رواية للقلوب معارك -1
رواية : وللقلوب معارك ..
للكاتبة وجه النهار ..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
البارت الاول
تجلبت في فراشي كذا مره ...تعبت من الدوااام ...بس والله مجبوره ...قمت وتسبحت وصليت ..لبست عباتي الي البسها من حوالي السنه ما غيرتها...حتى والله فشله بس شو اسوي ..لبست الشيله السادا الي ما عليه اي زخرفه او اكسسوار ..وظهرت الصاله ...نسيت كل همي واانا اجوف امايه يالسه ومخليه الريوق ...يلست على الارض عدالها بعد ما حبيت راسها
: صباح الخير اماايه
امايه بصوتها الي يرتجف : صباااح النور ...شمسه ..هاا بتروحيين الدواام ؟؟
قلت : هيه ..ما فيني اتاخر ..عن يخصم المدير من الراتب
حسيت امااايه عندها موضوع : امايه بلاج ...شي صاااير ؟؟
امايه : شمسه ابويه فواتير الكهربا من شهرين ما دفعناها ..اخافهم يقطعونهااا
سكتت ..اخر الشهر والراتب مخلص ..ما عندي غير 500 درهم اباها لاغراض البيت .
قلت وانا شايله الهم ..: خلاص امايه انا بمر علييهم بعد الدوام
امايه وهو تدعى لي : الله يوفقج ويحميج ويخليج ...ويرزقج بولد الحلال
ابتسمت ..: عيل وينها عليوه ؟
امايه : عليا راقده
هذي ما بتودر طبع الرقاد والكسل والاهمال ...قمت بوعييها حرااام امايه تيلس اروحها..قمت وانا اخلي سندويجه الجبن فالصينيه ...
امايه : وين رايحه حرااام خليها ترقد عندها اجازه
قلت : امايه لازم ادور لها شغل انا تعبت وهيه بس راقده وتتطلب ...
قمت وفتحت باب غرفتها ..جفتها وهيه نايمه على الارض ومتغطيه بشرشف والجو برد ...اووه نسيت اشتري لها بطانيه ...رحمتها ..سكرت الباب وظهرت ...شليت شنطتي وطلعت ...ركبت السياره...شغلت اذاعه القرآن الكريم ..سيارتي متواضعه خذتها بالاقساط ...وللحين اسدد الدين ...رفعت راسي وجفت طااارق يطالعني ...طارق ولد يرانا وزميلي فالشغل ...هو الي ساعدني اتوظف ...ابتسمت له ..وحركت السياره ...تبعني ..
كايد
دخلت قسمي الي فالبيت ...فريت عمري على السرير ..تعبااان ...سهرااان طول الليل ..فجاءه انفتح الباب بقو ...هذا اكيد عبدالله ...اوووف هب متفيج له الحيين انا ...
عبدالله : كااايد ...كاااايد
رديت : هممممم
قال : قوم الله يغربل ابليسك الحكومه برع ...ابويه وامايه فصاله الطعام ...لازم تنزل تتريق
قلت : ماابا
قال : لا ما فينا على الصدعه من الفير ..قووووووووووووووووم
قمت ...دخلت الحمام وخليت راسي تحت المغسله ...الماي بااارد ...شهقت ...رفعت راسي ..مررت اصابعي فشعري ..وقفت جدااام المرااياا ..يعني هم من امس ما يعرفون اذا نمت فالبيت والحييين بيسالون عني ...والله عايله متخلفه ...مشطت شعري ..طولان ...لازم اتحلق ...اوووف ..رتبت قميصي ما فيني على المحاظرااات من الصبح..تقربت من المرااياا وانااجوف السواد الي تحت عيني ...ونزلت ما احب هالبروتكولات على الصبـــــــــــح
دخلت اخر واااحد صاله الطعام ...عبدالله يالس على يمين ابويه...وعداله آحمد ...وعدالهم روضه ...والصوب الثاني مروان..وكرسيه فاضي ...وامايه مجابله ابويه
قلت : صبااح الخيير
الكل بصوت هااامس : صبااح النور
حشى هالخوف كله من ..امايه ..رحت وانا متافف صوب كرسيه ..ابا ارقد ...
اماايه : كااايد وين ناايم امس ..!
فريت قطعه التوست وسكت...اذا ناقشت بتصيير مصيبه ...
عبدالله
الله يستر ..كم مره نبهته ما يتاخر ...بس من 3 شهور وهوه على هذي الحااله ,,,اماايه سكتت وااايد ...صح انا مثله ما اهتم فالعايله ولا اعطي اي اهتمام لكلام امايه ...والبيت بس فندق ...بس اماايه متسلطه ...
ما رد عليييها ..قلت : انا بروح الدووااام
ابويه : يا هذا الدوام الي صادعنا فيه اقولك تعال الشركه ويايه
قلت : بس انا ما احب شغل الشركاات
رتبت دريسي (البدله العسكريه ) ولبست الجااكيت الاسود الي لركبه وظهرت ...بروح المركز ...ركبت سيارتي الرنج السودا ...احب اللون الاسود ..لانه يعبر عني ...شغلت الموسيقى الاجنبيه وتحركت
روضه
اووف ...لازم يعني هالرسميات على الصبح ...قمت من على الريوق ..بعد ما قام ابويه ..ومروان اخوي راح صوب غرفته .......طالعت يوسف
: أحمدوه ....امس شو تسوي فالمول ..
طالعني كااايد وقام وهو يدز الكرسي بقو ...حشى شو هالاخلاق من الصبح
امايه : كااايد ...كااايد
طلع من غير لا يرد على امايه ...محد فالبيت جيه الا هوه ..وعبدالله ...اما الباقيين وانا منهم ..ما نقدر نقول لامايه لا ...كاايد اخويه العود ...وبعده عبدالله ..وبعدين آحمد العله...ومروان اخر واااحد واصغرنا ..انا اكبر عنه ...
آحمد : وانتي شو دخلج ؟
قلت : بسك من ترقيم البنات ..خلهن فحالهن
قلدني وهو يعايب على طريقه كلامي ...اتكلم بدلع ..: خلهن فحالهن
قال : خليهن هن يودرني ...لو جفتيهن امس كيف يتبعني
صرخت امااايه : بس من هالرمسه الحييين
انتفظت انا وآحمد ...غمزلي ..واشر ان وقته الشرده ...طلعت من غرفه الطعاام ورحت فوق غرفتي ...
طارق
تبعتها للشغل ...دخلنا
قلت : صبااح الخير شمسه
قالت : هلا طاارق صباح النور
طالعتها ...حسيت انها مهتمه من شي ...بالها هب عندي ...دخلت المكتب وهيه راحت مكتبها ...غرقت فشغلي ...بس هيه على باالي ...طالعت الساعه 3 ونص ..الكل ظهر من الدوام الا الاشخاص الملتزميين ...يعني ينعدون على الاصابع ..طالعتها وهيه طالعه ..استغربت ولا مره طنشت ...ربعت صوبها
: شمسه ...شمسه
التفت صوبي : هلا طاارق
قلت وانا منحرج من اسئلتي الزااايده عن اللزوم : وين ..غريبه ؟؟
طالعتني ...قالت : بروح الكهربا ابا اسدد الفواتير
عسب جيه مضااايجه ...اكيد ما عندها فلوس انا عارف وضعهم ...صح وضعي قريب منها ...بس نحن احسن قلت : محتايه شي .......
قاطعتني وهيه معصبه : لا
روحت عني وانا وقف فنص الممر ...انا عارف ان نفسها عزيزه بس شو اسوي ..احس اني مسؤول عنها ...ومسؤول عن عايلتها...انا رمست امايه ..وخلاص هيه اليوم بتكلم امها عسب تخطبها لي ...
وعيت من الرقاد الساعه 1 الظهر ...اووف ما سويت الغدا ...تغسلت بسرعه ورحت صوب المطبخ ما فيني على صدعه شمسه ..دخلت المطبخ وبديت اقطع البصل والثوم ...متى الله يفرجها وافتك من هالبيت ..وياخذني وااااحد عنده فلوس ...وارتاح ...يلست اتخيل وسرحت بافكاري لحد ما سمعت صوت امايه تزقرني
طلعت بعد مالفيت شيله الصلاه على راسي
امايه : روحي جوفي حد يدق الباب
اوووه ...رحت وفتحت الباب جفت ام طاارق ..هذي شو يايبنها الحييين ...سلمت عليها
قالت : شحالج عليا ؟؟
رديت : الحمد الله تفضلي خالتي
ابتسمت وراحت صوب الصاله عند امايه ...دخلت المطبخ وكملت طباااخ .....بعد نص سااعه طلعت ام طاارق ...يرانا وناس طيبين وااااايد ...وطارق يحب شموس اختي بس هيه ما اعرف اذا تحبه ...بس انا احس انه يحبهاا وااايد ...شغلها وساعدها تقص الليسن (رخصه القياده) وهو انسان طيب ..وامايه تحبه وااايد ...ما عندي اخوان ...بس نحن الثنتين
طلعت ورحت صوب امايه ...الساعه الحيين 3 ...
قلت : هاه امايه شو تبا ام طارق ؟؟
ضحكت امايه: خطبت شمسه لطاارق
طالعتها ...شمسوه بتروح ..نحن بعدها نضييع ...قلت : صدق ؟؟
قالت امايه بفرح : هيييه ...
وطارق قال انه بيسكنها وياه فبيت اهله وبتكون جريبه منا ..وغير جيه راتبها ما بياخذ منه شي ....طالعت امايه...طاارق وااايد طيب ..
طالعت امايه الي سرحت : امااايه بلاج ؟؟
قالت : لا بس خاطري اختج توافق ...اخافها تقول لا
قلت : ما اضني ترفض ...هيه تحبه
امايه : بنت !!!!!
ضحكت ورحت صوب الحجره ...شغلت التلفزيون ...واخير بيصير عندنا عرس ...خليت على وحده من القنوات المحليه...ماشي عندنا دش ...اوووف ...كم مره قلت لشمسه ابا دش ...ما فيه شي بعد التلفزيون ..سكرته وطلعت يوم سمعت صوت امايه وهيه تزقرني...شو بعد الحيين ...حد يا يخطبني ..ضحكت ...وطلعت ...
جفت شمسه فويهي ...رحت اركض ولويت علييها : مبرووووووك
طالعت امايه : بلاها استخفت هذي ؟؟
ضحكت : ااه حب وغرام من ورانا ...
فتحت عيونها على الاخر :بلاج انتي شي شاربه ؟؟
ضحكت امايه : تعالي بخبرج السالفه تعالي شمسوه ... ..وانتي روحي غرفي الغدا ..وهاتيه ..ولاتنسين كيسه الدوا مالي ..
قلت : ان شاء الله
طرده محترمه ...طلعت ورحت صوب المطبخ ...
شمسه
وانا اسمع رمست امااايه ...تذكرت موقفي وياه اليوم...ما انكران طاارق له معزه خااصه عندي ...ما انكر ان له عوااطف عندي ...بس استعيل ...
سمعت امايه : سمعي يا شمسه انا ما برد ام طاررق ...وطارق مرمسني اروحه من قبل ...والريال يباج ..وهو قال الي تبينه بيصير
قلت : انا ...امايه
امايه مسكت ايدي بكل حنان : لا تحاتينا يا شمسه جوفي حياتج
قلت : وعليوه ..وانتي ؟؟
طالعتني امايه : انتي بتكونيين عدالنا
يلست افكر....انا ما بلقي احسن منه ..عاارفه انه عارف ظروفنا ويباني ..
انتبهت على عليوه وهيه ادش شاله الغدا ...: يلا نتغدا
بديت اتغدى ...وقمت بعدين دخلت الغرفه ..ورجعت طلعت ..صرخت : عليوه روحي السياره بتحصلين بطاانيه فالكرسي الوراني ...هاتيها لج
راحت تربع وهي تعدل شيلتها ...ادري انها كبيره بس احاتيها ...جفت امايه وهي تاكل ادويتها ..تذكرت اخر غيبوبه سكر يوم يتها ...ما عرفت شو اسوي ..اتصلت لطارق وهو وداها المستشفى ..محتايين ريال فالبيت ...تنهدت بتعب ...صليت ورقدت ...
آحمد
دخلت غرفتي ...بدلت ملابسي ..لبست قميص ازرق غامج ..وبنطلون جينز فاااتح ...عدلت شعري الي مطولنه ...لبست نظارتي الشمسيه وجفت شكلي : وتبا البنات ما يحبنك ؟
ضحكت ...تعطرت وظهرت صوب غرفه امايه ...اكيد ما بتردني انا دلوعها..انا الي لي كل الي اباه ...
دقيت الباب ..ومن دقتي عرفت اني انا ...قالت : ادخل
دخلت ..اول ما جفتها صفرت ...ضحكت ...قلت : شو هالحلاوه يا ام يوسف
طالعتني وقالت ..: فديتك وين بتتظهر الحيين ؟؟
قلت : ويا الربع
قالت : حراام عليكم حد يساعد ابوكم...عبدالله فالشرطه ..وكااايد من ثلاث شهور وهو حالته حاله...وانته بس تاخذ راتب ولك مكتب تركض فيه الخيــــــــــــــــول ..
رحت صوبها وحبيتها على راسها : فديتج والله ما احب الشغل ...امايه
امايه : هلا
قلت : ابا فلوس ...مفلس على الاخر
طالعتني وراحت صوب كبتها ..وطلعت من الكبت مفتاح الخزنه ...فتحتها وطلعت وهي تاشر : يسدنك لنهااايه الاسبوع فاااهم
قلت : هيييه اكييد ...كم ؟؟
طالعتني : 10 الالف
يالله حلوات ...قلت : امايه ابا بطاقه سحب شرات عبدالله وكااايد ...ابويه ينزل لهم اخر الشهر حتى رويض الي اصغر عني ينزللها ومروان بعد
طالعتني امايه .: انته نسيت شو مسوي حضرتك ...نزلك لشهر وخلصته فاسبوع
ضحكت : جربوني مره ثاانيه
قالت : ابوك كان ناوي يمنع عنك المصرووف ...بس انا تدخلت ...وهو ما يدري بكل هالفلوس بس يعطيك باليد بدايه الشهر ما ايدري انهن ما يكملن اسبوع ..
ضحكت وحبيتها على راسها ...جفتو واحد عمره 22 ياخذ مصرووفه من ابوه ...هيه انا ...عبدالله ما ياخذ يكتفي براتبه ما ادري كيف عااايش هذا ...وكااايد ما ادري عنه شي ...يطلع من بدايه الليل وما يرد الا نهايته وباقي اليوم راقد ..طلعت من غرفتي ..رحت صوب الصاله جفت مروان
: مروان قوم ادرس
قال : يا الخسف آجازه المنتصف
ضحكت وطلعت ...صدق اني خسف ...اووه نسيت سويج سيارتي ..طالعت الاصنصير ..مافيني اتريا ..طلعت بسرعه وانا اركض على الدري ...خطفت وسمعت صوت صدمني ..طالع من غرفه كااايد ...وقفت عند باب غرفته...لا الصوت من الغرفه ..
روضه
رحت صوب غرفه امايه ..انا مخلصه التقنيه ...واهلي اكيد ما بيخلوني اشتغل ...رحت صوب غرفتها ودقيت
ياني صوت امايه ..انتفضت ...بس مدلعه آحمد ...: ادخل
دخلت ورحت صوبها ...قالت : خير شو بلاج ..؟
بلعت ريقي : امااايه ابا اروح السوق ..اليوم طيف بتي عندي
طالعتني امايه : لا ماشي روحه
قلت : ليش ..؟؟
قالت وهي تصرخ : روضه يلاااا روحي غرفتج
حرااام والله كل البزا لهذا آحمد وانا لا...والله حرااااام ..رحت غرفتي سكرت الباب ويلست اصيييج ولا مره امايه حست فيني والا حتى يلست وياي تسولف شرات باقي الامهات ...
غيث
طلعت من الشركه وقت الغدا ....ركبت سيارتي ...اتصلت لجواهر
: الو
ردت: الو هلا غيث
قلت : حبيبتي ..انا بتاخر بمر على امااايه وبرجع بعدين البيت
قالت : لا حراااام ابا اروح وياك من زمان ما جفت خالوه
قلت : مره ثااانيه,,بس بسلم علييها وبرجع ...لا تتغدين عني
ضحكت : وانا اقدر
سكرت التلفون ...جواهر بنت خالتي ...متزوجنها من 4 شهور ...مرتاااح وااايد وياها ...ابوها وامها متوفيين ...وزوج خالتي وصاني علييها ...لفيت صوب بيت اهلي ...نزلت من السياره بعد ما صيحت هرن
دخلت الصاله ..لقيت امااايه ...سلمت عليها
اماايه : شحاللك الغالي عساك بخيير وشخبار جواااهر
قلت : انا بخير ..وجواهر زعلانه تبا تجوفج وانا مايبتها
قالت : الله يهديك ..لو يبتها بتتغدون عندي
ضحكت : مشتاق لطباخج ...ان شاء الله باجر بمر انا وياها
ضحكت : هههه مرحبابكم
قلت : عيل وين لطيفه ..وعذاري ؟؟
امايه : لطيفه فغرفتها ويا ولدها ...وعذاري فالمستشفى بعده ما خلص دوامها ..
قمت وقلت : بروح اسلم عليها
بعد وفاه ابويه احس اني مسؤول عنهن ...رحت صوب غرفتها ..فتحت الباب بس ما لقيتها ..اكيد فغرفه عبود ...
رحت صوب غرفته ...فتحت الباب وانصدمت بمخده تظرب على ويهي ...غطيت على ويهي وانا اسمع صرااااخ عبود ولطيفه ...يت صوبي تربع
: غيث تعورت ؟؟؟
سمعت صوت عبود : تعولت خالي
غطيت على ويهي وسكت ...حسيت به يقترب مني ..ويشد كندورتي ...نزلت بسرعه ومسكته وفريته فوق ..ورجعت امسكه وانا اسمعه وهو يصااااارخ
ضحكت لطيفه ...تقربت منها وحبيتها ...لطيفه طالبه الطلاق من ريلها ......متزوجه واحد من برع العايله ...بس طلع نذل...وهيه الحيين من شهرين فالبيت ...ولا سال عن الولد ..بس الحمد الله انه ما سال لان لطيفه بتتخبل لو خذه منها ...رحت صوبها ولويت علييها
قالت : شخبارك غيث ..؟؟
قلت : بخيير الحمد الله
قالت : عيل وين جواهر ؟
قلت : فالبيت ...باااجر بنتغدى عندكم
سمعت صوت ورايه : غيـــــــــــــــــــــــث
التفت وجفت عذاري وهي راده من المستشفى ...يت صوبي وفرت عمرها فحضني ...هذي دلوعتي ...
قلت : ما بسج من المستشفى ...ما تبين تقدميين استقالتج وترتاحيين فالبيت
كل مره اقولها هالكلام ...لاني اعرفها تغتاض ...ضربتي على جتفي : بس عااد غيث ...حرااام عليك
ضحكت عليييها ...
قلت : يلا انا بروح حبيبتي تترياني
ضحكن عليه...طلعت بروح واسمع صوت عبود يركض ورايه ...ولطيفه تهزبه : خالي ...ابا اروح الدكااان
كسر خااطري ...دوم ينشد عن ابوه ...ويسال وين ابويه ...جفت لطيفه اطالعه ...واداري دمعتها ...شليته وقلت
: بوديك احلى سنتر هب الا دكااان
قال : هيييه ..ابويه كان يوديني
قلت وانا احاول اغير الموضوع : بتي وياي عند عموه جواااهر
قال : هييه احبها طيييبه
قلت : يلا
غمزت لـ لطيفه وطلعت ....ورحت صوب البيت وانا كل سااعه اقول لعبود انه يقعد على الكرسي ..اخر شي نزلت وخليته فالكرسي الوراني ,,,لفيت وجفته مبوز ...حتى فبيتي له غرفه العاب ...كل العايله تحبه وتشفق عليييه
عبدالله
رجعت من الدوام على الساعه 3 الظهر ..دشيت البيت وجفت آحمد ...رحت صوبه ..فريت عمري على الكنبه
: شو ميلسنك هنيه
قال : راجع توني من المول
هزيت راسي ...لاحول ولا قوه االا بالله ...طالعني ..وقال : شو فيه اخوك كايد
طالعته وانا فاااج عيوني على الاخر : اخوي ...ليش هو هب اخوك ؟؟
قال : سمعني تراه اليوم سمعت صوت فغرفته ...حد يصيح او يتالم ...
وقف قلبي ...قلت : ودقيت الباب؟؟
قال : لا شو يخصني انا
طالعته معصب..: يا اخي انته ما فيك رحمه ..ما فيك قلب
قال : سمعني ...ان عندي شك ..صراااحه احسه يا مدمن يا مريض نفسيا
صرخت : هذا اذا انته تتكلم عن اخوك جيييه شو خليت لناس اه..؟؟
طالعني وقال : على العموم انا خبرتك وانته تصرف انا ما يخصني
عفدت عليه ومسكته من قميصه وقلت وانا ارص على اسناني : اذا سمعت انك خبرت امااايه بتجوف
شد عمره من بين ايديه...طالعني بنظره حاااده وروح ....واللعنه ...
طلعت اركض صوب غرفه كااايد ...بس انصدمت وانا اجوف امااايه رايحه صوب غرفه كااايد ...لو امايه حست بس انه مدمن ...اضني بتفره برع البيت ...محد حاس فيه ..
غمضت عيني وقلت : امااايه
التفت : عبدالله انته رجعت من الدوام ؟؟
رحت صوبها : هييه ....
التفت بعدها صوب غرفه كااايد ودقت الباب ...بلعت ريقي ...قلت : يمكن نااايم
طالعتني ...وقالت : اباه ضروري ...شو فيك انته واقف هنييه
قلت : لا ماشي
دقت الباب بقو ...وقلبي يدق اكثر ...لا ..ما ابا اجوف كااايد جيه ...ما ابا ...رحت صوبها وانا اجوفها فتحت الباب ...دخلت وراها ...مشغل التكييف ونحن فعز الشتاء ...والغرفه جوها كانها فالقطب الجنوبي ...راحت امااايه صوب الستاره وفتحتها ...دخلت الاناره فالغرفه كاامله ...التفت وجفت كااايد نايم بلبنطلون بدون قميص ...هذا ناوي يموت ....وغير جيه ...تحسه كانه جثه ..التفت وجفت برواز لصوره عداله ...التفت وانا اسمع امااايه تصرخ : كاااااااااااااااايد
ما تحرك ابدا ...رحت صوب الصوره...قلبتها وجفت صوره زوجته ....اماايه يلست اطالع ....توقعتها ترحمه وتظهر ...بس ابدا ...زادت صرااخ : كاااايد قوم اقولك
قال وهو فعز نومه : منى دخيلج بس ربع سااعه
انصدمت ...يتحسبها زوجته ...ما قدرت اوقف اكثر ....للحين كااايد منصدم من وفاتها ...للحين وهو يعاني ...
قلت : امااايه دخيلج خليه انا بوعيه
طالعتني : اباكم بعد نص سااعه كلكم تحت ....
قلت : ان شاء الله
طلعت امايه ....مسكت ايده ويلست اضربه بخفه ..: كااايد قوووم
تقلب ...فج عيونه الي صاايره حمرااا ...التفت وجفت درج من الطاوله الي عدال كرفايته مفتوح ...ياني فظول اطالع شو داخلها ...بس فاخر لحضه قال : شو مدخلنك غرفتي ؟؟
طالعته وقلت: امايه تبانا تحت يلا قوم ..
قال : اووه هذا وقته
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك