رواية ما ادري القاها من جرح القرايب والا عذاب الاحباب -4
بالمليون ونص هذي ان شاء الله اني بسوي اشياء ماحد يتوقعها وانت بنفسك راح تسمع اخبار تسرك
وتسعدك ان شاء الله ويمكن اكون منافس لكم ماحد يدري
سكت شوي ثم كمل بس ياترى انتم وقتها بتكونون بقوتكم هذي وتنافسون ولا بيساعدونكم عيالكم اللي
الى الان ماعندهم اي خلفيات عن التجاره بس يااخوي انت واعمامي خذوها نصيحة مني تراني احبكم
علموا عيالكم التجاره بكره راح نتنافس بالمليون والنص يلا سلام ياقاربي
بعد ماطلع فيصل الكل ظل ساكت ماحد يتكلم من بعد كلامه
فيصل اول ماخرج طالع بجواله حصل 19 مكالمه لاخته غلا طاح قلبه لما شاف رقمها واتصل عليها
غلا اول ماردت وهي تصيح :فيصل ليه مارديت من اول اتصل عليك
فيصل :كان على الصامت وانا مع ناس مادريت عنك
غلا : فيصل الله يخليك تعال لي السوق سرعه الله يخليك
فيصل وهو ميت خوف من سمع صوتها : غلا حبيبتي ايش فيك فيه احد صاير له شي لاسمح الله انتي
صاير لك شي
يتكلم وهو راكب السياره وحرك بسرعه
غلا : لا ليته كل اللي معي ميتن ولا صار معي اللي صار
فيصل حس انه اللي معها ضايقوها : خلاص وانا اخوك دقايق وانا عندك
غلا تبكي وهي جالسه على جنب باسوق وجالسه على الارض ولامه ركبتها لصدرها : فيصل اسرع
>>> بصوت متقطع : اا انــ ـا خـــ ا اا يــفــه
فيصل : افا عاد تخافين واخوك فيصل خلاص هذا انا قريب منك ايش فيك انا
غلا : فيصل الله يخليك الله يخليك لاتتاخر لو جلست اكثر من كذا بموت
فيصل بخوف : بعيد الشر ان شاء الله يلا حبيبتي شوي وانا عندك سلام
وقفل من عندها
اما في قصر سلطان بعد ماخرج فيصل وسكتوا شوي
الكل خاف من كلام فيصل بالذات انه صح
سعود مايقل عصبية عن سلطان : قال ايش فروع وشركات ههه هذا انجن
سلطان معصب ومقهور مع انه مو اي شي يخليه مقهور بالشكل هذا : سعود مجنون انت فيصل
ماتوقعته كذا فيصل مانجن فيصل طلع داهيه على بالك من موت الوالد فيصل جايب كلام من راسه
فيصل صادق بكل حرف
كلهم صاروا يناظرون بسلطان
كمل سلطان : فيصل اثره من زمان كان حاسب كل الاموال والحلال دام تكلم بعدد الشركات بعد موت
الوالد وفوق هذا كله طلع يعرف حتى الشركات اللي برا فيصل بيوصل لنا رساله ماحد فهمها غيري
محمد بخوف : وش هي رسالته ؟
سلطان : فيصل كانه يقول تراني صاحي لكم وتراني مو مقتنع بهذا المبلغ
سعود : وايش الجديد كلنا عارفين انه فيصل مو مقتنع انه هذا مو حقه بس مجبور لانه لو ماخذه ماراح
يحصل شي
سلطان : لا ياحبيبي لو دققت بكل حرف يقوله فيصل كان عرفت مقصده وايش الجديد اللي عنده بالذات
لما تكلم عن عيالنا وعن الكبر وعن عدد الشركات
سكت شوي
سعود : سلطان تكلم كمل
سلطان : فيصل كانه يقول لنا انه عارف كل شي من حقه واننا وقت يوقف فيصل على رجوله زين بعد
سنين حنا مانكون مثل اول وانه عيالنا بيشاركونا بقرارتنا وانه ناوي يسترد كل شي كان له
سيف اخيرا تكلم بكل خوف : سلطان انت وش قاعد تقول مستحيل فيصل يفكر لبعيد بالطريقه هذي
سلطان : لامومستحيل بعد ماسمعت كلام فيصل
سعود : والحل يعني نخليه يكبر ويسوي اللي برأسه ؟
سلطان : لا طبعا لازم اذا حاول يكبر من نفسه حنا نرجع نصغره ثاني لكن بعد هذي الجلسة مع فيصل
طلع اشياء كثيره ماكنت اعرفها عنه فيصل اصلا ماراح يعطينا وقت نحاربه فيصل مخطط يسوي كل
شي وقريب مره راح يضرب كم ضربة بالسوق تقومه
سعود : سلطان حنا نعتمد عليك بالشي هذا فيصل اعرف ايش وراه وخله يرجع على بساط الفقر ثاني
سلطان : ياخوفي انه فيصل يتوقع مننا انا نبحث وراه ويلعب من تحت لتتحت
سيف : لالا عاد سلطان بديت اخاف انا من فيصل هذا ايش اللي من تحت لتحت يعني بالله بمليون
ونص يحارب مليارات
سلطان : مليون ونص وعقل يابابا لكن من الحين ورايح لازم اشوف اخباره واعرف وين واراقبه
واعرف نية فيصل
محمد يضحك والكل مستغرب منه
سعود : شكل الشايب مخرف
محمد : لامخرف ولاشي بس فيصل يذكرني بسلطان لكن الفرق بينهم انه فيصل عشان حقه وعلى هذا
فيصل ساعدته الدنيا واللي صار له انه يفكر بطريقة اعمق من سلطان
سلطان راح فكره بعيد بعد ماسمع كلام محمد وعرف انه صح وانه لازم يحتاط من فيصل وصار يتكلم
بينه وبين نفسه : فيصل لازم انهيه لازم تكون نهايته في هذي الحياه على يدي
سعود : لو ماعطيته الفلوس وريحتنا من كل هذا
سلطان : مجنون انت انا قبل مايجي قعدت افهم فيكم ساعه انا ليه بعطيه الفلوس بالاخير ترجع ثاني
تقول ليه سعود فيصل حتى لو ذكي لكن يظل صغير واحنا بنعرف كل صغيره وكبيره وننهيه لكن المصيبه
لو ماعطيناه شي اكيد مابيدنا شي وبنضيع اشياء كثيره
بالسوق احمد واقف مع البنات يدورون غلا الا شيخة اللي اتصلت على سواقها عشان يوديها بيتها
احمد : الحين كيف تسوون هذا كله فيها المسكينه لا وكله كوم وشيخه اخر وحده توقعتها تسويها
الهنوف : وانت ليه تدافع عنها لايكون بس خطيبتك وانا مادري
احمد : لاخطيبتي ولايحزنون اصلا لو هي خطيبتي فيه احد يترجا يمد يده والله لاكسرها انا حتى
ماعرف شكلها بس اللي سويتوه مو قليل وماحد يرضاه
شيماء كانها فرحت وهي تشوف غلا جنب السوق بعد ماطلعوا يدورونها برا : شوفها احمد هناك
اتجه لها احمد واول مارفعت راسها انصدم م عيونها وحس انها سحرته رغم انها باكيه وعيونها مليانه
حزن في نفسه يقول لااله الا الله هذا صدق بشر ايش الزين هذا كله
غلا تناظره وبصوت متقطع من البكا : ايش تبي ؟
احمد : ها انا احمد انتي ليه جالسه كذا قومي معي
قامت غلا وعطته ظهرها وهي بتمشي لانها ماتبي احد يشوفها بالمنظر هذا بس ماخذت بالها انه البنات
ورا احمد
احمد : وقفي انا ماقلت قومي الله يهديك عشان تمشين
غلا : اتوقع مو من الذوق توقف بنات الناس وانت غريب عنهم وتقول هيا معي انا اخوي الحين بيجي
انا كلمته
احمد : بس انا ماني غريب عنك انا ولد عمك احمد ولد سيف ايش فيك اخو شيماء
غلا من سمعت هذا الكلام كانها نار شبت بداخلها لفت عليه : تخسي انت واهلك كلهم انا مايشرفني
يكون لي عم حرامي واكل حقوق الناس
احمد عصب لكن حب يمسك اعصابه : غلا الله يهديك ايش هذا الكلام انتــي
قاطعته الهنوف من وراه : انت ايش تبي فيها تراضيها خليها تولي هذا مقامها هنا
شيماء وهي معصبه من الهنوف : الهنوف كل اللي صار من ورا راسك خلاص فكينا واللي يرحم
والديك
الهنوف : بسكت مابتكلم >> وحطت يدها على فمها
غلا وهي تبتسم ابتسامه سخريه : لاماقصرتي ياشيماء سكيتها جزاك الله خير
احمد : غلا الله يخليك ماله داعي هذا الكلام ويلا مشينا
غلا : لا ماشاء الله شيخوه هذي العجوز ماقصرت وجايبه اخوك يغلق الباقي
احمد بدا يفقد اعصابه : غلا شيخه مو اصغر عيالك وبعدين تكلمي عنها باحترام
غلا : هذا اسلوبي عاجبك عاجبك مو عاجبك بالطقاق
احمد : طيب اطلعي معنا انا اوصلك
غلا : قلت اخوي بيجيني هنا
ناظرتهم كلهم : ماشاء الله شيخوه مو معكم وين راحت لايكون ارتفع عليها الضغط ولاالسكر
احمد : قلت لك مليون مره احترمي نفسك ولاتتكلمين عن شيخه بالطريقه هذي واذا عن اخوك خلاص
انا بنتظر وبوقف جنبك الين يجي احد ياخذك
الهنوف خلاص معاد قدرت تقفل فمها بالذات بعد ماجاتها فرصه انها تجرح غلا ثاني : ايوا صادق ايش
يعرفنا انه اخوك يمكن لاسمح الله
غلا تكلمت بااعلى صوتها : بس انتي وياه بس انا شرف منك ياحيوانه انا اشرف منكم كلكم ياكلاب
ياحراميه ياعيال الحراميه ياللي تاكلون مال الايتام ياللي ماتخافون الله كلكم كذا انتم واهلكم مافيكم
ولا واحد طيب
أحمد معصب على الاخر مسكها مع يدها وجرها والناس تناظر فيهم والي يقول مين تصير له واللي
يصيح عليه يفكها وقف : هذي زوجتي ماتربت وبربيها انا من جديد احد عنده كلمه ولو سمحتوا كل
واحد يورينا عرض اكتافه
الكل مشى بعد كلام أحمد وظل يجرها للسياره
فجأه جا فيصل ومسك يده وفكها عن غلا وهو في قمة عصبيته لانه فيصل ممكن يتحمل اي شي الا غلا
اول مابعد يد احمد مسك احمد من وراه مع ثوبه ورماه على السياره باقوى ماعنده
احمد طلع من فمه دم لانه ضرب وجهه بالسياره والناس رجعت تتجمهر ثاني ( لانها العاده عندنا اي
مشكله تلقى الناس والعالم حول الحدث ) اما شيماء راحت لاخوها على طول لانها خافت عليه
شيماء : احمد فيك شي
احمد يتكلم وهو حاس بشوية دوخه : لالا مافيني الا العافيه وسكت بيحاول يستوعب الي صار
فيصل دار ظهره لاخته غلا : غلا وانا اخوك ايش فيك وليه كل هذي الدموع علميني بالي صار
غلا ماتحملت وحضنت فيصل قدام الناس الحاظره فيصل حس بشوية احراج بالذات والناس تناظرهم
وهي تشاهق : ضربوني يافيصل
فيصل : ايش فيكم الحين حولنا كل واحد يورينا عرض كتافه خلاص فضوها ولعاد اشوف اي واحد هنا
بعد ماراحوا الناس من حولهم واحمد جالس على الارض وحاس بشووية دوخهمو قادر يوقف على
رجوله
فيصل وخر غلا من حضنه : غلا حبيبتي من اللي ضربك ووين ضربوك
فيصل زاد غيضه
فيصل : طيب من ضربك منهم
غلا توجه يدها نحو الهنوف على اساس انها هي اللي ضربتها
فيصل : على بالكم ماحد ياخذ حقها ؟
كلهم ساكتين والهنوف بعد عصبية فيصل خايفه يضربها كف مثل ماضربت غلا
فيصل : الحين بتاخذين حقك منهم
الهنوف زاد خوفها اكثر
فيصل يناظر بغلا : ردي لها الكف الحين قدامي
الهنوف لما سمعت يقول لغلا تضربها تلاشى كل الخوف لانها اللي تعرفه عن غلا ماتستقوي تسويهاا
ابتسمت الهنوف : مين انتي تضربيني كف انتي جبانه انتي اضعــ
جاها كف من غلا خلاها تسكت معاد تتكلم بحرف واحد
الكل مو مصدق انه غلا تضرب الهنوف كف بالذات لانها وقفت قدامها ثواني على بالهم غلا خافت مع
انه غلا تحس انها كل ماوقفت اكثر يزداد حقدها على الهنوف وتحس انه قوتها تزيد
فيصل ناظرها وهو مبتسم : ها مين الثانييه اللي مدت يدها عليك ؟
غلا : شيخه
فيصل ظل ساكت ثواني ماتوقع شيخه تسويها بس بنفس الوقت هذي اخته فوق كل اعتبار : وين شيخه؟
ليلى مو مصدقه اللي تشوفه : ليه ايش تبي فيها ؟
فيصل : ابي اختي تاخذ حقها
ظلوا ساكتين من كلام فيصل
احمد بغى يتكلم لكن قال خليني اسكت افضل بالذات وهو حاس بدوخه وبعد ماعرف ان شيخه راحت مع
سواقها
شيماء : راحت مع سواقها
فيصل قبل مايمشي شاف سيارة شرطه وظل ينادي لحد ماجات السياره
الشرطي : نعم اخوي خير ؟
فيصل : ابغى ابلغ عن محاولة اختطاف
كلهم فتحوا عيونهم على الاخر
الشرطي : نعم اخوي ؟؟
فيصل : عملية اختطااف
الشرطي طلب من فيصل بطاقتة وبلغ بالجهاز انهم يجيبون فرقه
الشرطي ا: لحين بتوصل الفرقه
الشرطي : انت متأكد من اللي تقوله وعندك دليل ؟
فيصل : ايه انا سمعتهم باذني يحاول يخطفها وقايل للناس انها زوجته واكيد تلقى احد من المتجمهرين
الحين كان حاظر الحادثه من اولها وبيشهد معي ( فيصل كان يجري من بعيد وهو يجري يسمع بعض
الكلام اللي يدور بينهن )
الشرطي : ياجماعه اللي كان حاظر وحاب يشهد يجي الله يعطيكم العافيه
الكل مكانه ماحد تقدم
فيصل : ياناس ايش فيكم واقفين خلوني اول مره في حياتي اايد الناس اللي توقف وتتجمهر وتشاهد
الحدث ياناس هذا الرجال بغى يخطف اختي وانتم شايفينه وبعدين ماحد يرضى هذي على احد من اهله
اهلكم يمكن بأي وقت يتعرضون لمثل هذي الحاله او احد من قرايبكم او احبابكم اوقفوا مع الحق يمكن
بكره هذا الشي يشفع لاحد من اهلكم انه يتعرض لمثل هذا الموقف
الناس حركها شوي كلام فيصل وكم واحد تقدم للشرطي على اساس انه يشهد مع فيصل
راح الشرطي للقسم ومعه احمد وكم شخص من الشهود
وفيصل راح يسيارته واخذ معه غلا
وشيماء كانت تبكي على اخوها وتقول ان اللي صار كله من الهنوف
سيف اول ماعرف انه احمد بالقسم اخذ ماجد وراح لهم
بهنا يكون انتهى البارت الرابع
الان نبي توقعاتكم للبارت الجاي
ياترى على ايش ناوي يوسف بطلبه الغريب لحمد ؟
وش ممكن يصير لفيصل بعد عملته مع احمد وتقديم بلاغ عنه بمحاولة اختطاف ؟
هل الهنوف بتسكت عن غلا بعد الكف ؟
شيخة وموقفها بعد اللي سوته ؟
انتظروني بالبارت الخامس ان شاء الله يوم الخميس القادم
البارت الخامس
اه ياحزن قلبي الشديد.... ياحزن قلبي
احس بأنفاسي تختنق ودها تنفجر
بركان في صدري بينطلق بس ماهو قادر بيحترق
كل الناس تتغير الا انا زي ماانا
ودي لو مره وحده اتغير واصير شخص ثاني
شخص غير اللي اشوفه بداخلي
الحياه من حولي صعبه ....
ماهي مثل تفكيري ولامثل احساسي
كل شي عكسي يجي يفاجئني بجهلي
اشوف بعيني انكساري ....
اقصى احلامي صارت ممزوجه بيأسي
ليت انا مو انا ليت قلبي مو بقلبي
كان فهمت مين انا ؟؟
وليش عنواني العنا ؟؟
وليش الدروب تمشي بعكسي او يمكن انا اللي عكسها؟
يمكن اللي حولي يفهموني غلط ودايما يخيب فيني ظنهم
بس والله ماقصدت بلحظه اخيب ظنونهم اواخلي الهم يسكن صدرهم
مدري يمكن تقولو اني عجيب..وان كلامي شي غريب
بس مهما اكتب ماظني حبين وش كثر قلبي بريئ
عمره مافكر بيوم يقسى او حتى يصير فيه شي من الغموض
رغم ذلك كل من عرفني يشهد ان لي من الغموض كون واسع
مهما حاول كل من حاول يقرب لا مايستحمله
رغم اني بإحساسي انوي اكون فأوضح حالاتي
اااه مدري وش احكي عن معاناتتي وضعفي
رغم علو صوت ضحكتي
تعادلها نبرة صرختي ...
ومدري لو اصرخ بوفي حق اللي بقلبي من وحدتي
ومدري ترى وش اللي ابغى ووش مرادي ومنيتي
ودي ابكي ودي افرح ودي احكي ودي امزح
بس بعالم لونه زهري سماه فضي وارضه بيضا
بعالم الصوت خالي من الشماته ومن النكران ومن النذاله
عالم مايعرف دموع ولاكذب ....
كله احلام ورديه براءة طفله ولمسة حنيه
نور جالسه بالغرفه تصارع الوحده اللي فرضتهاا عليها الحياه تصارع الظروف وتصارع اليأس
: اااااه من همي اللي عايشه فيه ليه يايبى تركتني لوحدي ياترى انتي عايشه يمى
ولا ميته ( اول ماقالت كلمتها هذي دمعت عيونها وكانها خايفه بيوم من الايام يضيع
حنان الام اللي من ولدت وهي تدوره ) لا ان شاء الله عايشه يعني انا راميني هنا بس
لاني بنت اجنبيه لكن انا وبعدين مع عيشى الفقر اللي انا عايشه فيه من انتهي منها
من اعيش حياة عز وكرامه من ابتعد عن جاسم حسبي الله عليه انا مو كاسر ظهري
الا امه اللي ربتني من صغري لكن انا حاسه اني مو قادره اتحمل اكثر من كذا مو
قادره الحياه هذي حسها تخنقني احسها تذبحني
الهنوف دخلت بيتهم وصكت باب البيت باقوى ماعندها
امها اول ماسمعت صوت الباب نزلت من غرفتها تشوف ايش صاير
نوال : من اللي صحك الباب بالشكل هذا ؟
ليلى تاشر على الهنوف لانها ماتبي تحتك معها وهي بقمة عصبيتها
نوال : الهنوف ايش فيك ايش صاير عليك ؟
الهنوف : والله والله لاخليها تدفع الثمن غالي والله لاجيب سيرتها بكل لسان والله اني لاجيب راسها بالتراب ولاماكون الهنوف
نوال : منه اللي بتسوين معها هذا كله ؟
الهنوف وهي تحك خدها من القهر : غلا الحيوانه
نوال : زين ايش سوت غلا عشان هذا كله ؟
الهنوف : انا تعطيني كف هذي الفصعونه انااا اااح يالقهر
نوال مو مصدقه انه غلا اعطتها كف وكانها تبي الهنوف تقول شخص ثاني : مين هي اللي اعطتك كف جعل يدها الكسر
الهنوف : يمى ايش فيك اقول غلا غلا اعطتني كف
نوال : غلا انتي متاكده انها غلا ؟
الهنوف بصوت عالي : ايه يمى ايه
نوال : جعل يدها الكسر قولي امين والله والله لاطين عيشتهم ولاخلي حياتهم حجيم ولا لاكرههم باليوم اللي عرفونا فيه
ليلى خايفه من كلام امها : يمى بس غلا ماعطت الهنوف كف الا عشان الهنوف قبل اعطتها كف
نوال تلتفت لليلى بعصبيه : الهنوف مو مثل غلا الهنوف سيدتها فاهمه حنا اسيادها وتاج راسها المفروض هذي لو نذبحها تموت وهي منزله راسها للارض
الهنوف : يمى خلاص كافي والله اني لاخذ حقي منهم مضاعف ولااسود عيشتهم واخليهم يكرهون انفسهم
على كلمة الهنوف دخل سعود بيته وسمع اخر كلام للهنوف
سعود : من هي يالهنوف ؟
الهنوف : وش هي اللي من هي ؟
سعود : هذي اللي تكريهنم بانسفهم
الهنوف : ناس اهانوا بنتك يبى
سعود : افا عاد اهانوا دلعوتي ماعاش من يهينك قولي لي من وانا اخذ حقك منهم الحين
الهنوف : لايبا هذي ابي اخذ حقي منها واتلذذ بتعذيبها
سعود : طيب من هي ؟
نوال : بنت اخوك غلا تخيل تطاول عليها وتضربها كف
سعود عصب وقرب منها وشاف اثار الكف
الهنوف : لاوبعد اللي شجعها اخوها المحترم فيصلوه وفوق هذا كله مجرجر احمد موديه للسجن
سعود تركهم وخرج من البيت معصب وهو ناوي شر على غلا وفيصل
بمكان اخر وبشخصيات اخرى
نواف توه داخل القصر وبوجهه ابوه المشلول اول ماطاحت عينه بعين ابوه نزلت دمعه من ابوه وهو تقريبا
صارت دموع القهر والضعف عاده بابو نايف من اللي شافه بتسألون ايش شاف ابو نواف ؟ لاتخافون بتعرفون باحداث الرواية
نواف سلم على راس ابوه : يبى الا دموعك والله انها تعذبني كل يوم وكل لحظه من اشوفها لكن والله والله يابو نواف ياللي وصلك لهذي الحاله لاخليه يعظ اصابعه قهر وندم والله لادمر
عائلتهم كلهااااااااا فرد فرد واخليهم يتمنون على الاقل يصيروا على هذا الكرسي المتحرك ولا يعيشون العذاب اللي بعيشهم فيه
ابو نواف يناظر نايف بعيون الحزن وبعيون الخوف على ولده ويتكلم كلام متقطع طبعا بسبب حياة نواف اللي مع ابوه نواف يفهم كلام ابوه على طول عكس غيره
طبعا بجيب الكلام على طول لاني ماتقن التعتعه بالكلام لانه ابو نايف اخذ فتره مايتكلم وماقدر سنين : ياولدي اترك هذا الحقد سلطان وعائلته ناس ماتخاف الله انت اللي باقي لي من الدنيا هذي مابي افقدك انا ماتحمل صدمه ثانيه فيك ياولدي
نواف : لاتخاف عليه يبى ماراح اسوي اي شي يضرني راح العب فيهم واحد واحد ولو اكتشفوا اللعبه اوعدك اني بختفي عن انظارهم
ابو نواف : ياولدي انا على قد شطارتي مكري بالتجاره الا اني ماقدرت على سلطان وانت الحين عظمك طري صعب عليك سلطان صعب
نواف : يبى سلطان له اعداء كثير وانا ببحث عن اشخاص مروا بنفس اللي مرينا فيه وانا بطمنك يبى انا بحثت عن سلطان وشغلات سلطان وطلعت اشياء كثيره مختفيه وغامضه
ماعرفت افسرها لكن اللي عرفت افسره هو طريقة تفكير سلطان صدقني يايبى سلطان باذن واحد احد مابيقدر عليه ولا بيقدر يهز شعره وحده من راسي واذا
انت تتكلم عن سلطان سلطان مايسوي كل شي لوحده سلطان يسوي الشي هذا بالتعاون مع عائلته
ابو نواف نزل راسه وهو يبكي : الله يهديك ياولدي الله يهديك
راح ابو نواف تفكيره لكم سنه ورا فتح باب المكتب عند سلطان بقووه
سلطان قام من مكانه : انت من سمح لك تدخل المكتب ؟
ابو نواف : انت ايش سويت انت ماتخاف ربك
سلطان : ابو نواف تراك بمكتبي واخاف ربي او ماخافه اعتقد هذا شي مايخصك وانا ماسويت شي اللي بيننا تجاره وانت خسرت
ابو نواف يتكلم بعصبيه ويده على مكتب سلطان : وعلى بالك خسارتي اللي تسببت فيها بتخليني على بساط الفقر انا تاجر يسلطان تاجر واعرف كيف اخرج نفسي من الخساره لكن الل صار انه انت قسمت ظهري باللي سويته احرقت اكبر المصانع بالشركه
في هذي اللحظه محمد صادف ابو نواف بمكتب سلطان وقاطع ابو نواف
ابو عبدالعزيز : هي انت لاتتبلى علينا روح اخرج من هنا لاتخليني ابلغ عليك واقول متهجم علينا
التفت ابو نواف لابو عبدالعزيز ودموعه بعينه
ابو نواف : انتم انذال انتم مو بشر عشان تخسرون شخص مستعدين تروح ارواح الحين مبسوطين راحوا ناس بالحريق وراحت زوجتي زوجتي مديرة القسم راحت بالحريق اللي يحرق قلوبكم على اعز ماتملكون الله يجعلني اشوف حرقة قلوبكم على اعز ماتعزه قلوبكم
هذي الكلمة هزت عبدالعزيز شوي لكن سلطان مثل العاده ماهمه اي شي واقف ببرود
سلطان : واكيد الحين خساره صفقه وخساره اكبر شركة بالمصنع وفوق هذا بتصير فيها تعويض عن اهل الاموات
ابو نواف : حسبي الله عليك هذا انت عارف انه التامين انتهى وكنت مخطط تسوي خطتك عشان الخساره انا اتحملها مو التامين لكن اللي راح راح الي راح
سكت ابو نواف بعد ماحس رجوله ماتشيله قرب منه ابو عبدالعزيز بيمسكه ويجلسه لكن سلطان مثل العاده بدون رحمه قرب منه ومسكه وجره برا المكتب ورماه مثل الدميه وابو نواف طاح بالارض مثل الجثه
ومن وقتها ابو نواف جاته جلطة وبغى يموت اخذ سنه كامله بالمستشفى وخرج مشلول على كرسي متحرك
اما الخساره لان ابو نواف عادته يحب الخير احبابه كثير ساعدوه لحد ماراحت ديونه ومنها فتح نواف شركة صغيره على صغر عمره وبمساعدة بعض التجار اللي يحبون ابوه قدروا يساعدنه بصنع اسمه وتكوين ثروه خاصه فيه
نروح لعائلة حمد صديق يوسف
ابو حمد : 54 سنه توفت زوجته ام حمد وبعدها بكم سنه تزوج غاليه ( ام ناصر )
ام ناصر : صغيره على ابو حمد عمرها 32 سنه
حمد : 25 سنه
روان : 20 سنه
ابو حمد سرحااان ويتامل ببنته اللي تناظره وحاسه انه ابوها شاغله موضوع مهم لانها الاقرب لابوها
روان اخذت بالها من ابوها اللي سرحان ويفكر بشي تطلكت وهي مبتسمه : هي يبى وين وصل تفكيرك
ابو حمد : ابد يابوك معك مارحت بعيد بس شوية مشاكل افكر فيها
روان : عسى ماشر يبى اي مشااكل ؟
ابو حمد : لاوانا ابوك مشاكل بالشغل لاتشغلين بالك فيها
روان بمزحه : ايه على بالي لقيت لي عريس من هنا ولا هنا
ابو حمد يضحك على اسلوبها وكلامها ويسوي نفسه معصب :هي يابنت استحي على وجهك من متى البنات عندنا يسألون عن عرسانهم
روان : انا ادري عنك يبى عاد من اول وانت تناظرني كانه فيه احد من هنا ولا هنا
ابو حمد : الله ياروان متى يجي اليوم اللي اشوفك فيه عروس وافرح فيك واشوف عيالك قبل مايااخذ ربي امانته
روان : يبى الله يخليك لاتتكلم كذا انت عارف اني ماحب السيره هذي
كملت بمزح : وبعدين من شوي تتكلم وتقول عيب البنت تتكلم عن عريس وماعريس تجي الحين بتعميها واذا انت مستعجل على الفكه مني بحط اعلان بالجريدة بنت حلوه تبحث عن عريس لان ابوها يبي الفكه منها
ابو حمد : هههههههههه عاد لاتفسرين من عندك انتي الثانيه انا قلت بفرج فيك مو افتك منك
روان : ايه هذا ابو حمد اللي نعرفه ضحكته ماليه وجهه وش زينها الله يخليك لنا يارب
ابو حمد : امين يابنتي ويخليك لي انتي واخوانك الا يابنتي نسيت ابلغك فيه توكيلات ابيك تسوينها لي لزوم الشغل
روان : يبى الله يخليك انا قلت لك خلي كل شي بسمك او باسم حم وبلاشي من اوراق وماوراق
ابو حمد : لا يابنتي مابقى بالعمر اكثر من اللي راح انا وراي عيال وحمد اخاف ينشغل عنك مع الوقت ويمكن يجي يوم هو الثاني ويتزوج والاعمار بالاول والاخير بيد الله مادري انا اموت قبل او انتي او اخوك حمد ولو بقى شي باسمي او باسم حمد ماحد يعرف انه لك
روان دمعت عيونها : بعد عمر طويل يبى
ابو حمد حضنها : جعل عيني ماتبكيك يابنتي
فجاه دخل حمد وهو توه مقفل جواله ويتنهد
ابو حمد رفع راسه له
ابو حمد : سلامتك ياولدي علامك تتنهد كذا
حمد : يوسف توفت امه وبيستقر هنا خلاص
ابو حمد : لاحول ولاقوة الا بالله الله يرحمها ويدخلها فسيح جناته ومتى ناوي يجي
حمد : مادري بس طالب مني اشياء غريبه واشياء صراحه تخوفني عليه
روان : انت تشغل نفسك فيه وهو تلقاه مو شايل همك
حمد : وانتي ايش عرفك فيه وهو صاحبي ولا صاحبك
روان : دافع دافع عنه انا والله من كثر كلامك عنه احسه انسان بارد ممل يجيب الطفش ويرفع الضغط و
حمد : بس بس بس اكلتي الرجال وهو مو فيه اجل لو كان فيه ايش بتسوين
روان : واقول لك بعدين حتى لو جا لاتقولي لاني بعرف
حمد يناظرها بنص عين : وكيف بتعرفين ؟
روان : بسيطه الدنيا تظلم واشعر باحساس الملل لانه بيني وبينك صاحبك هذا يصيب الناس اللي قريبين منه بعدوى الملل والقلب البارد
حمد : ها ها ها جبتي هرجه انتي ووجهك اقول روحي لافقع جبهتك بالارض
ابو حمد يناظرهم وهم مبتسم يعجبه احيان نقاشهم وهم يهاوشون بعض بشقاوه ويعدبه حبهم لبعض
ابو حمد حب بنهي هذا النقاش : اقول ماتشوفون انكم كثرتوها وصدعتوا راسي
روان حبت راس ابوها ومسكت يده : شوف يبى انا بقول لك شي من زمان انت ماتعرفه
ابو حمد : ها قولي وش هو هذا الشي
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك