بس...وشعور ثاني مايدري شو هو بالضبط..
سعيد: ساكته...!!.. بس مع ذلك احس انج مابتخليني اقول شي اليوم بعد..
ابتسمت نورة وحست باحراج.. وهزت راسها كانها تقول "لا" ...ويوم تم ساكت حست انه حط بخاطره..
نورة: سعيــــــد.... مافي داعي تقول شي انا اعرفه...
استانس سعيد...
سعيد: شووو عليج.... انتي تعرفين... انا اللي مسكين ماعرف...
ظحكت نورة شوي شوي.. ومدت ايدها تاخذ شنطتها من عنده..
نورة: لو فكرت شوي...بتعرف...تصبح على خير سعيد..
مات سعيد من الفرحه...شو تقصد.؟؟؟... تحبني؟؟... والا شوو بالضبط...!!.. ياربي ماصدق..
سعيد: وانتي من اهل الخير نورة...
دخلت نورة غرفة فطوم وسار سعيد صوب غرفته عند عبدالله...
الجزء الثاني عشر
يوم الخميس الساعه 10 الصبح.. دخلت حصه الصالة وحصلت امها وخالها وحرمه خالها وعليا ووياها هلال الصغيرة وسلامه... سلمت عليهم كلهم ويلست حذال امها... ام فيصل كانت تتكلم في التيلفون مع اختها... والباقي يسولفون ويتريقون رباعه..
عليا: حصه اصبلج شاهي.؟
حصه: خلي عنج بصب ارووحي...
بعد ماصبت لها شاهي ..
حصه: امايه وين عبدالله؟
ام خالد: في الميلس يتريق ويا سعيد وفيصل...
حصه: متى تبينا نسير؟..الساعه عشر احين..هبابنا نخلص..
عليا: وين بتسيرون؟
ام خالد: اختج تبا تتشرا قطع حق فستان تخرجها..
عليا: هييي..زين والله....من وين بتشترين؟
حصه: بسير مركز المنال..يمكن احصل شي حلوو..
عليا: نورة بتسير وياكم؟
حصه: والله مادريبها... هااا امايه اسير البس عباتي والا بعدج؟
ام خالد: لا لا..قومي لبسي عباتج وهاتي عباتي وياج...
في هاللحظه سكرت ام فيصل عن اختها...وسمعتهم يطرون السيرة..
ام فيصل: ويدي..!!!.. وين بسييرووون؟
ام خالد: بنسير السوق ام فيصل.. بودي حصه تتشرا قطع..
ام فيصل: لااااه..؟ شقايل انتي بتسيرين واختي يايتنج...سمعت انج في الشارجه قالت يايتنكم في الطريج..
ام خالد: حلييلها ام خوله من زمااان عنها والله... خلاص عيل بنترياها...
بطلت حصه عيونها ولصقت في امها تصاصرها...
حصه: اماااااااايه...شو هذا بعد بنترياها.؟؟؟ ماشي وقت.. لاتسوين هالحركات فيني احين...
ام خالد: يابنتي فظيحه نجفي بالحرمه يايه تزورنا ونحن نروح عنها...
حصه: والحل يعني؟؟ مااسير؟
ام خالد: سيري انتي واخوج وانا بعطيج فلوس عشان تشترين اللي تبينه...
حصه: هييي اذا جي اووكي...يالله اتصلي بعبدالله وخبريه..
في هاللحظه دخلت نوره معاها فاطمه والبنات منى ومنال..
نورة : السسسلام عليكم جميعاااا...
الكل: وعليكم السلام..
يت نورة ووايهت علىامها وحبت خالها على راسه..ويلست عداله... نورة تمووت في خالها هلال...ويعيبها تسمع سوالفه...
نورة: شحالك خاااالي؟؟..شو اصبحت؟
بو فيصل: بخير بنتي ..شحالج انتي؟
نورة: الحمد لله...(وصدت صوب حصه) حصووه سمعتج تقولين خبري عبدالله..شو تخبره؟ شوفيكم؟
حصه: ماشي امايه مابتسير ويايه ..بسير انا وعبدالله بس...
نورة: اهاااااااااااااااا زين والله...
فاطمه: وين بتسيرين حصه؟
حصه: بسير اشتري قطعه لفستان التخرج..
فاطمه بطلت عيونها وشافتها فرررصه..
فاطمه: حللللللللفي؟؟... ( وصدت صوب ابووها) ابوووووووووويه..فديتك انا بسير وياهم..؟
بو فيصل: شو عندج من الشغل تسيرين؟؟!!..والا بس هوامه..!!
فاطمه: لا والله ابوويه . جي انا بعد ماشريت قطعه لفستان تخرجي.. بيسوون حفله في مدرستنا والبنات بيتكشخن وانا بعدني مافصلت لي شي...باخذلي قطعه كاشخه بس بسيطه..فديت رووحك انا..
بو فيصل: وقته هذا انتي بعد؟؟؟ وين بتتلصقين وياهم؟...بنت عمتج اخووها بيوديها...
فاطمه: ابويه سعيييد بيوديني وياهم.... دخيلك لا تقول لا... مابتصيرلي فرصه حد يوديني عقب...
بو فيصل: زين فكينا من حشرتج... ام فيصل عطيها بيزات هذي سدي حلجها...
فاطمه: فديييييييييييتك انا يعلني ماخلى منك ياربي...
وهوت على راس ابوها وحبته...
فاطمه: نورة تعالي ويانا...
ام خالد: لالا ..مالها حايه ماتسير...
نورة: فطوم امبوونه انا مالي بارض عالسووق والمشي..خليني يالسه ابركلي...
ام فيصل: سيري حجرتي بتحصلين البوك في التواليت.. خذيلج بيزات ...
فاطمه: ان شاء الله امايه...
حصه: انا بعد بسير اتلبس... امايه اتصلي بعبدالله خبريييه...
ام خالد: احين بتصلبه..
الشباب في الميلس عبدالله وسعيد بعد ماترخص عنهم فيصل وسار يودي سيارته الوكاله... دق تيلفون عبدالله ورد عليه..
عبدالله: مررررررررحبا العيووز
ام خالد: هلا ابووويه...يالسين في الميلس؟
عبدالله: هي نعم...شو فخاطرج؟
ام خالد: اباك تودي اختك السوووق..
عبدالله: وانتي؟
ام خالد: انا حرمه بتي تسلم عليه ماروم اجفييبها...وفاطمه بعد تبا تسير وياكم..
عبدالله: حياها الله...
ام خالد: لا خالك يقول يوديها سعيد وياكم...
عبدالله ظحك وهو يطالع سعيد..وقاله " ورطووك ويانا انته بعد" ...
عبدالله: خلاص تمام امايه خليها تجهز انا هني بترياها..
ام خالد: خلاص ابوويه..الله يحفظك .. وهاا عن لخبال انته وسعيد ويا البنات..
عبدالله: افا عليج امايه..شو يهاال نحن؟
ام خالد: محشووم ياولدي بس اوصيك ...
عبدالله: لا توصين حريص... يالله فمان الله
ام خالد: مع السلامه .
سكر عبدالله تيلفونه ..
سعيد: شو بلاها عموه...؟
عبدالله: ماشي..توصي.. تباني اودي حصه السوق..واختك بعد تبا تسير عشان جي قال خالي لازم تي انته ويانا بعد..
سعيد: منو من خواتي؟
عبدالله: فاطمه..
سعيد: ييييييييييييييييييه يا هذي... يبالها ظرب عن هالسوق...
عبدالله: خللها برايها دامها وياك ماعليها شر... وبعدين صراحه ابا اغير جوو انا وماريد اسير اروحي ويا حصووه..
سعيد: همممم مب مشكله...واحين وينهن هن؟
عبدالله: بيتلبسن عبيهن وبيين....
وبعد دقايق طلعوا الاربعه فسياره سعيد صوب دبي..وسعيد متحسف لان نورة مب وياهم.. وفي البيت وصلت اخت ام فيصل " ام خوله" وطبعا وياها بنتها خوله... دخلن الصالة وسلمن على الموجودين ( ام فيصل وام خالد ونورة وعليا وعيالها وشيخه ومنى ومنال) .. نورة من زمااان ماشافت خوله..وما اندمجت وياها وايد ..واللي تعرفه عنها اشياء بسيطه...وبعد السلامات يلست خوله عدال نورة..
خوله: شحالج يانوورة..؟ وين من زماااان ماشفنااج..
نورة: والله شو نسوي نحن بعد بالغصب نحصل فرصه وني الشارجه..شخبارج انتي؟ شو دخلتي من الجامعات؟
خوله: جامعة الشارجه..
نورة: هيي ياحيج والله...ما انخطبتي؟
خوله: ههههههههههه لا ..اترياهم يعزموووون...والا انا واثقه..
استغربت نورة من كلام خوله ...
نورة: ههههههههه شو هاي بعد اترياهم يعزمون؟ يعني انخطبتي والا لا؟
خوله: همممممم رسميا لا....بس احس انه بيستوي قريب..
خوله من النوع الواثق من نفسه بغروور..كانت تفكر ساعتها بسعيد وهي تشوف نفسها الانسب له وانه بيخطبها قريب لا محاله.... وخصوصا بعد الموقف الاخير اللي اعتبرته ارضاءا لغرورها..انه غيييره من قبل سعيد عليها...ونورة مسكينه على نياتها ماعرفت شو تقصد وماحبت تدخل...
نورة: هيي..ماشاء الله..بالبركه عيل.. الله يوفقج.
خوله: الجميع ان شاء الله...اقولج..نسير حجرة فطيم..ابا ابدل عباتي والبس شيلة بيظا...
نورة: يالله..
سارت نوره مع خوله فوق وتموا الباقي تحت...يوم وصلوا غرفه فطوم...قالت خوله..
خوله: اكييد راقده الطويله...
ودخلت الغرفه واستغربت...فاظيه...
خوله: وييينها فطوم؟
نورة: سارت السوووق ويا حصه وعبدالله اخويه وسعيد...
رفعت خوله حواجبها وهي تعق شيلتها وعبالتها وتعلقهم في الكبت...
خوله: معقووووووووووله ؟؟؟
نورة: شو اللي معقووله؟
يلست خوله على الشبرية وسكرت نورة باب الغرفه ويلست وياها...
خوله: معقووله سعيد يودي فطووم السوق؟
نورة فز قلبها لطاري سعيد...
نورة: ليش لا؟؟..اخوها...
خوله: بس من بعد الموقف الاخير صراحه ماتوقعت انه يخليها تطلع من البيت...
نورة: خيبه..!!..ليش شو مستوي بينهم؟؟ ماحد خبرني شي...
خوله: ياختي سعيد وايد يغااااار... وورط فطوم المسكينه في السالفه..
بطلت نورة عيونها.... كانت حاسه انه السالفه فيها ان... بس مابتخلي خوله الا يوم اطلع منها كل العلووم اللي ماتدري عنها...
نورة: سعيد يغار؟؟؟ يغار على منوووو؟
رفعت خوله حواجبها بتكبر... كانها مستغربه من هالسؤال...
خوله: يغار عليه... على منو يعني بيغار؟..
بهتت نورة كان حد صافعنها طراق قوي.... سعيد.... سعيد حبيبي انا ...يغار على خوله..!!!!!!؟؟؟؟ ليش؟؟ شو تعنيله هي عشان يغار عليها ؟ تمالكت نورة اعصابها وحاولت تخلي ملامح ويهها طبيعية... نورة صحيح انها حساسه..بس قوية في مواجهة المواقف الصعبه عليها...
نورة: خوله خبريني السالفه من اول...
خوله: الله يسلمج تواعدنا انا ونورة نسير السوق ويا امايه..ويوم اتجهزنا حصلنا امايه تعبانه وقالت مافييني اسير وسيرن انتن رواحكن...شلينا نحن البشكاره والدريول ورحنا السوق...وانا اصلا ماتعودت اني اتغشى ..فطوم تنقبت بس انا كان ويهي مكشوف...المهم يوم ردينا شافني سعيد اني بلا غشوه..اول شي نازع فطوم..بس النزاع اللي ياها مايسوى شي عند النزاع اللي ياني انا...والله زعلت وسرت بيتنا اصيح...وامبوني حالفه ماطب هالبيت..لكن اول امس يا واستسمح مني وراضاني وقالي انا اغار عليج ووانا وانا ومادري اشوو ومن هالكلام... المهم ردولي اعتباري..وعقب عاده خذ مني وعد اني ماكشف ويهي جدام غريب.. وانا طاوعته ماروم اتم زعلانه عليه وارفض له طلب.... هذا سعييد...غيير...
نورة كان يبل طاح على راسها... حست بالقهر...بالغضب... وبالغيره... كانت تقدر تذبح خوله في هاللحظه...بس خوله ماتهمها هي...اللي يهمها سعيد....كيف سعيد يسوي فيها جي كييف؟؟؟ امس بس واللي قبله كان بيقولها انه يحبها وهي اللي منعته...شو يعني هالكلام؟؟ يلعب عليها؟؟؟... يوم يشوفها يسوي نفسه يحبها ومن تروح يلعب بذييله مع بنت خالته؟؟.... لا ياربي لاااا... شو سويت انا عشان انصدم فاغلى انسان عندي....يارب ارحمني وبين لي ان كل هالخبر جذب ...سعيد مايسويها ..مستحيل يقص عليه انا...
انتبهت خوله ان ملامح نورة تغيرت...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك