رواية للقلوب معارك -2
طلعت امايه ....مسكت ايده ويلست اضربه بخفه ..: كااايد قوووم
تقلب ...فج عيونه الي صاايره حمرااا ...التفت وجفت درج من الطاوله الي عدال كرفايته مفتوح ...ياني فظول اطالع شو داخلها ...بس فاخر لحضه قال : شو مدخلنك غرفتي ؟؟
طالعته وقلت: امايه تبانا تحت يلا قوم ..
قال : اووه هذا وقته
قلت : يلا تراني طلعتها من غرفتك بالغصب ...وبعدين شو هالغرفه الوصخه ...يا اخي جوف المكان عدالك ...نعلانك مفرره ...اللحاف على الارض ...التلفزيون مشغل وانته مخلنه جيه ...اربع تلفونات على الطاوله الي عدالك ...شو هالجو الي انته راقد فيـــــــــــــــــهـ ..بس احلى شي التلفزيون مقصر على الصوت اخر شي ...
طالعني ...رد تلحف ...ضربته : قووووم
روضه
اندق عليـــــــــــه الباب ...فتحت عيوني بالغصب ...شكلي رقدت وانا اصيييح ...قلت : ادخل
دخلت البشكاره وقالت : مدام كبير يريد انتي تحت عند المسبح
طالعتها وهزيت راسي ...صدرت اوامر صاااحبه الجلاله ...نزلت بالبجامه القصيره الي للركبه ...ادري انها بتهزبني ...هذا هب منظر بنت او على قولتها ليدي ...اوووف ...نزلت ورحت عند المسبح ...الجو بااارد ...تنفست براحه...جفت مروان يالس يلعب بتلفونه ...يحليله
رحت صوبه : مروان ...
طالعني ورجع يطالع شاشه موبايله ...قلت : امااايه بعد يابتك هنييه
قال بدفاشه : هيه
حشى ...التفت وجفت عبدالله نازل ...والله هذا شيخهم كلهم ...رحت صوبه ..قلت : وانته بعد ؟؟
ضحك : شو اسوي ...
قلت : بااقي كااايد وآحمد
قال : لا تحاتيين كااايد الحيين بينزل ...اما آحمد ما ادري عنه شي
قلت : ابويه رجع من الشركه ؟؟
قال : لا ....رويض ليش هالاجتماااع ؟؟
قلت : ما ادري
قال : انتي ما منج فااايده طووول
ضحكت عليه : عبدالله حرااام عليك روحي مضااايجه
طالعني وقال : شو فيها اخت اخوها ...اه شو فيها ؟؟
قلت : اماايه رفضت اروح المول ...ابا اروح
اشر على عيونه: انا بوصلج..وبنزل وياااج شو تبين بعد
قلت : لا لا ما فيني على امايه ...انته تروم تتفاهم وياااها انا ما اقدر اخاااف
قال : على مسؤليتي ..
التفتنا ونحن نجوف كاايد الي نازل ...كاسر خاااطري حاله ...
قلت لعبدالله وانا اجوفه يطالع كاايد بألم : شخباره الحييين ؟؟
قال :ما ادري شو اقول .........
طالعت كااايد الي فر عمره على الكرسي ...شكله متغير 180 درجه...التفتنا على صوت ضحك آحمد وامااايه
كايد
نزلت وانا اسحب عمري ...عادي امايه تقتحم عليه الغرفه ...يلست وصرخت على الخدامه
: ميري ..ميييييييري وصمخ...هاتي قهوه نسكافيه اي شي راسي بينفجر
راحت الخدامه تركض التفت على اماايه : كااااايد لا تصااارخ جيه عنبوه ...
تاففت فخاطري ...تعاملنا شرات اليهال ...قلت : شو سبب الاجتمااع السعيد ؟؟
طالعوني كلهم ...كيف جيه ارمس امايه...التفت وطاحت عيني على قسمي (جناحي ) الي كنت ساكن فيه ايام منى ...قلبي عورني ...ما اقدر ايلس مختنق ابا انسى كل شي
انتبهت على صوت امااايه : سمعوني اليوم خالتكم ام هاادف بتي عندنا اناعازمتنها على العشاء ...حركاتكم وبلاويكم ماابا اجوفها اليوم ...كلكم تنزلون وتقعدون ويانا
التفتنا كلنا على الكرسي الي دزه عبدالله وطلع...وامايه تصااارخ عليـــــــــــــــــــــــــه ....قمت راسي بينفجر .,,طلعت ..هب متفيجين لخالوه ...طلعت على الدري وانا اسمع صوت باب عبدالله الي سمعوه من الطابق الاول ....يعيبني يوم يتمرد على امااايه ...
شمسه
طلعت من المطبخ بعد ما سويت العشا ...رحت صوب عليوه الي يالسه على الارض وتجوف مسلسل رقيه وسبيجه ...اندق الباب قلت : قومي روحي فتحي الباب
قالت : لا والله انا اجوف المسلسل روحي انتي ...
امايه : انا بروح
قلت : لا امايه يلسي انتي ....
طالعت عليوه بنظرات وقمت ...وانا اقول : ما عليه مره ثااانيه بتفاهم وياااج
فتحت الباب وانا معصبه ...انحرجت وانا اجوف طاارق ماسك ضحكته ....قال : شحالج شمسه
بلعت ريقي ...ليش منحرجه هالكثر ...لانه خطبج يا لغبيه ...اكيد سمعني وانا اصارخ على عليوه السباله ...
قال : بوقف وااايد
قلت : سمحلي ...تفضل
دخل والابتسامه على ويههه ...غاظني ..عطيته ظهري بروح ...قال : شمسه ..
لفيت يالله خلني اروح ...قال : سوري ما قصدت اليوم اضايقبج فالشغل
قلت : لالا اانا الي كان اسلوبي غلط
طالعني بتامل ...ما عرفت شو اسوي ...نقزت متروعه على صوت عليوه : طرووووق انته هني ؟؟؟
طالعتها ...كانت لابسه شيله البيت ....قالت : بلاكم جيه واقفين فالميلس ...والله حاله
غمزت بعينها ...كان خااطري اقوم اذبحها ...طلعت بسرعه وانا اسمعها تضحك ويا طااارق ...نحن متعوديين عليه ...هو الي يخلصلنا واااايد من الامور ...وعليوه دوووم تتغايض وياااه ....دخلت الغرفه وانا احاول انظم دقات قلبي ...ابتسامته تذبحني ....تذكرت كلام عليوه (( شو تبين بعد هو يحبج ...وسيم ..حليو ...يشتغل ...وامه بعد تباج لولدها ...صدق انج بطرانه))
صدقها....ما جذبت عليوه يوم قالت هالرمســـــــــــــــــــهـ
جواهر
لبست وكشخت ...التفت وجفت غيث عند المرايا ...يعدل غترته ..ويكشخ ...اغااااااااااااااار يا ناس حد يفهمني ...رحت صوبه ...قلت : بس خلااااااص
طالعني وضحك ...قلت : بس غيث عبود مسوي صدعه يبا يروح المول
ما حسيت الا وهو يسحبني لحضنه ..ابتسمت ...قال : يا عيون غيث ...غيث ما يجوف غيرج ...
قلت : بس خاااطري ادخل صبوعي فعيون البنات الي يجوفنك
ضحك بقو ...سحبت عمري من بين ايديه ...وتعطرت وقلت : يلا
فتحت الباب ونزلت وانا اجوف عبود يالس على الكرسي ...ومؤدب اول مره جيه ...
قلت : عبود يلا نسير
قال : انزين وين حالي
التفتنا على غيث : يلا وصل حالك .((يعايب عليه )) ضحكت ....ورحنا وركبنا السياره ...خليته ورى وربطت حزااام الامان ....
قال غيث : هيه ما فيني يصير لك شي بتذبحنا لطيفه
ضحكت : حراااااااااام عليك يحليها ولدها الوحيييد
طالعني وحرك السياره ...شايل هم اخته ...وهم الناس كلها ...هالشي الي خلاني احبه ...طيبه قلبه وحبه للكل ..........
فالمول (عنـــــــــــــــد الالعااب )
ما شاء الله عليه عبود ...يالس يلعب وانا وغيث نراقبه ...ضحكت عليه يوم طاااح ...يلس يطالعنا ...وقف غيث يوم جافه يتظارب ويا ولد ثاااني ....وقفت وركضت صوبه ...
البنت : سلطان تعال ...عيب
مسكت ايده بقو ....قال : عموه نوره يظربني
مسك غيث عبود ...واعتذر من هذي الي اسمها نوره ...رحنا بيبي شوب ...شريت له البسه ...وهدااايا ...وغيث ما قصر ...على اخر الليل ...رحنا صوب بيت خالتي ...نزل عبود ...ويت الخدامه وشلت الاكياس ...حب غيث ونزل ..رحنا البيت ...اول ما وصلت كنت تعبانه ...خلاص حدي...دخلت الغرفه ...فريت العباه على الكرفااايه ...لحقني غيث ..
غيث : بخذ شور سريع وبطلع
فريت عمري على الكرفاايه اترياه يظهر ...تذكرت بعد وفاه ابويه وامايه بحاادث سياره,,,عشت ويا قوم خالوه.....واول ما خلصت الثانويه ملج عليه غيث ...انتبهت على صوت تلفونه الي يرن ..(( مســـــــــــج )) ياني فضول ...طالعت ساعتي الالماس الي هداني اياها غيث يوم عيد ميلادي ...الساعه 12 ...قمت ورحت صوب التلفون ..مسكته
سمعت صرخه : جواااااااااااااااااااااااهر
انتفضت ولفيت جفت غيث وهو يطالعني ومبين عليه العصبيه ...
قال وهو معصب : ليشت تتعبثين بتلفوني ؟؟
قلت : انا ....انا
يا صوبي وخذ التلفون بقو من ايدي ...سكرت عيني بقو وانا اسمع الباب يتسكر بقو...فريت عمري على الكرفااايه ...غبيه ...ليش سويت جيه ...اكيـــــــــــــــــــــــــــد زعل
روضه
طالعت الساعه ...باقي ساعه عن توصل خالتي وعيالها وزوجها...دخلت الحمام (عزكم الله ) خذت شور سرريع ....وطلعت ...تنوره جينز ...وبلوزه بيج ...رتبت شعري ......خليت كريمات على ويهي ...وجلوس ...وتجحلت بازرق...شعري اسود كثيف ... ...خليته كله على طرف وااااحد ...تعطرت ....الله يستر ...اكيد عبدالله ما بييلس ويانا ...انا متاكده ..لانه بعد ما تناقش ويا امايه ظهر غرفته بسرعه ...وجفته بعدين يركب سيارته ...انا ما الومه ...من حقه الي يسويه ....فريت عمري على الكرفااايه ...اليوم بجوفه ...مشتاقتله موووووووت
آحمد
طلعت بسرعه غرفته امايه وانا اسمعها تصااااارخ ...دخلت : شو صااااااير ؟؟
قالت وهي تفر كوب المااي الي فايدها : اخوك عبدالله ....
نهايه البارت
البارت الثاني
{ مٌنقذي ...!
أنتِ سـر سأكتمه ،
لان إفشاءهُ يعني نهايتي .. مَحبوبتي ..!
طلعت من البيت وانا مضايج ...افكر فكــــــــــــــــــايد ...اذا كان مدمن ...شو بسوي ...مسكت راسي ... ..طلعت من البيت وانا اسمع صوت صرااخ امايه وآحمد يهديها .. تباني ايلس ويا خالوه وعيالها..كيف ايلس وياهم وهيه عارفه كل شي ...عارفه اني ما احب قعدتهم ..وهيه تعرف السبب ...شغلت الراديو على الاذآعه...سمعت الاعلان ...(( قد تنصدم بادمان شخص عزيز عليك ....فلا تهمل الموضوع ...بل اذهب الي مراكز علاج الادمان........)) بندت الراديو ....ليش انا ما فكرت اسوي جيه ....سمعت هرن وراي ...الاشاره صااارت خضرا ...لفيت فالشوارع ...لحد ما وقفت عدال احد المراكز الخاصه المعروفه لعلاج الادمان ...وقفت سيارتي ونزلت ...دخلت المركز وانا اجوف السكيورتي على الباب ...المكان راقي ونظيف ...رحت صوب الرسيبشن ...
قلت : لو سمحت ابا اجوف اي دكتور يقدر يساااعدني
طالعني ...وبعدين قال : بجوف جداول الدكاتره اذا فيه اي حد فاااضي
طالعته ...شو بعد حد فاضي انا مستعيييل ....يارب اكلم اي دكتور ...التفت وهو يقول : من حضك احسن دكتوره عندنا ..الحين بيخلص دوامها ...بس تقدر تلحق عليها فالمكتب الي فالدور الثاني ...ثاني مكتب على ايدك اليمين
طلعت صوب الاصنصير....ضغطت على الطابق الثاني ...حرمه...ما اثق بالحريم ...وكيف حرمه تعالج مدمنيين ... امري لله ...بجوفها ...وبعدين بقرر ...وصلت الطابق الثاني ...مريت عدال اول مكتب ..(( الدكتور محمد الـ......))....لا ..الي فالرسبشن قال المكتب الثاني ...وقف اقرا اسمها (( عذراء الـ.........)) تقربت من الباب ودقيت ...كنت متردد ....كنت بروح ...بس سمعت صوت رقيق : ادخــــــــــــل
فتحت الباب ...انصدمت شكلها متوقعه حد ثاني ...قلت : ممكن اتكلم ويااج دكتوره
طالعتني وابتسمت ....شكلها طيبه ورقيقه ...وهذا غير انها حلوه ...قالت : تفضل
يلست على الكرسي جدامها ...قالت : خير اخوي ...محتاي شي ...في خااطرك شي...؟!
طالعتها ...اسلوبها يشجع ...قلت : هب انا راعي المشكله...
ابتسمت : هب مهم منو صاحب المشكله ....بس بما انك هني فاكيد عندك موضوع والا شو رايك ..!
خف التوتر ...قالت وهي تضحك : سمحلي شو تبا ...شاي ..قهوه ...
قلت : لا شكرا
قربت مني علبه شوكلاته فاخر : تفضل
خذت الشوكلاته ...ما حبيت اردها ....قلت : صااحب المشكله اخوي
هزت راسها تباني اكمل ...قلت : عندي شك انه مدمن
طالعتني ...: وكيف حسيت انه مدمن ؟؟
قلت : تصرفاااته ...احس بهالشي ..ومن شغلي وانا اجوف اشكاال والوان ...حسيت بهالشي ...واهلي بعد
قالت : عفوا ...بس شو مجال شغلك ؟؟
رديت : انا ضابط فالشرطه ...
قالت : انزين...اخوك قريب منك ؟؟
قلت : هيه اقرب اخواني لي
قالت : خلاص ...حاول تتقرب منه اكثر ...واذا اعترف لك ..راجعني ...لان اذا انا يت وقلتله ابي اعالجك ...ما بيرضى وبيعاند ...ونص العلاج من المريض نفسه ...اباك تخليه يصارحك ...وبعدين تعال والباقي عليه ....ولا تخااف ولا تحاااتي ...مرحله وبتمر
قلت : دكتوره...كيف اتاكد ؟؟
قالت : من ايده ...اذا فيها علامات الابر ...واذا كان ما يستخدم الابر ...بتلاحظ من خلال جسمه الي يضعف ...احيانا تحسه هب وياااك ...غير انه اتيه فترات يهلوس
تذكرته يوم يطرا منى ...ويتحسب انها وياه فالغرفه...قلت : دكتوره ممكن رقم مكتبج
عطتني الكرت ...وطلعت من عندها ...وانا ناووي اساعد كااااايد ...دقيت تلفون لآحمد : الو
آحمد : هلا والله
قلت : قوووم خالتك عندكم ؟؟
قال : هيـــــــــــــــــه
قلت : وكااايد موجود ؟؟
رد : لا
قلت : اوك يلا اجلب ويهك
قال : بترجع البيت
قلت : لا
وين راح كااايد ...مسكت تلفوني ودقيت على كل تلفوناته ...ما يرد ...قلبي مثل النااار عليه ...كااايد وايد يعنيلي ..انا بالتحديد ...ساعدني اطلع من اكبر مشكله فحياتي ...ولازم اساعده هو محتايني ...
روضه
ربعت صوب البلكونه وانا اجوفه نازل هو وطيف ...شهقت يوم جفته ...حطيت ايدي على قلبي ...ركضت صوب المرايا ...لبست شيلتي بطريقه حلوه ...ونزلت ...كنت اركض على الدري ...صدمت بـ آحمد
آحمد: بلاااج مستعيله ؟؟
قلت : خالتي وصلت
طالعني وقال : انزين ما يحتاي تربعين جيه
طنشته ورحت صوب الصاله ...دخلت وسلمت على خالوه وطيف ...رحت صوب طيف
: شحالج حبيبتي ؟؟
قالت : بخييير وينج انتي من خلصت الكليه ما جفناااج
كنت فخاااطري اباه يشتاق لي ...بس حتى هو ما زارنا ..معقوله ما اشتاق لي قالت : وين رحتي؟؟
قلت وانا ابتسم: وياااج
ضحكت : ههههههه والله انتي هب وياي
التفتنا على صوت خالوه : عيل وين الشباب ؟؟!
امايه : عبدالله وكااايد طلعوا ...وآحمد احيين بينزل صوب الميلس ...عاد تعرفيين آحمد ما يصبر عن هادف
ااه لا تقوليين اسمه ...دخيلج يا امااااايه ...قلت لِ طيف : شو رايج نروح صاله الالعاب نلعب بليارد ؟؟
قالت : والله فكره ...يلا قومي
نزلنا صاااله الالعاب ...بدينا نلعب ...كنت مركزه على الكره البيضاء ...بس يوم سمعت ضحكته ارتبكت ..رفعت راسي وجفته هو وآحمد داااشين
قال : السلام عليكم ...شحالج روضه ؟؟
قلت : بخير شحالك انته هاادف
قال : بخيير
عصبت يوم لف على آحمد : شكلهن البنات يلعبن ...خلهن نحن بنرجع بعدين
عصبت انا ما صدقت اجوفك ...بطولك وعرضك وهيبتك ...رحت صوبهم خليت ايدي على خصري : لا والله وليش ما تلعبون ويانا ؟؟
طالعني آحمد ..: لا والله ...اقول جلبي ويهج انااااا العب وياااج
قلت : هيييه والا خيفان بنت تغلبك
ضحك : هههههههههههههههههههههههه
طالعت هادف ابا استفزه ..ابا يتقرب مني ...يحس فيني : وانته شرات ولد خالتك ما تبا بنت تغلبك ؟؟
طالعني بتحدي : ما عاشت ولا كانت الي تغلبني انا هادف الـ...........
رفعت حاجبي وقلت : الميدان يا حميدااااااااااااااااااااااااان
صفرت طيف : عااااااااااااشو ...يلا انا اشجع روضه
آحمد : وانا اكيييييييييييييييد هااااااادف
هادف : وااذا فزت ...بطلعكم مره كلكم وبعشيكم على حسابي
قلت : يلا
رحنا صوب طااوله البليارد ...تفديت فخااااااااااطري كاااااااااااااايد ...هو الي علمني عليــــها ...وكنت دووم اتحداه ...ومنى الله يرحمها تشجعه...وكل ما يطيح كوره تبوسه على خده ...ابتسمت بحزن ...شو الي يالسه اسويه ...يلا بنبدا
،،،،
فشقه مشبوهه ...بنات ...شباب ...حشيش ...مخدرات ...دعاااره...موسيقى هااابطه ....رقص ...فهالمكان الي بعيد عن شخصيته ...بعيد عن قناعاته ...بعيد عن وضعه الاجتماااعي ...يحتقر نفسه كل ما يدش هالشقه ..ما يطالع البنات لانهن ما يهمنه ...اهم شي الكيـــــــــــــــــــــــــف ....اهم شي يضبط مـخه ...اهم شي ياااخذ هالماده الي تريحه ...هيه ...هذاااااااااا كاااااااااااااااااااااايد ....
كااايد
ما ابا اكون فها المكان ...بس مضطر ...جسمي يصرخ يبي المخدر ...احس بخلايا جسمي تتشنج ...يلست فالصاله ..نزلت راسي بعد ما جفت حركااات خليعه ...صوت الموسيقى فكل مكان ...وينه هذا ...كنت ارتجف ...يا صوبي حسن
قلت : وين المخدرات ؟؟
قال : الفلوس قبل
فريت عليه فلوس وااايد حتى ما حسبتها كم ...فر عليه المطلوب...طلعت من الشقه ..ركبت السياره مستعيل ...طلعت الابره ...ربطت على زند ايدي ..خليت المحلول المخدر فالابره ..قربتها من ايدي ....غمضت عيني بقو .....تنفست براحه بعد ما دخل المخدر لجسمي ...ارخيت راسي على كرسي السياره ....خلاص احس براحــــــــــــــــــــــــــــــــــــــه الحيــــــــــــــــــــــــن.. أبا انسى كل المشآهد الجديمه , الله يسآمحج يا امـآيه , الله يسآمحج ,
حرقتيها وحرقتي قلبي عليهـآ ...!!
غيث
ضربت بالباب وظهرت من الغرفه ...ابا افهم ليش تشك فيني ...ما شي ثقه عنبوه ...فريت عمري على كنبه الصااله ....غطيت على ويهي ...معصب ما ابي اجوفها اذا جفتها برتكب جريمــــــــــــــــــــــــه
مسكت التلفون ...قريت المسج (( غيث حبيبي اترياك باااجر ....وبسويلك الاكل الي تباه ...تصبح على خير )) ...تنهدت ...يالله يا جواهــــــــــــــــــــــر ....تشكين فيني ...ليش ...ابا افهم ...سمعت صوت الباب ..غطيت على ويهي
سمعت صوتها وشكلها صايحه : غيث
ما رديت عليها ..
قالت بصوت متقطع : غـــ..يـــث ...انا ...اســــــــ....فـــه
قمت ايدي وطالعتها وهي واقفه ...دق قلبي بقو وانا اجوفها ...قمت ورحت صوبها ...وقفت جدامها ..قلت : اخر مره
هزت راسها : هيــــــــــــ...ــــه اخر ..مـــــــ,...ــــــره ..
مسكت ايدها وحبيتها : والله ما اجوف فالدنيا غيرج ...جواهر عيوني ...ابا احس انج واثقه فيني ...
قالت : خلاص ..ان شاء الله
مسكتها من ايدها ودخلت وياها الغرفه ...مهما سوت انا احبهـــــــــــــــــــــا ...بنت خالتي ...اصغر عني بوايد ..7 سنين ...بس احبها ..تعلقت فيها من يوم صغااار ..بس من يوم تزوجتها وهي على هالحـآل , ما اعرف شو السبب , تحسسني انا وآحد صآيع ضآيع همه الوحيد البنات , اقل تصـرف اسويه تشك فيني , محآصرتني في كل تصـرف , ابا حريتي , اعرف اني متزوج , بس انا اتضآيج من تدخلها في كل صغيره وكبيـره , اطفر منهـآ , الله يهديهـآ
روضه
بدينا نلعب ...ولا مره حسيت انه مهتم لوجودي ...ولا مره حسيت انه يطالعني بنظرات حب ...بس بعدني احبه ...ليش جيه انا ...والله تعبت ..ما قدرت اركز فالكور...وبالتالي هو غلبني ...طالعني وقال : لا تتحديني مره ثااانيه
سكتت ...ما ابا اتحداك ..اباك تكون لي انا بس ...بس عمرك ما بتحس ..مسكتني طيف من ايدي وقالت : نحن بنطلع الحديقه يلا
آحمد : فكه من صدعتكن
طلعنا ...تنهدت واانا احس بالجو البارد ...ارتجفت...احب فصل الشتاء ...التفت على صوت طيف : وين عبدالله ؟؟
يحليلج يا طيف ..دوم البنات جيه فالعايله يحبن شخص ما يحبهن ...انا وانتي ..
قلت : طيف ...لا تسالين عنه
طالعتني وقالت : صدقج ...بس مهما كان هذا ولـــــــــــــــد خالتي
طالعتها وقلت : ولد خالتج ما سوالج قدر ...وراح يبي يخطب وحده فقيره منتفه وبيودرج انتي الي محيره من يوم كنتي ياهل له
حسيت عيونها انملت بالدموع ...شو قلت انا ...قالت بصوت يرتجف : برايه ...انا ما اباه
قلت : لا تنكرين ...مبين فعيونج ...صح امايه هددته اذا خذ هالبنت بتتبرا منه ...وابويه ويا امايه طبعا ...صح هو ودرها ...بس عبدالله بعده يحبها
قالت طيف بعصبيه : بس البنت تزوجت
قلت : هيـــــــــــــــــــــــه ادري ...بس عبدالله ما بياخذج غياض فامايه ...بياخذ اي بنت الا انتي فاااهمه
طالعتني وقالت : ودامه هو ما يباني فانا ما اباه بعد ...والف وااحد يتمنى نظره مني
ودرتني ودخلت ...شو الي سويته ..الله يغربل ابليسك يا عبدالله ..انا شو دخلني بينكم ...صدق اني هبله ..هو فك عمره وطلع من البيت ..التفت وجفت سياره كااايد وقفت بس هو ما نزل ...خفت ...حسيت انه شي مستوي ...رحت صوب السياره ..فتحت الباب جفته...انصدمت ...شكله فاااقد الوعي ...تقربت منه
: كاااايد ...كااايد
تروعت يوم ما رد عليـــــه ...فتح عيونه ...حسيته يهاذي ...هب عارف هو وين ...خفت ...مسكته من ايده طلعته ..خليته يستند عليه ..كنت بصيــــــــــح ..احسني بطيح ويااااه ...صرخت وانا احس بثقل جسمه عليه ....خفت ..اذا جافته امااايه بتسوي مصيبـــــه ...دخلته من الباب الوراني ...فتحت الاصنصير وودخلته وياي وهو يترنح ...لا يكون شاارب شي ...لا ما اعتقد ...دمعت عيني ...حالته ما تسر ...انفتح الاصنصير ..ان شاء الله محد يجوفني ...وصلته غرفته بالغصب ...فر عمره على السرير وهو يقول كلام هب مفهوم ...مسكت تلفوني وانا ارتجف ...
: الحق علينا عبدالله ...كااايد ما اعرف شو فيه ؟؟؟
عــــــــــــــــــــــــذاري
طلعت من المستشفى ...المستشفى حياتي ...المرضى متعلقه فيهم بشكل غير طبيعي ...ركبت سيارتي ...طالعت الساعه ..1 فالليل ...غيث بيسوي سالفه لو درى ...دووم يقولي اذا عندي دوام فالليل اتصله وارجع وياه...بس ما احب اعبل عليه ..حركت السياره ..الشوراع مليانه ناس ...باجر الجمعه ..اجازه...اوه يعني غيث بيتغدى عندنا ...بسوي باااجر الحلو ...اما الطبخ الثاني على لطيفه ...ما ابي اعرس بعد ما جفت لطيفه وتجربتها جدام عينــــــــــــــي ...يحليلها صبرت عليها وفالاخير حتى الطلاق هب راضي يطلقها ....حتى عن عبود ما يسال ...وقفت السياره ودخلت البيت ...اهلي متفهمين...ما يرفضون شغلي وتاخيري ..دخلت البيت وجفت امايه فالصاله ...رحت صوبها وحبيتها على راسها
قالت : بغيت اطمن انج وصلتي
ابتسمت : يلا امايه روحي رقدي فديتـــــــــــــــج
رحت صوب غرفتي...دخلت اخذ شور ...وسالفه الي ياني اليوم المكتب شاغله بالي ...ابي اتاكد اذا اخوه مدمن او لا ..يا حبي لشغلي ..حتى فوقت راحتي افكر فيه ..ضحكت وطلعت من الحمام ((عزكم الله )) ..فريت عمري على الكرفااايه ابا انااام ابا ارتاااااااااااااااااااااااااااااح
عبدالله
بغيت اتخبل وانا اسمع كلام روضه ...سرعت صوب البيت ...دشيت بسرعه وركضت على الدري صوب غرفه كااايد ...الحمد الله اني دخلت من الباب الوراني ما فيني على الصدعه ...فتحت باب الغرفه وجفت روضه تصيـــــح ,,,رحت صوبها
: شو صاارر..؟؟
قالت : ما اعرف بس كاايد تعبان
لفيت وجفته نايم على السرير ..ما ابيها تنصدم فاخوها العود ..قلت : طلعي انتي الحين ..
رحت صوبه ,,عفدت على الكرفايه ...رفعت ايد قميصه ...مسكت راسي من الصدمــــــه ,,,لا ما اصدق ..كااايد مدمن ...دمعت عيني وحسيت بجسمي يرتجف بقو ...معقوله ..اخوي العود ..قدوتي ..مدمن ...وين كنا عنه يوم كان محتاي لنا ..وين ..وين كنت انا عنه يوم هو يعاني ..وانا يوم عانيت ..اول واحد لقيته ...هو ......مسكت راسي بتخبل ...كيف اتصرف ...شو اسوي ...يااااااااااااااااااااااااارب ...
تقربت منه ...حبيته على راسه ...تحت تاثير المخدر ما يحس فيني ...ما ببين له اني عرفت ...بحاول اتصرف ...طلعت من غرفته ....اول ما سكرت الباب ..مسحت دموعي ...رفعت راسي وجفت طيف جدامي ...نزلت عيني ومريت من عدالها
قالت : ما بتسلم عليه
قلت : شحالج طيف ؟؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك